ᱡᱤᱞᱤᱧ ᱰᱟᱦᱟᱨ

ᱜᱩᱨ ᱟᱠᱟᱱ ᱦᱚᱲᱟᱜ ᱡᱟᱝ ᱵᱟᱦᱟ ᱛᱩᱯᱩ ᱱᱟᱺᱭ ᱜᱷᱟᱴ ᱤᱫᱤ ᱠᱟᱛᱮ ᱛᱩᱯᱩᱭ ᱜᱮ ᱡᱤᱞᱤᱧ ᱰᱟᱦᱟᱨ ᱫᱚᱵᱚᱱ ᱢᱮᱱᱟ ᱾

ᱛᱷᱩᱞᱤ ᱨᱚᱜ ᱥᱟᱯᱲᱟᱣ

ᱡᱤᱞᱤᱧ ᱰᱟᱦᱟᱨ ᱨᱮᱱᱟᱜ ᱠᱟ.ᱢᱤ ᱥᱟ.ᱜᱩᱱ ᱫᱤᱱ ᱫᱚ ᱢᱟᱜᱽ ᱟᱨ ᱵᱟᱦᱟ ᱵᱚᱸᱜᱟ ᱨᱮ ᱾ ᱱᱮᱰᱟ ᱟᱠᱟᱱ ᱫᱤᱱ ᱨᱮ ᱟ.ᱛᱩ ᱢᱚᱬᱮ ᱦᱚᱲ ᱫᱩᱠ ᱟᱠᱟᱱ ᱦᱟ.ᱭᱟ.ᱛ ᱟᱠᱟᱱ ᱦᱚᱲ ᱚᱲᱟᱜ ᱨᱮ ᱡᱟᱣᱨᱟ ᱠᱟᱛᱮ ᱛᱷᱩᱞᱤ ᱠᱚ ᱨᱚᱜᱟ ᱾ ᱯᱮᱲᱟ ᱯᱟ.ᱦᱬᱟ. ᱠᱚ ᱦᱮᱡ ᱥᱮᱴᱮᱨ ᱞᱮᱱ ᱠᱷᱟᱱ ᱥᱟᱡᱟᱣ ᱥᱟᱯᱲᱟᱣ ᱠᱟᱛᱮ ᱱᱟᱶᱟ ᱦᱟᱴᱟᱜ ᱨᱮ ᱜᱩᱨ ᱟᱠᱟᱱ ᱦᱚᱲ ᱟᱨ ᱢᱟᱨᱟᱝ ᱵᱳᱨᱳ ᱠᱚ ᱨᱩᱢ ᱰᱟᱠᱟᱣ ᱠᱤᱱᱟ ᱾ ᱵᱩᱜᱤ ᱵᱟ.ᱲᱤᱡ ᱠᱚ ᱠᱩᱞᱤ ᱡᱤᱸᱜᱟ.ᱥ ᱠᱤᱱᱟ ᱾ ᱟᱨ ᱚᱠᱚᱭᱟᱜ ᱛᱟᱨᱮᱱ ᱛᱮᱭ ᱪᱟᱞᱟᱜᱼᱟ, ᱚᱱᱟ ᱠᱚ ᱠᱩᱞᱤ ᱮᱭᱟ ᱟᱨ ᱫᱟᱱ ᱫᱩᱱᱟ. ᱠᱚ ᱮᱢᱟᱭ ᱛᱮᱠᱚ ᱵᱤᱫᱟ.ᱭ ᱠᱟ.ᱠᱤᱱᱟ ᱾

ᱡᱤᱞᱤᱧ ᱰᱟᱦᱟᱨ ᱥᱮᱱᱚᱜ ᱥᱟᱯᱲᱟᱣ

ᱡᱤᱞᱤᱧ ᱰᱟᱦᱟᱨ ᱦᱚᱨ ᱡᱤᱞᱤᱧ ᱦᱚᱛᱮᱛᱮ ᱦᱚᱨ ᱜᱤᱛᱤᱡ, ᱵᱤᱨ ᱜᱤᱛᱤᱡ, ᱞᱟᱡ ᱦᱟ.ᱥᱩ, ᱵᱚᱦᱚᱜ ᱦᱟ.ᱥᱩ, ᱟᱞᱚ ᱦᱩᱭᱩᱜ ᱢᱟ ᱢᱮᱱᱛᱮ ᱵᱟᱠᱷᱮᱬ ᱠᱟᱛᱮ ᱢᱤᱫ ᱯᱩᱸᱰ ᱥᱤᱢ ᱠᱚ ᱵᱚᱸᱜᱟ ᱮᱭᱟ ᱾ ᱩᱱᱤ ᱥᱤᱢ ᱟᱜ ᱤᱞ ᱫᱚᱠᱚ ᱫᱚᱦᱚ ᱠᱟᱜᱼᱟ ᱾ ᱫᱟᱠᱟ ᱩᱛᱩ ᱠᱚ ᱤᱥᱤᱱ ᱮᱱ ᱠᱷᱟᱱ ᱜᱤᱰᱤᱛᱟᱨᱟ ᱫᱟᱠᱟ ᱠᱚ ᱵᱚᱸᱜᱟᱭᱟ ᱾ ᱟᱨ ᱡᱚᱛᱚ ᱯᱮᱲᱟ ᱦᱚᱲ ᱫᱟᱠᱟ ᱩᱛᱩ ᱠᱚ ᱡᱚᱢ ᱥᱟ.ᱛ ᱞᱮᱠᱷᱟᱱ ᱱᱟᱺᱭ ᱛᱮ ᱪᱟᱞᱟᱜ ᱠᱚ ᱥᱟᱯᱲᱟᱣᱜᱼᱟ ᱾ ᱛᱟᱵᱮᱱ, ᱜᱩᱲ, ᱢᱤᱴᱷᱟ.ᱭ, ᱥᱤᱸᱫᱩᱨ, ᱯᱷᱩᱴᱤᱭᱟ.ᱠᱟ.ᱣᱰᱤ (ᱠᱷᱩᱪᱨᱟ. ᱯᱩᱭᱥᱟ.) ᱪᱟᱣᱞᱮ, ᱥᱩᱱᱩᱢ, ᱵᱩᱞᱩᱝ, ᱥᱟᱥᱟᱝ ᱮᱢᱟᱱ ᱢᱤᱫᱴᱟ.ᱝ ᱥᱟᱠᱟᱢ ᱛᱷᱩᱞᱤ ᱨᱮᱠᱚ ᱥᱟᱸᱵᱟᱣ ᱯᱮᱨᱮᱡᱟ ᱾ ᱟᱫᱚ ᱛᱚᱯᱟ ᱟᱠᱟᱫ ᱡᱟᱝ ᱵᱟᱦᱟ ᱟ.ᱛᱩ ᱞᱟ.ᱜᱤᱫ ᱟ.ᱛᱩ ᱨᱤᱱ ᱢᱚᱬᱮ ᱦᱚᱲ ᱟᱛᱮ ᱠᱚ ᱪᱟᱞᱟᱜᱼᱟ ᱾ ᱡᱟᱝ ᱵᱟᱦᱟ ᱠᱚ ᱩᱴᱠᱟ.ᱣ ᱚᱰᱚᱠ ᱠᱮᱫ ᱠᱷᱟᱱ ᱤᱫᱤ ᱛᱟᱨᱟ ᱞᱮᱫ ᱥᱟᱛᱮ ᱨᱮᱱᱟᱜ ᱵᱩᱥᱩᱵ ᱛᱚᱯᱟ ᱴᱷᱟᱶ ᱨᱮᱠᱚ ᱫᱷᱩᱲᱥᱟ.ᱣ ᱡᱮᱨᱮᱫ ᱚᱴᱚ ᱠᱟᱜᱼᱟ ᱾ ᱟᱫᱚ ᱢᱤᱫ ᱢᱚᱦᱰᱟ ᱫᱚ-ᱵᱟ.ᱴᱤ ᱪᱟᱸᱜᱟ ᱰᱟᱦᱟᱨ ᱛᱮᱠᱚ ᱩᱰᱩᱠ ᱦᱟ.ᱡᱩᱜᱼᱟ ᱾ ᱚᱱᱟ ᱪᱟᱸᱜᱟ ᱰᱟᱦᱟᱨ ᱨᱮᱜᱮ ᱯᱮᱭᱟ ᱛᱤᱨᱤᱞ ᱦᱟᱯᱟ ᱛᱮ ᱠᱩᱨᱩᱥ ᱠᱷᱩᱱᱴᱤ ᱠᱚ ᱵᱮᱱᱟᱣᱟ ᱾ ᱟᱨ ᱚᱱᱟ ᱪᱮᱛᱟᱱ ᱨᱮᱫᱚ ᱱᱟᱶᱟ ᱪᱩᱠᱟ.ᱜ ᱠᱚ ᱫᱚᱲᱚᱢᱟ ᱟᱨ ᱛᱷᱩᱞᱤ ᱯᱮ ᱢᱚᱠᱟ ᱠᱤᱪᱨᱤᱫ ᱠᱚ ᱫᱚᱦᱚᱭᱟ ᱟᱫᱚ ᱚᱲᱟᱜ ᱨᱤᱱ ᱠᱩᱲᱤ ᱦᱚᱯᱚᱱ ᱠᱚ ᱥᱮᱱ ᱠᱟᱛᱮ ᱯᱷᱩᱲᱩᱜ ᱛᱮ ᱢᱟᱬᱟᱝ ᱫᱚ ᱛᱟᱝ ᱦᱟᱺᱰᱤ ᱠᱚ ᱫᱩᱞᱟ, ᱫᱚᱥᱟᱨ ᱫᱚ ᱥᱟᱥᱟᱝ ᱫᱟᱜ ᱠᱚ ᱫᱩᱞᱟ, ᱟᱨ ᱛᱮᱥᱟᱨ ᱫᱚ ᱵᱮᱨᱮᱞ ᱫᱟᱜ ᱠᱚ ᱫᱩᱞᱟ ᱾ ᱟᱨ ᱥᱟᱥᱟᱵᱤᱡ ᱫᱚ ᱨᱤᱞ ᱟᱠᱟᱭ ᱛᱟᱦᱮᱸᱱᱟ ᱾ ᱱᱚᱝᱠᱟ ᱡᱚᱛᱚ ᱚᱲᱟᱜ ᱦᱚᱲ ᱠᱚ ᱫᱩᱞ ᱯᱩᱨᱟ.ᱣ ᱥᱮ ᱟ.ᱨᱩᱵ ᱯᱩᱨᱟ.ᱣ ᱞᱮᱠᱷᱟᱱ ᱠᱚ ᱡᱟᱝ ᱵᱟᱦᱟ ᱜᱚᱜᱚᱜᱤᱡ ᱫᱚ ᱢᱤᱫ ᱛᱤᱨᱤᱞ ᱦᱟᱯᱟ ᱥᱟᱵ ᱠᱟᱛᱮ ᱚᱱᱟ ᱠᱩᱨᱩᱥ ᱠᱷᱩᱱᱴᱤ ᱮᱛᱚᱢ ᱠᱚᱧᱮ ᱛᱮ ᱯᱮ ᱫᱷᱟᱣ ᱟ.ᱛᱩᱨ ᱢᱩᱪᱟ.ᱫ ᱠᱟᱛᱮ ᱚᱱᱟ ᱱᱟᱶᱟ ᱪᱩᱠᱟ.ᱜ ᱫᱚᱭ ᱫᱟᱞ ᱨᱟ.ᱯᱩᱫᱟ ᱾ ᱡᱟᱝ ᱵᱟᱦᱟ ᱫᱚ ᱚᱱᱟ ᱥᱟᱥᱟᱝ ᱜᱮᱸᱫᱽᱨᱮᱡ ᱨᱮᱠᱚ ᱜᱷᱮᱸᱴᱟ ᱾ ᱟᱫᱚ ᱜᱚᱜᱚᱜᱤᱡ ᱛᱟᱨᱮᱱ ᱨᱮᱠᱚ ᱜᱚᱜ ᱟᱭᱟ ᱾ ᱯᱮᱫᱷᱟᱣ ᱦᱤᱨᱞᱟ. ᱢᱟᱨᱟᱝ ᱵᱳᱨᱳ ᱢᱮᱱ ᱠᱟᱛᱮ ᱨᱟ.ᱥᱠᱟ. ᱛᱮ ᱥᱟᱠᱣᱟ, ᱛᱨᱤᱭᱟ.ᱣ ᱚᱨᱚᱝ ᱟᱛᱮ ᱠᱚ ᱥᱮᱱᱚᱜᱼᱟ ᱾ ᱛᱩᱯᱩᱱᱟᱺᱭ ᱜᱷᱟᱴ ᱠᱚ ᱥᱮᱴᱮᱨ ᱠᱮᱫ ᱠᱷᱟᱱ ᱯᱩᱭᱞᱩ ᱛᱮ ᱢᱚᱬᱮ ᱥᱤᱠᱟ. ᱠᱟ.ᱣᱰᱤ ᱛᱮ ᱜᱷᱟᱴ ᱠᱚ ᱠᱤᱨᱤᱧᱟ ᱾ ᱟᱨ ᱚᱱᱟ ᱜᱷᱟᱴ ᱨᱮᱠᱚ ᱦᱚᱭᱚ ᱢᱩᱸᱰᱨᱟ.ᱜᱼᱟ ᱾

ᱜᱷᱟᱴ ᱟᱬᱜᱚᱱ ᱥᱟᱯᱲᱟᱣ

ᱤᱱᱟ. ᱛᱟᱭᱚᱢ ᱮᱴᱟᱜ ᱠᱤᱪᱨᱤᱡ ᱵᱚᱫᱚᱞ ᱠᱟᱛᱮ ᱛᱩᱯᱩ ᱜᱷᱟᱴ ᱛᱮᱠᱚ ᱟᱬᱜᱚᱱᱟ ᱾ ᱵᱮᱲᱟ ᱨᱟᱠᱟᱵ ᱥᱮᱫ ᱥᱟᱢᱟᱝ ᱠᱟᱛᱮ ᱯᱮ ᱫᱷᱟᱣ ᱠᱚ ᱰᱩᱵᱩᱡᱚᱜᱼᱟ ᱾ ᱢᱩᱪᱟ.ᱫ ᱨᱮᱫᱚ ᱡᱟᱝ ᱵᱟᱦᱟ ᱛᱷᱩᱞᱤ ᱚᱨ ᱚᱲᱮᱡ ᱠᱟᱛᱮ ᱠᱚ ᱵᱚᱦᱮᱞ ᱜᱚᱫ ᱠᱟᱜᱼᱟ ᱾ ᱟᱨ ᱪᱟᱞᱟᱣ ᱟᱠᱟᱱ ᱥᱟᱶᱛᱮᱱ ᱠᱚᱫᱚ ᱯᱮᱫᱷᱟᱣ ᱦᱤᱨᱞᱟ. ᱢᱟᱨᱟᱝ ᱵᱳᱨᱳ ᱠᱚ ᱟᱲᱟᱝᱼᱟ ᱾ ᱨᱟᱠᱟᱵ ᱠᱟᱛᱮ ᱫᱟᱜ ᱥᱩᱨ ᱨᱮ ᱥᱟᱨᱡᱚᱢ ᱰᱟ.ᱨ ᱡᱟᱦᱮᱨ ᱫᱟᱨᱮ ᱯᱤᱸᱰ ᱠᱚ ᱵᱮᱱᱟᱣᱟ ᱾ ᱟᱨ ᱚᱸᱰᱮ ᱟᱫᱷᱟᱱ ᱫᱚ ᱥᱟᱠᱟᱢ ᱠᱚ ᱫᱚᱦᱚᱭᱟ ᱾ ᱚᱱᱟ ᱛᱟᱭᱚᱢ ᱯᱮᱭᱟ ᱥᱟᱨᱡᱚᱢ ᱥᱟᱠᱟᱢ ᱪᱚᱠᱷᱨᱟᱫ ᱨᱮ ᱛᱟᱵᱮᱱ, ᱜᱩᱲ, ᱢᱤᱴᱷᱟ.ᱭ ᱠᱚ ᱵᱚᱸᱜᱟᱭᱟ ᱾ ᱩᱱ ᱡᱚᱦᱚᱜ ᱠᱚ ᱵᱟᱠᱷᱮᱬᱟ -- " ᱡᱚᱦᱟᱨ ᱛᱚᱵᱮ ᱟᱢ ᱜᱚᱡ ᱟᱠᱟᱱ ᱜᱩᱨ ᱟᱠᱟᱱᱤᱡ ᱱᱚᱜᱼᱚᱭ ᱟᱞᱮᱞᱮ ᱜᱚᱭᱟ ᱜᱚᱝᱜᱟ ᱮᱫ ᱢᱮᱭᱟ ᱾ ᱟᱞᱮ ᱦᱚᱸ ᱞᱮ ᱩᱢ ᱮᱱ ᱱᱟᱲᱠᱟ ᱮᱱ ᱟᱢ ᱦᱚᱸ ᱩᱢ ᱠᱚᱜ ᱱᱟᱲᱠᱟ ᱠᱚᱜ ᱢᱮ ᱾"

ᱦᱟᱯᱲᱟᱢ ᱠᱚᱦᱚᱸ ᱠᱚ ᱵᱚᱸᱜᱟ ᱟᱠᱚᱣᱟ ᱟᱨ ᱠᱚ ᱵᱟᱠᱷᱮᱬᱟ " ᱜᱚᱭᱟ ᱜᱚᱝᱜᱟ ᱠᱮᱫᱮ ᱟᱞᱮ ᱟᱨ ᱥᱟᱶᱦᱟ ᱛᱤᱭᱚ.ᱜ ᱥᱟᱶᱦᱟ ᱠᱟᱞᱮ ᱯᱮ ᱾" ᱟᱫᱚ ᱟᱨ ᱦᱚᱸ ᱛᱩᱯᱩ ᱚᱠᱛᱮ ᱢᱟᱢᱚᱛ ᱵᱟᱝᱠᱷᱟᱱ ᱛᱮᱧᱟᱝ ᱠᱚ ᱜᱷᱟᱴ ᱠᱷᱚᱱ ᱠᱚ ᱨᱟᱠᱟᱵ ᱮᱭᱟ ᱾ ᱵᱩᱰᱤ ᱠᱤᱪᱨᱤᱡ ᱫᱚ ᱚᱸᱰᱮᱱ ᱠᱚᱜ ᱰᱚᱢ ᱦᱟ.ᱰᱤ ᱠᱚ ᱦᱟᱛᱟᱣᱟ ᱾ ᱯᱷᱩᱴᱤᱭᱟ. ᱠᱟ.ᱣᱰᱤ ᱟᱨ ᱥᱟᱠᱚᱢ ᱦᱚᱸᱠᱚ ᱦᱟᱛᱟᱣᱟ ᱾ ᱟᱫᱚ ᱵᱚᱸᱜᱟ ᱥᱟᱨᱮᱡ ᱯᱚᱴᱚᱢ ᱛᱟᱵᱮᱱ ᱡᱚᱛᱚ ᱦᱚᱲ ᱠᱚ ᱦᱟ.ᱴᱤᱧ ᱡᱚᱢᱟ ᱾

ᱱᱚᱝᱠᱟ ᱛᱮ ᱚᱲᱟᱜ ᱛᱮ ᱨᱩᱣᱟ.ᱲ ᱡᱚᱦᱚᱜ ᱦᱚᱸ ᱯᱮᱫᱷᱟᱣ ᱦᱤᱨᱞᱟ. ᱢᱟᱨᱟᱝ ᱵᱳᱨᱳ ᱢᱮᱱᱛᱮ ᱠᱚ ᱠᱟᱠᱞᱮ ᱚᱴᱚ ᱠᱟᱜᱼᱟ ᱾ ᱚᱲᱟᱜ ᱛᱮ ᱥᱮᱴᱮᱨ ᱠᱟᱛᱮ ᱡᱟᱸᱜᱟ ᱠᱚ ᱟ.ᱨᱩᱵ ᱠᱚᱣᱟ ᱾ ᱢᱟᱺᱡᱷᱤ ᱦᱟᱲᱟᱢ ᱦᱚᱨ ᱜᱤᱛᱤᱡ ᱵᱤᱨ ᱜᱤᱛᱤᱡ ᱠᱟᱛᱷᱟᱭ ᱠᱩᱞᱤ ᱡᱤᱜᱟᱺᱥ ᱠᱚᱣᱟ ᱾

ᱤᱱᱟ. ᱛᱟᱭᱚᱢ ᱡᱟ.ᱛᱨᱤ ᱥᱤᱢ ᱠᱚ ᱠᱩᱴᱟ.ᱢ ᱠᱚᱣᱟ ᱾ ᱟᱨ ᱯᱮ ᱴᱷᱮᱱ ᱠᱚ ᱦᱩᱸᱰᱟ.ᱭᱟ ᱾ ᱢᱤᱫ ᱫᱚ ᱟ.ᱥᱟ.ᱢᱤ ᱟᱨ ᱵᱟᱨ ᱦᱩᱸᱰᱟ. ᱫᱚ ᱢᱤᱫ ᱴᱷᱮᱱ ᱠᱚ ᱴᱷᱮᱞᱟᱣ ᱢᱤᱫᱟ ᱾ ᱟᱨ ᱚᱱᱟ ᱦᱚᱸ ᱯᱮ ᱴᱷᱮᱱ ᱠᱚ ᱦᱩᱸᱰᱟ.ᱭᱟ ᱾ ᱢᱤᱫ ᱫᱚ ᱯᱮᱲᱟ ᱟᱨ ᱵᱟᱨ ᱫᱚ ᱟ.ᱛᱩ ᱜᱟᱶᱛᱟ ᱟᱨ ᱯᱮ ᱦᱟ.ᱴᱤᱧ ᱫᱚ ᱥᱟᱭ ᱯᱩᱲᱥᱤ ᱞᱟ.ᱜᱤᱫ ᱾ ᱚᱱᱟ ᱠᱚ ᱡᱚᱢ ᱠᱟᱛᱮ ᱠᱚ ᱟᱯᱟᱱ ᱟ.ᱯᱤᱱᱚᱜᱼᱟ ᱾

ᱜᱚᱡ ᱟᱠᱟᱱ ᱜᱩᱨ ᱟᱠᱟᱱᱤᱡ ᱵᱚ ᱩᱢ ᱥᱟᱨᱪᱟ ᱠᱮᱫᱮ ᱠᱷᱟᱱ ᱡᱤᱞᱤᱧ ᱰᱟᱦᱟᱨ ᱛᱮᱵᱚ ᱤᱫᱤ ᱠᱮᱫᱮ ᱠᱷᱟᱱ ᱱᱤᱨᱟ.ᱭ ᱱᱟᱯᱟᱭ ᱨᱮᱭ ᱛᱟᱦᱮᱸᱱᱟ ᱟᱨ ᱥᱟᱶᱦᱟ ᱠᱟᱛᱮ ᱫᱷᱚᱨᱢᱚ ᱴᱷᱮᱱ ᱥᱩᱞᱩᱠ ᱨᱮ ᱴᱷᱟᱶ ᱮ ᱧᱟᱢᱟ ᱢᱮᱱᱛᱮ ᱦᱟᱯᱲᱟᱢ ᱠᱚ ᱢᱮᱱ ᱟ.ᱜᱩ ᱟᱠᱟᱜᱼᱟ ᱾

ᱛᱩᱯᱩᱱᱟ.ᱭ ᱜᱷᱟᱴ ᱧᱩᱛᱩᱢ ᱥᱟᱯᱲᱟᱣ

ᱚ. ᱛᱮᱞ ᱠᱩᱯᱤ ᱜᱟ.ᱭᱟ. ᱜᱷᱟᱴ ᱟ. ᱛᱤᱨᱭᱳ ᱜᱷᱟᱴ ᱤ. ᱜᱟ.ᱭᱟ. ᱜᱷᱟᱴ ᱩ. ᱵᱟ.ᱨᱱᱤ ᱜᱷᱟᱴ ᱮ. ᱫᱚᱢᱟᱞᱤᱭᱟ. ᱜᱷᱟᱴ ᱳ. ᱪᱟ.ᱶᱨᱤᱡ ᱜᱷᱟᱴ ᱛ. ᱵᱟᱜᱽᱱᱟ ᱜᱷᱟᱴ ᱠ. ᱦᱟᱴᱠᱩᱸᱰ ᱜᱷᱟᱴ ᱥ. ᱢᱟᱱ ᱜᱷᱟᱴ ᱮᱢᱟᱱ ᱾

ᱥᱟᱹᱠᱷᱭᱟᱹᱛ ᱥᱟᱯᱲᱟᱣ