ᱟᱵᱟ
ᱟᱵᱟ ᱟᱵᱟ ᱨᱮᱱᱟᱜ ᱢᱮᱱᱮᱛ ᱫᱚ ᱟᱭᱳ ᱟᱨ ᱵᱟᱵᱟ ᱠᱟᱱᱟ ᱾ ᱱᱚᱶᱟ ᱠᱤᱱ ᱨᱚᱲ ᱨᱮᱱᱟᱜ ᱦᱚᱦᱚ ᱡᱚᱠᱷᱟᱜ ᱫᱩᱞᱟᱹᱲ ᱨᱚᱲ ᱫᱚ ᱭᱳ ᱟᱨ ᱵᱟ ᱦᱚᱸᱵᱚ ᱢᱮᱱ ᱜᱮᱭᱟ ᱾ ᱯᱩᱭᱞᱩ ᱛᱮ ᱜᱤᱫᱽᱨᱟᱹ ᱨᱮᱵᱚ ᱪᱮᱫᱟ ᱾ ᱢᱟᱬᱟᱝ ᱫᱚ ᱚᱶᱟ ᱚᱣᱟᱝ ᱨᱟᱜ ᱱᱮᱦᱚᱨᱟ ᱾ ᱢᱮᱱᱫᱚ ᱚᱣᱟᱝ ᱨᱤᱱ ᱱᱩᱠᱤᱣ ᱟᱭᱳ ᱟᱨ ᱵᱟᱵᱟ ᱞᱟᱹᱜᱤᱫ ᱾ ᱱᱩᱠᱤᱱ ᱫᱚ ᱨᱚᱲ ᱠᱟᱱ ᱞᱟᱸᱫᱽ ᱠᱟᱱ ᱵᱚᱝᱜᱟ ᱠᱟᱱᱟ ᱠᱤᱱ ᱾
ᱟᱭᱳ ᱥᱟᱯᱲᱟᱣ
ᱟᱭᱳ ᱫᱚ ᱫᱷᱟᱹᱨᱛᱤ ᱨᱤᱱᱤᱡ ᱯᱩᱭᱞᱩ ᱠᱟᱱᱟᱭ , ᱡᱟᱦᱟᱸᱭ ᱦᱚᱲᱢᱚ ᱟᱱᱛᱚ ᱡᱤᱣᱤ ᱥᱟᱶᱛᱮ ᱥᱟᱶᱛᱟ ᱛᱟᱞᱟ ᱛᱮ ᱟᱹᱜᱩ ᱵᱚᱱᱟ ᱾ ᱩᱱᱤ ᱫᱚ ᱩᱭ ᱢᱮᱱᱛᱮ ᱜᱚᱝ ᱵᱚᱱᱟᱭ , ᱜᱩᱸᱜᱩᱫ ᱩᱠᱩ ᱠᱟᱛᱮ ᱦᱟᱨᱟ ᱵᱚᱱᱟᱭ ᱾ ᱫᱷᱟᱹᱨᱛᱤ ᱟᱭᱳ ᱞᱮᱠᱟ ᱟᱡᱟᱜ ᱢᱟᱭᱟᱢ ᱟᱹᱨᱩ ᱠᱟᱛᱮ ᱛᱚᱣᱟ ᱢᱮᱱᱛᱮ ᱟᱵᱚ ᱡᱚᱢᱟᱜ ᱮ ᱮᱢᱟ ᱵᱚᱱᱟ ᱾ ᱩᱱᱤ ᱫᱚ ᱢᱟᱹᱱᱢᱤ ᱨᱩᱯ ᱵᱚᱝᱜᱟ ᱠᱟᱱᱟᱭ ᱾ ᱟᱭᱳᱣᱟᱜ ᱛᱷᱩᱢ ᱫᱚ ᱫᱤᱱᱟᱢ ᱥᱮᱛᱟᱜ ᱦᱟᱛᱟᱣ ᱞᱮᱠᱷᱟᱱ ᱛᱟᱲᱟᱢ ᱦᱚᱨ ᱨᱮ ᱥᱟᱹᱜᱩᱱ ᱧᱟᱢᱚᱜᱼᱟ ᱾ ᱡᱟᱱᱟᱢ ᱟᱭᱳ , ᱡᱟᱦᱮᱨ ᱟᱭᱳ , ᱫᱷᱟᱹᱨᱛᱤ ᱟᱭᱳ ᱫᱚ ᱢᱤᱫ ᱞᱮᱠᱟᱱ ᱠᱚᱜᱮ ᱾ ᱚᱲᱟᱜ ᱨᱮ ᱡᱟᱱᱟᱢ ᱟᱭᱳ ᱟᱛᱩ ᱨᱮ ᱡᱟᱦᱮᱨ ᱟᱭᱳ ᱫᱤᱥᱚᱢ ᱨᱮ ᱚᱲᱚᱝ ᱛᱮ ᱫᱟᱲᱮ ᱟᱞᱟᱭ ᱟᱠᱟᱫᱼᱟᱭ ᱾
ᱵᱟᱵᱟ ᱥᱟᱯᱲᱟᱣ
ᱡᱟᱦᱟᱸᱭ ᱵᱤᱱ ᱛᱤ ᱡᱟᱸᱜᱟ ᱛᱮ ᱡᱤᱣᱤ ᱦᱟᱹᱴᱤᱧ ᱠᱟᱛᱮ ᱡᱟᱱᱟᱢᱚᱜ ᱞᱟᱹᱜᱤᱫ ᱮ ᱛᱷᱩᱢ ᱟᱵᱚᱱᱟ ᱩᱱᱤᱜᱮ ᱵᱟᱵᱟ ᱾ ᱵᱟᱵᱟ ᱮᱛᱚᱦᱚᱵ ᱡᱟᱱᱟᱢᱤᱡ ᱠᱟᱱᱟᱭ ᱾ ᱵᱟᱵᱟ ᱫᱚ ᱦᱟᱨᱟᱭ ᱫᱟᱲᱮ ᱵᱟᱹᱱᱩᱜ ᱟᱱ ᱛᱟᱭᱟ ᱾ ᱚᱱᱟᱛᱮ ᱵᱟᱵᱟ ᱫᱚ ᱛᱤ ᱡᱟᱸᱜᱟ ᱮᱢ ᱠᱟᱛᱮ ᱵᱟᱭ ᱦᱟᱨᱟ ᱫᱟᱲᱮ ᱟᱵᱚᱣᱟ ᱾ ᱚᱲᱟᱜ ᱨᱮ ᱵᱟᱵᱟ , ᱟᱹᱛᱩ ᱨᱮ ᱢᱟᱨᱟᱝ ᱵᱳᱨᱳ , ᱥᱮᱨᱢᱟ ᱨᱮ ᱥᱤᱧ ᱪᱟᱸᱫᱚ ᱚᱲᱚᱝ ᱛᱮ ᱟᱵᱚᱭ ᱮᱥᱮᱨ ᱟᱠᱟᱫ ᱵᱚᱱᱟ ᱾ ᱟᱹᱫᱚᱝ ᱠᱟᱱᱟᱭ ᱾ ᱵᱟᱵᱟ ᱴᱷᱮᱱ ᱫᱚ ᱜᱚᱲᱚ ᱟᱨ ᱫᱟᱲᱮ ᱧᱟᱢᱚᱜ-ᱟ ᱾ ᱚᱲᱟᱜ ᱨᱮ ᱵᱟᱵᱟ ᱟᱹᱛᱩ ᱨᱮ ᱢᱟᱨᱟᱝ ᱵᱳᱨᱳ ᱚᱣᱟᱝ ᱨᱮ ᱥᱤᱸᱜᱤ ᱢᱮᱱᱛᱮ ᱱᱮᱦᱚᱨ ᱞᱮᱠᱷᱟᱱ ᱜᱚᱲᱚ ᱫᱟᱲᱮ ᱧᱟᱢᱚᱜ-ᱟ ᱾ ᱚᱱᱟ ᱛᱮᱠᱚ ᱥᱮᱨᱮᱧ ᱟᱠᱟᱫ-ᱟ - ᱥᱮᱨᱮᱧ ᱡᱟᱱᱟᱢ ᱟᱹᱛᱩ ᱡᱟᱱᱟᱢ ᱫᱤᱥᱚᱢ, ᱨᱟᱹᱥᱠᱟᱹ ᱞᱟᱞᱮ ᱪᱟᱯᱮ, ᱡᱟᱱᱟᱢ ᱟᱭᱳ ᱵᱟᱵᱟ ᱠᱚᱞᱮ, ᱫᱩᱞᱟᱹᱲ ᱞᱟᱞᱮ ᱪᱟᱯᱮ ᱾ ᱦᱚᱭ ᱥᱤᱛᱩᱝ ᱨᱟᱵᱟᱝ ᱡᱟᱹᱯᱩᱫ, ᱨᱮᱸᱜᱮᱡ ᱛᱮᱛᱟᱝ ᱡᱟᱞᱟ, ᱛᱚᱣᱟ ᱫᱟᱨᱮ ᱜᱚᱢᱦᱮᱲ ᱩᱢᱩᱞ, ᱛᱟᱦᱮᱱ ᱨᱤᱞᱟᱹ ᱢᱟᱞᱟ ᱿ ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ , ᱡᱟᱭᱡᱤᱱ ᱡᱟᱦᱮᱨ ᱟᱭᱳ , ᱛᱷᱩᱢᱟᱹᱧ ᱢᱚᱬᱮ ᱠᱚ ᱛᱩᱨᱩᱭ ᱠᱚ , ᱟᱹᱭᱩᱨ ᱠᱟᱹᱧ ᱦᱟᱯᱲᱟᱢ ᱠᱚ ᱾