ᱵᱮᱵᱷᱟᱨᱤᱭᱟᱹ:Fagu Baskey/sandbox/ᱟᱹᱲᱟᱹ ᱥᱟᱶ ᱤᱧ ᱵᱟᱨ

ᱚᱠᱟ ᱨᱮᱢ ᱛᱟᱦᱮᱸ ᱠᱟᱱᱟ ᱦᱚᱞᱟ? ᱥᱟᱯᱲᱟᱣ

ᱚᱠᱟ ᱨᱮᱢ ᱛᱟᱦᱮᱸ ᱠᱟᱱᱟ ᱦᱚᱞᱟ ᱵᱟᱢ ᱦᱮᱡ ᱞᱮᱱᱟ ᱪᱮᱫᱟᱜ? ᱵᱟᱝ ᱫᱚ ᱨᱟᱜ ᱡᱚᱝ ᱮᱢ ᱪᱟᱞᱟᱣ ᱞᱮᱱ ᱜᱚᱡ ᱚᱲᱟᱜ!

ᱩᱱᱟᱹᱜ ᱮᱢ ᱨᱟᱜ ᱠᱮᱫ ᱟ ᱵᱚᱦᱚᱜ ᱠᱩᱴᱟᱹᱢ ᱟᱛᱮ ᱥᱮᱨᱢᱟ ᱥᱟᱱᱟᱢ ᱟᱸᱫᱚᱲᱮᱱ ᱚᱱᱟ ᱥᱟᱰᱮ ᱛᱮ ᱵᱟᱹᱫᱽ ᱵᱟᱹᱭᱦᱟᱹᱲ ᱞᱟᱞᱮ ᱪᱟᱯᱮᱭᱮᱱ ᱟᱢᱟᱜ ᱢᱮᱫ ᱫᱟᱜ ᱛᱮ ᱾

ᱟᱢᱟᱜ ᱵᱚᱦᱚᱜ ᱛᱟᱹᱯᱤᱧ ᱛᱮᱜᱮ ᱯᱟᱞᱮ ᱥᱮᱨᱢᱟ ᱜᱚᱴᱟ ᱵᱤᱞᱤᱫ ᱵᱟᱞᱟᱝ ᱮᱱ ᱵᱟᱨᱭᱟ ᱤᱛᱤᱞ ᱫᱷᱤᱨᱤ ᱠᱚᱴᱮᱡ ᱛᱮ ᱥᱮᱝᱜᱮᱞ ᱚᱰᱚᱠᱚᱜ ᱞᱮᱠᱟ ᱾

ᱚᱠᱟ ᱨᱮᱢ ᱛᱟᱦᱮᱸ ᱠᱟᱱᱟ ᱦᱚᱞᱟ? ᱵᱟᱝ ᱫᱚ ᱫᱟᱜ ᱞᱩᱢ ᱪᱟᱞᱟᱣ ᱞᱮᱱ ᱯᱮᱨᱮᱡ ᱴᱷᱤᱞᱤᱢ ᱛᱟᱹᱠᱤᱡ ᱠᱮᱫ ᱫᱷᱤᱨᱤ ᱦᱩᱴᱩᱵ ᱨᱮ ᱴᱷᱤᱞᱤ ᱯᱚᱥᱟᱜ ᱮᱱ ᱫᱟᱜ ᱡᱚᱨᱚᱭᱮᱱ ᱜᱟᱰᱟ, ᱢᱩᱰᱩ ᱞᱟᱞᱮ ᱪᱟᱯᱮᱭᱮᱱ ᱾

ᱟᱢ ᱫᱚ ᱯᱚᱥᱟᱜ ᱴᱷᱤᱞᱤ ᱦᱚᱵᱚᱨ ᱠᱟᱛᱮᱢ ᱨᱟᱨᱟᱜ ᱠᱟᱱ ᱛᱟᱦᱮᱸᱫ ᱜᱚᱴᱟ ᱥᱤᱧ ᱚᱱᱟ ᱛᱮᱜᱮ ᱵᱟᱢ ᱦᱮᱡ ᱞᱮᱱ!

ᱚᱠᱟ ᱨᱮᱢ ᱛᱟᱦᱮᱸ ᱠᱟᱱᱟ ᱦᱚᱞᱟ? ᱵᱟᱝ ᱫᱚ ᱞᱟᱜᱽᱬᱮ ᱮᱱᱮᱡ ᱮᱢ ᱪᱟᱞᱟᱣ ᱞᱮᱱ ᱛᱩᱢᱫᱟᱜ, ᱴᱟᱢᱟᱠ ᱥᱟᱰᱮ ᱟᱧᱡᱚᱢᱚᱜ ᱠᱟᱱ ᱛᱟᱦᱮᱸᱫ ᱪᱮᱛᱟᱱ ᱴᱚᱞᱟ ᱨᱮ, ᱩᱱᱟᱹᱜ ᱮᱢ ᱮᱱᱮᱡ ᱠᱮᱫ ᱫᱷᱩᱲᱤ ᱫᱚ ᱵᱟᱝᱟ ᱡᱟᱹᱲᱤ ᱜᱮ ᱰᱤᱜᱽᱞᱟᱹᱣᱮᱱ ᱟᱞᱮ ᱚᱲᱟᱜ ᱥᱟᱹᱲᱤᱢ ᱠᱷᱚᱱ ᱫᱟᱜ ᱡᱚᱨᱚᱭᱮᱱ!!

ᱫᱷᱟᱹᱨᱛᱤ ᱠᱚᱲᱟᱢ ᱥᱟᱯᱲᱟᱣ

ᱵᱟᱹᱭᱥᱟᱹᱠ

ᱱᱮᱛᱟᱨ ᱫᱚ ᱠᱮᱴᱮᱡ ᱟᱠᱟᱱ ᱫᱷᱟᱹᱨᱛᱤ ᱠᱚᱲᱟᱢ ᱩᱱᱤ ᱱᱤᱴᱷᱩᱨ ᱟᱠᱟᱱ ᱞᱚᱞᱚ ᱜᱮ ᱥᱟᱦᱮᱫ ᱮᱫᱟ ᱯᱟᱨᱟᱴ ᱯᱟᱨᱟᱴ ᱮ ᱯᱟᱜᱦᱟᱨ ᱠᱟᱱᱟ ᱾

ᱟᱥᱟᱲ

ᱱᱮᱛᱟᱨ ᱱᱚᱨᱚᱢ ᱟᱠᱟᱱ ᱯᱤᱨᱛᱷᱤᱢᱤ ᱠᱚᱲᱟᱢ ᱩᱱᱤ ᱫᱩᱜᱞᱟᱹᱲ ᱠᱟᱱ ᱛᱤᱨᱯᱤ ᱮᱫᱟᱭ ᱢᱟᱱᱛᱟᱨ ᱫᱟᱜ ᱡᱚᱛᱚ ᱦᱚᱲ ᱪᱮᱛᱟᱱ ᱾

ᱵᱷᱟᱫᱚᱨ

ᱱᱮᱛᱟᱨ ᱯᱷᱩᱞᱟᱹᱣ ᱟᱠᱟᱱ ᱫᱷᱟᱹᱨᱛᱤ ᱠᱚᱲᱟᱢ ᱯᱷᱩᱞᱟᱹᱣ ᱟᱠᱟᱱ ᱠᱚᱲᱟᱢ ᱨᱮ ᱟᱭᱳᱭ ᱥᱟᱹᱣᱛᱤ ᱫᱚᱦᱚ ᱟᱠᱟᱫ ᱟᱡ ᱨᱮᱱ ᱦᱚᱱ ᱜᱟᱬᱟ ᱠᱚ ᱞᱟᱹᱜᱤᱫ ᱡᱚᱢᱟᱜ ᱾

ᱟᱜᱷᱟᱬ

ᱱᱮᱛᱟᱨ ᱪᱚᱯᱚᱫ ᱮᱱ ᱚᱛᱮᱛ ᱠᱚᱲᱟᱢ ᱯᱟᱞᱮ ᱫᱷᱟᱹᱨᱛᱤ ᱵᱩᱰᱷᱤᱭᱮᱱ! ᱟᱭᱟᱜ ᱠᱚᱲᱟᱢ ᱨᱮᱭᱟᱜ ᱡᱚᱢᱟᱜ ᱢᱟᱹᱱᱢᱤ ᱠᱚ ᱥᱤᱲᱩᱵ ᱪᱟᱵᱟ ᱠᱮᱫ ᱾

ᱛᱤᱡᱩ ᱥᱟᱯᱲᱟᱣ

ᱟᱢ ᱫᱚᱢ ᱛᱤᱡᱩ ᱠᱟᱱᱟ ᱛᱤᱡᱩ ᱞᱮᱠᱟ ᱛᱟᱦᱮᱸᱱ ᱢᱮ ᱠᱩᱝᱠᱟᱹᱞ ᱛᱤᱡᱩ ᱴᱷᱮᱱ ᱫᱚ ᱪᱮᱫ ᱠᱷᱟᱹᱛᱤᱨ ᱮᱢ ᱟᱹᱛᱠᱤᱨ ᱚᱪᱚᱜ ᱠᱟᱱᱟ?

ᱟᱡᱟᱜ ᱡᱚᱢᱟᱜ ᱧᱩᱣᱟᱜ, ᱟᱪᱟᱨ ᱵᱮᱵᱷᱟᱨ ᱦᱚᱨᱚᱜ ᱵᱟᱸᱫᱮ, ᱡᱟᱹᱛᱤ ᱫᱷᱚᱨᱚᱢ ᱟᱯᱱᱟᱨ ᱠᱟᱛᱮ ᱟᱹᱰᱤ ᱨᱟᱹᱥᱠᱟᱹᱢ ᱵᱩᱡᱷᱟᱹᱣ ᱮᱫᱟ ᱵᱟᱝ?

ᱟᱡᱟᱜ ᱵᱷᱚᱬᱚ ᱵᱷᱚᱬᱚ ᱟᱸᱡᱚᱢ ᱛᱮ ᱟᱢ ᱦᱚᱸᱢ ᱵᱷᱚᱬᱚ ᱵᱷᱚᱬᱚᱜ ᱠᱟᱱ ᱫᱚ ᱟᱹᱰᱤ ᱨᱟᱹᱥᱠᱟᱹᱢ ᱵᱩᱡᱷᱟᱹᱣ ᱮᱫᱟ ᱵᱟᱝ?

ᱟᱢ ᱫᱚᱢ ᱛᱤᱡᱩ ᱠᱟᱱᱟ ᱛᱤᱡᱩ ᱞᱮᱠᱟ ᱛᱟᱦᱮᱸᱱ ᱢᱮ ᱠᱩᱝᱠᱟᱹᱞ ᱛᱤᱡᱩ ᱴᱷᱮᱱ ᱮᱢ ᱟᱹᱛᱠᱤᱨ ᱚᱪᱚᱜ ᱠᱷᱟᱱ ᱟᱢᱟᱜ ᱚᱥᱛᱤᱛᱣᱚ ᱟᱫᱚᱜ-ᱟ ᱾

ᱫᱚᱨᱭᱟ ᱠᱷᱚᱱᱤᱧ ᱦᱮᱡ ᱟᱠᱟᱱ ᱥᱟᱯᱲᱟᱣ

ᱤᱧ ᱫᱚ ᱫᱚᱨᱭᱟ ᱠᱷᱚᱱᱤᱧ ᱦᱮᱡ ᱟᱠᱟᱱ ᱾

ᱦᱟᱱᱛᱮ ᱠᱷᱚᱱᱤᱧ ᱨᱟᱠᱟᱵ ᱞᱮᱱ ᱱᱚᱛᱮ ᱨᱮᱧ ᱧᱩᱨᱮᱱ ᱾

ᱢᱟᱹᱱᱢᱤᱭᱟᱜ ᱛᱮᱛᱟᱝ ᱢᱟᱨᱛᱚᱠ ᱚᱴᱚ ᱠᱟᱛᱮ ᱫᱟᱨᱮ ᱱᱟᱹᱬᱤᱭᱟᱜ ᱡᱤᱣᱤ ᱡᱤᱭᱟᱹᱲ ᱚᱴᱚ ᱠᱟᱛᱮ ᱠᱤᱨᱥᱤ ᱨᱮ ᱫᱟᱱᱟ ᱥᱟᱢᱵᱟᱣ ᱚᱴᱚ ᱠᱟᱛᱮ ᱢᱤᱨᱛᱤᱠᱟ ᱨᱮ ᱦᱟᱹᱨᱭᱟᱹᱲ ᱜᱮ ᱟᱹᱜᱩ ᱨᱩᱣᱟᱹᱲ ᱠᱟᱛᱮ ᱤᱧᱟᱜ ᱠᱚᱨᱛᱚᱵᱽᱭᱚ ᱥᱟᱹᱛ ᱠᱟᱛᱮ,

ᱤᱧ ᱫᱚ ᱟᱨᱦᱚᱸᱧ ᱨᱩᱣᱟᱹᱲ ᱡᱚᱝᱟ ᱫᱚᱨᱭᱟ ᱛᱮᱜᱮ ᱾

ᱫᱟᱱᱟᱝ ᱨᱮ ᱛᱟᱦᱮᱸ ᱠᱟᱛᱮ ᱥᱟᱯᱲᱟᱣ

ᱫᱟᱱᱟᱝ ᱨᱮ ᱛᱟᱦᱮᱸ ᱠᱟᱛᱮ ᱫᱟᱨᱮ ᱡᱚᱢᱟᱜ ᱤᱧ ᱮᱢᱟᱭᱟ,

ᱫᱟᱱᱟᱝ ᱨᱮ ᱛᱟᱦᱮᱸ ᱠᱟᱛᱮ ᱫᱟᱨᱮ ᱧᱩᱣᱟᱜ ᱤᱧ ᱮᱢᱟᱭᱟ,

ᱫᱟᱱᱟᱝ ᱨᱮ ᱛᱟᱦᱮᱸ ᱠᱟᱛᱮ ᱫᱟᱨᱮᱭᱟᱜ ᱵᱷᱟᱹᱞᱟᱹᱭ ᱤᱧ ᱠᱟᱹᱢᱤᱭᱟ ᱾

ᱫᱟᱱᱟᱝ ᱨᱮ ᱛᱟᱦᱮᱸ ᱠᱟᱛᱮ ᱟᱢᱟᱜ ᱪᱤᱛᱟᱹᱨ ᱤᱧ ᱨᱟᱠᱟᱵᱟ

ᱫᱟᱱᱟᱝ ᱨᱮ ᱛᱟᱦᱮᱸ ᱠᱟᱛᱮ ᱟᱢᱟᱜ ᱠᱩᱥᱤ ᱨᱟᱹᱥᱠᱟᱹᱧ ᱥᱟᱵ ᱫᱚᱦᱚᱭᱟ ᱾

ᱢᱟᱹᱱᱢᱤ ᱥᱟᱯᱲᱟᱣ

ᱪᱮᱬᱮ ᱞᱮᱠᱟ ᱵᱟᱭ ᱩᱰᱟᱹᱣ ᱫᱟᱲᱮᱭᱟᱜ ᱠᱷᱟᱹᱛᱤᱨ ᱵᱮᱱᱟᱣ ᱠᱮᱫᱟᱭ ᱩᱰᱟᱹᱜ ᱜᱟᱹᱰᱤ,

ᱦᱟᱹᱠᱩ ᱞᱮᱠᱟ ᱵᱟᱭ ᱯᱟᱭᱨᱟ ᱫᱟᱲᱮᱭᱟᱜ ᱠᱷᱟᱹᱛᱤᱨ ᱛᱮᱭᱟᱨ ᱠᱮᱫᱟᱭ ᱡᱟᱦᱟᱡᱽ,

ᱥᱤᱞᱤᱵ ᱞᱮᱠᱟ ᱵᱟᱭ ᱫᱟᱹᱲ ᱫᱟᱲᱮᱭᱟᱜ ᱠᱷᱟᱹᱛᱤᱨ ᱵᱮᱱᱟᱣ ᱠᱮᱫᱟᱭ ᱢᱴᱚᱨ ᱜᱟᱹᱰᱤ,

ᱢᱮᱨᱚᱢ ᱞᱮᱠᱟ ᱡᱚᱢᱟᱜ ᱵᱟᱭ ᱩᱞᱟᱹ ᱛᱩᱫ ᱫᱟᱲᱮᱭᱟᱜ ᱠᱷᱟᱹᱛᱤᱨ ᱯᱟᱹᱜᱩᱨᱟᱭ ᱯᱟᱱ ᱾

ᱢᱮᱱᱟᱢ ᱜᱮᱭᱟ? ᱥᱟᱯᱲᱟᱣ

ᱢᱟᱢᱚ! ᱟᱢ ᱫᱚ ᱱᱤᱛ ᱦᱟᱹᱵᱤᱡ ᱢᱮᱱᱟᱢ ᱜᱮᱭᱟ?

ᱥᱤᱧ ᱪᱟᱸᱫᱚᱭ ᱴᱚᱨᱪ ᱢᱟᱨᱥᱟᱞ ᱠᱮᱫ ᱢᱮ ᱨᱮᱦᱚᱸ ᱟᱹᱣᱨᱤᱢ ᱨᱩᱣᱟᱹᱲ ᱜᱮᱭᱟ?

ᱜᱚᱴᱟ ᱧᱤᱫᱟᱹᱢ ᱫᱟᱬᱟ ᱠᱮᱫ ᱨᱮᱦᱚᱸ ᱵᱟᱢ ᱫᱟᱬᱟ ᱵᱷᱟᱜᱟᱣ ᱟᱠᱟᱱ ᱜᱮᱭᱟ?

ᱟᱢᱟᱜ ᱨᱟᱡᱽ ᱪᱟᱵᱟᱭᱮᱱ ᱨᱮᱦᱚᱸ ᱢᱮᱱᱟᱢ ᱜᱮᱭᱟ ᱯᱟᱞᱮ ᱥᱤᱧ ᱪᱟᱸᱫᱚᱣᱟᱜ ᱨᱟᱡᱽ ᱮᱢ ᱧᱮᱞ ᱛᱚᱨᱟᱭ ᱞᱟᱹᱜᱤᱫ!

ᱟᱢ ᱨᱮᱱ ᱯᱚᱨᱡᱟ ᱤᱯᱤᱞ ᱮᱸᱜᱮᱞ ᱠᱚ ᱨᱩᱣᱟᱹᱲ ᱪᱟᱵᱟᱭᱮᱱ ᱨᱮᱦᱚᱸ ᱟᱢ ᱫᱚ ᱱᱤᱛ ᱦᱟᱹᱵᱤᱡ ᱢᱮᱱᱟᱢ ᱜᱮᱭᱟ ᱵᱟᱹᱭ ᱵᱟᱹᱭ ᱜᱮᱢ ᱛᱟᱲᱟᱢ ᱟᱠᱟᱫ ᱾

ᱯᱟᱞᱮ ᱫᱟᱲᱮ ᱛᱟᱢ ᱪᱟᱵᱟ ᱤᱫᱤᱭᱮᱱ!

ᱵᱟᱰᱟᱭᱟᱹᱧ ᱛᱮᱦᱮᱧ ᱟᱢ ᱵᱤᱞᱚᱢ ᱨᱮᱢ ᱦᱮᱡ ᱟᱠᱟᱱᱟ ᱞᱚᱜᱚᱱ ᱮᱢ ᱦᱤᱡᱩᱜ ᱨᱮᱥᱮᱫ ᱞᱚᱜᱚᱱ ᱫᱚᱢ ᱨᱩᱣᱟᱹᱲᱟ!

ᱞᱟᱸᱫᱟ ᱧᱚᱜ ᱠᱟᱛᱮ ᱟᱢᱮᱢ ᱢᱮᱱᱟ ᱱᱚᱶᱟ ᱢᱤᱨᱛᱤᱠᱟ ᱨᱮ ᱦᱤᱡᱩᱜ ᱟᱨ ᱥᱮᱱᱚᱜ ᱟᱯᱱᱟᱨᱟᱜ ᱛᱤ ᱨᱮᱫᱚ ᱵᱟᱹᱱᱩᱜ ᱡᱷᱚᱛᱚ ᱥᱤᱨᱡᱚᱱᱤᱭᱟᱹ ᱟᱜ ᱤᱪᱷᱟᱹ ᱛᱮ ᱦᱩᱭᱩᱜ ᱾

ᱨᱚᱝ ᱥᱟᱯᱲᱟᱣ

ᱱᱤᱛ ᱡᱟᱦᱟᱸ ᱨᱚᱝ ᱤᱧᱟᱜ ᱦᱚᱲᱢᱚ ᱨᱮᱢ ᱧᱮᱞ ᱮᱫᱟ ᱚᱱᱟ ᱫᱚ ᱫᱷᱤᱱᱟᱹᱝ ᱵᱟᱝ ᱛᱟᱦᱮᱸᱱᱟ ᱾

ᱫᱷᱤᱱᱟᱹᱝ ᱡᱟᱦᱟᱸ ᱨᱚᱝ ᱤᱧᱟᱜ ᱦᱚᱲᱢᱚ ᱨᱮᱢ ᱧᱮᱞᱟ ᱚᱱᱟ ᱜᱟᱯᱟ ᱵᱟᱝ ᱛᱟᱦᱮᱸᱱᱟ ᱾

ᱢᱤᱫᱴᱟᱝ ᱨᱚᱝ ᱞᱮᱛᱟᱲ ᱦᱚᱨᱚᱜ ᱠᱟᱛᱮ ᱛᱟᱦᱮᱸᱱ ᱫᱚ ᱚᱦᱚᱣᱟᱱ ᱜᱮᱭᱟ ᱾

ᱚᱠᱛᱚ ᱡᱟᱹᱱᱤ ᱦᱚᱲᱢᱚ ᱨᱮᱭᱟᱜ ᱨᱚᱝ ᱵᱚᱫᱚᱞ ᱦᱩᱭᱩᱜ-ᱟ ᱾

ᱦᱮᱡ ᱮᱱᱟᱢ ᱥᱟᱯᱲᱟᱣ

ᱟᱹᱣᱨᱤ ᱟᱹᱭᱩᱵᱚᱜ ᱨᱮᱜᱮ ᱦᱮᱡ ᱮᱱᱟᱢ! ᱟᱬᱜᱟᱛ ᱨᱮᱢ ᱦᱮᱡ ᱮᱱᱟ ᱱᱟᱯᱟᱭᱮᱱᱟ ᱟᱹᱭᱩᱵ ᱫᱚ ᱦᱚᱨ ᱠᱚᱢ ᱟᱫ ᱮᱢᱟᱱᱟ ᱾

ᱢᱟᱢᱚ ᱟᱢ ᱢᱟᱹᱧ ᱦᱚᱦᱚᱣᱟᱢ ᱤᱧ ᱟᱭᱳ ᱢᱟ ᱟᱢ ᱫᱟᱹᱭ ᱫᱟᱹᱭ ᱦᱩᱜᱨᱤ ᱵᱷᱟᱹᱜᱽᱱᱟᱹ ᱦᱩᱜᱨᱤ ᱜᱮ ᱟᱢ ᱫᱚᱢ ᱦᱤᱡᱩᱜ ᱾

ᱢᱤᱢᱤᱫ ᱫᱷᱟᱣ ᱫᱚ ᱚᱠᱟ ᱛᱮᱪᱚᱢ ᱥᱮᱱᱚᱜ ᱟᱞᱮ ᱱᱚᱛᱮ ᱵᱟᱢ ᱦᱤᱡᱩᱜ ᱾

ᱟᱫᱚ ᱤᱧ ᱟᱭᱳ ᱪᱮᱫ ᱮ ᱮᱜᱮᱨ ᱟᱠᱟᱫ ᱢᱮᱛᱮ ᱚᱲᱟᱜ ᱩᱛᱟᱹᱨ ᱵᱟᱢ ᱦᱤᱡᱩᱜ ᱯᱷᱟᱨᱟᱠ ᱯᱷᱟᱨᱟᱠ ᱛᱮᱢ ᱯᱟᱨᱚᱢᱚᱜ ᱾

ᱵᱚᱦᱚᱨ ᱜᱮ ᱯᱟᱞᱮᱢ ᱧᱟᱢ ᱟᱠᱟᱫ ᱜᱩᱨᱚᱜ-ᱟᱢ, ᱡᱟᱱᱟᱢᱚᱜ-ᱟᱢ ᱪᱟᱸᱫᱚ ᱯᱤᱪᱷᱤ ᱟᱢ ᱾

ᱦᱚᱨ ᱛᱮᱱᱤᱡ ᱥᱟᱯᱲᱟᱣ

ᱚᱠᱟ ᱥᱮᱫ ᱪᱚᱭ ᱢᱚᱦᱰᱟ ᱞᱮᱱ ᱩᱰᱟᱹᱜ ᱛᱩᱞᱩᱡ ᱦᱚᱨ ᱮ ᱠᱮᱫ,

ᱵᱟᱝ ᱫᱚ ᱦᱟᱱᱛᱮ ᱵᱟᱝ ᱫᱚ ᱱᱚᱛᱮ ᱚᱠᱟ ᱥᱮᱫ ᱮ ᱥᱮᱱᱚᱜ ᱵᱟᱭ ᱴᱷᱤᱠᱟᱹᱭ,

ᱟᱫᱚᱭ ᱨᱟᱜ ᱡᱚᱝᱟ ᱩᱰᱟᱹᱜ ᱛᱩᱞᱩᱡ ᱢᱮᱫ ᱫᱟᱜ ᱮ ᱡᱚᱨᱚᱭ ᱴᱚᱲᱚᱜ ᱴᱚᱲᱚᱜ,

ᱟᱡᱟᱜ ᱢᱮᱫ ᱫᱟᱜ ᱜᱮ ᱪᱟᱹᱥᱤᱭᱟᱜ ᱢᱮᱫᱦᱟᱶ ᱨᱮ ᱨᱟᱹᱥᱠᱟᱹᱭ ᱥᱟᱨᱥᱟᱣ ᱾

ᱡᱚᱱᱚᱜ ᱥᱟᱯᱲᱟᱣ

ᱥᱤᱨᱡᱚᱱᱤᱭᱟᱹ! ᱤᱧ ᱫᱚ ᱟᱢᱟᱜ ᱛᱤ ᱨᱮᱭᱟᱜ ᱡᱚᱱᱚᱜ ᱵᱮᱱᱟᱣ ᱠᱟᱹᱧ ᱢᱮ ᱾

ᱟᱢ ᱜᱮ ᱤᱧ ᱟᱛᱮ ᱚᱡᱽᱨᱟ, ᱡᱚᱵᱽᱨᱟ ᱡᱚᱜ ᱯᱷᱟᱨᱪᱟᱭ ᱢᱮ ᱚᱥᱤᱠᱤᱛ, ᱚᱜᱮᱟᱱ, ᱟᱸᱫᱷᱟ ᱯᱟᱹᱛᱭᱟᱹᱣ ᱦᱤᱥᱟᱹ, ᱦᱤᱨᱠᱟᱹ, ᱯᱤᱲᱟᱹ ᱯᱷᱟᱱᱰᱟ ᱤᱧ ᱟᱛᱮ ᱡᱚᱜ ᱯᱷᱟᱨᱪᱟᱭ ᱢᱮ ᱾

ᱤᱧᱤᱡ ᱴᱷᱩᱴᱠᱤᱜ ᱛᱮᱫᱚ ᱡᱮᱢᱚᱱ ᱡᱚᱛᱚᱣᱟᱜ ᱥᱟᱯᱷᱟ ᱥᱟᱹᱯᱷᱤ ᱠᱚᱜ ᱢᱟ ᱾

ᱵᱚᱸᱜᱟ ᱥᱟᱯᱲᱟᱣ

᱑ ᱦᱟᱴ ᱤᱧ ᱪᱟᱞᱟᱣ ᱞᱮᱱ ᱵᱚᱸᱜᱟ ᱡᱟᱠᱚ ᱧᱟᱢᱚᱜ ᱠᱟᱱ ᱠᱤᱨᱤᱧ ᱛᱮ ᱾

᱒ ᱟᱥᱲᱟᱹᱧ ᱪᱟᱞᱟᱣ ᱞᱮᱱ ᱠᱤᱨᱤᱧ ᱟᱹᱜᱩ ᱵᱚᱸᱜᱟ ᱴᱷᱮᱱ ᱵᱮᱱᱟᱣ ᱵᱚᱸᱜᱟ ᱴᱷᱮᱱ ᱢᱟᱹᱱᱢᱤ ᱡᱟᱠᱚ ᱵᱟᱠᱷᱮᱬᱮᱫ ᱢᱟᱹᱱᱢᱤ ᱡᱟᱠᱚ ᱱᱮᱦᱚᱸᱨ ᱡᱚᱦᱟᱨᱚᱜ ᱠᱟᱱ ᱾

᱓ ᱠᱩᱞᱦᱤ ᱨᱮᱧ ᱫᱩᱲᱩᱵ ᱞᱮᱱᱟ ᱰᱤ ᱡᱮ ᱟᱛᱮ, ᱮᱱᱮᱡ ᱟᱛᱮ ᱦᱚᱲᱠᱚ ᱦᱤᱡᱩᱜ ᱠᱟᱱ ᱧᱮᱞ ᱛᱮ ᱚᱱᱛᱮᱧ ᱥᱮᱱ ᱮᱱᱟ ᱵᱚᱸᱜᱟ ᱡᱟᱠᱚ ᱜᱚᱜ ᱟᱠᱟᱫᱮ ᱮᱱᱮᱡ ᱥᱮᱨᱮᱧ ᱟᱛᱮ ᱾

᱔ ᱟᱫᱚ ᱤᱧ ᱦᱚᱸᱧ ᱯᱟᱸᱡᱟ ᱠᱮᱫ ᱠᱚ ᱵᱚᱸᱜᱟ ᱡᱟᱠᱚ ᱞᱮᱵᱽᱫᱟ ᱜᱤᱰᱤ ᱠᱟᱫᱮ ᱜᱟᱰᱟ ᱫᱟᱜ ᱨᱮ ᱾

᱕ ᱡᱟᱦᱟᱸᱭᱟᱜ ᱡᱟᱸᱜᱟ ᱞᱟᱛᱟᱨ ᱨᱮ ᱦᱚᱞᱟ ᱠᱚ ᱱᱮᱦᱚᱸᱨ ᱡᱚᱦᱟᱨᱮᱫ ᱵᱟᱠᱷᱮᱬ ᱚᱦᱬᱮᱭᱮᱫ ᱛᱟᱦᱮᱸᱫ ᱟᱯᱱᱟᱨᱟᱜ ᱥᱩᱠ ᱫᱩᱠ ᱠᱚ ᱞᱟᱹᱭᱮᱫ ᱛᱟᱦᱮᱸᱫ ᱩᱱᱤ ᱛᱮᱦᱮᱧ ᱠᱚ ᱞᱮᱵᱽᱫᱟ ᱜᱤᱰᱤ ᱠᱟᱭ ᱠᱟᱱ ᱾

᱖ ᱵᱚᱸᱜᱟ ᱫᱚᱭᱟ ᱪᱮᱫ ᱪᱮᱠᱟ ᱯᱮ ᱱᱚᱝᱠᱟᱭᱮ ᱠᱟᱱᱟ ᱵᱚᱸᱜᱟ ᱫᱚ ᱵᱚᱸᱜᱟ ᱞᱮᱠᱟ ᱛᱟᱦᱮᱸ ᱚᱪᱚᱣᱟᱭ ᱯᱮ ᱾

ᱪᱟᱹᱛ ᱵᱚᱸᱜᱟ ᱩᱨᱱᱤ ᱥᱟᱯᱲᱟᱣ

ᱚᱠᱚᱭ ᱡᱟᱠᱚ ᱥᱤᱸᱫᱩᱨᱟᱫ ᱢᱮ ᱦᱚᱨᱟᱥᱤ ᱨᱮ? ᱦᱚᱨᱟᱥᱤ ᱨᱮᱭᱟᱜ ᱥᱤᱸᱫᱩᱨ ᱢᱟ ᱡᱩᱞᱩᱜ ᱠᱟᱱ ᱵᱚᱦᱚᱜ ᱛᱟᱢ ᱟᱛᱟᱨᱚᱜ ᱠᱟᱱ ᱾

ᱚᱠᱚᱭ ᱡᱟᱠᱚ ᱟᱨᱟᱣᱟᱫ ᱢᱮ ᱢᱟᱞᱟ? ᱢᱟᱞᱟ ᱡᱩᱞᱩᱜ ᱠᱟᱱ ᱠᱚᱲᱟᱢ ᱛᱟᱢ ᱞᱚᱜ ᱠᱟᱱ ᱾

ᱫᱮᱞᱟ ᱵᱚᱭᱦᱟ ᱦᱤᱡᱩᱜ ᱯᱮ ᱩᱨᱱᱤᱭᱟᱜ ᱦᱚᱨᱟᱥᱤ ᱨᱮᱭᱟᱜ ᱡᱩᱞᱩᱜ ᱥᱤᱸᱫᱩᱨ ᱫᱚᱵᱚ ᱵᱟᱹᱬᱤᱡ ᱠᱟᱜ-ᱟ ᱩᱨᱱᱤᱭᱟᱜ ᱠᱚᱲᱟᱢ ᱨᱮᱭᱟᱜ ᱡᱩᱞᱩᱜ ᱢᱟᱞᱟ ᱫᱚ ᱤᱬᱤᱡ ᱠᱟᱜ-ᱟ ᱾

ᱩᱨᱱᱤ ᱫᱚ ᱵᱟᱵᱚ ᱞᱚ ᱚᱪᱚᱣᱟᱭᱟ ᱵᱟᱵᱚ ᱟᱛᱟᱨ ᱚᱪᱚᱣᱟᱭᱟ ᱾

ᱥᱟᱶᱦᱮᱫ ᱥᱟᱜᱟᱲ ᱥᱟᱯᱲᱟᱣ

ᱥᱟᱶᱦᱮᱫ ᱥᱟᱜᱟᱲ ᱨᱮᱭᱟᱜ ᱟᱨᱟᱬ ᱨᱮ ᱤᱧ ᱫᱚᱸᱧ ᱡᱚᱲᱟᱣ ᱟᱠᱟᱱ ᱾

ᱦᱟᱯᱲᱟᱢ ᱠᱚ ᱥᱟᱶᱦᱮᱫ ᱥᱟᱜᱟᱲ ᱱᱤᱱᱟᱹᱜ ᱦᱟᱹᱵᱤᱡ ᱠᱚ ᱚᱨ ᱟᱹᱜᱩ ᱟᱠᱟᱣᱟᱫ ᱵᱚᱱᱟ ᱟᱵᱚ ᱯᱟᱹᱨᱤ ᱱᱤᱛᱚᱜ ᱫᱚ ᱚᱱᱟ ᱚᱨ ᱦᱩᱭ ᱟᱵᱚᱱᱟ ᱾

ᱤᱧ ᱦᱚᱸ ᱤᱧᱟᱜ ᱫᱟᱲᱮ ᱚᱝᱥᱟᱨ ᱥᱟᱶᱦᱮᱫ-ᱥᱟᱜᱟᱲ ᱚᱨᱤᱧ ᱪᱷᱩᱴᱟᱹᱣ ᱟᱠᱟᱱ ᱾

ᱮᱴᱟᱜ ᱡᱟᱹᱛ ᱨᱮᱱ ᱦᱚᱲ ᱫᱚ ᱟᱹᱰᱤ ᱦᱚᱲ ᱜᱮ ᱥᱟᱶᱦᱮᱫ ᱥᱟᱜᱟᱲ ᱨᱮᱠᱚ ᱡᱚᱲᱟᱣ ᱟᱠᱟᱱ ᱛᱮ ᱟᱹᱰᱤ ᱡᱷᱟᱹᱞ ᱜᱮ ᱥᱟᱶᱦᱮᱫ ᱥᱟᱜᱟᱲ ᱠᱚ ᱚᱨ ᱤᱫᱤ ᱟᱠᱟᱫ ᱛᱟᱠᱚ ᱾

ᱫᱮᱞᱟ ᱟᱵᱚ ᱦᱚᱸ ᱵᱟᱹᱲᱛᱤ ᱠᱷᱚᱱ ᱵᱟᱹᱲᱛᱤ ᱦᱚᱲ ᱥᱟᱶᱦᱮᱫ ᱥᱟᱜᱟᱲ ᱨᱮᱵᱚ ᱡᱚᱲᱟᱣᱜ-ᱟ ᱟᱨ ᱥᱟᱶᱦᱮᱫ ᱥᱟᱜᱟᱲ ᱟᱹᱰᱤ ᱡᱤᱞᱤᱧ ᱜᱮᱵᱚ ᱚᱨ ᱤᱫᱤ ᱛᱟᱵᱚ ᱾

ᱥᱟᱜᱟᱲ ᱚᱨ ᱛᱤᱱᱟᱹᱜ ᱟᱸᱴᱟ ᱚᱱᱟ ᱫᱚ ᱚᱨ ᱟᱠᱟᱫ ᱦᱚᱲ ᱜᱮ ᱵᱟᱰᱟᱭᱟᱭ ᱾

ᱦᱚᱨ ᱨᱮ ᱚᱠᱟ ᱨᱮᱫᱚ ᱫᱷᱤᱨᱤ ᱦᱩᱴᱩᱵ ᱜᱮ ᱧᱟᱢᱚᱜ ᱠᱟᱱ ᱚᱠᱟ ᱨᱮᱫᱚ ᱟᱲᱮ ᱜᱮ ᱧᱟᱢᱚᱜ ᱠᱟᱱ ᱚᱠᱟ ᱨᱮᱫᱚ ᱟᱨᱦᱚᱸ ᱥᱟᱜᱟᱲ ᱪᱟᱠᱟ ᱛᱷᱟᱹᱞᱤᱜ ᱠᱟᱱ ᱾

ᱮᱱᱛᱮ ᱨᱮᱦᱚᱸ ᱟᱵᱚ ᱥᱟᱶᱦᱮᱫ ᱥᱟᱜᱟᱲ ᱫᱚ ᱚᱨ ᱤᱫᱤ ᱜᱮ ᱦᱩᱭ ᱟᱵᱚᱱ ᱚᱨ ᱤᱫᱤ ᱜᱮ ᱦᱩᱭ ᱟᱵᱚᱱ ᱟᱹᱰᱤ ᱡᱤᱞᱤᱧ ᱾

ᱠᱩᱠᱢᱩ ᱜᱷᱮᱸᱴ ᱠᱟᱛᱮ ᱥᱟᱯᱲᱟᱣ

ᱢᱟᱬᱟᱝ ᱥᱮᱫ ᱤᱧ ᱛᱟᱲᱟᱢ ᱞᱮᱜ-ᱟ ᱟᱹᱰᱤ ᱜᱟᱱ ᱠᱩᱠᱢᱩ ᱠᱚ ᱜᱷᱮᱸᱴ ᱠᱟᱛᱮ ᱾

ᱰᱷᱮᱨ ᱚᱞ ᱯᱟᱲᱦᱟᱣᱜ ᱨᱮᱭᱟᱜ ᱠᱩᱠᱢᱩ ᱢᱟᱨᱟᱝ ᱪᱟᱹᱠᱨᱤ ᱨᱮᱭᱟᱜ ᱠᱩᱠᱢᱩ ᱥᱮᱬᱟ ᱦᱚᱲᱚᱜ ᱨᱮᱭᱟᱜ ᱠᱩᱠᱢᱩ ᱟᱨᱦᱚᱸ ᱟᱹᱰᱤ ᱜᱟᱱ ᱠᱩᱠᱢᱩ ᱾

ᱠᱩᱠᱢᱩ ᱨᱮᱭᱟᱜ ᱜᱷᱮᱸᱴ ᱫᱚ ᱛᱟᱨᱮᱱ ᱨᱮ ᱜᱚᱜ ᱠᱟᱛᱮ ᱫᱮᱭᱟ ᱥᱮᱫ ᱨᱮ ᱟᱹᱛᱩᱨ ᱟᱠᱟᱱᱟ ᱾

ᱤᱧ ᱫᱚᱸᱧ ᱛᱟᱲᱟᱢ ᱟᱠᱟᱫᱟ ᱢᱟᱬᱟᱝ ᱥᱮᱫ ᱤᱧᱟᱜ ᱢᱚᱱᱮ ᱫᱚ ᱠᱩᱠᱢᱩ ᱨᱮᱫᱚ ᱵᱟᱝ ᱮᱴᱟᱜ ᱨᱮᱜᱮ ᱾

ᱟᱹᱰᱤ ᱥᱟᱹᱝᱜᱤᱧ ᱛᱟᱲᱟᱢ ᱛᱟᱭᱚᱢ ᱩᱭᱦᱟᱹᱨ ᱦᱮᱡ ᱟᱹᱫᱤᱧᱟ ᱟᱪᱠᱟ ᱜᱮ 'ᱦᱮᱸ, ᱤᱧ ᱢᱟ ᱠᱩᱠᱢᱩᱧ ᱜᱚᱜ ᱟᱠᱟᱫᱟ ᱠᱩᱠᱢᱩ ᱠᱚᱫᱚ ᱚᱠᱟ ᱞᱮᱠᱟ ᱢᱮᱱᱟᱜ-ᱟ ᱦᱟᱯᱮ ᱥᱮᱧ ᱨᱟᱲᱟ ᱞᱮᱜᱮ ᱾'

ᱜᱷᱮᱸᱴ ᱨᱟᱲᱟ ᱠᱟᱛᱮᱧ ᱧᱮᱞᱟ ᱠᱩᱠᱢᱩ ᱫᱚ ᱢᱤᱫᱴᱟᱝ ᱦᱚᱸ ᱵᱟᱹᱱᱩᱜ-ᱟ ᱡᱚᱛᱚ ᱵᱩᱡᱩᱨ ᱪᱟᱵᱟ ᱟᱠᱟᱱᱟ ᱾

ᱚᱠᱚᱭ ᱪᱚᱭ ᱢᱮᱛᱟᱫ ᱫᱤᱧᱟ 'ᱮᱛᱮ ᱵᱚᱭᱦᱟ! ᱠᱩᱠᱢᱩ ᱠᱚᱫᱚ ᱱᱚᱝᱠᱟᱢ ᱰᱷᱤᱞᱟᱹᱣ ᱠᱷᱟᱱ ᱵᱩᱡᱩᱨ ᱟᱫᱚᱜ ᱜᱮᱭᱟ ᱾'

ᱠᱩᱠᱢᱩ ᱫᱚ ᱥᱟᱹᱨᱤ ᱚᱪᱚᱭ ᱞᱟᱹᱜᱤᱫ ᱞᱮᱛᱟᱲ ᱧᱮᱞᱟᱜ ᱢᱮ, ᱠᱚᱭᱚᱜᱟᱜ ᱢᱮ ᱚᱱᱟ ᱫᱚ ᱯᱟᱪᱮ ᱨᱮᱫᱚ ᱵᱟᱝ ᱥᱟᱢᱟᱝ ᱨᱮᱜᱮ ᱫᱚᱦᱚ ᱠᱟᱜ ᱢᱮ ᱾

ᱢᱤᱨᱛᱤᱠᱟ ᱥᱟᱯᱲᱟᱣ

ᱱᱤᱛᱚᱜ ᱜᱮᱥᱮ ᱡᱚᱛᱚ ᱦᱚᱲᱠᱚ ᱠᱩᱥᱤᱭᱟᱹᱧ ᱠᱟᱱᱟ ᱮᱨᱟᱭ ᱮᱢ ᱟᱠᱟᱣᱟᱫ ᱫᱤᱧᱟ ᱴᱷᱟᱶ ᱟᱡᱟᱜ ᱨᱤᱫᱟᱹᱭ ᱨᱮ, ᱡᱚᱛᱚ ᱦᱚᱲ ᱜᱮ ᱤᱧ ᱞᱟᱹᱜᱤᱫ ᱴᱷᱟᱶ ᱠᱚ ᱨᱟᱠᱷᱟ ᱫᱚᱦᱚ ᱟᱠᱟᱫᱟ ᱟᱠᱚᱣᱟᱜ ᱨᱤᱫᱟᱹᱭ ᱨᱮ ᱾

ᱱᱤᱛᱚᱜ ᱫᱚ ᱤᱧ ᱟᱭᱳ ᱵᱟᱵᱟᱭᱤᱡ ᱫᱟᱹᱭ ᱫᱟᱫᱟ, ᱵᱚᱠᱚ ᱵᱚᱭᱦᱟ, ᱦᱟᱛᱚᱢ ᱠᱩᱢᱟᱹᱝ ᱢᱟᱢᱚ ᱢᱟᱹᱢᱤ, ᱯᱮᱲᱟ ᱯᱩᱦᱬᱟ ᱡᱚᱛᱚ ᱦᱚᱲᱤᱡ ᱾

ᱱᱤᱛᱚᱜ ᱜᱮᱥᱮ ᱤᱧ ᱥᱚᱨᱠᱟᱨᱤᱡ ᱟᱥᱲᱟ ᱨᱮ ᱟᱪᱮᱫ ᱠᱚᱭᱤᱡ ᱚᱱᱚᱬᱦᱤᱭᱟᱹ ᱯᱟᱹᱴᱷᱩᱣᱟᱹ ᱠᱚᱭᱤᱡ ᱾

ᱤᱠᱷᱟᱹᱱ ᱢᱤᱫ ᱫᱤᱱ ᱚᱱᱠᱟᱱ ᱚᱠᱛᱚ ᱥᱮᱴᱮᱨᱚᱜ ᱤᱧᱟᱜ ᱢᱮᱫ ᱢᱟᱨᱥᱟᱞ ᱢᱟᱞᱚᱴᱚᱜ ᱞᱩᱴᱤ ᱠᱷᱚᱱ ᱟᱲᱟᱝ ᱪᱟᱵᱟᱜ ᱥᱟᱦᱮᱫ ᱥᱟᱦᱟᱜ ᱟᱸᱡᱚᱢ ᱫᱟᱲᱮ ᱟᱫᱚᱜ,

ᱩᱱᱫᱚ ᱤᱧ ᱚᱠᱚᱭᱤᱡ ᱦᱚᱸ ᱵᱟᱝ ᱪᱮᱛᱟᱱ ᱨᱮᱱ ᱚᱠᱚᱭᱤᱡ ᱦᱚᱸ ᱵᱟᱝ ᱾

ᱯᱟᱨᱠᱚᱢ ᱦᱚᱸ ᱴᱷᱟᱶ ᱵᱟᱭ ᱮᱢᱟᱹᱧ ᱟᱡᱟᱜ ᱠᱚᱞᱮ ᱨᱮ ᱵᱚᱨᱚᱢ ᱟᱡ ᱜᱮ ᱜᱤᱛᱤᱡ ᱟᱭ ᱤᱧ ᱪᱮᱛᱟᱱ ᱨᱮ ᱾

ᱩᱱᱫᱚ ᱟᱢ ᱟᱢᱟᱜ ᱵᱟᱱᱟᱨ ᱛᱤ ᱛᱤᱭᱟᱹᱨ ᱠᱟᱛᱮ ᱤᱧᱮᱢ ᱦᱚᱵᱚᱨ ᱤᱫᱤᱭᱤᱧ ᱟᱢ ᱜᱮ ᱴᱷᱟᱶᱮᱢ ᱮᱢᱟᱹᱧ ᱟᱢᱟᱜ ᱠᱚᱞᱮ ᱨᱮ ᱾

ᱟᱨᱟᱜ ᱢᱮᱞᱚᱫ ᱥᱟᱯᱲᱟᱣ

ᱢᱮᱞᱚᱫᱮᱜ-ᱟᱢ! ᱤᱧᱮᱢ ᱡᱚᱢᱤᱧ ᱞᱟᱹᱜᱤᱫ ?

ᱡᱚᱢ ᱨᱮ ᱟᱢᱟᱜ ᱵᱟᱪᱷᱟᱣ ᱵᱤᱪᱟᱹᱨ ᱜᱮ ᱵᱟᱹᱱᱩᱜ ᱨᱚᱦᱚᱲ ᱦᱩᱭᱮᱱ ᱚᱫᱟ ᱦᱩᱭᱮᱱ ᱢᱟᱫ ᱦᱩᱭᱮᱱ ᱢᱟᱛᱠᱚᱢ ᱦᱩᱭᱮᱱ ᱥᱟᱨᱡᱚᱢ ᱦᱩᱭᱮᱱ ᱥᱟᱹᱜᱩᱣᱟᱹᱱ ᱦᱩᱭᱮᱱ ᱡᱚᱛᱚᱣᱟᱜ ᱮᱢ ᱡᱚᱢ ᱵᱟᱢ ᱡᱚᱢ ᱛᱮ ?

ᱤᱧ ᱜᱚᱲᱚᱢ ᱦᱟᱲᱟᱢ ᱟᱢ ᱜᱮᱢ ᱡᱚᱢ ᱠᱮᱫᱮ ᱵᱟᱝ ᱟ ᱵᱟᱝ ᱟ ᱟᱞᱮ ᱜᱮᱞᱮ ᱡᱚᱢ ᱚᱪᱚ ᱠᱮᱫ ᱢᱮ ᱟᱞᱮ ᱜᱮᱞᱮ ᱥᱟᱢᱵᱟᱣ ᱠᱮᱫᱮ ᱟᱢᱟᱜ ᱢᱚᱪᱟ ᱨᱮ, ᱟᱨᱟᱜ ᱢᱚᱪᱟ ᱨᱮ ᱢᱚᱪᱟ ᱨᱮ ?

ᱟᱞᱮ ᱡᱚᱛᱚ ᱟᱢᱟᱜ ᱢᱮᱞᱚᱫ ᱛᱮ ᱟᱨᱟᱜ ᱢᱮᱞᱚᱫ ᱛᱮ ᱵᱚᱞᱚᱱ ᱦᱩᱭ ᱟᱞᱮ ᱟᱢᱟᱜ ᱞᱟᱡ ᱵᱷᱤᱛᱨᱤ ᱛᱮ ᱞᱟᱡ ᱵᱷᱤᱛᱨᱤ ᱛᱮ ?

ᱫᱚᱥᱟᱨ ᱦᱤᱞᱚᱜ ᱦᱮᱡ ᱞᱮᱱᱟᱹᱧ ᱟᱢᱟᱜ ᱴᱷᱟᱶ ᱛᱮ ᱟᱢᱤᱧ ᱜᱚᱰᱟᱢ ᱢᱮᱱᱛᱮ ᱤᱠᱷᱟᱹᱱ ᱚᱠᱟᱭᱮᱱᱟᱢ ? ᱟᱢᱟᱜ ᱢᱮᱞᱚᱫ ᱛᱮ ᱟᱢ ᱜᱮ ᱞᱚ ᱪᱟᱵᱟᱭᱮᱱᱟᱢ ?

ᱚᱱᱰᱮ ᱟᱢ ᱵᱟᱢ ᱛᱟᱦᱮᱸ ᱠᱟᱱ ᱛᱟᱦᱮᱸ ᱠᱟᱱ ᱮᱠᱮᱱ ᱛᱚᱨᱚᱡ ᱟᱢᱟᱜ ᱜᱩᱨᱤᱡ ᱾ ᱜᱩᱨᱤᱡ ?

ᱟᱭᱳ ᱟᱜ ᱛᱷᱩᱢ ᱵᱮᱜᱚᱨ ᱥᱟᱯᱲᱟᱣ

ᱞᱟᱺᱫᱩᱲᱮᱱᱟ ᱟᱹᱲᱟᱹ ᱤᱴᱟᱹ ᱛᱮᱧ ᱵᱮᱱᱟᱣ ᱞᱮᱫ ᱚᱱᱚᱬᱦᱮ ᱫᱚᱞᱟᱱ ᱾

ᱵᱚᱜᱚᱡ ᱮᱱᱟ ᱟᱹᱲᱟᱹ ᱟᱲᱟᱥ ᱛᱮᱧ ᱵᱮᱱᱟᱣ ᱞᱮᱫ ᱠᱟᱹᱦᱱᱤ ᱵᱟᱺᱫᱤ ᱾

ᱛᱚᱯᱟᱜ ᱮᱱᱟ ᱟᱹᱲᱟᱹ ᱵᱟᱦᱟ ᱛᱮᱧ ᱜᱟᱞᱟᱝ ᱞᱮᱫ ᱚᱱᱚᱞ ᱢᱟᱞᱟ ᱾

ᱵᱷᱟᱹᱨᱩᱬᱮᱱᱟ ᱟᱹᱲᱟᱹ ᱵᱩᱥᱩᱵ ᱛᱮᱧ ᱵᱮᱱᱟᱣ ᱞᱮᱫ ᱜᱟᱭᱟᱱ ᱵᱚᱲ ᱾

ᱚᱲᱮᱡ ᱮᱱᱟ ᱟᱹᱲᱟᱹ ᱥᱩᱛᱟᱹᱢ ᱛᱮᱧ ᱞᱮᱫ ᱜᱟᱢᱟᱢ ᱡᱟᱞᱟᱢ ᱾

ᱩᱭᱦᱟᱹᱨ ᱮᱫᱟᱹᱧ ᱪᱮᱫᱟᱜ ᱫᱚ ᱱᱚᱝᱠᱟ ᱦᱩᱭᱮᱱ ᱪᱮᱫᱟᱜ, ᱪᱮᱫᱟᱜ ??

ᱫᱤᱥᱟᱹ ᱠᱮᱫᱟᱹᱧ ᱟᱭᱳ ᱟᱜ ᱛᱷᱩᱢ ᱵᱮᱜᱚᱨ ᱤᱧ ᱵᱮᱱᱟᱣ ᱞᱮᱫᱛᱮ ᱵᱟᱭ ᱛᱤᱥᱴᱷᱟᱹᱣ ᱞᱮᱱ ᱱᱚᱶᱟ ᱠᱚ ᱾

ᱯᱚᱨᱟᱱ ᱯᱩᱠᱷᱤ ᱥᱟᱯᱲᱟᱣ

ᱮ ᱥᱚᱠᱷᱤ! ᱛᱟᱦᱮᱸᱱᱟᱢ ᱥᱩᱠᱷᱤ ᱥᱮᱣᱟ ᱠᱚᱢᱮ ᱫᱩᱠᱷᱤ ᱩᱰᱟᱹᱜ ᱢᱟᱬᱟᱝ ᱨᱮ ᱯᱚᱨᱟᱱ ᱯᱩᱠᱷᱤ ᱾

ᱵᱟᱝ ᱫᱟᱹᱲ ᱠᱟᱛᱮ ᱯᱟᱹᱪᱷᱞᱟᱹ ᱨᱮ ᱞᱩᱠᱷᱤ ᱠᱟᱹᱢᱤ ᱢᱮ ᱱᱟᱯᱟᱭᱟᱜ ᱟᱞᱚᱢ ᱵᱟᱹᱲᱤᱡᱽ ᱚᱠᱚᱭᱟᱜ ᱩᱰᱟᱹᱜ ᱢᱟᱬᱟᱝ ᱨᱮ ᱯᱚᱨᱟᱱ ᱯᱩᱠᱷᱤ ᱾

ᱪᱟᱸᱫᱚ ᱢᱮᱱᱟᱭᱟ ᱥᱟᱹᱠᱷᱤ ᱵᱟᱹᱲᱤᱡᱟᱜ ᱮᱢ ᱠᱟᱹᱢᱤᱭᱟ ᱦᱟᱱᱟ ᱯᱩᱨᱤ ᱨᱮ ᱪᱟᱸᱫᱚᱭ ᱦᱟᱨᱠᱮᱛ ᱢᱮᱭᱟ ᱩᱰᱟᱹᱜ ᱛᱟᱭᱚᱢ ᱯᱚᱨᱟᱱ ᱯᱩᱠᱷᱤ ᱾

ᱱᱟᱯᱟᱭᱟᱜ ᱠᱟᱹᱢᱤ ᱢᱮ ᱫᱮᱠᱷᱤ ᱜᱚᱥᱟᱸᱭ ᱟᱡ ᱥᱩᱨ ᱨᱮ ᱴᱷᱟᱶᱮ ᱮᱢᱟᱢ ᱜᱚᱥᱟᱸᱭ ᱞᱮᱠᱟ ᱥᱮᱣᱟ ᱧᱟᱢᱟᱢ ᱩᱰᱟᱹᱜ ᱛᱟᱭᱚᱢ ᱯᱚᱨᱟᱱ ᱯᱩᱠᱷᱤ ᱾

ᱛᱤᱭᱟᱹᱜ ᱥᱟᱯᱲᱟᱣ

ᱢᱤᱫ

ᱢᱮᱨᱚᱢᱤᱧ ᱵᱟᱵᱮᱨ ᱟᱠᱟᱣᱟᱫᱮ ᱦᱚᱴᱚᱜ ᱨᱮ ᱵᱟᱭ ᱛᱟᱲᱟᱢ ᱫᱟᱲᱮᱭᱟᱜ ᱠᱟᱱ ᱨᱮᱦᱚᱸ ᱵᱚᱲᱦᱮᱧ ᱚᱨᱮ ᱠᱟᱱ ᱾

ᱫᱟᱜ ᱮ ᱵᱚᱨᱚᱣᱟᱜ ᱠᱟᱱ ᱵᱚᱲᱦᱮᱧ ᱚᱨ ᱯᱟᱨᱚᱢ ᱮ ᱠᱟᱱ ᱟᱲᱮ ᱵᱟᱭ ᱫᱮᱡ ᱠᱮ ᱠᱟᱱ ᱵᱚᱲᱦᱮᱧ ᱚᱨ ᱫᱮᱡᱮ ᱠᱟᱱ ᱾

ᱱᱚᱝᱠᱟ ᱵᱚᱲᱦᱮ ᱚᱨ ᱠᱟᱛᱮ ᱢᱮᱨᱚᱢ ᱜᱟᱥ ᱴᱷᱮᱱᱤᱧ ᱚᱨ ᱥᱮᱴᱮᱨ ᱠᱟᱭ ᱠᱟᱱ ᱾

ᱵᱟᱨ

ᱫᱮᱣᱟᱭ ᱵᱟᱵᱮᱨ ᱟᱠᱟᱣᱟᱫᱤᱧ ᱢᱩ ᱨᱮ ᱵᱟᱹᱧ ᱛᱟᱲᱟᱢ ᱫᱟᱲᱮᱭᱟᱜ ᱠᱟᱱ ᱨᱮᱦᱚᱸ ᱵᱚᱲᱦᱮ ᱚᱨᱤᱧ ᱠᱟᱱ ᱾

ᱫᱩᱠ ᱤᱧ ᱵᱚᱛᱚᱨᱟᱜ ᱠᱟᱱ ᱜᱚᱥᱟᱸᱭ ᱵᱚᱲᱦᱮ ᱚᱨᱤᱧ ᱠᱟᱱ ᱯᱤᱲᱟᱹ ᱯᱷᱟᱱᱰᱟ ᱨᱮᱧ ᱛᱚᱦᱚᱫᱚᱜ ᱠᱟᱱ ᱫᱮᱣᱟ ᱛᱟᱦᱩᱸᱭ ᱚᱨᱤᱧ ᱠᱟᱱ ᱟᱡᱟᱨ ᱵᱮᱢᱟᱨ ᱨᱮᱧ ᱟᱫᱷᱲᱟᱵ ᱠᱟᱱ ᱜᱚᱥᱟᱸᱭ ᱛᱟᱦᱩᱸᱭ ᱚᱨᱤᱧ ᱠᱟᱱ ᱾

ᱱᱚᱝᱠᱟ ᱵᱚᱲᱦᱮ ᱚᱨ ᱚᱨ ᱛᱮ ᱜᱚᱥᱟᱸᱭ ᱥᱩᱠ ᱴᱷᱟᱶ ᱨᱮ ᱛᱤᱭᱟᱹᱜ ᱥᱮᱴᱮᱨ ᱠᱟᱹᱧ ᱠᱟᱱ ᱾

ᱡᱤᱣᱤᱫ ᱟᱞᱟᱨᱟᱢ ᱥᱟᱯᱲᱟᱣ

ᱫᱷᱚᱨᱚᱢ ᱜᱚᱥᱟᱸᱭ ᱮ ᱵᱮᱱᱟᱣ ᱟᱠᱟᱫ ᱟᱞᱟᱨᱟᱢ ᱥᱟᱰᱮᱭᱮᱱᱟ ᱾

ᱟᱞᱟᱨᱟᱢ ᱮ ᱦᱚᱦᱚ ᱮᱫᱟ ᱵᱮᱨᱮᱫ ᱢᱮ ᱭᱳ ᱵᱮᱨᱮᱫ ᱢᱮ ᱵᱮᱨᱮᱫ ᱢᱮ ᱵᱟ ᱵᱮᱨᱮᱫ ᱢᱮ ᱵᱮᱨᱮᱫ ᱢᱮ ᱫᱟᱹᱭ ᱵᱮᱨᱮᱫ ᱢᱮ,

ᱞᱮᱡᱽᱨᱟ ᱢᱟᱹᱱᱢᱤ ᱟᱞᱟᱨᱟᱢ ᱥᱟᱰᱮ ᱟᱸᱡᱚᱢ ᱛᱮ ᱚᱠᱚᱭ ᱦᱚᱸ ᱵᱟᱠᱚ ᱵᱮᱨᱮᱫ ᱠᱟᱱᱟ ᱾

ᱟᱞᱮ ᱚᱲᱟᱜ ᱨᱮ ᱟᱞᱟᱨᱟᱢ ᱥᱟᱰᱮᱭᱮᱱᱟ ᱚᱱᱟ ᱟᱸᱡᱚᱢ ᱛᱮ ᱢᱚᱫᱚᱱ ᱛᱮᱠᱚ ᱚᱲᱟᱜ ᱨᱮ ᱟᱞᱟᱨᱟᱢ ᱥᱟᱰᱮᱭᱮᱱᱟ ᱚᱱᱟ ᱟᱸᱡᱚᱢ ᱛᱮ ᱥᱩᱫᱟᱹᱢ ᱛᱮᱠᱚ ᱚᱲᱟᱜ ᱨᱮ ᱟᱞᱟᱨᱟᱢ ᱥᱟᱰᱮᱭᱮᱱᱟ ᱚᱱᱟ ᱟᱸᱡᱚᱢ ᱛᱮ ᱟᱹᱛᱩ ᱡᱟᱠᱟᱛ ᱨᱮᱭᱟᱜ ᱟᱞᱟᱨᱟᱢ ᱥᱟᱰᱮᱭᱮᱱᱟ,

ᱵᱟᱝ ᱫᱚ ᱚᱠᱚᱭ ᱪᱚᱭ ᱚᱛᱟ ᱠᱮᱫ ᱥᱱᱩᱡᱽ ᱵᱚᱴᱚᱢ ᱠᱤᱪᱷᱩ ᱜᱷᱟᱹᱲᱤᱠ ᱛᱷᱤᱨᱮᱱ ᱛᱟᱭᱚᱢ ᱟᱨᱦᱚᱸ ᱫᱚᱦᱲᱟ ᱥᱟᱰᱮᱭᱮᱱᱟ ᱟᱞᱟᱨᱟᱢ ᱾

ᱥᱟᱰᱮᱭᱮᱱᱟ ᱛᱷᱤᱨᱮᱱᱟ ᱟᱨᱦᱚᱸ ᱥᱟᱰᱮᱭᱮᱱᱟ ᱛᱷᱤᱨᱮᱱᱟ ᱱᱚᱝᱠᱟ ᱯᱮ ᱫᱷᱟᱣ ᱜᱟᱱ ᱥᱟᱰᱮᱭᱮᱱ ᱛᱷᱤᱨᱮᱱ ᱨᱮᱦᱚᱸ ᱢᱟᱹᱱᱢᱤ ᱵᱟᱠᱚ ᱵᱮᱨᱮᱫ ᱠᱟᱱᱟ,

ᱟᱫᱚ ᱡᱤᱣᱤᱫ ᱟᱞᱟᱨᱟᱢ ᱨᱹᱟᱜᱤ ᱛᱮ ᱫᱟᱹᱲ ᱚᱰᱚᱠ ᱮᱱᱟᱭ ᱦᱳᱲᱳ ᱡᱚᱢ ᱦᱟᱭ ᱵᱮ ᱦᱟᱭ ᱵᱮ ᱢᱮᱱ ᱠᱟᱛᱮ ᱢᱟᱹᱱᱢᱤ ᱠᱚ ᱫᱟᱹᱲ ᱵᱮᱨᱮᱫ ᱮᱱᱟ ᱾

ᱮᱛᱮ ᱟᱥᱟᱲ ᱥᱟᱯᱲᱟᱣ

ᱮᱛᱮ ᱟᱥᱟᱲ! ᱫᱮᱡ ᱟᱠᱟᱱᱟᱢ ᱪᱮᱛᱟᱱ ᱨᱮ ᱪᱮᱛᱮ ᱥᱟᱜᱟᱲ?

ᱚᱱᱟ ᱥᱟᱜᱟᱲ ᱫᱚᱦᱲᱟ ᱨᱩᱣᱟᱹᱲ ᱞᱟᱹᱜᱤᱫ ᱛᱮ ᱞᱟᱜᱟᱜ ᱠᱟᱱᱟ ᱜᱮᱞᱵᱟᱨ ᱵᱚᱸᱜᱟ,

ᱮᱛᱮ ᱟᱥᱟᱲ! ᱥᱟᱹᱲᱤ ᱦᱟᱹᱨᱭᱟᱹᱲ ᱵᱟᱸᱫᱮ ᱠᱟᱛᱮ ᱠᱚᱞᱮ ᱨᱮ ᱴᱷᱤᱞᱤ ᱦᱮᱨᱢᱮᱫ ᱠᱟᱛᱮ ᱦᱤᱡᱩᱜ ᱠᱟᱱᱟᱢ,

ᱜᱚᱴᱟ ᱢᱤᱨᱛᱤᱠᱟ ᱫᱩᱞ ᱚᱴᱚ ᱠᱟᱜ ᱠᱟᱱᱟᱢ ᱪᱩᱠᱟᱹᱜ ᱫᱟᱜ ᱪᱟᱵᱟ ᱞᱮᱱ ᱠᱷᱟᱱ ᱨᱩᱣᱟᱹᱲ ᱡᱚᱝ ᱠᱟᱱᱟᱢ ᱾

ᱢᱤᱨᱛᱤᱠᱟ ᱫᱚ ᱪᱮᱫ ᱟᱢᱟᱜ ᱵᱟᱜᱟᱱ ᱠᱟᱱᱟ?

ᱚᱱᱰᱮᱢ ᱨᱚᱦᱚᱭ ᱟᱠᱟᱫ ᱩᱞ, ᱛᱤᱨᱤᱞ, ᱛᱟᱨᱚᱵ ᱥᱟᱨᱡᱚᱢ ᱫᱟᱨᱮ ᱠᱚᱨᱮ ᱥᱟᱯᱟᱨᱚᱢ, ᱜᱩᱞᱟᱹᱪᱤ, ᱠᱟᱹᱥᱤ ᱵᱟᱦᱟ ᱫᱟᱨᱮ ᱠᱚᱨᱮ ᱫᱟᱜ ᱮᱢ ᱫᱩᱞ ᱚᱴᱚᱣᱟᱜ ᱠᱟᱱᱟ!

ᱤᱠᱷᱟᱹᱱ ᱡᱚ ᱵᱟᱦᱟ ᱜᱚᱜᱚᱫ ᱫᱚ ᱵᱟᱢ ᱦᱤᱡᱩᱜ ᱠᱟᱱᱟ!

ᱮᱛᱮ ᱟᱥᱟᱲ ᱫᱮᱡ ᱟᱠᱟᱱᱟᱢ ᱪᱮᱛᱟᱱ ᱨᱮ ᱪᱮᱛᱮ ᱥᱟᱜᱟᱲ!

ᱟᱹᱲᱟᱹ ᱥᱟᱶ ᱤᱧ ᱥᱟᱯᱲᱟᱣ

ᱤᱧ ᱥᱟᱶ ᱟᱹᱲᱟᱹ ᱠᱚ ᱩᱠᱩ ᱩᱠᱩ ᱠᱚ ᱮᱱᱮᱡ ᱠᱟᱱ ᱾

ᱟᱹᱲᱟᱹ ᱠᱚ ᱱᱚᱛᱮ ᱨᱮᱠᱚ 'ᱟᱹᱭ' ᱜᱚᱫ ᱠᱟᱜ ᱱᱚᱝᱠᱟ ᱛᱮᱧ ᱠᱩᱫᱟᱹᱣ ᱟᱹᱪᱩᱨ ᱠᱚ ᱵᱟᱹᱧ ᱧᱟᱢ ᱠᱚ ᱾

ᱟᱨᱦᱚᱸ ᱦᱟᱱᱛᱮ ᱨᱮᱠᱚ 'ᱟᱹᱭ' ᱜᱚᱫ ᱠᱟᱜ ᱦᱟᱱᱠᱟ ᱛᱮᱧ ᱠᱩᱫᱟᱹᱣ ᱟᱹᱪᱩᱨ ᱠᱚ ᱵᱟᱹᱧ ᱧᱟᱢ ᱠᱚ ᱾

ᱤᱠᱷᱟᱹᱱ ᱢᱤᱫ ᱫᱷᱟᱣᱤᱧ ᱧᱟᱢ ᱟᱠᱟᱫ ᱠᱚ ᱠᱷᱟᱱ ᱵᱟᱹᱧ ᱟᱲᱟᱜ ᱠᱚ ᱛᱚᱞ ᱫᱚᱦᱚ ᱠᱚᱣᱟᱹᱧ ᱞᱟᱪᱷᱟ-ᱠᱷᱩᱱᱴᱤ ᱨᱮ ᱾

ᱤᱧ ᱥᱟᱶ ᱟᱹᱲᱟᱹ ᱠᱚ ᱩᱠᱩ ᱩᱠᱩ ᱠᱚ ᱮᱱᱮᱡ ᱠᱟᱱ ᱾

ᱮᱠᱷᱮᱱ ᱮᱢᱚᱜ ᱠᱚ ᱥᱟᱯᱲᱟᱣ

ᱚᱠᱚᱭ ᱫᱚ ᱚᱡᱽᱨᱟ ᱚᱠᱚᱭ ᱫᱚ ᱞᱮᱡᱽᱨᱟ ᱚᱠᱚᱭ ᱫᱚ ᱦᱩᱰᱤᱧ ᱚᱠᱚᱭ ᱫᱚ ᱦᱟᱯᱲᱟᱜ ᱚᱠᱚᱭ ᱫᱚ ᱛᱷᱤᱨ ᱚᱠᱚᱭ ᱫᱚ ᱚᱛᱷᱤᱨ ᱡᱚᱛᱚ ᱦᱚᱲ ᱜᱮ ᱟᱢᱟᱜ ᱠᱚᱞᱮ ᱨᱮ ᱴᱷᱟᱶᱮᱢ ᱮᱢᱟ ᱠᱚ,

ᱟᱢ ᱫᱚ ᱟᱭᱳ ᱤᱡ ᱟᱭᱳ ᱡᱚᱛᱚ ᱦᱚᱲᱤᱡ ᱟᱭᱳ ᱞᱮᱵᱮᱫ ᱢᱮᱠᱚ, ᱛᱷᱟᱹᱭᱟᱹ ᱢᱮᱠᱚ ᱵᱟᱢ ᱨᱟᱹᱜᱤᱜ ᱟᱢ ᱫᱚ ᱥᱚᱨᱵᱚᱝᱥᱚᱦᱟ ᱾

ᱵᱟᱨ

ᱚᱠᱚᱭ ᱫᱚ ᱚᱡᱽᱨᱟ ᱚᱠᱚᱭ ᱫᱚ ᱞᱮᱡᱽᱨᱟ ᱚᱠᱚᱭ ᱫᱚ ᱦᱩᱰᱤᱧ ᱚᱠᱚᱭ ᱫᱚ ᱦᱟᱯᱲᱟᱜ ᱚᱠᱚᱭ ᱫᱚ ᱛᱷᱤᱨ ᱚᱠᱚᱭ ᱫᱚ ᱚᱛᱷᱤᱨ ᱡᱚᱛᱚ ᱦᱚᱲ ᱜᱮ ᱟᱢᱟᱜ ᱛᱟᱨᱟᱥ ᱮᱢ ᱪᱟᱞ ᱟᱠᱚ ᱚᱠᱚᱭ ᱦᱚᱸ ᱵᱟᱢ ᱠᱚᱢ ᱰᱷᱮᱨ ᱠᱚ,

ᱡᱚᱛᱚ ᱦᱚᱲ ᱜᱮ ᱟᱢ ᱨᱮᱱ ᱦᱚᱱᱮᱢ ᱢᱚᱱᱮ ᱠᱚ ᱟᱢ ᱫᱚ ᱚᱝᱥᱩᱢᱟᱱ ᱥᱚᱠᱚᱲ ᱥᱚᱠᱛᱤᱨ ᱩᱛᱥᱚ ᱾

ᱯᱮ

ᱚᱠᱚᱭ ᱫᱚ ᱚᱡᱽᱨᱟ ᱚᱠᱚᱭ ᱫᱚ ᱞᱮᱡᱽᱨᱟ ᱚᱠᱚᱭ ᱫᱚ ᱦᱩᱰᱤᱧ ᱚᱠᱚᱭ ᱫᱚ ᱦᱟᱯᱲᱟᱜ ᱚᱠᱚᱭ ᱫᱚ ᱛᱷᱤᱨ ᱚᱠᱚᱭ ᱫᱚ ᱚᱛᱷᱤᱨ ᱡᱚᱛᱚ ᱦᱚᱲ ᱜᱮ ᱫᱟᱜ ᱮᱢ ᱛᱤᱨᱯᱤᱭᱟᱠᱚ ᱚᱠᱚᱭ ᱦᱚᱸ ᱵᱟᱢ ᱟᱪᱷᱟ ᱵᱟᱹᱲᱛᱤ ᱠᱚ,

ᱡᱚᱛᱚ ᱦᱚᱲᱟᱜ ᱛᱮᱛᱟᱝ ᱮᱢ ᱢᱟᱨᱛᱚᱠ ᱟᱢᱟᱜ ᱥᱤᱨᱤᱡᱽ ᱮᱢ ᱥᱟᱨᱛᱷᱚᱠ ᱟᱢ ᱫᱚ ᱚᱢᱵᱚᱨ ᱾

ᱯᱩᱱ

ᱚᱠᱚᱭ ᱫᱚ ᱚᱡᱽᱨᱟ ᱚᱠᱚᱭ ᱫᱚ ᱞᱮᱡᱽᱨᱟ ᱚᱠᱚᱭ ᱫᱚ ᱦᱩᱰᱤᱧ ᱚᱠᱚᱭ ᱫᱚ ᱦᱟᱯᱲᱟᱜ ᱚᱠᱚᱭ ᱫᱚ ᱛᱷᱤᱨ ᱚᱠᱚᱭ ᱫᱚ ᱚᱛᱷᱤᱨ ᱡᱚᱛᱚ ᱦᱚᱲᱮᱢ ᱤᱣᱤᱨ ᱠᱚ,

ᱡᱚᱛᱚ ᱦᱚᱲᱟᱜ ᱦᱚᱲᱢᱚ ᱛᱮᱢ ᱵᱚᱞᱚᱱ ᱥᱚᱵᱮᱱ ᱠᱚᱣᱟᱜ ᱡᱤᱣᱤᱢ ᱡᱤᱣᱤᱫᱽ ᱟᱢ ᱫᱚ ᱦᱚᱭᱚᱝ ᱾

ᱢᱚᱬᱮ

ᱢᱤᱨᱛᱤᱠᱟ, ᱥᱤᱧ ᱪᱟᱸᱫᱚ, ᱨᱤᱢᱤᱞ, ᱦᱚᱭ ᱟᱯᱮ ᱫᱚ ᱮᱢᱚᱜ ᱜᱮᱯᱮ ᱵᱟᱰᱟᱭ ᱤᱠᱷᱟᱹᱱ ᱪᱮᱫ ᱦᱚᱸ ᱵᱟᱯᱮ ᱠᱚᱠᱚᱭ ᱾

ᱟᱨ ᱢᱤᱫᱴᱟᱝ ᱟᱞᱟᱨᱟᱢ ᱥᱟᱯᱲᱟᱣ

ᱟᱨ ᱢᱤᱫᱴᱟᱝ ᱟᱞᱟᱨᱟᱢ ᱥᱟᱰᱮ ᱠᱟᱱᱟ ᱡᱚᱡᱚ ᱫᱟᱨᱮ ᱨᱮ ᱾

ᱚᱱᱟ ᱥᱟᱰᱮ ᱟᱸᱡᱚᱢ ᱛᱮ ᱟᱞᱟᱨᱟᱢ ᱥᱟᱰᱮᱭᱮᱱᱟ ᱢᱟᱛᱠᱚᱢ ᱫᱟᱨᱮ ᱨᱮ

ᱚᱱᱟ ᱥᱟᱰᱮ ᱟᱸᱡᱚᱢ ᱛᱮ ᱟᱞᱟᱨᱟᱢ ᱥᱟᱰᱮᱭᱮᱱᱟ ᱥᱟᱨᱡᱚᱢ ᱫᱟᱨᱮ ᱨᱮ

ᱩᱱᱟᱹᱜ ᱟᱞᱟᱨᱟᱢ ᱥᱟᱰᱮᱭᱮᱱ ᱨᱮᱦᱚᱸ ᱢᱟᱹᱱᱢᱤ ᱵᱟᱠᱚ ᱵᱮᱨᱮᱫ ᱠᱟᱱᱟ ᱾

ᱟᱫᱚ ᱟᱹᱲᱤᱥ ᱛᱮ ᱟᱞᱟᱨᱟᱢ ᱛᱷᱤᱨ ᱱᱟᱯᱚᱲ ᱮᱱᱟᱭ ᱾

ᱤᱧᱟᱜ ᱚᱱᱚᱬᱦᱮ ᱥᱟᱯᱲᱟᱣ

ᱤᱧᱟᱜ ᱚᱱᱚᱬᱦᱮ ᱫᱚ ᱵᱤᱥ ᱠᱟᱱᱟ ᱟᱢᱟᱜ ᱢᱚᱬᱮ ᱦᱟᱡᱟᱨ ᱴᱟᱠᱟ ᱨᱮᱭᱟᱜ ᱢᱚᱱᱮ ᱤᱧᱟᱜ ᱢᱚᱬᱮ ᱴᱟᱠᱟ ᱨᱮᱭᱟᱜ ᱚᱱᱚᱬᱦᱮ ᱠᱷᱟᱨᱟᱯ ᱜᱚᱫ ᱠᱟᱜ-ᱟᱭ ᱾

ᱤᱧᱟᱜ ᱚᱱᱚᱬᱦᱮ ᱫᱚ ᱵᱩᱞᱩᱝ ᱠᱟᱱᱟ ᱟᱢᱟᱜ ᱢᱤᱫ ᱵᱟᱹᱴᱤ ᱢᱚᱱᱮ ᱤᱧᱟᱜ ᱢᱤᱫ ᱴᱤᱰᱟᱹᱜ ᱚᱱᱚᱬᱦᱮ ᱟᱫᱟ ᱜᱚᱫ ᱠᱟᱜ-ᱟᱭ ᱾

ᱚᱦᱚᱞᱭᱟ ᱥᱟᱯᱲᱟᱣ

ᱫᱷᱤᱨᱤ ᱜᱟᱫᱮᱞ ᱨᱮᱧ ᱯᱟᱱᱛᱮ ᱭᱮ ᱠᱟᱱᱟ ᱚᱦᱚᱞᱭᱟ ᱾

ᱡᱟᱸᱜᱟ ᱛᱷᱚᱯᱟ ᱛᱮ ᱡᱚᱛᱚ ᱫᱷᱤᱨᱤᱧ ᱡᱚᱴᱮᱫ ᱮᱫᱟ ᱚᱠᱟ ᱫᱷᱤᱨᱤ ᱨᱮ ᱩᱠᱩ ᱠᱟᱛᱮ ᱢᱮᱱᱟᱭᱟ ᱚᱦᱚᱞᱭᱟ?

ᱤᱧᱟᱜ ᱛᱷᱚᱯᱟ ᱡᱚᱴᱮᱫ ᱧᱟᱢ ᱠᱟᱛᱮ ᱚᱯᱮᱞ ᱜᱚᱫᱚᱜ-ᱟᱭ ᱚᱦᱚᱞᱭᱟ ᱟᱫᱚ ᱤᱧᱮ ᱥᱮᱵᱟ ᱤᱧᱟ ᱾

ᱤᱠᱷᱟᱹᱱ ᱩᱠᱩᱨ! ᱡᱚᱴᱮᱫ ᱯᱩᱨᱟᱹᱣ ᱠᱮᱫ ᱨᱮᱦᱚᱸᱧ ᱟᱫᱷᱟ ᱠᱷᱚᱱᱟᱜ ᱵᱟᱹᱲᱛᱤ ᱫᱷᱤᱨᱤ ᱵᱟᱭ ᱚᱯᱮᱞᱚᱜ ᱠᱟᱱᱟ ᱚᱦᱚᱞᱭᱟ!

ᱚᱱᱟ ᱫᱷᱤᱨᱤ ᱜᱟᱫᱮᱞ ᱠᱷᱚᱱ ᱜᱮ ᱚᱠᱚᱭ ᱪᱚᱭ ᱢᱮᱛᱟ ᱫᱤᱧᱟ ᱚᱫᱷᱚᱢ! ᱵᱟᱭ ᱚᱯᱮᱞᱚᱜ-ᱟ ᱚᱦᱚᱞᱭᱟ ᱫᱚ ᱟᱢ ᱫᱚᱢ ᱨᱟᱢ ᱨᱟᱡᱟ ᱠᱟᱱ ᱨᱮᱥᱮᱫ ᱚᱯᱮᱞᱚᱜ-ᱟᱭ ᱚᱦᱚᱞᱭᱟ ᱫᱚ!!

ᱢᱟᱹᱱᱢᱤ ᱥᱟᱯᱲᱟᱣ

ᱪᱮᱬᱮ ᱞᱮᱠᱟ ᱵᱟᱭ ᱩᱰᱟᱹᱣ ᱫᱟᱲᱮᱭᱟᱜ ᱠᱷᱟᱹᱛᱤᱨ ᱵᱮᱱᱟᱣ ᱠᱮᱫ ᱟᱭ ᱩᱰᱟᱹᱜ ᱜᱟᱹᱰᱤ ᱾

ᱦᱟᱹᱠᱩ ᱞᱮᱠᱟ ᱵᱟᱭ ᱯᱟᱭᱨᱟ ᱫᱟᱲᱮᱭᱟᱜ ᱠᱷᱟᱹᱛᱤᱨ ᱵᱮᱱᱟᱣ ᱠᱮᱫ ᱟᱭ ᱡᱟᱦᱟᱡᱽ ᱾

ᱥᱤᱞᱤᱵ ᱞᱮᱠᱟ ᱵᱟᱭ ᱫᱟᱹᱲ ᱫᱟᱲᱮᱭᱟᱜ ᱠᱷᱟᱹᱛᱤᱨ ᱵᱮᱱᱟᱣ ᱠᱮᱫ ᱟᱭ ᱢᱚᱴᱚᱨ ᱜᱟᱹᱰᱤ ᱾

ᱢᱮᱨᱚᱢ ᱞᱮᱠᱟ ᱡᱚᱢᱟᱜ ᱵᱟᱭ ᱩᱞᱟᱹ ᱛᱩᱫ ᱫᱟᱲᱮᱭᱟᱜ ᱠᱷᱟᱹᱛᱤᱨ ᱯᱟᱹᱜᱩᱨᱟᱭ ᱯᱟᱱ ᱾

ᱱᱩᱭ ᱯᱩᱛᱷᱤ ᱡᱤᱣᱤᱫ ᱮᱱᱟᱭ ᱥᱟᱯᱲᱟᱣ

ᱛᱮᱦᱮᱧ ᱠᱷᱚᱱ ᱱᱩᱭ ᱯᱩᱛᱷᱤ ᱡᱤᱣᱤᱫ ᱮᱱᱟᱭ ᱱᱤᱛ ᱱᱩᱭ ᱤᱧᱟᱜ ᱠᱟᱛᱷᱟ ᱞᱟᱹᱭᱟᱭ ᱤᱧᱟᱜ ᱥᱮᱨᱮᱧ ᱥᱮᱨᱮᱧᱟᱭ ᱤᱧᱟᱜ ᱵᱷᱟᱵᱽᱱᱟ ᱟᱥᱮᱱᱟᱭ ᱾

ᱱᱤᱛ ᱫᱚ ᱱᱩᱭ ᱜᱮ ᱤᱧᱮ ᱟᱥᱮᱱᱤᱧᱟ ᱚᱲᱟᱜ ᱚᱲᱟᱜ, ᱫᱩᱣᱟᱹᱨ ᱫᱩᱣᱟᱹᱨ ᱾


ᱤᱧᱟᱜ ᱡᱤᱣᱤ ᱜᱮ ᱱᱚᱶᱟ ᱯᱩᱛᱷᱤ ᱨᱮ ᱵᱚᱞᱚᱭᱮᱱᱟ ᱱᱤᱛ ᱫᱚ ᱤᱧ ᱜᱩᱨᱚᱜ ᱨᱮᱦᱚᱸᱧ ᱵᱟᱹᱧ ᱜᱩᱨᱚᱜ-ᱟ ᱾

ᱫᱩᱠ-ᱵᱟᱦᱟ ᱢᱟᱞᱟ ᱥᱟᱯᱲᱟᱣ

ᱫᱩᱠ ᱢᱩᱦᱤᱢ ᱠᱚᱫᱚ ᱜᱚᱫ ᱟᱹᱜᱩ ᱠᱟᱛᱮ ᱥᱩᱛᱟᱹᱢ ᱥᱟᱶᱛᱮ ᱜᱚᱛᱷᱟᱣ ᱠᱟᱛᱮ ᱢᱟᱞᱟ ᱵᱮᱱᱟᱣ ᱢᱮ ᱾

ᱟᱨᱟᱣ ᱡᱚᱝ ᱢᱮ ᱫᱩᱠ ᱢᱩᱦᱤᱢ ᱨᱮᱭᱟᱜ ᱵᱟᱦᱟ ᱢᱟᱞᱟ ᱛᱤᱱᱟᱹᱝ ᱫᱤᱱ ᱵᱟᱝ ᱦᱚᱴᱚᱜ ᱨᱮ ᱛᱟᱦᱮᱸᱱ ᱟᱡ ᱛᱮᱜᱮ ᱜᱚᱥᱚ ᱡᱚᱝᱟ ᱾

ᱧᱤᱫᱟᱹ ᱪᱟᱸᱫᱚ ᱥᱟᱯᱲᱟᱣ

ᱧᱤᱫᱟᱹ ᱪᱟᱸᱫᱚᱭ ᱡᱟᱱᱟᱢ ᱟᱠᱟᱱ ᱚᱦᱟᱭ ᱟᱞᱮ ᱟᱹᱛᱩ ᱨᱮ, ᱯᱟᱹᱪᱷᱤᱢ ᱱᱟᱠᱷᱟ ᱨᱮ ᱾

ᱠᱚᱭᱚᱜᱽ ᱛᱩᱞᱩᱡ ᱢᱤᱞ ᱢᱤᱞ ᱯᱟᱭᱨᱟᱜ ᱠᱟᱱᱟᱭ ᱨᱤᱢᱤᱞ ᱪᱮᱛᱟᱱ ᱪᱮᱛᱟᱱ ᱛᱮ, ᱨᱟᱹᱥᱠᱟᱹ ᱛᱮ ᱾

ᱵᱟᱹᱭ ᱵᱟᱹᱭ ᱛᱮ ᱧᱤᱫᱟᱹ ᱪᱟᱸᱫᱚᱭ ᱦᱟᱨᱟᱭᱮᱱᱟ ᱵᱟᱠᱞᱮ ᱠᱷᱚᱱᱮ ᱠᱤᱥᱚᱨᱮᱱᱟ ᱠᱤᱥᱚᱨ ᱠᱷᱚᱱᱮ ᱡᱩᱣᱟᱹᱱᱮᱱᱟ ᱾

ᱡᱩᱣᱟᱹᱱ ᱟᱠᱟᱱ ᱧᱤᱫᱟᱹ ᱪᱟᱸᱫᱚ ᱤᱧ ᱧᱮᱞ ᱛᱮ ᱩᱠᱩᱱᱮ ᱨᱤᱢᱤᱞ ᱫᱟᱱᱟᱝ ᱨᱮ ᱤᱧ ᱫᱚᱸᱧ ᱟᱹᱲᱤᱥ ᱜᱚᱫᱚᱜ ᱛᱮ ᱵᱟᱹᱧ ᱠᱚᱭᱚᱜ-ᱮ ᱟᱫᱚ ᱧᱤᱫᱟᱹ ᱪᱟᱸᱫᱚᱭ ᱚᱰᱚᱠᱚᱜ-ᱟ ᱩᱠᱩ ᱠᱷᱚᱱ ᱤᱧᱮ ᱠᱚᱭᱚᱜ ᱤᱧᱟ ᱤᱧ ᱟᱡ ᱤᱧ ᱠᱚᱭᱚᱜ ᱮᱭᱟ ᱟᱫᱚᱭ ᱞᱟᱡᱟᱣ ᱜᱚᱫᱚᱜ ᱛᱮ ᱟᱨᱦᱚᱸᱭ ᱩᱠᱩᱱ ᱨᱤᱢᱤᱞ ᱫᱟᱱᱟᱝ ᱨᱮ ᱾

ᱵᱟᱝ ᱫᱚ ᱧᱤᱫᱟᱹ ᱪᱟᱸᱫᱚ ᱤᱧᱮ ᱥᱤᱵᱤᱞᱟᱹᱧ ᱠᱟᱱ ᱵᱟᱢ ᱧᱮᱞᱮ ᱠᱟᱱ ᱤᱧ ᱜᱮ ᱩᱱᱤ ᱯᱟᱸᱡᱟ ᱟᱠᱟᱫᱤᱧ ᱵᱟᱹᱱᱩᱜ ᱠᱚᱣᱟ ᱯᱟᱞᱮ ᱟᱡ ᱨᱮᱱ ᱜᱟᱛᱮᱧ ᱾

ᱮ ᱧᱤᱫᱟᱹ ᱪᱟᱸᱫᱚ! ᱟᱞᱚᱢ ᱩᱠᱩᱱ ᱟᱫᱚ ᱟᱞᱚᱢ ᱪᱮᱨᱮᱡ ᱤᱧ ᱩᱱᱟᱹᱜ ᱪᱚᱴ ᱠᱷᱚᱱ ᱫᱚ ᱾

ᱮᱛᱮ ᱪᱟᱸᱫᱚ! ᱪᱮᱠᱟᱭᱮᱱᱟᱢ? ᱨᱟᱹᱯᱩᱫ ᱮᱱᱟ ᱦᱚᱲᱢᱚ ᱟᱢᱟᱜ ᱪᱤᱠᱟᱹ ᱛᱮ? ᱡᱚᱢᱟᱜ ᱠᱚ ᱵᱟᱢ ᱡᱚᱢᱮᱫ ᱛᱮ??

ᱤᱧ ᱫᱚ ᱟᱢᱤᱧ ᱥᱤᱵᱤᱞᱟᱢ ᱠᱟᱱ ᱱᱮᱛᱟᱨ ᱫᱚ ᱯᱟᱞᱮ ᱵᱟᱢ ᱠᱩᱥᱤᱭᱟᱹᱧ ᱠᱟᱱ ᱞᱚᱜᱚᱱ ᱦᱚᱸ ᱵᱟᱢ ᱦᱤᱡᱩᱜ ᱠᱟᱱ ᱾

ᱫᱟᱱᱟᱝ ᱠᱷᱚᱱ ᱨᱤᱢᱤᱞ ᱵᱟᱢ ᱠᱚᱭᱚᱜ ᱤᱧ ᱠᱟᱱ ᱢᱤᱞ ᱢᱤᱞ ᱢᱮᱫᱦᱟᱶ ᱛᱟᱢ ᱪᱚᱠᱲᱮ ᱤᱫᱤᱭᱮᱱ ᱵᱟᱝ ᱫᱚᱢ ᱵᱩᱰᱷᱤᱭᱮᱱ!!

ᱛᱮᱦᱮᱧ ᱤᱧ ᱠᱚᱭᱚᱜ ᱢᱮᱫᱚ ᱵᱟᱹᱱᱩᱜ ᱢᱮᱭᱟ ᱥᱮᱨᱢᱟ ᱨᱮ ᱵᱟᱹᱱᱩᱜ ᱢᱮᱭᱟ ᱵᱩᱨᱩ ᱪᱚᱴ ᱨᱮ ᱵᱟᱹᱱᱩᱜ ᱢᱮᱭᱟ ᱟᱹᱭᱩᱵ ᱥᱚᱢᱚᱭ ᱵᱟᱹᱱᱩᱜ ᱢᱮᱭᱟ ᱛᱟᱞᱟ ᱧᱤᱫᱟᱹ ᱵᱟᱹᱱᱩᱜ ᱢᱮᱭᱟ ᱥᱤᱢᱨᱟᱜ ᱵᱟᱹᱱᱩᱜ ᱢᱮᱭᱟ ᱥᱮᱛᱟᱜ,

ᱫᱷᱟᱣᱬᱟ ᱫᱷᱟᱹᱣᱬᱤᱧ ᱯᱟᱱᱛᱮ ᱢᱮᱫᱚ ᱮ ᱪᱟᱸᱫᱚ! ᱚᱠᱟᱭᱮᱱᱟᱢ ᱟᱢ ᱫᱚ??

ᱥᱤᱭᱩᱜᱤᱡ ᱥᱟᱯᱲᱟᱣ

ᱤᱧ ᱫᱚ ᱮᱴᱟᱜ ᱠᱚᱨᱮ ᱟᱞᱚᱢ ᱯᱟᱱᱛᱮ ᱤᱧᱟ ᱵᱟᱝ ᱠᱟᱹᱱᱟᱹᱧ ᱚᱱᱟ ᱠᱚᱨᱮ ᱛᱟᱦᱮᱸᱱᱤᱡ ᱜᱮ ᱾

ᱤᱧ ᱫᱚ ᱥᱟᱶᱦᱮᱫ ᱥᱚᱠᱲᱟ ᱨᱮ ᱥᱤᱭᱩᱜᱤᱡ ᱚᱱᱰᱮ ᱜᱮ ᱯᱟᱱᱛᱮ ᱤᱧ ᱢᱮ ᱚᱱᱰᱮ ᱜᱮ ᱧᱟᱢᱤᱧᱟᱢ ᱤᱧ ᱫᱚ ᱾

ᱥᱟᱶᱦᱮᱫ ᱥᱚᱠᱲᱟ ᱨᱮ ᱤᱧ ᱫᱚ ᱞᱮᱛᱟᱲ ᱠᱟᱹᱢᱤᱧ ᱪᱷᱩᱴᱟᱹᱣ ᱠᱚᱜ ᱥᱤᱭᱟᱹᱧ, ᱠᱟᱨᱦᱟᱭᱟᱹᱧ, ᱦᱮᱲᱦᱮᱫᱟᱹᱧ, ᱠᱩᱠᱩᱴᱟᱹᱧ ᱾

ᱱᱚᱰᱮ ᱠᱷᱚᱱ ᱨᱩᱣᱟᱹᱲ ᱫᱚ ᱤᱧ ᱟᱹᱰᱤ ᱟᱸᱴ ᱤᱧ ᱟᱹᱭᱠᱟᱹᱣᱟ ᱟᱞᱚᱢ ᱦᱚᱦᱚ ᱨᱩᱣᱟᱹᱲ ᱤᱧ ᱱᱚᱰᱮ ᱠᱷᱚᱱ ᱱᱚᱰᱮ ᱠᱷᱟᱹᱴᱣᱟᱹ ᱚᱪᱚᱣᱟᱹᱧ ᱢᱮ ᱢᱚᱱᱠᱩᱥᱤ ᱾

ᱫᱮᱞᱟ! ᱟᱢ ᱦᱚᱸ ᱦᱤᱡᱩᱜ ᱢᱮ ᱥᱟᱶᱦᱮᱫ ᱥᱚᱠᱲᱟ ᱛᱮ ᱡᱚᱛᱚ ᱦᱚᱲ ᱵᱚ ᱠᱟᱹᱢᱤᱭᱟ ᱠᱩᱨᱩᱢᱩᱴᱩ ᱥᱟᱶᱦᱮᱫ ᱥᱚᱠᱲᱟ ᱫᱚ ᱦᱟᱹᱨᱭᱟᱹᱲ ᱜᱮᱵᱚ ᱧᱮᱞ ᱚᱪᱚᱭᱟ ᱾

ᱥᱚᱱᱮᱴ ᱥᱚᱠᱲᱟ ᱥᱟᱯᱲᱟᱣ

ᱯᱷᱟᱹᱜᱩᱱ ᱥᱟᱯᱲᱟᱣ

ᱱᱮᱛᱟᱨ ᱫᱚ ᱡᱩᱨ ᱵᱟᱝ ᱨᱟᱵᱟᱝ, ᱡᱩᱨ ᱵᱟᱝ ᱥᱤᱛᱩᱝ ᱫᱟᱨᱮ ᱞᱟᱨᱮ ᱠᱚᱨᱮ ᱵᱟᱞᱮ ᱥᱟᱠᱟᱢ ᱥᱟᱜᱮᱱᱚᱜ ᱟᱸᱡᱚᱢ ᱠᱟᱛᱮ ᱠᱚᱭᱮᱞᱟᱜ ᱠᱩᱦᱩ ᱠᱩᱦᱩ ᱟᱲᱟᱝ ᱤᱧᱟᱜ ᱢᱚᱱᱮ ᱡᱤᱣᱤ ᱢᱟ ᱢᱟᱥᱮ ᱟᱸᱜᱮᱱᱚᱜ ᱾

ᱦᱚᱲᱢᱚ ᱨᱮ ᱵᱟᱡᱟᱜ ᱡᱚᱠᱷᱚᱱ ᱦᱤᱥᱤᱫ ᱦᱤᱥᱤᱫ ᱦᱚᱭ ᱤᱧ ᱫᱚᱸᱧ ᱩᱭᱦᱟᱹᱨ ᱪᱟᱸᱫᱚ ᱵᱚᱸᱜᱟ ᱤᱧ ᱤᱣᱤᱨᱤᱧ ᱞᱟᱹᱜᱤᱫ ᱵᱷᱮᱡᱟ ᱟᱠᱟᱫᱮᱭᱟᱭ ᱚᱠᱚᱭ ᱦᱩᱞᱟᱹᱥ ᱞᱟᱹᱜᱤᱫ ᱤᱧᱟᱜ ᱡᱤᱣᱤ ᱰᱷᱚᱝᱜᱟ ᱾

ᱢᱩᱨᱩᱫ ᱟᱨ ᱮᱫᱮᱞ ᱫᱟᱨᱮ ᱯᱟᱞᱮ ᱠᱤᱱ ᱢᱚᱱᱮ ᱯᱷᱟᱹᱜᱩᱱ ᱫᱚᱭ ᱨᱮᱞ ᱜᱟᱹᱰᱤ ᱠᱟᱱ ᱚᱱᱟ ᱛᱮᱜᱮ ᱩᱱᱠᱤᱱ ᱛᱤᱸᱜᱩ ᱠᱟᱛᱮ ᱚᱱᱮ ᱟᱨᱟᱜ ᱪᱤᱨ ᱠᱤᱱ ᱫᱮᱠᱷᱟᱣ ᱟᱭ ᱠᱟᱱ ᱾

ᱥᱟᱦᱟ ᱞᱮᱱᱠᱷᱟᱱ ᱱᱩᱠᱤᱱᱟᱜ ᱟᱨᱟᱜ ᱪᱤᱨ ᱯᱷᱟᱹᱜᱩᱱ-ᱨᱮᱞ ᱜᱟᱹᱰᱤ ᱚᱛᱮᱛ ᱠᱷᱚᱱᱮ ᱧᱤᱨ ᱾

ᱥᱤᱛᱩᱝ ᱥᱟᱯᱲᱟᱣ

ᱥᱮᱴᱮᱨ ᱥᱟᱶᱛᱮ ᱮᱛᱚᱦᱚᱵᱟᱭ ᱱᱟᱦᱟᱪᱟᱨ ᱚᱛᱮᱛ ᱨᱮᱭᱟᱜ ᱫᱟᱜ ᱥᱤᱨᱯᱩᱫ ᱪᱟᱵᱟᱭ ᱨᱤᱠᱟᱹᱭ ᱚᱱᱟᱛᱮ ᱱᱩᱭ ᱢᱮᱛᱟᱭᱟ ᱠᱚ ᱱᱤᱴᱷᱩᱨ ᱰᱟᱹᱠ ᱪᱮᱬᱮ ᱢᱟ ᱨᱟᱜ ᱟᱛᱮ ᱫᱟᱜ ᱮ ᱠᱚᱠᱚᱭ ᱾

ᱡᱟᱦᱟᱸ ᱛᱤᱱᱟᱹᱜ ᱛᱟᱦᱮᱸ ᱠᱟᱱᱟ ᱫᱩᱨᱩᱫ ᱛᱟᱥᱟᱫ ᱚᱱᱟ ᱠᱚ ᱡᱚᱛᱚᱭ ᱞᱚ ᱨᱚᱝᱜᱚ ᱪᱟᱵᱟᱭ ᱛᱮᱛᱟᱝ ᱛᱮ ᱚᱛ ᱢᱟᱭ ᱪᱟᱦᱟᱵ ᱟᱠᱟᱫ ᱛᱤᱥ ᱫᱚ ᱛᱮᱛᱟᱝ ᱢᱟᱨᱛᱚᱠᱚᱜ ᱛᱟᱭ ᱚ ᱦᱟᱭ!

ᱟᱢ ᱫᱚ ᱥᱤᱛᱩᱝ ᱩᱱᱟᱹᱝ ᱪᱟᱜ ᱮᱢ ᱥᱟᱛᱟᱣ ᱞᱮ ᱟᱞᱮ ᱥᱟᱛᱟᱣ ᱠᱟᱛᱮ ᱪᱮ ᱟᱢ ᱫᱚᱢ ᱥᱩᱠᱩᱜ? ᱟᱢᱟᱜ ᱞᱚᱞᱚ ᱦᱚᱭ ᱧᱟᱢ ᱠᱟᱛᱮ ᱵᱟᱛᱟᱣ ᱞᱮ ᱟᱞᱮᱭᱟᱜ ᱫᱩᱠ ᱧᱮᱞ ᱛᱮ ᱵᱟᱪᱮᱢ ᱫᱩᱠᱩᱜ?

ᱦᱟᱛᱟᱣ ᱦᱩᱭ ᱟᱞᱮ ᱜᱮ ᱟᱢᱟᱜ ᱥᱟᱛᱟᱣ ᱟᱢᱟᱜ ᱥᱟᱛᱟᱣ ᱠᱷᱟᱹᱛᱤᱨ ᱜᱮ ᱠᱤᱨᱥᱤ ᱞᱮ ᱟᱨᱡᱟᱣ ᱾

ᱡᱟᱹᱯᱩᱫ ᱥᱟᱯᱲᱟᱣ

ᱚᱲᱮᱡ ᱪᱟᱵᱟ ᱞᱮᱱ ᱚᱛᱮᱛ ᱟᱜ ᱦᱟᱹᱨᱭᱟᱹᱲ ᱥᱟᱹᱲᱤ ᱦᱮᱡ ᱠᱟᱛᱮ ᱡᱟᱹᱯᱩᱫ ᱮ ᱡᱩᱛᱨᱟᱹᱣ ᱨᱩᱣᱟᱹᱲ ᱚᱛᱮᱛ ᱮ ᱧᱮᱞᱚᱜ ᱡᱮᱢᱚᱱ ᱡᱩᱣᱟᱹᱱ ᱠᱩᱲᱤ ᱵᱟᱸᱫᱮ ᱠᱟᱛᱮ ᱥᱟᱹᱲᱤ ᱦᱟᱹᱨᱭᱟᱹᱲ ᱾

ᱡᱟᱹᱯᱩᱫ ᱫᱚ ᱚᱛᱮᱛ ᱤᱡ ᱦᱮᱨᱮᱞ ᱠᱟᱱᱟᱭ ᱡᱚᱠᱷᱚᱱ ᱩᱱᱤ ᱢᱤᱨᱛᱤᱠᱟ ᱥᱟᱶ ᱮ ᱢᱮᱥᱟᱜ ᱢᱤᱨᱛᱤᱠᱟ ᱯᱮᱨᱮᱡ ᱦᱚᱲᱢᱚᱜ ᱠᱟᱱᱟᱭ ᱟᱹᱠᱤᱱᱟᱜ ᱢᱮᱥᱟᱜ ᱜᱮ ᱥᱟᱶᱟᱸᱭ ᱱᱮᱥᱟᱜ ᱾

ᱥᱮᱨᱢᱟ ᱨᱮ ᱥᱟᱰᱮ ᱛᱩᱢᱫᱟᱜ, ᱴᱟᱢᱟᱠ, ᱠᱚᱨᱛᱟᱞ ᱚᱱᱟ ᱟᱸᱡᱚᱢ ᱛᱮ ᱡᱚᱞ ᱡᱤᱭᱟᱹᱞᱤ ᱠᱚ ᱮᱱᱮᱡ ᱥᱮᱨᱮᱧ ᱵᱤᱡᱽᱞᱤ ᱢᱟ ᱡᱷᱤᱞᱤ ᱢᱤᱞᱤ ᱢᱮᱞᱟᱝᱠᱤ ᱢᱟᱨᱥᱟᱞ ᱚᱱᱟ ᱧᱮᱞ ᱛᱮ ᱡᱚᱞ ᱡᱤᱭᱟᱹᱞᱤ ᱠᱚ ᱮᱱᱮᱡ ᱥᱮᱨᱮᱧ ᱾

ᱨᱤᱛᱩ ᱡᱟᱹᱯᱩᱫ ᱟᱵᱚ ᱞᱟᱹᱜᱤᱫ ᱟᱹᱰᱤ ᱜᱮ ᱱᱟᱯᱟᱭ ᱵᱟᱹᱲᱛᱤ ᱠᱷᱟᱱ ᱫᱚ ᱫᱷᱚᱱ ᱡᱤᱵᱚᱱ ᱱᱟᱥᱟᱭ ᱾

ᱫᱟᱥᱟᱸᱭ ᱥᱟᱯᱲᱟᱣ

ᱫᱟᱲᱟᱱ ᱠᱟᱱᱟ ᱠᱚ ᱫᱟᱥᱟᱸᱭ ᱫᱟᱲᱟᱱ ᱠᱚᱭᱟ ᱦᱚᱛᱚᱫ ᱵᱩᱣᱟᱹᱝ ᱨᱮ ᱥᱟᱨ ᱥᱟᱢᱵᱟᱣ ᱠᱟᱛᱮ ᱫᱟᱲᱟᱱ ᱛᱩᱞᱩᱡ ᱦᱳᱲᱳ, ᱪᱟᱣᱞᱮ ᱠᱚ ᱠᱚᱭᱟ ᱫᱤᱵᱤ, ᱫᱩᱨᱜᱟᱹ, ᱟᱭᱚᱱ, ᱠᱟᱡᱚᱞ ᱠᱚ ᱯᱟᱸᱜᱛᱮ ᱾

ᱠᱷᱮᱨᱣᱟᱲ ᱠᱚ ᱟᱭᱚᱱ ᱠᱟᱡᱚᱞᱟᱜ ᱟᱹᱭᱩᱨ ᱛᱮ ᱡᱤᱛᱠᱟᱹᱨ ᱞᱮᱱᱟ ᱠᱚ ᱟᱹᱰᱤ ᱜᱟᱱ ᱞᱟᱹᱲᱦᱟᱹᱭ ᱱᱚᱶᱟ ᱠᱟᱛᱷᱟ ᱵᱟᱰᱟᱭ ᱧᱟᱢ ᱠᱟᱛᱮ ᱱᱩᱠᱤᱱ ᱜᱮ ᱦᱮᱞᱮᱡ ᱠᱤᱱ ᱵᱟᱹᱭᱨᱤ ᱠᱚ ᱨᱤᱠᱟᱹᱭ ᱾

ᱛᱩᱲᱩᱠ ᱠᱚ ᱛᱟᱬᱟᱜ ᱞᱮᱱ ᱛᱩᱯᱩᱱ ᱜᱷᱟᱴ ᱨᱮ ᱵᱟᱹᱠᱤᱱ ᱛᱷᱤᱛ ᱟᱱ ᱱᱩᱠᱩ ᱟᱭᱚᱱ ᱠᱟᱡᱚᱞ ᱩᱢᱩᱜ ᱠᱤᱱ ᱟᱬᱜᱚᱱ ᱠᱟᱱ ᱚᱠᱛᱚ ᱨᱮ ᱩᱱᱠᱤᱱᱠᱚ ᱵᱮᱲᱤ ᱠᱮᱫ ᱠᱤᱱ ᱵᱟᱹᱭᱨᱤ ᱫᱚᱞ ᱾

ᱱᱚᱶᱟ ᱠᱟᱛᱷᱟ ᱜᱮ ᱫᱟᱥᱟᱸᱭ ᱵᱚᱸᱜᱟᱭ ᱞᱟᱹᱭ ᱱᱩᱠᱩ ᱯᱟᱱᱛᱮ ᱞᱟᱹᱜᱤᱫ ᱫᱟᱥᱟᱸᱭ ᱫᱟᱲᱟᱱ ᱵᱷᱟᱹᱭ ᱾

ᱢᱩᱪᱟᱹᱫ ᱥᱟᱯᱲᱟᱣ

ᱨᱤᱛᱩ ᱠᱚᱫᱚ ᱠᱟᱱᱟ ᱠᱚ ᱢᱤᱢᱤᱫᱴᱟᱝ ᱨᱟᱡᱟ ᱥᱮᱴᱮᱨᱚᱜ-ᱟ ᱠᱚ ᱟᱵᱚ ᱥᱟᱱᱚᱱ ᱞᱟᱹᱜᱤᱫ ᱚᱠᱚᱭ ᱠᱚᱫᱚ ᱱᱟᱯᱟᱭᱟᱜ ᱠᱚ ᱠᱟᱡᱟ ᱚᱠᱚᱭ ᱠᱚᱫᱚ ᱠᱚ ᱥᱟᱛᱟᱣ ᱵᱚ ᱟᱹᱲᱤᱡ ᱛᱮᱫ ᱾

ᱩᱛᱩ ᱥᱩᱛᱩᱜ ᱛᱟᱨᱟᱭ ᱵᱟᱭ ᱦᱤᱲᱤᱧ ᱨᱟᱵᱟᱝ ᱠᱚᱭᱮᱞᱟᱜ ᱠᱩᱦᱩᱭ ᱜᱷᱮᱸᱴ ᱛᱟᱨᱟᱭ ᱱᱤᱨᱚᱲ ᱥᱤᱛᱩᱝ ᱮ ᱥᱮᱴᱮᱨᱚᱜ-ᱟ ᱛᱤᱭᱟᱹᱜ ᱠᱟᱛᱮ ᱛᱮᱛᱟᱝ ᱡᱚᱛᱚ ᱨᱤᱛᱩ ᱨᱮᱜᱮ ᱛᱟᱦᱮᱸᱱ ᱦᱩᱭ ᱟᱵᱚ ᱱᱤᱨᱚᱲ ᱾

ᱛᱤᱻ ᱨᱮ ᱡᱟᱹᱲᱤ ᱡᱟᱹᱯᱩᱫ ᱮ ᱪᱩᱯᱩᱫ ᱛᱟᱨᱟᱭ ᱦᱮᱢᱟᱞ ᱮ ᱵᱚᱵᱚᱨ ᱛᱟᱨᱟᱭ ᱫᱟᱥᱟᱸᱭ ᱮᱱᱮᱡ ᱦᱟᱣᱮᱫ ᱮ ᱦᱤᱡᱩᱜ-ᱟ ᱥᱟᱶ ᱠᱟᱛᱮ ᱥᱚᱦᱨᱟᱭ ᱡᱚᱛᱚ ᱜᱮ ᱟᱵᱚ ᱞᱟᱹᱜᱤᱫ ᱟᱹᱜᱩ ᱛᱟᱨᱟᱭᱠᱚ ᱵᱩᱜᱤ ᱵᱟᱹᱲᱤᱡ ᱾

ᱪᱟᱠᱷᱟᱭ ᱜᱮᱵᱚ ᱡᱚᱛᱚ ᱨᱤᱛᱩᱣᱟᱜ ᱦᱮᱲᱮᱢ ᱦᱮᱣᱮᱨ ᱵᱩᱜᱤ ᱵᱟᱹᱲᱤᱡ ᱨᱮᱭᱟᱜ ᱥᱮᱞᱮᱫ ᱜᱮᱛᱚ ᱥᱚᱝᱥᱟᱨ ᱾

ᱠᱚᱲᱟ ᱫᱚᱠᱚ ᱥᱤᱭᱟ ᱥᱟᱯᱲᱟᱣ

ᱠᱚᱲᱟ ᱫᱚᱠᱚ ᱥᱤᱭᱟ ᱦᱟᱥᱟ ᱚᱛ ᱨᱮᱠᱚ ᱥᱤᱭᱟ ᱠᱚᱲᱟ ᱫᱚᱠᱚ ᱥᱤᱭᱟ ᱡᱤᱞ ᱚᱛ ᱨᱮᱠᱚ ᱥᱤᱭᱟ ᱾

ᱯᱩᱭᱞᱩ ᱚᱛ ᱠᱷᱚᱱ ᱫᱚ ᱠᱤᱨᱥᱤ ᱚᱢᱚᱱᱚᱜ ᱟᱵᱚᱵᱚ ᱟᱹᱥᱩᱞᱚᱜ ᱾

ᱫᱚᱥᱟᱨ ᱚᱛ ᱠᱷᱚᱱ ᱫᱚ ᱜᱟᱬᱟ ᱠᱚ ᱚᱢᱚᱱᱚᱜ ᱟᱵᱚᱵᱚ ᱟᱹᱯᱟᱹᱥᱩᱞᱚᱜ ᱾