ᱢᱩᱬᱩᱛ ᱢᱮᱱᱩ ᱡᱷᱤᱡᱽ ᱢᱮ
ᱠᱟᱜᱚᱡᱽ
ᱠᱟᱜᱚᱡᱽ ᱵᱮᱱᱟᱣ

ᱠᱟᱜᱚᱡᱽ ᱫᱚ ᱢᱤᱫ ᱮᱛᱟᱝ ᱡᱤᱱᱤᱥ ᱠᱟᱱᱟ ᱡᱟᱦᱟᱸ ᱨᱮ ᱚᱞ ᱟᱨᱵᱟᱝ ᱪᱷᱟᱯᱟ ᱦᱩᱭᱩᱜ ᱠᱟᱱᱟ ᱾ ᱠᱟᱜᱚᱡᱽ ᱢᱩᱬ ᱞᱮᱠᱟ ᱛᱮᱫᱚ ᱚᱞ ᱟᱨᱵᱟᱝ ᱪᱷᱟᱯᱟ ᱞᱟ.ᱜᱤᱫ ᱵᱮᱵᱷᱟᱨᱚᱜ ᱠᱟᱱᱟ ᱾ ᱱᱚᱶᱟ ᱡᱤᱱᱤᱥ ᱠᱚ ᱯᱚᱴᱚᱢ ᱞᱟ.ᱜᱤᱫ ᱦᱚᱸ ᱠᱟ.ᱢᱤᱨᱮ ᱦᱟ.ᱡᱩᱜᱼᱟ ᱾ ᱢᱟ.ᱱᱢᱤᱭᱟᱜ ᱥᱟᱶᱛᱟ ᱩᱛᱱᱟ.ᱣ ᱨᱮᱦᱚᱸ ᱠᱟᱜᱚᱡᱟᱜ ᱟ.ᱰᱤ ᱢᱟᱨᱟᱝ ᱮᱱᱮᱢ ᱢᱮᱱᱟᱜᱼᱟ ᱾ ᱞᱚᱦᱚᱫ ᱥᱩᱛᱟ.ᱢ (ᱯᱷᱟᱭᱵᱚᱨ) ᱰᱷᱩᱸᱵᱟ.ᱜ ᱠᱟᱛᱮ ᱤᱱᱟ. ᱛᱟᱭᱚᱢ ᱨᱚᱦᱚᱲ ᱠᱟᱛᱮ ᱠᱟᱜᱚᱡᱽ ᱵᱮᱱᱟᱣᱜ ᱠᱟᱱᱟ ᱾ ᱱᱚᱶᱟ ᱥᱩᱛᱟ.ᱢ ᱫᱚ ᱵᱟ.ᱲᱛᱤ ᱞᱮᱠᱟᱛᱮ ᱥᱮᱞᱭᱩᱞᱚᱡᱽ ᱠᱮᱭᱟᱜ ᱞᱟ.ᱵᱤᱫᱟᱜ ᱠᱟᱱᱟ ᱡᱟᱦᱟᱸ ᱫᱚ ᱠᱟᱴ, ᱛᱟᱥᱟᱫ, ᱢᱟᱫ ᱟᱨᱵᱟᱝ ᱚᱲᱮᱡ ᱞᱩᱜᱽᱲᱤ ᱛᱮ ᱵᱮᱱᱟᱣ ᱦᱩᱭᱩᱜᱼᱟ ᱾

ᱠᱟᱜᱚᱡᱽ ᱵᱮᱱᱟᱣ ᱨᱮᱭᱟᱜ ᱛᱚᱦᱚᱨᱥᱟᱯᱲᱟᱣ

ᱫᱟᱨᱮ ᱨᱮ ᱥᱮᱥᱭᱩᱞᱚᱡᱽ ᱧᱩᱛᱩᱢᱟᱱ ᱢᱤᱫ ᱞᱮᱠᱟᱱ ᱠᱟᱨᱵᱚᱦᱟᱭᱰᱨᱮᱴ ᱛᱟᱦᱮᱸᱱᱟ ᱾ ᱫᱟᱨᱮ ᱨᱮᱭᱟᱜ ᱵᱷᱤᱛᱨᱤ ᱢᱟᱡᱽ ᱫᱚ ᱥᱮᱞᱭᱩᱞᱚᱡᱽ ᱛᱮ ᱵᱮᱱᱟᱜ ᱠᱚᱜᱼᱟ ᱾ ᱢᱩᱪᱟ.ᱫ ᱨᱮ ᱧᱮᱞ ᱞᱮᱠᱷᱟᱱ ᱫᱟᱨᱮ ᱨᱮᱭᱟᱜ ᱢᱩᱬ ᱚᱝᱜᱚᱥ ᱫᱚ ᱥᱮᱞᱭᱩᱞᱚᱡᱽ ᱜᱮ ᱾ ᱥᱮᱞᱭᱩᱞᱚᱡᱽ ᱨᱮᱭᱟᱜ ᱥᱩᱛᱟ.ᱢ (ᱯᱷᱟᱭᱵᱚᱨ) ᱢᱤᱫ ᱴᱷᱮᱱ ᱡᱚᱴᱟᱣ ᱡᱟᱣᱨᱟ ᱠᱟᱛᱮ ᱮᱛᱟᱝ ᱪᱟᱫᱚᱨ ᱞᱮᱠᱟ ᱡᱟᱦᱟᱸ ᱵᱮᱱᱟᱣᱜᱼᱟ, ᱚᱱᱟ ᱜᱮ ᱠᱟᱜᱚᱡᱽ ᱫᱚᱠᱚ ᱢᱮᱛᱟᱜᱼᱟ ᱾ ᱡᱟᱦᱟᱸ ᱜᱮ ᱫᱟᱨᱮ ᱟᱨᱵᱟᱝ ᱡᱤᱱᱤᱥ ᱡᱟᱦᱟᱸᱨᱮ ᱥᱮᱞᱭᱩᱞᱚᱡᱽ ᱵᱮᱥ ᱦᱤᱥᱟ.ᱵᱽ ᱨᱮ ᱛᱟᱦᱮᱸᱱᱟ ᱾ ᱠᱟᱜᱚᱡᱽ ᱵᱮᱱᱟᱣ ᱞᱟ.ᱜᱤᱫ ᱜᱟᱱ ᱦᱩᱭ ᱫᱟᱲᱮᱭᱟᱜᱼᱟ ᱾ ᱛᱩᱞᱟ.ᱢ ᱢᱮᱱ ᱞᱮᱠᱷᱟᱱ ᱱᱤᱨᱚᱲ ᱥᱮᱞᱩᱞᱚᱡᱽ ᱠᱟᱱᱟ ᱤᱠᱷᱟᱱ ᱠᱟᱜᱚᱡᱽ ᱵᱮᱱᱟᱣ ᱞᱟ.ᱜᱤᱫ ᱱᱚᱶᱟ ᱫᱚ ᱵᱟᱝ ᱵᱮᱵᱷᱟᱨᱚᱜ ᱠᱟᱱᱟ ᱪᱮᱫᱟᱜ ᱥᱮ ᱱᱚᱶᱟ ᱫᱚ ᱟ.ᱰᱤ ᱜᱚᱱᱚᱝ ᱟᱱᱟᱜ ᱠᱟᱱᱟ ᱟᱨ ᱢᱩᱬ ᱞᱮᱠᱟᱛᱮ ᱞᱩᱜᱽᱲᱤ ᱵᱮᱱᱟᱣ ᱠᱟ.ᱢᱤ ᱨᱮ ᱦᱟ.ᱡᱩᱜ ᱠᱟᱱᱟ ᱾ ᱢᱤᱫᱴᱟ.ᱝ ᱟᱨᱢᱤᱫᱴᱟ.ᱝ ᱥᱟᱶ ᱡᱩᱲᱟ.ᱭ ᱠᱟᱛᱮ ᱪᱟᱫᱚᱨ ᱞᱮᱠᱟ ᱨᱩᱯ ᱨᱮ ᱛᱟᱦᱮᱸ ᱫᱟᱲᱮᱭᱟᱜ ᱨᱮᱭᱟᱜ ᱜᱩᱱ ᱫᱚ ᱥᱮᱞᱭᱩᱞᱚᱡᱽ ᱨᱮᱭᱟᱜ ᱥᱩᱛᱟ.ᱢ ᱨᱮᱜᱮ ᱛᱟᱦᱮᱸᱱᱟ ᱚᱱᱟ ᱮᱛᱮᱫ ᱠᱟᱜᱚᱡᱽ ᱫᱚ ᱠᱷᱟ.ᱞᱤ ᱱᱚᱶᱟ ᱛᱮᱜᱮ ᱵᱮᱱᱟᱣ ᱦᱩᱭ ᱫᱟᱲᱮᱭᱟᱜᱼᱟ ᱾ ᱞᱩᱢᱟ.ᱝ ᱟᱨ ᱩᱞ ᱥᱩᱛᱟ.ᱢ ᱨᱮ ᱱᱚᱶᱟ ᱞᱮᱠᱟ ᱢᱤᱫ ᱴᱷᱮᱱ ᱡᱩᱲᱟ.ᱭ ᱛᱟᱦᱮᱸᱱ ᱨᱮᱭᱟᱜ ᱜᱩᱱ ᱵᱟᱝ ᱛᱟᱦᱮᱸᱱ ᱠᱷᱟ.ᱛᱤᱨ ᱠᱟᱜᱚᱡᱽ ᱵᱮᱱᱟᱣ ᱠᱟ.ᱢᱤ ᱨᱮᱫᱚ ᱵᱟᱝ ᱦᱮᱡ ᱫᱟᱲᱮᱭᱟᱜᱼᱟ ᱾ ᱡᱟᱦᱟᱸ ᱛᱤᱱᱟ.ᱜ ᱱᱤᱨᱚᱲ ᱥᱮᱞᱭᱩᱞᱚᱡᱽ ᱛᱟᱦᱮᱸᱱᱟ ᱠᱟᱜᱚᱡᱽ ᱦᱚᱸ ᱩᱱᱟ.ᱜ ᱜᱮ ᱯᱷᱟᱨᱪᱟ ᱟᱨ ᱪᱮᱦᱨᱮ ᱵᱮᱱᱟᱣ ᱜᱟᱱᱚᱜᱼᱟ ᱾ ᱚᱲᱮᱡ ᱞᱩᱜᱽᱲᱤ ᱟᱨ ᱚᱸᱡᱽᱨᱟ ᱠᱟᱜᱚᱡᱽ ᱨᱮ ᱥᱩᱨ ᱥᱩᱯᱩᱨ ᱥᱟᱭ ᱨᱟᱯᱟᱝᱜᱚᱥ ᱥᱮᱞᱭᱩᱞᱚᱡᱽ ᱛᱟᱦᱮᱸᱱᱟ ᱡᱟᱦᱟᱸ ᱠᱷᱟ.ᱛᱤᱨ ᱱᱚᱶᱟ ᱛᱮ ᱠᱟᱜᱚᱡᱽ ᱟᱞᱜᱟ ᱛᱮ ᱟᱨ ᱱᱟᱯᱟᱭ ᱵᱮᱱᱟᱣᱜᱼᱟ ᱾ ᱱᱟᱜᱟᱢᱤᱭᱟ. ᱠᱚᱣᱟᱜ ᱱᱚᱶᱟ ᱢᱚᱱᱚᱛ ᱠᱟᱱᱟ ᱡᱮ ᱯᱩᱭᱞᱩ ᱠᱟᱜᱚᱡᱽ ᱫᱚ ᱚᱲᱮᱡ ᱜᱮᱸᱫᱽᱨᱮᱡ ᱛᱮᱜᱮ ᱪᱤᱱ ᱨᱮ ᱵᱮᱱᱟᱜ ᱞᱮᱱᱟ ᱾

ᱫᱟᱨᱮ ᱨᱮ ᱥᱮᱞᱭᱩᱞᱚᱡᱽ ᱥᱟᱶ-ᱥᱟᱶ ᱛᱮ ᱮᱴᱟᱜᱟᱜ ᱟ.ᱰᱤ ᱞᱮᱠᱟᱱᱟᱜ ᱚᱝᱜᱚᱥ ᱥᱮᱞᱮᱫ ᱛᱟᱦᱮᱸ ᱠᱚᱜᱼᱟ ᱾ ᱡᱟᱦᱟᱸᱨᱮ ᱞᱤᱜᱽᱱᱤᱱ ᱟᱨ ᱯᱮᱠᱴᱤᱱ ᱟ.ᱰᱤ ᱵᱟ.ᱲᱛᱤ ᱢᱟᱛᱨᱟ ᱨᱮ ᱟᱨ ᱢᱤᱱᱮᱨᱟᱞ ᱵᱩᱞᱩᱝ ᱟᱨ ᱤᱛᱤᱞ ᱟᱨ ᱨᱚᱝ ᱞᱮᱠᱟᱱ ᱡᱤᱱᱤᱥ ᱦᱚᱸ ᱛᱤᱱᱟ.ᱝ ᱚᱝᱜᱚᱥ ᱨᱮᱫᱚ ᱛᱟᱦᱮᱸᱱᱟ ᱾ ᱱᱚᱶᱟ ᱡᱤᱱᱤᱥ ᱠᱚ ᱛᱤᱱ ᱵᱷᱩᱨ ᱞᱟ.ᱠᱛᱤ ᱞᱮᱠᱟ ᱚᱝᱜᱚᱥ ᱩᱰᱩᱠ ᱜᱤᱰᱤ ᱠᱟᱛᱮ ᱥᱮᱞᱭᱩᱞᱚᱡᱽ ᱯᱩᱨᱟ. ᱵᱟᱝ ᱵᱷᱮᱜᱟᱨᱚᱜᱼᱟ ᱩᱱ ᱵᱷᱩᱨ ᱥᱮᱞᱭᱩᱞᱚᱡᱽ ᱛᱮ ᱵᱮᱥ ᱠᱟᱜᱚᱡᱽ ᱫᱚ ᱵᱟᱝ ᱵᱮᱱᱟᱣ ᱜᱟᱱᱚᱜᱼᱟ ᱾ ᱞᱤᱜᱽᱱᱤᱱ ᱚᱰᱚᱠ ᱜᱤᱰᱤ ᱫᱚ ᱟ.ᱰᱤ ᱵᱟ.ᱲᱛᱤ ᱞᱟ.ᱠᱛᱤ ᱢᱮᱱᱟᱜᱼᱟ ᱾ ᱡᱩᱫᱤ ᱞᱤᱜᱽᱱᱤᱱ ᱵᱟ.ᱲᱛᱤ ᱚᱝᱜᱚᱥ ᱨᱮ ᱥᱮᱞᱭᱩᱞᱚᱡᱽ ᱨᱮ ᱛᱟᱦᱮᱸ ᱫᱚᱦᱚᱜᱼᱟ ᱮᱱᱠᱷᱟᱱ ᱥᱮᱞᱭᱩᱞᱚᱡᱽ ᱨᱮᱭᱟᱜ ᱥᱩᱛᱟ.ᱢ ᱴᱷᱤᱠ ᱥᱟᱺᱦᱤᱡ ᱧᱟᱢ ᱢᱩᱥᱠᱤᱞ ᱵᱩᱡᱷᱟ.ᱣ ᱜᱚᱫᱚᱜᱼᱟ ᱾ ᱮᱛᱚᱦᱚᱵ ᱨᱮ ᱛᱤᱱ ᱵᱷᱩᱨ ᱥᱮᱞᱭᱩᱞᱚᱡᱽ ᱫᱟᱨᱮ ᱠᱷᱚᱱ ᱱᱤᱨᱲᱟ. ᱥᱟᱺᱦᱤᱡ ᱧᱟᱢ ᱞᱟ.ᱜᱤᱫ ᱛᱮ ᱚᱠᱟ ᱦᱚᱸ ᱱᱟᱯᱟᱭ ᱦᱚᱨ ᱵᱟᱝ ᱧᱟᱢ ᱟᱠᱟᱱ ᱛᱟᱦᱮᱸᱫ ᱾ ᱠᱟᱜᱚᱡᱽ ᱫᱚ ᱢᱩᱬ ᱞᱮᱠᱟᱛᱮ ᱚᱲᱮᱡ ᱥᱩᱛᱟ.ᱢ ᱞᱩᱜᱽᱲᱤ ᱛᱮᱜᱮ ᱵᱮᱱᱟᱣ ᱦᱩᱭᱩᱜ ᱠᱟᱱ ᱛᱟᱦᱮᱸᱱ ᱾ ᱚᱲᱮᱡ ᱞᱩᱜᱽᱲᱤ ᱟᱨᱵᱟᱝ ᱢᱟᱨᱮ ᱠᱟᱜᱚᱡᱽ ᱡᱩᱫᱤ ᱦᱚᱸ ᱠᱟᱜᱚᱡᱽ ᱟ.ᱰᱤ ᱟᱞᱜᱟ ᱛᱮ ᱟᱨ ᱟ.ᱰᱤ ᱱᱟᱯᱟᱭ ᱵᱮᱱᱟᱣᱜ ᱠᱟᱱᱟ ᱮᱱ ᱦᱚᱸ ᱱᱚᱶᱟ ᱩᱱᱟ.ᱝ ᱵᱟ.ᱲᱛᱤ ᱧᱟᱢ ᱜᱚᱫᱚᱜ ᱢᱩᱥᱠᱤᱞ ᱜᱮᱭᱟ ᱡᱟᱦᱟᱸᱛᱮ ᱟᱵᱚᱣᱟᱜ ᱠᱟᱜᱚᱡᱽ ᱨᱮᱭᱟᱜ ᱯᱩᱨᱟ. ᱞᱟ.ᱠᱛᱤ ᱥᱚᱝ ᱯᱩᱨᱩᱱᱚᱜ ᱫᱚ ᱢᱩᱥᱠᱤᱞ ᱜᱮᱭᱟ ᱾

ᱠᱟᱜᱚᱡᱽ ᱵᱮᱱᱟᱣ ᱥᱟᱢᱟᱱᱥᱟᱯᱲᱟᱣ

ᱛᱮᱦᱮᱧ ᱜᱟᱯᱟ ᱠᱟᱜᱚᱡᱽ ᱵᱮᱱᱟᱣ ᱞᱟ.ᱜᱤᱫ ᱫᱚ ᱢᱩᱬ ᱞᱮᱠᱟᱛᱮ ᱞᱟᱛᱟᱨ ᱨᱮ ᱮᱢ ᱮᱱ ᱛᱤᱱᱟ.ᱝ ᱜᱟᱱ ᱡᱤᱱᱤᱥ ᱵᱟ.ᱲᱛᱤ ᱞᱮᱠᱟᱛᱮ ᱵᱮᱵᱷᱟᱨ ᱦᱩᱭᱩᱜ ᱠᱟᱱᱟ: ᱚᱲᱮᱡ ᱞᱩᱜᱽᱲᱤ, ᱢᱟᱨᱮ ᱠᱟᱜᱚᱡᱽ, ᱢᱟᱫ, ᱟ.ᱰᱤ ᱞᱮᱠᱟᱱ ᱫᱟᱨᱮ ᱨᱮᱭᱟᱜ ᱠᱟᱴ, ᱡᱮᱞᱮᱠᱟ: ᱥᱯᱨᱩᱥ ᱟᱨ ᱯᱟᱭᱤᱱ, ᱟᱨ ᱞᱮᱠᱟᱱ ᱞᱮᱠᱟᱱ ᱛᱟᱥᱟᱫ, ᱢᱮᱱ ᱢᱮ ᱵᱟᱪᱠᱚᱢ ᱟᱨ ᱮᱥᱯᱟᱨᱴᱳ ᱾ ᱵᱷᱟᱨᱚᱛ ᱨᱮᱫᱚ ᱢᱟᱫ ᱟᱨ ᱵᱟᱪᱠᱚᱢ ᱛᱟᱥᱟᱫ ᱜᱮ ᱠᱟᱜᱚᱡᱽ ᱵᱮᱱᱟᱣ ᱨᱮᱫᱚ ᱵᱟ.ᱲᱛᱤ ᱞᱮᱠᱟᱛᱮ ᱵᱮᱵᱷᱟᱨᱚᱜ ᱠᱟᱱᱟ ᱾

ᱵᱟᱨᱦᱮ ᱡᱚᱱᱚᱲᱥᱟᱯᱲᱟᱣ