ᱚᱦᱬᱮ

ᱚᱦᱬᱮ ᱨᱚᱲ ᱫᱚ ᱚᱬᱮ ᱨᱚᱲ ᱠᱷᱚᱱ ᱦᱮᱡ ᱟᱠᱟᱱᱟ ᱾ ᱚᱬᱮ ᱨᱮᱱᱟᱜ ᱢᱮᱱᱮᱛ ᱫᱚ ᱧᱩᱢ ᱥᱟᱨᱦᱟᱣ ᱠᱟᱛᱮ,ᱟᱡ ᱴᱷᱮᱱ ᱟᱯᱱᱟᱨᱚᱜ , ᱫᱩᱞᱟᱹᱲᱚᱜ , ᱜᱩᱸᱜᱩᱫᱚᱜ , ᱥᱚᱦᱟᱜᱚᱜ , ᱥᱩᱨᱚᱜ ,ᱞᱮᱠᱟᱱ ᱥᱟᱨᱦᱟᱣ ᱱᱮᱦᱚᱨ ᱠᱟᱱᱟ ᱾ ᱱᱚᱶᱟ ᱫᱚ ᱦᱚᱲ ᱞᱟᱹᱜᱤᱫ ᱦᱚᱸ ᱵᱚᱝᱜᱟ ᱛᱟᱞᱟ ᱟᱠᱟᱱ ᱦᱟᱯᱲᱟᱢ ᱞᱟᱹᱜᱤᱫ ᱦᱚᱸ ᱦᱩᱭ ᱫᱟᱲᱮᱭᱟᱜ-ᱟ ᱾ ᱢᱟᱹᱱᱢᱤ ᱞᱟᱹᱜᱤᱫ ᱫᱚ ᱥᱚᱦᱨᱟᱭ ᱜᱟᱹᱭ ᱫᱟᱬᱟ ᱨᱮ , ᱦᱮᱲᱦᱮᱫ ᱥᱮᱨᱮᱧ ᱨᱮ ᱟᱸᱡᱚᱢᱚᱜ-ᱟ ᱾ ᱵᱚᱝᱜᱟ ᱛᱟᱞᱟ ᱟᱠᱟᱱ ᱦᱟᱯᱲᱟᱢ ᱠᱚ ᱞᱟᱹᱜᱤᱫ ᱫᱚ ᱚᱠᱛᱚ ᱡᱟᱹᱱᱤᱡ ᱡᱟᱱᱟᱢ ᱢᱟᱦᱟ ᱜᱩᱨ ᱢᱟᱦᱟ ᱠᱚᱨᱮ ᱟᱸᱡᱚᱢᱚᱜ-ᱟ ᱾

ᱟᱭᱳ ᱚᱦᱬᱮ

ᱡᱟᱱᱟᱢ ᱟᱭᱳ ᱜᱳᱢ ᱡᱟᱱᱟᱢ ᱠᱤᱫᱤᱧ,

ᱠᱚᱞᱮ ᱵᱟᱞᱮᱨᱮᱢ ᱦᱟᱨᱟ ᱠᱤᱫᱤᱧ,

ᱤᱧ ᱛᱟᱦᱮᱸᱱ ᱫᱤᱥᱚᱢ ᱟᱭᱳ ᱜᱳ,

ᱪᱟᱜ ᱵᱟᱢ ᱮᱢᱟᱫᱤᱧ ᱾ [᱒ ᱫᱷᱟᱣ]

ᱡᱟᱱᱟᱢ ᱟᱲᱟᱝ ᱴᱟᱲᱟᱝ ᱴᱟᱲᱟᱝ,

ᱢᱮᱱᱟᱜ ᱟᱠᱟᱱ ᱨᱟᱲᱟᱝ ᱨᱟᱲᱟᱝ,

ᱚᱞ ᱪᱤᱠᱤ ᱦᱚᱦᱚ ᱟᱢᱟᱭ,

ᱫᱮᱞᱟᱝ ᱢᱟᱲᱟᱝ ᱢᱟᱲᱟᱝ ᱾ [᱒ ᱫᱷᱟᱣ]

ᱥᱟᱨᱱᱟ ᱫᱷᱚᱨᱚᱢ ᱨᱤᱞᱟᱹ ᱢᱟᱞᱟ,

ᱥᱟᱶᱦᱮᱫ ᱢᱟ ᱵᱤᱨ ᱛᱟᱞᱟᱨᱮ,

ᱥᱚᱱᱟ ᱪᱟᱛᱚᱢ ᱛᱮ ᱩᱢᱩᱞ ᱠᱟᱜ ᱢᱮ,

ᱡᱟᱦᱮᱨ ᱢᱟ ᱜᱟᱲ ᱛᱟᱞᱟᱨᱮ ᱾ [᱒ ᱫᱷᱟᱣ]

ᱜᱩᱨᱩ ᱚᱦᱬᱮ

ᱡᱟᱱᱟᱢ ᱞᱮᱱᱟᱢ ᱨᱟᱹᱜᱷᱩ ᱢᱩᱨᱢᱩ, ᱟᱢᱜᱮ ᱚᱞ ᱜᱩᱨᱩ, ᱟᱞᱮ ᱥᱤᱠᱷᱟᱹᱣ ᱮ ᱵᱷᱮᱡᱟ ᱞᱮᱫ ᱢᱮ, ᱟᱢ ᱫᱚ ᱢᱟᱨᱟᱝ ᱵᱳᱨᱳ ᱾

ᱢᱟᱹᱱᱢᱤ ᱨᱩᱯᱛᱮ ᱥᱮᱨᱢᱟ ᱵᱚᱸᱜᱟ, ᱟᱢ ᱫᱚᱢ ᱟᱬᱜᱚ ᱞᱮᱱ, ᱦᱤᱡᱩᱜ ᱦᱤᱡᱩᱜ ᱛᱮ ᱟᱞᱮ ᱜᱟᱫᱮᱞ ᱛᱮ, ᱟᱢ ᱫᱚᱢ ᱛᱟᱭᱚᱢ ᱞᱮᱱ ᱾

ᱮᱢᱟᱫ ᱞᱮᱭᱟᱢ ᱚᱞ ᱪᱤᱠᱤ, ᱵᱤᱫᱩ ᱪᱟᱸᱫᱟᱱ ᱥᱟᱹᱠᱷᱤ, ᱚᱠᱚᱭ ᱧᱮᱞ ᱛᱟᱢ ᱟᱢ ᱵᱟᱝᱠᱟᱱ, ᱫᱩᱞᱟᱹᱲᱤ ᱚᱞ ᱪᱤᱠᱤ ᱾

ᱦᱚᱦᱚ ᱟᱢᱟᱞᱮ ᱦᱟᱞᱚ ᱵᱟᱛᱚ, ᱜᱚᱰᱚᱜ ᱠᱟᱱᱟᱞᱮ ᱡᱚᱛᱚ, ᱟᱞᱚᱢ ᱩᱠᱩᱱᱟ ᱫᱩᱜ ᱠᱟᱜ ᱢᱮ, ᱢᱟᱞᱚᱴᱚᱜ ᱠᱟᱱ ᱡᱚᱛᱚ ᱾

ᱵᱟᱢ ᱥᱚᱫᱚᱨᱚᱜ ᱫᱟᱱᱟᱝ ᱠᱚᱜ ᱢᱮ, ᱟᱢ ᱜᱮ ᱦᱚᱲ ᱠᱚ ᱨᱚᱲ ᱢᱮ , ᱠᱟᱹᱯᱤ ᱰᱩᱝᱜᱽᱨᱤ ᱫᱷᱤᱨᱤ ᱫᱚᱞᱟᱱ ᱨᱮ, ᱪᱟᱹᱯᱩ ᱠᱟᱛᱮ ᱠᱚ ᱨᱚᱲ ᱢᱮ ᱾

ᱟᱫᱚᱜ ᱠᱟᱱᱟ ᱥᱚᱱᱮᱨ ᱥᱟᱨᱱᱟ, ᱧᱩᱛᱩᱢᱚᱜ ᱠᱟᱱ ᱯᱷᱟᱹᱨᱱᱟ, ᱟᱸᱡᱮᱫᱚᱜ ᱠᱟᱱ ᱥᱟᱶᱛᱟ ᱡᱷᱟᱨᱱᱟ, ᱵᱮᱱᱟᱣᱜ ᱠᱟᱱᱟ ᱠᱷᱮᱨᱱᱟ ᱾

ᱦᱟᱸᱰᱮ ᱱᱷᱟᱰᱮ ᱵᱟᱞᱮ ᱩᱪᱟᱹᱲᱚᱜ, ᱡᱮᱢᱚᱱ ᱟᱞᱚᱞᱮ ᱩᱡᱟᱹᱲᱚᱜ, ᱠᱷᱚᱡᱚᱜ ᱠᱟᱱᱟ ᱞᱮ ᱥᱟᱨᱱᱟ ᱜᱟᱡᱟᱲᱚᱜ, ᱤᱱᱟᱹᱜᱮ ᱟᱢ ᱥᱟᱶ ᱨᱚᱯᱚᱲᱚᱜ ᱾

ᱵᱟᱨᱦᱮ ᱡᱚᱱᱚᱲ

ᱟᱭᱳ ᱚᱦᱬᱮ ᱫᱚ , ᱟᱡᱚᱢ ᱠᱟᱛᱮ ᱪᱮᱫᱟᱜ ᱟᱨ ᱜᱩᱨᱩ ᱚᱦᱬᱮ ᱫᱚ ᱢᱚᱴ ᱛᱮ ᱜᱟᱵᱟᱱᱟᱜ ᱠᱟᱱᱟ ᱾