ᱵᱮᱵᱷᱟᱨᱤᱭᱟᱹ:Fagu Baskey/sandbox/ᱠᱟᱹᱲᱯᱩ ᱦᱟᱯᱟ

ᱵᱩᱞᱩᱝ

ᱜᱟᱺᱫᱷᱤ ᱵᱟᱵᱟᱭᱤᱡ ᱮᱨᱟ ᱠᱚᱥᱛᱩᱨᱵᱟ ᱢᱤᱫ ᱫᱷᱟᱣ ᱪᱮᱫ ᱵᱮᱢᱟᱨ ᱨᱮᱪᱚᱭ ᱯᱟᱲᱟᱣ ᱮᱱᱟ ᱾ ᱰᱟᱠᱛᱚᱨ ᱠᱚ ᱧᱮᱞ ᱵᱟᱲᱟ ᱚᱪᱚ ᱠᱮᱫ ᱠᱚ ᱠᱷᱟᱱ ᱠᱚ ᱞᱟᱹᱭ ᱠᱮᱫᱟ, 'ᱱᱚᱶᱟ ᱟᱡᱟᱨ ᱨᱮᱭᱟᱜ ᱨᱟᱱ ᱫᱚ ᱵᱟᱹᱱᱩᱜ-ᱟ; ᱛᱚᱵᱮ ᱨᱩᱜᱤ ᱵᱩᱞᱩᱝ ᱡᱚᱢ ᱮ ᱵᱟᱹᱜᱤ ᱞᱮᱠᱷᱟᱱ ᱟᱡᱟᱨ ᱫᱚ ᱵᱮᱥᱚᱜ-ᱟ ᱾' ᱰᱟᱠᱛᱚᱨ ᱟᱜ ᱠᱟᱛᱷᱟ ᱜᱟᱺᱫᱤ ᱵᱟᱵᱟ ᱮᱨᱟ ᱛᱟᱭ ᱮ ᱞᱟᱹᱭ ᱟᱫᱮᱭᱟ ᱾

ᱠᱟᱛᱷᱟ ᱟᱧᱡᱚᱢ ᱥᱟᱶ ᱜᱮ ᱠᱚᱥᱛᱩᱨᱵᱟᱭ ᱢᱮᱱ ᱠᱮᱫ-ᱟ, 'ᱵᱟᱝ, ᱤᱧ ᱫᱚ ᱵᱩᱞᱩᱝ ᱵᱮᱜᱚᱨ ᱢᱤᱫ ᱥᱟᱹᱠᱲᱤ ᱦᱚᱸ ᱵᱟᱹᱧ ᱩᱫ ᱠᱮᱭᱟ ᱾ ᱤᱧ ᱵᱩᱞᱩᱝ ᱵᱟᱹᱜᱤᱢ ᱢᱮᱛᱟᱹᱧ ᱠᱟᱱᱟ ᱟᱢ ᱵᱤᱱᱟᱹ ᱵᱩᱞᱩᱝ ᱛᱮ ᱡᱚᱢ ᱵᱤᱰᱟᱹᱣ ᱢᱮᱥᱮ ᱾'

ᱚᱱᱟ ᱫᱚᱥᱟᱨ ᱦᱤᱞᱚᱜ ᱠᱷᱚᱱ ᱜᱮ ᱜᱟᱺᱫᱷᱤ ᱵᱟᱵᱟ ᱫᱚ ᱵᱩᱞᱩᱝ ᱡᱚᱢ ᱮ ᱵᱟᱹᱜᱤ ᱠᱮᱫ ᱟ ᱾ ᱟᱡ ᱧᱮᱞ ᱛᱮ ᱠᱚᱥᱛᱩᱨᱵᱟ ᱦᱚᱸ ᱵᱩᱞᱩᱝ ᱡᱚᱢ ᱮ ᱵᱟᱹᱜᱤ ᱠᱮᱫ-ᱟ ᱾ ᱠᱤᱪᱷᱤ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱟᱡᱟᱜ ᱵᱮᱢᱟᱨ ᱵᱮᱥ ᱮᱱᱟ ᱾

ᱫᱚᱥ

ᱡᱷᱤᱞᱤ ᱡᱚᱠᱷᱚᱱ ᱱᱟᱶᱟ ᱵᱟᱹᱦᱩ ᱵᱮᱱᱟᱣ ᱠᱟᱛᱮ ᱱᱚᱶᱟ ᱚᱲᱟᱜ ᱛᱮ ᱦᱮᱡ ᱞᱮᱱᱟᱭ ᱢᱮᱱ ᱛᱟᱦᱮᱸᱫ ᱮ, "ᱱᱩᱭ ᱦᱟᱱᱦᱟᱨ ᱵᱩᱰᱷᱤ ᱫᱚᱱᱟᱭ ᱥᱤᱠᱤᱲ ᱜᱮᱭᱟ, ᱠᱟᱹᱢᱤ ᱜᱮ ᱚᱠᱟ ᱦᱚᱸ ᱵᱟᱭ ᱠᱩᱥᱤᱭᱟᱜ ᱛᱟᱢᱟ ᱾"

ᱟᱡ ᱡᱚᱠᱷᱚᱱ ᱵᱟᱹᱦᱩ ᱠᱷᱚᱱᱟᱜ ᱦᱟᱱᱦᱟᱨ ᱵᱩᱰᱷᱤ ᱛᱮ ᱯᱨᱚᱢᱚᱥᱚᱱ ᱮᱱᱟᱭ ᱮᱜᱮᱨᱟᱭ, "ᱱᱩᱭ ᱵᱟᱹᱦᱩ ᱫᱚᱱᱟᱭ ᱥᱤᱨᱜᱟᱹᱫ ᱜᱮᱭᱟ, ᱦᱟᱱᱦᱟᱨ ᱟᱭᱳ ᱪᱮᱫ ᱞᱮᱠᱟ ᱢᱟᱹᱱ ᱥᱚᱢᱢᱟᱱ ᱠᱚ ᱮᱢᱟ ᱠᱚᱣᱟ ᱚᱱᱟ ᱦᱚᱸ ᱵᱟᱭ ᱵᱟᱰᱟᱭᱟ ᱾"

ᱠᱟᱹᱲᱯᱩ ᱦᱟᱯᱟ

ᱚᱠᱟᱨᱮᱪᱚ ᱯᱟᱞᱮ ᱫᱚᱦᱚ ᱞᱮᱫ ᱡᱷᱚᱜ ᱦᱟᱲᱟᱢ'ᱟᱜ ᱦᱟᱯᱟ ᱨᱮᱫᱚ ᱥᱤᱢᱤᱡ ᱞᱟᱴᱠᱟᱣ ᱞᱮᱱᱟ ᱾ ᱟᱫᱚ ᱚᱱᱟ ᱜᱮ ᱱᱷᱟᱜ ᱮ ᱥᱟᱵ ᱥᱚᱡᱷᱮ ᱮᱫᱟ ᱢᱟ ᱥᱤᱢᱤᱡ ᱫᱚ ᱠᱚᱞᱮᱡᱽ ᱠᱚᱲᱟ ᱥᱟᱹᱞᱠᱷᱩ'ᱟᱜ ᱫᱚᱛᱚ ᱨᱮ ᱡᱮᱨᱮᱲ ᱮᱱᱟ ᱾ ᱥᱤᱢᱤᱡ ᱫᱚ ᱥᱚ ᱠᱮᱫᱮ ᱠᱷᱟᱱ ᱨᱟᱹᱜᱤ ᱛᱮ ᱥᱟᱹᱞᱠᱷᱩ ᱚᱱᱟ ᱦᱟᱯᱟ ᱩᱱᱤ ᱦᱟᱲᱟᱢ ᱮ ᱨᱮᱡ ᱠᱮᱫᱮᱭᱟ ᱾ ᱮᱴᱟᱜ ᱦᱚᱲ ᱦᱟᱸᱦᱟᱸ ᱦᱟᱸᱦᱟᱸ ᱢᱮᱱ ᱵᱟᱲᱟᱭ ᱛᱮᱜᱮ ᱥᱟᱹᱞᱠᱷᱩ ᱦᱟᱯᱟ ᱫᱚ ᱵᱟᱥ ᱜᱟᱹᱰᱤ ᱠᱷᱚᱱᱟᱜ ᱞᱟᱛᱟᱨ ᱥᱮᱫ ᱮ ᱪᱟᱯᱟᱫ ᱜᱤᱰᱤ ᱠᱟᱫ ᱟ ᱾

ᱠᱚᱱᱰᱚᱠᱴᱚᱨ ᱱᱚᱶᱟ ᱠᱟᱛᱷᱟᱭ ᱵᱟᱰᱟᱭ ᱠᱮᱫ ᱠᱷᱟᱱ ᱵᱟᱥ ᱜᱟᱹᱰᱤ ᱛᱤᱸᱜᱩ ᱠᱟᱛᱮ ᱦᱟᱲᱟᱢ ᱦᱟᱯᱟ ᱠᱚ ᱦᱟᱞᱟᱝ ᱟᱹᱜᱩ ᱟᱫᱮᱭᱟ ᱾

ᱵᱟᱥ ᱜᱟᱹᱰᱤ ᱟᱨᱦᱚᱸ ᱫᱟᱹᱲ ᱮ ᱮᱦᱚᱵ ᱠᱮᱫᱟ ᱾ ᱩᱱᱤ ᱦᱟᱲᱟᱢ ᱥᱟᱹᱞᱠᱷᱩ ᱛᱩᱞᱩᱡ ᱮ ᱢᱮᱱ ᱠᱮᱫᱟ, "ᱤᱠᱟᱹ ᱠᱟᱹᱧ ᱢᱮᱭᱟ ᱵᱟᱹᱵᱩ, ᱵᱟᱰᱟᱭ ᱛᱩᱞᱩᱡ ᱫᱚ ᱱᱚᱶᱟ ᱦᱟᱯᱟ ᱨᱮ ᱥᱤᱢᱤᱡ ᱵᱟᱹᱧ ᱞᱟᱴᱠᱟᱣ ᱟᱠᱟᱫ ᱟ ᱾ ᱢᱤᱫᱴᱟᱝ ᱠᱟᱛᱷᱟ ᱩᱭᱦᱟᱹᱨ ᱫᱚᱦᱚ ᱠᱟᱜ ᱢᱮ- ᱟᱢ ᱦᱚᱢ ᱦᱟᱲᱟᱢᱚᱜ ᱜᱮᱭᱟ, ᱟᱢ ᱦᱚᱸ ᱢᱤᱫ ᱫᱤᱱ ᱦᱤᱞᱚᱜ ᱠᱟᱹᱲᱯᱩ ᱦᱟᱯᱟ ᱥᱟᱵ ᱦᱩᱭᱟᱢ ᱜᱮᱭᱟ ᱾"

ᱯᱟᱹᱱᱟᱹᱦᱤ

ᱦᱚᱲ ᱡᱚᱠᱷᱚᱱ ᱢᱩᱱᱫᱩᱨ ᱛᱮ ᱵᱚᱸᱜᱟᱜ ᱠᱚ ᱦᱤᱡᱩᱜ-ᱟ ᱵᱟᱵᱟᱭ ᱢᱮᱛᱟ ᱠᱚᱣᱟ, "ᱯᱟᱹᱱᱟᱹᱦᱤ ᱫᱚ ᱵᱟᱦᱨᱮ ᱥᱮᱫ ᱨᱮ ᱛᱩᱫ ᱠᱟᱛᱮ ᱦᱤᱡᱩᱜ ᱯᱮ ᱾"

ᱢᱤᱫ ᱪᱚᱨᱚᱠ, ᱪᱷᱟᱹᱰᱩᱭ ᱠᱩᱲᱤ ᱡᱚᱠᱷᱚᱱ ᱱᱚᱶᱟ ᱢᱩᱱᱫᱤᱨ ᱛᱮ ᱵᱚᱸᱜᱟᱜ ᱮ ᱦᱤᱡᱩᱜ-ᱟ ᱵᱟᱵᱟᱭ ᱢᱮᱛᱟᱭᱟ, "ᱯᱟᱹᱱᱟᱹᱦᱤ ᱫᱚ ᱵᱷᱤᱛᱨᱤ ᱥᱮᱫ ᱜᱮ ᱟᱹᱜᱩ ᱛᱟᱨᱟᱭ ᱢᱮ; ᱵᱟᱦᱨᱮ ᱠᱚᱨᱮ ᱟᱞᱚᱢ ᱫᱚᱦᱚ ᱵᱟᱲᱟᱭᱟ ᱾"

ᱩᱭᱦᱟᱹᱨ

ᱢᱤᱫᱴᱤᱡ ᱜᱟᱹᱰᱤ ᱮᱠᱥᱤᱰᱮᱱᱴ ᱛᱮ ᱡᱚᱵᱟ ᱟᱨ ᱡᱟᱹᱣᱱᱟᱹ ᱵᱟᱱᱟ ᱦᱚᱲᱟᱜ ᱞᱮᱸᱜᱟ ᱛᱤ ᱛᱟᱹᱠᱤᱱ ᱜᱮᱡᱮᱨ ᱮᱱᱟ ᱾ ᱚᱱᱟ ᱫᱚ ᱚᱯᱨᱮᱥᱚᱱ ᱠᱟᱛᱮ ᱠᱷᱟᱹᱱᱰᱨᱟᱹ ᱦᱩᱭ ᱮᱱᱟ ᱾

ᱡᱚᱵᱟᱭ ᱢᱮᱱ ᱠᱮᱫ ᱟ, "ᱪᱟᱸᱫᱚ ᱵᱚᱸᱜᱟ! ᱟᱢ ᱫᱚ ᱩᱱᱟᱹᱜ ᱮᱢ ᱱᱤᱴᱷᱩᱨᱟ, ᱤᱧᱟᱜ ᱞᱮᱸᱜᱟ ᱛᱤᱢ ᱤᱫᱤ ᱠᱮᱫᱟ ᱾" ᱡᱟᱹᱣᱱᱟᱹᱭ ᱢᱮᱱ ᱠᱮᱫ ᱟ, "ᱪᱟᱸᱫᱚ ᱵᱚᱸᱜᱟ ᱤᱧ ᱫᱚᱭ ᱫᱟᱭᱟ ᱟᱹᱫᱤᱧᱟ; ᱞᱮᱸᱜᱟ ᱛᱤ ᱜᱮᱥᱮ ᱤᱫᱤ ᱠᱮᱫᱟ ᱡᱚᱡᱚᱢ ᱛᱤ ᱫᱚᱭ ᱥᱟᱨᱮᱡ ᱟᱠᱟᱣᱟᱫ ᱫᱤᱧ ᱜᱮᱭᱟ ᱾"

ᱵᱟᱯᱞᱟ

ᱪᱩᱰᱜᱩ- ᱟᱯᱮ ᱫᱚᱭᱟ ᱵᱟᱯᱞᱟ ᱠᱟᱛᱮ ᱟᱹᱰᱤ ᱥᱩᱠ ᱨᱮ ᱢᱮᱱᱟᱜ ᱯᱮᱭᱟ, ᱪᱮᱫ ᱦᱚᱸ ᱴᱮᱱᱥᱚᱱ ᱜᱮ ᱵᱟᱝ ᱾ ᱵᱟᱹᱰᱜᱩ- ᱫᱷᱟᱹᱴ ᱭᱟ! ᱟᱞᱚᱢ ᱢᱮᱱᱟ ᱾ ᱡᱷᱚᱛᱚ ᱴᱮᱱᱥᱚᱱ ᱵᱟᱯᱞᱟ ᱦᱚᱲᱟᱜ ᱾ ᱚᱠᱟᱭ ᱢᱮᱛᱟᱢᱟ ᱥᱟᱹᱲᱤ ᱵᱟᱹᱱᱩᱜ, ᱥᱟᱭᱟ ᱵᱟᱹᱱᱩᱜ, ᱡᱟᱹᱠᱤᱴ ᱵᱟᱹᱱᱩᱜ; ᱚᱠᱟᱭ ᱢᱮᱛᱟᱢᱟ ᱪᱩᱲᱤ ᱵᱟᱹᱱᱩᱜ, ᱴᱤᱠᱞᱤ ᱵᱟᱹᱱᱩᱜ, ᱯᱟᱭᱰᱚᱨ ᱵᱟᱹᱱᱩᱜ, ᱞᱤᱯᱥᱴᱤᱠ ᱵᱟᱹᱱᱩᱜ, ᱯᱟᱜᱽᱨᱟ ᱵᱟᱹᱱᱩᱜ ᱯᱷᱩᱞᱞᱤ ᱵᱟᱹᱱᱩᱜ ᱹᱹᱹᱹᱹᱹ ᱵᱚᱥᱮᱨ ᱰᱷᱤᱝᱠᱤ ᱵᱟᱹᱱᱩᱜ! ᱚᱠᱟ ᱞᱟᱡ ᱦᱟᱹᱥᱩ ᱧᱟᱢᱮᱭᱟ, ᱚᱠᱟ ᱵᱚᱦᱚᱜ ᱦᱟᱹᱥᱩ ᱧᱟᱢᱮᱭᱟ ᱾ ᱪᱩᱰᱜᱩ- ᱥᱟᱹᱨᱤ ᱜᱮᱭᱟ ᱾ ᱡᱟᱦᱟᱸ ᱰᱟᱺᱝᱜᱩᱣᱟᱹ ᱨᱮ ᱧᱟᱢᱚᱜ-ᱟ ᱚᱱᱟ ᱵᱟᱯᱞᱟ ᱠᱟᱛᱮ ᱵᱟᱭ ᱧᱟᱢᱚᱜ-ᱟ,ᱡᱟᱦᱟᱸ ᱵᱟᱯᱞᱟ ᱠᱟᱛᱮ ᱧᱟᱢᱚᱜ-ᱟ ᱚᱱᱟ ᱰᱟᱺᱜᱩᱣᱟᱹ ᱨᱮ ᱵᱟᱭ ᱧᱟᱢᱚᱜ-ᱟ ᱾ ᱚᱱᱟᱛᱮ ᱠᱚ ᱢᱮᱱ ᱥᱟᱫᱤ ᱠᱟ ᱞᱚᱰᱩ ᱡᱚ ᱠᱷᱟᱭᱟ ᱯᱚᱥᱛᱟᱭᱟ ᱡᱚ ᱱᱮᱦᱤᱸ ᱠᱷᱟᱭᱟ ᱣᱚ ᱵᱷᱤ ᱯᱚᱥᱛᱟᱭᱟ ᱾

ᱢᱟᱭᱟᱢ

ᱢᱤᱫᱴᱟᱝ ᱠᱩᱲᱤ ᱴᱷᱚᱠᱚᱨ ᱮᱱᱟᱭ ᱜᱟᱹᱰᱤ ᱛᱮ ᱾ ᱟᱹᱰᱤ ᱥᱚᱠᱛᱚ ᱢᱟᱭᱟᱢ ᱞᱤᱧᱡᱤ ᱮᱱᱟ ᱾ ᱚᱱᱟ ᱧᱮᱞᱛᱮ ᱥᱩᱨᱟᱹᱭ ᱮ ᱢᱮᱱ ᱠᱮᱫᱟ, "ᱩᱱᱟᱹᱜ ᱥᱚᱠᱛᱚ ᱢᱟᱭᱟᱢ ᱫᱚᱭᱟ, ᱩᱭᱦᱟᱹᱨ ᱞᱮᱠᱷᱟᱱ ᱮᱢ ᱫᱟᱠᱟ ᱦᱚᱸ ᱵᱟᱢ ᱡᱚᱢ ᱠᱮᱭᱟ ᱾"

ᱥᱩᱨᱟᱹᱭ ᱦᱚᱞᱟ ᱠᱟᱹᱥᱤ ᱜᱮᱫ ᱫᱚᱠᱟᱱ ᱨᱮᱧ ᱧᱟᱢ ᱞᱮᱫᱮᱭᱟ ᱾ ᱩᱱᱤ ᱚᱱᱰᱮᱭ ᱢᱮᱱᱮᱫ ᱛᱟᱦᱮᱸᱫ, ᱮ ᱵᱷᱟᱹᱭ! ᱢᱮᱨᱚᱢᱟᱜ ᱢᱟᱭᱟᱢ ᱢᱟ ᱵᱤᱱ ᱞᱤᱧᱡᱤ ᱪᱟᱵᱟ ᱚᱪᱚᱭᱮᱫ ᱫᱚ, ᱥᱤᱵᱤᱞᱟᱜ ᱜᱮ ᱵᱤᱱ ᱦᱤᱨᱤᱡ ᱚᱪᱚᱭᱮᱫᱟ ᱾ ᱢᱚᱱᱮ ᱢᱚᱱᱮ ᱛᱮᱧ ᱩᱭᱦᱟᱹᱨ ᱠᱮᱫᱟ- ᱡᱟᱦᱟᱸᱭ ᱦᱚᱲ ᱢᱟᱹᱱᱢᱤᱭᱟᱜ ᱢᱟᱭᱟᱢ ᱧᱮᱞ ᱛᱮ ᱫᱟᱠᱟ ᱵᱟᱭ ᱡᱚᱢ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱫ, ᱮᱴᱟᱜ ᱡᱤᱭᱟᱹᱞᱤ ᱟᱜ ᱢᱟᱭᱟᱢ ᱧᱮᱞ ᱛᱮ ᱩᱱᱤ ᱦᱚᱲᱟᱜ ᱩᱞᱤᱫᱟᱜ ᱡᱚᱨᱚᱜ ᱠᱟᱱᱟ ᱾

ᱱᱮᱛᱟᱨ ᱫᱚ ᱜᱟᱱᱚᱜ ᱜᱮᱭᱟ?

ᱡᱤᱞ ᱚᱠᱟ ᱨᱮᱭ ᱩᱛᱩᱭᱟ ᱵᱟᱭ ᱴᱷᱤᱠᱟᱹ ᱫᱟᱲᱮᱭᱟᱜ ᱠᱟᱱᱟ ᱨᱟᱹᱭᱢᱟᱹᱛ ᱾ ᱚᱱᱟᱛᱮ ᱟᱡ ᱟᱭᱳᱭ ᱠᱩᱞᱤ ᱠᱮᱫᱮᱭᱟ, ᱮ ᱭᱳ, ᱚᱠᱟ ᱨᱮᱧ ᱪᱚᱸᱫᱟᱭᱟ, ᱚᱲᱟᱜ ᱨᱮ ᱥᱮ ᱵᱟᱦᱨᱮ ᱨᱮ?

ᱟᱭᱳᱭ ᱢᱮᱱ ᱠᱮᱫᱟ, ᱚᱲᱟᱜ ᱨᱮᱜᱮ ᱪᱚᱸᱫᱟᱭ ᱢᱮ ᱾

- ᱩᱱᱫᱤᱱ ᱢᱟᱭᱳ ᱵᱟᱦᱨᱮ ᱨᱮᱵᱚ ᱪᱚᱸᱫᱟᱭ ᱛᱟᱦᱮᱸᱫ ᱫᱚ, ᱱᱮᱛᱟᱨ ᱫᱚ ᱚᱲᱟᱜ ᱨᱮᱦᱚᱸ ᱜᱟᱱᱚᱜ ᱜᱮᱭᱟ? - ᱚᱱᱟ ᱫᱚ ᱩᱱᱫᱤᱱ ᱜᱮᱥᱮ, ᱱᱮᱛᱟᱨ ᱫᱚ ᱚᱲᱟᱜ ᱨᱮᱦᱚᱸ ᱜᱟᱱᱚᱜ ᱜᱮᱭᱟ ᱾

- ᱜᱟᱱᱚᱜ ᱜᱮᱭᱟ?

ᱥᱤᱥᱩ ᱠᱟᱹᱢᱤᱭᱟᱹ

ᱢᱤᱫ ᱦᱟᱴ ᱢᱟᱬᱟᱝ

(ᱪᱟ ᱧᱩ ᱡᱷᱚᱜ ᱠᱚ ᱨᱚᱯᱚᱲ ᱠᱟᱱᱟ) ᱥᱟᱹᱫᱷᱩ- ᱮ ᱢᱚᱫᱷᱩ, ᱱᱚᱜ-ᱚᱭ ᱭᱟ ᱛᱮᱦᱮᱧᱟᱜ ᱠᱷᱚᱵᱚᱨ ᱧᱮᱞ ᱢᱮ, ᱠᱟᱹᱴᱤᱡ ᱜᱤᱫᱽᱨᱟᱹ ᱪᱮᱫ ᱞᱮᱠᱟ ᱤᱴᱟᱹ ᱵᱷᱟᱹᱴᱤ ᱨᱮᱠᱚ ᱠᱷᱟᱴᱟᱣᱮᱫ ᱠᱚᱣᱟ ᱾ ᱢᱚᱫᱷᱩ- ᱮ ᱭᱟ ᱡᱟᱦᱟᱸᱭ ᱮ ᱠᱷᱟᱴᱟᱣᱮᱫ ᱠᱚᱣᱟ ᱩᱱᱤ ᱫᱚ ᱡᱤᱦᱚᱞ ᱨᱮ ᱩᱛᱟᱹᱨ ᱥᱟᱢᱵᱟᱣ ᱠᱟᱭ ᱞᱟᱹᱠᱤ ᱾ ᱡᱟᱹᱫᱩ- ᱡᱤᱦᱚᱞ ᱫᱚᱭᱟ ᱪᱮᱫ, ᱩᱱᱤ ᱫᱚ ᱜᱩᱨ ᱰᱟᱱᱰᱮ ᱩᱛᱟᱹᱨ ᱮᱢᱟᱭ ᱞᱟᱹᱠᱛᱤ ᱾

ᱛᱮᱦᱮᱧ

ᱡᱟᱹᱫᱩ- ᱮ ᱭᱟ ᱮ ᱢᱟᱭᱥᱟ! ᱟᱯᱮ ᱚᱱᱛᱮ ᱨᱮ ᱜᱤᱫᱽᱨᱟᱹ ᱠᱚ ᱧᱮᱞ ᱠᱚᱢ ᱥᱮ, ᱰᱟᱹᱨᱤ ᱢᱮᱨᱚᱢ ᱥᱟᱢᱴᱟᱣ ᱠᱚ ᱟᱹᱰᱤᱧ ᱟᱸᱴᱚᱜ ᱠᱟᱱᱟ ᱾

ᱡᱤᱞ

ᱪᱮᱞᱮᱭᱟ ᱡᱤᱞᱮᱢ ᱟᱹᱜᱩ ᱠᱮᱫ ᱟ ᱥᱮ ᱵᱟᱝ ᱟ? ᱟᱯᱟᱛ ᱮ ᱢᱮᱱ ᱠᱮᱫ ᱟ ᱦᱚᱯᱚᱱ ᱛᱩᱞᱩᱡ ᱾

ᱵᱟᱝ ᱟ ᱾ ᱦᱚᱯᱚᱱᱟᱜ ᱠᱷᱟᱴᱚ ᱞᱟᱹᱱᱟᱹᱭ ᱾

ᱮᱭᱟᱹᱧ ᱢᱮᱛᱟᱫ ᱢᱮ ᱛᱟᱦᱮᱸᱫ ᱫᱚ, ᱵᱟᱨ ᱠᱤᱞᱚ ᱟᱹᱜᱩ ᱠᱟᱜ ᱢᱮ; ᱯᱩᱭᱥᱟᱹ ᱠᱚᱫᱚ ᱞᱤᱧ ᱨᱚᱯᱚᱲ ᱴᱷᱤᱠ ᱟᱠᱟᱱᱟ ᱾ ᱟᱯᱟᱛ ᱟᱹᱲᱤᱥ ᱫᱷᱟᱨᱟ ᱛᱮᱭ ᱢᱮᱱ ᱠᱮᱫ ᱟ ᱾

ᱦᱚᱯᱚᱱ ᱛᱮᱫ ᱮ ᱢᱮᱱ ᱠᱮᱫ ᱟ, ᱮᱭᱟ ᱥᱚᱦᱨᱟᱭ ᱢᱟ ᱰᱟᱹᱨᱤ ᱠᱚᱣᱟᱜ ᱯᱟᱨᱟᱵᱽ ᱠᱟᱱ ᱫᱚ, ᱰᱟᱹᱨᱤ ᱠᱚᱣᱟᱜ ᱯᱟᱨᱟᱵᱽ ᱨᱮ ᱟᱨᱦᱚᱸ ᱚᱱᱟ ᱡᱤᱞ? ᱪᱷᱤ ᱹᱹᱹᱹ ᱾

ᱥᱚᱦᱨᱟᱭ

ᱱᱟᱶᱟ ᱵᱟᱹᱦᱩᱭ ᱢᱮᱱ ᱮᱫᱟ, ᱩᱶᱟᱹᱥ ᱨᱮᱵᱚ ᱥᱚᱦᱨᱟᱭᱚᱜ-ᱟ; ᱦᱟᱱᱦᱟᱨ ᱟᱭᱳᱭ ᱢᱮᱱ ᱮᱫᱟ, ᱠᱩᱱᱟᱹᱢᱤ ᱨᱮᱵᱚ ᱥᱚᱦᱨᱟᱭᱚᱜ-ᱟ ᱾ ᱩᱶᱟᱹᱥ ᱨᱮᱫᱚ ᱟᱞᱮ ᱛᱤᱥ ᱦᱚᱸ ᱵᱟᱞᱮ ᱥᱚᱦᱨᱟᱭ ᱟᱠᱟᱱᱟ ᱾

- ᱚᱠᱟ ᱞᱮᱠᱟᱱ ᱦᱚᱲ ᱠᱟᱱᱟ ᱯᱮ ᱭᱳ ᱟᱯᱮ ᱫᱚ? ᱜᱚᱴᱟ ᱫᱤᱥᱚᱢ ᱦᱚᱲ ᱩᱶᱟᱹᱥ ᱨᱮᱠᱚ ᱥᱚᱦᱨᱟᱭᱚᱜ ᱠᱟᱱᱟ, ᱟᱠᱚ ᱫᱚ ᱵᱟᱝᱟ ᱦᱟᱱᱮ ᱠᱩᱱᱟᱹᱢᱤ ᱨᱮᱠᱚ ᱥᱚᱦᱨᱟᱭᱚᱜ-ᱟ ᱾ ᱠᱩᱱᱟᱹᱢᱤ ᱨᱮ ᱵᱟᱹᱛᱤ ᱯᱮ ᱡᱩᱞ ᱠᱷᱟᱱ ᱚᱠᱚᱭ ᱮ ᱧᱮᱞ ᱛᱟᱯᱮᱭᱟ?

- ᱵᱟᱹᱦᱩ! ᱚᱱᱟ ᱫᱚ ᱥᱟᱱᱛᱟᱲᱟᱜ ᱥᱮᱨᱣᱟ ᱫᱚ ᱵᱟᱝ ᱠᱟᱱᱟ ᱾ ᱟᱵᱚ ᱫᱚ ᱢᱟᱜᱽ ᱵᱚᱸᱜᱟ ᱨᱮ ᱢᱟᱜᱽ ᱵᱚ ᱵᱚᱸᱜᱟᱭᱟ, ᱯᱷᱟᱹᱜᱩᱱ ᱵᱚᱸᱜᱟ ᱨᱮ ᱵᱟᱦᱟ ᱵᱚ ᱵᱚᱸᱜᱟᱭᱟ ᱾ ᱚᱱᱠᱟ ᱜᱮ ᱥᱚᱦᱨᱟᱭ ᱵᱚᱸᱜᱟ ᱨᱮ ᱥᱚᱦᱨᱟᱭ ᱵᱚ ᱵᱚᱸᱜᱟᱭᱟ ᱾ ᱱᱚᱶᱟ ᱫᱚ ᱫᱟᱥᱟᱸᱭ ᱵᱟᱸᱜᱟ ᱩᱶᱟᱹᱥ ᱠᱟᱱᱟ, ᱥᱚᱦᱨᱟᱭ ᱵᱚᱸᱜᱟ ᱫᱚ ᱟᱹᱣᱨᱤ ᱵᱚᱞᱚᱱᱟᱭ ᱾ ᱥᱚᱦᱨᱟᱭ ᱪᱟᱸᱫᱚ ᱟᱹᱣᱨᱤ ᱵᱚᱞᱚᱱ ᱨᱮᱜᱮ ᱥᱚᱦᱨᱟᱭ ᱵᱚᱸᱜᱟᱭ ᱫᱚ ᱪᱮᱫ ᱴᱷᱤᱠ ᱦᱩᱭᱩᱜ ᱠᱟᱱᱟ?

ᱱᱟᱶᱟ ᱵᱟᱹᱦᱩ ᱪᱮᱫ ᱦᱚᱸ ᱵᱟᱭ ᱢᱮᱱ ᱞᱮᱫ ᱟ ᱾

ᱦᱩᱭᱤᱞ ᱪᱮᱭᱟᱨ

ᱢᱚᱡᱟᱭᱤᱠ ᱴᱟᱭᱤᱞ ᱟᱴᱮᱫ ᱟᱠᱟᱱ ᱚᱛ ᱨᱮ ᱚᱠᱟ ᱞᱮᱠᱟ ᱪᱚᱸᱧ ᱞᱮᱸᱡᱮᱫ ᱮᱱᱟ ᱾

ᱵᱷᱤᱸᱫᱟᱹᱲᱚᱜ ᱡᱷᱚᱜ ᱦᱩᱭᱤᱞ ᱪᱮᱭᱟᱨ ᱨᱮ ᱫᱩᱲᱩᱵ ᱟᱠᱟᱱ ᱥᱟᱞᱠᱷᱟᱱ ᱤᱧᱮ ᱥᱟᱵ ᱫᱟᱨᱟᱢ ᱠᱮᱫᱤᱧ ᱛᱮ ᱢᱮᱱ ᱠᱮᱫ ᱟᱭ, ᱛᱩᱨᱩᱭ ᱥᱮᱨᱢᱟ ᱢᱟᱬᱟᱝ ᱱᱚᱝᱠᱟᱱ ᱚᱛ ᱨᱮᱜᱮ ᱤᱧ ᱦᱚᱸᱧ ᱵᱷᱤᱸᱫᱟᱹᱲ ᱞᱮᱱ ᱛᱟᱦᱮᱸᱫ ᱾

ᱟᱨᱢᱤᱭᱤᱡ ᱮᱨᱟ

ᱮᱭᱟᱨᱯᱚᱨᱴ ᱠᱷᱚᱱ ᱚᱲᱟᱜ ᱛᱮ ᱨᱩᱣᱟᱹᱲ ᱡᱷᱚᱜ ᱤᱧᱟᱜ ᱢᱚᱱᱮ ᱜᱚᱨᱚᱵᱽ, ᱫᱩᱠ, ᱩᱭᱦᱟᱹᱨ ᱵᱷᱟᱵᱽᱱᱟ ᱠᱚᱛᱮ ᱜᱟᱞᱥᱟᱝ ᱪᱟᱵᱟ ᱞᱮᱱᱟ ᱾

ᱛᱮᱦᱮᱧ ᱮᱱᱟᱹᱧ ᱴᱷᱤᱠᱟᱹ ᱮᱫᱟ, ᱢᱤᱫᱴᱤᱡ ᱟᱨᱢᱤᱭᱤᱡ ᱮᱨᱟ ᱦᱩᱭᱩᱜ ᱫᱚ ᱛᱤᱱᱟᱹᱜ ᱟᱸᱴᱟ ᱾

ᱦᱚᱨᱟᱥᱤ ᱨᱮᱭᱟᱜ ᱥᱤᱸᱫᱩᱨ ᱤᱬᱤᱡ ᱟᱠᱟᱱ ᱨᱮᱭᱟᱜ ᱫᱩᱠ ᱢᱟ ᱛᱟᱦᱮᱸᱱ ᱠᱟᱱ ᱜᱮᱭᱟ, ᱦᱮᱨᱮᱞ ᱛᱤᱧ ᱫᱤᱥᱚᱢ ᱞᱟᱹᱜᱤᱫ ᱡᱤᱣᱤᱭ ᱟᱞᱟᱭ ᱟᱠᱟᱫ ᱨᱮᱭᱟᱜ ᱜᱚᱨᱚᱵᱽ ᱦᱤᱸᱧ ᱟᱹᱭᱠᱟᱹᱣ ᱮᱫᱟ ᱾ ᱩᱭᱦᱟᱹᱨ ᱮᱫᱟᱭ ᱪᱷᱤᱛᱟᱹ ᱾

ᱵᱟᱥᱚᱱᱛᱤ ᱟᱜ ᱵᱤᱥᱠᱩᱴ

ᱢᱤᱫᱴᱟᱝ ᱵᱤᱥᱠᱩᱴ ᱯᱟᱠᱮᱴ ᱟᱨ ᱢᱤᱫᱴᱟᱝ ᱯᱟᱛᱷᱟᱢ ᱮ ᱠᱤᱨᱤᱧ ᱠᱮᱫ ᱛᱮ ᱛᱟᱺᱜᱤ ᱵᱟᱹᱠᱷᱩᱞ ᱥᱮᱫ ᱮ ᱛᱟᱲᱟᱢ ᱠᱮᱫ ᱟ ᱵᱟᱥᱚᱱᱛᱤ ᱾ ᱢᱤᱫᱴᱟᱝ ᱠᱚᱲᱟᱭ ᱫᱩᱲᱩᱵ ᱞᱮᱱ ᱢᱟᱹᱪᱤ ᱥᱩᱨ ᱨᱮ ᱫᱩᱲᱩᱵ ᱠᱟᱛᱮ ᱯᱟᱛᱷᱟᱢ ᱯᱟᱲᱦᱟᱣ ᱮ ᱮᱦᱚᱵ ᱠᱮᱫᱟ ᱾ ᱱᱟᱥᱮ ᱨᱮᱸᱜᱮᱡ ᱞᱮᱫᱮ ᱠᱷᱟᱹᱛᱤᱨ ᱵᱤᱥᱠᱩᱴ ᱡᱚᱢ ᱦᱚᱸᱭ ᱮᱦᱚᱵ ᱠᱮᱫᱟ ᱾ ᱟᱡ ᱡᱟᱦᱟᱸ ᱵᱤᱥᱠᱩᱴ ᱮ ᱡᱚᱢ ᱮᱫᱟ ᱟᱡ ᱥᱩᱨ ᱨᱮ ᱫᱩᱲᱩᱵ ᱞᱮᱱ ᱠᱚᱲᱟ ᱦᱚᱸ ᱚᱱᱟ ᱵᱤᱥᱠᱩᱴ ᱡᱚᱢ ᱮ ᱮᱦᱚᱵ ᱠᱮᱫᱟ ᱧᱮᱞ ᱛᱮ ᱵᱟᱥᱚᱱᱛᱤ ᱨᱟᱹᱜᱤ ᱮᱱᱟᱭ ᱾ ᱤᱠᱷᱟᱹᱱ ᱪᱮᱫ ᱦᱚᱸ ᱵᱟᱭ ᱢᱮᱱ ᱞᱮᱫᱟ ᱾ ᱵᱟᱥᱚᱱᱛᱤ ᱫᱚᱦᱲᱟ ᱵᱤᱥᱠᱩᱴ ᱮ ᱡᱚᱢ ᱠᱮᱫ ᱠᱷᱟᱱ ᱩᱱᱤ ᱠᱚᱲᱟ ᱦᱚᱸ ᱟᱨ ᱢᱤᱫᱴᱤᱡ ᱵᱤᱥᱠᱩᱴ ᱤᱫᱤ ᱠᱟᱛᱮ ᱡᱚᱢ ᱠᱮᱫᱟᱭ ᱾

ᱵᱟᱥᱚᱱᱛᱤ ᱟᱨ ᱵᱟᱭ ᱥᱟᱢᱵᱽᱲᱟᱣ ᱫᱟᱲᱮᱭᱟᱫ ᱛᱮ ᱮᱜᱮᱨ ᱮ ᱮᱦᱚᱵ ᱠᱮᱫᱟ, ᱵᱤᱫᱷᱩᱣᱟᱹ ᱨᱟᱯᱟᱜ ᱜᱮᱞ ᱴᱟᱠᱟ ᱛᱮ ᱢᱤᱫᱴᱟᱝ ᱵᱤᱥᱠᱩᱴ ᱯᱟᱠᱮᱴ ᱵᱟᱭ ᱠᱤᱨᱤᱧ ᱫᱟᱲᱮᱭᱟᱜ ᱠᱟᱱᱟ, ᱦᱚᱲ ᱠᱤᱨᱤᱧᱟᱜ ᱵᱤᱥᱠᱩᱴ ᱮ ᱡᱚᱢ ᱮᱫᱟ ᱾ ᱩᱱᱤ ᱠᱚᱲᱟ ᱫᱚ ᱪᱮᱫ ᱵᱚᱸ ᱵᱟᱝ ᱢᱮᱱ ᱠᱟᱛᱮ ᱢᱟᱬᱟᱝ ᱞᱮᱠᱟ ᱜᱮ ᱵᱤᱥᱠᱩᱴ ᱡᱚᱢ ᱮ ᱪᱷᱩᱴᱟᱹᱣ ᱮᱱᱟ ᱾

ᱢᱩᱪᱟᱹᱫ ᱨᱮ ᱟᱨ ᱢᱤᱫᱴᱤᱡ ᱵᱤᱥᱠᱩᱴ ᱥᱟᱨᱮᱡ ᱮᱱᱟ ᱾ ᱠᱚᱲᱟ ᱫᱚ ᱚᱱᱟ ᱵᱤᱥᱠᱩᱴ ᱠᱮᱪᱟᱜ ᱠᱟᱛᱮ ᱢᱤᱫ ᱠᱮᱪᱟᱜ ᱮ ᱡᱚᱢ ᱠᱮᱫ ᱟ, ᱟᱨ ᱢᱤᱫ ᱠᱮᱪᱟᱜ ᱫᱚ ᱚᱱᱰᱮ ᱜᱮ ᱫᱚᱦᱚ ᱠᱟᱫ ᱟᱭ ᱾ ᱵᱟᱥᱚᱱᱛᱤ ᱫᱚ ᱠᱮᱪᱟᱜ ᱵᱤᱥᱠᱩᱴ ᱵᱟᱝ ᱡᱚᱢ ᱠᱟᱛᱮ ᱮᱜᱮᱨ ᱮᱜᱮᱨ ᱛᱮ ᱚᱱᱰᱮ ᱠᱷᱚᱱ ᱮ ᱥᱟᱦᱟ ᱮᱱᱟ ᱾

ᱩᱰᱟᱹᱱ ᱜᱟᱹᱰᱤ ᱦᱮᱡ ᱮᱱᱟ ᱾ ᱩᱰᱟᱹᱱ ᱜᱟᱹᱰᱤ ᱨᱮ ᱫᱮᱡ ᱠᱟᱛᱮ ᱵᱟᱥᱚᱱᱛᱤ ᱯᱟᱛᱷᱟᱢ ᱵᱮᱜᱽ ᱨᱮ ᱥᱟᱢᱵᱟᱣ ᱡᱷᱚᱜ ᱮ ᱧᱮᱞ ᱠᱮᱫ ᱟ, ᱟᱡᱟᱜ ᱵᱤᱥᱠᱩᱴ ᱫᱚ ᱵᱮᱜᱽ ᱨᱮᱜᱮ ᱢᱮᱱᱟᱜ-ᱟ ᱾ ᱩᱱᱤ ᱠᱚᱲᱟ ᱦᱟᱜ ᱵᱤᱥᱠᱩᱴ ᱜᱮ ᱡᱚᱢ ᱠᱟᱛᱮ ᱥᱚᱠᱛᱚᱭ ᱮᱜᱮᱨ ᱚᱴᱚ ᱟᱠᱟᱫᱮᱭᱟ ᱾ ᱩᱱᱤ ᱠᱚᱲᱟ ᱴᱷᱮᱱ ᱥᱮᱱ ᱠᱟᱛᱮ ᱤᱠᱟᱹ ᱠᱚᱭ ᱥᱟᱱᱟ ᱠᱮᱫᱮᱭᱟ ᱵᱟᱥᱚᱱᱛᱤ, ᱤᱠᱷᱟᱹᱱ ᱤᱱᱟᱹᱜ ᱛᱮᱫᱚ ᱩᱰᱟᱹᱱ ᱜᱟᱹᱰᱤ ᱨᱚᱱᱣᱮ ᱨᱮ ᱫᱟᱹᱲ ᱮ ᱮᱦᱚᱵ ᱞᱮᱫ ᱛᱟᱦᱮᱸᱫ ᱾ ᱑᱘ᱹ᱐᱘ᱹ᱒᱐᱑᱓

ᱚᱥᱟᱹᱜᱩᱱ

ᱢᱩᱬ ᱦᱤᱱᱫᱤ- ᱥᱤᱞ ᱠᱚᱣᱥᱤᱠ

ᱵᱟᱨ ᱫᱤᱱ ᱜᱟᱱ ᱦᱩᱭᱮᱱᱟ ᱢᱤᱫᱴᱮᱱ ᱥᱮᱛᱟ ᱵᱷᱩᱜ ᱫᱚ ᱵᱟᱝᱟ ᱠᱟᱸᱭ ᱠᱟᱸᱭ ᱮ ᱨᱟᱜ ᱮᱫᱟ ᱾ ᱡᱟᱦᱟᱸᱭ ᱚᱲᱟᱜ ᱥᱟᱢᱟᱝ ᱨᱮᱜᱮ ᱨᱟᱜ ᱮᱫᱟ ᱡᱷᱚᱛᱚ ᱜᱮ ᱦᱟᱯᱟ ᱥᱟᱯ ᱠᱟᱛᱮ ᱠᱯ ᱞᱟᱦᱟ ᱠᱮᱫᱮᱟᱭᱟ ᱾ ᱥᱮᱛᱟ ᱦᱟᱜ ᱱᱚᱝᱠᱟᱱ ᱨᱟᱜ ᱟᱧᱡᱚᱢ ᱛᱮ ᱟᱹᱛᱩ ᱦᱚᱲ ᱪᱟᱨᱪᱟ ᱠᱚ ᱮᱦᱚᱵ ᱠᱮᱫᱟ ᱾

ᱢᱤᱫ ᱦᱚᱲ ᱮ ᱢᱮᱱ ᱠᱮᱫᱟ, ᱥᱮᱛᱟ ᱱᱚᱝᱠᱟ ᱠᱟᱸᱭ ᱠᱟᱸᱭ ᱪᱮ ᱛᱩᱭᱩ ᱞᱮᱠᱟ ᱨᱟᱜᱽ ᱫᱚ ᱚᱥᱟᱹᱜᱩᱱ ᱨᱮᱭᱟᱜ ᱞᱚᱪᱷᱱᱟ ᱠᱟᱱᱟ ᱾ ᱴᱚᱞᱟ ᱨᱮᱜᱮ ᱨᱟᱢᱮᱥᱚᱨ ᱵᱟᱹᱵᱩᱭ ᱨᱩᱣᱟᱹᱜ ᱠᱟᱱᱟ, ᱪᱮᱫ ᱠᱚ ᱯᱟᱪᱷᱮ ᱦᱩᱭ ᱮᱢᱟᱱᱚᱜ-ᱟ?

ᱟᱨ ᱢᱤᱫ ᱦᱚᱲ ᱮ ᱢᱮᱱ ᱠᱮᱫᱟ, ᱥᱮᱛᱟ ᱫᱚ ᱡᱚᱢ ᱨᱟᱡᱟ ᱦᱟᱜ ᱩᱢᱩᱞ ᱠᱚ ᱧᱮᱧᱟᱢ ᱞᱮᱠᱷᱟᱱ ᱱᱚᱝᱠᱟ ᱠᱚ ᱨᱟᱜᱟ!

ᱛᱮᱥᱟᱨ ᱦᱚᱲ ᱮ ᱢᱮᱱ ᱠᱮᱫᱟ, ᱦᱚᱞᱟ ᱧᱤᱫᱟᱹ ᱵᱟᱡᱟᱨ ᱠᱷᱚᱱᱟᱜ ᱨᱩᱣᱟᱹᱲ ᱡᱚᱠᱷᱮᱡ ᱚᱱᱟ ᱵᱟᱲᱮ ᱫᱟᱨᱮ ᱴᱷᱮᱱ ᱪᱤᱞᱤ ᱪᱚᱠᱚ ᱨᱟᱜᱟᱥ ᱨᱚᱜᱚᱥ ᱟᱹᱫᱤᱧᱟ ᱾ ᱟᱹᱰᱤᱧ ᱵᱚᱨᱚᱭᱮᱱᱟ, ᱟᱹᱛᱩ ᱠᱚᱢᱟ ᱢᱚᱴᱷᱮ ᱵᱮᱥ ᱜᱮ ᱵᱟᱝ ᱵᱩᱡᱷᱟᱹᱜ ᱠᱟᱱᱟ ᱾

ᱟᱨ ᱢᱤᱫ ᱦᱚᱲ, ᱡᱟᱦᱟᱸᱭ ᱫᱚ ᱱᱩᱠᱩᱣᱟᱜ ᱠᱟᱛᱷᱟ ᱛᱷᱤᱨ ᱛᱷᱟᱨ ᱮ ᱟᱧᱡᱚᱢᱮᱫ ᱛᱟᱦᱮᱸᱫ, ᱮ ᱢᱮᱱ ᱠᱮᱫᱟ, ᱮᱭᱟ ᱩᱱᱤ ᱥᱮᱛᱟ ᱢᱟ ᱟᱞᱮ ᱚᱲᱟᱜ ᱨᱮ ᱵᱟᱥᱟ ᱞᱮᱱ ᱾ ᱩᱱᱤ ᱤᱧ ᱥᱮᱫ ᱠᱚᱭᱚᱜ ᱠᱟᱛᱮ ᱦᱩᱻᱦᱩᱻᱭ ᱨᱟᱜ ᱠᱮᱫᱟ ᱾ ᱫᱟᱠᱟ ᱠᱚᱞᱮ ᱮᱢᱟᱫᱮ ᱠᱷᱟᱱ ᱮ ᱵᱩᱨᱩᱢ ᱛᱷᱤᱨ ᱮᱱᱛᱮ ᱢᱤᱫᱴᱟᱝ ᱛᱷᱚᱯᱟ ᱫᱚ ᱞᱮᱛᱟᱲ ᱮ ᱡᱟᱞᱮᱫ ᱟᱨ ᱮ ᱜᱮᱨᱮᱫ ᱛᱮᱦᱮᱸᱫ ᱾ ᱥᱟᱦᱟᱥ ᱥᱟᱧᱪᱟᱣ ᱠᱟᱛᱮ ᱟᱡ ᱥᱩᱨ ᱤᱧ ᱪᱟᱞᱟᱣ ᱮᱱᱟ, ᱧᱮᱞᱟᱹᱧ ᱫᱚ ᱟᱡᱟᱜ ᱛᱷᱚᱯᱟ ᱨᱮ ᱠᱟᱸᱪ ᱵᱚᱞᱚ ᱟᱠᱟᱱᱟ ᱾ ᱚᱱᱟᱛᱮᱜᱮ ᱥᱮᱛᱟ ᱫᱚ ᱠᱟᱸᱭ ᱠᱟᱸᱭ ᱮ ᱨᱟᱜᱮᱫ ᱛᱟᱦᱮᱸᱫᱚᱜ, ᱡᱟᱦᱟᱸᱱᱟᱜ ᱚᱥᱟᱹᱜᱩᱱ ᱠᱷᱟᱹᱛᱤᱨ ᱫᱚ ᱵᱟᱝ ᱾ ᱠᱟᱸᱪ ᱤᱧ ᱚᱪᱚᱜ ᱠᱟᱫ ᱠᱷᱟᱱ ᱚᱠᱟ ᱥᱮᱫ ᱪᱚᱭ ᱧᱤᱨ ᱮᱱᱟ ᱾

ᱩᱯᱠᱟᱹᱨᱤᱭᱟᱹ

ᱫᱚᱨᱭᱟ ᱵᱷᱤᱛᱨᱤ ᱨᱮ ᱩᱱᱩᱢ ᱠᱟᱛᱮ ᱢᱮᱱᱟᱜ ᱢᱤᱫᱴᱟᱝ ᱵᱩᱨᱩ ᱨᱮ ᱛᱟᱹᱠᱤᱡ ᱮᱱᱛᱮ ᱡᱟᱦᱟᱡᱽ ᱫᱚ ᱩᱱᱩᱢᱚᱜ ᱮᱦᱚᱵ ᱮᱱᱟ ᱾

ᱰᱷᱚᱝᱜᱟ ᱛᱮ ᱫᱩᱫᱩᱜ ᱠᱚᱠᱚ ᱥᱮᱴᱮᱨ ᱮᱱ ᱠᱷᱟᱱ ᱡᱚᱛᱚ ᱦᱚᱲ ᱦᱚᱨᱚᱵᱚᱨᱚ ᱰᱷᱚᱝᱜᱟ ᱨᱮᱠᱚ ᱫᱮᱡ ᱮᱱᱟ ᱾ ᱦᱤᱲ ᱠᱚ ᱫᱮᱡ ᱯᱮᱨᱮᱡ ᱞᱮᱱ ᱰᱷᱝᱜᱟ ᱠᱚᱫᱚ ᱢᱟᱬᱟᱝ ᱮᱱᱟ, ᱥᱟᱨᱮᱡ ᱮᱱᱟ ᱢᱩᱪᱟᱹᱫ ᱰᱷᱚᱝᱜᱟ ᱾ ᱱᱚᱶᱟ ᱰᱷᱚᱝᱜᱟ ᱨᱮᱦᱚᱸ ᱩᱱᱟᱹᱜ ᱦᱚᱲ ᱠᱚ ᱫᱮᱡ ᱮᱱᱟ ᱡᱮ ᱟᱨ ᱢᱤᱫ ᱦᱚᱲ ᱜᱟᱱ ᱮ ᱫᱮᱡ ᱞᱮᱱᱠᱷᱟᱱ ᱜᱮ ᱰᱷᱚᱝᱜᱟ ᱩᱱᱩᱢᱚᱜ-ᱟ ᱾ ᱪᱮᱫ ᱵᱚ ᱪᱮᱠᱟᱭᱟ? ᱰᱷᱚᱝᱜᱟ ᱨᱮᱢᱟ ᱟᱨ ᱡᱟᱭᱜᱟ ᱜᱮ ᱵᱟᱹᱱᱩᱜ-ᱟ, ᱟᱨ ᱢᱤᱫ ᱦᱚᱲ ᱜᱟᱱ ᱮ ᱫᱮᱡ ᱞᱮᱱᱠᱷᱟᱱ ᱜᱮ ᱰᱷᱚᱝᱜᱟ ᱩᱱᱤᱢ ᱩᱛᱟᱹᱨᱚᱜ-ᱟ ᱾ ᱢᱤᱫ ᱦᱚᱲ ᱠᱷᱟᱹᱛᱤᱨ ᱡᱚᱛᱚ ᱦᱚᱲ ᱵᱚ ᱩᱱᱩᱢ ᱜᱩᱡᱩᱜ-ᱟ ᱾ ᱡᱚᱛᱚ ᱦᱚᱲ ᱱᱚᱝᱠᱟ ᱠᱚ ᱩᱭᱦᱟᱹᱨᱮᱫ ᱵᱮᱲᱟ ᱨᱮ ᱰᱷᱚᱝᱜᱟ ᱠᱷᱚᱱᱟᱜ ᱢᱤᱫᱴᱮᱱ ᱛᱤᱨᱞᱟᱹ, ᱡᱟᱦᱟᱸᱭ ᱫᱚ ᱵᱟᱨ ᱥᱮᱨᱢᱟ ᱩᱢᱮᱨ ᱜᱟᱱᱤᱡ ᱜᱤᱫᱟᱹᱨ ᱮ ᱦᱮᱵᱮ ᱟᱠᱟᱫᱮᱭᱟ, ᱠᱤᱠᱭᱟᱹᱣ ᱠᱟᱛᱮ ᱢᱮᱱ ᱠᱮᱫ ᱟᱭ, ᱚᱣᱟᱨ ᱮ ᱯᱮ! ᱩᱱᱤ ᱫᱚ ᱤᱧ ᱡᱟᱶᱟᱭ ᱠᱟᱱᱟᱭ ᱾ ᱩᱱᱤ ᱵᱟᱯᱮ ᱚᱣᱟᱨ ᱮ ᱠᱷᱟᱱ ᱱᱩᱭ ᱜᱤᱫᱟᱹᱨ ᱟᱜ ᱟᱜᱟᱢ ᱧᱩᱛᱟᱹᱛ ᱩᱛᱟᱹᱨᱚᱜ-ᱟ ᱾

ᱱᱩᱭ ᱟᱜ ᱠᱟᱛᱷᱟ ᱟᱹᱣᱨᱤ ᱪᱟᱵᱟᱜ ᱨᱮᱜᱮ ᱫᱩᱫᱩᱜᱤᱡ ᱠᱷᱚᱱᱟᱜ ᱢᱤᱫ ᱦᱚᱲ ᱫᱚ ᱫᱚᱨᱭᱟ ᱵᱷᱤᱛᱨᱤ ᱛᱮ ᱫᱚᱱ ᱠᱷᱟᱧᱡᱚ ᱮᱱᱟᱭ ᱾ ᱫᱟᱜ ᱨᱮ ᱩᱰᱤᱡ ᱰᱩᱵᱩᱡᱚᱜ ᱠᱟᱱ ᱠᱚᱲᱟ ᱛᱮᱡ ᱰᱷᱚᱝᱜᱟ ᱨᱮ ᱰᱷᱟᱠᱟ ᱫᱮᱡ ᱠᱟᱛᱮ ᱟᱡ ᱫᱚᱭ ᱩᱱᱩᱢ ᱥᱟᱹᱨᱤ ᱮᱱᱟ ᱾

ᱪᱮᱫᱟᱜ

ᱟᱡ ᱵᱟᱵᱟ ᱟᱨ ᱟᱡ ᱫᱟᱫᱟ ᱛᱮᱠᱤᱱ ᱡᱟᱦᱮᱨ ᱪᱟᱞᱟᱜ ᱠᱟᱱ ᱧᱮᱞᱛᱮ ᱥᱩᱢᱤ ᱦᱚᱸᱭ ᱟᱹᱨᱡᱤ ᱠᱮᱫᱟ ᱡᱟᱦᱮᱨ ᱥᱮᱱᱚᱜ ᱞᱟᱹᱜᱤᱫ ᱾ ᱢᱚᱬᱮ ᱩᱢᱮᱨ ᱠᱩᱲᱤ ᱜᱤᱫᱽᱨᱟᱹ ᱫᱚ ᱟᱡ ᱵᱟᱵᱟ ᱡᱟᱦᱟᱸ ᱥᱮᱫ ᱥᱮᱱᱚᱜ ᱡᱷᱚᱜ ᱮ ᱤᱫᱤ ᱵᱟᱲᱟ ᱮ ᱜᱮᱭᱟ ᱾ ᱚᱱᱟᱛᱮ ᱡᱟᱦᱮᱨ ᱦᱚᱸ ᱥᱮᱱᱚᱜ ᱥᱟᱱᱟᱭ ᱠᱟᱱᱟ ᱾

ᱟᱡ ᱫᱟᱫᱟ ᱧᱮᱞᱛᱮ ᱟᱡ ᱦᱚᱸ ᱯᱷᱟᱹᱨᱪᱟᱹ ᱯᱷᱟᱹᱨᱪᱤ ᱫᱚᱛᱚ ᱯᱮᱸᱴ ᱠᱚᱭ ᱦᱚᱨᱚᱜ ᱠᱮᱫ ᱟ ᱾ ᱟᱞᱚᱢ ᱪᱟᱞᱟᱜ-ᱟ ᱭᱳ, ᱠᱩᱲᱤ ᱜᱤᱫᱽᱨᱟᱹ ᱫᱚ ᱡᱟᱦᱮᱨ ᱫᱚ ᱵᱟᱠᱚ ᱥᱮᱱᱚᱜ-ᱟ ᱾ ᱟᱡ ᱵᱟᱵᱟᱭ ᱵᱩᱡᱷᱟᱹᱣ ᱠᱮᱫᱮᱭᱟ ᱾ ᱥᱩᱢᱤ ᱫᱚ ᱤᱠᱷᱟᱹᱱ ᱥᱮᱱᱚᱜ ᱜᱤᱭᱟᱹᱧ, ᱥᱮᱱᱚᱜ ᱜᱤᱭᱟᱹᱧ ᱮ ᱨᱚᱜᱚᱲ ᱟᱠᱟᱫ ᱟ ᱾

ᱟᱡ ᱵᱟᱵᱟ ᱛᱮᱠᱤᱱ ᱠᱤᱱ ᱚᱰᱚᱠᱮᱱ ᱠᱷᱟᱱ ᱥᱩᱢᱤ ᱦᱚᱸᱭ ᱠᱩᱫᱟᱹᱣ ᱠᱮᱫ ᱠᱤᱱᱟ ᱾

ᱟᱞᱚᱢ ᱦᱤᱡᱩᱜ-ᱟ ᱢᱮᱛᱟᱢ ᱠᱟᱱᱟᱹᱧ ᱾ ᱵᱟᱵᱟ ᱦᱟᱜ ᱩᱨᱤᱡ ᱫᱷᱟᱨᱟ ᱟᱲᱟᱝ ᱟᱧᱡᱚᱢ ᱛᱮ ᱥᱩᱢᱤ ᱫᱟᱯᱠᱟᱣ ᱧᱚᱜ ᱮᱱᱟᱭ ᱾ ᱱᱤᱛ ᱫᱚ ᱵᱟᱹᱭ ᱵᱟᱹᱭ ᱫᱷᱟᱨᱟᱭ ᱛᱟᱲᱟᱢ ᱟᱠᱟᱫ ᱛᱮ ᱯᱟᱸᱡᱟ ᱟᱠᱟᱫ ᱠᱤᱱᱟ ᱾ ᱨᱩᱣᱟᱹᱲ ᱠᱟᱱᱟᱢ ᱥᱮ ᱵᱟᱝᱟ ᱾ ᱵᱟᱵᱟ ᱦᱟᱜ ᱨᱟᱹᱜᱤ ᱟᱲᱟᱝ ᱟᱧᱡᱚᱢ ᱠᱟᱛᱮ ᱦᱚᱸ ᱥᱩᱢᱤ ᱯᱟᱸᱡᱟ ᱟᱠᱟᱫ ᱠᱤᱱ ᱜᱮᱭᱟ ᱾

ᱟᱡ ᱵᱟᱵᱟ ᱦᱟᱜ ᱨᱟᱹᱜᱤ ᱵᱚᱦᱚᱜ ᱛᱮ ᱨᱟᱠᱟᱵ ᱮᱱᱟ ᱾ ᱟᱫᱚ ᱨᱩᱣᱟᱹᱲ ᱠᱟᱛᱮ ᱵᱟᱨ ᱫᱷᱟᱣ ᱮ ᱛᱷᱟᱯᱚᱲ ᱠᱮᱫᱮᱭᱟ ᱥᱩᱢᱤ ᱜᱤᱫᱽᱨᱟᱹ ᱾ ᱥᱩᱢᱤ ᱫᱚ ᱨᱟᱜ ᱨᱟᱜ ᱛᱮ ᱫᱟᱹᱲ ᱨᱩᱣᱟᱹᱲ ᱮᱱᱟᱭ ᱚᱲᱟᱜ ᱥᱮᱫ ᱾ ᱨᱟᱨᱟᱜ ᱛᱩᱞᱩᱡ ᱮ ᱩᱭᱦᱟᱹᱨ ᱮᱫ ᱛᱟᱦᱮᱸᱫ, ᱪᱮᱫᱟᱜ ᱠᱩᱲᱤ ᱜᱤᱫᱽᱨᱟᱹ ᱫᱚ ᱡᱟᱦᱮᱨ ᱛᱮ ᱵᱟᱠᱚ ᱥᱮᱱ ᱚᱪᱚ ᱟᱠᱚᱣᱟ ? ᱪᱮᱫᱟᱜ ? ᱪᱮᱫᱟᱜ ??