ᱵᱟᱯᱞᱟ
ᱵᱟᱯᱞᱟ ᱫᱚ ᱡᱤᱭᱚᱱ ᱨᱮᱱᱟᱜ ᱟᱹᱰᱤ ᱢᱟᱨᱟᱝ ᱢᱤᱫᱴᱟᱹᱝ ᱠᱟᱹᱢᱤ ᱦᱚᱨᱟ ᱠᱟᱱᱟ ᱾ ᱥᱟᱶᱛᱟ ᱛᱟᱞᱟᱨᱮ ᱢᱮᱱᱟᱜ ᱠᱚ ᱡᱚᱛᱚ ᱠᱚᱜᱮ ᱛᱮᱦᱮᱧ ᱵᱟᱝᱠᱷᱟᱱ ᱜᱟᱯᱟ
ᱵᱟᱯᱞᱟᱜ ᱞᱟᱜᱟᱣ ᱟᱠᱚᱣᱟ ᱾ ᱟᱨ ᱦᱚᱲᱟᱜ ᱵᱟᱯᱞᱟ ᱫᱚ ᱟᱹᱰᱤᱜᱮ ᱨᱟᱹᱥᱠᱟᱹ ᱟᱨ ᱥᱚᱨᱮᱥ ᱜᱮᱭᱟ ᱾ ᱥᱟᱶᱛᱟ ᱛᱟᱞᱟ ᱨᱮ ᱨᱟᱹᱥᱠᱟᱹ ᱨᱮᱱᱟᱜ ᱢᱤᱫᱴᱟᱹᱝ ᱞᱟᱹᱴᱩ ᱩᱯᱟᱹᱭ ᱾ ᱥᱮᱫᱟᱭ ᱞᱮᱠᱟ ᱵᱟᱯᱞᱟ ᱵᱟᱝ ᱦᱩᱭᱩᱜ ᱠᱟᱱ ᱨᱮᱦᱚᱸ ᱱᱮᱛᱟᱨ ᱦᱚᱸ ᱦᱚᱲ ᱵᱟᱯᱞᱟ ᱨᱮᱱᱟᱜ ᱥᱚᱨᱮᱥ ᱫᱚ ᱢᱮᱱᱟᱜ ᱜᱮᱭᱟ ᱾ ᱱᱟᱶᱟ ᱡᱩᱜᱽ ᱵᱚᱞᱚᱭᱮᱱ ᱠᱷᱟᱹᱛᱤᱨ ᱵᱟᱯᱞᱟ ᱨᱮᱱᱟᱜ ᱱᱤᱭᱚᱢ ᱠᱟᱹᱱᱩᱱᱠᱚ ᱦᱚᱸ ᱱᱟᱥᱮ-ᱱᱟᱥᱮ ᱵᱚᱫᱚᱞᱚᱜ ᱛᱮᱜᱮ ᱢᱮᱱᱟᱜᱼᱟ ᱾ ᱟᱨᱦᱚᱸ ᱠᱤᱪᱷᱩ-ᱠᱤᱪᱷᱩ ᱵᱟᱯᱞᱟ ᱫᱚ ᱥᱟᱶᱛᱟ ᱞᱟᱹᱜᱤᱫ ᱵᱟᱝ ᱵᱷᱟᱜᱮᱭᱛᱮ ᱟᱫ ᱪᱟᱵᱟᱭᱮᱱᱟ ᱾ ᱥᱟᱶᱛᱟ ᱛᱟᱞᱟᱨᱮ ᱛᱤᱱᱟᱜ ᱨᱚᱠᱚᱢ ᱵᱟᱯᱞᱟ ᱛᱟᱸᱦᱮᱸᱞᱮᱱᱟ ᱥᱮ ᱱᱮᱛᱟᱨᱦᱚᱸ ᱢᱮᱱᱟᱜ ᱜᱮᱭᱟ ᱚᱱᱟ ᱠᱚ ᱞᱟᱛᱟᱨ ᱨᱮ ᱜᱟᱞᱢᱟᱨᱟᱣ ᱥᱚᱫᱚᱨᱮᱱᱟ :
ᱟᱭᱢᱟ ᱯᱚᱛᱚᱵᱠᱚ ᱧᱮᱞ ᱠᱟᱛᱮᱜ ᱥᱮ ᱥᱟᱶᱛᱟᱨᱮᱱ ᱯᱚᱱᱰᱤᱛᱠᱚ/ᱱᱟᱜᱟᱢᱤᱭᱟ ᱴᱷᱮᱱ ᱟᱭᱢᱟ ᱨᱚᱠᱚᱢ ᱵᱟᱯᱞᱟ ᱨᱮᱱᱟᱜ ᱠᱟᱛᱷᱟ ᱠᱚ ᱢᱮᱱᱴᱚᱠᱟᱣ ᱠᱟᱫᱟ ᱾ ᱯᱟᱹᱪᱷᱤᱢ ᱵᱟᱝᱞᱟ ᱨᱤᱱ ᱟᱹᱰᱤ ᱢᱟᱨᱟᱝ ᱚᱱᱚᱞᱤᱭᱟᱹ ᱫᱷᱤᱨᱮᱱᱫᱽᱨᱚᱱᱟᱛᱷ ᱵᱟᱥᱠᱮ ᱩᱱᱤᱭᱟᱜ ᱦᱚᱲ ᱵᱟᱯᱞᱟ ᱥᱮᱨᱮᱧ ᱯᱩᱛᱷᱤᱨᱮ ᱤᱨᱟᱹᱞ ᱜᱚᱴᱟᱝ ᱵᱟᱯᱞᱟ ᱨᱮᱱᱟᱜ ᱠᱟᱛᱷᱟᱭ ᱞᱟᱹᱭ ᱟᱠᱟᱫᱟ ᱾ ᱚᱱᱟ ᱠᱚᱫᱚ ᱦᱩᱭᱩᱜ ᱠᱟᱱᱟ ᱺ-
᱑. ᱥᱟᱹᱰᱟᱹᱭ ᱵᱟᱯᱞᱟ ᱥᱮ ᱫᱩᱣᱟᱹᱨ ᱥᱤᱸᱫᱩᱨ ᱵᱟᱯᱞᱟ
᱒. ᱴᱩᱝᱠᱤ ᱫᱤᱯᱤᱞ ᱵᱟᱯᱞᱟ
᱓. ᱧᱤᱨ ᱵᱚᱞᱚᱜ ᱵᱟᱯᱞᱟ
᱔. ᱚᱨ ᱟᱫᱮᱨ ᱵᱟᱯᱞᱟ
᱕. ᱜᱷᱚᱨ ᱡᱟᱸᱣᱟᱸᱭ ᱵᱟᱯᱞᱟ
᱖. ᱜᱷᱟᱹᱨᱫᱤ ᱡᱟᱸᱣᱟᱸᱭ ᱵᱟᱯᱞᱟ
᱗. ᱤᱯᱩᱛᱩᱛ ᱵᱟᱯᱞᱟ
᱘. ᱪᱟᱹᱣᱰᱟᱹᱞ ᱵᱟᱯᱞᱟ
www.santhaledisom.com ᱨᱮ ᱟᱨᱦᱚᱸ ᱠᱤᱪᱷᱩ ᱵᱟᱯᱞᱟ ᱨᱮᱱᱟᱜ ᱧᱩᱛᱩᱢ ᱧᱟᱢ ᱮᱱᱟ ᱾ ᱚᱱᱟ ᱠᱚᱫᱚ ᱦᱩᱭᱩᱜ ᱠᱟᱱᱟ :-
᱑. ᱥᱟᱸᱜᱷᱟ ᱵᱟᱯᱞᱟ
᱒. ᱠᱟᱫᱟᱢ ᱵᱟᱯᱞᱟ
᱓. ᱠᱤᱨᱤᱧ ᱵᱟᱯᱞᱟ
᱔. ᱩᱯᱟᱹᱜᱤᱨ ᱵᱟᱯᱞᱟ
᱕. ᱫᱤᱠᱩ ᱵᱟᱯᱞᱟ
᱖. ᱥᱟᱸᱜᱮ ᱵᱟᱹᱨᱤᱭᱟᱹᱛ
᱗. ᱦᱟᱲᱟᱢ ᱵᱟᱹᱨᱤᱭᱟᱹᱛ
ᱥᱟᱶᱛᱟ ᱛᱟᱞᱟᱨᱮ ᱟᱨᱦᱚᱸ ᱠᱤᱪᱷᱩ ᱵᱟᱯᱞᱟ ᱨᱮᱱᱟᱜ ᱧᱩᱛᱩᱢᱠᱚ ᱟᱸᱡᱚᱢᱚᱜᱼᱟ ᱾ ᱚᱱᱟᱠᱚᱫᱚ ᱦᱩᱭᱩᱜ ᱠᱟᱱᱟ :-
᱑. ᱦᱚᱨᱚᱜ ᱵᱟᱯᱞᱟ
᱒. ᱫᱟᱹᱣᱲᱟᱹ ᱵᱟᱯᱞᱟ
᱓. ᱯᱟᱹᱴᱤᱭᱟᱹ ᱵᱟᱯᱞᱟ
᱔. ᱛᱷᱟᱹᱨᱤ ᱵᱟᱯᱞᱟ
᱕. ᱠᱩᱢᱵᱟᱹ ᱩᱭᱩᱝ ᱵᱟᱯᱞᱟ