ᱵᱮᱵᱷᱟᱨᱤᱭᱟᱹ:Fagu Baskey/sandbox/ᱟᱹᱲᱟᱹ ᱥᱟᱶ ᱤᱧ

ᱚᱱᱚᱬᱦᱮ

ᱚᱱᱚᱬᱦᱮ ᱫᱚ ᱟᱦᱟᱨ ᱫᱟᱜ ᱪᱮᱛᱟᱱ ᱪᱮᱛᱟᱱ ᱛᱮ ᱯᱟᱭᱨᱟᱜ ᱠᱚᱫᱚ ᱪᱮᱫ ᱦᱚᱸ ᱵᱟᱠᱚ ᱧᱟᱢᱟ,

ᱵᱷᱤᱛᱨᱤ ᱯᱟᱭᱨᱟ ᱵᱚᱞᱚᱱ ᱠᱚᱫᱚ ᱚᱣᱟᱨ ᱡᱚᱝᱟ ᱠᱚ ᱦᱟᱹᱠᱩ, ᱠᱟᱴᱠᱚᱢ, ᱜᱚᱝᱜᱷᱟ, ᱨᱚᱠᱚᱡ ᱾

ᱚᱱᱚᱬᱦᱮ ᱫᱚ ᱪᱤᱱᱟᱹ ᱵᱟᱫᱟᱢ ᱪᱮᱛᱟᱱ ᱨᱮ ᱦᱟᱛᱣᱟ ᱵᱟᱲᱟᱭ ᱠᱚᱫᱚ ᱪᱮᱫ ᱦᱚᱸ ᱵᱟᱠᱚ ᱧᱟᱢᱟ,

ᱵᱷᱤᱛᱨᱤ ᱨᱮ ᱯᱟᱱᱛᱮ ᱠᱚᱫᱚ ᱞᱟ ᱚᱰᱚᱠ ᱡᱚᱝᱟ ᱠᱚ ᱵᱟᱫᱟᱢ ᱫᱟ ᱾

ᱵᱷᱟᱵᱽᱱᱟ ᱵᱟᱜᱟᱱ

ᱵᱷᱟᱵᱽᱱᱟ ᱵᱟᱜᱟᱱ ᱨᱮ ᱤᱧ ᱫᱚ ᱫᱟᱲᱟᱱᱤᱡ,

ᱱᱚᱶᱟ ᱵᱟᱜᱟᱱ ᱨᱮ ᱫᱟᱲᱟᱱ ᱛᱩᱞᱩᱡ ᱟᱹᱲᱟᱹ ᱠᱚ ᱥᱟᱶ ᱧᱟᱯᱟᱢ ᱦᱩᱭᱩᱜ ᱟᱹᱲᱟᱹ ᱠᱚ ᱛᱚᱞ ᱥᱟᱢᱴᱟᱣ ᱠᱚ ᱤᱧ ᱫᱚᱸᱧ ᱨᱤᱠᱟᱹᱭ ᱾

ᱵᱷᱟᱵᱽᱱᱟ ᱵᱟᱜᱟᱱ ᱠᱷᱚᱱᱟᱜ ᱟᱹᱲᱟᱹ ᱵᱟᱦᱟ ᱦᱟᱞᱝ ᱡᱟᱣᱨᱟ ᱠᱟᱛᱮ ᱤᱧ ᱫᱚ ᱵᱟᱦᱟ ᱜᱟᱞᱟᱝ ᱜᱮᱧ ᱨᱤᱠᱟᱹ ᱟᱠᱟᱫ,

ᱚᱱᱟ ᱵᱮᱜᱚᱨ ᱤᱧ ᱫᱚ ᱟᱨ ᱪᱮᱫ ᱦᱚᱸ ᱵᱟᱹᱧ ᱪᱤᱠᱟᱹ ᱟᱠᱟᱫ ᱾

ᱥᱟᱹᱲᱤ

ᱯᱷᱟᱹᱜᱩᱱ ᱮ ᱵᱟᱸᱫᱮᱭᱟ ᱟᱨᱟᱜ ᱥᱟᱹᱲᱤ ᱟᱡᱟᱜ ᱥᱟᱹᱲᱤ ᱩᱱᱟᱹᱜ ᱪᱚᱨᱚᱠ ᱚᱱᱰᱮ ᱵᱷᱟᱶᱟᱨ ᱠᱚ ᱟᱵᱚᱜ ᱟᱡᱟᱜ ᱥᱟᱹᱲᱤ ᱠᱚ ᱪᱚᱜᱟᱜ ᱾

ᱫᱷᱩᱥᱟᱹᱨ ᱥᱟᱹᱲᱤ ᱵᱟᱸᱫᱮ ᱠᱟᱛᱮ ᱵᱟᱹᱭᱥᱟᱹᱠ ᱮ ᱦᱤᱡᱩᱜ ᱥᱤᱧ ᱪᱟᱸᱫᱚ'ᱟᱜ ᱨᱟᱯ ᱛᱮ ᱟᱡᱟᱜ ᱥᱟᱹᱲᱤ ᱚᱲᱮᱡᱚᱜ ᱾

ᱦᱤᱡᱩᱜ-ᱟᱭ ᱟᱥᱟᱲ ᱵᱟᱸᱫᱮ ᱠᱟᱛᱮ ᱦᱟᱹᱨᱭᱟᱹᱲ ᱥᱟᱹᱲᱤ ᱟᱭᱟᱜ ᱥᱟᱹᱲᱤ ᱨᱮ ᱛᱟᱦᱮᱸᱱᱟ ᱨᱚᱝ ᱵᱮᱨᱚᱝ ᱵᱟᱦᱟ ᱪᱷᱟᱯ ᱾

ᱠᱩᱥᱤᱭᱟᱜ-ᱟᱭ ᱫᱟᱥᱟᱸᱭ ᱯᱩᱸᱰ ᱥᱟᱹᱲᱤ ᱯᱩᱸᱰ ᱥᱟᱹᱲᱤ ᱨᱮᱭᱟᱜ ᱛᱩᱞᱟᱹᱢ ᱚᱴᱟᱝᱚᱜ-ᱟ ᱢᱤᱨᱛᱤᱠᱟ ᱜᱚᱴᱟ ᱯᱟᱞᱮ ᱫᱟᱥᱟᱸᱭ ᱵᱟᱱᱩᱜ ᱮ ᱛᱟᱭ ᱡᱟᱶᱟᱭ !

ᱟᱜᱷᱟᱬ ᱮ ᱵᱟᱸᱫᱮᱭᱟ ᱡᱟᱸᱡᱟᱜ ᱥᱟᱹᱲᱤ ᱚᱱᱟ ᱥᱟᱹᱲᱤ ᱨᱮ ᱠᱷᱚᱧᱡᱟ ᱠᱚᱜ-ᱟ ᱦᱩᱰᱤᱧ ᱦᱩᱰᱤᱧ ᱦᱤᱨᱟᱹ ᱵᱟᱹᱛᱤ ᱾

ᱢᱟᱜᱽ ᱮ ᱦᱤᱡᱩᱜ-ᱟ ᱵᱟᱸᱫᱮ ᱠᱟᱛᱮ ᱥᱟᱥᱟᱝ ᱥᱟᱹᱲᱤ ᱤᱠᱷᱟᱹᱱ ᱦᱟᱭ! ᱟᱫᱷᱟ ᱫᱤᱱ ᱨᱮᱜᱮ ᱚᱱᱟ ᱥᱟᱹᱲᱤ ᱵᱷᱟᱸᱫᱩᱲᱮᱱ ᱛᱟᱭ ᱾

ᱚᱥᱟᱹᱜᱩᱱ

ᱰᱟᱹᱨᱤ ᱦᱚᱸᱭ ᱡᱤᱭᱟᱹᱞᱤ ᱠᱟᱱ ᱢᱮᱨᱚᱢ ᱦᱚᱸᱭ ᱡᱤᱭᱟᱹᱞᱤ ᱠᱟᱱ ᱵᱷᱤᱰᱤ ᱦᱚᱸᱭ ᱡᱤᱭᱟᱹᱞᱤ ᱞᱟᱱ ᱯᱩᱥᱤ ᱦᱚᱸᱭ ᱡᱤᱭᱟᱹᱞᱤ ᱠᱟᱱ,

ᱡᱟᱦᱟᱸ ᱥᱮᱫ ᱥᱮᱱᱚᱜ ᱡᱚᱠᱷᱮᱡ ᱰᱟᱹᱨᱤ, ᱢᱮᱨᱚᱢ, ᱵᱷᱤᱰᱤ ᱟᱢ ᱢᱟᱬᱟᱝ ᱛᱮᱠᱚ ᱫᱟᱹᱲ ᱯᱟᱨᱚᱢ ᱞᱮᱱᱠᱷᱟᱱ ᱚᱥᱟᱹᱜᱩᱱ ᱫᱚ ᱵᱟᱭ ᱦᱩᱭᱩᱜ,

ᱯᱩᱥᱤ ᱟᱢ ᱢᱟᱬᱟᱝ ᱛᱮ ᱫᱟᱹᱲ ᱯᱟᱨᱚᱢ ᱞᱮᱱᱠᱷᱟᱱ ᱚᱥᱟᱹᱜᱩᱱ ᱦᱩᱭᱩᱜ ᱪᱮᱫᱟᱜ?

᱒

ᱯᱚᱛᱟᱢ ᱦᱚᱸᱭ ᱪᱮᱬᱮ ᱠᱟᱱ ᱠᱤᱥᱱᱤ ᱦᱚᱸᱭ ᱪᱮᱬᱮ ᱠᱟᱱ ᱠᱚᱭᱮᱞ ᱦᱚᱸᱭ ᱪᱮᱬᱮ ᱠᱟᱱ ᱯᱤᱭᱚ ᱦᱚᱸᱭ ᱪᱮᱬᱮ ᱠᱟᱱ,

ᱯᱚᱛᱟᱢ, ᱠᱤᱥᱱᱤ, ᱠᱚᱭᱮᱞ ᱟᱢ ᱥᱩᱨ ᱨᱮᱠᱚ ᱨᱟᱜᱽ ᱠᱷᱟᱱ ᱚᱥᱟᱹᱜᱩᱱ ᱫᱚ ᱵᱟᱭ ᱦᱩᱭᱩᱜ,

ᱯᱤᱭᱚ ᱪᱮᱬᱮᱭ ᱨᱟᱜᱽ ᱠᱷᱟᱱ ᱚᱥᱟᱹᱜᱩᱱ ᱦᱩᱭᱩᱜ ᱪᱮᱫᱟᱜ?

ᱡᱤᱭᱚᱱ ᱰᱷᱚᱸᱜᱟ

ᱡᱤᱭᱚᱱ ᱰᱷᱚᱸᱜᱟ ᱫᱚᱛᱤᱧ ᱞᱤᱵ ᱞᱟᱵᱚᱜ ᱠᱟᱱ ᱥᱚᱝᱥᱟᱨ ᱥᱟᱹᱢᱩᱫᱽ ᱛᱟᱞᱟ ᱨᱮ,

ᱦᱟᱱᱟ ᱰᱷᱤᱯ ᱦᱚᱸ ᱵᱟᱝ ᱪᱮ ᱱᱚᱶᱟ ᱰᱷᱤᱯ ᱦᱚᱸ ᱵᱟᱝ ᱦᱟᱱᱟ ᱯᱩᱨᱤ ᱦᱚᱸ ᱵᱟᱝ ᱪᱮ ᱱᱚᱶᱟ ᱯᱩᱨᱤ ᱦᱚᱸ ᱵᱟᱝ,

ᱤᱧ ᱢᱟ ᱛᱟᱞᱟ ᱯᱩᱨᱤ ᱨᱮ ᱤᱧ ᱢᱟ ᱡᱟᱞᱟ ᱯᱩᱨᱤ ᱨᱮ,

ᱡᱤᱭᱚᱱ ᱰᱷᱚᱸᱜᱟ ᱫᱚᱛᱤᱧ ᱞᱤᱵ ᱞᱟᱵᱚᱜ ᱠᱟᱱ ᱥᱚᱝᱥᱟᱨ ᱥᱟᱹᱢᱩᱫᱽ ᱛᱟᱞᱟ ᱨᱮ ᱾

ᱦᱟᱹᱛᱭᱟᱹᱨ

ᱦᱤᱥᱟᱹ, ᱦᱤᱨᱠᱟᱹ ᱨᱮᱭᱟᱜ ᱦᱟᱹᱛᱭᱟᱹᱨ ᱥᱩᱭᱟᱹ, ᱥᱤᱠᱤᱲ ᱨᱮᱭᱟᱜ ᱥᱟᱨ ᱦᱟᱵᱟᱜ ᱮᱫᱟᱢ ᱤᱧ ᱥᱮᱫ? ᱟᱢ ᱫᱚᱢ ᱢᱚᱱᱮ ᱮᱫᱟ ᱪᱮᱫ ᱱᱚᱶᱟ ᱛᱮ ᱤᱧ ᱮᱢ ᱥᱮᱴᱮᱡ ᱤᱧᱟ!

ᱛᱮᱨᱟᱝ ᱟᱢᱟᱹᱧ ᱥᱤᱯᱤᱵᱤᱞ ᱨᱮᱭᱟᱜ ᱥᱟᱨ ᱤᱠᱟᱹ, ᱫᱟᱭᱟ, ᱫᱩᱞᱟᱹᱲ ᱧᱩᱛᱩᱢᱟᱱ ᱦᱟᱹᱛᱭᱟᱹᱨ ᱴᱚᱜ ᱥᱟᱶᱛᱮ ᱛᱟᱦᱮᱸ ᱜᱚᱫᱚᱜ ᱟᱢ ᱛᱷᱤᱨ ᱛᱷᱟᱨ ᱾

ᱵᱟᱢ ᱵᱟᱰᱟᱭ ᱛᱮ ᱦᱤᱥᱟᱹ, ᱦᱤᱨᱠᱟᱹ, ᱥᱩᱭᱟᱹ, ᱥᱤᱠᱤᱲ ᱦᱟᱹᱛᱭᱟᱹᱨ ᱠᱷᱚᱱᱟᱜ ᱥᱤᱯᱤᱵᱤᱞ ᱨᱮᱭᱟᱜ ᱥᱟᱨ ᱤᱠᱟᱹ, ᱫᱟᱭᱟ, ᱫᱩᱞᱟᱹᱲ ᱧᱩᱛᱩᱢᱟᱱ ᱦᱟᱹᱛᱭᱟᱹᱨ ᱞᱟᱥᱮᱨᱟ ᱢᱮᱱᱛᱮ?

ᱜᱟᱛᱮ ᱛᱤᱧ

ᱱᱤᱛᱚᱜ ᱜᱮᱥᱤᱧ ᱛᱚᱦᱚᱫᱚᱜ ᱠᱟᱱ ᱟᱢᱟᱜ ᱦᱚᱲᱢᱚ ᱨᱮ ᱠᱚᱭᱚᱜ ᱨᱩᱣᱟᱹᱲ ᱠᱟᱛᱮᱧ ᱵᱤᱸᱰᱩᱡ ᱚᱴᱚᱣᱟᱢ ᱠᱟᱱ ᱟᱨ ᱵᱟᱝᱠᱷᱟᱱ ᱮᱜᱮᱨ ᱮᱜᱮᱨ ᱛᱮᱧ ᱯᱟᱨᱚᱢᱚᱜ ᱠᱟᱱ ᱾

ᱛᱷᱟᱹᱭᱟᱹ ᱚᱴᱚ ᱠᱟᱛᱮᱧ ᱵᱟᱹᱜᱤ ᱚᱴᱚᱣᱟᱢ ᱠᱷᱟᱹᱛᱤᱨ ᱯᱟᱞᱮ ᱢᱮᱫ ᱛᱟᱢ ᱯᱮᱲᱮ ᱯᱮᱲᱮᱜ ᱚᱦᱚᱞᱭᱟ ᱞᱮᱠᱟ ᱾

ᱤᱠᱷᱟᱹᱱ ᱢᱤᱫ ᱫᱤᱱ ᱚᱱᱠᱟᱱ ᱚᱠᱛᱚ ᱥᱮᱴᱮᱨᱚᱜ ᱤᱧᱟᱜ ᱦᱚᱲᱢᱚ ᱱᱤᱥᱪᱚᱲᱚᱜ ᱥᱟᱦᱮᱫ ᱥᱟᱹᱠᱤᱫᱚᱜ,

ᱩᱱᱫᱚ ᱤᱧ ᱜᱤᱛᱤᱡ ᱠᱟᱛᱮ ᱟᱢ ᱜᱮᱧ ᱦᱟᱹᱲᱩᱵ ᱠᱟᱢ ᱟᱢ ᱜᱮᱧ ᱦᱚᱵᱚᱨ ᱠᱟᱢ ᱟᱢ ᱜᱮ ᱜᱟᱛᱮ ᱛᱤᱧ ᱾

ᱚᱱᱟ ᱚᱲᱟᱜ

ᱚᱲᱟᱜ ᱮᱢ ᱵᱟᱪᱷᱟᱣ ᱮᱫᱟ?

ᱥᱟᱹᱲᱤᱢ ᱵᱷᱩᱜᱟᱹᱜ ᱜᱮᱭᱟ ᱥᱤᱞᱯᱤᱧ ᱫᱷᱟᱫᱽᱨᱟ ᱜᱮᱭᱟ ᱠᱟᱸᱛ ᱯᱚᱥᱟᱜ ᱜᱮᱭᱟ ᱚᱱᱟᱛᱮ ᱚᱲᱟᱜ ᱵᱟᱢ ᱠᱩᱥᱤᱭᱟᱜ ᱠᱟᱱᱟ?

ᱵᱚᱪᱷᱚᱨ ᱡᱩᱛᱨᱟᱹᱣ ᱦᱩᱭᱟᱢ ᱠᱟᱱᱟ ᱾

ᱟᱨ ᱟᱢ! ᱠᱤᱥᱟᱹᱬ ᱵᱟᱹᱵᱩ ᱵᱤᱞᱰᱤᱝ ᱚᱲᱟᱜ, ᱯᱟᱝᱠᱷᱟ ᱢᱮᱱᱟᱜ ᱮ ᱥᱤ ᱨᱩᱢ, ᱠᱮᱴᱮᱡ ᱪᱚᱨᱚᱠ ᱥᱤᱞᱯᱤᱧ ᱚᱲᱟᱜ ᱨᱮ ᱛᱟᱦᱮᱸ ᱛᱟᱦᱮᱸ ᱛᱮᱢ ᱵᱚᱨ ᱪᱟᱵᱟ ᱮᱱᱟ?

ᱠᱷᱚᱡᱚᱜ ᱠᱟᱱᱟᱢ ᱟᱨᱦᱚᱸ ᱱᱟᱶᱟ ᱚᱲᱟᱜ?

ᱱᱚᱶᱟ ᱚᱲᱟᱜ ᱨᱮ ᱫᱤᱱ ᱜᱮ ᱫᱩᱠ ᱢᱩᱦᱤᱢ ᱫᱤᱱ ᱜᱮ ᱟᱡᱟᱨ ᱵᱮᱢᱟᱨ ᱫᱤᱱᱟᱹᱢ ᱱᱮᱭᱟᱶ ᱛᱟᱯᱟᱢ,

ᱚᱱᱟᱛᱮ ᱱᱚᱶᱟ ᱚᱲᱟᱜ ᱵᱟᱢ ᱠᱩᱥᱤᱭᱟᱜ ᱠᱟᱱᱟ?

ᱟᱸᱡᱚᱢ ᱢᱮ ᱤᱧ ᱢᱤᱫᱴᱟᱝ ᱚᱲᱟᱜ ᱤᱧ ᱥᱚᱢᱫᱟᱱ ᱟᱠᱟᱫᱟ ᱚᱱᱰᱮᱢ ᱛᱟᱦᱮᱸᱱᱟ ᱥᱮ?

ᱚᱱᱟ ᱚᱲᱟᱜ ᱫᱚ ᱛᱤᱥ ᱦᱚᱸ ᱡᱩᱛᱨᱟᱹᱣ ᱵᱟᱝ ᱦᱩᱭᱩᱜ-ᱟ ᱚᱱᱟ ᱚᱲᱟᱜ ᱨᱮᱫᱚ ᱟᱡᱟᱨ, ᱵᱮᱢᱟᱨ, ᱫᱩᱠ, ᱢᱩᱦᱤᱢ ᱪᱮᱫ ᱦᱚᱸ ᱵᱟᱹᱱᱩᱜ-ᱟ ᱾

ᱚᱱᱟ ᱚᱲᱟᱜ ᱨᱮᱭᱟᱜ ᱥᱟᱹᱱᱛᱤ ᱚᱱᱟ ᱚᱲᱟᱜ ᱨᱮ ᱵᱚᱞᱚ ᱠᱟᱛᱮ ᱩᱛᱟᱹᱨᱮᱢ ᱴᱷᱤᱠᱟᱹ ᱠᱮᱭᱟ ᱾

ᱤᱠᱷᱟᱹᱱ ᱢᱤᱫᱴᱟᱝ ᱥᱚᱨᱛᱚ 'ᱮᱥᱠᱟᱨ ᱜᱮ ᱥᱮᱱᱚᱜ ᱦᱩᱭᱩᱜ-ᱟ ᱾'

ᱦᱟᱯᱮ! ᱚᱱᱟ ᱚᱲᱟᱜ ᱨᱮ ᱥᱮᱴᱮᱨᱚᱜ ᱫᱚ ᱩᱱᱟᱹᱜ ᱵᱟᱝ ᱟᱞᱜᱟ ᱦᱟ ᱱᱚᱶᱟ ᱚᱲᱟᱜ ᱨᱮ ᱛᱟᱦᱮᱸ ᱵᱷᱟᱜᱟᱣ ᱞᱮᱱ ᱢᱮ ᱟᱫᱚ ᱚᱱᱟ ᱚᱲᱟᱜ ᱤᱧ ᱩᱫᱩᱜ ᱟᱢᱟ ᱾

ᱥᱮᱱᱚᱜ ᱟᱢ ᱥᱮ ᱚᱱᱟ ᱚᱲᱟᱜ ᱛᱮ?

ᱚᱱᱟ ᱚᱲᱟᱜ ᱥᱮᱱᱚᱜ ᱞᱟᱹᱜᱤᱫ ᱮᱢ ᱦᱚᱨᱚ ᱵᱚᱨᱚ ᱪᱟᱵᱟ ᱮᱱᱟ?

ᱫᱟ ᱟᱹᱜᱩᱭ ᱢᱮ ᱵᱚᱲ ᱥᱮᱝᱜᱮᱞ ᱥᱟᱛᱮ ᱠᱷᱚᱱ ᱵᱚᱡᱽ ᱢᱮ ᱥᱟᱹᱣᱲᱤ ᱡᱩᱜᱟᱹᱲ ᱢᱮ ᱠᱷᱚᱭ ᱠᱟᱹᱣᱲᱤ ᱫᱮᱞᱟ ᱤᱧ ᱛᱟᱭᱚᱢ ᱛᱟᱭᱚᱢ ᱛᱮ ᱦᱤᱡᱩᱜ ᱢᱮ ᱩᱫᱩᱜ ᱟᱢᱟᱹᱧ ᱚᱱᱟ ᱚᱲᱟᱜ ᱾

ᱨᱮᱰ ᱥᱤᱜᱽᱱᱟᱞ

ᱟᱹᱰᱤ ᱫᱤᱱ ᱛᱟᱭᱚᱢ ᱦᱩᱭ ᱟᱠᱟᱱ ᱫᱩᱞᱟᱹᱲ ᱜᱟᱛᱮ ᱥᱟᱶ ᱧᱟᱯᱟᱢ ᱯᱟᱛᱟ ᱴᱟᱺᱰᱤ ᱨᱮ,

ᱠᱩᱞᱤ ᱠᱮᱫᱤᱧᱟᱭ ᱨᱮᱭᱟᱲ ᱜᱮ 'ᱪᱮᱞᱮ ᱫᱟᱫᱟ, ᱚᱠᱟ ᱞᱮᱠᱟ ᱢᱮᱱᱟᱢᱟ?' ᱤᱧ ᱦᱚᱸ ᱥᱤᱵᱤᱞ ᱜᱮᱧ ᱨᱚᱲ ᱟᱫᱮᱭᱟ 'ᱵᱷᱟᱹᱜᱤ ᱜᱮ ᱢᱮᱱᱟᱹᱧᱟ ᱾'

ᱠᱚᱭᱚᱜ ᱠᱮᱫᱤᱭᱟᱹᱧ ᱢᱮᱫᱦᱟᱶ ᱟᱡ ᱦᱚᱸ ᱤᱧ ᱮ ᱠᱚᱭᱚᱜ ᱠᱮᱫᱤᱧᱟ ᱢᱮᱫ ᱢᱮᱫ ᱛᱟᱹᱞᱤᱧ ᱢᱮᱥᱟ ᱮᱱᱟ ᱡᱟᱣ ᱞᱮᱠᱟ ᱜᱮ ᱾

ᱡᱟᱣ ᱫᱚ ᱢᱮᱫ ᱢᱮᱫ ᱢᱮᱥᱟ ᱞᱮᱱᱠᱷᱟᱱ ᱦᱚᱲᱢᱚ ᱥᱟᱱᱟᱢ ᱨᱩᱢᱩᱧ ᱜᱚᱫᱚᱜ ᱢᱚᱱᱮ ᱢᱮᱱᱟᱭ ᱢᱮᱫ ᱫᱚ ᱦᱩᱱᱟᱹᱝ ᱟᱞᱚ ᱨᱤᱯᱤᱫᱚᱜ ᱟᱡ ᱜᱮ ᱠᱚᱭᱚᱜ ᱠᱟᱭ ᱜᱚᱴᱟ ᱥᱤᱧ, ᱜᱚᱴᱟ ᱧᱤᱫᱟᱹ ᱾

ᱤᱠᱷᱟᱹᱱ ᱛᱮᱦᱮᱧ ᱫᱚ ᱢᱚᱱᱮ ᱛᱤᱧ ᱢᱚᱥᱚᱫ ᱮᱱᱟ ᱪᱮᱫᱟᱜ ᱪᱮ ᱨᱮᱰ ᱥᱤᱜᱽᱱᱟᱞ ᱛᱟᱦᱮᱸ ᱠᱟᱱᱟ ᱟᱡᱟᱜ ᱢᱮᱫᱦᱟᱶ ᱨᱮ ᱟᱡᱟᱜ ᱢᱚᱞᱚᱝ ᱨᱮ, ᱟᱡᱟᱜ ᱦᱚᱨᱟᱥᱤ ᱨᱮ ᱾

ᱫᱟᱯᱠᱟᱣ ᱜᱚᱫ ᱮᱱᱟᱹᱧ ᱩᱭᱦᱟᱹᱨ ᱠᱮᱫᱟᱹᱧ ᱵᱤᱯᱚᱫᱽ ᱜᱮᱭᱟ ᱢᱟᱬᱟᱝ ᱥᱮᱫ ᱞᱟᱦᱟᱜ ᱫᱚ ᱾

ᱡᱟᱣ ᱫᱚ ᱤᱧᱟᱜ ᱟᱨ ᱟᱡᱟᱜ ᱛᱤ ᱢᱤᱫ ᱴᱷᱮᱱ ᱜᱮ ᱛᱟᱦᱮᱸ ᱠᱚᱜ-ᱟ ᱟᱹᱰᱤ ᱜᱷᱟᱹᱲᱤᱠ ᱟᱡ ᱮ ᱢᱮᱱᱟ, 'ᱟᱢᱟᱜ ᱛᱤ ᱫᱚ ᱪᱮᱫᱟᱜ ᱩᱱᱟᱹᱜ ᱥᱟᱭᱜᱟᱫ ᱟ?' ᱤᱧᱤᱧ ᱢᱮᱱᱟ, 'ᱟᱢᱟᱜ ᱛᱤ ᱫᱚ ᱪᱮᱫᱟᱜ ᱩᱱᱟᱹᱜ ᱞᱩᱜᱩᱵ ᱟ?' ᱤᱠᱷᱟᱹᱱ ᱛᱮᱦᱮᱧ ᱫᱚ ᱚᱱᱠᱟ ᱪᱮᱫ ᱦᱚᱸ ᱵᱟᱭ ᱦᱩᱭ ᱞᱮᱱᱟ ᱪᱮᱫᱟᱜ ᱪᱮ ᱟᱡᱟᱜ ᱦᱚᱨᱟᱥᱤ ᱨᱮ ᱨᱮᱰ ᱥᱤᱜᱽᱱᱟᱞ ᱛᱟᱦᱮᱸ ᱠᱟᱱᱟ ᱾

ᱟᱡᱟᱜ ᱦᱚᱨᱟᱥᱤ ᱨᱮᱭᱟᱜ ᱨᱮᱰ ᱥᱤᱜᱽᱱᱟᱞ ᱮ ᱞᱟᱹᱞᱟᱹᱭ ᱠᱟᱱᱟ ᱤᱧ ᱫᱚ ᱟᱞᱚᱢ ᱡᱚᱴᱮᱫ ᱤᱧᱟ ᱤᱧᱤᱡ ᱫᱚ ᱡᱤᱣᱤ ᱡᱩᱨᱤ ᱢᱮᱱᱟᱭ ᱛᱤᱧᱟ ᱪᱷᱟᱛᱟ ᱫᱟᱨᱮ ᱢᱮᱱᱟᱭ ᱛᱤᱧᱟ ᱾

ᱨᱮᱰ ᱥᱤᱜᱽᱱᱟᱞ ᱧᱮᱞ ᱛᱮ ᱤᱧ ᱫᱚᱸᱧ ᱛᱤᱸᱜᱩ ᱛᱷᱤᱨ ᱩᱛᱟᱹᱨ ᱮᱱᱟ ᱾

ᱢᱚᱦᱚᱢ ᱨᱮᱱᱤᱡ ᱢᱟᱹᱱᱢᱤ ᱛᱟᱱᱟᱜ ᱟᱨ ᱵᱟᱝᱠᱷᱟᱱ ᱵᱟᱡᱟᱨ ᱪᱷᱚᱠᱚ ᱠᱚᱨᱮ ᱠᱚ ᱛᱷᱟᱯᱚᱱ ᱠᱟᱠᱚ ᱥᱤᱨᱢᱤᱴ, ᱢᱟᱨᱵᱚᱞ ᱫᱷᱤᱨᱤ ᱨᱮᱱᱤᱡ ᱢᱟᱹᱱᱢᱤ ᱛᱮᱧ ᱟᱹᱨᱩ ᱩᱛᱟᱹᱨ ᱞᱮᱱᱟ ᱾

ᱤᱧᱤᱡ ᱜᱟᱛᱮ ᱤᱧ ᱵᱟᱝ ᱵᱟᱰᱟᱭ ᱚᱪᱚ ᱠᱟᱛᱮ ᱥᱟᱵ ᱠᱮᱫᱟᱭ ᱟᱨ ᱢᱤᱫ ᱦᱚᱲᱟᱜ ᱛᱤ ᱪᱤᱠᱟᱹᱛᱮ?

ᱡᱟᱦᱟᱸᱭ ᱢᱤᱫ ᱡᱚᱱᱚᱢ ᱫᱚ ᱵᱟᱝ ᱪᱮ ᱵᱟᱨ ᱡᱚᱱᱚᱢ ᱦᱚᱸ ᱵᱟᱰᱝ ᱥᱟᱭ ᱡᱚᱱᱚᱢ ᱦᱟᱹᱵᱤᱡ ᱤᱧ ᱥᱟᱶ ᱛᱟᱦᱮᱸᱱ ᱞᱟᱹᱜᱤᱫ ᱮ ᱚᱠᱨᱟᱬ ᱞᱮᱱᱟ ᱩᱱᱤ ᱫᱚᱭ ᱵᱟᱹᱜᱤ ᱟᱹᱫᱤᱧᱟ!

ᱤᱧ ᱫᱚ ᱩᱭᱦᱟᱹᱨ ᱨᱮᱭᱟᱜ ᱵᱤᱸᱫᱤ ᱜᱟᱱᱟᱜ ᱨᱮᱧ ᱡᱷᱟᱹᱞᱤ ᱟᱠᱟᱱᱟ ᱾

ᱟᱡ ᱜᱮ ᱢᱮᱱ ᱠᱮᱫ ᱟᱭ, 'ᱪᱟᱜ ᱮᱢ ᱛᱤᱸᱜᱩ ᱛᱷᱤᱨ ᱟᱠᱟᱱᱟ ᱫᱟᱫᱟ, ᱪᱮᱫ ᱮᱢ ᱩᱭᱦᱟᱹᱨ ᱮᱫᱟ?'

ᱴᱟᱴᱠᱟ ᱤᱧ ᱫᱚᱸᱧ ᱪᱚᱢᱠᱟᱣ ᱮᱱᱟ ᱟᱡᱟᱜ ᱠᱟᱛᱷᱟ ᱛᱮ, ᱚᱱᱰᱮ ᱫᱚ ᱟᱨ ᱢᱤᱫ ᱰᱚᱸᱰᱮᱠ ᱦᱚᱸ ᱵᱟᱭ ᱛᱟᱦᱮᱸᱱ ᱥᱟᱹᱱᱟᱹᱧ ᱠᱟᱱ ᱛᱟᱦᱮᱸᱫ ᱾

ᱤᱧᱤᱡ ᱫᱩᱞᱟᱹᱲ ᱜᱟᱛᱮ ᱫᱚᱭ ᱵᱟᱹᱜᱤ ᱥᱟᱹᱨᱤ ᱟᱹᱫᱤᱧᱟ ᱟᱫᱚ ᱡᱟᱣ ᱞᱮᱠᱟ ᱤᱧᱤᱡ ᱫᱩᱞᱟᱹᱲ ᱜᱟᱛᱮ ᱵᱟᱹᱧ ᱪᱚᱜ ᱫᱟᱲᱮ ᱟᱭᱟ ᱢᱚᱞᱚᱝ ᱨᱮ ᱵᱟᱹᱧ ᱪᱚᱜ ᱫᱟᱲᱮ ᱟᱭᱟ ᱡᱚᱦᱟ ᱨᱮ ᱵᱟᱹᱧ ᱪᱚᱜ ᱫᱟᱲᱮ ᱟᱭᱟ ᱞᱩᱞᱦᱟᱹ ᱨᱮ ᱾

ᱤᱧᱤᱡ ᱜᱟᱛᱮ ᱤᱧ ᱥᱩᱨ ᱨᱮ ᱢᱮᱱᱟᱭ ᱨᱮᱦᱚᱸ ᱟᱹᱰᱤ ᱥᱟᱹᱝᱜᱤᱧ ᱨᱮ ᱢᱮᱱᱟᱭ ᱞᱮᱠᱟᱹᱧ ᱟᱹᱭᱠᱟᱹᱣ ᱮᱫᱟ ᱾

ᱩᱱᱡᱷᱚᱜ ᱤᱧᱟᱜ ᱢᱚᱵᱟᱭᱤᱞ ᱯᱷᱚᱱ ᱨᱤᱝ ᱮᱱᱟ ᱨᱤᱥᱤᱵᱷᱟᱨ ᱚᱛᱟ ᱠᱟᱛᱮ ᱥᱟᱦᱟ ᱮᱱᱟᱹᱧ ᱚᱱᱰᱮ ᱠᱷᱚᱱ ᱾

ᱤᱧᱤᱡ ᱠᱚᱸᱫᱟ ᱡᱚᱴᱟᱣ

ᱞᱮᱛᱟᱲ ᱟᱢ ᱫᱚ ᱤᱧ ᱥᱟᱶ ᱜᱮᱢ ᱛᱟᱦᱮᱸ ᱠᱚᱜ ᱠᱟᱱᱟ ᱾

ᱚᱠᱟ ᱡᱷᱚᱜ ᱫᱚᱢ ᱯᱟᱸᱡᱟ ᱠᱟᱹᱧ ᱠᱟᱱᱟ ᱚᱠᱟ ᱡᱷᱚᱜ ᱫᱚ ᱤᱧ ᱢᱟᱬᱟᱝ ᱢᱟᱬᱟᱜ ᱛᱮᱢ ᱛᱟᱲᱟᱢ ᱠᱟᱜ ᱠᱟᱱᱟ ᱚᱠᱟ ᱡᱷᱚᱜ ᱫᱚ ᱤᱧᱟᱜ ᱞᱮᱸᱜᱟ, ᱚᱠᱟ ᱡᱷᱚᱜ ᱫᱚ ᱤᱧᱟᱜ ᱡᱚᱡᱚᱢ ᱯᱟᱦᱴᱟ ᱛᱮᱢ ᱛᱟᱲᱟᱢ ᱠᱟᱜ ᱠᱟᱱᱟ ᱾

ᱞᱮᱛᱟᱲ ᱤᱧ ᱥᱟᱶᱮᱢ ᱛᱟᱦᱮᱸ ᱠᱚᱜ ᱠᱟᱱ ᱠᱷᱟᱹᱛᱤᱨ ᱟᱢ ᱫᱚ ᱤᱧᱤᱡ ᱡᱚᱴᱟᱣ ᱠᱟᱱᱟᱢ ᱤᱧ ᱡᱟᱦᱟᱸ ᱵᱩᱜᱤᱭᱟᱜ, ᱵᱟᱹᱲᱤᱡᱟᱜ ᱠᱚᱸᱧ ᱠᱟᱹᱢᱤ ᱟᱠᱟᱫᱟ ᱚᱱᱟ ᱨᱮᱱᱤᱡ ᱟᱢ ᱠᱚᱸᱫᱟ ᱥᱟᱹᱠᱷᱤ ᱠᱟᱱᱟᱢ ᱾

ᱟᱢᱮᱢ ᱨᱚᱲ ᱠᱷᱟᱱ ᱦᱩᱱᱟᱹᱝ ᱚᱱᱟ ᱠᱚ ᱡᱚᱛᱚ ᱦᱚᱲ ᱴᱷᱮᱱ ᱮᱢ ᱞᱟᱹᱭ ᱯᱷᱟᱫᱟ ᱠᱟᱜ-ᱟ ᱾

ᱢᱤᱢᱤᱫ ᱫᱷᱟᱣ ᱫᱚ ᱟᱢᱟᱜ ᱨᱩᱯ ᱛᱮ ᱤᱧᱤᱧ ᱵᱷᱮᱣᱱᱟ ᱜᱚᱫᱚᱜ-ᱟ ᱚᱠᱚᱭ ᱮ ᱯᱤᱪᱷᱟᱹ ᱟᱠᱟᱫᱤᱧ ᱞᱮᱠᱟᱹᱧ ᱟᱹᱭᱠᱟᱹᱣᱟ ᱾

ᱩᱢᱩᱞ! ᱤᱧᱤᱡ ᱠᱚᱸᱫᱟ ᱡᱚᱴᱟᱣ ᱟᱢ ᱫᱚ ᱞᱮᱛᱟᱲ ᱤᱧ ᱥᱟᱶ ᱨᱮᱜᱮ ᱛᱟᱦᱮᱸᱱ ᱢᱮ ᱵᱟᱹᱲᱤᱡᱟᱜ ᱠᱚᱸᱧ ᱠᱟᱹᱢᱤ ᱠᱷᱟᱱ ᱵᱚᱛᱚᱨ ᱚᱪᱚᱭᱤᱧ ᱢᱮ ᱵᱮᱥᱟᱜ ᱜᱮᱧ ᱠᱟᱹᱢᱤ ᱠᱷᱟᱱ ᱥᱟᱨᱦᱟᱣ ᱜᱚᱫᱤᱧ ᱢᱮ ᱾

ᱪᱮᱛᱟᱱ ᱴᱚᱞᱟ ᱨᱮ ᱮᱱᱮᱡ ᱥᱮᱨᱮᱧ

ᱛᱮᱦᱮᱧ ᱪᱮᱛᱟᱱ ᱴᱚᱞᱟ ᱨᱮ ᱮᱱᱮᱡ ᱥᱮᱨᱮᱧ ᱪᱟᱹᱞᱩ ᱟᱠᱟᱱ ᱾

ᱨᱤᱢᱤᱞ ᱮ ᱨᱩ ᱮᱫᱟ ᱴᱟᱢᱟᱠ ᱵᱤᱡᱽᱞᱤ ᱢᱟ ᱢᱮᱫ ᱮ ᱫᱷᱩᱞᱩᱯ ᱱᱚᱶᱟ ᱠᱚ ᱧᱮᱞ ᱛᱮ, ᱱᱚᱶᱟ ᱠᱚ ᱟᱸᱡᱚᱢ ᱛᱮ ᱵᱟᱹᱫᱽ ᱠᱟᱹᱢᱤ ᱠᱚᱠᱚ ᱫᱟᱹᱲ ᱨᱩᱣᱟᱹᱲ ᱚᱲᱟᱜ ᱛᱮ ᱾

ᱚᱠᱚᱭ ᱠᱚᱪᱚ ᱠᱚ ᱮᱱᱮᱡ ᱠᱟᱱ ᱱᱚᱛᱮ ᱠᱷᱚᱱ ᱢᱟ ᱵᱟᱠᱚ ᱧᱮᱞᱚᱜ ᱠᱟᱱ, ᱡᱩᱨ ᱜᱮᱠᱚ ᱮᱱᱮᱡ ᱠᱟᱱ ᱫᱷᱩᱲᱤ ᱫᱚ ᱵᱟᱝ ᱡᱟᱹᱲᱤ ᱜᱮ ᱰᱤᱜᱽᱞᱟᱹᱜ ᱠᱟᱱ ᱾

ᱡᱟᱹᱲᱤ ᱰᱤᱜᱽᱞᱟᱹᱣ ᱧᱟᱢᱟᱫ ᱠᱚᱠᱷᱟᱱ ᱨᱚᱴᱮ, ᱜᱷᱩᱜᱽᱨᱤ, ᱥᱩᱶᱟᱬᱤ ᱠᱚ ᱨᱟᱹᱥᱠᱟᱹᱭᱮᱱ ᱟᱠᱚ ᱦᱚᱸᱠᱚ ᱮᱦᱚᱵ ᱠᱮᱫ ᱮᱱᱮᱡ ᱥᱮᱨᱮᱧ ᱾

ᱛᱮᱦᱮᱧ ᱪᱮᱛᱟᱱ ᱴᱚᱞᱟ ᱨᱮ ᱮᱱᱮᱡ ᱥᱮᱨᱮᱧ ᱪᱟᱹᱞᱩ ᱟᱠᱟᱱ ᱾

ᱫᱩᱣᱟᱹᱨ

ᱚᱠᱟ ᱡᱷᱚᱜ ᱫᱚ ᱯᱚᱠᱮᱴ ᱨᱮᱧ ᱥᱟᱢᱵᱟᱣ ᱠᱟᱜ ᱠᱟᱱᱟ ᱚᱠᱟ ᱡᱷᱚᱜ ᱫᱚ ᱛᱤ ᱨᱮᱧ ᱥᱟᱵ ᱠᱟᱜ ᱠᱟᱱᱟ ᱚᱠᱟ ᱡᱷᱚᱜ ᱫᱚᱸᱧ ᱫᱚᱦᱚ ᱠᱟᱜ ᱠᱟᱱᱟ ᱾

ᱚᱱᱰᱮ ᱠᱷᱚᱱ ᱵᱚᱞᱚ ᱠᱟᱛᱮ ᱟᱹᱰᱤ ᱥᱟᱝᱜᱤᱧ ᱤᱧ ᱥᱮᱱ ᱠᱮ ᱠᱟᱱᱟ, ᱢᱤᱫ ᱰᱚᱸᱰᱮᱠ ᱨᱮ ᱫᱤᱥᱚᱢ ᱯᱟᱨᱚᱢ ᱫᱤᱥᱚᱢ ᱤᱧ ᱥᱮᱴᱮᱨ ᱜᱚᱫᱚᱜ ᱠᱟᱱᱟ ᱚᱱᱰᱮᱱ ᱠᱚ ᱦᱚᱲ ᱥᱟᱶᱤᱧ ᱧᱮᱯᱮᱞ, ᱨᱚᱯᱚᱲ ᱠᱟᱱᱟ ᱾

ᱚᱱᱰᱮ ᱵᱚᱞᱚᱱ ᱞᱟᱹᱜᱤᱫ ᱠᱟᱹᱣᱰᱤ ᱫᱚ ᱞᱟᱜᱟᱜ ᱠᱟᱱ ᱜᱮᱭᱟ ᱢᱮᱱᱠᱷᱟᱱ ᱟᱹᱰᱤ ᱜᱟᱱ ᱫᱚ ᱵᱟᱝ ᱾

ᱚᱱᱟ ᱫᱚ ᱫᱩᱣᱟᱹᱨ ᱠᱟᱱᱟ ᱚᱱᱰᱮ ᱠᱷᱚᱱ ᱵᱚᱞᱚ ᱠᱟᱛᱮ ᱜᱚᱴᱟ ᱥᱮᱥᱮᱱ ᱠᱟᱱᱟ ᱡᱚᱛᱚᱣᱟᱜ ᱧᱮᱧᱟᱢᱚᱜ ᱠᱟᱱᱟ ᱡᱚᱛᱚᱣᱟᱜ ᱧᱟᱢᱚᱜ ᱠᱟᱱᱟ ᱾

ᱫᱩᱣᱟᱹᱨ ᱨᱮᱭᱟᱜ ᱢᱟᱨᱥᱟᱞ ᱡᱩᱞᱩᱜ ᱠᱟᱱᱟ ᱤᱬᱤᱡᱚᱜ ᱠᱟᱱᱟ,

ᱤᱬᱤᱡ ᱟᱠᱟᱱ ᱠᱷᱟᱱ ᱴᱷᱤᱠᱟᱹᱭ ᱢᱮ ᱤᱧ ᱫᱚ ᱵᱟᱦᱨᱮ ᱨᱮ ᱢᱮᱱᱟᱹᱧᱟ ᱡᱩᱞ ᱟᱠᱟᱱ ᱠᱷᱟᱱ ᱵᱟᱰᱟᱭ ᱢᱮ ᱤᱧ ᱫᱚ ᱵᱷᱤᱛᱨᱤ ᱛᱮᱧ ᱵᱚᱞᱚ ᱟᱠᱟᱱᱟ ᱾

ᱵᱟᱝ ᱫᱚᱸᱧ ᱠᱩᱫᱩᱢᱮᱫ ᱵᱟᱝ ᱫᱚᱸᱧ ᱠᱟᱹᱦᱱᱤᱭᱮᱫ ᱤᱧ ᱦᱚᱸ ᱵᱟᱹᱧ ᱴᱷᱤᱠᱟᱹ ᱡᱚᱝ ᱠᱟᱱ ᱫᱩᱣᱟᱹᱨ ᱫᱚ ᱱᱤᱛ ᱪᱟᱨᱡᱽ ᱨᱮ ᱵᱟᱹᱭᱥᱟᱹᱣ ᱟᱠᱟᱱ ᱛᱮ ᱤᱧ ᱫᱚ ᱚᱱᱚᱬᱦᱮᱧ ᱚᱻᱚᱞ ᱠᱟᱱ ᱾

ᱵᱷᱟᱵᱽᱱᱟ

ᱵᱷᱟᱵᱽᱱᱟ ᱫᱚ ᱵᱚᱦᱚᱜ ᱨᱮ ᱥᱮᱛᱮᱧᱚᱜ ᱠᱟᱱᱟ,

ᱟᱫᱚ ᱵᱟᱹᱭ ᱵᱟᱹᱭ ᱛᱮ ᱥᱟᱨᱮᱲᱚᱜ ᱠᱟᱱᱟ ᱾

ᱛᱤ ᱥᱮᱫ ᱛᱮ, ᱱᱚᱱᱚᱞ ᱥᱮᱫ ᱛᱮ ᱞᱟᱪᱷᱟ ᱨᱮ ᱞᱤᱧᱡᱤ ᱟᱬᱜᱚᱱ ᱠᱟᱱᱟ ᱤᱧᱟᱜ ᱵᱷᱟᱵᱽᱱᱟ ᱞᱟᱪᱷᱟ ᱨᱮ ᱰᱟᱵᱽᱨᱟᱜ ᱠᱟᱱᱟ ᱟᱫᱚ ᱤᱧᱟᱜ ᱵᱷᱟᱵᱽᱱᱟ ᱟᱯᱮ ᱯᱮ ᱧᱮᱧᱟᱢ ᱮᱫᱟ ᱾

ᱵᱟᱝ ᱫᱚ ᱦᱮᱲᱮᱢ ᱜᱮ ᱵᱟᱝ ᱫᱚ ᱠᱷᱟᱨᱟ ᱜᱮ ᱵᱟᱝ ᱫᱚ ᱦᱟᱲᱦᱟᱫ ᱜᱮ ᱵᱟᱝ ᱫᱚ ᱦᱮᱣᱮᱨ ᱜᱮ ᱵᱚᱦᱚᱜ ᱠᱷᱚᱱ ᱛᱤ ᱥᱮᱫ ᱛᱮ ᱞᱤᱧᱡᱤ ᱟᱬᱜᱚ ᱟᱠᱟᱱ ᱤᱧᱟᱜ ᱵᱷᱟᱵᱽᱱᱟ ᱢᱟ ᱪᱟᱠᱷᱟ ᱵᱤᱰᱟᱹᱣ ᱯᱮ ᱾

ᱢᱟᱹᱱᱢᱤ ᱠᱷᱚᱱᱤᱧ ᱜᱚᱥᱟᱸᱭ ᱮᱱᱟ

ᱤᱧ ᱫᱚ ᱢᱟᱹᱱᱢᱤ ᱠᱷᱚᱱᱤᱧ ᱜᱚᱥᱟᱸᱭ ᱮᱱᱟ ᱤᱧᱟᱜ ᱢᱚᱱᱮ ᱨᱮ ᱡᱟᱦᱟᱸ ᱦᱤᱥᱟᱹ, ᱦᱤᱨᱠᱟᱹ, ᱦᱟᱨᱠᱮᱛ ᱛᱟᱦᱮᱸ ᱠᱟᱱᱟ ᱡᱚᱛᱚ ᱪᱟᱵᱟᱭᱮᱱᱟ ᱾

ᱤᱧᱟᱜ ᱦᱚᱲᱢᱚ ᱨᱮ ᱡᱟᱦᱟᱸ ᱠᱟᱢᱱᱟ, ᱵᱟᱥᱱᱟ, ᱢᱟᱹᱭᱞᱟᱹ, ᱚᱡᱽᱨᱟ ᱛᱟᱦᱮᱸ ᱠᱟᱱᱟ ᱡᱚᱛᱚ ᱪᱟᱵᱟᱭᱮᱱᱟ ᱾

ᱡᱟᱣ ᱫᱚ ᱮᱨᱟᱹᱧ ᱮ ᱦᱚᱦᱚᱣᱟᱹᱧ ᱛᱟᱦᱮᱸᱫ 'ᱫᱮᱞᱟ ᱜᱚ! ᱫᱟᱠᱟ ᱡᱚᱢ ᱟᱹᱨᱩᱵᱚᱜ ᱢᱮ' ᱱᱮᱛᱟᱨ ᱫᱚ ᱚᱱᱠᱟ ᱵᱟᱠᱚ ᱢᱮᱛᱟᱹᱧᱟ; ᱢᱮᱛᱟᱹᱧᱟ ᱠᱚ, 'ᱡᱚᱦᱟᱨ ᱜᱚᱥᱟᱸᱭ ᱱᱮ ᱮᱱᱫᱚ ᱟᱢ ᱧᱩᱛᱩᱢ ᱛᱮᱞᱮ ᱮᱢ ᱠᱮᱫ ᱪᱟᱞ ᱠᱮᱫ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜ ᱢᱮ ᱾'

ᱤᱧ ᱫᱚ ᱢᱟᱹᱱᱢᱤ ᱠᱷᱚᱱᱤᱧ ᱜᱚᱥᱟᱸᱭ ᱮᱱᱟ ᱧᱮᱞᱚᱜᱤᱡ ᱠᱷᱚᱱᱤᱧ ᱵᱟᱝ ᱧᱮᱞᱚᱜᱤᱡ ᱮᱱᱟ ᱾

ᱤᱧᱟᱜ ᱡᱟᱦᱟᱸ ᱩᱥᱟᱹᱫ, ᱟᱹᱲᱤᱥ, ᱜᱚᱨᱚᱵᱽ ᱜᱩᱢᱟᱹᱱ ᱛᱟᱦᱮᱸ ᱠᱟᱱᱟ ᱡᱚᱛᱚ ᱪᱟᱵᱟᱭᱮᱱᱟ ᱾

ᱤᱧᱟᱜ ᱵᱮᱵᱷᱟᱨ ᱫᱚ ᱱᱤᱛ ᱢᱟᱹᱱᱢᱤ ᱞᱮᱠᱟ ᱫᱚ ᱵᱟᱝ ᱜᱚᱥᱟᱸᱭ ᱞᱮᱠᱟ ᱮᱱᱟ ᱾

ᱤᱧ ᱫᱚ ᱢᱟᱹᱱᱢᱤ ᱠᱷᱚᱱᱤᱧ ᱜᱚᱥᱟᱸᱭ ᱮᱱᱟ ᱱᱤᱛ ᱫᱚ ᱡᱚᱢᱟᱜ ᱧᱩᱣᱟᱜ ᱢᱟᱹᱱᱢᱤ ᱞᱮᱠᱟ ᱵᱟᱹᱧ ᱟᱛᱟᱝᱟ ᱜᱚᱥᱟᱸᱭ ᱞᱮᱠᱟᱹᱧ ᱟᱛᱟᱝᱟ ᱾

ᱚᱲᱟᱜ ᱦᱚᱲ ᱫᱚᱠᱚ ᱨᱟᱜ ᱡᱚᱝ ᱠᱟᱱᱟ ᱯᱟᱞᱮ ᱩᱱᱠᱩ ᱤᱧ ᱜᱚᱥᱟᱸᱭ ᱨᱩᱯᱛᱮ ᱵᱟᱭ ᱧᱮᱞ ᱥᱟᱱᱟᱭᱮᱫ ᱠᱚᱣᱟ ᱾

ᱟᱡ ᱮ ᱥᱮᱴᱮᱨ ᱟᱠᱟᱱᱟ

ᱱᱤᱛ ᱫᱚ ᱟᱡ ᱮ ᱥᱮᱴᱮᱨ ᱟᱠᱟᱱᱟ ᱟᱡᱟᱜ ᱨᱟᱡᱽ ᱜᱮ ᱪᱟᱹᱞᱩᱜ-ᱟ ᱾

ᱚᱠᱚᱭ ᱚᱠᱟ ᱨᱮ ᱢᱮᱱᱟᱜ ᱯᱮᱭᱟ ᱞᱚᱜᱚᱱ ᱨᱩᱣᱟᱹᱲ ᱯᱮ ᱚᱲᱟᱜ ᱛᱮ ᱚᱠᱚᱭ ᱪᱮᱫ ᱯᱮ ᱠᱟᱹᱢᱤ ᱠᱟᱱᱟ ᱞᱚᱜᱚᱱ ᱪᱟᱵᱟᱭ ᱯᱮ ᱾

ᱦᱮᱸᱫᱮ ᱪᱟᱫᱚᱨ ᱛᱮ ᱡᱚᱛᱚᱣᱟᱜ ᱮ ᱩᱭᱩ ᱯᱚᱴᱚᱢ ᱠᱮᱫ ᱟ ᱱᱤᱛ ᱫᱚ ᱟᱡ ᱮ ᱥᱮᱴᱮᱨ ᱟᱠᱟᱱᱟ ᱟᱡᱟᱜ ᱨᱟᱡᱽ ᱜᱮ ᱪᱟᱹᱞᱩᱜ-ᱟ ᱾

ᱢᱮᱫ ᱨᱮ ᱪᱮᱫ ᱪᱚᱭ ᱛᱤᱨᱯᱤᱭᱟᱫ ᱵᱚᱱᱟ ᱢᱮᱫ ᱜᱮ ᱵᱟᱭ ᱵᱮᱸᱜᱮᱫᱚᱜ ᱠᱟᱱᱟ ᱟᱹᱛᱩᱨᱚᱜ ᱠᱟᱱᱟ, ᱡᱟᱹᱯᱤᱫᱚᱜ ᱠᱟᱱᱟ ᱾

ᱢᱟ! ᱡᱟᱦᱟᱸᱱᱟᱜ ᱜᱮ ᱚᱛ ᱨᱮ, ᱯᱟᱨᱠᱚᱢ ᱨᱮ ᱟᱴᱮᱫ ᱠᱟᱛᱮ ᱡᱤᱨᱟᱹᱣ ᱡᱚᱝ ᱯᱮ ᱱᱤᱛ ᱫᱚ ᱟᱡ ᱮ ᱥᱮᱴᱮᱨ ᱟᱠᱟᱱᱟ ᱟᱡᱟᱜ ᱨᱟᱡᱽ ᱜᱮ ᱪᱟᱹᱞᱩᱜ-ᱟ ᱾

ᱡᱟᱞᱟᱢ

ᱯᱷᱮᱥᱵᱩᱠ-ᱡᱟᱞᱟᱢ ᱠᱷᱚᱱ ᱵᱟᱹᱲᱭᱟᱹ ᱛᱮᱧ ᱯᱩᱪᱩᱡ ᱮᱱᱟ ᱾

ᱵᱷᱟᱹᱵᱤ ᱞᱮᱫᱟᱹᱧ ᱱᱤᱛ ᱫᱚ ᱥᱟᱹᱱᱛᱤ ᱛᱮᱧ ᱯᱟᱭᱨᱟ ᱵᱟᱲᱟᱭᱟ ᱚᱠᱟ ᱥᱮᱫ ᱤᱪᱷᱟᱹ ᱚᱱᱛᱮᱧ ᱯᱟᱭᱨᱟ ᱥᱮᱱᱚᱜ-ᱟ ᱾

ᱢᱟ ᱟᱨᱦᱚᱸ ᱦᱩᱣᱟᱴᱥᱟᱯ-ᱡᱟᱞᱟᱢ ᱨᱮᱧ ᱡᱷᱟᱹᱞᱤᱭᱮᱱ! ᱚᱱᱰᱮᱧ ᱯᱷᱮᱧᱪᱚᱲ ᱵᱟᱲᱟᱭᱮᱱᱟ ᱵᱟᱹᱲᱭᱟᱹ ᱛᱮᱧ ᱯᱩᱪᱩᱡ ᱮᱱᱟ ᱾

ᱮᱴᱟᱜ ᱥᱮᱫ ᱤᱧ ᱢᱚᱦᱰᱟ ᱮᱱᱟ ᱢᱟ! ᱛᱤᱱ ᱨᱮᱪᱚ ᱤᱱᱥᱴᱟᱜᱽᱨᱟᱢ ᱡᱟᱞᱟᱢ ᱨᱮᱧ ᱯᱟᱲᱟᱣ ᱟᱠᱟᱱ ᱤᱧ ᱫᱚ ᱛᱷᱤᱛ ᱜᱮ ᱵᱟᱝ ᱾

ᱚᱱᱟ ᱡᱟᱞᱟᱢ ᱠᱷᱚᱱ ᱯᱩᱪᱩᱡᱚᱜ ᱞᱟᱹᱜᱤᱫ ᱡᱩᱨ ᱛᱮᱧ ᱯᱷᱮᱧᱪᱚᱲ ᱞᱮᱱᱟ ᱭᱩᱴᱭᱩᱵᱽ ᱡᱟᱞᱟᱢ ᱨᱮ ᱯᱟᱹᱥᱤᱨ ᱠᱟᱛᱮᱧ ᱞᱟᱴᱠᱟᱣ ᱮᱱᱟ ᱾

ᱟᱫᱚᱸᱧ ᱛᱷᱤᱨ ᱜᱚᱫ ᱮᱱᱟ ᱾

ᱦᱟᱭ! ᱜᱚᱴᱟ ᱜᱮᱭᱟ ᱡᱟᱞᱟᱢ ᱠᱚ ᱚᱰᱟᱣ ᱟᱠᱟᱫ ᱫᱚ ᱱᱩᱠᱩ ᱡᱟᱞᱟᱢᱤᱭᱟᱹ ᱾

ᱤᱯᱤᱞ ᱠᱚᱣᱟᱜ ᱚᱠᱷᱚ ᱮᱱᱮᱡ

ᱥᱤᱧ ᱪᱟᱸᱫᱚᱭ ᱧᱤᱨᱮᱱ ᱠᱷᱟᱱ ᱡᱟᱸᱜᱟ ᱛᱷᱚᱯᱟ ᱵᱟᱝ ᱥᱟᱰᱮ ᱚᱪᱚ ᱠᱟᱛᱮ ᱧᱤᱫᱟᱹᱭ ᱥᱮᱴᱮᱨ ᱮᱱᱟ ᱵᱟᱹᱭ ᱵᱟᱹᱭ ᱛᱮ ᱾

ᱩᱱᱤ ᱯᱟᱸᱡᱟ ᱯᱟᱸᱡᱟ ᱛᱮ ᱠᱮᱪᱟᱜ ᱪᱟᱸᱫᱚ, ᱤᱯᱤᱞ ᱮᱸᱜᱮᱞ ᱦᱚᱸᱠᱚ ᱦᱮᱡ ᱮᱱᱟ ᱾

ᱟᱫᱚ ᱵᱟᱹᱭ ᱵᱟᱹᱭ ᱛᱮᱠᱚ ᱟᱬᱜᱚᱭᱮᱱᱟ ᱵᱩᱰᱷᱟᱹᱜᱚᱲᱚᱢ ᱜᱟᱰᱟ ᱫᱟᱜ ᱨᱮ ᱾

ᱜᱚᱴᱟ ᱧᱤᱫᱟᱹ ᱚᱱᱰᱮ ᱠᱚ ᱮᱱᱮᱡ ᱠᱮᱫ ᱟ ᱚᱠᱷᱚ ᱠᱮᱪᱟᱜ ᱪᱟᱸᱫᱚ, ᱤᱯᱤᱞ ᱮᱸᱜᱮᱞ ᱾

ᱥᱮᱛᱟᱜ ᱦᱤᱡᱩᱜ ᱨᱮᱭᱟᱜ ᱛᱷᱚᱯᱟ ᱥᱟᱰᱮ ᱟᱸᱡᱚᱢ ᱥᱟᱶᱛᱮ ᱟᱯᱱᱟᱨᱟᱜ ᱚᱲᱟᱜ ᱨᱩᱣᱟᱹᱲ ᱚ ᱮᱦᱚᱵ ᱠᱮᱫ ᱟ ᱤᱯᱤᱞ ᱮᱸᱜᱮᱞ, ᱠᱮᱪᱟᱜ ᱪᱟᱸᱫᱚ ᱾

ᱵᱚᱛᱚᱨ ᱮ ᱠᱩᱫᱟᱹᱣ ᱟᱠᱟᱫᱤᱧ

ᱧᱤᱫᱟᱹ ᱫᱟᱲᱟᱱ ᱡᱚᱠᱷᱮᱡ ᱤᱧ ᱫᱚᱸᱧ ᱵᱚᱨᱚᱜ-ᱟ ᱟᱹᱲᱤᱡ ᱛᱮᱡ ᱢᱚᱱᱮᱭᱟᱹᱧ ᱯᱟᱞᱮ ᱰᱟᱹᱱ ᱠᱚ ᱠᱩᱫᱟᱹᱣ ᱟᱠᱟᱫᱤᱧ ᱯᱟᱞᱮ ᱱᱟᱡᱚᱢ ᱠᱚ ᱯᱟᱸᱡᱟ ᱟᱠᱟᱫᱤᱧ ᱾

ᱵᱷᱟᱹᱵᱤᱛᱟᱹᱧ ᱯᱟᱞᱮ ᱪᱮᱴᱨᱟ ᱛᱟᱱᱟᱜ ᱮ ᱛᱟᱬᱟᱜ ᱟᱠᱟᱣᱟᱫ ᱫᱤᱧ ᱯᱟᱞᱮ ᱦᱟᱰᱜᱟᱨ ᱛᱟᱱᱟᱜ ᱮ ᱛᱟᱲᱟᱢ ᱟᱠᱟᱫ ᱤᱧ ᱛᱟᱭᱚᱢ ᱛᱟᱭᱚᱢ ᱛᱮ ᱾

ᱛᱟᱭᱚᱢ ᱥᱮᱫ ᱠᱚᱭᱚᱜ ᱨᱩᱣᱟᱹᱲ ᱥᱟᱹᱱᱟᱹᱧᱟ ᱤᱠᱷᱟᱹᱱ ᱜᱩᱨᱩ ᱠᱚᱠᱚ ᱢᱮᱱ ᱟᱠᱟᱫ ᱵᱚᱸᱜᱟ ᱠᱚᱣᱟᱜ ᱧᱩᱛᱩᱢ ᱧᱩᱢ ᱛᱟᱭᱚᱢ ᱛᱟᱭᱚᱢ ᱥᱮᱫ ᱠᱚᱭᱚᱜ ᱨᱩᱣᱟᱹᱲ ᱢᱟᱱᱟ ᱜᱮᱭᱟ ᱾

ᱛᱮᱦᱮᱧ ᱫᱚ ᱤᱧ ᱟᱹᱰᱤ ᱡᱩᱨᱤᱧ ᱵᱚᱨᱚ ᱮᱱᱟ ᱪᱮᱫ ᱪᱚ ᱤᱧ ᱛᱟᱭᱚᱢ ᱥᱮᱫ ᱨᱮ ᱞᱟᱴᱟ ᱥᱮᱫ ᱨᱮ ᱥᱟᱰᱮᱭᱮᱱᱟ ᱚᱱᱰᱮ ᱠᱷᱚᱱ ᱪᱤᱞᱤ ᱪᱚ ᱤᱧ ᱮ ᱯᱟᱸᱡᱟ ᱟᱠᱟᱫᱤᱧ ᱞᱮᱠᱟᱹᱧ ᱟᱹᱭᱠᱟᱹᱣ ᱠᱮᱫ ᱟ ᱾

ᱯᱟᱪᱷᱮ ᱛᱟᱭᱚᱢ ᱠᱷᱚᱱ ᱤᱧ ᱮ ᱦᱟᱹᱲᱩᱵ ᱮᱢᱟᱱᱤᱧᱟ, ᱯᱟᱪᱷᱮ ᱛᱟᱭᱚᱢ ᱠᱷᱚᱱ ᱮ ᱚᱨ ᱨᱩᱣᱟᱹᱲ ᱤᱧᱟ?

ᱠᱚᱭᱚᱜ ᱨᱩᱣᱟᱹᱲ ᱥᱟᱱᱟᱹᱧᱟ ᱤᱠᱷᱟᱹᱱ ᱜᱩᱨᱩ ᱠᱚᱠᱚ ᱢᱮᱱ ᱟᱠᱟᱫ ᱵᱚᱸᱜᱟ ᱠᱚᱣᱟᱜ ᱧᱩᱛᱩᱢ ᱧᱩᱢ ᱛᱟᱭᱚᱢ ᱛᱟᱭᱚᱢ ᱥᱮᱫ ᱠᱚᱭᱚᱜ ᱨᱩᱣᱟᱹᱲ ᱢᱟᱱᱟ ᱜᱮᱭᱟ ᱾

ᱢᱟᱬᱟᱝ ᱨᱮᱱ ᱫᱚ ᱡᱟᱦᱟᱱᱤᱡ ᱜᱮ ᱩᱱᱟᱹᱜ ᱵᱟᱹᱧ ᱵᱚᱨᱚ ᱟᱠᱚᱣᱟ ᱤᱠᱷᱟᱹᱱ ᱛᱟᱭᱚᱢ ᱨᱮᱱ ᱫᱚ ᱟᱹᱰᱤ ᱛᱮᱫ ᱜᱮᱧ ᱵᱚᱨᱚ ᱟᱠᱚᱣᱟ ᱾

ᱜᱩᱨᱩᱣᱟᱜ ᱠᱟᱛᱷᱟ ᱮᱱᱰᱟᱜ ᱠᱟᱛᱮ ᱛᱟᱭᱚᱢ ᱥᱮᱫ ᱤᱧ ᱠᱚᱭᱚᱜ ᱨᱩᱣᱟᱹᱲ ᱠᱮᱫ ᱜᱮᱭᱟ ᱰᱟᱹᱱ, ᱱᱟᱡᱚᱢ, ᱪᱮᱴᱨᱟ, ᱦᱟᱰᱜᱟᱨ ᱤᱧ ᱫᱚ ᱪᱤᱞᱤ ᱦᱚᱸ ᱵᱟᱠᱚ ᱠᱩᱫᱟᱹᱣ ᱟᱠᱟᱫᱤᱧ ᱪᱤᱞᱤ ᱦᱚᱸ ᱵᱟᱠᱚ ᱯᱟᱸᱡᱟ ᱟᱠᱟᱫ᱾ᱧ ᱤᱧ ᱫᱚ ᱵᱚᱛᱚᱨ ᱜᱮ ᱠᱩᱫᱟᱹᱣ ᱟᱠᱟᱫᱤᱧ ᱵᱚᱛᱚᱨ ᱜᱮ ᱯᱟᱸᱡᱟ ᱟᱠᱟᱫᱤᱧ ᱾

ᱟᱬᱜᱚᱭᱮᱱᱟᱢ

ᱟᱬᱜᱚᱭᱮᱱᱟᱢ ᱱᱟᱯᱟᱭᱮᱱᱟᱢ ᱤᱧᱟᱜ ᱦᱚᱲᱢᱚ ᱨᱮᱢ ᱛᱟᱦᱮᱸ ᱠᱟᱱᱟ ᱦᱚᱲᱢᱚ ᱛᱤᱧ ᱨᱟᱣᱟᱞ ᱮᱱᱟ ᱾

ᱟᱹᱨᱩᱵ ᱠᱮᱫ ᱢᱮᱭᱟᱹᱧ ᱥᱟᱯᱷᱟ ᱠᱮᱫ ᱢᱮᱭᱟᱹᱧ ᱪᱷᱩᱛ ᱠᱮᱫ ᱢᱮᱭᱟᱹᱧ ᱪᱷᱟᱹᱴᱭᱟᱹᱨ ᱠᱮᱫ ᱢᱮᱭᱟᱹᱧ ᱡᱟᱹᱛᱤ ᱠᱮᱫ ᱢᱮᱭᱟᱹᱧ ᱧᱩᱛᱩᱢ ᱠᱮᱫ ᱢᱮᱭᱟᱹᱧ ᱾

ᱢᱟ ᱱᱤᱛ ᱫᱚ ᱫᱟᱬᱟ ᱡᱚᱝ ᱢᱮ ᱦᱟᱨᱟ ᱡᱚᱝ ᱢᱮ ᱟᱢᱟᱜ ᱚᱛᱮᱛ ᱨᱮ,

ᱦᱚᱲᱟᱜ ᱵᱷᱟᱹᱞᱟᱹᱭ ᱠᱟᱹᱢᱤ ᱢᱮ ᱥᱤᱨᱤᱡᱽ ᱛᱟᱢ ᱥᱟᱨᱛᱚᱠ ᱢᱮ ᱾

ᱮ ᱢᱟᱨᱥᱟᱞᱤᱭᱟᱹ

ᱟᱢ ᱥᱟᱶ ᱢᱮᱫ ᱢᱮᱫ ᱵᱟᱹᱧ ᱧᱮᱯᱮᱞ ᱠᱮ ᱠᱟᱱᱟ ᱢᱮᱫ ᱛᱤᱧ ᱟᱛᱟᱨᱚᱜ ᱠᱟᱱᱟ ᱡᱷᱟᱯᱥᱟ ᱡᱷᱟᱯᱥᱟᱹᱧ ᱠᱚᱭᱚᱜᱮᱫ ᱫᱷᱩᱸᱫᱽ ᱜᱮᱧ ᱧᱮᱧᱟᱢᱮᱫ ᱜᱚᱴᱟ ᱯᱟᱲᱟ ᱾

ᱡᱚᱛᱚ ᱦᱚᱲ ᱪᱮᱛᱟᱱ ᱨᱮᱢ ᱛᱟᱨᱥᱮ ᱟᱢᱟᱜ ᱫᱩᱞᱟᱹᱲ ᱛᱟᱨᱟᱥ ᱚᱠᱟ ᱡᱷᱚᱜ ᱫᱚ ᱮᱞᱟᱝ ᱞᱮ ᱚᱠᱟ ᱡᱷᱚᱜ ᱫᱚ ᱩᱨᱜᱩᱢ ᱞᱮ ᱾

ᱟᱢᱟᱜ ᱫᱟᱲᱮ ᱜᱮᱛᱚ ᱟᱞᱮ ᱢᱟᱞᱮ ᱡᱚᱢᱮᱫ ᱰᱷᱩᱞᱟᱹ ᱪᱮᱛᱟᱱ ᱨᱮᱞᱮ ᱥᱟᱹᱣᱛᱤ ᱫᱚᱦᱚᱭᱮᱫ

ᱡᱚᱛᱚ ᱦᱚᱲ ᱪᱮᱛᱟᱱ ᱨᱮ ᱥᱚᱢᱟᱱ ᱛᱮᱢ ᱛᱟᱨᱥᱮ ᱟᱢᱟᱜ ᱫᱩᱞᱟᱹᱲ ᱛᱟᱨᱟᱥ ᱾

ᱵᱟᱰᱟᱭᱟᱢ ᱢᱟᱱᱛᱟᱨ ᱥᱮ ᱡᱷᱟᱹᱨᱱᱤ ᱟᱢᱮᱢ ᱦᱤᱡᱩᱜ ᱟᱞᱮ ᱞᱮ ᱮᱵᱷᱮᱱᱚᱜ ᱟᱢᱮᱢ ᱨᱩᱣᱟᱹᱲ ᱟᱞᱮ ᱞᱮ ᱡᱟᱹᱯᱤᱫᱽ ᱾

ᱡᱮᱜᱮᱛ ᱜᱚᱴᱟᱢ ᱮᱨᱟ ᱢᱟᱨᱥᱟᱞ ᱮ ᱢᱟᱨᱥᱟᱞᱤᱭᱟᱹ!

ᱟᱢ ᱫᱚ ᱵᱟᱢ ᱦᱤᱡᱩᱜ, ᱵᱟᱢ ᱨᱩᱣᱟᱹᱲ ᱮᱱᱰᱮ ᱜᱮᱢ ᱛᱟᱦᱮᱸ ᱠᱚᱜ ᱟᱞᱮ ᱜᱮ ᱵᱩᱞ ᱦᱚᱲ ᱞᱮᱠᱟ ᱞᱮ ᱟᱹᱪᱩᱨᱚᱜ ᱵᱷᱟᱸᱭ ᱵᱷᱟᱸᱭ ᱾

ᱵᱷᱮᱣᱱᱟᱜ ᱟᱞᱮ, ᱢᱚᱱᱮᱭᱟᱞᱮ ᱟᱢ ᱫᱚᱢ ᱦᱮᱡ ᱟᱠᱟᱱ ᱟᱞᱮ ᱦᱩᱜᱨᱤ ᱵᱤᱱ ᱨᱚᱯᱚᱲ ᱛᱮᱜᱮᱢ ᱨᱩᱣᱟᱹᱲ ᱡᱚᱝ ᱠᱟᱱ ᱵᱟᱹᱭ ᱵᱟᱹᱭ ᱛᱮ, ᱮ ᱢᱟᱨᱥᱟᱞᱤᱭᱟᱹ!

ᱚᱠᱟ ᱨᱮᱢ ᱛᱟᱦᱮᱸ ᱠᱟᱱᱟ ᱦᱚᱞᱟ?

ᱚᱠᱟ ᱨᱮᱢ ᱛᱟᱦᱮᱸ ᱠᱟᱱᱟ ᱦᱚᱞᱟ ᱵᱟᱢ ᱦᱮᱡ ᱞᱮᱱᱟ ᱪᱮᱫᱟᱜ? ᱵᱟᱝ ᱫᱚ ᱨᱟᱜ ᱡᱚᱝ ᱮᱢ ᱪᱟᱞᱟᱣ ᱞᱮᱱ ᱜᱚᱡ ᱚᱲᱟᱜ!

ᱩᱱᱟᱹᱜ ᱮᱢ ᱨᱟᱜ ᱠᱮᱫ ᱟ ᱵᱚᱦᱚᱜ ᱠᱩᱴᱟᱹᱢ ᱟᱛᱮ ᱥᱮᱨᱢᱟ ᱥᱟᱱᱟᱢ ᱟᱸᱫᱚᱲᱮᱱ ᱚᱱᱟ ᱥᱟᱰᱮ ᱛᱮ ᱵᱟᱹᱫᱽ ᱵᱟᱹᱭᱦᱟᱹᱲ ᱞᱟᱞᱮ ᱪᱟᱯᱮᱭᱮᱱ ᱟᱢᱟᱜ ᱢᱮᱫ ᱫᱟᱜ ᱛᱮ ᱾

ᱟᱢᱟᱜ ᱵᱚᱦᱚᱜ ᱛᱟᱹᱯᱤᱧ ᱛᱮᱜᱮ ᱯᱟᱞᱮ ᱥᱮᱨᱢᱟ ᱜᱚᱴᱟ ᱵᱤᱞᱤᱫ ᱵᱟᱞᱟᱝ ᱮᱱ ᱵᱟᱨᱭᱟ ᱤᱛᱤᱞ ᱫᱷᱤᱨᱤ ᱠᱚᱴᱮᱡ ᱛᱮ ᱥᱮᱝᱜᱮᱞ ᱚᱰᱚᱠᱚᱜ ᱞᱮᱠᱟ ᱾

ᱚᱠᱟ ᱨᱮᱢ ᱛᱟᱦᱮᱸ ᱠᱟᱱᱟ ᱦᱚᱞᱟ? ᱵᱟᱝ ᱫᱚ ᱫᱟᱜ ᱞᱩᱢ ᱪᱟᱞᱟᱣ ᱞᱮᱱ ᱯᱮᱨᱮᱡ ᱴᱷᱤᱞᱤᱢ ᱛᱟᱹᱠᱤᱡ ᱠᱮᱫ ᱫᱷᱤᱨᱤ ᱦᱩᱴᱩᱵ ᱨᱮ ᱴᱷᱤᱞᱤ ᱯᱚᱥᱟᱜ ᱮᱱ ᱫᱟᱜ ᱡᱚᱨᱚᱭᱮᱱ ᱜᱟᱰᱟ, ᱢᱩᱰᱩ ᱞᱟᱞᱮ ᱪᱟᱯᱮᱭᱮᱱ ᱾

ᱟᱢ ᱫᱚ ᱯᱚᱥᱟᱜ ᱴᱷᱤᱞᱤ ᱦᱚᱵᱚᱨ ᱠᱟᱛᱮᱢ ᱨᱟᱨᱟᱜ ᱠᱟᱱ ᱛᱟᱦᱮᱸᱫ ᱜᱚᱴᱟ ᱥᱤᱧ ᱚᱱᱟ ᱛᱮᱜᱮ ᱵᱟᱢ ᱦᱮᱡ ᱞᱮᱱ!

ᱚᱠᱟ ᱨᱮᱢ ᱛᱟᱦᱮᱸ ᱠᱟᱱᱟ ᱦᱚᱞᱟ? ᱵᱟᱝ ᱫᱚ ᱞᱟᱜᱽᱬᱮ ᱮᱱᱮᱡ ᱮᱢ ᱪᱟᱞᱟᱣ ᱞᱮᱱ ᱛᱩᱢᱫᱟᱜ, ᱴᱟᱢᱟᱠ ᱥᱟᱰᱮ ᱟᱧᱡᱚᱢᱚᱜ ᱠᱟᱱ ᱛᱟᱦᱮᱸᱫ ᱪᱮᱛᱟᱱ ᱴᱚᱞᱟ ᱨᱮ, ᱩᱱᱟᱹᱜ ᱮᱢ ᱮᱱᱮᱡ ᱠᱮᱫ ᱫᱷᱩᱲᱤ ᱫᱚ ᱵᱟᱝᱟ ᱡᱟᱹᱲᱤ ᱜᱮ ᱰᱤᱜᱽᱞᱟᱹᱣᱮᱱ ᱟᱞᱮ ᱚᱲᱟᱜ ᱥᱟᱹᱲᱤᱢ ᱠᱷᱚᱱ ᱫᱟᱜ ᱡᱚᱨᱚᱭᱮᱱ!!

ᱫᱷᱟᱹᱨᱛᱤ ᱠᱚᱲᱟᱢ

ᱵᱟᱹᱭᱥᱟᱹᱠ

ᱱᱮᱛᱟᱨ ᱫᱚ ᱠᱮᱴᱮᱡ ᱟᱠᱟᱱ ᱫᱷᱟᱹᱨᱛᱤ ᱠᱚᱲᱟᱢ ᱩᱱᱤ ᱱᱤᱴᱷᱩᱨ ᱟᱠᱟᱱ ᱞᱚᱞᱚ ᱜᱮ ᱥᱟᱦᱮᱫ ᱮᱫᱟ ᱯᱟᱨᱟᱴ ᱯᱟᱨᱟᱴ ᱮ ᱯᱟᱜᱦᱟᱨ ᱠᱟᱱᱟ ᱾

ᱟᱥᱟᱲ

ᱱᱮᱛᱟᱨ ᱱᱚᱨᱚᱢ ᱟᱠᱟᱱ ᱯᱤᱨᱛᱷᱤᱢᱤ ᱠᱚᱲᱟᱢ ᱩᱱᱤ ᱫᱩᱜᱞᱟᱹᱲ ᱠᱟᱱ ᱛᱤᱨᱯᱤ ᱮᱫᱟᱭ ᱢᱟᱱᱛᱟᱨ ᱫᱟᱜ ᱡᱚᱛᱚ ᱦᱚᱲ ᱪᱮᱛᱟᱱ ᱾

ᱵᱷᱟᱫᱚᱨ

ᱱᱮᱛᱟᱨ ᱯᱷᱩᱞᱟᱹᱣ ᱟᱠᱟᱱ ᱫᱷᱟᱹᱨᱛᱤ ᱠᱚᱲᱟᱢ ᱯᱷᱩᱞᱟᱹᱣ ᱟᱠᱟᱱ ᱠᱚᱲᱟᱢ ᱨᱮ ᱟᱭᱳᱭ ᱥᱟᱹᱣᱛᱤ ᱫᱚᱦᱚ ᱟᱠᱟᱫ ᱟᱡ ᱨᱮᱱ ᱦᱚᱱ ᱜᱟᱬᱟ ᱠᱚ ᱞᱟᱹᱜᱤᱫ ᱡᱚᱢᱟᱜ ᱾

ᱟᱜᱷᱟᱬ

ᱱᱮᱛᱟᱨ ᱪᱚᱯᱚᱫ ᱮᱱ ᱚᱛᱮᱛ ᱠᱚᱲᱟᱢ ᱯᱟᱞᱮ ᱫᱷᱟᱹᱨᱛᱤ ᱵᱩᱰᱷᱤᱭᱮᱱ! ᱟᱭᱟᱜ ᱠᱚᱲᱟᱢ ᱨᱮᱭᱟᱜ ᱡᱚᱢᱟᱜ ᱢᱟᱹᱱᱢᱤ ᱠᱚ ᱥᱤᱲᱩᱵ ᱪᱟᱵᱟ ᱠᱮᱫ ᱾

ᱛᱤᱡᱩ

ᱟᱢ ᱫᱚᱢ ᱛᱤᱡᱩ ᱠᱟᱱᱟ ᱛᱤᱡᱩ ᱞᱮᱠᱟ ᱛᱟᱦᱮᱸᱱ ᱢᱮ ᱠᱩᱝᱠᱟᱹᱞ ᱛᱤᱡᱩ ᱴᱷᱮᱱ ᱫᱚ ᱪᱮᱫ ᱠᱷᱟᱹᱛᱤᱨ ᱮᱢ ᱟᱹᱛᱠᱤᱨ ᱚᱪᱚᱜ ᱠᱟᱱᱟ?

ᱟᱡᱟᱜ ᱡᱚᱢᱟᱜ ᱧᱩᱣᱟᱜ, ᱟᱪᱟᱨ ᱵᱮᱵᱷᱟᱨ ᱦᱚᱨᱚᱜ ᱵᱟᱸᱫᱮ, ᱡᱟᱹᱛᱤ ᱫᱷᱚᱨᱚᱢ ᱟᱯᱱᱟᱨ ᱠᱟᱛᱮ ᱟᱹᱰᱤ ᱨᱟᱹᱥᱠᱟᱹᱢ ᱵᱩᱡᱷᱟᱹᱣ ᱮᱫᱟ ᱵᱟᱝ?

ᱟᱡᱟᱜ ᱵᱷᱚᱬᱚ ᱵᱷᱚᱬᱚ ᱟᱸᱡᱚᱢ ᱛᱮ ᱟᱢ ᱦᱚᱸᱢ ᱵᱷᱚᱬᱚ ᱵᱷᱚᱬᱚᱜ ᱠᱟᱱ ᱫᱚ ᱟᱹᱰᱤ ᱨᱟᱹᱥᱠᱟᱹᱢ ᱵᱩᱡᱷᱟᱹᱣ ᱮᱫᱟ ᱵᱟᱝ?

ᱟᱢ ᱫᱚᱢ ᱛᱤᱡᱩ ᱠᱟᱱᱟ ᱛᱤᱡᱩ ᱞᱮᱠᱟ ᱛᱟᱦᱮᱸᱱ ᱢᱮ ᱠᱩᱝᱠᱟᱹᱞ ᱛᱤᱡᱩ ᱴᱷᱮᱱ ᱮᱢ ᱟᱹᱛᱠᱤᱨ ᱚᱪᱚᱜ ᱠᱷᱟᱱ ᱟᱢᱟᱜ ᱚᱥᱛᱤᱛᱣᱚ ᱟᱫᱚᱜ-ᱟ ᱾