ᱛᱩᱢᱫᱟᱜ
ᱛᱩᱢᱫᱟᱜ ᱫᱚ ᱦᱩᱭᱩᱜ ᱠᱟᱱᱟ ᱥᱤᱧᱚᱛ, ᱵᱟᱝᱞᱟᱫᱮᱥ ᱟᱨ ᱱᱮᱯᱟᱞ ᱫᱤᱥᱚᱢ ᱨᱤᱱ ᱦᱚᱲ ᱦᱚᱯᱚᱱ ᱥᱮ ᱥᱟᱱᱛᱟᱲ ᱠᱚᱣᱟᱜ ᱨᱩᱨᱩᱭ ᱡᱟᱭ ᱾ ᱱᱚᱶᱟ ᱡᱟᱭ ᱫᱚ ᱜᱩᱞᱟᱺᱰ ᱢᱩᱰᱷᱟᱹᱫ ᱞᱮᱠᱟᱱᱟ, ᱵᱷᱤᱛᱤᱨ ᱫᱚ ᱠᱷᱚᱞ ᱜᱮᱭᱟ ᱾ ᱢᱤᱫ ᱢᱚᱠᱟ ᱟᱨ ᱢᱤᱫ ᱵᱤᱛᱟᱹ ᱜᱟᱱ ᱡᱤᱞᱤᱧᱟ ᱾ ᱵᱟᱨ ᱱᱟᱠᱷᱟ ᱵᱟᱨᱭᱟ ᱢᱚᱪᱟ ᱟᱨᱵᱟᱝ ᱛᱤᱻ ᱛᱮ ᱠᱚᱴᱟᱵ ᱥᱮ ᱫᱟᱞ ᱞᱟᱹᱜᱤᱫ ᱴᱷᱟᱶ ᱢᱮᱱᱟᱜ ᱟᱠᱟᱫᱼᱟ ᱾ ᱚᱱᱟ ᱴᱷᱟᱶ ᱫᱚ ᱠᱷᱟᱨᱮᱱ ᱠᱚ ᱢᱮᱛᱟᱜᱼᱟ ᱾ ᱚᱱᱟ ᱴᱷᱟᱶ ᱨᱮ ᱛᱤ ᱛᱮ ᱫᱟᱞ ᱞᱮᱠᱷᱟᱱ ᱨᱟᱲᱟᱝ ᱥᱟᱰᱮ ᱚᱰᱚᱠᱚᱜᱼᱟ ᱾ ᱦᱚᱲ ᱦᱚᱯᱚᱱ ᱠᱚ ᱛᱩᱢᱫᱟᱜ ᱫᱚ ᱫᱷᱚᱨᱚᱢ ᱠᱚᱨᱚᱢ ᱟᱨ ᱯᱚᱨᱚᱵᱽ ᱯᱩᱱᱟᱹᱭ ᱮᱱᱮᱡ ᱨᱮ ᱴᱟᱢᱟᱠ ᱥᱟᱶ ᱠᱚ ᱨᱩᱭᱟ ᱾ ᱱᱚᱶᱟ ᱛᱩᱢᱫᱟᱜ ᱟᱨ ᱴᱟᱢᱟᱠ ᱫᱚ ᱟᱠᱷᱲᱟ ᱨᱮ ᱠᱚᱲᱟ ᱦᱚᱯᱚᱱ ᱠᱚ ᱨᱩᱭᱟ ᱟᱨ ᱠᱩᱲᱤ ᱦᱚᱯᱚᱱ ᱠᱚ ᱫᱚ ᱠᱚ ᱮᱱᱮᱡᱼᱟ ᱾ ᱛᱩᱢᱫᱟᱜ ᱨᱮᱭᱟᱜ ᱵᱟᱱᱟᱨ ᱢᱚᱪᱟ ᱫᱚ ᱰᱟᱸᱜᱽᱨᱟ ᱦᱟᱨᱛᱟ ᱛᱮ ᱟᱹᱰᱤ ᱩᱨᱤᱡ ᱛᱮᱠᱚ ᱯᱚᱴᱚᱢᱟ, ᱚᱱᱟ ᱪᱮᱛᱟᱱ ᱨᱮ ᱛᱟᱞᱟ ᱵᱟᱨᱟᱵᱟᱹᱨᱤ ᱨᱮ ᱢᱤᱫ ᱞᱮᱠᱟᱱ ᱦᱟᱥᱟ ᱛᱮ ᱜᱩᱞ ᱜᱮ ᱠᱚ ᱯᱚᱛᱟᱣᱟ ᱾ ᱚᱱᱟ ᱜᱩᱞᱟᱹᱭ ᱛᱮᱫ ᱫᱚ ᱠᱷᱟᱨᱮᱱ ᱠᱚ ᱢᱮᱛᱟᱜᱼᱟ ᱾ ᱮᱛᱚᱢ ᱱᱟᱠᱷᱟ ᱨᱮᱭᱟᱜ ᱠᱷᱟᱨᱮᱱ ᱠᱷᱚᱱ ᱠᱚᱧᱮ ᱱᱟᱠᱷᱟ ᱠᱷᱟᱨᱮᱱ ᱫᱚ ᱱᱟᱥᱮ ᱢᱟᱨᱟᱝ ᱧᱚᱜ ᱜᱮᱭᱟ ᱾ ᱥᱟᱱᱛᱟᱲ ᱦᱚᱲ ᱠᱚ ᱮᱱᱮᱡ ᱡᱷᱚᱜ, ᱛᱩᱢᱫᱟᱜ ᱨᱩᱻᱨᱩ ᱤᱡ ᱫᱚ ᱢᱟᱹᱫᱟᱹᱲᱤᱭᱟᱹ ᱠᱚ ᱢᱮᱛᱟᱭᱟ ᱾ ᱢᱟᱹᱫᱟᱹᱲᱤᱭᱟᱹ ᱛᱩᱢᱫᱟᱜ ᱛᱤ ᱛᱮ ᱪᱮᱴᱟᱜ ᱮᱫ ᱡᱷᱚᱜ, ᱪᱮᱴᱟᱜ ᱨᱮᱱᱟᱜ ᱵᱚᱦᱚᱨ ᱤᱫᱤᱠᱟᱛᱮ ᱜᱮ ᱨᱟᱲᱟᱝ ᱥᱟᱰᱮ ᱟᱨ ᱛᱟᱹᱯᱩᱜ ᱥᱟᱰᱮ ᱠᱚ ᱯᱷᱚᱴᱮᱞᱚᱜᱼᱟ ᱾
