ᱫᱟᱥᱟᱸᱭ ᱵᱚᱸᱜᱟ ᱫᱚ ᱥᱮᱨᱢᱟ ᱨᱮᱱᱟᱜ ᱟᱨᱮᱭᱟᱜ ᱵᱚᱝᱜᱟ ᱟᱨᱵᱟᱝ ᱪᱟᱸᱫᱚ ᱠᱟᱱᱟ ᱾ ᱱᱩᱭ ᱪᱟᱸᱫᱚ ᱫᱚ ᱥᱟᱨᱱᱟ ᱫᱷᱚᱨᱚᱢ ᱥᱟᱱᱛᱟᱲ ᱠᱚᱫᱚ ᱵᱚ ᱫᱟᱥᱟᱸᱭᱟ ᱾ ᱫᱟᱥᱟᱸᱭ ᱥᱟᱱᱛᱟᱲ ᱠᱚᱣᱟᱜ ᱱᱟᱜᱟᱢ ᱠᱟᱱᱟ ᱾ ᱫᱟᱥᱟᱸᱭ ᱨᱮᱱᱟᱜ ᱢᱮᱱᱮᱛ ᱫᱚ - ᱫᱟᱜ + ᱥᱟᱭ = ᱫᱟᱥᱟᱸᱭ ᱡᱟᱹᱲᱤ ᱟᱨᱵᱟᱝ ᱫᱟᱜ, ᱪᱟᱵᱟ ᱵᱟᱝ ᱥᱟᱭ ᱠᱟᱛᱮ ᱠᱚ ᱫᱟᱬᱟᱱ ᱛᱮ ᱫᱟᱥᱟᱸᱭ ᱫᱟᱬᱟᱱ ᱠᱚ ᱢᱮᱛᱟᱜᱼᱟ ᱾ ᱫᱟᱥᱟᱸᱭ ᱫᱚ ᱱᱟᱜᱟᱢ ᱨᱮᱱᱟᱜ ᱩᱱᱩᱭᱦᱟᱹᱨ ᱞᱟᱹᱜᱤᱫ ᱠᱚ ᱫᱟᱬᱟᱱᱟ ᱾ ᱫᱤᱵᱤ, ᱫᱩᱨᱜᱟᱹ, ᱟᱭᱱᱚᱢ, ᱠᱟᱡᱚᱞ ᱧᱩᱛᱩᱢ ᱛᱮᱠᱚ ᱫᱟᱬᱟᱱᱟ ᱾ ᱱᱩᱠᱩ ᱜᱮ ᱫᱟᱥᱟᱸᱭ ᱫᱟᱬᱟᱱ ᱨᱤᱱ ᱯᱷᱮᱰᱟᱛ ᱠᱟᱱᱟ ᱠᱚ ᱾

ᱦᱟᱯᱲᱟᱢ ᱠᱚᱠᱚ ᱥᱮᱨᱮᱧᱟ ᱥᱟᱯᱲᱟᱣ

ᱪᱟᱹᱭᱜᱟᱲ ᱪᱟᱢᱯᱟ ᱜᱟᱲ ᱞᱤᱞᱤ ᱵᱤᱛᱤ,

ᱵᱟᱫᱚᱞᱤ ᱠᱚᱸᱭᱰᱟ ᱞᱤᱠᱷᱚᱱ ᱜᱚᱲᱦᱚᱱ,

ᱪᱤᱠᱟᱹᱛᱮ ᱜᱟᱲ ᱫᱚᱵᱚᱱ ᱵᱟᱹᱜᱤ ᱭᱟᱫᱼᱟ ᱾

ᱪᱟᱹᱭᱜᱟᱲ ᱪᱟᱢᱯᱟᱜᱟᱲ ᱪᱟᱸᱭᱟᱸ ᱭᱮᱱᱟ,

ᱵᱟᱫᱚᱞᱤ ᱠᱚᱸᱭᱰᱟ ᱵᱟᱜᱟᱦᱤ ᱭᱮᱱ,

ᱚᱱᱟᱛᱮ ᱜᱟᱲ ᱫᱚᱵᱚᱱ ᱵᱟᱹᱜᱤᱭᱟᱫᱼᱟ ᱾

ᱪᱟᱹᱭᱜᱟᱲ ᱪᱟᱢᱯᱟᱜᱟᱲ ᱞᱤᱞᱤ ᱵᱤᱛᱤ ᱚᱲᱟᱜ, ᱞᱤᱠᱷᱚᱱ ᱜᱚᱲᱦᱚᱱ ᱠᱩᱞᱦᱤ, ᱦᱮᱥᱮᱡ ᱥᱮᱠᱮᱡ ᱨᱟᱹᱥᱠᱟᱹ, ᱵᱤᱭᱚᱞ ᱵᱚᱭᱚᱞ ᱦᱚᱲ, ᱟᱱᱮᱡ ᱫᱷᱟᱱᱮᱡ ᱡᱚᱢ ᱧᱩ ᱾ ᱱᱚᱝᱠᱟᱱ ᱟᱹᱛᱩ ᱫᱤᱥᱚᱢ ᱧᱮᱞᱛᱮ ᱪᱷᱟᱹᱛᱤᱠ ᱠᱚ ᱞᱟᱞᱚᱪ ᱵᱟᱠᱚ ᱥᱟᱢᱵᱽᱲᱟᱣ ᱫᱟᱲᱮᱭᱟᱫᱼᱟ ᱾ ᱵᱷᱮᱭᱟᱬ ᱠᱮᱫᱼᱟ ᱠᱚ ᱫᱤᱥᱚᱢ ᱨᱮᱨᱮᱡ ᱞᱟᱹᱜᱤᱫ ᱾ ᱛᱤᱱ ᱡᱚᱠᱷᱟᱜ ᱜᱟᱲ ᱛᱮᱠᱚ ᱵᱚᱞᱚ ᱦᱮᱡ ᱮᱱᱟ, ᱩᱱ ᱡᱚᱠᱷᱟᱡ ᱜᱮ ᱩᱱᱠᱩ ᱪᱷᱟᱹᱛᱤᱠ ᱟᱨᱵᱟᱝ ᱟᱨᱡᱚ ᱥᱟᱞᱟᱜ ᱪᱟᱹᱭ ᱪᱟᱢᱯᱟ ᱨᱤᱱ ᱠᱷᱮᱨᱣᱟᱲ ᱠᱚ ᱛᱩᱯᱩᱫ ᱞᱮᱱᱟ ᱠᱚ ᱩᱱᱠᱩ ᱵᱟᱹᱭᱨᱤ ᱥᱟᱞᱟᱜ ᱟᱨ ᱛᱩᱯᱩᱫ ᱨᱮᱦᱚᱸ ᱠᱚ ᱫᱟᱲᱮ ᱞᱮᱱᱟ ᱠᱷᱮᱨᱣᱟᱲ ᱠᱚ ᱾ ᱱᱚᱝᱠᱟ ᱟᱹᱰᱤ ᱫᱷᱟᱣ ᱛᱩᱯᱩᱫ ᱛᱟᱯᱟᱢ ᱦᱩᱭ ᱟᱠᱟᱱᱟ ᱾ ᱤᱠᱷᱟᱱ ᱟᱨᱡᱚ ᱵᱟᱹᱭᱨᱤ ᱵᱟᱠᱚ ᱫᱟᱲᱮ ᱟᱠᱟᱱᱟ ᱾ ᱠᱷᱮᱨᱣᱟᱲ ᱠᱚ ᱜᱷᱟᱱᱮ ᱜᱷᱟᱱᱮ ᱫᱟᱲᱮᱜ ᱨᱮᱱᱟᱜ ᱫᱟᱱᱟᱝ ᱫᱟᱲᱮ ᱠᱤᱱ ᱛᱟᱦᱮᱸ ᱠᱟᱱᱟ ᱱᱩᱠᱤᱱ ᱵᱚᱝᱜᱟ ᱚᱲᱚᱝ ᱡᱩᱨᱤ ᱠᱩᱲᱤ ᱟᱭᱱᱚᱢ ᱟᱨ ᱠᱟᱡᱚᱞ ᱾ ᱛᱤᱱ ᱡᱚᱠᱷᱟᱡ ᱠᱷᱮᱨᱣᱟᱲ ᱠᱚ ᱛᱩᱯᱩᱫ ᱠᱚ ᱪᱟᱞᱟᱜ ᱠᱟᱱ ᱛᱟᱦᱮᱸᱫ, ᱩᱱ ᱡᱚᱠᱷᱟᱡ ᱟᱭᱱᱚᱢ ᱠᱟᱡᱚᱞ ᱛᱟᱹᱠᱤᱱ, ᱯᱮᱨᱮᱡ ᱴᱷᱤᱞᱤ ᱫᱤᱯᱤᱞ ᱠᱟᱛᱮ ᱠᱤᱱ ᱠᱚᱭᱚᱜ ᱜᱚᱫ ᱠᱟᱠᱚ ᱠᱟᱱ ᱛᱟᱦᱮᱸᱫ ᱾ ᱟᱨᱠᱤᱱ ᱢᱮᱛᱟ ᱠᱚ ᱠᱟᱱ ᱛᱟᱦᱮᱸᱫ, ᱡᱤᱛᱠᱟᱹᱨᱚᱜᱼᱟᱯᱮ ᱫᱷᱚᱨᱚᱢ ᱡᱤᱛᱠᱟᱹᱨᱚᱜᱼᱟᱯᱮ ᱾ ᱟᱫᱚ ᱠᱚᱲᱟ ᱠᱚᱫᱚ ᱞᱟᱹᱲᱦᱟᱹᱭ ᱠᱚ ᱪᱟᱞᱟᱜᱼᱟ ᱟᱨ ᱟᱹᱠᱤᱱ ᱫᱚ ᱫᱟᱜ ᱥᱩᱯᱟᱹᱲᱤ ᱫᱤᱯᱤᱞ ᱠᱟᱛᱮ ᱚᱲᱟᱜ ᱠᱤᱱ ᱨᱩᱣᱟᱹᱲᱟ ᱾ ᱱᱚᱝᱠᱟ ᱟᱹᱰᱤ ᱫᱷᱟᱣ ᱦᱩᱭ ᱮᱱᱟ ᱾ ᱟᱨᱡᱚ ᱠᱚ ᱟᱠᱚ ᱯᱟᱹᱦᱩᱲᱚᱜ ᱨᱮᱱᱟᱜ ᱦᱩᱱᱩᱨ ᱠᱚ ᱯᱟᱸᱡᱟ ᱠᱮᱫᱼᱟ ᱾ ᱡᱩᱜᱤ ᱞᱮᱠᱟ ᱪᱤᱱᱛᱮ ᱪᱟᱹᱭ ᱪᱟᱢᱯᱟ ᱜᱟᱲ ᱠᱚ ᱵᱚᱞᱚ ᱮᱱᱟ ᱟᱨ ᱟᱭᱱᱚᱢ ᱠᱟᱡᱚᱞᱟᱜ ᱛᱷᱩᱢ ᱫᱟᱲᱮ ᱮᱢᱚᱜ ᱡᱚᱠᱷᱟᱡ ᱧᱮᱱᱮᱞ ᱦᱚᱸ ᱠᱚ ᱧᱮᱞ ᱠᱮᱫᱼᱟ ᱾ ᱱᱩᱠᱤᱱ ᱟᱭᱱᱚᱢ ᱠᱟᱡᱚᱞᱟᱜ ᱫᱟᱲᱮ ᱛᱮ ᱱᱩᱠᱩ ᱠᱚ ᱫᱟᱲᱮᱜ ᱠᱟᱱᱟ ᱢᱮᱱᱛᱮ ᱠᱚ ᱵᱟᱰᱟᱭ ᱠᱮᱫᱼᱟ ᱾ ᱤᱱᱟ ᱦᱤᱞᱚᱜ ᱠᱷᱚᱱ ᱜᱮ ᱟᱠᱚ ᱫᱤᱥᱚᱢ ᱨᱩᱣᱟᱹᱲ ᱠᱟᱛᱮ ᱡᱚᱛᱚ ᱠᱟᱛᱷᱟ ᱟᱠᱚᱨᱤᱱ ᱦᱚᱲ ᱴᱷᱮᱱ ᱠᱚ ᱞᱟᱹᱭ ᱥᱚᱫᱚᱨ ᱠᱮᱫᱼᱟ ᱾ ᱟᱫᱚ ᱱᱩᱠᱤᱱ ᱟᱭᱱᱚᱢ ᱠᱟᱡᱚᱞ ᱛᱟᱹᱠᱤᱱ ᱟᱺᱰᱤᱡ ᱠᱤᱱᱟ ᱠᱚ ᱢᱮᱱᱛᱮ ᱯᱚᱨᱛᱚᱱ ᱠᱮᱫᱼᱟ ᱠᱚ ᱾

ᱫᱟᱥᱟᱸᱭ ᱵᱚᱸᱜᱟ, ᱢᱤᱫ ᱦᱟ [ᱢᱟᱦᱟ] ᱨᱮᱱᱟᱜ ᱠᱟᱛᱷᱟ ᱾ ᱤᱱᱟᱹ ᱦᱤᱞᱚᱜ ᱫᱚ ᱥᱮᱨᱢᱟ ᱫᱟᱜ ᱮ ᱡᱟᱹᱲᱤ ᱮᱫᱼᱟ ᱾ ᱟᱹᱛᱩ ᱦᱚᱲ ᱡᱚᱛᱚ ᱚᱲᱟᱜ ᱨᱮ ᱟᱯᱟᱱ ᱟᱹᱯᱤᱱ ᱠᱚ ᱵᱚᱞᱚ ᱵᱟᱭ ᱟᱠᱟᱱᱟ ᱾ ᱜᱩᱨᱩ ᱟᱠᱷᱲᱟ ᱨᱮ ᱪᱮᱞᱟ ᱠᱚ ᱫᱩᱲᱩᱵ ᱟᱠᱟᱱᱟ ᱾ ᱥᱮᱨᱢᱟ ᱡᱟᱹᱲᱤ ᱛᱮ ᱵᱟᱹᱫᱽ ᱵᱟᱹᱭᱦᱟᱹᱲ ᱜᱟᱰᱟ ᱢᱩᱸᱰᱩ ᱵᱟᱹᱭ ᱵᱟᱹᱭ ᱛᱮ ᱥᱟᱨᱮᱲ ᱤᱫᱤᱜ ᱠᱟᱱᱟ ᱾ ᱵᱮᱲᱟᱭ ᱦᱟᱹᱥᱩᱨᱚᱜ ᱞᱟᱹᱜᱤᱫ ᱾ ᱤᱱᱟ ᱚᱠᱛᱚ ᱨᱮ ᱟᱭᱱᱚᱢ ᱟᱨ ᱠᱟᱡᱚᱞ ᱫᱟᱜ ᱞᱩᱜᱞᱩ ᱠᱤᱱ ᱚᱰᱚᱠ ᱮᱱᱟ ᱾ ᱡᱩᱨᱤ ᱜᱟᱛᱮ ᱩᱯᱩᱭᱦᱟᱹᱨ ᱨᱮᱱᱟᱜ ᱛᱮᱛᱟᱝ ᱧᱮᱯᱮᱞᱚᱜ ᱨᱮᱱᱟᱜ ᱵᱩᱴᱟᱹ ᱫᱟᱜ ᱞᱩ ᱰᱟᱹᱰᱤ ᱠᱩᱧ ᱫᱟᱜ ᱜᱷᱟᱴ ᱵᱩᱴᱟᱹᱜᱮ ᱾ ᱡᱷᱚᱢᱚᱨ ᱡᱷᱚᱢᱚᱨ ᱮ ᱫᱟᱜ ᱮᱫᱼᱟ ᱥᱮᱨᱢᱟ ᱡᱟᱹᱲᱤ ᱾ ᱮᱱ ᱦᱚᱸ ᱠᱤᱱ ᱚᱸᱰᱚᱠ ᱮᱱᱟ ᱫᱟᱜ ᱞᱩᱞᱩ ᱡᱩᱨᱤ ᱠᱩᱲᱤ ᱠᱤᱱ ᱾ ᱛᱟᱬᱟᱜ ᱞᱮᱱᱟᱠᱚ ᱵᱟᱹᱭᱨᱤ ᱱᱩᱠᱤᱱ ᱟᱹᱛᱠᱤᱨ ᱥᱟᱦᱟ ᱠᱤᱱ ᱞᱟᱹᱜᱤᱫ ᱾ ᱥᱟᱹᱨᱤ ᱛᱮᱦᱚᱸ ᱡᱷᱟᱨᱱᱟ ᱥᱮᱴᱮᱨ ᱠᱟᱛᱮ ᱫᱟᱜ ᱞᱩᱞᱩ ᱱᱤᱪᱚᱞ ᱚᱠᱛᱚ ᱨᱮ ᱵᱟᱹᱭᱨᱤ ᱠᱚ ᱡᱟᱹᱯᱩᱫ ᱠᱮᱫ ᱠᱤᱱᱟ ᱟᱨ ᱠᱚ ᱟᱹᱛᱠᱤᱨ ᱠᱮᱫ ᱠᱤᱱᱟ ᱟᱹᱰᱤ ᱥᱟᱺᱜᱤᱧ ᱵᱟᱹᱭᱨᱤ ᱫᱤᱥᱚᱢ ᱛᱮ ᱾ ᱦᱚᱦᱚ ᱦᱚᱦᱚ ᱛᱮᱠᱤᱱ ᱪᱟᱞᱟᱜ ᱠᱟᱱ ᱛᱟᱦᱮᱸᱫ ᱾ ᱚᱱᱟ ᱫᱟᱭᱟ ᱦᱚᱦᱚ ᱟᱸᱡᱚᱢ ᱧᱟᱢ ᱠᱮᱫᱼᱟ ᱠᱤᱱ ᱠᱟᱰᱟ ᱜᱩᱯᱤ ᱠᱚᱲᱟ ᱫᱤᱵᱤ ᱟᱨ ᱫᱩᱨᱜᱟᱹ ᱾ ᱚᱠᱟ ᱦᱚᱸ ᱫᱤᱥᱟᱹ ᱵᱟᱝ ᱠᱩᱲᱟᱹᱣ ᱠᱟᱛᱮ, ᱫᱟᱹᱲ ᱠᱮᱫᱼᱟ ᱠᱤᱱ ᱟᱹᱛᱩ ᱥᱮᱫ ᱾ ᱟᱹᱛᱩ ᱨᱮ ᱡᱟᱣᱨᱟ ᱟᱠᱟᱱ ᱪᱮᱞᱟ ᱠᱚᱲᱟ ᱠᱚ ᱧᱟᱢ ᱠᱮᱫ ᱠᱚᱣᱟ ᱠᱤᱱ ᱜᱩᱨᱩ ᱟᱹᱠᱷᱲᱟ ᱨᱮ ᱾ ᱟᱨ ᱱᱚᱶᱟ ᱫᱩᱠᱷᱟᱹᱞᱤ ᱰᱚᱜᱚᱨ ᱠᱤᱱ ᱞᱟᱹᱭ ᱟᱫ ᱠᱚᱣᱟ ᱾ ᱱᱚᱝᱠᱟᱱ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱵᱤᱥᱞᱟᱣ ᱮᱱᱟ ᱠᱚ ᱪᱮᱞᱟ ᱠᱚᱲᱟ ᱠᱚ ᱾ ᱫᱩᱜ ᱠᱤᱱ ᱞᱟᱹᱜᱤᱫ ᱜᱩᱨᱩᱭ ᱟᱸᱫᱮ ᱭᱟᱫ ᱠᱚᱣᱟ ᱾ ᱜᱩᱨᱩ ᱪᱮᱞᱟ ᱠᱚ ᱵᱤᱞᱚᱢᱚᱜ ᱞᱮᱠᱟ ᱠᱤᱱ ᱟᱹᱭᱠᱟᱣ ᱠᱮᱫᱼᱟ ᱫᱤᱵᱤ ᱫᱩᱨᱜᱟᱹ ᱛᱟᱹᱠᱤᱱ ᱾ ᱟᱹᱠᱤᱱ ᱠᱤᱱ ᱢᱟᱬᱟᱝ ᱮᱱᱟ ᱪᱮᱞᱟ ᱠᱚᱲᱟ ᱠᱚᱨᱮ ᱠᱷᱚᱱ ᱾ ᱠᱩᱞᱦᱤ ᱢᱩᱪᱟᱹᱫ ᱫᱟᱹᱲ ᱥᱮᱴᱮᱨ ᱠᱟᱛᱮ ᱠᱤᱱ ᱧᱮᱞ ᱠᱮᱫᱼᱟ ᱜᱟᱰᱟ ᱢᱩᱸᱰᱩ ᱵᱟᱱ ᱫᱟᱜ ᱛᱮ ᱥᱟᱨᱮᱲ ᱮᱱᱟ ᱾ ᱵᱟᱝ ᱵᱟᱛᱟᱣ ᱠᱟᱛᱮ ᱫᱚᱱ ᱪᱟᱹᱰᱩ ᱠᱟᱛᱮ ᱯᱟᱭᱨᱟ ᱯᱟᱨᱚᱢᱚᱜ ᱞᱟᱹᱜᱤᱫ ᱠᱤᱱ ᱛᱮᱴᱮᱡ ᱠᱮᱫᱼᱟ ᱾ ᱵᱟᱝ ᱵᱟᱰᱟᱭ ᱞᱮᱱᱟ ᱯᱟᱨᱚᱢ ᱮᱱᱟ ᱪᱚᱝ ᱠᱤᱱ ᱵᱚᱦᱮᱞ ᱮᱱᱟ ᱾

ᱤᱱᱟ ᱛᱟᱭᱚᱢ ᱚᱰᱚᱠ ᱮᱱᱟᱠᱚ ᱜᱩᱨᱩ ᱟᱨ ᱪᱮᱞᱟ ᱠᱚᱲᱟ ᱠᱚ ᱾ ᱡᱟᱰᱟᱢ ᱡᱟᱰᱟᱢ ᱥᱮᱨᱢᱟ ᱡᱟᱹᱲᱤ, ᱵᱚᱛᱚᱨ ᱜᱮ ᱜᱟᱨᱡᱟᱣ ᱠᱟᱛᱮ ᱟᱬᱜᱚᱱ ᱠᱟᱱᱟ ᱵᱟᱱ ᱫᱟᱜ ᱾ ᱦᱟᱦᱟᱲᱟᱜᱮ ᱥᱤᱨᱡᱚᱱᱤᱡᱟᱜ ᱵᱷᱮᱭᱟᱬ ᱾ ᱢᱚᱠᱚᱧ ᱜᱮᱠᱚ ᱟᱹᱭᱠᱟᱣ ᱠᱮᱫᱼᱟ ᱜᱩᱨᱩ ᱪᱮᱞᱟᱠᱚ ᱾ ᱨᱩᱣᱟᱲ ᱮᱱᱟ ᱠᱚ ᱢᱚᱠᱚᱧ ᱠᱟᱛᱮ ᱟᱹᱛᱩ ᱚᱲᱟᱜ ᱥᱮᱫ ᱾ ᱛᱟᱺᱜᱤ ᱠᱮᱫᱼᱟ ᱠᱚ ᱫᱟᱜ ᱟᱹᱥᱩᱲ "ᱫᱟᱜᱥᱟᱭ" ᱫᱷᱟᱹᱨᱤᱡ ᱾

ᱡᱟᱹᱲᱤ ᱟᱹᱥᱩᱲ ᱮᱱ ᱫᱟᱜᱥᱟᱭ ᱮᱱᱟ ᱵᱟᱱ ᱜᱟᱰᱟ ᱚᱦᱨᱟᱣ ᱮᱱᱟ ᱾ ᱥᱮᱨᱢᱟ ᱨᱟᱞᱟᱜ ᱮᱱᱟ ᱦᱚᱨ ᱯᱷᱟᱭᱞᱟ ᱮᱱᱟ,ᱥᱟᱯᱲᱟᱣ ᱮᱱᱟᱠᱚ ᱜᱩᱨᱩ ᱪᱮᱞᱟ ᱠᱚ ᱾ ᱚᱰᱚᱠ ᱮᱱᱟᱠᱚ ᱜᱩᱨᱩ ᱥᱟᱶ ᱪᱮᱞᱟ ᱠᱚ ᱫᱟᱥᱟᱸᱭ ᱫᱟᱬᱟᱱ ᱾ ᱜᱩᱨᱩ ᱠᱚᱠᱚ ᱩᱭᱦᱟᱹᱨ ᱠᱮᱫᱼᱟ ᱫᱟᱥᱟᱸᱭ ᱫᱟᱬᱟᱱ ᱨᱮᱱᱟᱜ ᱛᱚᱦᱚᱨ ᱾ ᱟᱨᱡᱚ ᱠᱚᱫᱚ ᱠᱷᱮᱨᱣᱟᱲ ᱠᱚᱣᱟᱜ ᱫᱷᱚᱱ ᱫᱷᱟᱱᱮᱡ ᱦᱚᱨᱚᱜ ᱥᱟᱯᱟᱵ ᱟᱨ ᱠᱩᱲᱤ ᱦᱚᱯᱚᱱ ᱨᱮ ᱵᱟᱹᱲᱛᱤ ᱞᱟᱞᱚᱪ ᱛᱟᱦᱮᱸ ᱠᱟᱱ ᱛᱟᱠᱚᱣᱟ ᱾ ᱚᱱᱟᱛᱮ ᱜᱩᱨᱩ ᱪᱮᱞᱟ ᱠᱚᱫᱚ ᱠᱩᱲᱤ ᱦᱚᱯᱚᱱᱟᱜ ᱥᱟᱯᱟᱵ ᱛᱮᱠᱚ ᱥᱟᱡᱟᱣ ᱮᱱᱟ ᱾ ᱛᱤᱨᱮ ᱠᱚ ᱥᱟᱵ ᱠᱮᱫᱼᱟ ᱟᱜ, ᱦᱚᱛᱚᱫ ᱵᱩᱣᱟᱹᱝ ᱨᱮᱠᱚ ᱥᱟᱸᱵᱟᱣ ᱠᱮᱫᱼᱟ ᱩᱜᱽᱞᱤ ᱥᱟᱨ, ᱢᱟᱨᱟᱜ ᱯᱷᱤᱧᱪᱟᱹᱨ ᱥᱟᱞᱟᱜ ᱠᱚ ᱫᱟᱦᱲᱤ ᱩᱨᱤᱡ ᱠᱮᱫᱼᱟ ᱠᱟᱹᱯᱤᱞ ᱜᱟᱹᱭ ᱪᱟᱶᱟᱨ ᱾ ᱥᱟᱡᱟᱣ ᱮᱱᱟ ᱠᱚ ᱥᱤᱱᱟᱹᱢ ᱠᱩᱲᱤ ᱞᱮᱠᱟ ᱾ ᱟᱹᱛᱩ ᱦᱚᱲ ᱠᱚᱦᱚᱸ ᱠᱚ ᱡᱟᱣᱨᱟ ᱮᱱᱟ ᱫᱟᱥᱟᱸᱭ ᱫᱟᱬᱟᱱ ᱠᱚᱲᱟ ᱠᱚ ᱧᱮᱞᱜᱚᱫ ᱠᱟᱠᱚ ᱞᱟᱹᱜᱤᱫ ᱾ ᱢᱟᱺᱡᱷᱤ ᱢᱟᱸᱯᱟᱧᱡᱤ ᱥᱟᱢᱟᱝ ᱨᱮ ᱫᱷᱚᱨᱚᱢ ᱟᱠᱷᱲᱟ ᱛᱟᱞᱟᱨᱮ ᱜᱩᱨᱩᱭ ᱟᱬᱜᱚ ᱠᱮᱫᱼᱟ ᱥᱩᱱᱩᱢ ᱥᱤᱸᱫᱩᱨ ᱾ ᱪᱮᱞᱟ ᱠᱚ ᱫᱟᱭᱟ ᱜᱮᱠᱚ ᱥᱮᱨᱮᱧ ᱠᱮᱫᱼᱟ

ᱜᱩᱨᱩ ᱪᱮᱞᱟ ᱠᱚ ᱠᱩᱯᱩᱞᱤ ᱥᱮᱨᱮᱧ ᱥᱟᱯᱲᱟᱣ

ᱦᱟᱭᱨᱮ ᱦᱟᱭᱨᱮ ᱦᱟᱭᱨᱮ ᱦᱟᱭᱹᱹ

ᱜᱩᱨᱩ ᱦᱳᱹᱹᱹ

ᱛᱚᱠᱚᱭ ᱞᱟᱹᱜᱤᱫ ᱫᱚ ᱜᱩᱨᱩ ᱦᱳ,

ᱥᱩᱱᱩᱢ ᱥᱤᱸᱫᱩᱨ ᱫᱚ,

ᱜᱩᱨᱩ ᱦᱳᱹᱹᱹ

ᱛᱚᱠᱚᱭ ᱞᱟᱹᱜᱤᱫ ᱫᱚ ᱜᱩᱨᱩ ᱦᱳ,

ᱟᱭᱱᱚᱢ ᱠᱟᱡᱚᱞ ᱫᱚ ᱾

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱫᱮᱥ ᱞᱟᱹᱜᱤᱫ ᱪᱮᱞᱟ ᱠᱚ ᱥᱩᱱᱩᱢ ᱥᱤᱸᱫᱩᱨ ᱫᱚ,

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱫᱤᱥᱚᱢ ᱞᱟᱹᱜᱤᱫ ᱪᱮᱞᱟ ᱦᱚ ᱟᱭᱱᱚᱢ ᱠᱟᱡᱚᱞ ᱫᱚ ᱾

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱫᱷᱚᱨᱚᱢ ᱫᱟᱲᱮ ᱪᱮᱞᱟ ᱠᱚ ᱥᱩᱱᱩᱢ ᱥᱤᱸᱫᱩᱨ ᱫᱚ,

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱵᱟᱹᱭᱨᱤ ᱫᱟᱨᱟᱢ ᱪᱮᱞᱟ ᱠᱚ ᱟᱭᱱᱚᱢ ᱠᱟᱡᱚᱞ ᱫᱚ ᱾

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱫᱤᱵᱤ ᱫᱩᱨᱜᱟᱹ ᱫᱚᱠᱤᱱ ᱚᱸᱰᱚᱠ ᱮᱱᱟ ᱨᱮ,

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱟᱭᱱᱚᱢ ᱠᱟᱡᱚᱞ ᱫᱚᱠᱤᱱ ᱵᱟᱦᱮᱨ ᱮᱱᱟ ᱨᱮ ᱾

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱪᱮᱛᱮ ᱞᱟᱹᱜᱤᱫ ᱫᱚᱠᱤᱱ ᱚᱸᱰᱚᱠ ᱮᱱᱟ ᱨᱮ,

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱪᱮᱛᱮ ᱞᱟᱹᱜᱤᱫ ᱫᱚᱠᱤᱱ ᱵᱟᱦᱮᱨ ᱮᱱᱟ ᱨᱮ ᱾

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱫᱮᱥ ᱞᱟ.ᱜᱤᱫ ᱫᱚᱠᱤᱱ ᱚᱸᱰᱚᱠ ᱮᱱᱟ ᱨᱮ,

ᱦᱟᱭᱨᱮ ᱦᱟᱭᱨᱮ ᱦᱟᱭ

ᱫᱤᱥᱚᱢ ᱞᱟᱹᱜᱤᱫ ᱫᱚᱠᱤᱱ ᱵᱟᱦᱮᱨ ᱮᱱᱟ ᱨᱮ ᱾

ᱯᱷᱮᱰᱟᱛ ᱥᱟᱯᱲᱟᱣ