ᱨᱩ ᱚᱨᱚᱝ ᱥᱟᱯᱟᱵ
ᱨᱩ ᱚᱨᱚᱝ ᱥᱟᱯᱟᱵ
ᱥᱟᱱᱛᱟᱲ ᱫᱚ ᱟᱹᱰᱤ ᱨᱩᱥᱤᱠᱟ ᱨᱟᱹᱥᱠᱟᱹ ᱟᱱ ᱡᱟᱹᱛ ᱠᱟᱱᱟᱠᱚ, ᱮᱱᱮᱡ ᱥᱮᱨᱮᱧ ᱫᱚ ᱩᱱᱠᱩᱟᱜ ᱡᱟᱝ ᱢᱟᱭᱟᱢ ᱨᱮ ᱢᱮᱥᱟ ᱢᱮᱱᱟᱜᱼᱟ ᱾ ᱮᱱᱮᱡ ᱥᱮᱨᱮᱧ ᱫᱚ ᱨᱩ ᱚᱨᱚᱝ ᱨᱮᱱᱟᱜ ᱨᱟᱦᱟ ᱵᱟᱝ ᱢᱟ ᱛᱟᱲ ᱛᱮᱜᱮ ᱠᱚ ᱮᱱᱮᱡᱼᱟ ᱾ ᱨᱩ ᱚᱨᱚᱝ ᱞᱟᱹᱜᱤᱫ ᱟᱭᱢᱟ ᱜᱚᱴᱟᱝ ᱥᱟᱯᱟᱵ (ᱵᱟᱡᱽ-ᱵᱟᱡᱽᱱᱟ/musical instruments) ᱢᱮᱱᱟᱜ-ᱟ ᱾ ᱚᱱᱟ ᱨᱩ ᱚᱨᱚᱝ ᱥᱟᱯᱟᱵ ᱠᱚ ᱢᱩᱫᱽ ᱨᱮ ᱵᱮᱣᱦᱟᱨᱚᱜ ᱠᱟᱱ ᱥᱟᱯᱟᱵ ᱠᱚ ᱫᱚ:- ᱴᱟᱢᱟᱠ, ᱛᱩᱢᱫᱟᱜ, ᱨᱮᱜᱽᱲᱟ, ᱰᱷᱟᱠ, ᱡᱷᱟᱺᱭ, ᱠᱚᱨᱛᱟᱞ, ᱛᱤᱨᱤᱭᱟᱹᱣ, ᱵᱟᱱᱟᱢ, ᱞᱤᱯᱩᱨ, ᱡᱷᱩᱱᱠᱟᱹ, ᱜᱷᱚᱱᱴᱟ ᱮᱢᱟᱱ ᱠᱚ ᱾
ᱴᱟᱢᱟᱠ
ᱥᱟᱯᱲᱟᱣᱴᱟᱢᱟᱠ ᱨᱮᱱᱟᱜ ᱟᱥᱚᱞ ᱦᱤᱸᱥ ᱫᱚ ᱠᱩᱸᱰᱦᱤ ᱟᱨ ᱛᱟᱞᱠᱷᱟ ᱾ ᱠᱩᱸᱰᱦᱤ ᱫᱚ ᱢᱮᱬᱦᱮᱫ ᱯᱟᱹᱛᱤ ᱡᱚᱲᱟᱣ ᱠᱟᱛᱮ ᱟᱨ ᱛᱟᱨᱟ ᱫᱚ ᱛᱟᱞᱮ ᱨᱮᱦᱮᱫ ᱰᱷᱟᱹᱢᱯᱩ ᱴᱷᱩᱭᱟᱸᱜ ᱞᱮᱠᱟᱠᱚ ᱵᱮᱱᱟᱣ ᱟ ᱾ ᱛᱟᱞᱠᱷᱟ ᱫᱚ ᱦᱟᱲᱟᱢ ᱠᱟᱰᱟ ᱦᱟᱨᱛᱟ ᱨᱮᱱᱟᱜ ᱾ ᱠᱟᱰᱟ ᱦᱟᱨᱛᱟ ᱨᱮᱱᱟᱜ ᱠᱟᱝᱠᱷᱚᱨ ᱛᱮᱜᱮ ᱛᱟᱞᱠᱷᱟ ᱛᱮᱠᱚ ᱫᱟᱞᱚᱵᱟ ᱾ ᱨᱩ ᱞᱟᱹᱜᱤᱫ ᱵᱟᱨᱭᱟ ᱴᱟᱢᱟᱠ ᱠᱷᱟᱹᱰᱤ ᱞᱟᱜᱟᱜᱼᱟ ᱾ ᱢᱚᱸᱡᱽ ᱛᱮ ᱥᱟᱰᱮᱜ ᱞᱟᱹᱜᱤᱫ ᱛᱟᱞᱠᱷᱟ ᱨᱮ ᱠᱩᱸᱭᱰᱤ, ᱵᱟᱹᱨᱩ ᱥᱩᱱᱩᱢ ᱠᱚ ᱚᱡᱚᱜᱟᱜᱼᱟ ᱾ ᱴᱟᱢᱟᱠ ᱨᱮᱱᱟᱜ ᱥᱟᱰᱮ ᱒᱐ᱼ᱒᱕ ᱢᱟᱭᱤᱞ ᱥᱟᱹᱜᱤᱧ ᱦᱟᱹᱵᱤᱡ ᱪᱟᱞᱟᱜᱼᱟ ᱾ ᱫᱚᱝ, ᱞᱟᱜᱽᱬᱮ, ᱵᱟᱦᱟ, ᱠᱟᱨᱟᱢ, ᱫᱳᱸᱜᱮᱲ, ᱯᱚᱨᱚᱵ ᱮᱱᱮᱡ ᱠᱚᱨᱮ ᱴᱟᱢᱟᱠ ᱫᱚ ᱮᱠᱟᱞ ᱞᱟᱹᱠᱛᱤᱜ ᱜᱮᱭᱟ ᱿
- ᱴᱟᱢᱟᱠ
ᱛᱩᱢᱫᱟᱜ
ᱥᱟᱯᱲᱟᱣ
ᱛᱩᱢᱫᱟᱜ ᱨᱮᱱᱟᱜ ᱠᱷᱚᱞ ᱛᱮᱫ ᱫᱚ ᱦᱟᱥᱟ ᱵᱟᱝᱠᱷᱟᱱ ᱨᱟᱣᱟᱞ ᱧᱚᱜ ᱢᱮᱬᱦᱮᱫ ᱯᱟᱹᱛᱤ ᱨᱮᱱᱟᱜ ᱠᱚ ᱵᱮᱱᱟᱣ ᱟ ᱾ ᱦᱟᱥᱟ ᱨᱮᱱᱟᱜ ᱠᱷᱚᱞ ᱵᱮᱱᱟᱣ ᱠᱟᱛᱮ ᱢᱚᱸᱡᱽ ᱛᱮᱠᱚ ᱨᱟᱯᱟᱜᱟ ᱾ ᱰᱟᱺᱜᱽᱨᱤ, ᱢᱮᱨᱚᱢ ᱵᱟᱝᱠᱷᱟᱱ ᱵᱷᱤᱰᱤ ᱦᱟᱨᱛᱟ ᱛᱮᱠᱚ ᱫᱟᱞᱚᱵᱟ ᱾ ᱠᱟᱝᱠᱷᱚᱨ ᱦᱚᱸ ᱚᱱᱚ ᱨᱮᱱᱟᱜ ᱜᱮᱠᱚ ᱵᱮᱱᱟᱣ ᱟ ᱾ ᱫᱚᱝ, ᱞᱟᱜᱽᱬᱮ, ᱵᱟᱦᱟ, ᱠᱟᱨᱟᱢ ᱨᱮᱫᱚ ᱛᱩᱢᱫᱟᱜ ᱮᱠᱟᱞ ᱜᱮ ᱞᱟᱹᱛᱤᱜᱼᱟ ᱾ ᱛᱩᱢᱫᱟᱜ ᱫᱚ ᱡᱚᱛᱚ ᱨᱩ ᱚᱨᱚᱝ ᱥᱟᱯᱟᱵ-ᱮ ᱟᱹᱭᱩᱨ ᱠᱚᱣᱟ ᱿
ᱰᱷᱟᱠ
ᱥᱟᱯᱲᱟᱣᱰᱷᱟᱠ ᱠᱷᱚᱞ ᱫᱚ ᱢᱚᱴᱟ ᱧᱚᱜ ᱜᱷᱟᱱᱴᱟᱲ/ᱠᱟᱱᱴᱷᱟᱲ ᱥᱮ ᱚᱱᱠᱟᱱᱟᱜ ᱨᱟᱣᱟᱞ ᱫᱟᱨᱮ ᱨᱮᱱᱟᱜ ᱠᱚ ᱵᱮᱱᱟᱣ ᱟ ᱾ ᱡᱤᱞᱤᱧ ᱫᱚ ᱦᱚᱲ ᱵᱟᱨᱟᱵᱟᱨᱤ ᱦᱚᱸ ᱠᱚ ᱵᱮᱱᱟᱣ ᱜᱮᱭᱟ ᱾ ᱢᱮᱨᱚᱢ ᱵᱟᱝᱠᱷᱟᱱ ᱵᱷᱤᱰᱤ ᱦᱟᱨᱛᱟ ᱛᱮᱠᱚ ᱫᱟᱞᱚᱵᱟ ᱾ ᱠᱟᱝᱠᱷᱚᱨ ᱦᱚᱸ ᱚᱱᱚ ᱨᱮᱱᱟᱜ ᱜᱮᱠᱚ ᱵᱮᱱᱟᱣ ᱟ ᱾ ᱯᱚᱨᱚᱵ ᱮᱱᱮᱡ ᱨᱮ ᱰᱷᱟᱠ ᱫᱚ ᱟᱹᱰᱤ ᱞᱟᱹᱠᱛᱤᱭᱟᱱ ᱠᱟᱱᱟ ᱾
- ᱰᱷᱟᱠ
ᱛᱤᱨᱤᱭᱟᱹᱣ
ᱥᱟᱯᱲᱟᱣᱛᱤᱨᱤᱭᱟᱹᱣ ᱫᱚ ᱨᱟᱣᱟᱞ ᱢᱟᱫ ᱠᱷᱚᱞ ᱛᱮ ᱠᱚ ᱵᱮᱱᱟᱣᱟ ᱾ ᱚᱱᱟ ᱠᱷᱚᱞ ᱨᱮᱱᱟᱜ ᱢᱤᱫ ᱯᱟᱦᱴᱟ ᱫᱚ ᱮᱥᱮᱫ ᱜᱮ ᱛᱟᱦᱮᱸᱱᱟ ᱟᱨ ᱚᱱᱟ ᱪᱮᱛᱟᱱ ᱨᱮ ᱡᱚᱛᱚᱨᱮ ᱮᱭᱟᱭ(᱗) ᱜᱚᱴᱟᱝ ᱠᱚ ᱵᱷᱩᱜᱟᱹᱜ ᱠᱟᱜᱼᱟ ᱦᱚᱭ ᱚᱰᱚᱠ ᱵᱚᱞᱚᱱ ᱞᱟᱹᱜᱤᱫ ᱾ ᱢᱤᱫ(᱑) ᱵᱷᱩᱜᱟᱹᱜ ᱛᱮ ᱦᱚᱭ ᱚᱝ ᱠᱟᱛᱮ ᱟᱫᱟᱮᱨ ᱞᱟᱹᱜᱤᱫ ᱟᱨ ᱛᱩᱨᱩᱭ(᱖) ᱜᱚᱴᱟᱝ ᱵᱷᱩᱜᱟᱜ ᱫᱚ ᱠᱟᱹᱴᱩᱵ ᱛᱮ ᱠᱚᱴᱟᱵ ᱞᱟᱹᱜᱤᱫ ᱟᱨ ᱚᱱᱟ ᱛᱩᱨᱩᱭ ᱜᱚᱴᱟᱝ ᱵᱷᱩᱜᱟᱹᱜ ᱥᱮᱫ ᱛᱮ ᱦᱚᱭ ᱚᱰᱚᱠ ᱠᱟᱛᱮ ᱨᱟᱦᱟ ᱠᱚᱭ ᱨᱟᱣᱟᱞ ᱦᱟᱢᱟᱞ ᱚᱪᱚᱭᱟ ᱠᱟᱹᱴᱩᱵ ᱠᱚᱴᱟᱵ ᱟᱬᱜᱚ ᱨᱟᱠᱟᱵ ᱥᱟᱶᱛᱮ ᱾ ᱚᱨᱚᱝ ᱵᱷᱩᱜᱟᱜ ᱯᱟᱦᱴᱟ ᱠᱷᱚᱞ ᱫᱚ ᱮᱥᱮᱫ ᱜᱮ ᱛᱟᱦᱮᱸᱱᱟ ᱡᱮᱢᱚᱱ ᱡᱚᱛᱚ ᱚᱝ ᱵᱚᱞᱚ ᱦᱚᱭ ᱠᱚᱴᱟᱵ ᱵᱷᱩᱜᱟᱜ ᱥᱮᱫ ᱛᱮ ᱥᱮᱱᱚᱜ ᱢᱟ ᱢᱮᱱᱛᱮ ᱾
- ᱛᱤᱨᱤᱭᱟᱹᱣ
ᱵᱟᱦᱟ, ᱥᱚᱦᱨᱟᱭ ᱥᱮᱨᱮᱧ ᱥᱟᱶ ᱟᱹᱰᱤ ᱯᱚᱴᱟᱣᱼᱟ ᱾ ᱮᱠᱞᱟ ᱱᱤᱥᱚᱱ ᱵᱮᱲᱟ ᱨᱮ ᱚᱨᱚᱝ ᱡᱚᱝ ᱟᱨ ᱟᱧᱡᱚᱢ ᱡᱚᱝ ᱟᱹᱰᱤ ᱨᱩᱢᱩᱧ ᱜᱮ ᱵᱩᱡᱷᱟᱹᱣᱼᱟ, ᱡᱮᱢᱚᱱ ᱜᱮ ᱚᱱᱚᱬᱦᱤᱭᱟᱹ ᱠᱚ ᱠᱚ ᱚᱞ ᱟᱠᱟᱫ-:
ᱵᱤᱪᱷᱚᱠ ᱢᱚᱱᱮᱧ ᱨᱟᱲᱮᱡᱽ ᱜᱟᱛᱮ....
ᱟᱢᱟᱜ ᱛᱤᱨᱤᱭᱟᱹᱣ ᱨᱟᱦᱟ ᱟᱧᱡᱚᱢᱛᱮ....
ᱠᱚᱨᱛᱟᱞ
ᱥᱟᱯᱲᱟᱣᱠᱚᱨᱛᱟᱞ ᱫᱚ ᱠᱟᱥᱟ ᱨᱮᱱᱟᱜ ᱠᱟᱱᱟ ᱾ ᱪᱟᱞᱯᱟᱝ ᱜᱩᱞᱟᱹᱭ ᱜᱮ ᱾ ᱵᱟᱨᱭᱟ ᱵᱟᱱᱟᱨ ᱛᱤ ᱛᱮ ᱛᱟᱹᱠᱤᱡ ᱞᱮᱠᱷᱟᱱ ᱚᱱᱟ ᱫᱚ ᱪᱷᱟᱭᱚᱢ ᱪᱷᱟᱭᱚᱢ ᱥᱟᱰᱮᱭᱟ ᱾ ᱱᱚᱶᱟ ᱫᱚ ᱨᱩ ᱥᱟᱰᱮ ᱨᱮᱱᱟᱜ ᱨᱚᱢᱚᱡᱽ ᱨᱟᱠᱟᱵ ᱞᱟᱹᱜᱤᱫ ᱾