ᱜᱮᱭᱟᱱ
ᱜᱮᱭᱟᱱ ᱫᱚ ᱢᱤᱫ ᱜᱩᱱᱩᱱ ᱯᱟᱹᱨᱤᱥ ᱟᱹᱲᱟᱹ ᱠᱟᱱᱟ ᱾ ᱚᱱᱟᱛᱮ ᱜᱮᱭᱟᱱ ᱢᱮᱱ ᱞᱮᱠᱷᱟᱱ ᱡᱤᱵ ᱡᱤᱭᱟᱹᱞᱤ ᱠᱚᱣᱟᱜ ᱦᱟᱛᱟᱝ ᱨᱮᱱᱟᱜ ᱠᱮᱴᱮᱡ ᱦᱚᱸ ᱠᱚ ᱢᱮᱱᱼᱟ ᱾ ᱪᱮᱠᱟᱛᱮ ᱚᱠᱚᱭᱟᱜ ᱦᱟᱛᱟᱝ ᱛᱤᱱᱟᱹᱜ ᱠᱮᱴᱮᱡᱼᱟ, ᱩᱱᱠᱩ ᱡᱤᱵ ᱜᱮ ᱡᱚᱢ ᱟᱹᱥᱩᱞᱚᱜ ᱞᱟᱹᱜᱤᱫ ᱟᱭᱢᱟ ᱞᱮᱠᱟᱱ ᱠᱟᱹᱢᱤ ᱠᱚ ᱠᱟᱹᱢᱤᱭᱟ ᱾ ᱥᱩᱞᱩᱠ ᱨᱮ ᱛᱟᱦᱮᱱ ᱞᱟᱹᱜᱤᱫ, ᱟᱠᱚ ᱨᱤᱱ ᱜᱟᱬᱟ ᱠᱚ ᱟᱹᱭᱩᱨ ᱠᱚᱣᱟ, ᱥᱟᱶᱛᱟ ᱠᱚ ᱵᱮᱱᱟᱣᱼᱟ, ᱥᱟᱶᱦᱮᱫ ᱠᱚ ᱛᱚᱞ ᱫᱚᱦᱚᱭᱟ ᱾ ᱡᱤᱵ ᱠᱚ ᱵᱟᱧᱪᱟᱣᱜ ᱞᱟᱹᱜᱤᱫ, ᱡᱚᱢ ᱟᱹᱥᱩᱞᱚᱜ ᱥᱟᱶᱛᱮ ᱨᱩᱣᱟᱹᱜ ᱟᱡᱟᱨ ᱠᱷᱚᱱ ᱵᱮᱥᱚᱜ ᱞᱟᱹᱜᱤᱫ ᱛᱮ ᱨᱟᱱ ᱡᱩᱰᱜᱟᱹᱨ ᱥᱮᱸᱫᱽᱨᱟ ᱧᱟᱢ, ᱟᱠᱚᱣᱟᱜ ᱥᱟᱶᱛᱟ ᱥᱩᱜᱩᱲ ᱛᱮ ᱛᱟᱦᱮᱱ ᱞᱟᱹᱜᱤᱫ ᱞᱟᱹᱭ ᱞᱟᱠᱪᱟᱨ ᱟᱨ ᱨᱟᱭᱨᱤᱛ ᱛᱚᱞ ᱫᱚᱦᱚ ᱞᱮᱠᱟᱱ ᱠᱟᱹᱢᱤ ᱠᱚ ᱫᱚ ᱩᱱᱠᱩ ᱡᱤᱵ ᱟᱜ ᱜᱮᱭᱟᱱ ᱨᱮᱱᱟᱜ ᱚᱨᱡᱚ ᱠᱚ ᱠᱟᱱᱟ ᱾ ᱢᱤᱫ ᱦᱚᱲ ᱟᱜ ᱜᱮᱭᱟᱱ ᱢᱮᱱ ᱞᱮᱠᱷᱟᱱ ᱱᱟᱯᱟᱭ ᱛᱮ ᱛᱟᱦᱮᱱ ᱞᱟᱹᱜᱤᱫ ᱟᱡᱟᱜ ᱥᱮᱪᱮᱫ ᱜᱩᱱ ᱦᱚᱸ ᱵᱩᱡᱷᱟᱹᱣᱵ ᱛᱟᱭᱟ ᱾ ᱜᱮᱭᱟᱱ ᱫᱚ ᱯᱚᱛᱚᱵ ᱯᱩᱛᱷᱤ ᱯᱟᱲᱦᱟᱣ ᱠᱟᱛᱮ, ᱟᱸᱡᱚᱢ ᱪᱮᱫ ᱠᱟᱛᱮᱟᱨ ᱠᱟᱹᱢᱤ ᱠᱚ ᱛᱚᱨᱟᱣ ᱤᱫᱤ ᱛᱩᱞᱩᱡ ᱛᱮ ᱟᱨᱡᱟᱣᱜᱼᱟ ᱾ ᱜᱮᱭᱟᱱ ᱟᱨᱡᱟᱣ ᱞᱟᱹᱜᱤᱫ ᱠᱷᱟᱱ ᱢᱤᱫᱴᱟᱹᱝ ᱡᱟᱭ ᱤᱫᱤᱠᱟᱛᱮ ᱜᱟᱺᱦᱤᱨ ᱩᱭᱦᱟᱹᱨ, ᱚᱱᱟ ᱤᱫᱤᱠᱟᱛᱮ ᱠᱷᱚᱸᱫᱽᱨᱚᱫᱽ ᱟᱨ ᱞᱟᱹᱭ ᱜᱟᱱ ᱪᱮᱫᱚᱜ ᱦᱩᱭᱩᱜᱼᱟ ᱾ ᱵᱟᱧᱪᱟᱣᱜ ᱵᱟᱦᱟᱨ ᱨᱮ ᱵᱟᱡᱟᱣᱵ ᱠᱟᱱ ᱮᱴᱠᱮᱴᱚᱬᱮ ᱠᱚ ᱠᱷᱚᱸᱫᱽᱨᱚᱫᱽ ᱞᱮᱠᱷᱟᱱ ᱦᱚᱸ ᱜᱮᱭᱟᱱ ᱟᱨᱡᱟᱣᱜᱼᱟ ᱾
ᱜᱮᱭᱟᱱ ᱛᱚᱛᱷᱭᱚᱥᱟᱯᱲᱟᱣ
ᱜᱮᱭᱟᱱ ᱛᱚᱛᱷᱭᱚ ᱢᱮᱱ ᱞᱮᱠᱷᱟᱱ ᱢᱤᱫ ᱦᱚᱲ ᱟᱭᱳ ᱠᱚᱞᱮᱨᱮ ᱦᱟᱨᱟᱜ ᱡᱷᱚᱜ ᱟᱭᱳ ᱴᱷᱮᱱ ᱠᱷᱚᱱ ᱮ ᱪᱮᱢᱮᱫᱚᱜ ᱵᱚᱦᱚᱨ ᱟᱨ ᱦᱟᱨᱟ ᱠᱟᱛᱮ ᱤᱛᱩᱱ ᱟᱥᱲᱟ ᱨᱮ ᱯᱚᱛᱚᱵ ᱯᱟᱲᱦᱟᱣ ᱠᱟᱛᱮ ᱟᱨ ᱵᱟᱝ ᱥᱟᱶᱛᱟ ᱨᱮ ᱜᱩᱨᱞᱟᱹᱣ ᱤᱫᱤᱜ ᱠᱟᱱ ᱦᱚᱭ ᱦᱤᱥᱤᱫ, ᱥᱤᱛᱩᱝ, ᱡᱟᱨᱜᱮ ᱡᱟᱹᱯᱩᱫ ᱮᱢᱟᱱ ᱠᱚ ᱨᱮᱱᱟᱜ ᱚᱨᱥᱚᱝ ᱠᱚ ᱢᱮᱫ ᱛᱮ ᱧᱮᱞ ᱠᱟᱛᱮ, ᱞᱩᱛᱩᱨ ᱛᱮ ᱟᱸᱡᱚᱢ ᱠᱟᱛᱮ ᱪᱮᱢᱮᱫᱚᱜ ᱟᱨ ᱥᱮᱪᱮᱫᱚᱜ ᱜᱮ ᱜᱮᱭᱟᱱ ᱛᱚᱛᱷᱭᱚ ᱨᱮᱱᱟᱜ ᱢᱤᱫ ᱵᱷᱟᱜᱽ ᱠᱟᱱᱟ ᱾ ᱢᱤᱫ ᱦᱚᱲ ᱮ ᱯᱟᱸᱡᱟ ᱮᱫ ᱠᱟᱱ ᱜᱮᱭᱟᱱ ᱛᱚᱛᱷᱭᱚ ᱨᱮᱱᱟᱜ ᱚᱨᱥᱚᱝ ᱞᱮᱠᱟᱛᱮ ᱩᱱᱤ ᱦᱚᱲ ᱟᱜ ᱨᱚᱲ, ᱞᱟᱸᱫᱽ, ᱵᱮᱵᱷᱟᱨ ᱟᱨ ᱵᱟᱝ ᱥᱟᱶᱛᱟᱨᱤ ᱠᱟᱹᱢᱤ ᱠᱚ ᱯᱷᱚᱴᱮᱞᱚᱜᱼᱟ ᱾ ᱜᱮᱭᱟᱱ ᱛᱚᱛᱷᱭᱚ ᱫᱚ ᱵᱮᱥ ᱠᱟᱹᱢᱤ ᱥᱮ ᱵᱮᱥ ᱦᱚᱲ ᱵᱮᱱᱟᱣᱵ ᱞᱟᱹᱜᱤᱫ ᱜᱮ ᱠᱟᱱᱟ ᱾ ᱢᱤᱫ ᱦᱚᱲᱟᱜ ᱠᱟᱹᱢᱤ ᱨᱮ ᱱᱟᱯᱟᱭ ᱚᱨᱥᱚᱝ ᱯᱷᱚᱴᱮᱞ ᱞᱮᱱᱠᱷᱟᱱ ᱩᱱᱤ ᱫᱚ ᱜᱮᱭᱟᱱ ᱟᱱ ᱦᱚᱲ ᱠᱟᱱᱟᱭ ᱢᱮᱱᱛᱮ ᱵᱚ ᱢᱮᱱᱟ ᱟᱨ ᱩᱱᱤ ᱦᱚᱲ ᱫᱚ ᱵᱮᱥ ᱜᱮᱭᱟᱱ ᱛᱚᱛᱷᱭᱚᱭ ᱪᱮᱢᱮᱫ ᱟᱠᱟᱱᱟ ᱢᱮᱱᱛᱮ ᱵᱚ ᱢᱮᱱᱟ ᱾ ᱦᱚᱲ ᱟᱜ ᱯᱟᱹᱨᱥᱤ, ᱥᱟᱶᱦᱮᱫ, ᱞᱟᱹᱭ ᱞᱟᱠᱪᱟᱨ, ᱦᱚᱭ ᱦᱤᱥᱤᱫ, ᱫᱟᱨᱮ ᱞᱟᱨᱮ, ᱡᱤᱣᱤ ᱡᱟᱱᱣᱟ ᱮᱢᱟᱱ ᱛᱮᱭᱟᱜ ᱚᱠᱟ ᱜᱮ ᱫᱷᱟᱹᱨᱛᱤ ᱨᱮ ᱥᱤᱨᱡᱚᱱ ᱠᱟᱛᱮ ᱢᱮᱱᱟᱜᱼᱟ, ᱚᱱᱟ ᱠᱚ ᱜᱮ ᱜᱮᱭᱟᱱ ᱛᱚᱛᱷᱭᱚ ᱨᱮᱱᱟᱜ ᱢᱤᱼᱢᱤᱫᱴᱟᱹᱝ ᱵᱷᱟᱜᱽ ᱠᱟᱱᱟ ᱾
ᱡᱚᱜᱟᱡᱚᱜᱽ ᱜᱮᱭᱟᱱᱥᱟᱯᱲᱟᱣ
ᱢᱤᱫ ᱦᱚᱲ ᱨᱚᱱ ᱮ ᱪᱮᱫ ᱮᱱ ᱛᱟᱭᱚᱢ, ᱟᱡ ᱨᱤᱱ ᱟᱭᱳ ᱵᱟᱵᱟ ᱟᱨ ᱟᱠᱚᱣᱟᱜ ᱜᱷᱟᱨᱚᱸᱡᱽ ᱨᱤᱱ ᱢᱟᱨᱟᱝ ᱦᱚᱲ ᱠᱚ ᱥᱟᱝ ᱮ ᱨᱚᱲ ᱟᱭ ᱟᱨ ᱵᱟᱝ ᱨᱚᱯᱚᱲ ᱟᱨ ᱞᱟᱹᱭ ᱟᱭ ᱾ ᱞᱟᱹᱞᱟᱹᱭ ᱦᱚᱲ ᱪᱮᱫ ᱮ ᱠᱷᱚᱡ ᱠᱟᱱᱟ ᱚᱱᱟ ᱟᱨ ᱢᱤᱫ ᱦᱚᱲ ᱮ ᱵᱩᱡᱷᱟᱹᱣ ᱚᱪᱚᱭᱮ ᱨᱮᱱᱟᱜ ᱵᱚᱦᱚᱨ ᱜᱮ ᱡᱚᱜᱟᱡᱚᱜᱽ ᱜᱮᱭᱟᱱ ᱵᱚ ᱢᱮᱛᱟᱜᱼᱟ ᱾
ᱥᱟᱬᱮᱥ ᱜᱮᱭᱟᱱᱥᱟᱯᱲᱟᱣ
ᱥᱟᱬᱮᱥ ᱫᱚ ᱯᱟᱹᱦᱤᱞ ᱠᱷᱚᱱ ᱫᱷᱟᱹᱨᱛᱤ ᱨᱤᱱ ᱡᱤᱣᱤ ᱡᱟᱱᱣᱟ, ᱦᱚᱭ ᱦᱤᱥᱤᱫ, ᱫᱟᱨᱮ ᱞᱟᱨᱮ ᱡᱤᱣᱤ ᱡᱟᱱᱣᱟ, ᱨᱩᱣᱟᱹᱜ ᱟᱡᱟᱨ, ᱨᱟᱱ ᱢᱩᱰᱜᱟᱹᱨ ᱮᱢᱟᱱ ᱤᱫᱤ ᱠᱟᱛᱮ ᱚᱞ ᱛᱚᱞ ᱫᱚᱦᱚ ᱟᱠᱟᱱ ᱜᱮᱭᱟᱱ ᱛᱚᱛᱷᱭᱚ ᱠᱚ ᱨᱮᱱᱟᱜ ᱥᱟᱢᱴᱟᱣ ᱛᱮᱫ ᱠᱟᱱᱟ ᱾ ᱚᱱᱟᱠᱚ ᱯᱟᱲᱦᱟᱣ ᱠᱟᱛᱮ ᱪᱮᱢᱮᱫ ᱞᱮᱱ ᱠᱷᱟᱱ ᱥᱟᱬᱮᱥ ᱜᱮᱭᱟᱱ ᱧᱟᱢᱚᱜᱼᱟ ᱾
ᱫᱷᱚᱨᱚᱢ ᱜᱮᱭᱟᱱᱥᱟᱯᱲᱟᱣ
ᱢᱟᱹᱱᱢᱤ ᱫᱚ ᱫᱷᱟᱹᱨᱛᱤ ᱪᱮᱛᱟᱱ ᱨᱤᱱ ᱟᱹᱰᱤ ᱜᱮᱭᱟᱱ ᱟᱱ ᱡᱤᱵᱽ ᱢᱮᱱᱛᱮ ᱵᱚ ᱦᱤᱥᱟᱹᱵᱚᱜᱼᱟ ᱾ ᱫᱷᱟᱹᱨᱛᱤ ᱪᱮᱛᱟᱱ ᱨᱮ ᱟᱵᱚ ᱵᱟᱹᱰ ᱮᱱᱟ ᱵᱚ, ᱡᱚᱢ ᱟᱹᱥᱩᱞᱚᱜᱼᱟ ᱵᱚ ᱪᱮᱫ ᱮᱱᱟ ᱟᱨ ᱟᱹᱰᱤ ᱞᱮᱠᱟᱱ ᱜᱮᱭᱟᱱ ᱵᱚ ᱟᱨᱡᱟᱣ ᱠᱮᱜᱼᱟ ᱾ ᱟᱵᱚᱣᱟᱜ ᱫᱷᱟᱹᱨᱛᱤ ᱫᱚ ᱟᱹᱪᱩᱨ ᱟᱠᱟ ᱢᱮᱱᱟᱜᱼᱟ, ᱚᱱᱟ ᱦᱚᱸ ᱵᱚ ᱵᱟᱰᱟᱭᱟ, ᱢᱮᱱᱠᱷᱟᱱ ᱟᱵᱚ ᱢᱟᱹᱱᱢᱤ ᱛᱤᱥ ᱟᱨ ᱪᱮᱫ ᱞᱮᱠᱟ ᱛᱮ ᱵᱚ ᱡᱟᱱᱟᱢ ᱞᱮᱱᱟ ᱚᱱᱟ ᱜᱮᱭᱟᱱ ᱛᱚᱛᱷᱭᱚ ᱫᱚ ᱱᱤᱛ ᱦᱚᱸ ᱵᱟᱹᱱᱩᱜᱼᱟ ᱾ ᱟᱵᱚᱣᱟᱜ ᱫᱷᱟᱹᱨᱛᱤ ᱩᱢᱤᱱ ᱢᱟᱨᱟᱝ ᱚᱣᱟᱝ ᱨᱮ ᱪᱮᱫ ᱞᱮᱠᱟᱛᱮ ᱴᱟᱨᱦᱟᱣ ᱠᱟᱛᱮ ᱟᱹᱪᱩᱨᱚᱜ ᱠᱟᱱᱟ ᱚᱱᱟ ᱦᱟᱦᱟᱲᱟ ᱛᱮᱫ ᱜᱮ ᱫᱷᱚᱨᱚᱢ ᱜᱮᱭᱟᱱ ᱛᱚᱛᱷᱭᱚ ᱫᱚ ᱾ ᱱᱚᱶᱟ ᱫᱷᱚᱨᱚᱢ ᱜᱮᱭᱟᱱ ᱛᱚᱛᱷᱭᱚ ᱞᱮᱠᱟᱛᱮ ᱟᱵᱚ ᱦᱚᱲ ᱫᱚ ᱵᱚᱱ ᱢᱮᱱᱟ ᱢᱟᱨᱟᱝ ᱵᱳᱨᱳ ᱜᱮ ᱱᱚᱸᱠᱟᱱᱟᱜ ᱥᱤᱨᱤᱡ ᱮ ᱵᱮᱱᱟᱣ ᱟᱠᱟᱜᱼᱟ ᱾ ᱛᱤᱱᱟᱹᱜ ᱜᱟᱱ ᱦᱚᱲ ᱠᱚ ᱫᱚ ᱵᱷᱚᱜᱣᱟᱱ ᱜᱮ ᱡᱚᱛᱚᱣᱟᱜ ᱮ ᱥᱤᱨᱤᱡ ᱟᱠᱟᱜᱼᱟ ᱟᱨ ᱛᱤᱱᱟᱹᱜ ᱪᱚ ᱟᱞᱞᱟ ᱥᱮ ᱤᱥᱥᱟᱨ ᱠᱚ ᱢᱮᱱᱼᱟ ᱾ ᱱᱚᱶᱟ ᱢᱟᱨᱟᱝ ᱵᱳᱨᱳ, ᱵᱷᱚᱜᱣᱟᱱ, ᱟᱞᱞᱟ, ᱤᱥᱥᱟᱨ ᱚᱱᱠᱟᱱ ᱟᱹᱲᱟᱹ ᱠᱚ ᱫᱚ ᱫᱷᱚᱨᱚᱢ ᱤᱫᱤ ᱠᱟᱛᱮ ᱦᱟᱹᱴᱤᱧ ᱠᱟᱱᱟ ᱟᱨ ᱚᱱᱟ ᱠᱚ ᱞᱮᱠᱟᱱᱟᱜ ᱜᱮᱭᱟᱱ ᱛᱚᱛᱷᱭᱚ ᱛᱮ ᱵᱮᱱᱟᱣ ᱟᱠᱟᱱ ᱥᱟᱬᱮᱥ ᱜᱮᱭᱟᱱ ᱜᱮ ᱫᱷᱚᱨᱚᱢ ᱜᱮᱭᱟᱱ ᱠᱚ ᱢᱮᱛᱟᱜᱼᱟ ᱾
ᱮᱴᱟᱜ ᱯᱟᱹᱨᱥᱤ ᱛᱮ ᱯᱟᱲᱦᱟᱶ ᱢᱮᱥᱟᱯᱲᱟᱣ
ᱦᱤᱸᱫᱤ ᱣᱤᱠᱤ