ᱢᱟ.ᱡᱷᱤ ᱵᱟᱪᱷᱚᱱ

ᱤᱧ ᱢᱟᱹᱡᱷᱤ ᱵᱟᱪᱷᱚᱱ

ᱟᱹᱛᱩ ᱨᱤᱱᱤᱡ ᱦᱚᱲ ᱮ ᱦᱩᱭ ᱠᱚᱜ ᱢᱟ ᱾ ᱟᱪᱟᱨ ᱵᱤᱪᱟᱹᱨ ᱠᱟᱛᱷᱟ ᱠᱚᱭ ᱵᱟᱰᱟᱭ ᱠᱟᱜ ᱢᱟ ᱫᱤᱥᱚᱢ ᱨᱤᱱ ᱯᱮᱲᱟ ᱠᱚ ᱫᱟᱨᱟᱢ ᱫᱟᱜ ᱫᱩᱲᱩᱵ ᱛᱤᱸᱜᱩᱱ ᱴᱷᱟᱶ ᱚᱲᱟᱜ ᱠᱚ ᱛᱟᱦᱮᱸ ᱠᱚᱜ ᱛᱟᱭ ᱢᱟ ᱾ ᱫᱟᱜ ᱫᱟᱠᱟ ᱯᱮᱲᱟ ᱵᱮᱵᱷᱟᱨ ᱠᱩᱲᱟᱹᱭ ᱛᱟᱦᱮᱸᱱ ᱢᱟ ᱾ ᱱᱮᱛᱟᱨ ᱫᱚ ᱡᱩᱜᱽ ᱵᱚᱫᱚᱞ ᱮᱱᱟ ᱦᱚᱲ ᱵᱚ ᱟᱹᱨᱩ ᱪᱮᱸᱜᱷᱟ ᱮᱱᱟ ᱾ ᱚᱱᱟᱛᱮ ᱮᱴᱟᱜ ᱯᱟᱹᱨᱤᱥ ᱦᱚᱲ ᱦᱚᱸ ᱢᱟᱹᱡᱷᱤ ᱞᱮᱠᱟ ᱠᱚ ᱵᱟᱪᱷᱚᱱ ᱚᱜ ᱠᱟᱱᱟ ᱾

ᱜᱩᱱ ᱢᱟᱱᱟᱣ ᱟᱨ ᱠᱟᱹᱢᱤᱦᱚᱨᱟ

ᱢᱟᱹᱡᱷᱤ ᱫᱚ ᱟᱹᱛᱩ ᱨᱤᱱᱤᱡ ᱢᱟᱨᱟᱝ ᱜᱚᱢᱠᱮ ᱠᱟᱱᱟᱭ ᱾ ᱟᱨ ᱦᱚᱸ ᱢᱩᱛᱩᱞ ᱠᱷᱩᱱᱴᱤ ᱥᱮ ᱨᱟᱡᱟ ᱵᱟᱵᱟ ᱞᱮᱠᱟ ᱦᱚᱸ ᱱᱩᱭ ᱵᱟᱝ ᱠᱷᱟᱱ ᱟᱹᱛᱩᱨᱮ ᱪᱮᱫ ᱠᱟᱹᱢᱤ ᱦᱚᱸ ᱵᱟᱝ ᱦᱩᱭᱩᱜᱼᱟ ᱾ ᱱᱩᱭᱟᱜ ᱟᱸᱫᱮ ᱛᱮᱜᱮ ᱟᱹᱛᱩᱨᱮ ᱵᱚᱸᱜᱟ ᱵᱳᱨᱳ, ᱟᱪᱟᱨ ᱵᱤᱪᱟᱹᱨ, ᱪᱷᱩᱛ ᱪᱷᱟᱹᱴᱭᱟᱹᱨ, ᱵᱟᱯᱞᱟ ᱵᱮᱦᱟ, ᱜᱩᱡᱩᱜ ᱵᱩᱨᱩᱜ, ᱵᱷᱟᱸᱰᱟᱱ ᱠᱩᱸᱰᱟᱹᱱ, ᱥᱮᱸᱫᱽᱨᱟ ᱠᱟᱨᱠᱟ, ᱯᱟᱨᱟᱵᱽ ᱯᱩᱱᱟᱹᱭ, ᱱᱮᱭᱟᱣ ᱱᱤᱯᱥᱟᱹ ᱨᱮ, ᱥᱚᱞᱦᱮ ᱥᱚᱡᱷᱮ ᱨᱮ, ᱫᱩᱠ ᱢᱩᱦᱤᱢ ᱨᱮ, ᱚᱛ ᱦᱟᱥᱟ ᱦᱟᱯᱟᱴᱤᱧ ᱨᱮ, ᱜᱚᱡ ᱜᱚᱯᱚᱡ ᱨᱮ, ᱟᱡᱟᱜ ᱥᱮᱞᱮᱫ ᱛᱟᱦᱮᱸ ᱞᱮᱱ ᱮᱱᱟᱝ ᱠᱟᱹᱢᱤ ᱥᱩᱥᱟᱹᱨ ᱞᱟᱦᱟᱱᱛᱤᱜᱼᱟ ᱾ ᱟᱡᱟᱜ ᱠᱟᱹᱢᱤ ᱫᱚ ᱢᱚᱬᱮ ᱦᱚᱲ ᱧᱩᱛᱩᱢ ᱛᱮᱜᱮ ᱪᱟᱞᱟᱜᱼᱟ ᱟᱨ ᱧᱩᱛᱩᱢᱚᱜᱼᱟ ᱾ ᱚᱱᱟᱛᱮ ᱠᱚ ᱢᱮᱱᱟ, "ᱟᱹᱛᱩ ᱨᱤᱱ ᱢᱟᱹᱡᱷᱤ ᱢᱚᱬᱮ ᱦᱚᱲ ᱜᱮᱠᱚ ᱟᱹᱜᱛᱩᱣᱟ ᱟᱨ ᱟᱹᱛᱩ ᱨᱤᱱ ᱩᱱᱠᱩ ᱢᱟᱹᱡᱷᱤ ᱢᱚᱬᱮ ᱦᱚᱲ ᱜᱮ ᱥᱟᱶᱛᱟ ᱨᱮᱠᱚ ᱡᱟᱹᱛᱤ ᱛᱟᱜᱞᱟ ᱦᱟ ᱾

ᱠᱷᱮᱢᱛᱟ (Power)

ᱟᱹᱛᱩ ᱨᱤᱱ ᱦᱚᱲ ᱠᱚ ᱡᱟᱦᱟᱸᱭ ᱜᱮ ᱢᱟᱹᱡᱷᱤᱭ ᱟᱸᱫᱮ ᱟᱭᱟ, ᱚᱱᱟ ᱵᱟᱛᱟᱣ ᱛᱮ ᱦᱩᱭ ᱟᱭᱟ ᱾ ᱢᱟᱹᱡᱷᱤ ᱫᱚ ᱵᱟᱠᱚ ᱚᱢᱟᱱᱛᱤ ᱠᱚᱣᱟ ᱾ ᱵᱟᱝᱠᱷᱟᱱ ᱚᱢᱟᱱᱛᱤ ᱞᱮᱠᱟᱛᱮ ᱰᱟᱸᱰᱚᱢ ᱢᱮᱱᱟᱜᱼᱟ ᱾ ᱡᱟᱦᱟᱸ ᱟᱹᱛᱩ ᱨᱤᱱ ᱫᱤᱥᱚᱢ ᱯᱮᱲᱟ ᱠᱚ ᱟᱡᱟᱜ ᱚᱲᱟᱜ ᱠᱚ ᱦᱮᱡ ᱢᱟᱬᱟᱝ ᱚᱜᱼᱟ ᱟᱨ ᱩᱱᱠᱩᱭ ᱧᱮᱞ ᱩᱨᱩᱢ ᱫᱟᱨᱟᱢ ᱠᱚᱣᱟ ᱾ ᱵᱩᱜᱤ ᱵᱟᱹᱲᱤᱡ ᱠᱚ ᱵᱟᱰᱟᱭ ᱫᱟᱲᱮᱭᱟᱜᱼᱟ ᱾ ᱟᱪᱟᱨ ᱵᱤᱪᱟᱹᱨ ᱮᱴᱟᱜ ᱟᱹᱛᱩ ᱢᱟᱹᱡᱷᱤ ᱥᱟᱶᱛᱮ ᱟᱹᱛᱩ ᱨᱤᱱ ᱧᱩᱛᱩᱢᱟᱱ ᱢᱚᱬᱮ ᱦᱚᱲ ᱠᱚ ᱥᱟᱶ ᱥᱟᱶᱛᱟ ᱨᱮ ᱥᱮᱞᱮᱫ ᱫᱟᱲᱮᱭᱟᱜᱼᱟ ᱾ ᱢᱟᱹᱡᱷᱤ ᱵᱟᱝ ᱮ ᱥᱮᱱ ᱫᱟᱲᱮᱭᱟᱜ ᱠᱷᱟᱱ ᱟᱹᱛᱩ ᱨᱤᱱᱤᱡ ᱢᱟᱹᱡᱷᱤ ᱢᱚᱬᱮ ᱦᱚᱲ ᱞᱮᱠᱟᱛᱮ ᱯᱟᱹᱨᱟᱹᱱᱤᱠ, ᱜᱳᱰᱮᱛ, ᱡᱚᱜᱽ ᱢᱟᱹᱡᱷᱤ ᱡᱟᱦᱟᱸᱭ ᱠᱚ ᱜᱮ ᱠᱚ ᱪᱟᱞᱟᱣ ᱫᱟᱲᱮᱭᱟᱜᱼᱟ ᱾ ᱟᱨ ᱢᱟᱹᱡᱷᱤ ᱞᱮᱠᱟᱛᱮ ᱢᱟᱹᱱ ᱠᱚ ᱧᱟᱢᱟ ᱾ ᱟᱹᱛᱩ ᱨᱮᱭᱟᱜ ᱵᱩᱜᱤ ᱵᱟᱹᱲᱤᱡ, ᱥᱮᱪᱮᱫ ᱯᱟᱦᱴᱟ, ᱩᱛᱱᱟᱹᱣ ᱞᱟᱦᱟᱱᱛᱤ ᱠᱟᱹᱢᱤᱦᱚᱨᱟ, ᱜᱟᱯᱟᱞᱢᱟᱨᱟᱣ ᱫᱩᱯᱲᱩᱵ ᱠᱟᱛᱮ ᱥᱚᱨᱠᱟᱨ ᱥᱟᱞᱟᱜ ᱵᱟᱝᱠᱷᱟᱱ ᱮᱴᱟᱜ ᱟᱹᱛᱩ ᱠᱚ ᱥᱟᱞᱟᱜ ᱥᱩᱞᱩᱠ ᱱᱤᱨᱟᱹᱭ ᱥᱟᱹᱜᱟᱹᱭ ᱫᱚᱦᱚ ᱠᱟᱛᱮ ᱥᱟᱶᱛᱟ ᱞᱟᱦᱟᱱᱛᱤ ᱠᱟᱹᱢᱤᱦᱚᱨᱟ ᱥᱟᱵ ᱠᱟᱛᱮ ᱠᱟᱹᱢᱤ ᱠᱚ ᱩᱨᱟᱹᱞ ᱫᱟᱲᱮᱭᱟᱜᱼᱟ,

ᱥᱟᱹᱜᱟᱹᱲᱤᱭᱟᱹ ᱦᱚᱨ ᱰᱟᱦᱟᱨ, ᱧᱩ ᱫᱟᱜ, ᱡᱟᱦᱮᱨ ᱜᱟᱲ, ᱵᱚᱸᱜᱟ ᱛᱷᱟᱹᱱ ᱠᱟᱹᱢᱤ ᱥᱩᱥᱟᱹᱨ, ᱡᱟᱨᱟ ᱠᱤᱨᱥᱤ ᱫᱟᱨᱮ ᱟᱠᱚᱴ, ᱠᱷᱚᱣᱟᱲ ᱮᱢᱟᱱ ᱠᱚ ᱾ 

ᱢᱟᱹᱡᱷᱤ ᱟᱪᱟᱨ ᱵᱤᱪᱟ.ᱨ ᱦᱚᱪᱚᱭ ᱞᱟᱹᱜᱤᱫ ᱟᱡᱟᱜ ᱪᱷᱟᱴᱠᱟ ᱨᱮ ᱟᱠᱷᱲᱟ ᱛᱟᱦᱮᱸᱱᱟ ᱾ ᱚᱱᱟ ᱫᱷᱚᱨᱚᱢ ᱟᱠᱷᱲᱟ ᱨᱮᱜᱮ ᱵᱤᱪᱟᱹᱨ ᱢᱟᱰᱣᱟ ᱫᱚ ᱥᱮᱫᱟᱭ ᱠᱷᱚᱱ ᱦᱮᱡ ᱟᱹᱜᱩ ᱟᱠᱟᱱᱟ ᱾ ᱟᱨ ᱵᱟᱝ ᱠᱷᱟᱱ ᱫᱷᱚᱨᱚᱢ ᱡᱟᱦᱮᱨ ᱜᱟᱲ ᱨᱮᱦᱚᱸ ᱟᱪᱟᱨ ᱵᱤᱪᱟᱹᱨ ᱫᱚ ᱫᱩᱯᱲᱩᱵᱚᱜᱼᱟ ᱾

ᱟᱹᱛᱩᱨᱮ ᱯᱟᱨᱟᱵᱽ ᱯᱩᱱᱟᱹᱭ ᱨᱟᱹᱥᱠᱟᱹ ᱨᱚᱢᱚᱡᱽ ᱞᱟᱹᱜᱤᱫ ᱢᱟᱹᱡᱷᱤ ᱜᱚᱢᱠᱮ ᱴᱷᱮᱱ ᱵᱟᱨᱭᱟ ᱡᱚᱲᱟ ᱛᱩᱢᱫᱟᱜ ᱛᱟᱦᱮᱸᱱᱟ ᱾ ᱚᱱᱟ ᱥᱟᱶᱛᱮ ᱢᱟᱹᱡᱷᱤ ᱫᱚ ᱟᱡᱟᱜ ᱪᱷᱟᱴᱠᱟ ᱨᱮᱜᱮ ᱜᱚᱥᱟᱬᱮ ᱦᱚᱸ ᱛᱟᱦᱮᱸᱱᱟ ᱾ ᱚᱸᱰᱮ ᱜᱮ ᱟᱡ ᱫᱚ ᱥᱩᱱᱩᱢ ᱥᱤᱸᱫᱩᱨ ᱮ ᱟᱬᱜᱚᱭᱟ ᱾ ᱟᱨ ᱱᱟᱭᱠᱮ ᱦᱚᱸᱭ ᱵᱚᱸᱜᱟᱭᱟ ᱾

ᱠᱩᱲᱟᱹᱭ

ᱥᱮᱫᱟᱭ ᱦᱟᱯᱲᱟᱢ ᱠᱚᱫᱚ ᱟᱹᱛᱩ ᱨᱮ ᱢᱟᱹᱡᱷᱤ ᱫᱚ ᱢᱩᱛᱩᱞ ᱠᱷᱩᱱᱴᱤ ᱞᱮᱠᱟᱛᱮ ᱠᱟᱹᱢᱤᱦᱚᱨᱟ ᱧᱮᱞ ᱛᱚᱨᱟᱣ ᱞᱟᱹᱜᱤᱫ ᱢᱟᱹᱱ ᱚᱛ ᱦᱟᱥᱟ ᱠᱚ ᱞᱮᱵᱮᱫ ᱟᱫ ᱠᱚ ᱛᱟᱦᱮᱸᱫ ᱾ ᱦᱚᱲ ᱵᱚ ᱥᱟᱸᱜᱮ ᱮᱱᱟ ᱡᱩᱜᱽ ᱦᱚᱸ ᱵᱚᱫᱚᱞ ᱤᱫᱤ ᱮᱱᱟ ᱚᱱᱟ ᱢᱟᱹᱡᱷᱤ ᱢᱟᱯᱟᱧᱡᱤ ᱢᱟᱹᱱ ᱚᱛ ᱦᱟᱥᱟ ᱠᱚᱫᱚ ᱩᱱᱠᱩ ᱟᱹᱛᱩ ᱨᱤᱱ ᱜᱮ ᱢᱟᱹᱡᱷᱤ ᱜᱩᱥᱴᱤ ᱥᱮ ᱵᱚᱝᱥᱚ ᱠᱚᱜᱮ ᱚᱛ ᱦᱟᱥᱟ ᱫᱚ ᱟᱠᱚᱣᱟᱜ ᱧᱩᱛᱩᱢ ᱨᱮᱠᱚ ᱴᱤᱠᱚᱥ ᱠᱮᱜᱼᱟ ᱾ ᱦᱟᱥᱟ ᱢᱟ ᱵᱟᱝ ᱵᱟᱹᱲᱛᱤᱜ ᱠᱟᱱᱟ ᱾ ᱟᱫᱚ ᱱᱮᱛᱟᱨ ᱫᱚ ᱢᱟᱹᱱ ᱞᱮᱠᱟᱛᱮ ᱵᱚᱸᱜᱟ ᱵᱳᱨ, ᱯᱟᱨᱟᱵᱽ ᱯᱩᱱᱟᱹᱭ, ᱵᱷᱟᱸᱰᱟᱱ ᱠᱩᱸᱰᱟᱹᱱ ᱠᱚᱨᱮ ᱵᱟᱹᱲᱛᱤ ᱦᱳᱲᱳ ᱵᱷᱟᱜᱽ ᱠᱚ ᱧᱟᱢᱮᱜᱼᱟ ᱾ ᱵᱟᱯᱞᱟ ᱵᱮᱦᱟ ᱨᱮ ᱢᱤᱫ ᱢᱟᱹᱡᱷᱤ ᱢᱟᱰᱣᱟ ᱫᱟᱹᱲᱤ ᱠᱚ ᱮᱱᱟ ᱠᱚ ᱠᱟᱱᱟ ᱾ ᱯᱟᱨᱟᱵᱽ ᱯᱩᱱᱟᱹᱭ ᱮᱢᱟᱱ ᱠᱚᱨᱮ ᱢᱟᱹᱱ ᱞᱮᱠᱟᱛᱮ ᱢᱟᱹᱱ ᱢᱟᱹᱪᱤ ᱠᱚ ᱵᱤᱞ ᱟᱠᱚ ᱠᱟᱱᱟ ᱾ ᱟᱨ ᱢᱤᱫ ᱵᱟᱨ ᱯᱷᱩᱲᱩᱜ ᱛᱟᱝ ᱦᱟᱺᱰᱤ ᱟᱨ ᱪᱟᱠᱷᱱᱟ ᱠᱚ ᱮᱢᱟ ᱾ ᱠᱤᱱᱟ ᱾ ᱢᱟᱹᱡᱷᱤ ᱜᱚᱢᱠᱮ ᱞᱮᱠᱟᱛᱮ ᱢᱟᱹᱡᱷᱤ ᱵᱩᱰᱷᱤ ᱪᱮ ᱮᱨᱟ ᱦᱚᱸ ᱢᱟᱹᱱ ᱠᱚ ᱮᱢᱟᱭᱟ ᱾

ᱵᱟᱪᱷᱚᱱ

ᱥᱟᱱᱛᱟᱲ ᱦᱚᱯᱚᱱ ᱠᱚᱣᱟᱜ ᱫᱚ ᱢᱟᱜᱽ ᱵᱚᱸᱜᱟᱨᱮ ᱥᱮᱨᱢᱟ ᱮᱛᱚᱦᱚᱵᱚᱜᱼᱟ ᱟᱨ ᱯᱩᱥ ᱵᱚᱸᱜᱟᱨᱮ ᱢᱩᱪᱟᱹᱫ ᱥᱮᱨᱢᱟ ᱯᱩᱨᱟᱹᱣᱜᱼᱟ ᱾ ᱚᱱᱠᱟ ᱞᱮᱠᱟ ᱜᱮ ᱟᱹᱛᱩ ᱨᱤᱱ ᱢᱟᱹᱡᱷᱤ ᱜᱚᱢᱞᱮ ᱛᱤᱠᱤᱱᱟᱜ ᱦᱚᱸ ᱚᱱᱟ ᱢᱟᱜᱽ ᱵᱚᱸᱜᱟ ᱨᱮᱜᱮ ᱟᱹᱛᱩ ᱨᱤᱱ ᱦᱚᱲ ᱠᱚ ᱦᱚᱛᱮᱛᱮ ᱚᱠᱚᱭ ᱜᱮᱠᱚ ᱠᱩᱥᱤ ᱟᱭᱟ ᱢᱟᱹᱡᱷᱤ ᱜᱩᱥᱴᱤ ᱯᱟᱹᱨᱤᱥ ᱨᱤᱱᱤᱡ ᱩᱱᱤ ᱜᱮ ᱢᱟᱹᱡᱷᱤ ᱞᱮᱠᱟ ᱛᱮᱠᱚ ᱵᱟᱪᱷᱚᱱ ᱮᱭᱟ ᱾

ᱟᱹᱛᱩ ᱨᱤᱱ ᱢᱟᱹᱡᱷᱤ, ᱯᱟᱨᱟᱱᱤᱠ, ᱡᱚᱜᱽ ᱢᱟᱹᱡᱷᱤ, ᱜᱚᱰᱮᱛ ᱮᱢᱟᱱ ᱠᱚ ᱱᱚᱝᱠᱟ ᱜᱮ ᱾ ᱟᱹᱛᱩ ᱨᱤᱱ ᱦᱚᱲ ᱟᱛᱮ ᱠᱚ ᱵᱟᱪᱷᱚᱱ ᱠᱚᱣᱟ ᱾ ᱥᱮᱨᱢᱟ ᱯᱤᱪᱷᱤ ᱵᱩᱪᱷᱨᱤ ᱜᱮ ᱾ ᱟᱹᱛᱩ ᱦᱚᱲ ᱪᱮᱛᱟᱱ ᱨᱮᱠᱚ ᱫᱚᱦᱚ ᱠᱚᱣᱟ ᱟᱨ ᱠᱚ ᱵᱟᱪᱷᱟᱣ ᱠᱚᱣᱟ ᱾

ᱫᱚᱨᱵᱟᱨ ᱟᱠᱷᱲᱟ

ᱟᱹᱛᱩ ᱨᱮᱱᱟᱜ ᱞᱚᱲᱟ ᱯᱟᱲᱟᱣᱜ ᱡᱚᱦᱚᱜ ᱢᱟᱹᱡᱷᱤᱭᱟᱜ ᱟᱸᱫᱮᱛᱮ ᱟᱹᱛᱩ ᱨᱮ ᱡᱚᱜᱽ ᱢᱟᱹᱡᱷᱤ ᱟᱹᱛᱩ ᱦᱚᱲ ᱠᱚᱭ ᱡᱟᱣᱨᱟ ᱦᱚᱫᱚ ᱠᱚᱣᱟ ᱾ ᱚᱸᱰᱮ ᱢᱟᱹᱡᱷᱤ ᱟᱠᱷᱲᱟ ᱨᱮᱜᱮ ᱟᱪᱟᱨ ᱵᱤᱪᱟᱹᱨ, ᱯᱟᱨᱟᱵᱽ ᱯᱩᱱᱟᱹᱭ, ᱱᱮᱰᱟ ᱵᱟᱨᱛᱮ ᱦᱩᱭᱩᱜᱼᱟ ᱾ ᱯᱟᱨᱟᱵᱽ ᱯᱩᱱᱟᱹᱭ ᱵᱚᱸᱜᱟ ᱵᱳᱨᱳ ᱑᱒ (ᱜᱮᱵᱟᱨ) ᱢᱟᱦᱟᱸ ᱢᱟᱬᱟᱝ ᱨᱮ ᱾ ᱮᱱ ᱮᱱᱟᱝ ᱟᱹᱛᱩᱨᱮ ᱱᱤᱴ ᱜᱚᱞᱟᱴ ᱟᱠᱟᱱ ᱫᱤᱱ ᱢᱟᱦᱟᱸᱨᱮ ᱯᱮᱲᱟ ᱯᱩᱨᱵᱷᱩ, ᱫᱮ-ᱵᱷᱟᱹᱜᱤᱱ ᱠᱚ ᱱᱮᱣᱛᱟ ᱵᱟᱨᱛᱮ ᱟᱹᱜᱩ ᱠᱚᱣᱟ ᱾ ᱡᱟᱦᱟᱸᱱᱟᱜ ᱫᱚᱨᱵᱟᱨ ᱦᱚᱪᱚᱭ ᱠᱷᱟᱱ ᱢᱟᱹᱡᱷᱤ ᱜᱚᱢᱠᱮ ᱴᱷᱮᱱ ᱢᱚᱬᱮ ᱥᱤᱠᱟᱹ (᱑. ᱒᱕) ᱯᱩᱭᱥᱟᱹ ᱟᱨᱫᱟᱥ ᱜᱚᱱᱚᱝ ᱞᱟᱜᱟᱣᱜᱼᱟ ᱾ ᱮᱱ ᱠᱟᱛᱮ ᱮᱱᱟᱝ ᱢᱟᱹᱡᱷᱤ ᱫᱚᱨᱵᱟᱨ ᱮ ᱦᱚᱦᱚ ᱚᱪᱚᱭᱟ ᱾ ᱟᱹᱛᱩᱨᱮ ᱢᱟᱹᱡᱷᱤ ᱚᱲᱟᱜ ᱠᱚ ᱱᱮᱭᱟᱣ ᱱᱤᱯᱥᱟᱹ ᱡᱚᱦᱚᱜ ᱩᱥᱟᱹᱫ ᱡᱤᱣᱤ ᱨᱟᱲᱮᱡ ᱠᱚ ᱥᱮᱱᱚᱜᱼᱟ ᱾ ᱩᱱᱠᱩ ᱱᱮᱭᱟᱣ ᱦᱚᱲ ᱠᱚ ᱜᱟᱞ ᱠᱟᱛᱷᱟ ᱛᱮ ᱵᱟᱨ ᱯᱮ ᱦᱚᱲ ᱚᱲᱟᱜ ᱛᱮ ᱤᱫᱤ ᱠᱟᱛᱮ ᱥᱚᱞᱦᱟ-ᱱᱟᱢᱟ ᱠᱟᱠᱚᱣᱟ ᱾ ᱵᱟᱠᱚ ᱨᱮᱵᱮᱱ ᱠᱷᱟᱱ ᱢᱟᱹᱡᱷᱤ ᱟᱡᱟᱜ ᱚᱲᱟᱜ ᱨᱮ ᱡᱚᱢ-ᱧᱩ ᱫᱚᱦᱚ ᱠᱟᱛᱮ ᱠᱩᱲᱤ ᱟᱯᱟᱵᱟᱨᱮ ᱚᱲᱟᱜ ᱛᱮ ᱢᱚᱬᱮ ᱦᱚᱲ ᱟᱛᱮ ᱤᱫᱤ ᱥᱮᱴᱮᱨ ᱦᱚᱴᱚ ᱠᱟᱭᱟ ᱠᱚ ᱾ ᱟᱨ ᱟᱯᱟᱵᱟᱨᱮᱛ ᱟᱛᱮ ᱠᱚ ᱟᱹᱜᱩ ᱦᱚᱴᱚ ᱠᱟᱭᱟ ᱾ ᱟᱨ ᱠᱚ ᱵᱤᱪᱟᱹᱨ ᱫᱚᱨᱵᱟᱨ ᱢᱟᱵᱽᱞᱟᱭᱟ ᱾

ᱫᱚᱨᱵᱟᱨ ᱨᱮ ᱟᱹᱛᱩ ᱨᱤᱱ ᱢᱚᱬᱮ ᱦᱚᱲ ᱠᱚ ᱵᱮᱨᱮᱫ ᱠᱚ ᱞᱟᱹᱜᱤᱫ ᱞᱟᱡ ᱫᱟᱠᱟ ᱫᱟᱜ ᱢᱟᱹᱰᱤ ᱞᱮᱠᱟ ᱟᱹᱫᱟᱹᱭ ᱦᱩᱭᱩᱜᱼᱟ ᱵᱟᱱᱟᱨ ᱟᱹᱥᱟᱹᱢᱤ ᱫᱚᱨᱵᱟᱨ ᱦᱚᱪᱚ ᱠᱤᱱ ᱾ ᱟᱨ ᱫᱩᱥᱤ ᱧᱟᱢ ᱤᱡ ᱫᱚ ᱵᱟᱹᱲᱛᱤ ᱜᱮ ᱜᱩᱱᱦᱟᱹ ᱡᱟᱹᱱᱤ ᱵᱤᱪᱟᱹᱨ ᱰᱟᱸᱰᱚᱢ ᱮᱢᱚᱜ ᱦᱩᱭᱩᱜ ᱛᱟᱭᱟ ᱾ ᱫᱚᱨᱵᱟᱨ ᱰᱟᱸᱰᱚᱢ ᱴᱟᱠᱟ ᱫᱚ ᱢᱟᱹᱡᱷᱤ ᱜᱚᱢᱠᱮ ᱵᱟᱨ ᱵᱷᱟᱜᱽ ᱦᱩᱸᱰᱟᱹ ᱡᱩᱲᱩ ᱯᱟᱲᱟᱣᱜᱼᱟ ᱾ ᱟᱵᱚ ᱥᱟᱱᱛᱟᱲ ᱦᱚᱯᱚᱱ ᱫᱚ ᱥᱮᱸᱫᱽᱨᱟ ᱠᱟᱨᱠᱟ, ᱵᱤᱪᱟᱹᱨ ᱟᱪᱟᱨ, ᱜᱤᱫᱽᱨᱟᱹ ᱪᱮ ᱦᱟᱲᱟᱢ ᱦᱚᱲ ᱡᱚᱛᱚ ᱜᱮ ᱵᱟᱨᱟᱵᱟᱹᱨᱤ ᱞᱮᱜᱽ ᱵᱷᱟᱜᱽ ᱠᱚ ᱧᱟᱢᱟ ᱾ ᱟᱨ ᱟᱪᱟᱨ ᱵᱤᱪᱟᱹᱨ ᱨᱮ ᱨᱚᱲ ᱨᱮᱱᱟᱜ ᱫᱟᱣ ᱡᱚᱛᱚ ᱦᱚᱲ ᱜᱮᱠᱚ ᱨᱚᱲ ᱫᱟᱲᱮᱭᱟᱜᱼᱟ ᱾ ᱤᱠᱷᱟᱹᱱ ᱦᱟᱺᱰᱤ ᱯᱟᱹᱨᱩᱣᱟᱹ ᱧᱩ ᱵᱩᱞ ᱠᱟᱛᱮ ᱫᱚᱨᱵᱟᱨ ᱨᱮ ᱨᱚᱲ ᱫᱚ ᱢᱟᱱᱟ ᱜᱮᱭᱟ ᱾ ᱫᱚᱨᱵᱟᱨ ᱛᱟᱞᱟᱨᱮ ᱩᱫᱩᱜ ᱪᱮ ᱠᱚᱲᱟᱢ ᱫᱟᱞ ᱠᱟᱛᱮ ᱜᱟᱯᱟᱞ ᱢᱟᱨᱟᱣ ᱦᱚᱸ ᱢᱟᱱᱟ ᱜᱮᱭᱟ ᱾