ᱰᱳᱰᱳ
ᱰᱳᱰᱳ ᱫᱚ ᱥᱤᱧᱚᱛ ᱢᱟᱦᱟᱫᱚᱨᱭᱟ ᱨᱮᱱᱟᱜ ᱫᱤᱯ ᱢᱚᱨᱤᱥᱚᱥ ᱨᱮᱱᱟᱜ ᱢᱤᱫ ᱴᱚᱴᱷᱟ ᱨᱤᱱ ᱪᱮᱬᱮᱭ ᱛᱟᱦᱮᱸᱠᱟᱱᱟ[᱑]᱾ ᱱᱩᱭ ᱫᱚ ᱪᱮᱬᱮ ᱛᱷᱚᱠ ᱨᱮ ᱢᱮᱱᱟᱭ ᱨᱮᱦᱚᱸ ᱪᱮᱬᱮ ᱞᱮᱠᱟ ᱩᱰᱟᱹᱣᱜ ᱨᱮᱱᱟᱝ ᱫᱟᱲᱮ ᱫᱚ ᱵᱟᱱᱩᱜᱼᱟ ᱾ ᱑᱗ ᱥᱟᱭ ᱥᱮᱨᱢᱟ ᱢᱩᱪᱟᱹᱫ ᱥᱮᱫ ᱛᱮ ᱢᱟᱹᱱᱢᱤ ᱠᱚ ᱫᱟᱨᱟᱭ ᱛᱮ ᱟᱹᱰᱤ ᱛᱮᱫ ᱠᱚ ᱥᱮᱸᱫᱽᱨᱟ ᱠᱮᱫ ᱠᱚ ᱠᱷᱟᱹᱛᱤᱨ ᱱᱩᱠᱩ ᱪᱮᱬᱮ ᱫᱚ ᱠᱚ ᱟᱫ ᱥᱟᱹᱨᱤᱭᱮᱱᱟ ᱾ ᱱᱩᱠᱩ ᱫᱚ ᱯᱟᱨᱣᱟ ᱪᱮᱬᱮ ᱛᱷᱚᱠ ᱨᱤᱱ ᱠᱚ ᱛᱟᱦᱮᱸᱫ ᱾ ᱱᱩᱠᱩ ᱫᱚ ᱥᱤᱢ ᱞᱮᱠᱟ ᱦᱚᱲᱢᱚ ᱛᱟᱠᱚ ᱟᱨ ᱩᱥᱩᱞ ᱫᱚ ᱢᱤᱫ ᱢᱤᱴᱚᱨ ᱜᱟᱱ ᱟᱨ ᱦᱟᱢᱟᱞ ᱫᱚ ᱒᱐ ᱠᱤᱞᱚᱜᱨᱟᱢ ᱜᱟᱱ ᱾ ᱱᱩᱠᱩ ᱫᱚ ᱚᱛ ᱨᱮᱜᱮ ᱛᱩᱠᱟᱹ ᱠᱚ ᱵᱮᱱᱟᱣᱳᱲᱫᱚᱳᱰᱟ, ᱟᱨ ᱡᱚᱢᱟᱜ ᱞᱮᱠᱟᱛᱮ ᱴᱚᱴᱷᱟ ᱨᱮᱱᱟᱜ ᱡᱚ ᱠᱚᱠᱚ ᱡᱚᱢ ᱵᱟᱲᱟᱭᱮᱫ ᱛᱟᱦᱮᱸᱫ ᱾ ᱰᱳᱰᱳ ᱫᱚ ᱥᱤᱢ ᱠᱷᱚᱱ ᱫᱚ ᱠᱚ ᱢᱟᱨᱟᱝ ᱜᱮᱭᱟ ᱞᱩᱫᱩᱵᱩᱫᱩ ᱢᱚᱴᱟ ᱥᱟᱹᱦᱤᱡ ᱟᱨ ᱩᱱᱠᱩᱣᱟᱜ ᱡᱟᱸᱜᱟ ᱫᱚ ᱦᱩᱰᱤᱧ ᱜᱮ ᱛᱟᱦᱮᱸᱫ, ᱚᱱᱟᱛᱮ ᱟᱡᱟᱜ ᱦᱟᱢᱟᱞ ᱦᱚᱸ ᱵᱟᱭ ᱥᱟᱢᱵᱽᱲᱟᱣ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱫ ᱾ ᱩᱱᱠᱩᱣᱟᱜ ᱯᱷᱟᱹᱠᱬᱟᱹᱜ ᱦᱚᱸ ᱟᱹᱰᱤ ᱦᱩᱰᱤᱧ ᱜᱮ ᱛᱟᱦᱮᱸᱫ, ᱫᱚ ᱩᱰᱟᱹᱣᱜ ᱞᱟᱹᱜᱤᱫ ᱫᱟᱲᱮ ᱵᱟᱝ ᱛᱟᱦᱮᱸᱭᱟ ᱾ ᱱᱚᱶᱟ ᱠᱷᱟᱹᱛᱤᱨ ᱛᱮ ᱩᱥᱟᱹᱨᱟ ᱦᱚᱸ ᱵᱟᱭ ᱫᱟᱹᱲ ᱠᱮᱭᱟ ᱟᱨ ᱩᱰᱟᱹᱣ ᱦᱚᱸ ᱵᱟᱭ ᱩᱰᱟᱹᱣ ᱠᱮᱭᱟ ᱾
ᱛᱷᱚᱠ ᱥᱟᱯᱲᱟᱣ
ᱱᱮᱵᱮᱛᱟᱨ ᱨᱤᱱ ᱡᱤᱵᱽ ᱥᱟᱬᱮᱥᱤᱭᱟᱹ ᱞᱮᱠᱟᱛᱮ ᱱᱩᱠᱩᱣᱟᱜ ᱧᱩᱛᱩᱢ ᱫᱚ ᱦᱩᱭᱩᱜ ᱠᱟᱱᱟ "ᱨᱟᱯᱷᱥ ᱠᱩᱠᱴᱟᱞᱚᱥ" ᱾ ᱮᱛᱚᱦᱚᱵ ᱨᱮ ᱡᱤᱵᱽ ᱥᱟᱬᱮᱥᱤᱭᱟᱹ ᱠᱚ ᱰᱳᱰᱳ ᱫᱚ ᱚᱴᱚᱪᱮᱬᱮ ᱟᱨᱵᱟᱝ ᱜᱤᱫᱤ ᱡᱟᱹᱛ ᱨᱤᱱ ᱪᱮᱬᱮ ᱠᱟᱱᱟ ᱠᱚ ᱢᱮᱛᱮ ᱠᱚ ᱵᱷᱟᱹᱵᱤᱭᱮᱫ ᱛᱟᱦᱮᱸᱫ ᱾ ᱢᱮᱱᱠᱷᱟᱱ ᱑᱘᱔᱒ ᱥᱟᱞᱮ ᱨᱮ ᱡᱚᱠᱷᱚᱱ ᱰᱮᱱᱢᱟᱨᱠ ᱨᱤᱱᱤᱡ ᱥᱟᱪᱟᱨ (nature) ᱥᱟᱬᱮᱥᱤᱭᱟᱹ ᱢᱤᱫ ᱢᱤᱣᱡᱤᱭᱚᱢ ᱨᱮ ᱢᱮᱱᱟᱜ ᱠᱷᱚᱹᱯᱨᱤ ᱡᱟᱝ ᱪᱮᱛᱟᱱ ᱨᱮ ᱵᱤᱱᱤᱰᱟᱹᱣ ᱠᱟᱛᱮ ᱡᱤᱵᱽ ᱥᱟᱬᱮᱥᱤᱭᱟᱹ ᱡᱚᱦᱟᱱᱥ ᱛᱷᱤᱭᱮᱰᱚᱨ ᱨᱟᱭᱤᱝᱦᱟᱨᱰ ᱱᱩᱠᱩ ᱫᱚ ᱯᱟᱨᱣᱟ / ᱯᱚᱛᱟᱢ ᱡᱟᱹᱛ ᱨᱤᱱ ᱪᱮᱬᱮ ᱠᱟᱱᱟ ᱠᱚ ᱢᱮᱱᱛᱮ ᱥᱚᱫᱚᱨᱞᱮᱫ ᱛᱟᱦᱮᱸᱫ ᱾
ᱦᱚᱲᱢᱚ ᱜᱚᱲᱦᱚᱱ ᱥᱟᱯᱲᱟᱣ
ᱡᱚᱠᱷᱚᱱ ᱜᱮ ᱰᱳᱰᱳ ᱣᱟᱜ ᱡᱟᱦᱟᱸᱱ ᱥᱟᱢᱯᱩᱞ (sample) ᱮᱢᱟᱱ ᱜᱮ ᱵᱟᱹᱱᱩᱜ ᱟᱱᱟ, ᱚᱱᱟᱛᱮ ᱱᱩᱠᱩᱣᱟᱜ ᱨᱩᱯ ᱟᱨ ᱜᱚᱲᱦᱚᱱ ᱨᱮᱱᱟᱜ ᱠᱟᱛᱷᱟ ᱜᱮᱞ ᱮᱭᱟᱭ ᱥᱟᱭ ᱥᱮᱨᱢᱟ ᱨᱮᱱᱟᱜ ᱚᱱᱚᱞ ᱪᱤᱛᱟᱹᱨ ᱪᱮᱛᱟᱱ ᱨᱮ ᱠᱚ ᱯᱟᱹᱛᱭᱟᱹᱣᱟ ᱾ ᱛᱟᱭᱚᱢ ᱛᱮ ᱧᱟᱢ ᱟᱠᱟᱱ ᱢᱮᱥᱨᱮᱡ (ᱢᱮᱴᱟᱣ ᱥᱟᱨᱮᱡ) ᱠᱷᱚᱱ ᱦᱚᱸ ᱱᱩᱠᱩᱣᱟᱜ ᱦᱚᱲᱢᱚ ᱵᱟᱵᱚᱫᱽ ᱛᱮ ᱧᱮᱛᱮᱞ ᱧᱟᱢᱚᱜᱼᱟ ᱾ ᱚᱱᱟ ᱠᱚᱨᱮ ᱠᱷᱚᱱ ᱧᱟᱢᱚᱜ ᱥᱟᱹᱠᱷᱭᱟᱹᱛ ᱞᱮᱠᱟᱛᱮ ᱱᱩᱠᱩ ᱪᱮᱬᱮ ᱨᱮᱱᱟᱜ ᱨᱚᱝ ᱫᱚ ᱢᱟᱹᱞᱪᱷᱟᱹ ᱟᱨᱵᱟᱝ ᱦᱟᱥᱟ ᱞᱮᱠᱟ ᱫᱷᱟᱨᱟ ᱛᱟᱦᱮᱸᱠᱟᱱᱟ ᱾ ᱩᱥᱩᱞ ᱨᱮ ᱫᱚ ᱑ ᱢᱤᱴᱚᱨ ᱦᱟᱹᱵᱤᱡ ᱟᱨ ᱦᱟᱢᱟᱞ ᱫᱚ ᱒᱑ ᱠᱤᱞᱚ ᱜᱟᱱ ᱦᱟᱹᱵᱤᱡ ᱥᱮᱬᱟᱜ ᱨᱮᱱᱟᱜ ᱯᱟᱭᱛᱟᱨ ᱟᱠᱟᱱᱟ ᱾ ᱮᱸᱜᱟ ᱠᱚᱨᱮ ᱠᱷᱚᱱ ᱥᱟᱺᱰᱤ ᱪᱮᱬᱮ ᱫᱚ ᱱᱟᱥᱮ ᱢᱟᱨᱟᱝ ᱠᱚ ᱛᱟᱦᱮᱸ ᱠᱟᱱᱟ ᱟᱨ ᱡᱤᱞᱤᱧ ᱴᱷᱚᱱᱴᱟ ᱛᱟᱦᱮᱸ ᱠᱟᱱᱟ ᱾ ᱱᱩᱠᱩᱣᱟᱜ ᱫᱚ ᱯᱷᱟᱹᱠᱬᱟᱹᱜ ᱵᱟᱝ ᱛᱟᱦᱮᱸ ᱠᱟᱱᱟ, ᱚᱱᱟ ᱵᱚᱫᱚᱞ ᱯᱮᱭᱟ ᱯᱩᱱᱭᱟᱹ ᱜᱟᱱ ᱦᱩᱰᱤᱧ ᱤᱞ ᱛᱟᱦᱮᱸᱱ ᱠᱟᱱ ᱛᱟᱦᱮᱸᱫ ᱾
ᱡᱚᱢᱟᱜ ᱥᱟᱯᱲᱟᱣ
ᱵᱟᱹᱲᱛᱤ ᱠᱟᱛᱮ ᱱᱩᱠᱩ ᱪᱮᱬᱮ ᱫᱚ ᱚᱛ ᱨᱮ ᱧᱩᱨᱟᱜ ᱡᱚ ᱠᱚ ᱜᱮ ᱠᱚ ᱡᱚᱢᱮᱫ ᱛᱟᱦᱮᱸᱫ ᱾ ᱚᱱᱟ ᱥᱟᱶᱛᱮ ᱡᱟᱝ, ᱫᱟᱨᱮ ᱢᱩᱬ ᱟᱨ ᱵᱟᱠᱞᱟᱜ ᱮᱢᱟᱱ ᱠᱚ ᱡᱚᱢᱮᱫ ᱛᱟᱦᱮᱸᱫ ᱾ ᱡᱚᱢᱟᱜ ᱠᱚ ᱦᱚᱡᱚᱢ ᱞᱟᱹᱜᱤᱫ ᱛᱮ ᱫᱷᱤᱨᱤ ᱜᱩᱨᱜᱩᱰᱤ ᱠᱚ ᱡᱚᱢ ᱨᱮᱱᱟᱜ ᱵᱟᱰᱟᱭ ᱢᱮᱱᱟᱜᱼᱟ ᱾
ᱢᱮᱴᱟᱣ ᱥᱟᱯᱲᱟᱣ
ᱢᱟᱹᱱᱢᱤ ᱠᱚ ᱢᱚᱨᱤᱥᱚᱥ ᱫᱤᱯ ᱨᱮ ᱜᱮᱭᱟᱭ ᱥᱟᱭ ᱥᱮᱨᱢᱟ ᱦᱟᱹᱵᱤᱡ ᱫᱚ ᱵᱟᱠᱚ ᱵᱟᱥᱟ ᱞᱮᱱ ᱛᱟᱦᱮᱸᱫ, ᱥᱩᱢᱩᱝ ᱟᱨᱚᱵ ᱥᱟᱢᱩᱸᱫ ᱨᱤᱱ ᱵᱮᱯᱟᱨᱤᱭᱟᱹ ᱠᱚ ᱛᱟᱞᱟ ᱡᱩᱜᱽ ᱝᱨᱮ ᱠᱚ ᱥᱮᱱ ᱞᱮᱱᱟ ᱢᱮᱱᱛᱮ ᱵᱟᱰᱟᱭ ᱢᱮᱱᱟᱜᱼᱟ ᱾ ᱑᱕᱐᱗ ᱡᱤᱥᱩᱢᱟᱹᱥᱤ ᱨᱮ ᱯᱚᱨᱛᱩᱜᱤᱡᱽ ᱞᱟᱹᱣᱲᱤᱭᱟᱹ ᱮᱛᱚᱦᱚᱵ ᱤᱣᱨᱚᱯᱤᱭᱟᱹ ᱞᱮᱠᱟᱛᱮ ᱡᱟᱸᱜᱟ ᱠᱚ ᱮᱢ ᱞᱮᱫ ᱛᱟᱦᱮᱸᱫ ᱾ ᱑᱕᱙᱘ ᱥᱟᱞᱮ ᱨᱮ ᱰᱚᱪ (ᱦᱚᱞᱟᱸᱰ) ᱥᱟᱢᱨᱟᱡᱽᱭᱚ ᱱᱚᱶᱟ ᱫᱤᱯ ᱟᱠᱚᱣᱟᱜ ᱟᱹᱫᱟᱹᱨ ᱛᱮ ᱠᱚ ᱤᱫᱤ ᱞᱮᱫ ᱛᱟᱦᱮᱸᱫ ᱟᱨ ᱩᱱᱠᱷᱚᱱ ᱚᱸᱰᱮ ᱢᱟᱹᱢᱤ ᱠᱚᱣᱟᱜ ᱵᱟᱥᱟ ᱛᱮᱭᱟᱨ ᱞᱮᱱ ᱛᱟᱦᱮᱸᱫ ᱾ ᱩᱱᱚᱠᱛᱚ ᱨᱮ ᱱᱩᱠᱩ ᱞᱟᱹᱣᱲᱤᱭᱟᱹ ᱯᱷᱟᱹᱠᱬᱟᱹᱜ ᱵᱟᱹᱱᱩᱜ ᱪᱮᱬᱮ ᱠᱚ ᱜᱚᱡ ᱠᱟᱛᱮ ᱠᱚ ᱡᱚᱢᱮᱫ ᱠᱚ ᱛᱟᱦᱮᱸᱫ, ᱩᱱᱠᱩᱣᱟᱜ ᱡᱤᱞ ᱥᱤᱵᱤᱞ ᱵᱟᱭ ᱵᱩᱡᱟᱣᱮᱫ ᱠᱚ ᱨᱮᱦᱚᱸ ᱾ ᱱᱩᱠᱩᱪᱮᱬᱮ ᱢᱟᱹᱱᱢᱤ ᱠᱚᱫᱚ ᱵᱟᱝ ᱠᱚ ᱵᱚᱣᱟᱠᱚ ᱠᱟᱱ ᱛᱟᱦᱮᱸᱫ, ᱚᱱᱟᱛᱮ ᱟᱹᱰᱤ ᱞᱟᱜᱮ ᱠᱚ ᱥᱟᱵᱚᱜ ᱠᱟᱱ ᱛᱟᱦᱮᱸᱫ ᱾
ᱜᱮᱭᱟᱭ ᱥᱟᱭ ᱥᱮᱨᱢᱟ ᱨᱮ ᱢᱚᱨᱤᱥᱚᱥ ᱨᱤᱱ ᱦᱚᱲ ᱮᱞ ᱫᱚ ᱕᱐ ᱠᱷᱚᱱ ᱵᱟᱹᱲᱛᱤ ᱵᱟᱝ ᱠᱚ ᱛᱟᱦᱮᱸ ᱠᱟᱱᱟ, ᱛᱚᱵᱮ ᱩᱱᱠᱩ ᱥᱟᱶ ᱠᱚ ᱦᱮᱡ ᱞᱮᱱ ᱥᱩᱠᱨᱤ, ᱥᱮᱛᱟ, ᱯᱩᱥᱤ, ᱜᱩᱰᱩ ᱟᱨ ᱜᱟᱹᱬᱤ ᱮᱢᱟᱱ ᱠᱚ ᱰᱳᱰᱳ ᱠᱚᱣᱟᱜ ᱟᱹᱰᱤ ᱡᱩᱨ ᱜᱮ ᱠᱚ ᱠᱷᱤᱛᱤ ᱞᱮᱫ ᱛᱟᱦᱮᱸᱫ ᱾ ᱰᱳᱰᱳ ᱠᱚ ᱞᱟᱹᱜᱤᱫ ᱧᱟᱢᱚᱜ ᱠᱟᱱ ᱡᱚᱢ ᱠᱚ ᱵᱟᱨᱦᱮ ᱠᱷᱚᱱ ᱦᱮᱡ ᱟᱠᱟᱱ ᱡᱤᱵᱽ ᱠᱚ ᱡᱚᱢ ᱠᱮᱫᱼᱟ ᱚᱱᱟ ᱥᱟᱶᱛᱮ ᱰᱳᱰᱳ ᱠᱚᱣᱟᱜ ᱛᱩᱠᱟᱹ ᱠᱚ ᱨᱟᱹᱯᱩᱫ ᱠᱮᱫᱼᱟ ᱾ ᱱᱚᱶᱟ ᱥᱟᱶᱛᱮ ᱢᱟᱹᱱᱢᱤ ᱠᱚ ᱚᱱᱟ ᱫᱤᱯ ᱨᱮᱱᱟᱜ ᱵᱤᱨ ᱠᱚ ᱢᱟᱜ ᱥᱟᱯᱷᱟ ᱠᱮᱫᱼᱟ ᱟᱨ ᱰᱳᱰᱳ ᱠᱚ ᱥᱮᱸᱫᱽᱨᱟ ᱠᱮᱫ ᱠᱚᱣᱟ ᱾ ᱱᱚᱶᱟ ᱠᱚ ᱠᱷᱟᱹᱛᱤᱨ ᱛᱮ ᱚᱠᱟ ᱠᱟᱲ ᱠᱷᱚᱱ ᱢᱚᱨᱤᱥᱚᱥ ᱨᱮ ᱵᱟᱧᱪᱟᱣ ᱟᱹᱜᱩᱣᱟᱠᱟᱱ ᱰᱳᱰᱳ ᱠᱚ ᱖᱐-᱗᱐ ᱥᱮᱨᱢᱟ ᱵᱷᱤᱛᱤᱨ ᱛᱮᱜᱮ ᱠᱚ ᱢᱮᱴᱟᱣ ᱩᱛᱟᱨᱮᱱᱟ ᱾
ᱛᱤᱢᱤᱱ ᱜᱟᱵ ᱥᱟᱹᱠᱷᱭᱟᱹᱛ ᱞᱮᱠᱟᱛᱮ ᱢᱩᱪᱟᱹᱫ ᱫᱷᱟᱣ ᱡᱤᱣᱤᱫ ᱛᱮ ᱑᱖᱖᱒ ᱥᱟᱞᱮ ᱨᱮ ᱢᱚᱨᱤᱥᱚᱥ ᱥᱩᱨ ᱚᱢᱵᱚᱨ ᱫᱣᱤᱯᱚ ᱨᱮ ᱠᱚ ᱧᱮᱞ ᱞᱮᱫ ᱠᱚ ᱛᱟᱦᱮᱸᱫ ᱾ ᱟᱨ ᱛᱤᱢᱤᱱ ᱜᱟᱱ ᱥᱟᱹᱠᱷᱭᱟᱹᱛ ᱞᱮᱠᱟᱛᱮ ᱑᱖᱘᱘ ᱥᱟᱞᱮ ᱨᱮ ᱢᱩᱪᱟᱹᱫ ᱫᱷᱟᱣ ᱯᱮᱭᱟ ᱰᱳᱰᱳ ᱠᱚ ᱧᱮᱞ ᱧᱟᱢ ᱞᱮᱱ ᱛᱟᱦᱮᱸᱫ ᱾[᱒]
ᱰᱳᱰᱳ ᱠᱚᱣᱟᱣᱜ ᱢᱮᱴᱟᱣ ᱢᱟᱹᱱᱢᱤᱠᱚᱣᱟᱜ ᱱᱟᱶᱟ ᱡᱤᱭᱚᱱ ᱦᱚᱨᱟ ᱟᱨ ᱠᱟᱹᱢᱤ ᱦᱚᱨᱟ ᱛᱮ ᱵᱟᱹᱲᱛᱤ ᱵᱟᱰᱟᱭᱟᱱ ᱢᱮᱱᱫᱚ ᱯᱩᱭᱞᱩ ᱢᱮᱴᱟᱣ ᱟᱠᱟᱱ ᱡᱤᱭᱟᱹᱞᱤ ᱞᱮᱠᱟᱛᱮ ᱵᱟᱰᱟᱭᱚᱜᱼᱟᱭ ᱾[᱓]
ᱵᱤᱫᱮᱥ ᱯᱟᱨᱚᱢ ᱥᱟᱯᱲᱟᱣ
ᱢᱤᱫ ᱦᱟᱦᱟᱲᱟᱦᱟᱱ ᱢᱮᱱᱫᱚ ᱠᱚᱢ ᱧᱮᱞᱚᱜ ᱠᱟᱱ ᱪᱮᱬᱮ ᱞᱮᱠᱟᱛᱮ ᱛᱤᱢᱤᱱ ᱜᱟᱱ ᱡᱤᱣᱤᱫ ᱰᱳᱰᱳ ᱫᱚ ᱭᱩᱨᱚᱯ ᱢᱮᱱᱫᱚ ᱵᱤᱫᱮᱥ ᱥᱮᱫ ᱠᱚ ᱤᱫᱤᱞᱮᱫ ᱠᱚ ᱨᱮᱱᱟᱜ ᱛᱤᱢᱤᱱ ᱜᱟᱱ ᱯᱚᱨᱢᱟᱬ ᱠᱚ ᱢᱮᱱᱜᱼᱟ ᱾ ᱯᱤᱴᱚᱨ ᱢᱩᱸᱰᱤ ᱧᱩᱛᱩᱢᱟᱱᱤᱡ ᱢᱤᱫ ᱤᱝᱨᱮᱡᱽ ᱵᱮᱯᱟᱨᱤ ᱥᱤᱧᱚᱛ ᱨᱮᱱᱟᱜ ᱥᱩᱨᱚᱴ ᱨᱮ ᱑᱒᱘ ᱠᱷᱚᱱ ᱑᱖᱓᱔ ᱡᱤᱥᱩᱢᱟᱹᱥᱤ ᱥᱮᱫ ᱨᱮ ᱵᱟᱨᱭᱟ ᱰᱳᱰᱳᱭ ᱧᱮᱞ ᱞᱮᱫ ᱠᱤᱱ ᱛᱟᱦᱮᱸᱫ ᱾ ᱦᱩᱭ ᱫᱟᱲᱮᱭᱟᱜᱼᱟ ᱱᱚᱶᱟ ᱠᱷᱚᱱ ᱢᱤᱫ ᱧᱮᱞ ᱠᱟᱛᱮ ᱩᱥᱛᱟᱫᱽ ᱢᱚᱥᱩᱨ (ᱡᱟᱦᱟᱸᱭ ᱫᱚ ᱢᱚᱜᱚᱞ ᱥᱚᱢᱨᱟᱴ ᱡᱟᱦᱟᱝᱜᱤᱨᱟᱜ ᱨᱟᱡᱽᱫᱚᱨᱵᱟᱨ ᱨᱤᱱᱤᱡ ᱪᱤᱛᱟᱹᱨ ᱵᱟᱰᱚᱦᱤᱭ ᱛᱟᱦᱮᱸᱠᱟᱱᱟ) ᱢᱤᱫ ᱨᱩᱝᱜᱤᱱ ᱪᱤᱛᱟᱹᱨᱻᱮ ᱛᱮᱭᱟᱨ ᱞᱮᱫᱼᱟ ᱾ ᱱᱚᱶᱟ ᱪᱤᱛᱟᱹᱨ ᱫᱚ ᱡᱤᱭᱟᱹᱞᱤ ᱥᱟᱬᱮᱥᱤᱭᱟᱹ ᱠᱚ ᱞᱟᱹᱜᱤᱫ ᱰᱳᱰᱳ ᱵᱟᱵᱚᱫᱽ ᱛᱮ ᱟᱹᱰᱤ ᱢᱟᱨᱟᱝ ᱡᱟᱭ ᱠᱟᱱᱟ ᱾ ᱑᱖᱔᱗ ᱥᱟᱞᱮ ᱨᱮ ᱢᱤᱫ ᱡᱤᱣᱤᱫ ᱰᱳᱰᱳ ᱡᱟᱯᱟᱱ ᱫᱤᱥᱚᱢ ᱨᱮᱱᱟᱜ ᱱᱟᱜᱟᱥᱟᱠᱤ ᱱᱟᱜᱟᱨ ᱛᱮ ᱠᱚ ᱯᱟᱨᱚᱢ ᱟᱠᱟᱫ ᱫᱮ ᱨᱮᱱᱟᱜ ᱱᱟᱜᱟᱢ ᱥᱟᱹᱠᱷᱤ ᱢᱮᱱᱟᱜᱼᱟ ᱾
- ↑ cite web|title=Dodo|url=https://en.wikipedia.org/wiki/Dodo%7Cpublisher=ᱤᱝᱞᱤᱥ ᱣᱤᱠᱤᱯᱤᱰᱤᱭᱟ|accessdate=29 April 2018
- ↑ cite web|title=Isaac Johannes Lamotius|url=https://en.wikipedia.org/wiki/Isaac_Johannes_Lamotius%7Cwork=ଇଂରାଜୀ ଉଇକିପିଡିଆ|accessdate=5 May 2018
- ↑ cite web|first=The Editors of Encyclopedia Britannica|title=Dodo EXTINCT BIRD|url=https://www.britannica.com/animal/dodo-extinct-bird%7Cwork=ENCYCLOPÆDIA BRITANNICA|accessdate=16 May 2018