ᱵᱟᱦᱟ ᱰᱟᱞᱣᱟᱜ

ᱥᱮᱛᱟᱜᱽ

ᱠᱩᱠᱨᱩᱛᱼᱪᱩᱛ ᱫᱮᱥᱮᱰᱮᱨᱮᱫ ᱯᱮ, ᱥᱟᱸᱰᱤ ᱥᱤᱢ ᱠᱚᱞᱮ ᱠᱷᱚᱱ ᱠᱤᱥᱱᱤ ᱫᱟᱨᱮ ᱠᱷᱚᱱ ; ᱦᱳᱼᱦᱳ ᱠᱟᱱ ᱧᱟᱧᱟᱢ ᱠᱟᱱ ᱫᱮᱥᱮ ᱵᱮᱨᱮᱛ ᱯᱮ ᱾

ᱠᱩᱠᱨᱩᱛ ᱪᱩᱛ ᱫᱮᱥᱮ ᱵᱮᱨᱮᱛ ᱯᱮ, ᱥᱤᱧ ᱢᱟ ᱢᱟᱨᱮ ᱠᱟᱹᱢᱤ ᱡᱚᱝ, ᱵᱟᱨᱟᱝ ᱮ ᱢᱟ ᱵᱟᱨᱟᱝ, ᱫᱟᱨᱟ ᱠᱟᱱ ᱥᱤᱧ ᱨᱟᱡ ᱫᱮᱥᱮ ᱵᱮᱨᱮᱛ ᱯᱮ ᱾

ᱠᱩᱠᱨᱩᱛᱼᱪᱩᱛ ᱫᱮᱥᱮ ᱵᱮᱨᱮᱛ ᱯᱮ, ᱪᱮᱢᱮ ᱢᱟ ᱪᱤᱯᱨᱩᱛ, ᱠᱟᱦᱩ ᱢᱟ ᱦᱳ ᱠᱩᱲᱤᱛ, ᱫᱮᱥᱮ ᱵᱮᱨᱮᱛ ᱯᱮ ᱾

ᱠᱩᱠᱨᱩᱛᱼᱪᱩᱛ ᱫᱮᱥᱮ ᱵᱮᱨᱮᱛ ᱯᱮ ᱾ ᱥᱤᱨᱡᱚᱱ ᱢᱟ ᱪᱮᱛᱟᱱ ᱮᱱ, ᱰᱟᱰ ᱨᱮᱦᱚᱸ ᱜᱷᱩᱨᱟᱣ ᱮᱱ, ᱠᱩᱲᱭᱟ ᱢᱚᱱ ᱪᱮᱫᱟᱜ ᱦᱳ, ᱫᱮᱥᱮ ᱵᱮᱨᱮᱛ ᱯᱮ ᱾

ᱠᱩᱠᱨᱩᱛᱼᱪᱩᱛ ᱫᱮᱥᱮ ᱵᱮᱨᱮᱛ ᱯᱮ, ᱵᱮᱨᱮᱛ ᱯᱮ ᱠᱟᱥᱱᱟᱣ ᱯᱮ ᱠᱟᱹᱢᱤ ᱡᱚᱝ ᱮᱦᱚᱯ ᱯᱮ, ᱟᱠᱤᱞ ᱦᱚᱨ ᱯᱟᱸᱡᱟᱭ ᱨᱮ, ᱫᱮᱥᱮ ᱵᱮᱨᱮᱛ ᱯᱮ ᱾

ᱠᱩᱠᱨᱩᱛᱼᱪᱩᱛ ᱫᱮᱥᱮ ᱵᱮᱨᱮᱛ ᱯᱮ, ᱢᱟᱱᱣᱟ ᱦᱳ ᱟᱯᱮ ᱪᱮᱠᱟᱛᱮ ᱵᱟᱯᱮ ᱵᱩᱡᱷ, ᱞᱟᱦᱟ ᱥᱮᱱ ᱢᱚᱦᱰᱟᱜ ᱨᱮ; ᱫᱮᱥᱮ ᱵᱮᱨᱮᱛ ᱯᱮ ᱾

ᱵᱟᱦᱟ ᱰᱟᱞᱣᱟᱜ :- ᱯᱟᱩᱞ ᱡᱩᱡᱷᱟᱨ ᱥᱚᱨᱮᱱ

᱒.ᱥᱮᱛᱟᱜ ᱠᱚᱭᱡᱚᱝ

ᱫᱮᱞᱟ ᱵᱚᱱ ᱡᱚᱦᱟᱨᱟᱭ ᱱᱚᱣᱟ ᱥᱮᱛᱟᱜ ᱨᱮ ᱾ ᱥᱤᱥᱤᱨ ᱡᱟᱣᱤᱜ ᱜᱳᱴᱟ ᱧᱤᱫᱟᱹ, ᱦᱚᱨᱦᱚ ᱟᱠᱟᱫ ᱵᱩᱱᱟᱭ ᱾ ᱚᱥᱟᱵᱦᱟᱲᱫᱟᱭᱟᱵ, ᱢᱟᱞᱤᱠ ᱚᱞ ᱥᱮᱨᱢᱟ ᱨᱮ ᱾ ᱵᱟᱯᱩᱲᱤᱪ ᱛᱟᱢ ᱜᱩᱛᱤ ᱠᱚ, ᱥᱟᱨᱦᱟᱣ ᱟᱛᱟᱝ ᱛᱟᱞᱮᱢᱮ ᱾

ᱟᱢ ᱦᱚᱨᱦᱚ ᱞᱮᱢᱮ ᱫᱟᱭᱟ ᱫᱟᱭᱟ ᱫᱩᱞᱟᱹᱲ ᱛᱟᱢ ᱛᱮ ᱾ ᱜᱳᱴᱟ ᱥᱤᱸᱜᱮ ᱟᱹᱭᱩᱨ ᱞᱮᱢᱮ ᱵᱩᱜᱤ-ᱠᱟᱹᱢᱤ ᱠᱚᱨᱮ ᱾

ᱵᱩᱫᱷᱤ ᱟᱹᱠᱤᱞ ᱮᱢᱟ ᱞᱮᱢ ᱟᱢ ᱵᱟᱲᱟᱭ ᱱᱮᱢᱟ ᱞᱮᱢ ᱾ ᱢᱤᱢᱤᱫ ᱠᱚᱣᱟᱜ ᱢᱚᱛᱞᱚᱵ ᱟᱢᱜᱮ ᱯᱩᱨᱟᱹᱣ-ᱠᱟᱢ ᱾

ᱥᱳᱦᱟᱭ ᱮᱢᱟ ᱞᱮᱢ ᱟᱢ ᱠᱟᱹᱢᱤ ᱠᱚ ᱛᱟᱞᱮ ᱾ ᱨᱟᱹᱥᱠᱟᱹ ᱢᱚᱱᱮ-ᱛᱮ ᱚᱬᱦᱮᱸ ᱢᱮᱞᱮ ᱠᱟᱹᱢᱤ ᱢᱩᱪᱟᱹᱫ ᱨᱮ ᱾

᱓.ᱥᱚᱱᱚᱛ ᱦᱚᱲ ᱟᱨ ᱫᱟᱸᱫᱤ ᱦᱚᱲ

ᱵᱟᱹᱲᱤᱪ ᱦᱚᱲ ᱥᱟᱶ ᱥᱮ ᱞᱮᱫᱚᱜ, ᱩᱱᱠᱩ ᱥᱟᱶᱛᱮ ᱠᱮᱫᱚᱜᱮᱠᱚ; ᱵᱟᱹᱜᱤ ᱮᱫᱟᱭ ᱡᱟᱦᱟᱸᱭ ᱜᱮ, ᱱᱤᱪᱷᱳᱠ ᱫᱚ ᱩᱱᱤᱜᱮ ᱾

ᱦᱤᱥᱠᱟ ᱦᱚᱞᱚᱝ ᱨᱤᱡᱷ-ᱨᱳᱲ, ᱵᱦᱟᱜᱣ ᱮᱫᱟᱭ ᱩᱱᱤ ᱪᱚᱝ ᱾

ᱛᱚᱱ ᱢᱚᱱ ᱥᱟᱯᱷᱟ ᱦᱚᱲ, ᱢᱚᱡ ᱠᱟᱹᱢᱤ ᱥᱮᱵᱮᱞ ᱨᱚᱲ ᱾

ᱱᱚᱣᱟ ᱠᱚ ᱤᱥᱚᱨ ᱴᱷᱮᱱ, ᱥᱮᱴᱮᱨᱚᱜ ᱟᱭ ᱱᱤᱨᱢᱟᱲ ᱾ ᱫᱷᱚᱱ ᱢᱚᱱ ᱢᱤᱛ ᱴᱷᱮᱱ, ᱯᱷᱟᱨᱟᱠ ᱜᱮᱭᱟ ᱤᱥᱚᱨ ᱠᱷᱚᱱ ᱾

ᱥᱩᱞᱩᱠ ᱱᱤᱨᱟᱹᱭ ᱞᱟᱜᱟᱭᱟᱭ, ᱡᱟᱦᱟᱸ ᱨᱮᱜᱮ ᱱᱚᱝᱠᱟ, ᱚᱵᱷᱟᱜᱤᱭᱟᱹ ᱩᱱᱤ ᱪᱚ ᱾

᱔.ᱟᱹᱛᱩᱜ ᱫᱟᱜ ᱢᱟ ᱜᱚᱰᱳ-ᱜᱚᱰᱳ

ᱟᱹᱛᱩᱜ ᱫᱟᱜ ᱢᱟ ᱜᱚᱰᱳ-ᱜᱚᱰᱳ, ᱞᱮᱜᱮᱢ-ᱞᱮᱜᱮᱢ ᱟᱹᱛᱩᱜ ᱜᱟᱰᱟ ᱾

ᱟᱡ ᱢᱚᱛᱚ ᱜᱮ ᱪᱟᱞᱟᱜ ᱠᱟᱱᱟ, ᱵᱟᱹᱭᱦᱟᱹᱲ ᱵᱩᱨᱩ ᱯᱟᱨᱚᱢ ᱠᱟᱛᱮᱜ ᱾ ᱟᱹᱛᱷᱟᱱ ᱫᱟᱜ ᱥᱟᱶ ᱧᱟᱯᱟᱢ ᱢᱮᱛᱮ, ᱨᱩᱣᱟᱲ ᱵᱟᱝᱜᱮ ᱚᱱᱟ ᱫᱟᱜ ᱫᱚ ᱾ ᱟᱹᱛᱩᱜ ᱫᱟᱜ ᱫᱚ ᱜᱚᱰᱳ-ᱜᱚᱰᱳ ᱾

ᱟᱹᱛᱩᱜ ᱫᱟᱜ ᱢᱟ ᱜᱚᱰᱳ-ᱜᱚᱰᱳ ᱾ ᱠᱚᱭᱚᱲ-ᱠᱚᱭᱚᱲ ᱟᱹᱛᱩᱜ ᱜᱟᱰᱟ, ᱪᱟᱞᱟᱣ ᱮᱠᱷᱮᱱ ᱵᱟᱰᱟᱭ ᱚᱱᱟ, ᱢᱟᱱᱣᱟ ᱡᱤᱣᱤ ᱫᱟᱜ ᱦᱚᱸ ᱱᱚᱝᱠᱟ ᱾ ᱫᱤᱱᱟᱹᱢ-ᱜᱮᱪᱚ ᱪᱟᱞᱟᱜ ᱠᱟᱱᱟᱝ, ᱨᱩᱣᱟᱲ ᱢᱟ ᱵᱟᱰᱟᱭ ᱵᱟᱪᱚ ᱟᱹᱛᱩᱜ ᱫᱟᱜ ᱢᱟ ᱜᱚᱰᱳ-ᱜᱚᱰᱳ ᱾

ᱟᱹᱛᱩᱜ ᱫᱟᱜ ᱢᱟ ᱜᱚᱰᱳ-ᱜᱚᱰᱳ ᱾ ᱫᱤᱱᱟᱹᱢ ᱜᱮᱪᱚ ᱪᱟᱯᱟᱜ ᱠᱟᱱᱟ, ᱵᱤᱱ ᱢᱩᱪᱟᱹᱫᱚᱜ ᱚᱠᱛᱮ ᱴᱷᱮᱱ ᱦᱚᱸ ᱥᱟᱹᱨᱤ ᱢᱟᱱᱣᱟ ᱡᱤᱣᱤ ᱫᱟᱜ ᱪᱚ ᱾ ᱚᱦᱟᱭ ᱢᱟᱱᱣᱟ ᱡᱤᱣᱤ ᱦᱚᱸᱪᱚ ᱾ ᱫᱟᱜᱢᱟ ᱞᱮᱠᱟ ᱜᱚᱰᱳ-ᱜᱚᱰᱳ ᱾

ᱟᱹᱛᱩᱜ ᱫᱟᱜ ᱢᱟ ᱜᱚᱰᱳ-ᱜᱚᱰᱳ ᱾ ᱟᱹᱛᱩᱜ ᱫᱟᱜ ᱢᱟ ᱜᱚᱰᱳ-ᱜᱚᱰᱳ ᱾ ᱥᱮᱨᱮᱧ ᱪᱟᱞᱟᱜ ᱥᱤᱧ ᱟᱨ ᱧᱤᱫᱟᱹ, ᱩᱯᱠᱟᱨ ᱮᱫᱟᱭ ᱦᱚᱲᱟᱜ, ᱜᱟᱰᱟ ᱾ ᱥᱤᱛᱩᱝ ᱡᱷᱟᱡ ᱨᱮ ᱫᱟᱜ ᱮᱢᱚᱜ-ᱮ, ᱫᱩᱣᱟᱸ ᱨᱮᱢᱟ ᱠᱩᱞᱤ ᱮᱢᱚᱜ ᱾ ᱥᱟᱞᱟᱜ ᱥᱮᱨᱮᱧ ᱥᱤᱧ-ᱧᱤᱫᱟᱹ ᱪᱚ, ᱟᱹᱛᱩᱜ ᱫᱟᱜ ᱢᱟ ᱜᱚᱰᱳ-ᱜᱚᱰᱳ ᱾

ᱫᱟᱜ ᱢᱟ ᱱᱟᱛᱩᱜ ᱜᱚᱰᱳ-ᱜᱚᱰᱳ, ᱢᱟᱱᱣᱟ ᱡᱤᱣᱤ ᱫᱤᱥᱟᱭ ᱢᱮ ᱟᱢ ᱾ ᱥᱮᱨᱮᱧ ᱪᱟᱞᱟᱜ ᱫᱩᱞᱩᱜ ᱜᱮᱭᱮᱭ; ᱠᱷᱟᱪᱩᱜ ᱫᱩᱞᱟᱹᱲ ᱠᱩᱥᱤ ᱢᱚᱱᱛᱮ, ᱵᱚᱭᱦᱟᱢ ᱠᱟᱹᱢᱤ ᱩᱥᱟᱹᱨᱟ ᱫᱮ ᱾ ᱥᱮᱥ ᱨᱮ ᱮᱱᱠᱷᱟᱱ ᱫᱚᱨᱭᱟ ᱨᱮᱪᱚ, ᱫᱟᱜ ᱞᱮᱠᱟ ᱜᱮ ᱜᱚᱰᱳ-ᱜᱚᱰᱳ ᱾

᱕. ᱟᱥᱤᱱ ᱟᱹᱭᱩᱵ

ᱟᱹᱭᱩᱵ ᱥᱤᱸᱜᱟᱲᱚᱜ ᱡᱚᱦᱚᱜ,

ᱟᱭᱠᱟᱣᱜ ᱟᱹᱰᱤ ᱛᱮᱛ ᱜᱮ ᱢᱚᱡ,

ᱚᱲᱮᱪ ᱨᱤᱢᱤᱞ ᱟᱨ ᱥᱮᱨᱢᱟ ᱾

ᱵᱮᱱᱟᱣ ᱣᱟᱠᱤᱱ ᱟᱹᱰᱤ ᱞᱮᱠᱟ ᱢᱚᱡ ᱫᱩᱥᱱᱟᱣ ᱠᱚ,

ᱨᱤᱢᱤᱞ ᱜᱮ ᱵᱩᱨᱩ ᱨᱟᱛᱟᱝ,

ᱫᱚᱨᱭᱟ ᱟᱨ ᱮᱛᱟᱝ ᱮᱛᱟᱝ,

ᱢᱤᱢᱤᱛ ᱢᱟ ᱫᱤᱥᱚᱢ ᱛᱮ,

ᱡᱟᱞᱟ ᱯᱩᱨᱤ ᱟᱲᱮ-ᱨᱮ ᱾

ᱧᱮᱞᱚᱜ ᱟᱹᱭᱩᱵ ᱥᱮᱨᱢᱟ ᱨᱮ ᱾

ᱜᱷᱟᱱᱮ ᱨᱤᱢᱤᱞ ᱫᱟᱨᱮ ᱠᱚ,

ᱢᱟᱛ ᱜᱷᱟᱥ ᱜᱟᱡᱟᱲ ᱵᱚᱸᱜᱟ ᱦᱚᱸ ᱾

ᱚᱲᱟ ᱞᱟᱹᱣᱠᱟᱹ ᱵᱟᱫᱚᱢ,

ᱢᱤᱛ ᱞᱟᱹᱴᱩ ᱠᱟᱛᱤᱪ ᱟᱫᱚᱢ ᱾

ᱦᱟᱸᱥ ᱜᱮ ᱰᱚᱸᱵᱚᱞ ᱵᱟᱲᱟᱭ ᱫᱚ,

ᱵᱮᱱᱟᱣ ᱰᱟᱦᱟᱨ ᱢᱟ ᱚᱠᱟ,

ᱧᱮᱞᱚᱜ ᱜᱷᱟᱱᱮ ᱨᱤᱢᱤᱞ ᱢᱟ ᱾

ᱵᱩᱨᱩ ᱫᱮᱡᱚᱜ ᱦᱚᱲ ᱵᱟᱨᱟᱝ,

ᱧᱮᱞᱚᱜ ᱟᱹᱰᱤ ᱫᱟᱜᱮ ᱫᱟᱜ ᱾

ᱫᱩᱨᱮ ᱵᱮᱡᱟᱭ ᱞᱟᱦᱨᱟ,

ᱜᱷᱟᱱᱮ ᱫᱚᱨᱭᱟ ᱧᱮᱞᱚᱜ,

ᱯᱮᱨᱮᱪ ᱵᱤᱱ ᱛᱮ ᱠᱟᱨᱭᱟ ᱫᱟᱜ ᱾

ᱞᱮᱠᱳᱱ ᱚᱱᱩᱢᱚᱜ ᱠᱚ ᱠᱟᱱ-ᱠᱚ,

ᱴᱟᱺᱰᱤ ᱛᱮ ᱚᱰᱚᱠ ᱦᱚᱸ ;

ᱱᱤᱯᱟᱴ ᱜᱮ ᱧᱮᱞᱚᱜ-ᱟ ᱾

ᱜᱷᱟᱱᱮᱠ ᱧᱮᱞᱚᱜ ᱡᱚᱛᱚᱣᱟᱜ,

ᱟᱭᱟᱱ ᱫᱟᱜ ᱨᱮ ᱩᱱᱩᱢᱚᱜ ᱾

ᱫᱤᱥᱚᱢ ᱵᱩᱨᱩ ᱵᱤᱱ ᱞᱟᱣᱟᱠ,

ᱟᱣᱨᱤ ᱥᱟᱱᱟᱢ ᱜᱮ ᱢᱤᱪᱦᱟ,

ᱠᱚᱴ. ᱮᱱ ᱦᱚᱲ ᱡᱚᱴᱚ ᱤᱱᱟᱹ ᱾

ᱞᱟᱹᱭᱟᱧ ᱯᱮᱪᱮ ᱡᱟᱦᱟᱸᱭ ᱫᱮ,

ᱱᱚᱝᱠᱟ ᱪᱮᱛ ᱠᱚ ᱤᱭᱟᱛᱮ ᱾

ᱥᱮᱪᱮᱛ ᱡᱟᱸᱦᱟ ᱫᱟᱨᱮᱭᱟᱜ,

ᱫᱤᱥᱚᱢ ᱵᱩᱨᱩ ᱜᱟᱰᱟ ᱥᱟᱶ,

ᱥᱮ ᱮᱱᱮᱛᱮ ᱵᱷᱩᱞ ᱢᱮᱛ ᱨᱮᱭᱟᱜ,

ᱦᱩᱫᱤᱥ ᱫᱟᱲᱮ ᱢᱚᱱ ᱫᱚ,

ᱵᱟᱨ ᱜᱮ ᱚᱛ ᱠᱚ ᱪᱤᱱᱦᱟ ᱠᱚᱞᱮᱴ ᱯᱮ,

ᱫᱩᱨᱮ ᱪᱮᱠᱟ ᱛᱮ ᱾