ᱜᱚᱡ ᱜᱩᱨ ᱚᱠᱛᱚ ᱨᱮᱱᱟᱜ ᱠᱟ.ᱢᱤ ᱠᱚ

ᱥᱟᱱᱛᱟᱲ ᱦᱚᱲ ᱠᱚᱣᱟᱜ ᱚᱲᱟᱜ ᱠᱚᱨᱮ ᱦᱚᱲ ᱠᱚᱠᱚ ᱜᱚᱡ ᱜᱩᱨ ᱞᱮᱱᱠᱷᱟᱱ, ᱚᱱᱟ ᱨᱮᱱᱟᱜ ᱠᱟ.ᱢᱤ ᱠᱚ ᱺ- ᱫᱩᱠ ᱟᱠᱟᱱ ᱦᱚᱲ, ᱢᱟ.ᱡᱷᱤ ᱵᱟᱵᱟᱭ ᱞᱟ.ᱭ ᱵᱷᱤᱲᱟ.ᱣ ᱟᱭ ᱠᱷᱟᱱᱜᱮ ᱢᱟ.ᱡᱷᱤ ᱵᱟᱵᱟ ᱫᱚ ᱜᱳᱰᱮᱛ ᱟᱛᱮ ᱟ.ᱛᱩᱨᱤᱱ ᱥᱟᱱᱟᱢ ᱦᱚᱲ ᱠᱚᱣᱟᱜ ᱚᱲᱟᱜ ᱨᱟᱪᱟ ᱨᱮ ᱥᱮᱴᱮᱨ ᱠᱟᱛᱮ ᱢᱤᱫᱴᱟᱹᱝ ᱦᱟᱲᱟᱢ ᱟᱨ ᱢᱤᱫᱴᱟᱹᱝ ᱵᱩᱰᱷᱤ ᱜᱚᱜ ᱥᱟᱦᱟᱱ ᱜᱤᱰᱤ ᱞᱟᱹᱜᱤᱫ ᱮ ᱦᱚᱦᱚ ᱡᱟᱣᱨᱟ ᱦᱚᱪᱚ ᱠᱚᱣᱟ ᱾ ᱟ.ᱛᱩ ᱥᱟᱱᱟᱢ ᱦᱚᱲ ᱠᱚ ᱩᱱᱨᱮ ᱟ.ᱛᱩ ᱨᱤᱱᱤᱡ ᱩᱱᱤ ᱫᱩᱠ ᱟᱠᱟᱱᱮ ᱦᱚᱲ ᱴᱷᱮᱱ ᱥᱚᱦᱚᱨ ᱥᱮᱴᱮᱨ ᱠᱟᱛᱮ ᱥᱟᱱᱟᱢ ᱞᱮᱠᱟᱱᱟᱜ ᱠᱟ.ᱢᱤ ᱨᱮᱠᱚ ᱥᱚᱦᱚᱫ ᱮᱭᱟ ᱾ ᱡᱮ ᱞᱮᱠᱟ ᱺ-ᱯᱮᱲᱟ ᱯᱟᱺᱦᱬᱟ. ᱠᱚᱴᱷᱮᱱ ᱫᱩᱠ ᱟᱠᱟᱱ ᱨᱮᱱᱟᱜ ᱠᱟᱛᱷᱟ ᱠᱚ ᱞᱟ.ᱭ ᱵᱷᱤᱲᱟ.ᱣ, ᱜᱚᱡ ᱦᱚᱲᱢᱚ ᱢᱟᱲ ᱜᱷᱟ.ᱴᱤ ᱛᱮ ᱤᱫᱤ ᱞᱟᱦᱟ ᱨᱮ ᱡᱟᱜᱮ ᱢᱮᱱᱟᱜ ᱟᱱ ᱚᱱᱟ ᱵᱟᱠᱷᱨᱟ ᱛᱮ ᱥᱟᱱᱟᱢ ᱞᱮᱠᱟᱱᱟᱜ ᱠᱟ.ᱢᱤ ᱠᱚ ᱮᱢᱟᱱ ᱾

ᱜᱚᱡ ᱵᱮᱣᱨᱟ ᱞᱟ.ᱭ ᱞᱟ.ᱜᱤᱫ ᱛᱮ ᱯᱮᱲᱟ ᱯᱟ.ᱦᱲᱟ. ᱠᱚᱴᱷᱮᱱ ᱚᱱᱮ ᱮᱠᱞᱟ ᱫᱚ ᱵᱟᱝᱠᱚ ᱠᱳᱞ ᱠᱚᱣᱟ ᱾ ᱠᱚᱢ ᱠᱟᱭᱛᱮ ᱵᱟᱨ ᱦᱚᱲ ᱫᱚ ᱠᱤᱱ ᱪᱟᱞᱟᱜ ᱜᱮᱭᱟ ᱾ ᱜᱚᱡ ᱦᱚᱲᱢᱚ ᱠᱚ ᱥᱮᱸᱜᱮᱞᱟᱜ ᱠᱷᱟᱱ ᱥᱟᱱᱟᱢ ᱟᱛᱳ ᱦᱚᱲ ᱛᱮ ᱥᱟᱦᱟᱱ ᱠᱚᱠᱚ ᱢᱟᱜ ᱡᱟᱣᱨᱟᱭᱟ ᱾ ᱥᱟᱦᱟᱱ ᱢᱟᱜ ᱞᱟ.ᱜᱤᱫ ᱤᱱᱟ. ᱦᱤᱞᱚᱜ ᱡᱟᱦᱟᱸ ᱴᱟᱸᱜᱟ, ᱵᱩᱰᱤᱭᱟᱹ ᱠᱚ ᱞᱟᱜᱟᱣᱟ, ᱚᱱᱟ ᱫᱚ ᱚᱲᱟᱜ ᱨᱤᱱᱤᱡ ᱢᱟᱨᱟᱝ ᱠᱚᱲᱟ ᱵᱟᱝ ᱨᱮᱫᱚ ᱵᱚᱝᱥᱚ ᱨᱤᱱᱤᱡ ᱡᱟᱦᱟᱸᱭ ᱜᱮ ᱢᱤᱫ ᱦᱚᱲ ᱚᱲᱟᱜ ᱵᱷᱤᱛᱨᱤ ᱠᱷᱚᱱ ᱛᱟᱨᱮᱱ ᱨᱮ ᱜᱚᱜ ᱠᱟᱛᱮᱫ ᱵᱟᱦᱨᱮ ᱛᱮᱭ ᱩᱰᱩᱠ ᱟ.ᱜᱩᱭᱛᱮ ᱚᱠᱟ ᱫᱟᱨᱮ ᱨᱮᱱᱟᱜ ᱥᱟᱦᱟᱱ ᱠᱚ ᱢᱟᱜᱼᱟ, ᱩᱱᱤ ᱜᱮ ᱞᱟᱦᱟᱛᱮ ᱯᱮ ᱫᱷᱟᱣ ᱚᱱᱟ ᱫᱟᱨᱮ ᱨᱮ ᱩᱭᱩᱜᱟ ᱾ ᱚᱱᱟ ᱛᱟᱭᱚᱢ ᱥᱟᱱᱟᱢ ᱟᱛᱳ ᱦᱚᱲ ᱠᱚᱛᱮ ᱟᱫᱚ ᱠᱚ ᱢᱟᱜ ᱡᱟᱣᱨᱟᱭᱟ ᱾ ᱢᱟᱲ ᱜᱷᱟᱱ.ᱴᱤ ᱨᱮ ᱰᱷᱚᱰᱟ ᱞᱟ ᱞᱟ.ᱜᱤᱫ ᱠᱩᱰᱤ ᱦᱚᱸ ᱚᱱᱮ ᱴᱟᱸᱜᱟ ᱥᱮ ᱵᱩᱰᱭᱟ. ᱞᱮᱠᱟᱜᱮ ᱚᱲᱟᱜ ᱵᱷᱤᱛᱨᱤ ᱠᱷᱚᱱ ᱛᱟᱨᱮᱱ ᱨᱮ ᱜᱚᱜ ᱠᱟᱛᱮᱫ ᱵᱟᱦᱨᱮ ᱛᱮ ᱩᱰᱩᱠ ᱟ.ᱜᱩ ᱦᱩᱭᱩᱜᱼᱟ ᱾ ᱜᱚᱡ ᱜᱩᱨ ᱟᱠᱟᱱ ᱚᱠᱛᱚ ᱵᱮᱜᱚᱨ ᱠᱩᱰᱤ ᱴᱟᱸᱜᱟ ᱫᱚ ᱟᱲᱟᱜ ᱠᱷᱚᱱ ᱵᱟᱝ ᱠᱚ ᱜᱚᱜ ᱩᱰᱩᱠᱟ ᱾

ᱯᱮᱲᱟ ᱚᱲᱟᱜ ᱵᱮᱣᱨᱟ ᱥᱮᱴᱮᱨ ᱟᱨ ᱥᱟᱨᱟ ᱥᱮᱸᱜᱮᱞ ᱥᱟᱦᱟᱱ ᱢᱟᱜ, ᱰᱷᱚᱰᱟ ᱞᱟ- ᱠᱟᱹᱢᱤ ᱠᱚ ᱫᱚ ᱡᱩᱣᱟᱹᱱ ᱫᱷᱟᱨᱟ ᱠᱚᱲᱟ ᱦᱚᱯᱚᱱ ᱠᱚ ᱵᱷᱮᱡᱟ ᱠᱚᱣᱟ ᱾ ᱚᱲᱟᱜ ᱨᱮ ᱦᱟᱲᱟᱢ ᱠᱚ ᱫᱚ ᱟᱫᱽᱣᱟ ᱦᱳᱲᱳ, ᱜᱩᱨᱤᱡ, ᱫᱩᱨᱤᱵ ᱫᱚᱦᱚ ᱪᱩᱠᱟᱹᱜ, ᱵᱚᱲ ᱥᱮᱸᱜᱮᱞ, ᱢᱤᱫᱴᱟᱹᱝ ᱡᱤᱣᱤᱫ ᱥᱤᱢ, ᱮᱢᱟᱱ ᱠᱚ ᱧᱟᱢ ᱡᱟᱣᱨᱟᱭᱟ ᱾ ᱵᱩᱰᱷᱤ ᱦᱚᱲ ᱠᱚ ᱫᱚ ᱵᱮᱨᱮᱞ ᱥᱟᱥᱟᱝ, ᱟᱫᱽᱣᱟ ᱦᱳᱲᱳ ᱪᱟᱣᱞᱮ ᱠᱚ ᱨᱤᱫ ᱜᱩᱸᱰᱟᱹᱭᱟ ᱾ ᱚᱱᱟᱠᱚ ᱧᱟᱢ ᱛᱟᱭᱚᱢ ᱵᱚᱸᱜᱟ ᱟᱠᱟᱱ ᱦᱚᱲ ᱤᱡ ᱢᱟᱨᱟᱝ ᱦᱚᱯᱚᱱ, ᱟᱨ ᱵᱟᱝᱠᱷᱟᱱ ᱚᱸᱥᱚ ᱠᱚᱲᱟ ᱦᱚᱯᱚᱱ ᱫᱚ ᱟᱠᱚᱣᱟᱜ ᱨᱟᱪᱟ ᱨᱮ ᱢᱤᱫ ᱵᱤᱛᱟᱹ ᱚᱥᱟᱨ ᱨᱮ ᱜᱩᱞᱟᱹᱤ ᱛᱮ ᱜᱩᱨᱤᱡᱼᱟᱭ ᱾ ᱚᱱᱟ ᱪᱮᱛᱟᱱ ᱨᱮ ᱟᱡᱟᱜ ᱛᱤ ᱛᱮ ᱯᱮ ᱪᱩᱯᱩᱫ ᱟᱫᱽᱣᱟ ᱦᱳᱲᱳᱭ ᱫᱚᱦᱚᱭᱟ ᱾ ᱚᱱᱟᱫᱚ ᱛᱟᱭᱚᱢ ᱴᱷᱮᱠᱟ ᱵᱟᱝ ᱠᱷᱟᱱ ᱜᱩᱦᱬᱤ ᱛᱮᱠᱚ ᱴᱚᱯᱟᱨ ᱠᱟᱜᱼᱟ, ᱡᱮᱢᱚᱱ ᱥᱮᱛᱟ, ᱯᱩᱥᱤ ᱪᱮ ᱮᱴᱟᱜ ᱡᱤᱣᱤ ᱟᱱ ᱠᱚ ᱟᱞᱚ ᱠᱚ ᱞᱮᱵᱮᱫ ᱞᱚᱢᱚᱴ ᱢᱟ ᱾ (ᱟᱵᱚ ᱥᱟᱱᱛᱟᱲ ᱦᱚᱲ ᱠᱚ ᱞᱟᱹᱜᱤᱫ ᱨᱤᱛ ᱢᱮᱱᱟᱜᱼᱟ ᱡᱮ, ᱟᱵᱚ ᱜᱤᱫᱽᱨᱟᱹᱭ ᱡᱟᱱᱟᱢ ᱠᱟᱛᱮ ᱪᱷᱟᱹᱴᱭᱟᱹᱨ ᱮᱱᱠᱷᱟᱱ ᱜᱮ ᱟᱡᱟᱜ ᱧᱩᱛᱩᱢ ᱛᱮ ᱢᱤᱫᱴᱟᱹᱝ ᱠᱟᱸᱥᱟ ᱵᱟᱹᱴᱤ ᱵᱚᱱ ᱠᱤᱨᱤᱧᱟ ᱾ ᱟᱨ ᱚᱱᱟ ᱠᱟᱸᱥᱟ ᱵᱟᱹᱴᱤ ᱫᱚ ᱱᱚᱸᱠᱟ ᱜᱚᱡ ᱮᱱ ᱛᱟᱭᱚᱢ ᱟᱡ ᱥᱟᱶᱛᱮ ᱛᱮ ᱢᱟᱬᱜᱷᱟᱹᱴᱤ ᱛᱮ ᱤᱫᱤᱜᱼᱟ) ᱾ ᱛᱟᱭᱚᱢ ᱩᱱᱤ ᱜᱚᱡ ᱦᱚᱲ ᱫᱚ ᱚᱲᱟᱜ ᱵᱷᱤᱛᱤᱨ ᱠᱷᱚᱱ ᱯᱟᱨᱠᱚᱢ ᱥᱟᱶᱛᱮ ᱠᱚ ᱛᱩᱞ ᱚᱰᱚᱜ ᱮᱭᱟ ᱟᱨ ᱯᱚᱴᱚᱢ ᱴᱷᱮᱠᱟ ᱪᱮ ᱜᱩᱦᱬᱤ ᱠᱚ ᱚᱪᱚᱜ ᱛᱮ ᱚᱱᱟ ᱟᱫᱽᱣᱟ ᱦᱳᱲᱳ ᱫᱚᱦᱚ ᱟᱠᱟᱱ ᱴᱷᱟᱶ ᱨᱮᱠᱚ ᱫᱚᱦᱚ ᱮᱭᱟ ᱫᱩᱠᱷᱤᱱ ᱥᱮᱱ ᱵᱚᱦᱚᱜ ᱠᱟᱛᱮ, ᱟᱨ ᱱᱟᱶᱟ ᱯᱩᱸᱰ ᱠᱤᱪᱨᱤᱛ ᱛᱮᱠᱚ ᱩᱭᱩᱸ ᱮᱭᱟ ᱾ ᱛᱟᱭᱚᱢ ᱟᱠᱚ ᱚᱱᱟᱜ ᱠᱚᱲᱟ ᱦᱚᱯᱚᱱ ᱟᱨ ᱵᱟᱝ ᱚᱝᱥᱚ ᱠᱚᱲᱟ ᱦᱚᱲ, ᱩᱱᱤ ᱜᱚᱡ ᱦᱚᱲ ᱟᱜ ᱠᱟᱸᱥᱟ ᱵᱟᱹᱴᱤ ᱨᱮ, ᱨᱤᱛ ᱵᱮᱨᱮᱞ ᱥᱟᱥᱟᱝ ᱮ ᱞᱮᱣᱦᱟᱭᱟ ᱾ ᱚᱱᱟ ᱥᱟᱥᱟᱝ ᱫᱟᱜ ᱛᱮ ᱩᱱᱤ ᱜᱚᱡ ᱦᱚᱲ ᱟᱜ ᱢᱮᱫᱢᱩᱴᱷᱟᱹᱱ ᱨᱮ ᱯᱮ ᱫᱮᱠᱷᱟᱣ ᱮ ᱟᱹᱨᱩᱵ ᱟᱬᱜᱚ ᱮᱭᱟ ᱾ ᱚᱱᱟ ᱛᱟᱭᱚᱢ ᱡᱚᱡᱚᱢ ᱛᱤ, ᱞᱮᱸᱜᱟ ᱛᱤ, ᱡᱚᱡᱚᱢ ᱡᱟᱸᱜᱟ ᱟᱨ ᱞᱮᱸᱜᱟ ᱡᱟᱸᱜᱟᱭ ᱟᱹᱨᱩᱵ ᱮᱭᱟ ᱾ ᱚᱱᱟ ᱛᱟᱭᱚᱢ ᱯᱟᱨᱠᱚᱢ ᱞᱟᱛᱟᱨ ᱠᱷᱚᱱ ᱢᱤᱫ ᱪᱩᱯᱩᱫ ᱦᱳᱲᱳ ᱜᱚᱡ ᱦᱚᱲ ᱟᱜ ᱡᱚᱡᱚᱢ ᱛᱤ ᱨᱮ ᱫᱚᱦᱚ ᱠᱟᱛᱮ ᱟᱛᱟᱝ ᱨᱩᱣᱟᱹᱲ ᱟᱭ ᱾ ᱚᱱᱠᱟᱜᱮ ᱞᱮᱸᱜᱟ ᱛᱤ ᱨᱮ ᱦᱚᱸ ᱢᱤᱫ ᱪᱩᱯᱩᱫ ᱦᱳᱲᱳ ᱫᱚᱦᱚ ᱠᱟᱛᱮ ᱟᱛᱟᱝ ᱨᱩᱣᱟᱹᱲ ᱟᱭ ᱾ ᱚᱱᱟ ᱛᱟᱭᱚᱢ ᱯᱟᱨᱠᱚᱢ ᱥᱟᱶ ᱠᱚ ᱛᱩᱞ ᱠᱟᱛᱮ ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱢᱮᱱ ᱟᱛᱮ ᱯᱮ ᱫᱮᱠᱷᱟ ᱚᱱᱟ ᱴᱷᱟᱶ ᱨᱮ ᱠᱚ ᱟᱹᱪᱩᱨ ᱮᱭᱟ ᱟᱨ ᱫᱚᱻᱵᱟᱹᱴᱤ ᱠᱚ ᱤᱫᱤ ᱮᱭᱟ ᱾ (ᱚᱱᱟ ᱦᱳᱲᱳ ᱫᱚ ᱦᱤᱡᱩᱜ ᱪᱟᱥ ᱨᱮ ᱵᱟᱹᱫᱽ ᱨᱮ ᱠᱚ ᱮᱨᱟ ᱾) ᱫᱚ-ᱵᱟᱹᱴᱤ ᱨᱮ ᱦᱚᱸ ᱚᱱᱟ ᱠᱟᱸᱥᱟ ᱵᱟᱹᱴᱤ ᱨᱮᱱᱟᱜ ᱥᱟᱥᱟᱝ ᱫᱟᱜ ᱛᱮ ᱟᱠᱚ ᱚᱲᱟᱜ ᱠᱩᱲᱤ ᱦᱚᱲ ᱢᱟᱲᱟᱝ ᱛᱮ ᱢᱮᱫᱢᱩᱴᱷᱟᱹᱱ, ᱛᱤ ᱟᱨ ᱡᱟᱸᱜᱟᱭ ᱟᱹᱨᱩᱵ ᱮᱭᱟ ᱾ ᱚᱱᱟ ᱛᱟᱭᱚᱢ ᱥᱟᱨᱮᱡ ᱟᱠᱟᱱ ᱟᱠᱚ ᱟᱲᱟᱝ ᱦᱚᱲ, ᱯᱮᱲᱟ ᱯᱟᱹᱦᱬᱟ ᱮᱢᱟᱱ ᱜᱚᱨᱚᱡᱽ ᱟᱱ ᱦᱚᱲ ᱠᱚ ᱚᱱᱟ ᱥᱟᱥᱟᱝ ᱫᱟᱜ ᱛᱮ ᱩᱱᱤ ᱜᱚᱡ ᱦᱚᱲ ᱠᱚ ᱟᱹᱨᱩᱵ ᱮᱭᱟ ᱾ ᱚᱱᱟ ᱥᱟᱹᱛ ᱮᱱ ᱛᱟᱭᱚᱢ ᱚᱸᱰᱮ ᱦᱚᱸ ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱢᱮᱱ ᱟᱛᱮ ᱯᱮ ᱫᱮᱠᱷᱟ ᱠᱚ ᱟᱹᱪᱩᱨ ᱮᱭᱟ ᱟᱨ ᱵᱟᱝ ᱛᱤᱸᱜᱩ ᱠᱟᱛᱮ, ᱚᱱᱟ ᱠᱟᱸᱥᱟ ᱵᱟᱹᱴᱤ, ᱥᱤᱢ, ᱵᱚᱲ ᱥᱮᱸᱜᱮᱞ, ᱫᱩᱨᱤᱵᱽ ᱫᱚᱦᱚ ᱪᱩᱠᱟᱹᱜ, ᱨᱤᱫ ᱟᱠᱟᱱ ᱟᱫᱽᱣᱟ ᱪᱟᱣᱞᱮ ᱟᱨ ᱥᱟᱥᱟᱝ ᱟᱨ ᱮᱢᱟᱱ ᱞᱟᱹᱠᱛᱤ ᱟᱜ ᱥᱟᱢᱟᱱ ᱟᱛᱮ ᱡᱚᱛᱚ ᱠᱚᱲᱟ ᱦᱚᱯᱚᱱ ᱠᱚ ᱢᱟᱬᱜᱷᱟᱹᱴᱤ ᱠᱚ ᱥᱮᱱᱚᱜᱼᱟ ᱾ ᱠᱩᱲᱤ ᱦᱚᱲ ᱠᱚ ᱫᱚ ᱩᱢᱩᱠ ᱠᱚ ᱥᱮᱱᱚᱜᱼᱟ ᱾ ᱱᱚᱶᱟ ᱠᱟᱹᱢᱤ ᱠᱚ ᱫᱚ ᱟᱵᱚ ᱦᱚᱲ ᱛᱮ ᱫᱚ ᱜᱚᱡ ᱰᱩᱞᱩᱰᱩᱝ ᱜᱤᱰᱤ ᱠᱟᱹᱢᱤ ᱦᱚᱨᱟ ᱦᱚᱸ ᱠᱚ ᱢᱮᱱᱟ ᱾

ᱥᱟ.ᱠᱷᱭᱟ.ᱛ ᱥᱟᱯᱲᱟᱣ