ᱮᱭᱟᱭ ᱢᱟᱦᱟᱸᱨᱤ ᱡᱟᱹᱛᱤᱭᱟᱹᱨᱤ ᱠᱟᱹᱢᱤᱥᱟᱲᱟ, ᱥᱚᱢᱵᱚᱞᱯᱩᱨ ᱡᱮᱜᱮᱛ ᱵᱤᱨᱫᱟᱹᱜᱟᱲ
ᱱᱤᱛ ᱦᱟᱹᱵᱤᱫᱽ ᱛᱮ ᱡᱟᱦᱟᱸ ᱛᱤᱱᱟᱹᱜ ᱡᱮᱜᱮᱫ ᱵᱤᱨᱫᱟᱹᱜᱟᱲ ᱠᱚᱨᱮ ᱥᱟᱱᱛᱟᱲ ᱛᱮ ᱯᱤ.ᱮᱪᱰᱤ ᱠᱟᱹᱢᱤᱦᱚᱨᱟ ᱪᱟᱞᱟᱜ ᱠᱟᱱᱟ ᱚᱱᱟ ᱠᱚ ᱥᱟᱱᱛᱟᱲᱤ ᱠᱷᱚᱸᱫᱽᱨᱚᱱ ᱨᱮ ᱵᱮᱵᱷᱟᱨᱚᱜ ᱠᱟᱱ ᱵᱷᱮᱜᱟᱨ ᱵᱷᱟᱜᱟᱨ ᱟᱹᱲᱟᱹ ᱠᱚ ᱛᱩᱢᱟᱹᱞ ᱦᱩᱭᱮᱱᱟ᱾ ᱛᱩᱢᱟᱹᱞ ᱨᱮ ᱵᱤᱥᱥᱚᱼᱵᱷᱟᱨᱚᱛᱤ, ᱥᱚᱢᱵᱚᱞᱯᱩᱨ, ᱠᱤᱥᱥ, ᱮᱢᱟᱱ ᱡᱮᱜᱮᱫ ᱵᱤᱨᱫᱟᱹᱜᱟᱲ ᱠᱚᱨᱮᱱ ᱠᱷᱚᱸᱫᱽᱨᱚᱫᱤᱭᱟᱹ ᱠᱚ ᱥᱮᱴᱮᱨ ᱞᱮᱱᱟ᱾
 ᱠᱟᱹᱢᱤᱦᱚᱨᱟ ᱨᱮᱭᱟᱜ ᱵᱮᱱᱟᱨ | |
| ᱢᱩᱬ ᱧᱩᱛᱩᱢ | ᱮᱭᱟᱭ ᱢᱟᱦᱟᱸᱨᱤ ᱡᱟᱹᱛᱤᱭᱟᱹᱨᱤ ᱠᱟᱹᱢᱤᱥᱟᱲᱟ |
|---|---|
| ᱤᱝᱞᱤᱥ ᱧᱩᱛᱩᱢ | Seven Days International Workshop |
| ᱚᱠᱛᱚ | ᱑᱓ ᱡᱩᱱ ᱒᱐᱒᱓ ᱠᱷᱚᱱ ᱒᱐ ᱡᱩᱱ ᱒᱐᱒᱓ |
| ᱠᱟᱹᱢᱤ ᱚᱠᱛᱮ | ᱮᱭᱟᱭ ᱢᱟᱦᱟᱸ |
| ᱴᱷᱟᱶ | ᱥᱚᱢᱵᱚᱞᱯᱩᱨ ᱡᱮᱜᱮᱛ ᱵᱤᱨᱫᱟᱹᱜᱟᱲ |
| ᱞᱳᱠᱮᱥᱟᱱ | ᱳᱰᱤᱭᱟ ᱵᱤᱵᱷᱟᱜᱽ |
| ᱞᱮᱠᱟᱱ | ᱡᱟᱹᱛᱤᱭᱟᱹᱨᱤ |
| ᱥᱟᱛᱟᱢ | ᱥᱟᱱᱛᱟᱲᱤ ᱠᱷᱚᱸᱫᱽᱨᱚᱱ ᱠᱟᱹᱢᱤ ᱨᱮᱭᱟᱜ ᱟᱹᱲᱟᱹᱠᱚ ᱨᱮᱱᱟᱜ ᱢᱟᱱᱚᱠᱤᱠᱚᱨᱚᱱ |
ᱠᱟᱹᱢᱤᱦᱚᱨᱟ ᱨᱮᱭᱟᱜ ᱚᱡᱮ
ᱥᱟᱯᱲᱟᱣᱱᱤᱛ ᱟᱹᱰᱤ ᱜᱟᱱ ᱡᱮᱜᱮᱫ ᱵᱤᱨᱫᱟᱹᱜᱟᱲ ᱨᱮ ᱥᱟᱱᱛᱟᱲᱤ ᱛᱮ ᱯᱤᱹᱮᱭᱤᱪᱹᱰᱤ ᱠᱷᱚᱸᱫᱽᱨᱚᱱ ᱠᱟᱹᱢᱤ ᱪᱟᱞᱟᱜ ᱠᱟᱱᱟ᱾ ᱢᱮᱱᱠᱷᱟᱱ ᱱᱚᱣᱟ ᱨᱮ ᱢᱤᱫ ᱢᱟᱨᱟᱝ ᱮᱴᱠᱮᱴᱚᱬᱮ ᱫᱚ ᱦᱩᱭᱩᱜ ᱠᱟᱱᱟ, ᱵᱷᱮᱜᱟᱨ ᱵᱷᱮᱜᱟᱨ ᱡᱮᱜᱮᱫ ᱵᱤᱨᱫᱟᱹᱜᱟᱲ ᱨᱮ ᱵᱷᱮᱜᱟᱨ ᱵᱷᱮᱜᱟᱨ “ᱠᱷᱚᱸᱫᱽᱨᱚᱱ ᱨᱮ ᱵᱮᱵᱷᱟᱨᱚᱜ ᱠᱟᱱ ᱟᱹᱲᱟᱹ” ᱠᱚ ᱠᱚ ᱚᱞᱮᱫ ᱠᱟᱱᱟ᱾ ᱱᱚᱝᱠᱟ ᱞᱮᱠᱷᱟᱱ ᱟᱜᱟᱢ ᱫᱤᱱ ᱨᱮ ᱥᱮ ᱱᱚᱣᱟ ᱠᱷᱚᱸᱫᱽᱨᱚᱱ ᱠᱚ ᱵᱮᱵᱷᱟᱨᱮᱫ ᱠᱟᱱ ᱯᱟᱹᱴᱷᱩᱣᱟᱹ ᱠᱚ ᱮᱴᱠᱮᱴᱚᱬᱮ ᱟᱨ ᱵᱟᱝ ᱟᱸᱫᱷᱟ ᱨᱮᱠᱚ ᱧᱩᱨᱩᱜ ᱠᱟᱱᱟ᱾ ᱱᱚᱝᱠᱟ ᱜᱮ ᱦᱩᱭ ᱪᱟᱞᱟᱣ ᱞᱮᱱ ᱠᱷᱟᱱ ᱡᱟᱦᱟᱸ ᱡᱚᱥ ᱟᱛᱮ ᱠᱷᱚᱸᱫᱽᱨᱚᱱ ᱠᱟᱹᱢᱤ ᱦᱩᱭᱩᱜ ᱠᱟᱱᱟ ᱚᱱᱟ ᱜᱮ ᱵᱟᱝ ᱯᱩᱨᱟᱹᱣ ᱫᱟᱲᱮᱭᱟᱜᱼᱟ᱾ ᱟᱨ ᱱᱚᱝᱠᱟ ᱦᱩᱭ ᱞᱮᱱ ᱠᱷᱟᱱ ᱥᱟᱱᱛᱟᱲᱤ ᱯᱟᱹᱨᱥᱤ ᱨᱮᱭᱟᱜ ᱢᱚᱱᱚᱠᱤᱠᱚᱨᱚᱱ ᱨᱮᱦᱚᱸ ᱞᱟᱦᱟᱱᱛᱤ ᱵᱟᱝ ᱦᱩᱭ ᱫᱟᱲᱮᱭᱟᱜᱼᱟ᱾
ᱠᱟᱹᱢᱤ ᱯᱟᱱᱛᱷᱟ
ᱥᱟᱯᱲᱟᱣᱱᱤᱛ ᱦᱟᱹᱵᱤᱫᱽ ᱛᱮ ᱵᱮᱵᱷᱟᱨᱚᱜ ᱠᱟᱱ ᱟᱹᱲᱟᱹ ᱠᱚ ᱥᱮᱸᱫᱽᱨᱟ ᱧᱟᱢ ᱞᱟᱹᱜᱤᱫ ᱱᱚᱣᱟ ᱠᱟᱹᱢᱤᱥᱟᱲᱟ ᱨᱮ ᱥᱮᱴᱮᱨ ᱟᱠᱟᱱ ᱯᱮᱲᱟ ᱠᱚ ᱵᱟᱨᱭᱟ ᱜᱩᱴ ᱨᱮ ᱦᱟᱹᱴᱤᱧ ᱦᱩᱭᱮᱱᱟ᱾ ᱢᱤᱫ ᱫᱚ ᱑) ᱠᱷᱚᱸᱫᱽᱨᱚᱱ ᱨᱮ ᱵᱮᱵᱷᱟᱨᱚᱜ ᱠᱟᱱ ᱤᱝᱞᱤᱥ ᱟᱹᱲᱟᱹ ᱠᱚ ᱛᱩᱢᱟᱹᱞ ᱡᱟᱣᱨᱟᱭᱮᱫᱟ ᱟᱨ ᱢᱤᱫ ᱫᱚ ᱒) ᱥᱟᱱᱛᱟᱲᱤ ᱟᱹᱲᱟᱹ ᱠᱚ ᱛᱩᱢᱟᱹᱞ ᱡᱟᱣᱨᱟᱭᱮᱫᱟ᱾