ᱡᱳᱡᱤᱵᱤᱱᱤ ᱴᱩᱱᱡᱤ
ᱡᱳᱡᱤᱵᱤᱱᱤ ᱴᱩᱱᱡᱤ (ᱤᱝᱨᱮᱹᱡᱤ:Zozibini Tunzi;ᱡᱟᱱᱟᱢ:᱑᱘ ᱥᱮᱯᱴᱮᱢᱵᱚᱨ ᱑᱙᱙᱓)ᱫᱚ ᱠᱚᱧᱮ ᱟᱯᱷᱨᱤᱠᱟ ᱨᱮᱱ ᱢᱤᱫᱴᱮᱱ ᱢᱚᱰᱮᱞ ᱟᱨ ᱥᱩᱱᱫᱳᱨᱤ ᱦᱮᱯᱨᱟᱣ ᱨᱮᱱ ᱢᱤᱫ ᱡᱤᱛᱠᱟᱹᱨᱤᱭᱟᱹ ᱠᱟᱱᱟᱭ᱾ ᱩᱱᱤᱫᱚ ᱒᱐᱑᱙ ᱢᱤᱥ ᱤᱣᱱᱤᱵᱷᱟᱨᱥ ᱮ ᱦᱩᱭ ᱟᱠᱟᱱᱟ᱾[᱑] ᱱᱤᱭᱟᱹ ᱞᱟᱦᱟᱨᱮ ᱱᱤᱭᱟᱹ ᱥᱮᱨᱢᱟ ᱜᱮ ᱩᱱᱤ ᱢᱤᱥ ᱤᱣᱱᱤᱵᱷᱟᱨᱥ ᱠᱚᱧᱮ ᱟᱯᱷᱨᱤᱠᱟᱭ ᱦᱩᱭᱞᱮᱱᱟ᱾ ᱩᱱᱤᱫᱚ ᱛᱮᱥᱟᱨ ᱠᱚᱧᱮ ᱟᱯᱷᱨᱤᱠᱟᱱ ᱟᱨ ᱒᱐᱑᱑ ᱢᱤᱥ ᱤᱣᱱᱤᱵᱷᱟᱨᱥ ᱥᱤᱨᱯᱟ. ᱡᱤᱛᱠᱟᱹᱨᱤᱭᱟᱹ ᱞᱮᱭᱞᱟ ᱞᱳᱯᱮᱡᱽ ᱛᱟᱭᱚᱢ ᱫᱟᱨᱟᱢ ᱯᱟᱹᱦᱤᱞ ᱦᱮᱸᱫᱮ ᱛᱤᱨᱞᱟᱹ ᱦᱤᱥᱟᱹᱵᱛᱮ ᱱᱚᱣᱟ ᱥᱤᱨᱯᱟᱹᱭ ᱧᱟᱢ ᱠᱮᱫᱟ᱾
| ᱡᱳᱡᱤᱵᱤᱱᱤ ᱴᱩᱱᱡᱤ Zozibini Tunzi | |
|---|---|
| ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ ᱟᱨ ᱡᱟᱱᱟᱢ ᱴᱷᱟᱶ | ᱑᱘ ᱥᱮᱯᱴᱮᱢᱵᱚᱨ ᱑᱙᱙᱓ ᱴᱤᱥᱳᱞᱳ, ᱥᱟᱢᱟᱝ ᱠᱮᱹᱯ, ᱠᱚᱧᱮ ᱟᱯᱷᱨᱤᱠᱟ |
| ᱥᱮᱪᱮᱫ | ᱠᱮᱹᱯ ᱯᱮᱹᱱᱤᱱᱥᱩᱞᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱚᱵ ᱴᱮᱹᱠᱱᱳᱞᱳᱡᱤ |
| ᱩᱥᱩᱞ | 5 ft 10 in (1.78 m) |
| ᱥᱟᱧᱩᱢ | ᱢᱤᱥ ᱠᱚᱧᱮ ᱟᱯᱷᱨᱤᱠᱟ ᱒᱐᱑᱙ ᱢᱤᱥ ᱤᱣᱱᱤᱵᱷᱟᱨᱥ ᱒᱐᱑᱙ |
| ᱪᱚᱨᱚᱠ ᱦᱮᱯᱨᱟᱣ ᱥᱤᱨᱯᱟᱹ ᱡᱤᱛᱠᱟᱹᱨᱤᱭᱟᱹ | |
| ᱩᱵ ᱨᱚᱝ | ᱦᱮᱸᱫᱮ |
| ᱢᱮᱫ ᱨᱚᱝ | ᱵᱟᱫᱟᱢᱤ |
| ᱞᱟᱹᱴᱩ ᱦᱮᱯᱨᱟᱣ(ᱠᱩ) | ᱢᱤᱥ ᱠᱚᱧᱮ ᱟᱯᱷᱨᱤᱠᱟ ᱒᱐᱑᱗ (ᱴᱚᱯ ᱒᱖) ᱢᱤᱥ ᱠᱚᱧᱮ ᱟᱯᱷᱨᱤᱠᱟ ᱒᱐᱑᱙ (ᱡᱤᱛᱠᱟᱹᱨᱤᱭᱟᱹ) ᱢᱤᱥ ᱤᱣᱱᱤᱵᱷᱟᱨᱥ ᱒᱐᱑᱙ (ᱡᱤᱛᱠᱟᱹᱨᱤᱭᱟᱹ) |
ᱮᱛᱦᱚᱵ ᱡᱤᱭᱚᱱ ᱥᱟᱯᱲᱟᱣ
ᱴᱩᱱᱡᱤ ᱫᱚ ᱠᱚᱧᱮ ᱟᱯᱷᱨᱤᱠᱟ ᱨᱮᱱᱟᱜ ᱥᱟᱢᱟᱝ ᱠᱮᱹᱯᱮᱹᱨ ᱥᱳᱞᱳ ᱥᱚᱦᱚᱨ ᱨᱮᱭ ᱡᱟᱱᱟᱢ ᱟᱠᱟᱱᱟ᱾ ᱟᱡ ᱵᱟᱵᱟ ᱫᱚ ᱞᱩᱝᱜᱤᱥᱟ ᱴᱩᱱᱡᱤ ᱟᱨ ᱜᱚᱜᱚ ᱫᱚ ᱯᱷᱤᱞᱤᱥᱳᱣᱟ ᱱᱟᱰᱟᱯᱳ᱾ ᱴᱩᱱᱡᱤ ᱨᱮᱱ ᱫᱚ ᱟᱨᱦᱚᱸ ᱵᱟᱨᱮᱭᱟ ᱠᱩᱲᱤ ᱵᱚᱭᱦᱟ ᱢᱮᱱᱟᱜ ᱠᱤᱱᱟᱹ᱾ ᱠᱟᱹᱴᱤᱡ ᱨᱮ ᱫᱚ ᱴᱩᱱᱡᱤ ᱥᱳᱞᱳ ᱠᱷᱚᱱ ᱥᱩᱨᱜᱮ ᱢᱮᱱᱟᱜ ᱥᱩᱰᱳᱭᱟᱰᱳᱭᱮᱱᱤ ᱟᱹᱛᱚ ᱨᱮ᱾ ᱛᱟᱭᱚᱢ ᱛᱮ ᱴᱩᱱᱡᱤ ᱫᱚ ᱠᱮᱹᱯᱴᱟᱣᱱ ᱥᱚᱦᱚᱨ ᱨᱮᱭ ᱦᱮᱡ ᱮᱱᱟ ᱟᱨ ᱛᱟᱸᱦᱮᱸᱱᱮ ᱫᱷᱩᱨᱟᱹᱣᱱᱟ᱾ ᱚᱸᱰᱮᱜᱮ ᱩᱱᱤᱫᱚ ᱠᱮᱹᱯ ᱯᱮᱹᱱᱤᱱᱥᱩᱞᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱒᱐᱑᱘ ᱥᱮᱨᱢᱟ ᱨᱮ ᱡᱚᱱᱚᱥᱚᱝᱡᱳᱜᱽ ᱟᱨ ᱪᱤᱛᱟᱹᱨ ᱵᱮᱵᱚᱥᱛᱷᱟᱯᱚᱱᱟ ᱥᱟᱛᱟᱢ ᱛᱮ ᱚᱱᱟᱨᱥ ᱰᱤᱜᱨᱤᱭ ᱧᱟᱢ ᱠᱮᱫᱟ᱾
ᱠᱟᱹᱢᱤ ᱡᱤᱭᱚᱱ ᱥᱟᱯᱲᱟᱣ
ᱢᱤᱥ ᱠᱚᱧᱮ ᱟᱯᱷᱨᱤᱠᱟ ᱥᱟᱯᱲᱟᱣ
ᱴᱩᱱᱡᱤ ᱫᱚ ᱒᱐᱑᱗ ᱥᱮᱨᱢᱟ ᱨᱮ ᱯᱟᱹᱦᱤᱞ ᱫᱷᱟᱣ ᱪᱚᱨᱚᱠ ᱦᱮᱯᱨᱟᱣ ᱨᱮᱭ ᱥᱮᱞᱮᱫ ᱞᱮᱱᱟ᱾ ᱒᱐᱑᱗ ᱢᱤᱥ ᱠᱚᱧᱮ ᱟᱯᱷᱨᱤᱠᱟ ᱦᱮᱯᱨᱟᱣ ᱨᱮ ᱩᱱ ᱡᱚᱠᱷᱚᱡ ᱩᱱᱤ ᱫᱚ ᱢᱩᱪᱟᱹᱫ ᱒᱖ ᱵᱷᱤᱛᱨᱤ ᱨᱮᱭ ᱛᱟᱸᱦᱮᱸᱠᱟᱱᱟ᱾ ᱛᱚᱵᱮ ᱢᱩᱪᱟᱹᱫ ᱑᱒ ᱨᱮ ᱫᱚ ᱵᱟᱭ ᱛᱟᱸᱦᱮᱸᱞᱮᱱᱟ᱾ ᱒᱐᱑᱙ ᱨᱮ ᱟᱨᱦᱚᱸ ᱩᱱᱤ ᱢᱤᱥ ᱠᱚᱧᱮ ᱟᱯᱷᱨᱤᱠᱟ ᱦᱮᱯᱨᱟᱣ ᱨᱮᱭ ᱥᱮᱞᱮᱫᱼᱮᱱᱟ᱾ ᱯᱟᱹᱦᱤᱞ ᱫᱷᱟᱣ ᱛᱮ ᱴᱩᱱᱡᱤ ᱫᱚ ᱯᱟᱹᱦᱤᱞ ᱓᱕ ᱵᱷᱤᱛᱨᱤ ᱨᱮᱭ ᱛᱟᱸᱦᱮᱸᱠᱟᱱᱟ᱾ ᱤᱱᱟᱹ ᱛᱟᱭᱚᱢ ᱯᱮᱯᱩᱱ ᱫᱷᱟᱣ ᱚᱰᱤᱥᱚᱱ ᱛᱟᱭᱚᱢ ᱯᱟᱹᱦᱤᱞ ᱑᱖ ᱵᱷᱤᱛᱨᱤ ᱨᱮᱦᱚᱸᱭ ᱛᱟᱸᱦᱮᱸᱭᱱᱟ᱾
ᱢᱩᱪᱟᱹᱫ ᱑᱖ ᱵᱷᱤᱛᱨᱤ ᱨᱮ ᱦᱮᱡ ᱠᱟᱛᱮ ᱒᱐᱑᱙ ᱢᱤᱥ ᱠᱚᱧᱮ ᱟᱯᱷᱨᱤᱠᱟ ᱦᱮᱯᱨᱟᱣ ᱨᱮ ᱴᱩᱱᱡᱤ ᱫᱚ ᱙ ᱟᱜᱚᱥᱴ ᱯᱨᱤᱴᱳᱨᱤᱭᱟᱥ ᱥᱚᱦᱚᱨ ᱨᱮ ᱦᱮᱯᱨᱟᱣ ᱨᱮᱱᱟᱜ ᱢᱩᱬᱩᱛ ᱯᱚᱨᱵᱚ ᱨᱮᱭ ᱥᱮᱞᱮᱫ ᱞᱮᱱᱟ᱾ ᱤᱱᱟᱹ ᱛᱟᱭᱚᱢ ᱚᱸᱰᱮ ᱠᱷᱚᱱ ᱢᱩᱪᱟᱹᱫ ᱑᱐, ᱢᱩᱪᱟᱹᱫ ᱕ ᱠᱷᱚᱱ ᱦᱮᱯᱨᱟᱣ ᱨᱮᱱᱟᱜ ᱯᱷᱟᱭᱱᱟᱞ ᱨᱮᱭ ᱥᱮᱴᱮᱨ ᱞᱮᱱᱟ᱾ ᱯᱷᱟᱭᱱᱟᱞ ᱨᱮ ᱥᱟᱥᱟ ᱞᱤ ᱚᱞᱤᱵᱷᱤᱭᱮ ᱧᱩᱛᱩᱢᱟᱱ ᱥᱟᱶᱛᱮ ᱦᱮᱯᱨᱟᱣ ᱨᱮ ᱟᱡ ᱥᱤᱨᱯᱟᱹᱭ ᱧᱟᱢ ᱠᱮᱫᱟ᱾ ᱞᱟᱦᱟ ᱫᱷᱟᱣ ᱨᱮᱱ ᱢᱤᱥ ᱠᱚᱧᱮ ᱟᱯᱷᱨᱤᱠᱟ ᱛᱟᱢᱟᱨᱤᱱ ᱜᱨᱤᱱ ᱴᱷᱮᱱ ᱠᱷᱚᱱ ᱥᱤᱨᱯᱟᱹᱭ ᱦᱟᱢᱮᱴ ᱡᱚᱝ ᱠᱮᱫᱟ᱾ ᱚᱱᱟ ᱥᱤᱨᱯᱟᱹ ᱨᱮᱱᱟᱜ ᱯᱩᱨᱚᱥᱠᱟᱨ ᱦᱤᱥᱟᱹᱵᱛᱮ ᱴᱩᱱᱡᱤ ᱑ ᱢᱤᱞᱤᱭᱚᱱ ᱨᱮᱱᱰ, ᱢᱤᱫᱴᱮᱱ ᱜᱟᱹᱰᱤ, ᱡᱳᱦᱟᱱᱮᱥᱵᱟᱨᱜᱽ ᱠᱷᱚᱱ ᱥᱩᱨᱨᱮ ᱥᱮᱱᱰ ᱴᱚᱱᱨᱮ ᱕ ᱢᱤᱞᱤᱭᱚᱱ ᱫᱟᱢ ᱨᱮᱱᱟᱜ ᱡᱤᱱᱤᱥᱯᱚᱛᱨᱚ ᱥᱟᱶ ᱢᱤᱫᱴᱮᱱ ᱚᱲᱟᱜᱼᱮ ᱧᱟᱢ ᱠᱮᱫᱟ᱾ ᱟᱨ ᱢᱤᱥ ᱤᱣᱱᱤᱵᱷᱟᱨᱥ ᱒᱐᱑᱙ ᱦᱮᱯᱨᱟᱣ ᱨᱮ ᱠᱚᱧᱮ ᱟᱯᱷᱨᱤᱠᱟ ᱨᱮᱱ ᱦᱩᱭ ᱠᱟᱛᱮ ᱥᱮᱞᱮᱫᱚᱜ ᱨᱮᱱᱟᱜ ᱥᱩᱡᱳᱜᱽ ᱦᱚᱸᱭ ᱧᱟᱢ ᱞᱮᱫᱟ᱾
ᱢᱤᱥ ᱤᱣᱱᱤᱵᱷᱟᱨᱥ ᱥᱟᱯᱲᱟᱣ
ᱴᱩᱱᱡᱤ ᱒᱐᱑᱙ ᱥᱮᱨᱢᱟ ᱨᱮᱱᱟᱜ ᱱᱚᱵᱷᱮᱢᱵᱚᱨ ᱪᱟᱸᱫᱚ ᱢᱤᱥ ᱤᱣᱱᱤᱵᱷᱟᱨᱥ ᱦᱮᱯᱨᱟᱣ ᱨᱮ ᱥᱮᱞᱮᱫᱚᱜ ᱞᱟᱹᱜᱤᱛ ᱡᱚᱨᱡᱤᱭᱟ ᱨᱮᱱᱟᱜ ᱟᱴᱞᱟᱱᱴᱟ ᱥᱚᱦᱚᱨ ᱛᱮᱭ ᱪᱟᱞᱟᱣ ᱞᱮᱱᱟ᱾ ᱖ ᱰᱤᱥᱮᱢᱵᱚᱨ ᱯᱟᱹᱦᱤᱞ ᱫᱷᱟᱯ ᱯᱟᱨᱚᱢ ᱠᱟᱛᱮᱡ ᱘ ᱰᱤᱥᱮᱢᱵᱚᱨ ᱴᱟᱭᱞᱟᱨ ᱯᱮᱹᱨᱤ ᱤᱥᱴᱩᱰᱤᱭᱳ ᱨᱮ ᱢᱩᱪᱟᱹᱫ ᱦᱮᱯᱨᱟᱣ ᱨᱮᱭ ᱥᱮᱞᱮᱫᱼᱮᱱᱟ᱾ ᱱᱚᱣᱟ ᱦᱮᱯᱨᱟᱣ ᱨᱮ ᱴᱩᱱᱡᱤ ᱟᱯᱷᱨᱤᱠᱟ/ᱮᱥᱤᱭᱟ-ᱯᱨᱚᱥᱟᱱᱛᱚ ᱢᱚᱦᱟᱫᱚᱨᱮᱭᱟ ᱮᱞᱟᱠᱟ ᱠᱷᱚᱱ ᱯᱟᱹᱦᱤᱞ ᱥᱮᱹᱢᱤ ᱯᱷᱟᱭᱱᱟᱞᱤᱥᱴ ᱦᱤᱥᱟᱹᱵᱛᱮ ᱥᱮᱨᱟ ᱒᱐ ᱨᱮ ᱧᱩᱛᱩᱢ ᱦᱮᱡ ᱮᱱ ᱛᱟᱭᱟ᱾ ᱤᱱᱟᱹ ᱛᱟᱭᱚᱢ ᱫᱷᱟᱯᱮ ᱫᱷᱟᱯᱮ ᱴᱩᱱᱡᱤ ᱥᱮᱨᱟ ᱑᱐, ᱥᱮᱨᱟ ᱕ ᱟᱨ ᱥᱮᱨᱟ ᱓ ᱨᱮᱭ ᱥᱮᱴᱮᱨᱼᱮᱱᱟ᱾ ᱦᱮᱯᱨᱟᱣ ᱨᱮᱱᱟᱜ ᱢᱩᱪᱟᱹᱫ ᱨᱮ ᱴᱩᱱᱡᱤ ᱫᱚ ᱨᱟᱱᱟᱨ-ᱟᱯ ᱯᱳᱭᱮᱨᱛᱳ ᱨᱤᱠᱳ ᱨᱮᱱ ᱢᱮᱰᱤᱥᱚᱱ ᱮᱱᱰᱟᱨᱥᱚᱱ ᱟᱨ ᱢᱮᱠᱥᱤᱠᱳ ᱨᱮᱱ ᱥᱳᱯᱷᱤᱭᱟ ᱮᱨᱟᱜᱚᱱ ᱛᱟᱹᱠᱤᱱ ᱛᱟᱭᱚᱢ ᱨᱮ ᱫᱚᱦᱚ ᱠᱟᱛᱮ ᱞᱟᱦᱟ ᱫᱷᱟᱣ ᱨᱮᱱ ᱥᱤᱨᱯᱟᱹ ᱡᱤᱛᱠᱟᱹᱨᱤᱭᱟᱹ ᱯᱷᱤᱞᱤᱯᱟᱭᱤᱱ ᱨᱮᱱ ᱠᱮᱴᱨᱤᱭᱳᱱᱟ ᱜᱨᱮ ᱴᱷᱮᱡ ᱠᱷᱚᱱ ᱒᱐᱑᱙ ᱨᱮᱱᱟᱜ ᱢᱤᱥ ᱤᱣᱱᱤᱵᱷᱟᱨᱥ ᱥᱤᱨᱯᱟᱹᱭ ᱧᱟᱢ ᱠᱮᱫᱟ᱾ ᱴᱩᱱᱡᱤ ᱫᱚ ᱠᱚᱧᱮ ᱟᱯᱷᱨᱤᱠᱟ ᱠᱷᱚᱱ ᱛᱮᱥᱟᱨ ᱪᱚᱨᱚᱠ ᱦᱮᱯᱨᱟᱣ ᱡᱤᱛᱠᱟᱹᱨᱤᱭᱟᱹ ᱠᱟᱱᱟᱭ᱾