ᱯᱨᱤᱛᱷᱤᱵᱤ ᱢᱟᱹᱡᱷᱤ

ᱯᱨᱤᱛᱷᱤᱵᱤ ᱢᱟᱹᱡᱷᱤ ᱫᱚ ᱢᱤᱫ ᱨᱟᱡᱽ-ᱟᱹᱨᱤᱭᱟ ᱠᱟᱱᱟᱭ᱾ ᱱᱩᱭ ᱫᱚ ᱟᱥᱟᱢ ᱯᱚᱱᱚᱛ ᱠᱷᱚᱱ ᱠᱚᱝᱨᱮᱥ ᱫᱚᱞ ᱥᱟᱶ ᱡᱚᱲᱟᱣ ᱢᱮᱱᱟᱭᱟ᱾ ᱴᱤᱝᱠᱷᱚᱝ ᱵᱤᱫᱷᱟᱱᱥᱚᱵᱷᱟ ᱢᱟᱹᱪᱤ ᱠᱷᱚᱱ ᱢᱤᱫ ᱫᱷᱟᱣ ᱟᱨ ᱞᱟᱦᱚᱣᱟᱞ ᱵᱤᱰᱷᱟᱱᱥᱚᱵᱷᱟ ᱢᱟᱹᱪᱤ ᱠᱷᱚᱱ ᱯᱩᱵ ᱫᱷᱟᱣ ᱵᱤᱫᱷᱟᱭᱚᱠ ᱪᱷᱟᱰᱟ ᱢᱤᱫ ᱫᱷᱟᱣ ᱨᱟᱡᱭᱚᱥᱚᱵᱷᱟ ᱥᱟᱝᱥᱚᱫᱮ ᱛᱟᱸᱦᱮᱭᱟ᱾ ᱩᱱᱤᱫᱚ ᱞᱮᱛᱟᱲ ᱜᱮ ᱪᱟ ᱵᱟᱜᱟᱱ ᱟᱹᱫᱤᱵᱟᱹᱥᱤ ᱠᱚᱣᱟᱜ ᱩᱛᱱᱟᱹᱣ ᱞᱟᱹᱜᱤᱫ ᱞᱟᱹᱲᱦᱟᱹᱭ ᱟᱠᱟ ᱢᱮᱱᱟᱭᱟ᱾

ᱡᱟᱱᱟᱢ ᱟᱨ ᱥᱮᱪᱮᱫ

ᱯᱨᱤᱛᱷᱤᱵᱤ ᱢᱟᱹᱡᱷᱤ ᱟᱜ ᱡᱟᱱᱟᱢ ᱫᱚ ᱢᱟᱹ ᱒᱔.᱐᱑.᱑᱙᱕᱑ ᱦᱤᱛ ᱨᱮ ᱟᱥᱟᱢ ᱯᱚᱱᱚᱛ ᱨᱮᱱᱟᱜ ᱰᱤᱵᱨᱩᱜᱚᱲ ᱡᱤᱞᱟᱹ ᱞᱮᱠᱟᱭ-ᱱᱟᱜᱟᱶ ᱟᱹᱛᱩ ᱨᱮ ᱦᱩᱭ ᱞᱮᱱᱟ᱾ ᱟᱯᱟᱛ ᱧᱩᱛᱩᱢ ᱫᱚ ᱵᱤᱨᱥᱤᱝ ᱢᱟᱹᱡᱷᱤ ᱟᱨ ᱮᱸᱜᱟᱛᱟᱜ ᱫᱚ ᱥᱤᱛᱟᱹ ᱢᱟᱹᱡᱷᱤ᱾ ᱩᱱᱤ ᱫᱚ ᱑᱙᱗᱒ ᱥᱟᱞᱮ ᱨᱮ ᱰᱤᱵᱨᱩᱜᱚᱲ ᱡᱮᱜᱮᱫ ᱵᱤᱨᱫᱟᱹᱜᱟᱲ ᱠᱷᱚᱱ ᱵᱤ. ᱮ. ᱟᱨ ᱒᱐᱐᱐ ᱥᱟᱞᱮ ᱨᱮ ᱜᱩᱣᱟᱦᱟᱴᱤ ᱡᱮᱜᱮᱫ ᱵᱤᱨᱫᱟᱹᱜᱟᱲ ᱠᱷᱚᱱ ᱮᱞ. ᱮᱞ. ᱵᱤ. ᱫᱚᱭ ᱥᱟᱹᱛ ᱞᱮᱜᱼᱟ᱾ ᱱᱩᱭ ᱫᱚ ᱵᱟᱨ ᱫᱷᱟᱣ ᱮ ᱵᱟᱯᱞᱟ ᱟᱠᱟᱱᱟ᱾ ᱮᱛᱚᱦᱚᱵ ᱫᱷᱟᱣ ᱫᱚ ᱚᱱᱤᱛᱟ ᱢᱟᱹᱡᱷᱤ ᱥᱟᱶ ᱑᱙᱗᱘ ᱥᱟᱞᱮ ᱨᱮ ᱟᱨ ᱫᱚᱥᱟᱨ ᱫᱷᱟᱣ ᱫᱚ ᱰᱟᱠᱛᱟᱨ ᱛᱚᱨᱩᱞᱚᱛᱟ ᱢᱟᱹᱡᱷᱤ ᱥᱟᱶ ᱑᱙᱙᱗ ᱥᱟᱞᱮ ᱨᱮ᱾ ᱜᱤᱫᱟᱹᱨ ᱫᱚ ᱵᱟᱨ ᱠᱚᱲᱟ ᱟᱨ ᱵᱟᱨ ᱠᱩᱲᱤ᱾

ᱨᱟᱡᱟᱹᱨᱤ ᱡᱤᱭᱚᱱ

ᱩᱱᱤᱭᱟᱜ ᱨᱟᱡᱟᱹᱨᱤ ᱡᱤᱭᱚᱱ ᱫᱚ ᱠᱚᱞᱮᱡᱽ ᱵᱮᱲᱟ ᱨᱮ ᱜᱮ ᱮᱦᱚᱵ ᱞᱮᱱᱟ ᱑᱙᱖᱘ ᱥᱟᱞᱮ ᱨᱮ ᱟᱥᱟᱢ ᱯᱚᱱᱚᱛ ᱪᱟ ᱵᱟᱜᱟᱱ ᱟᱹᱫᱤᱵᱟᱹᱥᱤ ᱯᱟᱹᱴᱷᱩᱣᱟᱹ ᱜᱟᱶᱛᱟ ᱨᱮᱱ ᱥᱩᱛᱨᱮᱫ ᱞᱮᱠᱟ ᱛᱮ᱾ ᱑᱙᱗᱘ ᱥᱟᱞᱮ ᱫᱷᱟᱹᱵᱤᱡ ᱚᱱᱟ ᱜᱟᱶᱛᱟ ᱨᱮ ᱥᱩᱛᱨᱮᱫ ᱮ ᱛᱟᱸᱦᱮ ᱠᱟᱱᱟ᱾ ᱚᱱᱟ ᱛᱟᱭᱚᱢ ᱟᱥᱟᱢ ᱪᱟ ᱵᱟᱜᱟᱱ ᱠᱟᱹᱢᱤᱭᱟ ᱜᱟᱶᱛᱟ ᱨᱮ ᱢᱟᱬᱛᱮ ᱥᱩᱛᱨᱮᱫ ᱞᱮᱠᱟᱛᱮ ᱑᱙᱘᱓ ᱥᱟᱞᱮ ᱫᱷᱟᱹᱵᱤᱡ ᱮ ᱛᱟᱸᱦᱮ ᱠᱟᱱᱟ᱾ ᱚᱱᱟ ᱠᱟᱛᱮ ᱨᱟᱡᱭᱚᱥᱚᱵᱷᱟ ᱥᱟᱝᱥᱚᱫᱽ (᱑᱙᱘᱔-᱑᱙᱙᱐) ᱟᱨ ᱢᱚᱬᱮ ᱫᱷᱟᱣ ᱵᱤᱫᱷᱟᱭᱚᱠ (᱑᱙᱙᱑-᱒᱐᱑᱖) ᱮ ᱛᱟᱸᱦᱮᱭᱟ᱾ ᱚᱱᱟ ᱛᱟᱞᱟ ᱡᱚᱜᱚ ᱤᱥᱯᱤᱠᱟᱨ, ᱤᱥᱯᱤᱠᱟᱨ ᱟᱨ ᱪᱟ ᱟᱹᱫᱤᱵᱟᱹᱥᱤ ᱵᱷᱟᱹᱞᱟᱹᱭ ᱢᱚᱱᱛᱨᱤ ᱞᱮᱠᱟᱛᱮ ᱦᱚᱸᱭ ᱛᱟᱸᱦᱮ ᱠᱟᱱᱟ᱾

ᱥᱟᱶᱦᱮᱫ ᱡᱚᱱᱚᱲᱟᱣ

ᱩᱱᱤᱫᱚ ᱟᱹᱫᱤᱵᱟᱹᱥᱤ ᱥᱟᱶᱛᱟ ᱥᱮᱪᱮᱫ ᱞᱟᱠᱪᱟᱨ ᱥᱮᱢᱞᱮᱫ, ᱟᱥᱟᱢ ᱯᱚᱱᱚᱴ ᱨᱮᱱ ᱫᱤᱥ-ᱦᱩᱫᱤᱥ ᱪᱟᱞᱤᱡ ᱟᱨ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱨᱮᱱ ᱢᱟᱹᱱ ᱥᱚᱦᱮᱫ ᱠᱟᱱᱟᱭ᱾ ᱩᱱᱤᱫᱚ ᱤᱱᱴᱟᱨᱱᱮᱥᱚᱱᱟᱞ ᱥᱟᱱᱛᱟᱞ ᱠᱟᱣᱩᱱᱥᱤᱞ ᱨᱮᱱ ᱯᱟᱨᱥᱮᱫ ᱦᱚᱸᱭ ᱛᱟᱦᱮ ᱠᱟᱱᱟ᱾ ᱩᱱᱤᱭᱟᱜ ᱚᱞ ᱵᱮᱞ ᱠᱚ ᱢᱩᱫᱽ ᱨᱮ ᱯᱮ ᱯᱟᱹᱨᱥᱤ ᱟᱹᱲᱟᱹ ᱵᱟᱺᱫᱤ (ᱥᱟᱱᱛᱟᱲᱤ-ᱚᱥᱚᱢᱤᱭᱟ-ᱤᱝᱞᱤᱥ) ᱥᱟᱯᱲᱟᱣ, ᱚᱥᱚᱢᱤᱭᱟ ᱯᱟᱹᱨᱥᱤ ᱛᱮ ᱚᱱᱚᱲᱦᱮ ᱯᱩᱛᱷᱤ 'ᱥᱨᱚᱢᱤᱠ', ᱤᱥᱯᱤᱠᱟᱨ ᱞᱮᱠᱟᱛᱮ ᱵᱟᱪᱷᱟᱣ ᱥᱤᱫ ᱨᱚᱲ (ᱤᱥᱯᱤᱪ)ᱤᱝᱞᱤᱥ ᱟᱨ ᱚᱥᱚᱢᱤᱭᱟ ᱯᱟᱹᱨᱥᱤ ᱛᱮ ᱩᱪᱷᱟᱹᱱ ᱮᱢᱟᱱ ᱧᱩᱢ ᱜᱟᱱᱚᱜᱼᱟ᱾

ᱵᱤᱞᱟᱹᱛ ᱥᱟᱸᱜᱷᱟᱨ

ᱩᱱᱤᱫᱚ ᱵᱤᱞᱟᱹᱛ ᱫᱤᱥᱚᱢ ᱥᱟᱸᱜᱷᱟᱨ ᱨᱮᱱᱟᱜ ᱟᱹᱰᱤ ᱥᱚᱠᱷ ᱛᱟᱭ᱾ ᱛᱷᱟᱭᱞᱮᱸᱰ, ᱦᱚᱝᱠᱚᱝ, ᱜᱮᱱᱮᱵᱷᱟ, ᱚᱥᱴᱨᱮᱞᱤᱭᱟ, ᱡᱟᱯᱟᱱ, ᱥᱤᱝᱜᱟᱯᱩᱨ, ᱢᱚᱨᱤᱥᱟᱥ, ᱠᱟᱱᱟᱰᱟ, ᱫᱩᱵᱟᱭ, ᱤᱴᱟᱞᱤ, ᱡᱟᱨᱢᱟᱱᱤ ᱮᱢᱟᱱ ᱫᱤᱥᱚᱢ ᱠᱚᱭ ᱥᱟᱸᱜᱷᱟᱨ ᱟᱠᱟᱫᱟ᱾

ᱵᱟᱦᱨᱮ ᱡᱚᱱᱚᱲ

1. http://assamassembly.gov.in/prithibi-majhi:html 2. http://assamassembly.nic.in