ᱨᱟᱣᱞᱟᱴ ᱟᱭᱤᱱ
ᱨᱟᱣᱞᱟᱴ ᱟᱹᱱ ᱥᱮ ᱟᱭᱤᱱ(The Rowlatt Act of 1919)- ᱱᱤᱭᱟᱹ ᱛᱮ ᱫᱚ ᱯᱩᱭᱞᱩ ᱫᱷᱟᱹᱨᱛᱤ ᱞᱟᱹᱲᱦᱟᱹᱭ ᱛᱟᱭᱚᱢ ᱵᱨᱤᱴᱤᱥ ᱥᱚᱨᱠᱟᱨ ᱡᱚᱛᱚ ᱞᱮᱠᱟᱱ ᱜᱚᱱᱚᱛᱟᱱᱛᱨᱤᱠ ᱟᱱᱫᱳᱞᱚᱱ ᱞᱤᱢᱵᱟᱹᱫ ᱟᱨ ᱥᱚᱱᱛᱨᱟᱥᱵᱟᱫᱽ(ᱵᱨᱤᱴᱤᱥ ᱵᱤᱨᱳᱫᱷᱤ ᱟᱱᱫᱳᱞᱚᱱ) ᱫᱚᱢᱟᱣ ᱨᱮᱱᱟᱜ ᱮ ᱠᱩᱨᱩᱢᱩᱴᱩ ᱞᱮᱫᱟ᱾ ᱱᱤᱭᱟᱹ ᱞᱟᱜᱤᱫ ᱜᱮ ᱵᱨᱤᱴᱤᱥ ᱥᱚᱨᱠᱟᱨ ᱵᱤᱪᱟᱹᱨᱯᱚᱛᱤ ᱨᱟᱣᱞᱟᱴᱼᱟᱜ ᱟᱹᱭᱩᱨ ᱛᱮ ᱢᱚᱲᱮ ᱦᱚᱲ ᱛᱮ 'ᱥᱤᱰᱤᱥᱚᱱ ᱠᱚᱢᱤᱥᱚᱱ’ [Sedition Commission] ᱛᱤᱝᱜᱩ ᱠᱮᱫᱟ᱾ ᱵᱷᱟᱨᱚᱛᱤᱭᱚ ᱠᱚᱣᱟᱜ ᱦᱤᱝᱥᱟᱠᱛᱚᱠ ᱟᱱᱫᱳᱞᱚᱱ ᱠᱷᱚᱱ ᱵᱨᱤᱴᱤᱥ ᱨᱟᱡᱽ ᱨᱩᱠᱷᱤᱭᱟᱹ ᱞᱟᱹᱜᱤᱫ ᱛᱮ ᱠᱚᱢᱤᱥᱚᱱ ᱛᱷᱚᱲᱟ ᱥᱩᱯᱟᱨᱤᱥ ᱮ ᱮᱢ ᱮᱱᱟ᱾ ᱚᱱᱟ ᱥᱩᱯᱟᱨᱤᱥ ᱪᱮᱛᱟᱱ ᱜᱮ ᱑᱙᱑᱙ ᱠᱷᱨᱤᱥᱴᱟᱵᱽᱫᱚ ᱨᱮᱱᱟᱜ ᱑᱘ ᱢᱟᱨᱪ ᱵᱨᱤᱴᱤᱥ ᱥᱚᱨᱠᱟᱨ ᱥᱚᱱᱛᱨᱟᱥᱵᱟᱫᱽ ᱵᱤᱨᱳᱫᱷᱤ ᱟᱨ ᱫᱚᱢᱚᱱ ᱟᱭᱤᱱ ᱮ ᱪᱟᱹᱞᱩ ᱠᱮᱫᱟ᱾ ᱤᱱᱤᱭᱟᱹ ᱟᱭᱤᱱ ᱫᱚ ᱠᱩᱠᱠᱷᱟᱛᱚ 'ᱨᱟᱣᱞᱟᱴ ᱟᱭᱤᱱ' ᱦᱚ ᱠᱚ ᱢᱮᱛᱟᱜᱼᱟ᱾ ᱱᱤᱭᱟᱹ ᱟᱭᱤᱱ ᱛᱮ ᱦᱚᱲ ᱠᱚᱣᱟᱜ ᱯᱷᱩᱨᱜᱟᱹᱞ ᱟᱨ ᱟᱹᱭᱫᱟᱹᱨᱤ ᱦᱚᱥᱚᱫ ᱮᱱᱟ᱾ ᱥᱚᱨᱠᱟᱨ ᱵᱤᱨᱳᱫᱷᱤ ᱡᱟᱦᱟᱱ ᱯᱟᱥᱱᱟᱣ ᱜᱮ ᱜᱷᱟᱹᱴ ᱢᱮᱱᱛᱮ ᱞᱮᱠᱷᱟᱭᱮᱱᱟ᱾ ᱡᱟᱦᱟᱞᱮᱠᱟᱱ ᱯᱨᱚᱢᱟᱱ ᱵᱮᱜᱚᱨ ᱛᱤᱜ ᱤᱱᱫᱤᱫ ᱟᱠᱟᱱ ᱡᱟᱦᱟᱭ ᱵᱮᱜᱚᱨ ᱯᱚᱨᱚᱣᱟᱱᱟ ᱟᱨ ᱵᱮᱜᱚᱨ ᱵᱤᱪᱟᱨ ᱛᱮ ᱥᱟᱵ ᱟᱨ ᱡᱟᱦᱟ ᱛᱤᱱᱟᱹᱜ ᱫᱤᱱ ᱟᱴᱚᱠ ᱫᱚᱦᱚ ᱨᱮᱱᱟᱜ ᱠᱷᱚᱢᱚᱛᱟ ᱟᱨ ᱚᱲᱟᱜ ᱠᱚ ᱛᱚᱞᱟᱥ ᱨᱮᱱᱟᱜ ᱟᱹᱭᱫᱟᱹᱨᱤ ᱥᱚᱨᱠᱟᱨᱮ ᱧᱟᱢ ᱠᱮᱫᱟ᱾ ᱱᱤᱭᱟᱹ ᱟᱭᱤᱱ ᱛᱮ ᱵᱷᱟᱨᱚᱛ ᱨᱮᱱ ᱦᱚᱲ ᱥᱟᱹᱨᱤᱱ ᱵᱤᱪᱟᱹᱨ ᱧᱟᱢ ᱨᱮᱱᱟᱜ ᱟᱹᱭᱫᱟᱹᱨᱤ ᱠᱷᱚᱱ ᱠᱚ ᱮᱲᱮ ᱟᱪᱚᱭᱮᱱᱟ᱾ ᱚᱱᱟᱛᱮ ᱨᱟᱣᱞᱟᱴ ᱟᱭᱤᱱ ᱫᱚ [ᱦᱮᱸᱫᱮ ᱟᱭᱤᱱ] ᱠᱚ ᱢᱮᱛᱟᱜᱼᱟ᱾ ᱥᱚᱝᱵᱟᱫᱽᱯᱚᱛᱨᱚ ᱠᱚ ᱨᱮᱱᱟᱜ ᱯᱷᱩᱨᱜᱟᱹᱞ ᱪᱟᱵᱟᱭᱮᱱᱟ᱾ ᱥᱚᱨᱠᱟᱨ ᱪᱟᱞᱟᱜ ᱠᱟᱱ ᱟᱭᱤᱱ ᱠᱚ ᱵᱚᱱᱫᱚ ᱠᱟᱛᱮᱜ ᱯᱩᱞᱤᱥ ᱟᱨ ᱯᱨᱚᱥᱟᱥᱚᱱᱟᱜ ᱠᱚᱪᱞᱚᱱ ᱨᱮ ᱦᱚᱲᱮ ᱴᱷᱮᱞᱟᱣ ᱜᱚᱫ ᱠᱟᱜ ᱠᱚᱣᱟ᱾ ᱦᱚᱲ ᱠᱚ ᱢᱩᱫᱽ ᱨᱮ ᱱᱤᱭᱟᱹ ᱟᱭᱤᱱ ᱵᱤᱨᱩᱫᱽ ᱨᱚᱲ ᱮᱦᱚᱵ ᱮᱱᱟ᱾ ᱵᱷᱟᱨᱚᱛᱤᱭᱚ ᱥᱟᱨᱛᱷᱚ ᱵᱤᱨᱳᱫᱷᱤ ᱱᱤᱭᱟᱹ ᱟᱭᱤᱱ ᱵᱤᱨᱩᱫᱽ ᱡᱚᱛᱚ ᱥᱮᱡ ᱠᱷᱚᱱ ᱦᱚᱲ ᱯᱨᱚᱛᱤᱵᱟᱫᱽ ᱠᱚ ᱮᱦᱚᱵ ᱮᱱᱟ᱾ ᱠᱮᱱᱫᱨᱤᱭᱚ ᱟᱭᱤᱱ ᱥᱚᱵᱷᱟ ᱨᱮᱱ ᱡᱚᱛᱚ ᱵᱷᱟᱨᱚᱛᱤᱭᱚ ᱥᱚᱫᱚᱥᱥᱚ ᱠᱚ ᱦᱟᱺᱰᱨᱟᱹᱣ ᱮᱱᱟ᱾ ᱢᱚᱫᱚᱱᱢᱳᱦᱚᱱ ᱢᱟᱞᱟᱵᱵᱚ, ᱢᱚᱦᱚᱢᱢᱚᱫᱽ ᱟᱞᱤ ᱡᱤᱱᱱᱟᱦ, ᱢᱟᱡᱽᱦᱟᱨ ᱩᱞ ᱦᱚᱠ ᱟᱭᱤᱱ ᱯᱚᱨᱤᱥᱚᱫ ᱨᱮᱱᱟᱜ ᱦᱚᱨ ᱠᱚ ᱵᱟᱹᱜᱤᱭᱟᱫᱟ᱾ ᱪᱚᱨᱚᱢᱯᱚᱱᱛᱷᱤ ᱥᱟᱞᱟᱜ ᱥᱩᱨᱮᱱᱫᱨᱚᱱᱟᱛᱷ ᱞᱮᱠᱟᱱ ᱱᱚᱨᱚᱢᱯᱚᱱᱛᱷᱤ ᱦᱚᱸ ᱱᱤᱭᱟᱹ ᱟᱭᱤᱱ ᱵᱤᱨᱩᱫᱽ ᱠᱩ ᱛᱤᱝᱜᱩ ᱮᱱᱟ᱾ ᱢᱟᱦᱟᱛᱢᱟ ᱜᱟᱱᱫᱷᱤ ᱜᱚᱴᱟ ᱵᱷᱟᱨᱚᱛ ᱞᱟᱲᱟᱣᱱᱟᱭ ᱦᱚᱦᱚ ᱠᱮᱫᱟ᱾ ᱑᱙᱑᱙ ᱠᱷᱨᱤᱥᱴᱟᱵᱽᱫᱚ ᱨᱮᱱᱟᱜ ᱓᱐ ᱢᱟᱨᱪ ᱟᱨ ᱖ ᱮᱯᱨᱤᱞ ᱜᱟᱱᱫᱷᱤᱡᱤ ᱭᱟᱜ ᱦᱚᱦᱚ ᱛᱮ ᱜᱚᱴᱟ ᱫᱤᱥᱟᱹᱢ ᱦᱚᱨᱛᱟᱞ ᱟᱨ ᱡᱚᱱᱚᱥᱚᱵᱷᱟ ᱢᱟᱱᱟᱣ ᱮᱱᱟ᱾ ᱜᱟᱱᱫᱷᱤᱡᱤ ᱥᱚᱛᱛᱟᱜᱨᱚᱦ ᱨᱮᱱᱟᱜ ᱦᱩᱢᱠᱤᱭ ᱮᱢᱟᱜ ᱠᱚᱣᱟ᱾