ᱮᱨᱚᱜ ᱥᱤᱢ
ᱮᱨᱚᱜ ᱥᱤᱢ ᱫᱚ ᱦᱚᱲ ᱦᱚᱯᱚᱱ ᱠᱚᱣᱟᱜ ᱵᱷᱤᱱᱟᱹ ᱵᱷᱤᱱᱟᱹ ᱯᱚᱨᱚᱵᱽ ᱯᱚᱨᱵᱟᱥ ᱢᱩᱫᱽ ᱨᱮ ᱢᱤᱫᱴᱮᱱ ᱠᱟᱱᱟ᱾ ᱱᱚᱶᱟ ᱯᱚᱨᱚᱵᱽ ᱫᱚ ᱟᱥᱟᱲ ᱪᱟᱱᱫᱚ ᱨᱮ ᱠᱚ ᱯᱚᱨᱚᱵᱚᱜ-ᱟ᱾ ᱮᱨ ᱟᱯᱷᱚᱨ ᱡᱮᱢᱚᱱ ᱱᱟᱭᱛᱮ ᱱᱟᱯᱟᱭ ᱛᱮ ᱯᱚᱴᱠᱚᱡᱚᱜ ᱢᱟ ᱦᱟᱨᱟ ᱵᱩᱨᱩᱜ ᱢᱟ ᱚᱱᱟ ᱧᱩᱛᱩᱢᱛᱮ ᱵᱚᱝᱜᱟ ᱵᱩᱨᱩ ᱴᱷᱮᱱᱠᱚ ᱟᱸᱨᱚᱸᱡᱟ᱾
ᱵᱟᱠᱷᱮᱬ ᱥᱟᱯᱲᱟᱣ
ᱮᱨᱚᱜ ᱥᱤᱢ ᱵᱚᱝᱜᱟ ᱨᱮ ᱫᱚ ᱱᱚᱝᱠᱟ ᱞᱮᱠᱟᱠᱚ ᱵᱚᱝᱜᱟᱭᱟᱺ
ᱡᱚᱦᱟᱨ ᱛᱚᱵᱮ ᱵᱟᱹᱯᱩ ᱴᱷᱟᱹᱠᱩᱨᱛᱤᱧ, ᱡᱚᱦᱟᱨ ᱡᱟᱦᱮᱨ ᱮᱨᱟ, ᱡᱚᱦᱟᱨ ᱢᱟᱨᱟᱝ ᱵᱩᱨᱩ, ᱱᱮ ᱛᱚᱵᱮ ᱮᱨᱚᱜ ᱥᱤᱢ ᱧᱩᱛᱩᱢ ᱛᱮ ᱮᱢᱟᱢ ᱪᱟᱞᱟᱢ ᱠᱟᱱᱟ, ᱢᱤᱫ ᱴᱷᱮᱱᱮ ᱮᱨᱟ ᱜᱮᱞ ᱵᱟᱨ ᱴᱷᱮᱱ ᱠᱟᱹᱱᱟᱹᱭᱚᱜ ᱢᱩᱱᱟᱹᱭᱚᱜ ᱢᱟ, ᱡᱟᱨᱜᱮ ᱫᱟᱠ ᱢᱟᱱᱰᱦᱟᱨᱮ ᱫᱩᱠᱟᱜ ᱯᱟᱯᱜ, ᱨᱚᱜᱟᱜ ᱵᱤᱜᱦᱤᱱᱟᱜ ᱞᱟᱜ ᱦᱟᱥᱳ, ᱵᱚᱦᱚᱜ ᱦᱟᱥᱳ ᱟᱞᱚᱯᱮ ᱵᱚᱞ ᱳᱪᱳ ᱥᱚᱲ ᱳᱪᱳᱭᱟ ᱥᱟᱢᱟᱱᱚᱢ ᱥᱤᱠᱩᱣᱟᱹᱨ ᱥᱟᱢᱟᱱᱚᱢ ᱢᱟᱨᱟᱣ ᱮᱴᱟᱜ ᱟᱲᱮ ᱮᱴᱟᱜ ᱥᱤᱢᱟᱹᱛᱮ ᱜᱚᱜ ᱜᱤᱰᱤ ᱵᱷᱟᱹᱨᱤᱭᱟᱹᱭ ᱯᱮ, ᱵᱟᱹᱵᱩ ᱵᱟᱹᱵᱩ ᱴᱷᱟᱹᱠᱩᱨᱛᱤᱧ ᱫᱚ᱾ ᱨᱟᱹᱰᱤ ᱮᱨᱟ ᱦᱮᱢᱮ ᱮᱨᱟ ᱚᱲᱮᱡ ᱥᱟᱠᱟᱢ ᱞᱟᱟᱹᱴᱩᱢ ᱥᱟᱠᱟᱢ ᱵᱟᱪᱟᱭᱟᱠᱚ ᱵᱚᱱᱫᱟᱠᱚ ᱟᱞᱚ ᱛᱚᱵᱮᱯᱮ ᱥᱟᱨᱟᱜ ᱥᱟᱹᱜᱩᱱᱟᱹᱜ ᱛᱟᱠᱚᱣᱟ, ᱟᱫᱚ ᱢᱤᱫ ᱫᱤᱱ ᱛᱟᱨᱟ ᱚᱭᱚᱝᱟᱠᱚ ᱪᱩᱱᱰᱚᱜᱟᱠᱚ ᱟᱞᱚᱯᱮ ᱞᱟᱜᱟᱣ ᱚᱪᱚ ᱵᱟᱡᱟᱣ ᱚᱪᱚᱭᱟ, ᱵᱮᱥ ᱚᱠᱚᱛᱮ ᱵᱟᱲᱮ ᱢᱤᱦᱩᱸ ᱮᱝᱜᱟ ᱢᱮᱨᱚᱢ ᱮᱝᱜᱟ ᱫᱟᱲᱟᱢᱠᱚ ᱥᱟᱝᱜᱷᱟᱨᱠᱚ, ᱥᱤᱧ ᱵᱤᱨ ᱢᱟᱱ ᱵᱤᱨ ᱜᱩᱛᱨᱩᱫ ᱥᱮᱛᱟ ᱛᱮᱱᱠᱮ ᱦᱟᱹᱲᱩᱵ ᱥᱚᱥᱟᱸᱭ ᱵᱟᱹᱯᱩ ᱴᱷᱟᱹᱠᱩᱨᱛᱤᱧ ᱫᱚ᱾
ᱱᱤᱭᱚᱢ ᱥᱟᱯᱲᱟᱣ
ᱮᱨᱚᱜ ᱥᱤᱢ ᱫᱚ ᱵᱚᱪᱦᱚᱨ ᱨᱮᱭᱟᱜ ᱯᱟᱹᱦᱤᱞ ᱵᱚᱝᱜᱟ ᱠᱟᱱᱟ᱾ ᱟᱥᱟᱲ ᱪᱟᱱᱫᱚ ᱨᱮ ᱮᱨᱚᱜ ᱥᱤᱢ ᱫᱚᱠᱚ ᱡᱚᱢ ᱠᱚᱣᱟ ᱮᱨ ᱟᱯᱷᱚᱨ ᱧᱩᱛᱩᱢ ᱛᱮ᱾ ᱚᱲᱟᱜ ᱚᱲᱟᱜ ᱢᱤᱫᱢᱤᱫ ᱜᱚᱴᱟᱝ ᱥᱤᱢ ᱠᱚ ᱮᱢᱚᱜ-ᱟ᱾ ᱱᱟᱭᱠᱮ ᱫᱚ ᱡᱟᱦᱮᱨ ᱨᱮ ᱢᱤᱢᱤᱫ ᱜᱚᱴᱟᱝᱮ ᱵᱚᱝᱜᱟ ᱠᱚᱣᱟ ᱢᱟᱨᱟᱝ ᱵᱩᱨᱩ, ᱡᱟᱦᱮᱨ ᱮᱨᱟ, ᱢᱚᱬᱮᱠᱚ ᱛᱩᱨᱩᱭᱠᱚ, ᱜᱚᱸᱥᱟᱭ ᱮᱨᱟ, ᱢᱟᱹᱧᱷᱡᱤ ᱟᱨ ᱯᱟᱨᱜᱟ ᱦᱟᱲᱟᱢ ᱠᱚ ᱧᱩᱛᱩᱢ ᱛᱮ ᱛᱮᱭᱮ ᱵᱚᱝᱜᱟ ᱠᱚᱣᱟ᱾ ᱵᱮᱲᱦᱟᱭ ᱥᱤᱢᱟᱹ ᱨᱮᱱ ᱵᱚᱝᱜᱟ ᱠᱚ ᱞᱟᱹᱜᱤᱫ ᱫᱚ ᱢᱤᱫᱴᱮᱱ ᱦᱮᱱᱫᱮ ᱥᱤᱢᱮ ᱵᱚᱝᱜᱟ ᱭᱮᱭᱟ᱾ ᱥᱟᱨᱮᱡ ᱥᱤᱢ ᱥᱤᱢᱟᱹ ᱟᱲᱮ ᱨᱮᱭᱮ ᱵᱚᱝᱜᱟ ᱠᱚᱣᱟ᱾ ᱵᱟᱹᱲᱛᱤ ᱥᱤᱢ ᱫᱚᱠᱚ ᱯᱮᱴᱮᱨ ᱜᱚᱡ ᱠᱚᱣᱟ᱾
ᱱᱟᱭᱠᱮ ᱵᱚᱝᱜᱟ ᱠᱟᱛᱮ ᱥᱤᱢᱠᱚ ᱥᱩᱲᱟᱹ ᱠᱚᱣᱟ᱾ ᱚᱱᱟ ᱥᱩᱲᱟᱹ ᱫᱚ ᱟᱹᱛᱩ ᱥᱩᱫᱷᱟᱹ ᱨᱮᱱ ᱦᱮᱨᱮᱞ ᱦᱚᱯᱚᱱ ᱠᱚ ᱡᱚᱢᱟ᱾ ᱡᱟᱦᱮᱨ ᱮᱨᱟ ᱥᱤᱢ ᱟᱨ ᱢᱚᱬᱮᱠᱚ ᱥᱤᱢ ᱫᱚ ᱱᱟᱭᱠᱮ ᱟᱡ ᱮᱥᱠᱟᱨ ᱛᱮᱜᱮᱭᱮ ᱡᱚᱢ ᱠᱤᱱᱟᱹ᱾ ᱫᱚᱥᱟᱨ ᱛᱮᱥᱟᱨ ᱠᱫᱚ ᱚᱲᱟᱜ ᱚᱲᱟᱜ ᱠᱚ ᱵᱚᱝᱜᱟᱭᱟ ᱟᱵᱽᱜᱮ ᱵᱚᱝᱜᱟ, ᱚᱲᱟᱜ ᱵᱚᱝᱜᱟ, ᱢᱟᱨᱟᱝ ᱵᱩᱨᱩ ᱟᱨ ᱦᱟᱯᱲᱟᱢ ᱠᱚ ᱧᱩᱛᱩᱢ ᱛᱮ᱾