ᱥᱟᱦᱟᱵᱽ-ᱩᱫᱽ-ᱫᱤᱱ ᱢᱚᱦᱢᱚᱫᱽ ᱠᱷᱩᱨᱟᱢ ᱫᱚ ᱵᱟᱹᱲᱛᱤ ᱥᱟᱦᱡᱟᱦᱟᱱ ᱢᱮᱱᱛᱮ ᱜᱮ ᱠᱚ ᱵᱟᱰᱟᱭᱮᱭᱟ ᱾ ᱥᱚᱢᱨᱟᱴ ᱡᱟᱦᱟᱝᱜᱤᱨᱤᱡ ᱛᱮᱥᱟᱨ ᱦᱚᱱ ᱫᱚ ᱥᱟᱦᱡᱟᱦᱟᱱ ᱮ ᱛᱟᱦᱮᱸᱠᱟᱱᱟ ᱾ ᱩᱱᱤ ᱫᱚ ᱕ ᱡᱟᱹᱱᱩᱣᱟᱹᱨᱤ ᱑᱕᱙᱒ ᱥᱟᱞᱮ ᱨᱮ ᱡᱟᱱᱟᱢ ᱞᱮᱱ ᱛᱟᱦᱮᱸᱫ ᱾ ᱡᱟᱦᱟᱝᱜᱤᱨᱟᱜ ᱜᱚᱡ ᱛᱟᱭᱚᱢ ᱟᱡ ᱨᱤᱱ ᱡᱚᱛᱚ ᱵᱚᱭᱦᱟᱭ ᱜᱚᱡ ᱠᱮᱫ ᱠᱚᱣᱟ ᱟᱨ ᱔ ᱯᱷᱮᱵᱽᱨᱩᱣᱟᱨᱤ ᱑᱖᱒᱘ ᱥᱟᱞᱮᱨᱮ ᱨᱟᱡᱽ ᱜᱟᱹᱫᱤ ᱨᱮᱭ ᱫᱩᱲᱩᱵ ᱞᱮᱱ ᱛᱟᱦᱮᱸᱫ ᱾ ᱟᱡ ᱨᱤᱱ ᱯᱮᱭᱟ ᱨᱟᱹᱱᱤ ᱠᱷᱚᱱ, ᱫᱚᱥᱟᱨᱤᱡ ᱫᱚ ᱢᱚᱢᱚᱛᱟᱡᱽ ᱧᱩᱛᱩᱢᱟᱭ ᱛᱟᱦᱮᱸᱫ ᱾ ᱢᱚᱢᱚᱛᱟᱡᱽ ᱥᱟᱶ ᱑᱖᱑᱒ ᱥᱟᱞᱮᱨᱮ ᱟᱹᱠᱤᱱᱟᱜ ᱵᱟᱯᱞᱟ ᱦᱩᱭ ᱞᱮᱱ ᱛᱟᱦᱮᱸᱫ ᱾ ᱑᱖᱓᱑ ᱥᱟᱞᱮᱨᱮ ᱢᱚᱢᱚᱛᱟᱡᱟᱜ ᱜᱩᱨ ᱛᱟᱭᱚᱢ ᱟᱡ ᱧᱩᱛᱩᱢ ᱛᱮ ᱛᱟᱡᱽᱢᱚᱦᱚᱞ ᱮ ᱵᱮᱱᱟᱣ ᱞᱮᱫ ᱛᱟᱦᱮᱸᱫ ᱾ ᱫᱤᱞᱞᱤ ᱨᱮᱱᱟᱜ ᱡᱟᱢᱟ ᱢᱚᱥᱡᱤᱫᱽ ᱟᱨ ᱟᱜᱽᱨᱟ ᱨᱮᱱᱟᱜ ᱢᱚᱛᱤ ᱢᱚᱥᱡᱤᱫᱽ ᱦᱚᱸ ᱟᱡ ᱜᱮ ᱵᱮᱱᱟᱣ ᱞᱮᱫ ᱛᱟᱦᱮᱸᱫ ᱾ ᱥᱟᱦᱟᱡᱟᱦᱟᱱᱵᱟᱫᱽ ᱧᱩᱛᱩᱢ ᱛᱮ ᱢᱤᱫ ᱱᱟᱶᱟ ᱨᱟᱡᱽᱜᱟᱲᱮ ᱵᱮᱨᱮᱫ ᱞᱮᱫ ᱛᱟᱦᱮᱸᱫ ᱾ ᱑᱖᱕᱘ ᱥᱟᱞᱮ ᱟᱡᱤᱡ ᱦᱚᱯᱚᱱ ᱚᱣᱨᱚᱝᱡᱟᱵᱽ ᱟᱡ ᱫᱚᱭ ᱵᱚᱱᱫᱤ ᱠᱮᱫᱮ ᱛᱮ ᱨᱟᱡᱽᱜᱟᱹᱫᱤᱭ ᱟᱢᱮᱴ ᱞᱮᱫ ᱛᱟᱦᱮᱸᱫ ᱾ ᱤᱨᱟᱹᱞ ᱥᱮᱨᱢᱟ ᱵᱚᱱᱫᱤ ᱡᱤᱭᱚᱱ ᱠᱷᱟᱸᱰᱟᱣ ᱠᱟᱛᱮ ᱒᱒ ᱡᱟᱱᱩᱣᱟᱨᱤ ᱑᱖᱖᱖ ᱥᱟᱞᱮᱨᱮ ᱟᱡᱟᱜ ᱡᱤᱣᱤ ᱵᱟᱹᱛᱤ ᱫᱚ ᱤᱬᱤᱡ ᱞᱮᱱ ᱛᱟᱦᱮᱸᱫ ᱾

ᱥᱟᱦᱡᱟᱦᱟᱱ

ᱦᱩᱞ ᱥᱟᱢᱟᱝ ᱥᱟᱯᱲᱟᱣ

ᱨᱟᱡᱽ ᱜᱟᱹᱫᱤ ᱦᱟᱥᱚᱞ ᱛᱟᱭᱚᱢ ᱟᱹᱰᱤ ᱱᱟᱯᱟᱭ ᱛᱮ ᱥᱟᱦᱡᱟᱦᱟᱱ ᱫᱚ ᱥᱟᱥᱚᱱᱮ ᱪᱚᱲᱟᱣᱮᱫ ᱛᱟᱦᱮᱸᱫ ᱾ ᱩᱱᱤ ᱫᱚ ᱵᱩᱱᱫᱮᱞ ᱨᱟᱡᱟ ᱡᱩᱡᱷᱟᱨ ᱥᱤᱝ ᱟᱨ ᱟᱯᱷᱜᱟᱱ ᱨᱟᱡᱟ ᱠᱷᱟᱸᱡᱟᱦᱟᱱ ᱞᱚᱫᱤᱭᱟᱜ ᱦᱩᱞᱥᱟᱹᱭᱮ ᱥᱟᱢᱟᱝ ᱫᱟᱨᱟᱢ ᱞᱮᱫ ᱛᱟᱦᱮᱸᱫ ᱾ ᱩᱱ ᱡᱚᱠᱷᱚᱡ ᱦᱩᱜᱩᱲᱤ ᱨᱮ ᱯᱚᱨᱛᱩᱜᱤᱡᱽ ᱠᱚ ᱟᱹᱰᱤ ᱞᱮᱠᱟᱱ ᱱᱟᱦᱟᱪᱟᱨ ᱠᱚ ᱪᱷᱩᱴᱟᱹᱣ ᱞᱮᱱ ᱛᱟᱦᱮᱸᱫ ᱾ ᱚᱱᱟᱛᱮ ᱥᱟᱦᱡᱟᱦᱟᱱ ᱟᱨ ᱨᱤᱱ ᱯᱷᱟᱹᱫᱽ ᱠᱚ ᱠᱩᱞ ᱠᱟᱛᱮ ᱚᱱᱟ ᱴᱚᱴᱷᱟᱠᱚᱭ ᱫᱚᱠᱷᱚᱞ ᱞᱮᱫ ᱛᱟᱦᱮᱸᱫ ᱾ ᱟᱭᱢᱟ ᱯᱚᱨᱛᱩᱜᱤᱡᱽ ᱠᱚ ᱜᱚᱡ ᱮᱱᱟ ᱟᱨ ᱠᱚ ᱵᱚᱱᱫᱤ ᱠᱮᱫ ᱠᱚᱣᱟ ᱾ ᱥᱟᱦᱡᱟᱦᱟᱱᱟᱜ ᱥᱟᱥᱮᱛ ᱚᱠᱛᱚ ᱨᱮ ᱠᱚᱧᱮ ᱥᱮᱦᱮᱫ ᱟᱨ ᱜᱩᱡᱽᱨᱟᱴ ᱨᱮ ᱟᱹᱰᱤ ᱡᱩᱨ ᱠᱚ ᱨᱮᱸᱜᱮᱡ ᱱᱟᱪᱟᱨ ᱞᱮᱱᱟ ᱾ ᱥᱟᱦᱡᱟᱦᱟᱱᱟᱜ ᱜᱚᱜᱽᱲᱚ ᱥᱟᱶᱛᱮ ᱨᱮᱦᱚᱸ ᱟᱭᱢᱟ ᱠᱚᱣᱟᱜ ᱡᱤᱣᱤ ᱪᱟᱞᱟᱣᱮᱱᱟ ᱾

ᱠᱟᱱᱫᱟᱦᱟᱨ ᱦᱩᱞᱥᱟᱸᱜᱷᱟᱨ ᱥᱟᱯᱲᱟᱣ

ᱥᱟᱦᱡᱟᱦᱟᱱ ᱯᱟᱨᱚᱥᱭᱚ ᱥᱚᱢᱨᱟᱴ ᱜᱚᱵᱚᱞ ᱠᱷᱚᱱ ᱠᱟᱱᱫᱟᱦᱟᱨ ᱨᱮᱡ ᱞᱟᱹᱜᱤᱫ ᱞᱮᱛᱟᱲ ᱮ ᱨᱤᱠᱟᱹ ᱞᱮᱫ ᱨᱮᱦᱚᱸ ᱵᱟᱭ ᱨᱮᱡ ᱫᱟᱲᱮᱭᱟᱫᱮᱭᱟ ᱾ ᱱᱚᱶᱟ ᱫᱟᱨᱟᱭ ᱛᱮ ᱢᱚᱜᱚᱞ ᱫᱟᱲᱮ ᱢᱚᱥᱨᱟ ᱭᱮᱱᱟ ᱢᱮᱱᱛᱮ ᱵᱟᱰᱟᱭᱮᱱᱟ ᱾ ᱥᱟᱦᱡᱟᱦᱟᱱ ᱛᱟᱞᱟ ᱮᱥᱤᱭᱟ ᱨᱮᱱᱟᱜ ᱱᱤᱡᱚᱨ ᱵᱟᱵᱟ ᱟᱯᱟᱛ ᱛᱮᱠᱚᱣᱟᱜ ᱛᱟᱹᱨᱤ ᱨᱮ ᱢᱮᱱᱟᱜ ᱫᱤᱥᱚᱢ ᱠᱚ ᱦᱚᱸ ᱨᱮᱡ ᱞᱟᱹᱜᱤᱫ ᱞᱮᱛᱟᱲ ᱜᱮ ᱯᱷᱟᱹᱫᱽ ᱠᱚᱭ ᱵᱷᱮᱡᱟ ᱞᱮᱫ ᱠᱚᱣᱟ ᱾ ᱢᱮᱱᱠᱷᱟᱱ ᱚᱸᱰᱮ ᱦᱚᱸ ᱵᱟᱭ ᱫᱟᱲᱮᱞᱮᱱ ᱛᱟᱦᱮᱸᱫ ᱟᱭᱢᱟ ᱫᱷᱚᱱ ᱨᱮᱱᱟᱜ ᱠᱷᱤᱛᱤ ᱠᱟᱛᱮ ᱦᱮᱡ ᱦᱩᱭᱟᱫᱮ ᱛᱟᱦᱮᱸᱫ ᱾

ᱠᱚᱸᱡᱮ ᱥᱮᱦᱮᱫ ᱦᱩᱞᱥᱟᱸᱜᱷᱟᱨ ᱥᱟᱯᱲᱟᱣ

ᱚᱦᱢᱚᱫᱽᱱᱚᱜᱚᱨ ᱱᱟᱜᱟᱨ ᱨᱤᱱᱤᱡ ᱧᱩᱛᱩᱢᱟᱱ ᱢᱚᱱᱛᱨᱤ ᱢᱟᱞᱤᱠ ᱚᱢᱵᱚᱨᱟᱜ ᱜᱩᱨ ᱛᱟᱭᱚᱢ ᱟᱡᱤᱡ ᱦᱚᱯᱚᱱ ᱯᱷᱚᱛᱮ ᱠᱷᱟᱱ ᱚᱦᱢᱚᱫᱽᱱᱚᱜᱚᱨ ᱨᱤᱱᱤᱡ ᱥᱩᱞᱛᱟᱱ ᱜᱚᱡ ᱠᱟᱛᱮ ᱟᱡᱤᱡ ᱦᱚᱯᱚᱱ ᱦᱩᱥᱮᱱ ᱥᱟᱦ ᱨᱟᱡᱽᱜᱟᱹᱫᱤ ᱨᱮ ᱫᱚᱲᱚᱢ ᱠᱟᱛᱮ ᱥᱟᱱᱟᱢ ᱟᱭᱫᱟᱹᱨ ᱟᱡ ᱮ ᱤᱫᱤᱞᱮᱫ ᱛᱟᱦᱮᱸᱫ ᱾ ᱱᱚᱶᱟ ᱚᱠᱛᱚ ᱨᱮ ᱥᱟᱦᱡᱟᱦᱟᱱ ᱞᱮᱛᱟᱲ ᱩᱴᱠᱟᱹᱨ ᱚᱦᱢᱚᱫᱽᱱᱚᱜᱚᱨ ᱨᱮᱱᱟᱜ ᱨᱟᱡᱽᱜᱟᱲ ᱫᱚᱣᱞᱟᱛᱵᱟᱫ ᱫᱚᱭ ᱫᱚᱠᱷᱚᱞ ᱞᱮᱫ ᱛᱟᱦᱮᱸᱫ ᱾ ᱑᱖᱓᱓ ᱥᱟᱞᱮ ᱚᱦᱢᱚᱫᱽᱱᱚᱜᱚᱨ ᱢᱚᱜᱚᱞ ᱨᱟᱡᱽ ᱛᱟᱹᱨᱤ ᱨᱮ ᱥᱮᱞᱮᱫ ᱮᱱᱟ ᱟᱨ ᱡᱟᱭᱡᱩᱜᱽ ᱞᱟᱹᱜᱤᱫ ᱱᱤᱡᱟᱢᱥᱟᱦᱤ ᱵᱚᱝᱥᱚ ᱫᱚ ᱟᱫ ᱥᱟᱹᱨᱤᱭᱮᱱᱟ ᱾ ᱚᱱᱟ ᱵᱚᱝᱥᱚ ᱨᱮᱱᱟᱜ ᱫᱚᱦᱲᱟ ᱨᱟᱠᱟᱵ ᱠᱮᱴᱮᱡ ᱟᱨ ᱚᱦᱢᱚᱫᱽᱱᱚᱜᱚᱨ ᱨᱮᱱᱟᱜ ᱯᱷᱩᱨᱜᱟᱹᱞ ᱟᱹᱜᱩᱭ ᱞᱟᱹᱜᱤᱫ ᱢᱚᱨᱚᱦᱚᱴᱟ ᱨᱟᱡᱟ ᱟᱭᱢᱟ ᱨᱤᱠᱟᱹ ᱠᱟᱛᱮ ᱦᱚᱸ ᱵᱟᱭ ᱫᱟᱲᱮᱭᱟᱫ ᱛᱟᱦᱮᱸᱫ ᱾

ᱵᱟᱨᱦᱮ ᱡᱚᱱᱚᱲ ᱥᱟᱯᱲᱟᱣ

ᱥᱟᱹᱠᱷᱭᱟᱹᱛ ᱥᱟᱯᱲᱟᱣ