ᱰᱟᱦᱟᱨ

ᱰᱟᱦᱟᱨ ᱮᱱᱮᱡ-ᱥᱮᱨᱮᱧ ᱨᱮᱭᱟᱜ ᱛᱮᱛᱮᱫ ᱠᱟᱛᱷᱟ

ᱢᱟᱜᱷ ᱵᱚᱸᱜᱟ ᱢᱩᱞᱩᱜ ᱥᱟᱶᱛᱮ,ᱥᱟᱱᱟᱢ ᱥᱟᱱᱛᱷᱟᱞ ᱟᱹᱛᱩ ᱨᱮᱜᱮ ᱰᱟᱦᱟᱨ ᱥᱮᱨᱮᱧ ᱟᱨ ᱮᱱᱮᱡ ᱨᱮᱱᱟᱜ ᱨᱟᱦᱟ ᱫᱚ ᱛᱟᱠᱮᱨ ᱛᱟᱨᱠᱚ ᱨᱟᱠᱟᱵ-ᱟ ᱰᱟᱦᱟᱨ ᱫᱷᱩᱲᱤ ᱛᱮ᱾ ᱢᱮᱱ ᱟᱠᱚ ᱥᱮᱫᱟᱭ ᱠᱷᱚᱱ ᱜᱤ ᱥᱤᱧ ᱪᱟᱸᱫᱚ ᱫᱚ ᱫᱤᱱ ᱮ ᱞᱮᱠᱷᱟᱭᱟ,ᱟᱨ ᱧᱤᱸᱫᱟᱹ ᱪᱟᱸᱫᱚ ᱫᱚ ᱪᱟᱸᱫᱚᱭ ᱞᱮᱠᱷᱟ ᱠᱚᱣᱟ᱾ ᱱᱚᱣᱟ ᱡᱮᱜᱮᱫ ᱨᱮᱱ ᱥᱤᱨᱡᱚᱱᱤᱡ "ᱥᱤᱨᱡᱚᱱ"ᱫᱚ ᱧᱤᱸᱫᱟᱹ ᱪᱟᱸᱫᱚᱠᱚ ᱫᱚ ᱜᱮᱞᱵᱟᱨ ᱦᱟᱹᱴᱤᱧ ᱨᱮᱭᱮ ᱦᱟᱹᱴᱤᱧ ᱟᱠᱟᱫ ᱠᱚᱣᱟ᱾ ᱩᱱᱠᱩᱣᱟᱜ ᱧᱩᱛᱩᱢ ᱫᱚ ᱠᱟᱱᱟ—ᱢᱟᱜᱷ,ᱯᱷᱟᱹᱜᱩᱱ,ᱪᱟᱹᱛ,ᱵᱟᱹᱭᱥᱟᱹᱠ,ᱡᱷᱮᱴ,ᱟᱥᱟᱲ,ᱥᱟᱱ,ᱵᱷᱟᱫᱚᱨ,ᱫᱟᱥᱟᱸᱭ,ᱥᱚᱦᱨᱟᱭ,ᱟᱜᱷᱟᱸᱲ ᱟᱨ ᱯᱩᱥ᱾ ᱚᱱᱟᱛᱮ ᱱᱩᱠᱩ ᱜᱮᱞᱵᱟᱨ ᱪᱟᱸᱫᱚ ᱫᱚ ᱜᱮᱞᱵᱟᱨ ᱵᱚᱸᱜᱟ ᱨᱮᱭᱮ ᱥᱤᱫᱩᱯ ᱟᱠᱟᱫ ᱠᱚᱣᱟ᱾ ᱢᱟᱜᱷ ᱪᱟᱸᱫᱚ ᱨᱮ ᱫᱚ ᱢᱟᱜᱷ ᱵᱚᱸᱜᱟ ᱯᱷᱟᱹᱜᱩᱱ ᱪᱟᱸᱫᱚ ᱨᱮ ᱵᱟᱦᱟ ᱵᱚᱸᱜᱟ, ᱪᱟᱹᱛ ᱪᱟᱸᱫᱚ ᱨᱮ ᱡᱩᱜᱽᱱᱤ ᱵᱚᱸᱜᱟ, ᱵᱟᱹᱭᱥᱟᱹᱠ ᱪᱟᱸᱫᱚ ᱨᱮ ᱮᱨᱚᱜ ᱵᱚᱸᱜᱟ,ᱡᱷᱮᱴ ᱪᱟᱸᱫᱚ ᱨᱮ ᱢᱩᱪᱨᱤᱵᱚᱸᱜᱟ,ᱟᱥᱟᱲ ᱪᱟᱸᱫᱚ ᱨᱮ ᱟᱥᱟᱲᱤᱭᱟᱹ ᱵᱚᱸᱜᱟ,ᱥᱟᱱ ᱪᱟᱸᱫᱚ ᱨᱮ ᱫᱚ ᱠᱟᱨᱟᱢ ᱵᱚᱸᱜᱟ ᱵᱷᱟᱫᱚᱨ ᱪᱟᱸᱫᱚ ᱨᱮ ᱫᱚ ᱡᱟᱱᱛᱷᱟᱲ ᱵᱚᱸᱜᱟ, ᱫᱟᱥᱟᱸᱭ ᱪᱟᱸᱫᱚ ᱨᱮ ᱫᱚ ᱫᱟᱥᱟᱸᱭ ᱵᱚᱸᱜᱟ,ᱥᱚᱦᱨᱟᱭ ᱪᱟᱸᱫᱚ ᱨᱮ ᱫᱚ ᱥᱚᱦᱨᱟᱭ ᱵᱚᱸᱜᱟ, ᱟᱜᱷᱟᱸᱲ ᱪᱟᱸᱫᱚ ᱨᱮ ᱫᱚ ᱡᱚᱢᱥᱤᱢ ᱵᱚᱸᱜᱟ ᱟᱨ ᱯᱩᱥ ᱪᱟᱸᱫᱚ ᱨᱮ ᱫᱚ ᱥᱟᱠᱨᱟᱛ ᱵᱚᱸᱜᱟ᱾ ᱪᱟᱸᱫᱚ ᱢᱩᱞᱩᱜ ᱠᱷᱚᱱ ᱮᱦᱚᱵ ᱠᱟᱛᱮᱜ ᱠᱩᱱᱟᱹᱢᱤ ᱦᱟᱹᱵᱤᱡ ᱟᱨ ᱠᱩᱱᱟᱹᱢᱤ ᱟᱹᱢᱤ ᱠᱷᱚᱱ ᱮᱦᱚᱵ ᱠᱟᱛᱮᱜ ᱟᱢᱟᱵᱟᱭᱥᱤ ᱦᱟᱹᱵᱤᱡ ᱯᱮᱜᱮᱞ ᱥᱤᱧ ᱧᱤᱸᱫᱟᱹ ᱫᱚ ᱢᱤᱫ ᱴᱟᱝ ᱪᱟᱸᱫᱚ ᱨᱮᱭᱮ ᱞᱮᱠᱷᱟ ᱟᱠᱟᱫ ᱠᱚᱣᱟ᱾ᱥᱤᱨᱡᱚᱱ ᱨᱮᱱᱟᱜ ᱥᱚᱡᱚᱱᱛᱚᱨ ᱧᱮᱞᱮᱞᱚᱢ ᱨᱩᱯ ᱨᱮ᱾ ᱢᱟᱜᱷ ᱪᱟᱸᱫᱚ ᱠᱷᱚᱱ ᱜᱤ ᱮᱦᱚᱵ ᱮᱱᱟ ᱢᱤᱢᱤᱫ ᱥᱮᱨᱢᱟ ᱨᱮᱱᱟᱜ ᱞᱮᱠᱷᱟ ᱫᱤᱱ ᱫᱚ᱾ ᱚᱱᱟᱛᱮ ᱢᱟᱜᱷ ᱪᱟᱸᱫᱚ ᱫᱚ ᱥᱮᱨᱢᱟ ᱥᱮ ᱵᱚᱪᱷᱚᱨ ᱫᱤᱱ ᱨᱮᱱᱟᱜ ᱮᱦᱚᱵ ᱪᱟᱸᱫᱚ ᱠᱟᱱᱟ᱾ ᱥᱤᱨᱡᱚᱱᱤᱡ ᱥᱤᱨᱡᱚᱱ ᱫᱚ "ᱢᱟᱜᱷ ᱵᱚᱸᱜᱟ" ᱫᱚᱭ ᱥᱤᱫᱩᱯ ᱠᱮᱫᱮᱭᱟ ᱢᱟᱜᱷ ᱪᱟᱸᱫᱚ ᱨᱮ᱾ ᱥᱤᱨᱡᱚᱱ ᱨᱮᱱᱟᱜ ᱥᱚᱡᱚᱱᱛᱚᱨ ᱫᱷᱟᱹᱨᱛᱤᱨᱮ ᱢᱟᱱᱶᱟ ᱠᱚ ᱵᱟᱝ ᱮᱱᱠᱷᱟᱱ "ᱢᱟᱨᱟᱱᱜ ᱵᱩᱨᱩ" ᱣᱟᱜ ᱥᱚᱯᱷᱟ ᱛᱮ ᱦᱚᱲ ᱦᱚᱯᱚᱱ ᱠᱚ ᱫᱚ ᱵᱤᱨ ᱵᱩᱨᱩ ᱢᱟᱜ ᱥᱟᱯᱷᱟ ᱯᱷᱟᱨᱪᱟ ᱠᱟᱛᱮᱜ,ᱰᱤ ᱰᱟᱹᱰᱤ ᱟᱹᱛᱩ ᱠᱚ ᱵᱮᱨᱮᱫ ᱞᱮᱫᱟ᱾ ᱵᱤᱨ ᱵᱩᱨᱩ ᱢᱟᱜ ᱯᱷᱟᱨᱪᱟ ᱡᱚᱠᱷᱮᱡ ᱦᱚᱲ ᱦᱚᱯᱚᱱ ᱠᱚ ᱫᱚ ᱵᱤᱨ ᱵᱚᱸᱜᱟ "ᱵᱟᱹᱜᱷᱤᱭᱟ ᱠᱚ ᱥᱟᱵ ᱞᱮᱫᱮᱭᱟ᱾ᱢᱟᱜᱷ ᱪᱟᱸᱫᱚ ᱨᱮᱭᱟᱜ ᱢᱩᱞᱩᱜ ᱯᱮ ᱢᱟᱦᱟᱸ ᱨᱮ᱾ "ᱵᱟᱹᱜᱷᱤᱭᱟ" ᱵᱚᱸᱜᱟ ᱫᱚ ᱠᱩᱲᱤ ᱵᱚᱸᱜᱟ ᱠᱟᱱᱟᱭ᱾ᱩᱱᱡᱚᱠᱷᱮᱡ ᱩᱱᱤ ᱵᱟᱹᱜᱷᱤᱭᱟ ᱵᱚᱸᱜᱟ ᱮ ᱢᱮᱱᱞᱮᱫᱟ— ᱦᱮ ᱢᱟᱱᱶᱟ ᱠᱚ ᱤᱧ ᱦᱚᱸ ᱡᱟᱦᱮᱨ ᱟᱭᱚᱣᱟᱜ ᱚᱲᱟᱜ ᱞᱮᱠᱟ ᱚᱲᱟᱜ ᱵᱮᱱᱟᱣᱟᱧ ᱯᱮ᱾ ᱚᱲᱟᱜ ᱛᱟᱞᱟ ᱨᱮ ᱠᱷᱚᱸᱰ ᱵᱮᱱᱟᱣ ᱠᱟᱛᱮᱜ ᱵᱟᱞᱮ ᱠᱷᱚᱫᱮ ᱡᱟᱝ ᱡᱩᱨᱩᱡᱽᱯᱮ,ᱵᱟᱞᱮᱢᱟᱭᱟᱝ ᱡᱚᱨᱚᱣᱟᱧ ᱯᱮ ᱮᱱᱠᱷᱟᱱ ᱜᱤ ᱤᱧᱤᱧ ᱟᱛᱟᱝᱟ᱾ ᱤᱧ ᱯᱮ ᱠᱩᱲᱤ ᱨᱟᱹᱥᱠᱟ ᱚᱪᱚ ᱤᱧ ᱠᱷᱟᱱ ᱫᱤᱞ ᱫᱟᱲᱮᱧ ᱥᱟᱨᱦᱟᱣ ᱟᱯᱮᱭᱟ᱾ ᱵᱤᱨ ᱠᱟᱹᱲᱢᱤ ᱠᱩᱲᱤ,ᱜᱩᱛᱤ ᱠᱚᱲᱟ(ᱛᱟᱹᱨᱩᱵ-ᱠᱩᱞ)ᱠᱚᱧ ᱛᱚᱞ ᱠᱚᱣᱟ ᱟᱨ ᱚᱱᱟ ᱛᱟᱭᱚᱢ ᱵᱤᱨ ᱵᱩᱨᱩ ᱵᱚᱞᱚᱱᱟ ᱯᱮ ᱪᱤᱞᱤ ᱦᱚᱸ ᱵᱟᱝ ᱯᱮ ᱧᱟᱢ ᱠᱚᱣᱟ᱾ ᱪᱮᱫ ᱦᱚᱭ ᱦᱤᱥᱤᱫ ᱦᱚᱸ ᱵᱟᱝ ᱵᱟᱡᱟᱣ ᱟᱯᱮᱭᱟ᱾ ᱵᱤᱨ ᱥᱟᱨᱡᱚᱢ ᱥᱮᱱᱮᱨ ᱢᱟᱜ ᱯᱮ, ᱵᱤᱨ ᱥᱤᱨᱦᱤ ᱵᱟᱛᱟ ᱢᱟᱜ ᱯᱮ ᱵᱤᱨ ᱥᱟᱜᱟᱜ ᱥᱟᱹᱣᱲᱤ ᱢᱟᱜ ᱤᱨ ᱯᱮ᱾ᱩᱱᱠᱷᱚᱱ ᱜᱤ ᱢᱟᱜᱷ ᱵᱚᱸᱜᱟ ᱢᱩᱞᱩᱜ ᱯᱮ ᱢᱟᱦᱟᱸ ᱠᱷᱚᱱ ᱟᱹᱛᱩ ᱱᱟᱭᱠᱮ ᱫᱚ ᱢᱟᱜᱷ ᱵᱚᱸᱜᱟ ᱮ ᱵᱚᱸᱜᱟᱭᱟ,ᱜᱚᱨᱟᱢ ᱨᱮ᱾ ᱵᱚᱸᱜᱟ ᱫᱮᱣᱟ ᱥᱮᱣᱟ ᱞᱟᱹᱜᱤᱫ ᱟᱹᱛᱩ ᱢᱟᱺᱡᱷᱤ,ᱱᱟᱭᱠᱮ ᱜᱚᱰᱮᱛ,ᱯᱟᱨᱟᱱᱤᱠ, ᱟᱹᱛᱩ ᱦᱚᱲᱠᱚ ᱟᱛᱮ,ᱱᱤᱴ ᱟᱠᱟᱱ ᱫᱤᱱ ᱵᱤᱨ ᱠᱚ ᱵᱚᱞᱚᱱᱟ, ᱵᱤᱨ ᱥᱟᱨᱡᱚᱢ ᱨᱮᱱᱟᱜ ᱥᱮᱱᱮᱨ, ᱵᱤᱨ ᱥᱤᱨᱦᱤ ᱠᱟᱨᱜᱟᱞᱮ ᱨᱮᱱᱟᱜ ᱵᱟᱛᱟ, ᱵᱤᱨ ᱞᱟᱲ ᱵᱟᱵᱮᱨ ᱟᱨᱵᱤᱨ ᱥᱟᱜᱟᱜ ᱥᱟᱹᱣᱲᱤ ᱛᱮ ᱡᱟᱦᱮᱨ ᱚᱲᱟᱜ ᱠᱚ ᱵᱮᱱᱟᱣᱟ᱾ ᱵᱟᱞᱮ ᱠᱷᱚᱫᱮ,ᱵᱟᱞᱮ ᱥᱤᱢ ᱢᱟᱭᱟᱝ ᱛᱮᱠᱚ ᱜᱚᱪᱟᱨ ᱮᱭᱟ᱾ ᱱᱚᱣᱟ ᱥᱤᱨᱥᱛᱟ ᱜᱤ ᱥᱟᱱᱛᱷᱟᱞ ᱟᱹᱛᱩ ᱨᱮ ᱱᱤᱛ ᱦᱚᱸ ᱢᱮᱱᱟᱜ-ᱟ᱾ ᱩᱱ ᱡᱚᱠᱷᱮᱡ ᱦᱚᱲ ᱦᱚᱯᱚᱱ ᱵᱚᱸᱜᱟ ᱧᱩᱛᱩᱢ ᱛᱮ ᱱᱚᱝᱠᱟ ᱠᱚ"ᱵᱟᱠᱷᱮᱬ ᱞᱮᱫ-ᱟ᱾ "ᱡᱚᱦᱟᱨ ᱜᱚᱥᱟᱸᱭ, ᱵᱟᱹᱜᱷᱤᱭᱟ ᱵᱚᱸᱜᱟ᱾ ᱮᱢᱟᱢ,ᱪᱟᱞᱟᱢ ᱠᱟᱱᱟᱞᱮ᱾ ᱢᱟᱜᱷ ᱵᱚᱸᱜᱟ ᱧᱩᱛᱩᱢ ᱛᱮ ᱵᱟᱞᱮ ᱠᱷᱚᱫᱮ ᱡᱟᱝ ᱞᱮ ᱪᱩᱨᱩᱡ ᱟᱢ ᱠᱟᱱᱟ,ᱵᱟᱞᱮ ᱥᱤᱢ ᱢᱟᱭᱟᱝ ᱞᱮ ᱡᱚᱨᱚᱣᱟᱢ ᱠᱟᱱᱟ᱾ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜ ᱢᱮ ᱵᱟᱲᱮ᱾ ᱱᱚᱣᱟ ᱱᱟᱶᱟ ᱥᱮᱨᱢᱟ ᱵᱚᱞᱚᱱᱟ ᱠᱟᱱ,ᱡᱚᱲᱚᱱ ᱠᱟᱱ ᱚᱱᱟ ᱦᱚᱸ ᱟᱢᱜᱮ ᱥᱟᱨ ᱠᱟᱜ ᱥᱟᱹᱜᱩᱱ ᱠᱟᱜ ᱢᱮ ᱵᱟᱲᱮ᱾ ᱵᱤᱨ ᱨᱮ ᱵᱩᱨᱩ ᱨᱮ,ᱦᱚᱨ ᱨᱮ ᱫᱷᱟᱨᱮ ᱨᱮ ᱥᱟᱹᱣᱲᱤ ᱟᱞᱮ,ᱥᱟᱜᱟᱜ ᱟᱞᱮ,ᱚᱲᱟᱜᱚᱜ-ᱟ ᱞᱮ, ᱫᱩᱣᱟᱹᱨᱚᱜ ᱟᱞᱮ ᱚᱱᱟ ᱦᱚᱸ ᱟᱢ ᱜᱮ ᱧᱮᱞᱟᱜ ᱢᱮ , ᱥᱟᱹᱜᱩᱱ ᱠᱟᱜ ᱢᱮ᱾ ᱟᱛᱩ ᱨᱮ ᱢᱟᱲᱮᱫ ᱨᱮ ᱨᱚᱜᱚᱜ ᱟᱞᱮ ᱵᱤᱫᱷᱤᱱᱚᱜ ᱟᱞᱮ ᱚᱱᱟ ᱦᱚᱸ ᱟᱢ ᱜᱮᱢ ᱧᱮᱞᱠᱟᱜ ᱥᱟᱦᱟᱣᱠᱟᱜ-ᱟ᱾ ᱟᱞᱚᱢ ᱵᱚᱞᱚ ᱚᱪᱚᱭᱟ,ᱠᱷᱚᱲᱚ ᱚᱪᱚᱭᱟ ᱾ ᱞᱚᱴᱚ ᱡᱟᱹᱱᱩᱢ,ᱠᱟᱲᱠᱮ ᱡᱟᱹᱱᱩᱢ ᱠᱚ ᱞᱮᱱ ᱠᱟᱜ ᱛᱮᱱᱠᱟᱜ ᱟᱢ᱾ ᱠᱟᱹᱲᱢᱤ ᱠᱩᱲᱤ ᱜᱩᱛᱨᱩᱫ ᱥᱮᱛᱟ ᱠᱚᱢ ᱛᱚᱞᱠᱟᱠᱚᱣᱟᱢ ᱵᱟᱸᱫᱷᱟᱣ ᱠᱟᱠᱚᱣᱟᱢ᱾ ᱵᱟᱹᱭᱨᱤ ᱠᱚ ᱥᱟᱹᱭᱨᱤ ᱠᱚ,ᱧᱮᱞ ᱫᱟᱨᱟᱢ,ᱧᱮᱸᱫ ᱫᱟᱨᱟᱢ,ᱦᱮᱞᱮᱡ ᱫᱟᱨᱟᱢ ᱠᱚᱣᱟᱢ᱾ ᱵᱤᱨ ᱨᱮ, ᱵᱩᱨᱩ ᱨᱮ,ᱫᱮᱥ ᱨᱮ,ᱫᱤᱥᱚᱢ ᱨᱮ,ᱢᱟᱛᱠᱚᱢ ᱜᱮᱞᱮ ᱨᱮ, ᱥᱟᱨᱡᱚᱢ ᱵᱟᱦᱟ ᱨᱮ ᱥᱟᱨᱠᱟᱜ ᱟᱢ ᱥᱟᱹᱜᱩᱱ ᱠᱟᱜ ᱟᱢ᱾ ᱡᱟᱲᱜᱮ ᱫᱟᱜ,ᱡᱟᱹᱲᱤ ᱫᱟᱜ,ᱦᱚᱭ ᱟᱹᱜᱩ,ᱪᱟᱯᱮ ᱟᱹᱜᱩ ᱠᱟᱜ ᱟᱢ᱾ ᱡᱤᱣᱤ ᱡᱟᱹᱛᱤ ᱨᱮ ᱱᱟᱣᱟ ᱫᱟᱲᱮ,ᱨᱟᱹᱥᱠᱟ ᱠᱚᱢ ᱥᱟᱨᱦᱮ ᱠᱟᱜ ᱟᱢ ᱵᱟᱲᱮ᱾ ᱢᱟ ᱛᱚᱵᱮ ᱜᱚᱥᱟᱸᱭ᱾"

ᱵᱚᱸᱜᱟ ᱫᱮᱣᱟ ᱥᱮᱣᱟ ᱥᱟᱹᱛ ᱛᱟᱭᱚᱢ, ᱵᱚᱸᱜᱟ ᱥᱟᱨᱮᱡ ᱥᱚᱲᱮ ᱠᱚ ᱡᱚᱢᱟ,ᱢᱤᱢᱤᱫ ᱪᱩᱠᱛᱤ ᱦᱟᱺᱰᱤ ᱠᱚ ᱧᱩᱭᱟ᱾ ᱚᱱᱟ ᱛᱟᱭᱚᱢ ᱟᱹᱛᱩ ᱫᱤᱥᱚᱢ ᱨᱮᱭᱟᱜ ᱵᱮᱥ ᱵᱟᱹᱲᱤᱡ ᱠᱟᱛᱷᱟ ᱠᱚ ᱜᱟᱞᱢᱟᱨᱟᱣᱟ᱾ ᱟᱨ ᱟᱹᱛᱩ ᱴᱚᱞᱟ ᱨᱮᱱ ᱠᱩᱲᱤ ᱜᱤᱫᱽᱨᱟᱹ ᱠᱚ ᱦᱚᱸ ᱰᱟᱦᱟᱨ ᱮᱱᱮᱡ ᱥᱮᱨᱮᱧ ᱠᱚ ᱢᱮᱛᱟ ᱠᱚᱣᱟ᱾ ᱚᱱᱟ ᱰᱟᱦᱟᱨ ᱥᱮᱨᱮᱧ ᱠᱚ ᱜᱤ ᱯᱤᱲᱦᱤ ᱪᱮᱛᱟᱱ ᱯᱤᱲᱦᱤ ᱟᱸᱡᱚᱢ ᱦᱤᱡᱩᱜ ᱠᱟᱱᱟ᱾ ᱰᱟᱦᱟᱨ ᱮᱱᱮᱡ ᱥᱮᱨᱮᱧ ᱫᱚ ᱠᱩᱲᱤ ᱜᱤᱫᱽᱨᱟᱹ ᱦᱚᱛᱮᱛᱮ ᱟᱹᱛᱩ ᱟᱠᱷᱲᱟ ᱨᱮ, ᱰᱟᱦᱟᱨ ᱨᱮᱜᱮ ᱠᱚ ᱥᱮᱨᱮᱧᱟ᱾

ᱚᱱᱚᱞᱤᱭᱟᱹ ᱰᱨ.ᱠᱨᱤᱥᱬ ᱪᱟᱱᱫᱨᱟ ᱴᱩᱰᱩ(ᱯᱨᱚᱯᱷᱮᱥᱟᱨ)