ᱥᱟᱠᱟᱢ ᱚᱲᱮᱡ

ᱥᱟᱠᱟᱢ ᱚᱲᱮᱡ ᱵᱟᱝ ᱵᱟᱯᱟᱜᱽ ᱫᱚ ᱡᱩᱨᱤ ᱠᱤᱱ ᱪᱷᱟᱰᱟ ᱪᱷᱟᱹᱰᱤ ᱠᱟᱹᱠᱤᱱ ᱾ ᱢᱚᱬᱮ ᱢᱟᱯᱟᱧᱡᱤ ᱥᱟᱨ ᱥᱟᱹᱜᱩᱱ ᱠᱟᱛᱮ ᱵᱚᱝᱜᱟ ᱵᱳᱨᱳ ᱥᱟᱹᱠᱷᱤ ᱠᱟᱛᱮ ᱢᱤᱫ ᱦᱟᱨᱟ ᱠᱚᱲᱟ ᱦᱟᱨᱟ ᱠᱩᱲᱤ ᱥᱟᱶ ᱠᱟᱹᱠᱤᱱ ᱜᱮ ᱡᱩᱨᱤ ᱫᱚ ᱾ ᱡᱟᱦᱟᱸᱱᱟᱜ ᱚᱡᱮ ᱛᱮᱜᱮ ᱡᱩᱨᱤᱠᱤᱱᱟᱜ ᱥᱩᱞᱩᱠ ᱥᱟᱹᱜᱟᱭ ᱨᱮ ᱢᱚᱱᱮ ᱨᱚᱪᱚᱫ ᱞᱮᱱᱠᱷᱟᱱ ᱡᱩᱨᱤᱠᱤᱱ ᱵᱟᱹᱠᱤᱱ ᱥᱩᱯᱩᱞᱩᱠᱚᱜ-ᱟ ᱾ ᱟᱭᱳ , ᱵᱟᱵᱟ ᱯᱮᱲᱟ ᱨᱟᱦᱬᱟ , ᱵᱚᱭᱦᱟ ᱠᱚ , ᱜᱟᱛᱮ ᱠᱚ ᱢᱟᱹᱡᱷᱤ ᱢᱟᱯᱟᱧᱡᱤ ᱡᱩᱨᱤ ᱠᱤᱱ ᱯᱮᱲᱟ ᱨᱩᱣᱟᱲ ᱠᱟᱹᱠᱤᱱ ᱨᱮᱭᱟᱜ ᱠᱚ ᱛᱮᱴᱮᱡᱟ ᱾ ᱮᱱ ᱦᱚᱸ ᱟᱹᱠᱤᱱᱟᱜ ᱩᱭᱦᱟᱨ ᱵᱟᱝ ᱟᱹᱨᱩᱞᱮᱱ ᱠᱷᱟᱱ ᱟᱨ ᱵᱟᱝ ᱡᱟᱦᱟᱸᱭᱟᱜ ᱱᱟᱯᱟᱭ ᱫᱤᱥᱟ ᱨᱮᱱᱟᱜ ᱚᱨᱡᱚ ᱵᱟᱝ ᱧᱟᱢ ᱞᱮᱱ ᱠᱷᱟᱱ , ᱚᱱᱟ ᱫᱚ ᱵᱟᱹᱲᱤᱡ ᱥᱮᱱ ᱥᱮᱴᱮᱨᱚᱜ-ᱟ , ᱩᱱ ᱚᱠᱛᱚ ᱜᱮ ᱥᱟᱠᱟᱢ ᱚᱲᱮᱡ ᱨᱮᱱᱟᱜ ᱠᱟᱛᱷᱟ ᱨᱟᱠᱟᱵ-ᱟ ᱟᱨ ,ᱥᱟᱠᱟᱢ ᱚᱲᱮᱡ ᱦᱚᱸ ᱦᱩᱭᱩᱜ- ᱾

ᱞᱮᱜᱽ ᱟᱱᱟᱜ ᱠᱚᱥᱟᱯᱲᱟᱣ

ᱯᱮᱨᱮᱡ ᱞᱚᱴᱟ ᱫᱟᱜ , ᱡᱚᱲ ᱥᱤᱨ ᱥᱟᱨᱡᱚᱢ ᱥᱟᱠᱟᱢ ᱯᱮᱭᱟ , ᱠᱟᱴᱠᱚᱢ ᱪᱟᱨᱮᱡ ᱯᱮᱭᱟ , ᱜᱩᱨᱤᱡ ᱢᱤᱫ ᱪᱚᱯᱟᱜ ᱾

ᱥᱟᱠᱟᱢ ᱚᱲᱮᱡ ᱥᱮᱨᱣᱟᱥᱟᱯᱲᱟᱣ

ᱟᱹᱛᱩ ᱨᱮ ᱥᱟᱠᱟᱢ ᱚᱲᱮᱡ ᱚᱠᱛᱚ ᱨᱮᱫᱚ ᱟᱹᱛᱩ ᱨᱤᱱ ᱢᱟᱹᱡᱷᱤ , ᱯᱟᱨᱟᱱᱤᱠ ,ᱡᱚᱜᱽ ᱢᱟᱹᱡᱷᱤ , ᱡᱚᱜᱽ ᱯᱟᱨᱟᱱᱤᱠ , ᱜᱚᱰᱮᱛ , ᱛᱟᱦᱮᱸᱠᱚᱜ ᱠᱷᱟᱱᱮ ᱨᱟᱭᱵᱟᱨᱤᱡ ᱠᱚ ᱛᱟᱦᱮᱸ ᱠᱟᱛᱮ ᱠᱟᱹᱢᱤ ᱥᱟᱹᱛᱩᱜ-ᱟ , ᱠᱩᱲᱤ ᱠᱚᱲᱟ ᱵᱟᱱᱟᱨ ᱯᱟᱦᱴᱟ ᱨᱤᱱ ᱜᱟᱨᱡᱚᱱ ᱠᱚ ᱛᱟᱦᱮᱱᱟ ᱾

ᱠᱟᱹᱢᱤ ᱛᱮᱫᱥᱟᱯᱲᱟᱣ

ᱫᱷᱚᱨᱚᱢ ᱟᱠᱷᱲᱟ ᱟᱨ ᱵᱟᱝᱠᱷᱟᱱ ᱫᱚᱵᱟᱹᱴᱤ ᱠᱩᱞᱦᱤ ᱢᱩᱪᱟᱹᱫ ᱠᱚᱨᱮ ᱱᱚᱶᱟ ᱫᱚᱠᱚ ᱠᱟᱹᱢᱤᱭᱟ ᱾ ᱱᱚᱶᱟ ᱠᱟᱹᱢᱤ ᱫᱚ ᱯᱩᱭᱞᱩ ᱨᱮ ᱨᱟᱭᱵᱟᱨᱤᱡ ᱵᱟᱝ ᱛᱟᱦᱮᱱ ᱨᱮ ᱜᱚᱰᱮᱛ ᱵᱟᱝ ᱨᱮ ᱡᱚᱜᱽ ᱢᱟᱹᱡᱷᱤ ᱵᱟᱝ ᱨᱮ ᱢᱟᱹᱡᱷᱤ ᱠᱚ ᱥᱚᱡᱽ ᱜᱚᱲᱚ ᱨᱮᱠᱚ ᱛᱟᱦᱮᱸᱱᱟ ᱾ ᱯᱷᱟᱨᱪᱟ ᱚᱛᱨᱮ ᱯᱩᱱ ᱠᱚᱬ ᱠᱚ ᱜᱩᱨᱤᱡᱟ , ᱚᱱᱟ ᱪᱚᱴ ᱨᱮ ᱯᱮᱨᱮᱡ ᱞᱚᱴᱟ ᱫᱟᱜ ᱠᱚ ᱫᱚᱲᱚᱢᱟ , ᱞᱚᱴᱟ ᱫᱟᱜ ᱪᱚᱴ ᱨᱮ ᱯᱮᱭᱟ ᱡᱚᱲ ᱥᱤᱨ ᱥᱟᱨᱡᱚᱢ ᱥᱟᱠᱟᱢ ᱦᱟᱹᱨᱩᱵ ᱛᱮᱠᱚ ᱫᱚᱦᱚᱭᱟ , ᱚᱱᱟ ᱪᱮᱛᱟᱱ ᱨᱮ ᱯᱮᱭᱟ ᱠᱟᱴᱠᱚᱢ ᱪᱟᱨᱮᱡ ᱠᱚ ᱫᱚᱦᱚᱭᱟ ᱾ ᱥᱟᱠᱟᱢ ᱚᱲᱮᱡᱮᱫ ᱡᱩᱨᱤ ᱠᱤᱱ ᱞᱚᱴᱟ ᱫᱟᱜ ᱨᱮᱱᱟᱜ ᱯᱟᱪᱮ ᱯᱟᱦᱴᱟ ᱨᱮ ᱵᱚᱝᱜᱟ ᱨᱟᱠᱟᱵ ᱥᱮᱫ ᱥᱟᱢᱟᱝ ᱠᱟᱛᱮ ᱠᱤᱱ ᱛᱤᱸᱜᱩᱱᱟ ᱾ ᱞᱟᱹᱭ ᱟᱹᱠᱤᱱᱟᱠᱚ ᱵᱟᱱᱟ ᱦᱚᱲᱟᱜ ᱞᱮᱸᱜᱟ ᱛᱤᱛᱮ ᱢᱟᱬᱟᱝ ᱢᱤᱫ ᱫᱷᱟᱣᱛᱮ ᱯᱮᱭᱟ ᱠᱟᱴᱠᱚᱢ ᱪᱟᱨᱮᱡ ᱠᱤᱱ ᱨᱟᱹᱯᱩᱫᱟ ᱾ ᱨᱟᱹᱯᱩᱫ ᱠᱟᱛᱮ ᱞᱚᱴᱟ ᱫᱟᱜ ᱥᱩᱨ ᱨᱮᱠᱤᱱ ᱧᱩᱨ ᱠᱟᱜ-ᱟ ᱾ ᱚᱱᱟ ᱛᱟᱭᱚᱢ ᱯᱮᱭᱟ ᱡᱚᱲ ᱥᱤᱨ ᱥᱟᱨᱡᱚᱢ ᱥᱟᱠᱟᱢ ᱦᱚᱸ ᱢᱤᱫ ᱫᱷᱟᱣ ᱨᱮ ᱞᱮᱸᱜᱟ ᱛᱤᱛᱮ ᱜᱮ ᱪᱩᱯᱤ ᱥᱮᱫ ᱨᱮ ᱥᱟᱵ ᱠᱟᱛᱮ ᱵᱚᱦᱚᱜ ᱥᱮᱫ ᱠᱤᱱ ᱪᱤᱨᱟᱹ ᱟᱹᱜᱩᱭᱟ ᱾ ᱤᱱᱟᱹ ᱛᱟᱭᱚᱢ ᱞᱚᱴᱟ ᱫᱟᱜ ᱦᱚᱸ ᱵᱟᱱᱟ ᱦᱚᱲ ᱞᱮᱸᱜᱟ ᱡᱟᱸᱜᱟ ᱛᱮ ᱠᱤᱱ ᱠᱚᱞᱥᱟ ᱦᱤᱨᱤᱡᱟ ᱵᱚᱝᱜᱟ ᱨᱟᱠᱟᱵ ᱥᱮᱫ ᱾ ᱢᱩᱪᱟᱹᱫ ᱨᱮᱫᱚ ᱚᱱᱟ ᱜᱩᱨᱤᱡᱟᱜ ᱨᱮᱜᱮ ᱛᱤᱸᱜᱩ ᱠᱟᱛᱮ ᱦᱚᱨᱟᱥᱤ ᱨᱮᱱᱟᱜ ᱥᱤᱸᱫᱩᱨ ᱯᱮ ᱫᱷᱟᱣ ᱞᱮᱸᱜᱟ ᱛᱤ ᱛᱮ ᱜᱮᱭ ᱜᱟᱥᱟᱣ ᱤᱬᱤᱡᱽ ᱛᱟᱭ ᱛᱮ ᱞᱮᱸᱜᱟ ᱛᱤ ᱨᱮᱱᱟᱜ ᱢᱮᱬᱦᱮᱫ ᱥᱟᱠᱚᱢᱮ ᱛᱩᱫ ᱛᱟᱨᱟᱭᱮᱭᱟ ᱾ ᱟᱫᱚ ᱟᱯᱟᱱ ᱟᱹᱯᱤᱱ ᱦᱚᱨ ᱛᱮ ᱠᱤᱱ ᱥᱮᱱᱚᱜ ᱚᱠᱛᱚ ᱨᱮ ᱢᱟᱯᱟᱧᱡᱤ ᱠᱚ ᱞᱟᱹᱭ ᱟᱠᱤᱱᱟ > ᱟᱹᱵᱤᱱ ᱫᱚ ᱛᱮᱦᱮᱧ ᱠᱷᱚᱱ ᱫᱚ ᱵᱚᱭᱦᱟ ᱞᱮᱠᱟ ᱵᱤᱱ ᱛᱟᱦᱮᱸᱱᱟ ᱾ ᱧᱩᱛᱩᱢ ᱟᱛᱮ ᱵᱤᱱ ᱦᱚᱯᱚᱦᱚᱜ-ᱟ ᱾ ᱡᱟᱦᱟᱸ ᱫᱤᱱ ᱡᱟᱦᱟᱸ ᱦᱤᱞᱚᱜ ᱵᱤᱱ ᱧᱟᱯᱟᱢ ᱫᱚᱦᱲᱟᱜ ᱠᱷᱟᱱ ᱥᱟᱶᱛᱟ ᱟᱹᱨᱤ ᱞᱮᱠᱟ ᱛᱮ ᱵᱤᱱ ᱰᱟᱸᱰᱚᱢᱚᱜ-ᱟ ᱾