ᱡᱟᱵᱷᱟ (ᱫᱤᱯ)

ᱡᱟᱵᱷᱟ (ᱤᱱᱫᱳᱱᱮᱥᱤᱭᱟᱱ: Jawa, ᱡᱟᱵᱷᱟᱱᱤᱥ: ᮏᮝ) ᱫᱚ ᱤᱱᱫᱳᱱᱮᱥᱤᱭᱟ ᱫᱤᱥᱚᱢ ᱨᱮᱱᱟᱜ ᱢᱤᱫ ᱫᱤᱯ ᱠᱟᱱᱟ ᱾ ᱱᱚᱶᱟ ᱫᱤᱯ ᱨᱮᱱᱟᱜ ᱮᱛᱚᱢ ᱥᱮᱫ ᱡᱟᱵᱷᱟ ᱫᱚᱨᱮᱭᱟ ᱟᱨ ᱠᱚᱧᱮ ᱥᱮᱫ ᱥᱤᱧᱚᱛᱤᱭᱟᱹ ᱢᱟᱦᱟᱫᱚᱨᱭᱟ ᱢᱮᱱᱟᱜᱼᱟ ᱾ ᱑᱔.᱑ ᱠᱳᱴᱤ ᱜᱟᱱ ᱦᱚᱲ (ᱡᱟᱵᱷᱟ ᱮᱥᱠᱟᱨ) ᱥᱮ ᱑᱔.᱕ ᱠᱳᱴᱤ (ᱡᱟᱵᱷᱟ ᱟᱨ ᱚᱱᱟ ᱟᱰᱮᱯᱟᱥᱮ ᱫᱤᱯᱠᱚ) ᱜᱟᱱ ᱦᱚᱲ ᱠᱚᱶᱟ ᱫᱤᱯ ᱨᱮᱠᱚ ᱛᱟᱦᱮᱱ ᱠᱟᱱᱟ, ᱡᱟᱦᱟ ᱫᱚ ᱜᱚᱴᱟ ᱤᱱᱫᱳᱱᱮᱥᱤᱭᱟ ᱫᱤᱥᱚᱢ ᱨᱮᱱ ᱕᱖.᱗% ᱾ ᱱᱚᱶᱟ ᱜᱮ ᱡᱮᱜᱮᱛ ᱨᱮᱱᱟᱜ ᱥᱟᱱᱟᱢ ᱠᱷᱚᱱ ᱡᱟᱹᱥᱛᱤ ᱦᱚᱲᱮᱞ ᱫᱤᱯ ᱠᱟᱱᱟ ᱾ ᱤᱱᱫᱳᱱᱮᱥᱤᱭᱟ ᱨᱮᱱᱟᱜ ᱨᱟᱡᱽᱜᱟᱲ ᱡᱟᱠᱟᱨᱛᱟ ᱱᱚᱶᱟ ᱫᱤᱯ ᱨᱮᱱᱟᱜ ᱮᱛᱚᱢᱼᱯᱟᱪᱮ ᱫᱚᱨᱮᱭᱟ ᱟᱨᱮ ᱨᱮ ᱢᱮᱱᱟᱜᱼᱟ ᱾ ᱤᱱᱫᱳᱱᱮᱥᱤᱭᱟ ᱨᱮᱱᱟᱜ ᱱᱟᱜᱟᱢ ᱨᱮᱱᱟᱜ ᱡᱟᱹᱥᱛᱤ ᱜᱟᱱ ᱵᱟᱲᱟᱭᱟ ᱜᱷᱚᱴᱚᱱᱟ ᱠᱚ ᱱᱚᱶᱟ ᱫᱤᱯ ᱨᱮᱜᱮ ᱦᱩᱭ ᱟᱠᱟᱱᱟ ᱾ ᱱᱚᱶᱟ ᱜᱮ ᱦᱤᱱᱫᱩ-ᱵᱩᱫᱫᱷᱚ ᱨᱟᱡᱽ ᱠᱚᱣᱟᱜ ᱛᱟᱞᱢᱟ, ᱤᱥᱞᱟᱢ ᱥᱟᱞᱛᱟᱱᱟᱛ ᱟᱨ ᱰᱟᱪᱽ ᱤᱥᱴ ᱤᱱᱰᱤᱡ ᱩᱯᱚᱢᱟᱦᱫᱮᱥ ᱟᱜ ᱢᱩᱬᱩᱛ ᱜᱟᱲ ᱛᱟᱦᱮ ᱠᱟᱱᱟ ᱾ ᱡᱟᱵᱷᱟ ᱨᱮᱜᱮ ᱑᱙᱓᱐-᱑᱙᱔᱐ ᱥᱮᱨᱢᱟ ᱚᱠᱛᱚ ᱨᱮᱱᱟᱜ ᱤᱱᱫᱳᱱᱮᱥᱤᱭᱟᱱ ᱯᱷᱩᱨᱜᱟᱹᱞ ᱞᱟᱹᱰᱷᱟᱹᱭ ᱛᱟᱞᱢᱟ ᱛᱟᱦᱮ ᱠᱟᱱᱟ ᱾

ᱚᱛᱱᱚᱜ

ᱯᱟᱪᱮ ᱡᱟᱵᱷᱟ ᱨᱮ ᱵᱨᱳᱢᱳ ᱵᱩᱨᱩ

ᱡᱟᱵᱷᱟ ᱫᱤᱯ ᱨᱮᱱᱟᱜ ᱯᱟᱪᱮ ᱥᱮᱫ ᱥᱩᱢᱟᱛᱨᱟ, ᱥᱟᱢᱟᱝ ᱥᱮᱫ ᱵᱟᱞᱤ, ᱮᱛᱚᱢ ᱥᱮᱫ ᱵᱳᱨᱱᱤᱭᱳ ᱟᱨ ᱠᱚᱧᱮ ᱥᱮᱫ ᱠᱨᱤᱥᱴᱢᱟᱥ ᱫᱤᱯ ᱢᱮᱱᱟᱜᱼᱟ ᱾ ᱱᱚᱶᱟ ᱫᱚ ᱡᱮᱜᱮᱛ ᱨᱮᱱᱟᱜ ᱑᱓ ᱟᱱᱟᱜ ᱢᱟᱨᱟᱝ ᱫᱤᱯ ᱠᱟᱱᱟ ᱾ ᱡᱟᱵᱷᱟ ᱨᱮᱱᱟᱜ ᱮᱛᱚᱢ ᱥᱮᱫ ᱡᱟᱵᱷᱟ ᱫᱚᱨᱮᱭᱟ, ᱯᱟᱪᱮ ᱥᱮᱫ ᱥᱩᱱᱫᱟ ᱯᱨᱚᱱᱟᱞᱤ, ᱠᱚᱧᱮ ᱥᱮᱫ ᱥᱤᱧᱚᱛᱤᱭᱟᱹ ᱢᱟᱦᱟᱫᱚᱨᱭᱟ ᱟᱨ ᱥᱟᱢᱟᱝ ᱥᱮᱫ ᱢᱟᱞᱟᱠᱠᱟ ᱯᱨᱚᱱᱟᱞᱤ ᱢᱮᱱᱟᱜᱼᱟ ᱾

ᱡᱟᱵᱷᱟ ᱫᱤᱯ ᱨᱮ ᱜᱚᱴᱟ ᱜᱟᱱ ᱜᱮ ᱥᱮᱸᱜᱮᱞ ᱵᱩᱨᱩ ᱨᱮᱱᱟᱜ ᱡᱟᱱᱟᱢ ᱴᱷᱟᱶ ᱢᱮᱱᱟᱜᱼᱟ; ᱱᱚᱸᱰᱮ ᱥᱟᱢᱟᱝ-ᱯᱟᱪᱮ ᱥᱟᱹᱨᱛᱮ ᱯᱮᱜᱮᱞ ᱤᱨᱟᱹᱞ ᱜᱚᱴᱟᱱ ᱵᱩᱨᱩ ᱢᱮᱱᱟᱜᱼᱟ, ᱡᱟᱦᱟ ᱫᱚ ᱢᱤᱫ ᱚᱠᱛᱚ ᱥᱮ ᱮᱴᱟᱜ ᱫᱚ ᱡᱤᱣᱟᱹᱫᱽ ᱥᱮᱸᱜᱮᱞ ᱵᱩᱨᱩ ᱠᱟᱱᱟ ᱾ ᱡᱟᱵᱷᱟ ᱨᱮᱱᱟᱜ ᱥᱟᱱᱟᱢ ᱠᱷᱚᱱ ᱩᱥᱩᱞ ᱥᱮᱸᱜᱮᱞ ᱵᱩᱨᱩ ᱫᱚ ᱢᱟᱭᱩᱱᱴ ᱥᱮᱢᱮᱨᱩ, ᱓,᱖᱗᱖ ᱢᱤᱴᱟᱨ (᱑᱒,᱐᱖᱐ ᱯᱷᱩᱴ) ᱾

ᱥᱟᱪᱟᱨᱦᱮ

Banteng at Alas Purwo, eastern edge of Java

ᱥᱟᱥᱚᱱᱤᱭᱟᱹ ᱴᱚᱴᱷᱟ

Java transport network

ᱡᱟᱵᱷᱟ ᱫᱚ ᱯᱩᱱᱭᱟ ᱯᱚᱱᱚᱛ ᱟᱨ ᱵᱟᱨᱭᱟ ᱵᱤᱥᱮᱥ ᱥᱟᱥᱚᱱᱤᱭᱟᱹ ᱴᱚᱴᱷᱟ ᱨᱮ ᱦᱟᱹᱴᱤᱧ ᱟᱠᱟᱱᱟ :

• ᱵᱟᱱᱛᱮ, ᱨᱟᱡᱽᱜᱟᱲ: ᱥᱮᱨᱟᱝ
• ᱯᱟᱪᱮ ᱡᱟᱵᱷᱟ, ᱨᱟᱡᱽᱜᱟᱲ: ᱵᱟᱱᱫᱩᱝ
• ᱛᱟᱞᱢᱟ ᱡᱟᱵᱷᱟ, ᱨᱟᱡᱽᱜᱟᱲ: ᱥᱮᱢᱟᱨᱮᱝ
• ᱥᱟᱢᱟᱝ ᱡᱟᱵᱷᱟ, ᱨᱟᱡᱽᱜᱟᱲ: ᱥᱩᱨᱟᱵᱟᱭᱟ
• ᱡᱟᱠᱟᱨᱛᱟ ᱵᱤᱥᱮᱥ ᱥᱟᱥᱚᱱᱤᱭᱟᱹ ᱴᱚᱴᱷᱟ
• ᱭᱳᱜᱽᱭᱟᱠᱟᱨᱛᱟ ᱵᱤᱥᱮᱥ ᱥᱟᱥᱚᱱᱤᱭᱟᱹ ᱴᱚᱴᱷᱟ, ᱨᱟᱡᱽᱜᱟᱲ: ᱭᱳᱜᱽᱭᱟᱠᱟᱨᱛᱟ

ᱱᱟᱜᱟᱢ

ᱥᱮᱫᱟᱭ ᱨᱮ ᱡᱟᱵᱷᱟ ᱥᱩᱨ ᱠᱚᱨᱮᱱᱟᱜ ᱴᱚᱴᱷᱟ ᱠᱚ ᱦᱤᱱᱫᱩ ᱨᱟᱡᱟ ᱠᱚᱣᱟᱜ ᱪᱟᱪᱞᱟᱣ ᱨᱮ ᱛᱟᱦᱮ ᱠᱟᱱᱟ ᱾ ᱱᱚᱸᱰᱮ ᱛᱟᱭᱚᱢ ᱛᱮ ᱵᱩᱫᱫᱷᱚ ᱫᱷᱚᱨᱚᱢ ᱯᱟᱥᱱᱟᱣ ᱞᱮᱱᱟ ᱾ ᱱᱚᱸᱰᱮ ᱱᱮᱛᱟᱨ ᱦᱚᱸ ᱟᱭᱢᱟ ᱢᱟᱬᱮ ᱦᱤᱱᱫᱩ ᱟᱨ ᱵᱩᱫᱫᱷᱚ ᱢᱚᱱᱫᱤᱨ ᱨᱮᱱᱟᱜ ᱨᱟᱹᱯᱩᱫ ᱥᱟᱨᱮᱡ ᱠᱚ ᱢᱮᱱᱟᱜ ᱜᱮᱭᱟ ᱾ ᱢᱮᱝᱜᱤᱞᱚᱝ ᱥᱩᱨ 'ᱵᱚᱨᱳᱵᱩᱫᱩ' ᱟᱜ ᱢᱚᱱᱫᱤᱨ ᱡᱮᱜᱮᱛ ᱨᱮᱱᱟᱜ ᱥᱟᱱᱟᱢ ᱠᱷᱚᱱ ᱢᱟᱨᱟᱝ ᱵᱩᱫᱫᱷᱚ ᱢᱚᱱᱫᱤᱨ ᱠᱟᱱᱟ ᱾ ᱑᱓-᱑᱕ ᱥᱟᱭ ᱥᱮᱨᱢᱟ ᱢᱩᱫ ᱨᱮ ᱱᱚᱸᱰᱮ ᱢᱟᱡᱟᱯᱟᱛᱤᱦ ᱧᱩᱛᱩᱢᱟᱱ ᱢᱤᱫ ᱦᱤᱱᱫᱩ ᱨᱟᱡᱽ ᱦᱟᱨᱟ ᱨᱟᱠᱟᱯ ᱞᱮᱱᱟ ᱾ ᱚᱱᱟ ᱨᱮᱱᱟᱜ ᱪᱷᱟᱯ ᱛᱤᱧ ᱦᱚᱸ ᱱᱚᱸᱰᱮᱱᱟᱜ ᱞᱟᱠᱪᱟᱨ, ᱯᱟᱹᱨᱥᱤ ᱟᱨ ᱚᱛᱦᱟᱥᱟ ᱨᱮ ᱢᱮᱱᱟᱜ ᱜᱮᱭᱟ ᱾ ᱑᱔-᱑᱕ ᱟᱱᱟᱜ ᱥᱟᱭ ᱥᱮᱨᱢᱟ ᱨᱮ ᱱᱚᱸᱰᱮ ᱤᱥᱞᱟᱢ ᱞᱟᱠᱪᱟᱨ ᱯᱟᱥᱱᱟᱣ ᱞᱮᱱᱟ ᱟᱨ ᱱᱚᱸᱰᱮ ᱤᱥᱞᱟᱢ ᱨᱟᱡᱽ ᱠᱚᱣᱟᱜ ᱪᱟᱪᱞᱟᱣ ᱛᱷᱟᱯᱚᱱ ᱞᱮᱱᱟ ᱾ ᱚᱱᱟ ᱛᱟᱭᱚᱢ ᱯᱳᱨᱛᱩᱜᱤᱡᱽ, ᱰᱟᱪᱽ ᱟᱨ ᱤᱝᱨᱮᱡ ᱵᱮᱯᱟᱨᱤᱭᱟᱹ ᱠᱚᱠᱚ ᱦᱮᱡᱽ ᱟᱠᱟᱱᱟ ᱾ ᱑᱖᱑᱙ ᱥᱮᱨᱢᱟ ᱠᱷᱚᱱ ᱱᱚᱸᱰᱮ ᱰᱟᱪᱽ ᱠᱚᱣᱟᱜ ᱥᱟᱥᱚᱱ ᱮᱛᱚᱦᱚᱵ ᱞᱮᱱᱟ ᱾ ᱑᱙᱓᱐-᱔᱐ ᱥᱮᱨᱢᱟ ᱚᱠᱛᱮ ᱤᱱᱫᱳᱱᱮᱥᱤᱭᱟ ᱨᱮᱱᱟᱜ ᱯᱷᱩᱨᱜᱟᱹᱞ ᱞᱟᱹᱰᱷᱟᱹᱭ ᱨᱮᱱᱟᱜ ᱛᱟᱞᱢᱟ ᱛᱟᱦᱮ ᱠᱟᱱᱟ ᱡᱟᱵᱷᱟ ᱫᱤᱯ ᱾

ᱵᱟᱨᱦᱮ ᱡᱚᱱᱚᱲ

• Cribb, Robert (2000). Historical Atlas of Indonesia. London and Honolulu: RoutledgeCurzon Press, University of Hawaii Press. ISBN 978-0-8248-2111-1.
• Padmo, Soegijanto (2000). Java and The Making of The Nation. Humaniora Journal, Gadjah Mada University. [᱑]