ᱭᱚᱥᱳᱫᱟ ᱢᱩᱨᱢᱩ
ᱭᱚᱥᱳᱫᱟ ᱢᱩᱨᱢᱩ (ᱡᱟᱱᱟᱢ : ᱒᱔ ᱡᱩᱞᱟᱭ ᱑᱙᱖᱔)[᱑] ᱫᱚ ᱢᱤᱫ ᱧᱩᱛᱩᱢᱟᱱ ᱥᱟᱱᱛᱟᱲᱤ ᱚᱱᱚᱬᱦᱤᱭᱟᱹ ᱟᱨ ᱛᱚᱨᱡᱚᱢᱤᱭᱟᱹ (Translator) ᱠᱟᱱᱟᱭ ᱾ ᱥᱚᱨᱠᱟᱨᱤ ᱪᱟᱹᱠᱨᱤ ᱥᱟᱶ-ᱥᱟᱶ ᱛᱮ ᱟᱭᱢᱟ ᱯᱚᱛᱚᱵ ᱯᱩᱛᱷᱤᱭ ᱚᱞ ᱟᱠᱟᱫᱼᱟ ᱚᱱᱟ ᱥᱟᱶᱛᱮ ᱮᱴᱟᱜ ᱯᱟᱹᱨᱥᱤ ᱨᱮᱭᱟᱜ ᱧᱩᱛᱩᱢᱟᱱ ᱫᱟᱢᱟᱱ ᱯᱩᱛᱷᱤ ᱠᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱨᱮᱭ ᱟᱹᱨᱩ ᱟᱠᱟᱫᱼᱟ ᱟᱨᱵᱟᱝ ᱮ ᱛᱚᱨᱡᱚᱢᱟ ᱟᱠᱟᱫᱼᱟ ᱾
| ᱭᱚᱥᱳᱫᱟ ᱢᱩᱨᱢᱩ | |
|---|---|
| ᱡᱟᱱᱟᱢ | ᱭᱚᱥᱳᱫᱟ ᱦᱟᱸᱥᱫᱟᱜ (᱒᱔. ᱗. ᱑᱙᱖᱔) 1964 (age 59–60) ᱡᱩᱢᱟᱞ, ᱥᱟᱹᱨᱟᱹᱭᱠᱮᱞᱟ, ᱡᱷᱟᱨᱠᱷᱚᱸᱰ |
| ᱠᱟᱹᱢᱤ | ᱚᱱᱚᱬᱦᱤᱭᱟᱹ |
| ᱡᱟᱹᱛᱤᱭᱟᱹᱛ | ᱥᱤᱧᱚᱛᱤᱭᱟᱹ |
| ᱥᱤᱨᱯᱷᱟᱹ | ᱰᱨ. ᱟᱢᱵᱮᱫᱽᱠᱚᱨ ᱯᱷᱮᱞᱚᱥᱤᱯ ᱱᱮᱥᱱᱟᱞ ᱥᱤᱨᱯᱷᱟᱹ (᱒᱐᱐᱙), ᱥᱟᱨᱚᱫᱟ ᱯᱨᱚᱥᱟᱫᱽ ᱠᱩᱥᱠᱩ ᱥᱤᱨᱯᱷᱟᱹ (᱒᱐᱑᱗) |
| ᱜᱟᱛᱮ | ᱦᱚᱨᱤᱯᱚᱫᱚ ᱢᱩᱨᱢᱩ |
| ᱦᱚᱯᱚᱱ | ᱚᱨᱪᱚᱱᱟ, ᱵᱚᱱᱫᱚᱱᱟ, ᱯᱩᱱᱟᱹᱢ |
ᱡᱟᱱᱟᱢ ᱥᱟᱯᱲᱟᱣ
ᱭᱚᱥᱳᱫᱟ ᱢᱩᱨᱢᱩ ᱫᱚ ᱢᱤᱫ ᱦᱟᱸᱥᱫᱟᱜ ᱵᱟᱹᱠᱷᱳᱞ ᱨᱮᱭ ᱡᱟᱱᱟᱢ ᱟᱠᱟᱱᱟ ᱾ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭᱟᱜ ᱥᱟᱹᱨᱟᱹᱭᱠᱮᱞᱟ ᱠᱷᱚᱨᱥᱚᱶᱟ ᱦᱚᱱᱚᱛ (ᱯᱟᱹᱦᱤᱞᱟᱜ ᱫᱚ ᱥᱤᱝᱵᱷᱩᱢ ᱦᱚᱱᱚᱛ), ᱛᱷᱟᱱᱟ ᱨᱟᱡᱽᱱᱚᱜᱚᱨ, ᱟᱹᱛᱩ ᱡᱩᱢᱟᱞ (ᱡᱷᱩᱢᱟᱹᱲ) ᱨᱮ ᱟᱡᱟᱜ ᱡᱟᱱᱟᱢ ᱫᱚ ᱦᱩᱭ ᱟᱠᱟᱱᱟ ᱒᱔ ᱡᱩᱞᱟᱭ ᱑᱙᱖᱔ ᱥᱟᱞᱮ ᱨᱮ ᱾ ᱟᱡᱤᱡ ᱡᱟᱱᱟᱢ ᱵᱟᱵᱟ ᱦᱟᱜ ᱧᱩᱛᱩᱢ ᱫᱚ ᱵᱚᱸᱜᱟᱛᱟᱞᱟ ᱟᱠᱟᱱ ᱫᱮᱵᱽᱨᱟᱡᱽ ᱦᱟᱸᱥᱫᱟᱜ ᱟᱨ ᱟᱭᱳᱣᱟᱜ ᱧᱩᱛᱩᱢ ᱫᱚ ᱯᱟᱨᱵᱚᱛᱤ ᱦᱟᱸᱥᱫᱟᱜ ᱛᱟᱦᱮᱸ ᱠᱟᱱᱟ ᱾
ᱥᱮᱪᱮᱫ ᱟᱨ ᱪᱟᱹᱠᱨᱤ ᱥᱟᱯᱲᱟᱣ
ᱟᱡᱟᱜ ᱯᱩᱭᱞᱩ ᱥᱮᱪᱮᱫ ᱫᱚ ᱢᱟᱢᱚ ᱚᱲᱟᱜ ᱟᱹᱛᱩ ᱨᱟᱡᱽᱫᱚᱦᱟ, ᱠᱷᱮᱨᱣᱟᱲ ᱢᱤᱰᱤᱞ ᱟᱥᱲᱟ ᱠᱷᱚᱱ ᱮ ᱟᱢᱮᱴ ᱟᱠᱟᱫᱼᱟ ᱾ ᱟᱡᱟᱜ ᱮᱭᱟᱭ ᱟᱨ ᱤᱨᱟᱹᱞ ᱪᱟᱱᱚᱪ ᱨᱮᱭᱟᱜ ᱥᱮᱪᱮᱫ ᱫᱚ ᱮᱥᱴᱤ-ᱡᱟᱵᱷᱤᱭᱚᱨ ᱜᱟᱞᱥ ᱦᱟᱭᱤᱥᱠᱩᱞ, ᱪᱟᱺᱭᱵᱟᱥᱟ ᱠᱷᱚᱱ ᱮ ᱥᱟᱹᱛ ᱟᱠᱟᱜᱼᱟ ᱾ ᱤᱨᱟᱹᱞ ᱪᱟᱱᱚᱪ ᱥᱟᱹᱛ ᱠᱮᱫ ᱛᱟᱭᱚᱢ ᱫᱚ ᱟᱡ ᱫᱚ ᱢᱩᱨᱢᱩ ᱵᱟᱹᱠᱷᱳᱞ ᱨᱮ ᱢᱟᱹᱱ ᱦᱚᱨᱤᱯᱚᱫᱚ ᱢᱩᱨᱢᱩ ᱴᱷᱮᱱ ᱠᱚ ᱜᱚᱝ ᱠᱟᱫᱮᱭᱟ ᱾ ᱩᱱ ᱡᱚᱦᱚᱜ ᱫᱚ ᱟᱡ ᱫᱚ ᱥᱩᱢᱩᱝ ᱑᱔ ᱥᱮᱨᱢᱟ ᱩᱢᱮᱨ ᱛᱟᱭ ᱛᱟᱦᱮᱸ ᱠᱟᱱᱟ ᱾ ᱵᱟᱯᱞᱟ ᱛᱟᱭᱚᱢ ᱦᱚᱸ ᱟᱡ ᱫᱚ ᱟᱡᱟᱜ ᱯᱚᱲᱦᱚᱱ ᱮ ᱛᱚᱸᱜᱮ ᱫᱚᱦᱚ ᱠᱮᱫ ᱜᱮᱭᱟ ᱟᱨ ᱱᱚᱝᱠᱟᱛᱮ ᱟᱡᱟᱜ ᱜᱮᱞ ᱪᱟᱱᱚᱪ ᱫᱚ ᱑᱙᱘᱑ ᱥᱟᱞᱮ ᱨᱮ N.D. Rungta Girl's High School, Chakulia ᱠᱷᱚᱱ ᱮ ᱥᱟᱹᱛ ᱠᱮᱜᱼᱟ ᱾ ᱑᱑ ᱪᱟᱱᱚᱪ ᱞᱟᱹᱜᱤᱫ ᱟᱨᱭᱚ ᱠᱚᱱᱭᱟ ᱢᱟᱨᱟᱝ ᱵᱤᱨᱫᱟᱹᱜᱟᱲ ᱠᱚᱞᱠᱟᱛᱟ ᱨᱮ ᱮᱰᱢᱤᱥᱳᱱ ᱮ ᱦᱟᱛᱟᱣ ᱠᱮᱫ ᱛᱟᱭᱚᱢ ᱟᱡᱤᱡ ᱯᱩᱭᱞᱩ ᱜᱤᱫᱽᱨᱟᱹᱦᱟᱜ ᱡᱟᱱᱟᱢ ᱠᱷᱟᱹᱛᱤᱨ ᱯᱟᱲᱦᱟᱣ ᱫᱚ ᱴᱷᱟᱠᱮᱫ ᱫᱚᱦᱚ ᱦᱩᱭ ᱟᱫᱮᱭᱟ ᱑᱙᱘᱒ ᱥᱟᱞᱮ ᱨᱮ ᱾
ᱟᱡᱤᱡ ᱫᱚᱥᱟᱨ ᱠᱩᱲᱤ ᱜᱮᱫᱽᱨᱟᱹ ᱑᱙᱘᱗ ᱥᱟᱞᱮ ᱨᱮᱭ ᱡᱟᱱᱟᱢ ᱮᱱᱟ ᱾ ᱟᱨ ᱤᱱᱟᱹ ᱥᱮᱨᱢᱟ ᱜᱮ clerk-cum-cashier ᱞᱮᱠᱟᱛᱮ ᱯᱚᱧᱡᱟᱵᱽ ᱟᱨ ᱥᱤᱸᱫᱽ ᱵᱮᱸᱠ, ᱡᱚᱱᱟᱞ ᱟᱹᱢᱟᱹᱞᱤ, ᱠᱚᱞᱠᱟᱛᱟ ᱨᱮ ᱮᱯᱚᱭᱮᱸᱴᱢᱮᱴ ᱮ ᱧᱟᱢ ᱠᱮᱜᱼᱟ ᱾ ᱤᱱᱟᱹ ᱛᱟᱭᱚᱢ ᱟᱨ ᱦᱚᱸ ᱟᱡᱟᱜ ᱯᱚᱲᱦᱚᱱ ᱮ ᱛᱚᱸᱜᱮ ᱫᱚᱦᱚ ᱠᱮᱫᱼᱟ ᱟᱨ IA ᱫᱚ ᱑᱙᱙᱐ ᱥᱟᱞᱮ ᱨᱮ ᱟᱨ BA ᱫᱚ ᱑᱙᱙᱕ ᱥᱟᱞᱮ ᱨᱮ LBSM ᱵᱤᱨᱫᱟᱹᱜᱟᱲ, ᱠᱚᱨᱚᱱᱰᱤ, ᱡᱟᱢᱥᱮᱫᱽᱯᱩᱨ ᱟᱱᱰᱟᱨ ᱨᱟᱧᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱮ ᱥᱟᱹᱛ ᱠᱮᱜᱼᱟ ᱾ ᱟᱨ ᱟᱡᱟᱜ ᱢᱟᱥᱴᱚᱨ ᱰᱤᱜᱽᱨᱤ ᱫᱚ ᱒᱐᱐᱖ ᱥᱟᱞᱮ ᱨᱮ ᱥᱟᱱᱛᱟᱲᱤ ᱛᱮ ᱨᱟᱧᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ, ᱨᱟᱧᱪᱤ ᱠᱷᱚᱱ ᱮ ᱥᱟᱹᱛ ᱠᱮᱫᱼᱟ ᱾ ᱑᱙᱙᱕ ᱥᱟᱞᱮ ᱨᱮ ᱟᱡᱟᱜ ᱜᱨᱟᱡᱩᱣᱮᱥᱳᱱ ᱮ ᱥᱟᱹᱛ ᱠᱮᱫ ᱥᱚᱸᱜᱮ ᱜᱮ ᱟᱹᱢᱟᱹᱞᱤᱭᱟᱹ ᱯᱳᱥᱴ ᱯᱨᱳᱢᱳᱥᱚᱱ ᱞᱟᱹᱜᱤᱫ ᱰᱤᱯᱟᱨᱴᱢᱮᱱᱴᱟᱞ ᱵᱤᱱᱤᱰ ᱮ ᱚᱞ ᱠᱮᱜᱼᱟ ᱟᱨ ᱚᱱᱟᱨᱮ ᱡᱤᱛᱠᱟᱹᱨ ᱠᱟᱛᱮ ᱑᱙᱙᱖ ᱥᱟᱞᱮᱨᱮ ᱟᱹᱢᱟᱹᱞᱤᱭᱟᱹ ᱯᱳᱥᱴ ᱨᱮ ᱯᱨᱳᱢᱳᱥᱚᱱ ᱮ ᱧᱟᱢ ᱠᱮᱫᱼᱟ ᱾ ᱟᱨ ᱤᱱᱟᱹ ᱥᱮᱨᱢᱟ ᱜᱮ ᱟᱡᱤᱡ ᱛᱮᱥᱟᱨ ᱟᱨᱵᱟᱝ ᱦᱩᱰᱤᱧ ᱩᱛᱟᱹᱨᱤᱡ ᱠᱩᱲᱤ ᱜᱤᱫᱽᱨᱟᱹ ᱦᱟᱜ ᱡᱟᱱᱟᱢ ᱦᱩᱭ ᱮᱱᱟ ᱾
ᱜᱷᱟᱨᱚᱸᱡᱽ ᱥᱟᱯᱲᱟᱣ
ᱟᱡ ᱫᱚ ᱥᱩᱢᱩᱝ ᱑᱔ ᱥᱮᱨᱢᱟ ᱵᱚᱭᱚᱥ ᱮ ᱛᱟᱦᱮᱸ ᱠᱟᱱ ᱡᱚᱦᱚᱜ ᱟᱨ ᱤᱨᱟᱹᱞ ᱪᱟᱱᱚᱪ ᱮ ᱚᱞᱚᱜ ᱠᱟᱱ ᱡᱚᱦᱚᱜ ᱢᱟᱹᱱ ᱦᱚᱨᱤᱯᱚᱫᱚ ᱢᱩᱨᱢᱩ ᱴᱷᱮᱱ ᱠᱚ ᱜᱚᱝ ᱠᱟᱫᱮᱭᱟ ᱾ ᱡᱟᱶᱟᱭ ᱚᱲᱟᱜ ᱟᱹᱛᱩ ᱧᱩᱛᱩᱢ ᱫᱚ ᱵᱟᱨᱫᱤ ᱠᱟᱱᱯᱩᱨ, ᱯᱩᱞᱤᱥ ᱥᱴᱮᱥᱳᱱ - ᱪᱟᱹᱠᱩᱲᱤᱭᱟᱹ, ᱦᱚᱱᱚᱛ - ᱥᱤᱝᱵᱷᱩᱢ, ᱵᱤᱦᱟᱨ ᱯᱚᱱᱚᱛ ᱾ ᱱᱤᱛᱚᱜ ᱫᱚ ᱦᱚᱱᱚᱛ - ᱥᱟᱢᱟᱝ ᱥᱤᱝᱵᱷᱩᱢ, ᱡᱷᱟᱨᱠᱷᱚᱸᱰ ᱾ ᱟᱡᱤᱡ ᱡᱤᱛᱟᱹ ᱫᱚ ᱢᱤᱫ ᱥᱮᱨᱮᱧ ᱨᱩᱥᱤᱠᱟᱭ ᱛᱟᱦᱮᱸ ᱠᱟᱱᱟ ᱾ ᱯᱟᱹᱦᱤᱞ ᱫᱚ All India Radio ᱠᱚᱞᱠᱟᱛᱟ ᱠᱷᱚᱱ ᱥᱟᱱᱛᱟᱲᱤ ᱟᱠᱷᱲᱟ ᱮᱛᱚᱦᱚᱵ ᱛᱟᱨᱟ ᱠᱷᱚᱱ ᱟᱡᱟᱜ ᱥᱮᱨᱮᱧ ᱠᱚ ᱩᱪᱷᱟᱹᱱᱚᱜ ᱠᱟᱱ ᱛᱟᱦᱮᱸᱫ ᱑᱙᱙᱐ ᱥᱟᱞᱮ ᱫᱷᱟᱹᱵᱤᱫ ᱾ ᱟᱡ ᱨᱤᱱ ᱫᱚ ᱯᱮ ᱦᱚᱲ ᱦᱚᱯᱚᱱ ᱮᱨᱟ ᱢᱮᱱᱟᱜ ᱠᱚᱣᱟ ᱾ ᱯᱩᱭᱞᱩ ᱟᱨᱵᱟᱝ ᱢᱟᱨᱟᱝ ᱦᱚᱯᱚᱱ ᱮᱨᱟ ᱦᱟᱜ ᱧᱩᱛᱩᱢ ᱫᱚ ᱚᱨᱪᱚᱱᱟ, ᱫᱚᱥᱟᱨ ᱦᱚᱯᱚᱱ ᱮᱨᱟᱦᱟᱜ ᱧᱩᱛᱩᱢ ᱫᱚ ᱵᱚᱱᱫᱚᱱᱟ ᱟᱨ ᱛᱮᱥᱟᱨ ᱟᱨᱵᱟᱝ ᱦᱩᱰᱤᱧ ᱩᱛᱟᱹᱨᱤᱡ ᱦᱚᱯᱚᱱ ᱮᱨᱟ ᱦᱟᱜ ᱧᱩᱛᱩᱢ ᱫᱚ ᱯᱩᱱᱟᱹᱢ ᱾
ᱥᱟᱶᱦᱮᱫ ᱮᱱᱮᱢ ᱥᱟᱯᱲᱟᱣ
ᱜᱤᱫᱽᱨᱟᱹ ᱩᱢᱮᱨ ᱠᱷᱚᱱ ᱜᱮ ᱥᱟᱶᱦᱮᱫ ᱪᱮᱛᱟᱱ ᱨᱮ ᱨᱟᱹᱥᱠᱟᱹ ᱫᱚ ᱢᱮᱱᱟᱜ ᱛᱟᱭᱟ ᱾ ᱟᱡᱟᱜ ᱚᱞ ᱚᱱᱚᱬᱦᱮ, ᱚᱱᱚᱞ, ᱠᱟᱹᱦᱱᱤ ᱠᱚᱫᱚ ᱟᱹᱰᱤ ᱜᱚᱴᱟᱝ ᱯᱟᱛᱷᱟᱢ ᱠᱚᱨᱮ ᱪᱷᱟᱯᱟ ᱯᱟᱨᱥᱟᱞ ᱟᱠᱟᱱᱟ ᱾ ᱡᱮᱞᱮᱠᱟ :-ᱥᱤᱞᱤ, ᱛᱮᱛᱨᱮ, ᱥᱟᱹᱨᱤ, ᱫᱤᱥᱟᱹ, ᱦᱚᱞᱚᱝ ᱜᱟᱰᱟ, ᱠᱟᱨᱟᱢ ᱰᱟᱹᱨ, ᱮᱵᱷᱮᱱ ᱥᱟᱠᱣᱟ, ᱯᱚᱥᱪᱤᱢ ᱵᱟᱸᱜᱽᱞᱟ, ᱯᱟᱸᱡᱟ, ᱥᱟᱸᱫᱮᱥ, ᱡᱤᱣᱤ, ᱢᱟᱱᱛᱟᱨ, ᱡᱩᱜᱽ ᱥᱤᱨᱤᱡᱚᱞ ᱾ ᱟᱨ ᱦᱤᱱᱫᱤ ᱯᱟᱹᱨᱥᱤ ᱛᱮᱭᱟᱜ ᱚᱞ ᱠᱚᱫᱚ ᱡᱷᱟᱨᱠᱷᱚᱸᱰ ᱯᱨᱚᱫᱤᱯ, ᱟᱹᱝᱠᱩᱨ, ᱱᱚᱜᱚᱨᱯᱨᱚᱵᱷᱟ, ᱥᱚᱸᱵᱚᱫᱤᱭᱟ, ᱥᱚᱢᱠᱟᱞᱤᱱ ᱵᱷᱟᱨᱚᱛᱤᱭᱚ ᱥᱟᱦᱤᱛᱭᱚ, ᱟᱠᱟᱝᱥᱟ ᱮᱢᱟᱱ ᱯᱟᱛᱷᱟᱢ ᱠᱚᱨᱮ ᱪᱷᱟᱯᱟ ᱥᱚᱫᱚᱨ ᱟᱠᱟᱱᱟ ᱾ ᱚᱱᱟ ᱥᱟᱶᱛᱮ ᱱᱤᱛᱚᱜ ᱫᱷᱟᱹᱵᱤᱡ ᱛᱮ ᱢᱚᱬᱮ ᱜᱚᱴᱟᱝ ᱯᱩᱛᱷᱤᱭ ᱪᱷᱟᱯᱟ ᱦᱩᱭ ᱟᱠᱟᱜᱼᱟ ᱟᱨ ᱢᱤᱫ ᱛᱚᱨᱡᱚᱢᱟ ᱯᱩᱛᱷᱤ ᱫᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱣᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱪᱷᱟᱯᱟ ᱥᱚᱫᱚᱨ ᱟᱠᱟᱱᱟ ᱾
ᱫᱩᱨᱫᱚᱨᱥᱚᱱ ᱠᱮᱸᱫᱽᱨᱚ ᱠᱚᱞᱠᱟᱛᱟ ᱟᱨ ᱟᱠᱟᱥᱵᱟᱬᱤ ᱠᱚᱞᱠᱟᱛᱟ ᱠᱷᱚᱱ ᱦᱚᱸ ᱛᱷᱩᱛᱤ, ᱜᱟᱞᱢᱟᱨᱟᱣ, ᱟᱨ ᱚᱱᱚᱬᱦᱮ ᱠᱚ ᱦᱚᱸ ᱩᱪᱷᱟᱹᱱᱚᱜ ᱠᱟᱱ ᱛᱟᱭᱟ ᱾ ᱟᱨ ᱦᱚᱸ ᱵᱤᱨᱫᱟᱹᱜᱟᱲ ᱠᱚᱨᱮ ᱯᱟᱲᱦᱟᱣᱜ ᱠᱟᱱ ᱥᱤᱞᱟᱵᱟᱥ ᱯᱩᱛᱷᱤ ᱠᱚᱨᱮ ᱦᱚᱸ ᱢᱤᱫ ᱵᱟᱨ ᱥᱟᱛᱟᱢ ᱥᱮᱞᱮᱫ ᱢᱮᱱᱟᱜ ᱛᱟᱭᱟ ᱾
ᱢᱟᱹᱱᱤᱡ ᱭᱚᱥᱳᱫᱟ ᱢᱩᱨᱢᱩ ᱫᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱣᱟ ᱫᱤᱞᱞᱤ ᱥᱟᱱᱛᱟᱲᱤ ᱮᱰᱵᱟᱭᱤᱡᱚᱨᱤ ᱵᱚᱨᱰ ᱨᱤᱱᱤᱡ ᱨᱟᱹᱥᱤᱭᱟᱹ ᱞᱮᱠᱟᱛᱮ ᱒᱐᱐᱘-᱒᱐᱑᱒, ᱫᱩᱨᱫᱚᱨᱥᱚᱱ ᱠᱮᱸᱫᱽᱨᱚ ᱠᱚᱞᱠᱟᱛᱟ ᱟᱨ ᱟᱠᱟᱥᱵᱟᱬᱤ ᱠᱚᱞᱠᱟᱛᱟ ᱨᱤᱱᱤᱡ ᱦᱚᱸ ᱡᱚᱭᱮᱸᱴ ᱯᱨᱚᱜᱨᱟᱢ ᱮᱰᱵᱟᱭᱤᱡᱚᱨᱤ ᱠᱩᱢᱩᱴ ᱨᱮ ᱨᱟᱹᱥᱭᱟᱹ ᱞᱮᱠᱟᱛᱮ ᱒᱐᱑᱑-᱒᱐᱑᱓ ᱟᱨ ᱦᱚᱸ ᱥᱟᱱᱛᱟᱲᱤ ᱮᱠᱟᱰᱮᱢᱤ ᱯᱩᱪᱷᱤᱢ ᱵᱟᱸᱜᱽᱞᱟ ᱨᱤᱱᱤᱡ ᱦᱚᱸ ᱮᱛᱚᱦᱚᱵ ᱨᱮ ᱨᱟᱹᱥᱤᱭᱟᱹᱭ ᱛᱟᱦᱮᱸ ᱠᱟᱱᱟ ᱾ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱨᱤᱱᱤᱡ ᱦᱚᱸ ᱡᱤᱵᱚᱱ ᱵᱷᱩᱨ ᱥᱚᱦᱮᱛ ᱞᱮᱠᱟᱛᱮ ᱢᱮᱱᱟᱜ ᱟᱠᱟᱫᱮᱭᱟ ᱥᱟᱶᱛᱮ ᱱᱚᱣᱟ ᱜᱟᱶᱛᱟ ᱨᱮᱭᱟᱜ ᱥᱮᱱᱴᱨᱟᱞ ᱠᱚᱢᱤᱴᱤ ᱨᱮ ᱒᱐᱑᱑ ᱠᱷᱚᱱ ᱒᱐᱑᱔ ᱫᱷᱟᱹᱵᱤᱡ ᱮ ᱠᱟ.ᱢᱤ ᱟᱠᱟᱫᱼᱟ ᱠᱚᱢᱤᱴᱤ ᱨᱟᱹᱥᱤᱭᱟᱹ ᱞᱮᱠᱟᱛᱮ ᱾ ᱱᱚᱝᱠᱟ ᱜᱮ ᱢᱟᱹᱱᱤᱡ ᱢᱩᱨᱢᱩ ᱫᱚ ᱞᱮᱛᱟᱲ ᱜᱮ ᱥᱟᱶᱦᱮᱫ ᱦᱟᱨᱟᱵᱩᱨᱩ ᱠᱟᱹᱢᱤ ᱨᱮ ᱪᱷᱩᱴᱟᱹᱣ ᱟᱠᱟ ᱢᱮᱱᱟᱭᱟ ᱾ ᱱᱤᱛᱚᱜ ᱫᱚ ᱵᱮᱸᱠ ᱢᱮᱱᱮᱡᱚᱨ ᱞᱮᱠᱟᱛᱮ ᱫᱤᱞᱤ ᱛᱮᱭ ᱯᱳᱥᱴᱤᱝ ᱟᱠᱟᱱᱟ ᱾
ᱩᱪᱷᱟᱹᱱ ᱟᱠᱟᱱ ᱯᱩᱛᱷᱤ ᱠᱚ ᱥᱟᱯᱲᱟᱣ
ᱭᱚᱥᱳᱫᱟ ᱢᱩᱨᱢᱩ ᱫᱚ ᱱᱤᱛᱚᱜ ᱫᱷᱟᱹᱵᱤᱡ ᱢᱚᱬᱮ ᱜᱚᱴᱟᱜ ᱯᱩᱛᱷᱤᱭ ᱯᱟᱨᱥᱟᱞ ᱦᱩᱭ ᱟᱠᱟᱫᱼᱟ ᱾ ᱚᱱᱟ ᱯᱩᱛᱷᱤ ᱨᱮᱭᱟᱜ ᱧᱩᱛᱩᱢ ᱠᱚᱫᱚ ᱦᱩᱭᱩᱜ ᱠᱟᱱᱟ :-
- ᱑. ᱛᱳᱣᱟ ᱫᱟᱨᱮ - ᱒᱐᱐᱙
- ᱒. ᱥᱟᱶᱦᱮᱫ ᱰᱟᱹᱨ - ᱒᱐᱑᱐
- ᱓. ᱜᱩᱲ ᱢᱮᱥᱟ ᱜᱚᱲᱚᱢ ᱨᱟᱥᱟ - ᱒᱐᱑᱔
- ᱔. ᱠᱟᱸᱛ ᱨᱮ ᱡᱷᱚᱨᱠᱟ ᱛᱟᱦᱮᱸ ᱠᱟᱱᱟ - ᱒᱐᱑᱕ (ᱛᱚᱨᱡᱚᱢᱟ ᱯᱩᱛᱷᱤ ᱦᱤᱱᱫᱤ ᱜᱟᱢᱟᱢ - ᱫᱤᱵᱟᱨ ᱢᱮ ᱮᱠ ᱠᱷᱤᱰᱠᱤ ᱨᱮᱦᱛᱤ ᱛᱷᱤ) ᱥᱟᱦᱤᱛᱭᱚ ᱮᱠᱟᱰᱮᱢᱤ ᱠᱷᱚᱱ ᱥᱤᱨᱯᱷᱟᱹ ᱟᱢᱮᱴ ᱟᱠᱟᱫ ᱦᱤᱱᱫᱤ ᱯᱩᱛᱷᱤ ᱾
- ᱕. ᱥᱤᱫᱽ ᱦᱟᱞᱟᱝ ᱜᱟᱞᱟᱝ ᱢᱟᱞᱟ - ᱒᱐᱑᱗
ᱱᱤᱭᱟᱹ ᱛᱟᱭᱱᱚᱢ ᱟᱨ ᱦᱚᱸ ᱟᱭᱢᱟ ᱯᱩᱛᱷᱤ ᱠᱚ ᱪᱷᱟᱯᱟ ᱥᱚᱫᱚᱨ ᱨᱮᱭᱟᱜ ᱢᱮᱱᱟᱜᱼᱟ ᱾ ᱪᱷᱟᱯᱟ ᱥᱚᱫᱚᱨ ᱞᱟᱹᱜᱤᱫ ᱥᱟᱯᱲᱟᱣ ᱨᱮ ᱢᱮᱱᱟᱜ ᱵᱟᱨᱭᱟ ᱯᱩᱛᱷᱤ ᱢᱤᱫ ᱫᱚ ᱠᱟᱹᱦᱱᱤ ᱠᱟᱱᱟ ᱟᱨ ᱫᱚᱥᱟᱨ ᱫᱚ ᱛᱚᱨᱡᱚᱢᱟ ᱯᱩᱛᱷᱤ ᱠᱟᱱᱟ ᱾
ᱥᱤᱨᱯᱷᱟᱹ ᱥᱟᱯᱲᱟᱣ
ᱭᱚᱥᱳᱫᱟ ᱢᱩᱨᱢᱩ ᱫᱚ ᱥᱟᱶᱦᱮᱫ ᱞᱟᱹᱜᱤᱫ ᱟᱡᱟᱜ ᱜᱟᱺᱦᱤᱨ ᱫᱩᱞᱟᱹᱲ ᱟᱨ ᱥᱚᱨᱮᱥ ᱠᱟᱹᱢᱤ ᱞᱟᱹᱜᱤᱫ ᱛᱤᱱᱟᱹᱝ ᱜᱟᱱ ᱥᱤᱨᱯᱷᱟᱹ ᱛᱮ ᱦᱚᱸᱭ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾ ᱚᱱᱟ ᱠᱚᱫᱚ ᱦᱩᱭᱩᱜ ᱠᱟᱱᱟ :-
- ᱑. ᱰᱨ. ᱟᱢᱵᱮᱫᱽᱠᱚᱨ ᱯᱷᱮᱞᱚᱥᱤᱯ ᱱᱮᱥᱱᱟᱞ ᱥᱤᱨᱯᱷᱟᱹ --- ᱒᱐᱐᱙ ᱥᱟᱞᱮ ᱨᱮ, ᱵᱷᱟᱨᱚᱛᱤᱭᱚ ᱫᱚᱞᱤᱛ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱫᱤᱞᱤ ᱯᱟᱦᱴᱟ ᱠᱷᱚᱱ ᱾
- ᱒. ᱢᱟᱹᱱ ᱥᱟᱠᱟᱢ ᱼᱼᱼ ᱪᱮᱱᱱᱟᱭ ᱥᱟᱱᱛᱟᱲ ᱮᱥᱚᱥᱤᱭᱮᱥᱚᱱ, ᱪᱮᱱᱱᱟᱭ ᱯᱟᱦᱴᱟ ᱠᱷᱚᱱ ᱒᱐᱑᱓ ᱥᱟᱞᱮ ᱨᱮ ᱾
- ᱓. ᱥᱟᱨᱚᱫᱟ ᱯᱨᱚᱥᱟᱫᱽ ᱠᱩᱥᱠᱩ ᱥᱤᱨᱯᱷᱟᱹ --- ᱒᱐᱑᱗ ᱥᱟᱞᱮ ᱨᱮ, ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱯᱟᱦᱴᱟ ᱠᱷᱚᱱ ᱾ [᱒]