ᱥᱚᱦᱨᱟᱭ ᱵᱚᱝᱜᱟ

ᱥᱚᱦᱨᱟᱭ ᱵᱚᱸᱜᱟ ᱫᱚ ᱥᱮᱨᱢᱟ ᱨᱮᱱᱟᱜ ᱜᱮᱞᱟᱜ ᱵᱚᱸᱜᱟ ᱥᱮ ᱪᱟᱸᱫᱚ ᱠᱟᱱᱟ ᱾ ᱢᱮᱱᱟᱠᱚ "ᱦᱟᱹᱛᱤ" ᱞᱮᱠᱟᱱ ᱥᱚᱦᱨᱟᱭ ᱾ ᱦᱟᱹᱛᱤ ᱞᱮᱠᱟ ᱥᱮᱬᱟᱦᱟᱸ, ᱦᱟ.ᱛᱤ ᱞᱮᱠᱟ ᱜᱩᱱ, ᱦᱟᱹᱛᱤ ᱞᱮᱠᱟ ᱫᱟᱲᱮ ᱾ ᱟᱵᱚ ᱥᱟᱨᱱᱟ ᱫᱷᱚᱨᱚᱢ ᱥᱟᱱᱛᱟᱲ ᱠᱚᱫᱚ ᱦᱟᱹᱛᱤ ᱜᱩᱱᱫᱚ "ᱟᱭᱳ" ᱫᱟᱲᱮ ᱟᱨ ᱥᱟᱫᱚᱢ ᱜᱩᱱᱫᱚ "ᱵᱟᱵᱟ" ᱫᱟᱲᱮ ᱞᱮᱠᱟ ᱵᱚ ᱢᱟᱱᱟᱣᱟ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱫᱚ ᱦᱚᱲ ᱦᱚᱸ ᱵᱚ ᱦᱟᱹᱛᱤ ᱥᱟᱫᱚᱢᱚᱜ ᱜᱮᱭᱟ ᱾

ᱥᱚᱦᱨᱟᱭ

ᱧᱩᱛᱩᱢᱚᱜ ᱨᱮᱱᱟᱜ ᱢᱮᱱᱮᱛ ᱫᱚ "ᱥᱟᱦᱟᱨᱟᱭ" ᱠᱷᱚᱱ ᱜᱮ ᱨᱚᱲ ᱨᱚᱲ ᱛᱮ "ᱥᱚᱦᱨᱟᱭ" ᱧᱩᱛᱩᱢ ᱟᱠᱟᱱᱟ, ᱦᱩᱲᱩ, ᱪᱟᱣᱞᱮ, ᱠᱟᱣᱰᱤ, ᱢᱤᱸᱭᱦᱩᱸ, ᱢᱮᱨᱚᱢ, ᱜᱟᱹᱭ, ᱠᱟᱰᱟ, ᱥᱟᱶ ᱢᱟᱹᱱᱢᱤ ᱦᱚᱸᱠᱚ ᱥᱟᱦᱟᱨᱚᱜᱼᱟ ᱾ ᱚᱱᱟ ᱞᱟᱹᱜᱤᱫ ᱛᱮᱜᱮ ᱥᱚᱦᱨᱟᱭ ᱯᱟᱨᱟᱵᱽ ᱫᱚ ᱾ ᱚᱱᱟ ᱥᱟᱦᱟᱨ ᱨᱮᱱᱟᱜ ᱫᱟᱲᱮ ᱢᱮᱱᱟᱜᱼᱟ ᱜᱟᱹᱭ ᱴᱷᱮᱱ ᱾ ᱜᱟᱹᱭ ᱵᱚ ᱪᱟᱨᱦᱟᱣ ᱮᱭᱟ ᱟᱨ ᱵᱚ ᱥᱟᱨᱦᱟᱣ ᱮᱭᱟ ᱥᱚᱦᱨᱟᱭ ᱵᱚᱝᱜᱟ ᱠᱩᱱᱟᱹᱢᱤ ᱨᱮ ᱾ ᱪᱮᱫᱟᱜ ᱥᱮ ᱜᱟᱹᱭ ᱟᱭᱳ ᱜᱮ ᱦᱤᱦᱤᱲᱤ ᱯᱤᱯᱤᱲᱤ ᱠᱷᱚᱱ ᱦᱩᱲᱩ ᱜᱮᱞᱮ ᱫᱚᱭ ᱫᱤᱯᱤᱞ ᱟᱹᱜᱩ ᱞᱮᱫ-ᱟᱭ ᱾ ᱚᱱᱟᱛᱮ ᱥᱚᱦᱨᱟᱭ ᱨᱮᱫᱚ ᱜᱟᱹᱭ ᱵᱚᱦᱚᱜ ᱨᱮ ᱦᱩᱲᱩ ᱜᱮᱞᱮ ᱨᱮᱱᱟᱜ ᱫᱷᱟᱶᱟ ᱵᱮᱱᱟᱣ ᱠᱟᱛᱮ ᱵᱚ ᱛᱚᱞ ᱟᱠᱚᱣᱟ ᱾ ᱨᱟᱹᱥᱠᱟᱹ ᱛᱮ ᱵᱚ ᱥᱟᱨᱦᱟᱣ ᱮᱭᱟ ᱟᱨ ᱵᱚ ᱪᱟᱨᱦᱟᱣ ᱮᱭᱟ ᱾ ᱚᱱᱟᱛᱮ ᱜᱟᱭ ᱵᱚ ᱚᱦᱬᱮ ᱮᱭᱟ ᱜᱟᱹᱭ ᱵᱚ ᱪᱩᱢᱟᱣᱲᱟ ᱮᱭᱟ ᱾ ᱥᱚᱦᱨᱟᱭ ᱯᱟᱨᱟᱵᱽ ᱫᱚ ᱢᱚᱬᱮ ᱢᱟᱦᱟᱸ ᱠᱚ ᱢᱟᱱᱟᱣᱟ ᱾ ᱱᱚᱝᱠᱟ ᱢᱟᱱᱟᱣ ᱠᱚ ᱫᱚ- ᱑-ᱜᱚᱴ ᱵᱚᱝᱜᱟ ᱒-ᱜᱚᱲᱟ ᱵᱚᱝᱜᱟ ᱓-ᱟᱲᱟᱜ/ᱠᱷᱩᱱᱴᱟᱹᱣ [ᱜᱟᱹᱭ ᱠᱚ] ᱔-ᱟᱲᱟᱜ/ᱠᱷᱩᱱᱴᱟᱹᱣ [ᱠᱟᱰᱟ ᱠᱚ] ᱕-ᱡᱟᱡᱽᱞᱮ ᱾ ᱟᱹᱰᱤ ᱨᱟᱹᱥᱠᱟᱹ ᱜᱮ ᱾

ᱱᱮ ᱠᱩᱱᱟᱹᱢᱤ ᱫᱚ ᱜᱚᱴ ᱵᱚᱸᱜᱟ

ᱜᱚᱴ ᱵᱚᱸᱜᱟ ᱦᱤᱞᱚᱜ ᱫᱚ ᱥᱮᱛᱟᱜ ᱨᱮ ᱥᱟᱱᱟᱢ ᱦᱚᱲ ᱨᱤᱱ ᱜᱟᱹᱭ ᱠᱟᱰᱟ ᱠᱚ ᱛᱩᱯᱩ ᱯᱷᱟᱨᱪᱟ ᱠᱚᱣᱟ ᱾ ᱫᱮᱨᱮᱧ ᱠᱚᱨᱮ ᱥᱩᱱᱩᱢ ᱠᱚ ᱚᱡᱚᱜ ᱟᱠᱚᱛᱮ ᱜᱩᱯᱤᱠᱚ ᱤᱫᱤ ᱠᱚᱣᱟ ᱾ ᱱᱟᱭᱠᱮ ᱫᱚ ᱥᱮᱛᱟᱜ ᱵᱮᱲᱟ ᱜᱚᱴ ᱴᱟᱺᱰᱤ ᱨᱮ ᱜᱚᱴᱮ ᱵᱚᱝᱜᱟᱭᱟ ᱾ ᱜᱚᱴ ᱵᱚᱝᱜᱟ ᱨᱮᱫᱚ ᱱᱟᱭᱠᱮ ᱯᱮᱭᱟ ᱥᱤᱢ ᱮ ᱵᱚᱝᱜᱟ ᱠᱚᱣᱟ ᱾ ᱢᱟᱨᱟᱝ ᱵᱳᱨᱳ ᱧᱩᱛᱩᱢ ᱛᱮ ᱯᱩᱸᱰ ᱥᱤᱢ ᱥᱟᱺᱰᱤ, ᱡᱟᱦᱮᱨ ᱟᱭᱳ ᱧᱩᱛᱩᱢ ᱛᱮ ᱦᱮᱲᱟᱜ ᱠᱟᱞᱚᱴ, ᱢᱚᱬᱮᱠᱚ ᱛᱩᱨᱩᱭᱠᱚ ᱞᱟᱹᱜᱤᱫ ᱟᱨᱟᱜ ᱥᱟᱺᱰᱤ ᱾ ᱵᱚᱝᱜᱟ ᱦᱩᱭ ᱛᱟᱭᱚᱢ ᱢᱟᱨᱟᱝ ᱵᱳᱨᱳ ᱠᱷᱚᱸᱰ ᱨᱮ ᱱᱟᱭᱠᱮ ᱢᱤᱫᱴᱟᱹᱝ ᱵᱤᱞᱤ ᱫᱚᱲᱚᱢᱟᱸᱭ ᱾ ᱥᱚᱲᱮᱠᱚ ᱤᱥᱤᱱ ᱡᱚᱢ ᱵᱟᱲᱟ ᱠᱟᱛᱮ ᱛᱟᱨᱟᱥᱤᱧ ᱵᱮᱲᱟ ᱜᱟᱹᱭ ᱰᱟᱝᱜᱽᱨᱟ ᱠᱚ ᱡᱚᱛᱚ ᱦᱚᱲ ᱠᱚ ᱞᱟᱜᱟ ᱥᱩᱨ ᱟᱹᱜᱩᱠᱚᱣᱟ ᱟᱨ ᱚᱱᱟ ᱵᱤᱞᱤ ᱠᱚ ᱞᱮᱵᱮᱫ ᱦᱚᱪᱚ ᱠᱚᱣᱟ ᱾ ᱡᱟᱦᱟᱸᱭᱤᱡ ᱰᱟᱹᱝᱜᱽᱨᱤ ᱚᱱᱟ ᱵᱤᱞᱤᱭ ᱞᱮᱵᱮᱫᱟ ᱩᱱᱤᱠᱚ ᱥᱤᱫᱩᱨ ᱟᱭᱟ ᱾ ᱟᱫᱚ ᱩᱱᱤ ᱰᱟᱹᱝᱜᱽᱨᱤ ᱠᱤᱥᱟᱹᱬ ᱫᱚ ᱟᱹᱰᱤ ᱥᱟᱦᱟᱨᱟᱹᱱᱤᱡ ᱠᱟᱱᱟᱭ ᱢᱮᱱᱛᱮᱭ ᱵᱟᱰᱟᱭᱚᱜᱼᱟ ᱾ ᱚᱱᱟ ᱨᱟᱹᱥᱠᱟᱹᱛᱮ ᱫᱚᱥᱟᱨ ᱥᱮᱨᱢᱟ ᱜᱚᱴ ᱵᱚᱝᱜᱟ ᱞᱟᱹᱜᱤᱫ ᱢᱤᱫ ᱴᱩᱠᱩᱡ ᱦᱟᱺᱰᱤ ᱟᱨ ᱜᱟᱹᱭᱫᱟᱬᱟᱱ ᱠᱩᱲᱤ ᱠᱚᱲᱟ ᱠᱚ ᱡᱚᱢᱧᱩᱭ ᱮᱢᱟ ᱠᱚᱣᱟ ᱾ ᱜᱚᱴ ᱞᱮᱵᱮᱫ ᱛᱟᱭᱚᱢ ᱚᱸᱰᱮ ᱠᱷᱚᱱ ᱜᱮ ᱠᱚᱲᱟᱠᱚ ᱱᱟᱭᱠᱮ ᱚᱲᱟᱜ ᱛᱮ ᱠᱚ ᱤᱫᱤ ᱦᱚᱴᱚ ᱠᱟᱭᱟ ᱾ ᱱᱟᱭᱠᱮ ᱚᱲᱟᱜ ᱠᱷᱚᱱ ᱡᱚᱜᱽ ᱢᱟᱹᱡᱷᱤ ᱚᱲᱟᱜ ᱠᱚ ᱪᱟᱞᱟᱜᱼᱟ ᱾ ᱚᱸᱰᱮ ᱫᱚ ᱠᱩᱲᱤ ᱠᱚᱦᱚᱸ ᱠᱚ ᱦᱮᱡ ᱠᱚᱜᱼᱟ ᱾ ᱡᱚᱜᱽᱢᱟᱹᱡᱷᱤ ᱚᱲᱟᱜ ᱛᱮ ᱦᱤᱡᱩᱜ ᱡᱚᱠᱷᱟᱜ ᱠᱩᱲᱤ ᱠᱚᱲᱟ ᱠᱚ ᱾

ᱱᱚᱝᱠᱟ ᱠᱚ ᱥᱮᱨᱮᱧᱟ

ᱩᱢ ᱱᱟᱲᱠᱟᱜ ᱜᱷᱟᱹᱨᱱᱤ ᱛᱤᱠᱤ ᱥᱚᱵᱚᱫ,

ᱚᱲᱟᱜ ᱫᱩᱣᱟᱹᱨ ᱥᱩᱥᱟᱹᱨ ᱟᱞᱚᱢ ᱦᱤᱲᱤᱧᱟ ᱾

ᱫᱩᱣᱟᱹᱨ ᱯᱤᱪᱷᱤ ᱜᱷᱟᱹᱨᱱᱤ ᱵᱟᱹᱛᱤ ᱞᱟᱜᱟᱣ ᱢᱮ,

ᱞᱩᱠᱷᱤ ᱫᱷᱚᱨᱚᱱ ᱧᱩᱛᱩᱢ ᱜᱚᱰ ᱱᱟᱹᱪᱩᱨ ᱢᱮ ᱾

ᱥᱤᱢ ᱠᱚ ᱨᱟᱜ ᱛᱮ ᱜᱟᱹᱛᱤᱧ ᱵᱮᱨᱮᱫ ᱛᱟᱞᱟᱝ ᱢᱮ,

ᱵᱷᱤᱛᱟᱹᱨ ᱫᱩᱣᱟᱹᱨ ᱪᱩᱞᱦᱟᱹ ᱞᱩᱸᱰᱟᱹ ᱚᱰᱚᱠ ᱢᱮ ᱾

ᱫᱷᱚᱱ ᱦᱚᱯᱚᱱ ᱞᱟᱹᱜᱤᱫ ᱫᱮᱞᱟᱝ ᱱᱮᱦᱚᱨ ᱠᱤᱱ,

ᱞᱩᱠᱷᱤ ᱫᱷᱚᱨᱚᱢ ᱜᱮᱞᱟᱝ ᱥᱮᱵᱟ ᱵᱮᱵᱷᱟᱨ ᱠᱤᱱ ᱾

ᱢᱟᱨᱟᱝ ᱵᱳᱨᱳ ᱫᱷᱚᱨᱚᱢ ᱡᱤᱣᱤ ᱫᱚᱭ ᱠᱷᱚᱧᱡᱟ ᱟᱢ,

ᱡᱟᱦᱮᱨ ᱟᱭᱳ ᱞᱩᱠᱷᱤ ᱫᱷᱚᱱ ᱫᱚᱭ ᱯᱩᱨᱩᱱ ᱠᱟᱢ ᱾

ᱫᱷᱚᱱ ᱠᱚᱠᱚᱭ ᱨᱮᱛᱚ ᱫᱷᱚᱱ ᱠᱤᱱ ᱮᱢᱟᱢ ᱠᱟᱱ,

ᱫᱷᱚᱨᱚᱢ ᱫᱷᱟᱹᱨᱛᱤ ᱦᱟᱭᱨᱮ ᱪᱮᱫ ᱠᱤᱱ ᱪᱮᱠᱟ ᱟᱢ ᱾

ᱫᱷᱚᱱ ᱦᱚᱯᱚᱱ ᱦᱟᱭᱨᱮ ᱚᱠᱚᱭ ᱵᱟᱭ ᱧᱟᱢ ᱠᱟᱱ,

ᱫᱷᱚᱱ ᱦᱚᱯᱚᱱ ᱨᱮᱫᱚ ᱪᱟᱜ ᱵᱚ ᱦᱟᱹᱱᱩᱜ ᱠᱟᱱ ᱾

ᱫᱮᱵᱟ ᱥᱮᱵᱟᱢ ᱜᱟᱱᱟ ᱫᱷᱚᱨᱢᱚᱭ ᱩᱨᱩᱢ ᱠᱟᱢ,

ᱟᱪᱟᱨ ᱵᱮᱵᱷᱟᱨ ᱞᱩᱠᱷᱤ ᱫᱷᱚᱱ ᱫᱚᱭ ᱯᱩᱨᱩᱱ ᱠᱟᱢ ᱾

ᱱᱚᱝᱠᱟ ᱥᱮᱨᱮᱧ ᱥᱮᱨᱮᱧ ᱛᱮ ᱡᱚᱜᱽ ᱢᱟᱹᱡᱷᱤ ᱚᱲᱟᱜ ᱠᱚ ᱪᱟᱞᱟᱜᱼᱟ ᱾ ᱡᱚᱜᱽ ᱢᱟᱹᱡᱷᱤ ᱚᱲᱟᱜ ᱨᱮ ᱡᱚᱢ ᱧᱩ ᱵᱟᱲᱟ ᱠᱟᱛᱮ, ᱡᱚᱜᱽᱢᱟᱹᱡᱷᱤ ᱫᱚ ᱠᱩᱲᱤ ᱠᱚᱲᱟ ᱠᱚ ᱱᱟᱶᱟ ᱦᱟᱴᱟᱜ, ᱫᱮᱣᱦᱮ ᱵᱟᱹᱛᱤ, ᱟᱫᱽᱣᱟ ᱪᱟᱣᱞᱮ, ᱫᱷᱩᱵᱤ ᱜᱟᱥ ᱮᱢᱟᱱᱮ ᱟᱛᱮ ᱜᱟᱹᱭ ᱫᱟᱬᱟᱱ ᱞᱟᱹᱜᱤᱫ ᱮ ᱥᱚᱡᱽ ᱜᱚᱫ ᱠᱟᱠᱚᱣᱟ ᱾ ᱟᱫᱚ ᱠᱩᱲᱤ ᱠᱚᱲᱟ ᱠᱚᱫᱚ ᱚᱲᱟᱜ ᱚᱲᱟᱜ ᱜᱟᱹᱭ ᱠᱚ ᱫᱟᱬᱟ ᱟᱠᱚᱣᱟ ᱨᱤᱸᱡᱟᱹ ᱠᱚ ᱮᱱᱮᱡᱼᱟ ᱟᱨ ᱜᱟᱹᱭ ᱠᱚ ᱪᱩᱢᱟᱹᱲᱟ ᱠᱚᱣᱟ ᱜᱚᱲᱟᱨᱮ ᱵᱚᱞᱚ ᱠᱟᱛᱮ ᱾ ᱟᱫᱚ ᱠᱚ ᱥᱮᱨᱮᱧᱟ-

" ᱛᱚ~ᱠᱚᱭ ᱨᱤᱱ ᱜᱟᱹᱭ ᱠᱚ,

ᱜᱟᱹᱭ ᱠᱚ ᱵᱩᱨᱩᱫ ᱵᱩᱨᱩᱫ,

ᱛᱚ~ᱠᱚᱭ ᱨᱤᱱ ᱵᱤᱛᱠᱤᱞ,

ᱵᱤᱛᱠᱤᱞ ᱧᱟᱹᱦᱩᱢ ᱫᱟᱹᱨᱩᱢ,

ᱯᱷᱟ~ᱨᱱᱟ ᱨᱤᱱ ᱜᱟᱹᱭ ᱠᱚ,

ᱦᱚ ᱜᱟᱹᱭ ᱠᱚ ᱵᱩᱨᱩᱫ ᱵᱩᱨᱩᱫ,

ᱯᱷᱟ~ᱨᱱᱟ ᱨᱤᱱ ᱵᱤᱛᱠᱤᱞ,

ᱦᱚ ᱵᱤᱛᱠᱤᱞ ᱧᱟᱹᱦᱩᱢ ᱫᱟᱹᱨᱩᱢ ᱾

ᱪᱮ~ᱫ ᱜᱟᱥ ᱠᱚ ᱱᱟᱺᱛᱤᱧ,

ᱪᱮ~ᱫ ᱡᱟᱝ ᱠᱚ ᱦᱟᱞᱟᱝ,

ᱫᱷᱩᱵᱤ ᱜᱟᱥ ᱠᱚ ᱱᱟᱺᱛᱤᱧ,

ᱨᱟᱹ~ᱭ ᱡᱟᱝ ᱛᱚ ᱦᱟᱞᱟᱝ,

ᱪᱮ~ᱫ ᱫᱟᱜ ᱠᱚ ᱧᱩ~ᱭᱟᱸ

ᱦᱚ ᱪᱷᱟᱯᱟᱨ ᱫᱟᱜ ᱠᱚ ᱧᱩ~ᱭᱟᱸ,

ᱦᱚ ᱞᱚᱫᱽᱢᱟ ᱞᱚᱭᱚᱝ ᱨᱮ ᱾

" ᱱᱚᱝᱠᱟ ᱠᱚ ᱥᱮᱨᱮᱧᱟ ᱟᱨ ᱥᱚᱦᱨᱟᱭ ᱨᱤᱧᱟᱹᱠᱚ ᱥᱮᱨᱮᱧᱟ ᱟᱨᱠᱚ ᱮᱱᱮᱡ ᱤᱫᱤᱭᱟ ᱡᱚᱛᱚ ᱚᱲᱟᱜ ᱜᱚᱴᱟ ᱟᱹᱛᱩ ᱾

ᱵᱩᱨᱩ ᱠᱩᱱᱟᱹᱢᱤ ᱫᱚ ᱜᱚᱲᱟ ᱵᱚᱝᱜᱟ

ᱱᱚᱣᱟ ᱦᱩᱞᱚᱜ ᱜᱟᱹᱭᱫᱟᱬᱟ ᱢᱩᱪᱟᱹᱫ ᱠᱚᱜᱼᱟ ᱾ ᱜᱚᱲᱟ ᱠᱚ ᱯᱷᱟᱨᱪᱟ ᱯᱷᱟᱹᱨᱪᱤ ᱠᱟᱛᱮ ᱜᱚᱲᱟ ᱨᱮᱵᱚ ᱵᱚᱝᱜᱟᱜᱼᱟ ᱾ ᱜᱟᱹᱭ ᱰᱟᱝᱜᱽᱨᱟ ᱵᱤᱛᱠᱤᱞ ᱠᱟᱰᱟ ᱠᱚ ᱱᱟᱯᱟᱭ ᱨᱮᱠᱚ ᱛᱟᱦᱮᱱ ᱞᱟᱹᱜᱤᱫ ᱜᱚᱲᱟ ᱫᱚᱵᱚ ᱵᱚᱝᱜᱟᱜᱼᱟ ᱾ ᱥᱮᱨᱣᱟ ᱟᱨ ᱫᱟᱬᱮ ᱠᱚᱫᱚ ᱯᱟᱹᱨᱤᱥ ᱡᱟᱹᱱᱤᱡ ᱡᱩᱫᱟᱹ ᱡᱩᱫᱟᱹ ᱜᱮᱭᱟ ᱾

ᱠᱩᱱᱟᱹᱢᱤ ᱦᱤᱞᱚᱜ ᱟᱲᱟᱜ/ᱠᱷᱩᱱᱴᱟᱹᱣ

ᱠᱩᱱᱟᱹᱢᱤ ᱦᱤᱞᱚᱜ ᱫᱚ ᱟᱲᱟᱜ ᱵᱟᱝ ᱠᱷᱩᱱᱴᱟᱹᱣ ᱾ ᱠᱷᱩᱱᱴᱟᱹᱣ ᱨᱮᱫᱚ ᱟᱹᱰᱤ ᱨᱟᱹᱥᱠᱟ ᱥᱟᱨᱥᱟᱣᱜᱼᱟ ᱾ ᱤᱱᱟᱹ ᱦᱤᱞᱚᱜ ᱫᱚ ᱜᱩᱛᱤ ᱠᱚᱲᱟ ᱟᱨ ᱠᱟᱹᱲᱢᱤ ᱠᱩᱲᱤ ᱠᱚᱣᱟᱜ ᱨᱚᱢᱚᱡᱽ ᱟᱠᱷᱲᱟ ᱾ ᱠᱩᱞᱦᱤ ᱢᱩᱪᱟᱹᱫ ᱠᱷᱚᱱᱟᱜ ᱜᱟᱹᱭ ᱜᱚᱴ ᱰᱟᱺᱰᱤ ᱵᱟᱝᱠᱷᱟᱱ ᱛᱟᱞᱟ ᱠᱩᱞᱦᱤ ᱨᱮ ᱰᱟᱝᱜᱽᱨᱟ ᱠᱚ ᱠᱷᱩᱱᱴᱟᱹᱣ ᱠᱚᱣᱟ ᱾ ᱠᱩᱞᱦᱤ ᱨᱮ ᱰᱷᱚᱰᱟ ᱞᱟ ᱠᱟᱛᱮ ᱢᱤᱫᱴᱟᱹᱝ ᱠᱮᱴᱮᱡ ᱠᱷᱩᱱᱴᱤ ᱵᱟᱝᱠᱷᱟᱱ ᱠᱟᱭᱨᱟ ᱫᱟᱨᱮ ᱠᱚ ᱵᱤᱫᱟ ᱾ ᱚᱱᱟ ᱠᱷᱩᱱᱤᱨᱮ ᱫᱟᱲᱮ ᱟᱨ ᱪᱚᱴᱠᱟᱨ ᱧᱚᱜ ᱰᱟᱝᱜᱽᱨᱟ ᱠᱚ ᱛᱚᱞᱮᱭᱟ ᱾ ᱩᱱᱤ ᱰᱟᱝᱜᱽᱨᱟᱭᱤᱡ ᱠᱤᱥᱟᱹᱬ ᱜᱷᱟᱹᱨᱱᱤ ᱚᱲᱟᱜ ᱠᱷᱚᱱ ᱛᱷᱟᱹᱨᱤ ᱨᱮ ᱟᱫᱽᱣᱟ ᱪᱟᱣᱞᱮ ᱫᱷᱩᱵᱤ ᱜᱟᱥ ᱫᱮᱣᱦᱮ ᱵᱟᱹᱛᱤ ᱟᱨ ᱛᱟᱝ ᱦᱟᱺᱰᱤ ᱟᱜᱩᱭᱟᱭ ᱾ ᱩᱱᱤ ᱰᱟᱝᱜᱽᱨᱟ ᱪᱩᱢᱟᱺᱬᱟ ᱠᱟᱛᱮ ᱠᱤᱥᱟᱹᱬ ᱛᱮᱫ ᱠᱷᱩᱴᱤ ᱥᱩᱨ ᱨᱮ ᱛᱟᱝ ᱦᱟᱺᱰᱤ ᱵᱚᱝᱜᱟᱭᱟᱭ ᱾ ᱵᱚᱝᱜᱟ ᱥᱟᱨᱮᱡ ᱧᱩ ᱵᱟᱲᱟ ᱠᱟᱛᱮ ᱰᱟᱝᱜᱽᱨᱟ ᱠᱚ ᱥᱮᱨᱮᱧ ᱟᱭᱟ ᱟᱨᱠᱚ ᱪᱟᱨᱦᱟᱣ ᱮᱭᱟ ᱾ ᱪᱟᱨᱦᱟᱣ ᱫᱚ ᱦᱟᱨᱛᱟ ᱛᱮᱠᱚ ᱪᱟᱨᱦᱟᱣ ᱠᱚᱣᱟ ᱾ ᱪᱟᱨᱦᱟᱣ ᱨᱮᱱᱟᱜ ᱢᱮᱱᱮᱛ ᱫᱚ ᱜᱚᱴᱨᱮ ᱟᱹᱛᱤᱧ ᱡᱚᱠᱷᱟᱜ ᱦᱤᱸᱥᱠᱤᱫ ᱡᱟᱱᱣᱟᱨ ᱠᱚ ᱟᱞᱚ ᱠᱚ ᱛᱟᱬᱜᱚᱢ ᱠᱚᱢᱟ ᱟᱨ ᱠᱚ ᱦᱩᱴᱤᱡ ᱫᱟᱨᱟᱢ ᱠᱚᱢᱟ ᱾ ᱜᱟᱹᱭᱠᱚ ᱢᱤᱸᱭᱦᱩᱸ ᱠᱚ ᱠᱩᱞ, ᱛᱟᱹᱨᱩᱵ, ᱦᱟᱰᱜᱟᱨ, ᱦᱟᱹᱨᱫᱩᱲ ᱪᱮᱴᱨᱟ ᱮᱢᱟᱱ ᱠᱚᱨᱮ ᱠᱷᱚᱱ ᱠᱚ ᱫᱩᱜ ᱫᱟᱲᱮ ᱟᱠᱚᱢᱟ ᱾ ᱦᱟᱨᱛᱟ ᱨᱮᱱᱟᱜ ᱢᱮᱱᱮᱛ ᱫᱚ, ᱡᱟᱱᱣᱟᱨ ᱡᱟᱱᱣᱟᱨ ᱥᱚ ᱠᱚᱢᱟ ᱾ ᱪᱟᱨᱦᱟᱣ ᱡᱚᱠᱷᱟᱜ ᱠᱷᱩᱱᱴᱤ ᱯᱚᱴᱚᱡ ᱞᱮᱱᱠᱷᱟᱱ ᱵᱟᱝ ᱡᱚᱲᱟ ᱛᱚᱯᱟᱜ ᱞᱮᱱᱠᱷᱟᱱ ᱠᱤᱥᱟᱹᱬ ᱛᱮᱫ ᱢᱤᱫ ᱴᱩᱠᱩᱡ ᱦᱟᱺᱰᱤ ᱠᱚ ᱰᱟᱸᱰᱚᱢᱮᱭᱟ ᱾ ᱱᱚᱝᱠᱟ ᱢᱟᱱᱟᱣᱜᱼᱟ ᱠᱷᱩᱱᱴᱟᱹᱣ ᱫᱚ ᱾

ᱡᱟᱡᱽᱞᱮ/ᱯᱮᱴᱮᱡ ᱞᱟᱹᱯᱩᱜ

ᱡᱟᱡᱽᱞᱮ ᱠᱷᱩᱱᱴᱟᱹᱣ ᱫᱚᱥᱟᱨ ᱦᱤᱞᱚᱜ ᱾ ᱱᱚᱶᱟ ᱫᱚ ᱢᱩᱪᱟᱹᱫ ᱥᱚᱦᱨᱟᱭ ᱠᱟᱱᱟ ᱾ ᱠᱷᱟᱹᱨᱟᱹᱭ ᱨᱮ ᱡᱟᱦᱟᱸ ᱠᱮᱠᱟ ᱦᱳᱲᱳ ᱫᱟᱞ ᱠᱟᱛᱮ, ᱯᱮᱴᱮᱡ ᱛᱮᱫ ᱠᱚ ᱞᱟᱹᱯᱩᱜᱟ ᱥᱟᱨᱮᱡ ᱢᱟᱨᱮᱡ ᱦᱳᱲᱳ ᱠᱚ ᱵᱚ ᱞᱟᱹᱯᱩᱜ ᱚᱰᱚᱠᱟ, ᱚᱱᱠᱟ ᱜᱮ ᱯᱟᱨᱟᱵᱽ ᱥᱟᱨᱮᱡ ᱠᱚ ᱥᱮᱨᱮᱧ ᱚᱸᱰᱚᱠᱟ ᱾ ᱞᱮᱴᱚᱠᱚ, ᱯᱤᱴᱷᱟᱹᱠᱚ, ᱠᱷᱟᱹᱡᱟᱹᱲᱤᱠᱚ, ᱥᱤᱴᱷᱟᱹᱦᱟᱺᱰᱤᱠᱚ, ᱟᱲᱟᱜ, ᱥᱟᱠᱟᱢ, ᱡᱚ, ᱵᱤᱞᱤ ᱮᱢᱟᱱ ᱠᱚᱠᱚ ᱠᱚᱭ ᱟᱹᱪᱩᱨᱟ ᱾ ᱠᱩᱲᱤ, ᱠᱚᱲᱟ, ᱥᱮᱨᱮᱧ ᱟᱠᱚ ᱮᱱᱮᱡ ᱟᱠᱚ ᱚᱲᱟᱜ ᱚᱲᱟᱜ ᱠᱚ ᱫᱟᱬᱟᱱᱟ ᱾ ᱟᱹᱭᱩᱵ ᱫᱚ ᱫᱚᱢᱮ ᱞᱟᱜᱽᱬᱮ ᱠᱚ ᱮᱱᱮᱡᱼᱟ ᱾ ᱱᱚᱝᱠᱟ ᱥᱚᱦᱨᱟᱭ ᱯᱟᱨᱟᱵᱽ ᱵᱚ ᱢᱟᱱᱟᱣ ᱯᱟᱨᱚᱢᱟ ᱾

ᱥᱚᱦᱨᱟᱭ ᱥᱮᱨᱮᱧ

• ᱩᱢ ᱱᱟᱲᱠᱟᱜ ᱜᱷᱟᱹᱨᱱᱤ ᱛᱤᱠᱤ ᱥᱚᱵᱚᱫ,

ᱚᱲᱟᱜ ᱫᱩᱣᱟᱹᱨ ᱥᱩᱥᱟᱹᱨ ᱟᱞᱚᱢ ᱦᱤᱲᱤᱧᱟ ᱾

ᱥᱤᱢ ᱠᱚ ᱨᱟᱜ ᱛᱮ ᱜᱟᱹᱛᱤᱧ ᱵᱮᱨᱮᱫ ᱛᱟᱞᱟᱝ ᱢᱮ,

ᱵᱷᱤᱛᱟᱹᱨ ᱫᱩᱣᱟᱹᱨ ᱪᱩᱞᱦᱟᱹ ᱞᱩᱸᱰᱟᱹ ᱚᱰᱚᱠ ᱢᱮ ᱾

ᱫᱩᱣᱟᱹᱨ ᱯᱤᱪᱷᱤ ᱜᱷᱟᱹᱨᱱᱤ ᱵᱟᱹᱛᱤ ᱞᱟᱜᱟᱣ ᱢᱮ,

ᱞᱩᱠᱷᱤ ᱫᱷᱚᱨᱚᱢ ᱧᱩᱛᱩᱢ ᱜᱚᱰ ᱱᱟᱹᱪᱩᱨ ᱢᱮ ᱾

ᱫᱷᱚᱱ ᱦᱚᱯᱚᱱ ᱞᱟᱹᱜᱤᱫ ᱫᱮᱞᱟᱝ ᱱᱮᱦᱚᱨ ᱠᱤᱱ,

ᱞᱩᱠᱷᱤ ᱫᱷᱚᱨᱚᱢ ᱜᱮᱞᱟᱝ ᱥᱮᱵᱟ ᱵᱮᱵᱷᱟᱨ ᱠᱤᱱ ᱾

ᱢᱟᱨᱟᱝ ᱵᱳᱨᱳ ᱫᱷᱚᱨᱚᱢ ᱡᱤᱣᱤ ᱫᱚᱭ ᱠᱷᱚᱧᱡᱟ ᱟᱢ, ᱡᱟᱦᱮᱨ ᱟᱭᱳ ᱞᱩᱠᱷᱤ ᱫᱷᱚᱱ ᱫᱚᱭ ᱯᱮᱨᱮᱡ ᱠᱟᱢ ᱾

ᱫᱷᱚᱱ ᱠᱷᱚᱡᱚᱜ ᱨᱮᱛᱚ ᱫᱷᱚᱱ ᱠᱤᱱ ᱮᱢᱟᱢ ᱟᱢ,

ᱫᱷᱚᱨᱚᱢ ᱫᱷᱟᱹᱨᱛᱤ ᱦᱟᱭᱨᱮ ᱪᱮᱫ ᱠᱤᱱ ᱪᱮᱠᱟ ᱟᱢ ᱾

ᱫᱷᱚᱱ ᱦᱚᱯᱚᱱ ᱦᱟᱭᱨᱮ ᱚᱠᱚᱭ ᱵᱟᱭ ᱧᱟᱢ ᱠᱟᱱ,

ᱫᱷᱚᱱ ᱦᱚᱯᱚᱱ ᱫᱚᱨᱮ ᱪᱟᱜ ᱵᱚ ᱦᱟᱹᱱᱩᱜ ᱠᱟᱱ ᱾

ᱫᱮᱵᱟ ᱥᱮᱵᱟᱢ ᱜᱟᱱᱟ ᱫᱷᱚᱨᱢᱚᱭ ᱩᱨᱩᱢ ᱠᱟᱢ,

ᱟᱪᱟᱨ ᱵᱮᱵᱷᱟᱨ ᱞᱩᱠᱷᱤ ᱫᱷᱚᱱᱫᱚᱭ ᱯᱮᱨᱮᱡ ᱠᱟᱢ ᱾

• ᱱᱟᱶᱟ ᱦᱟᱴᱟᱜ ᱱᱟᱭᱚ ᱠᱤᱨ~ᱧᱟᱧ ᱢᱮ,

ᱱᱤᱧ ᱦᱚᱧ ᱪᱟᱞᱟᱜ ᱱᱟᱭᱚ ᱠᱩᱞᱦᱤ ᱫᱟᱬᱟᱱ,

ᱱᱤᱧ ᱦᱚᱧ ᱪᱟᱞᱟᱜ ᱱᱟᱭᱚ ᱜᱟᱹᱭᱠᱚ ᱪᱩᱢᱟᱺᱲᱟ,

• ᱢᱟᱹᱡᱷᱤ ᱠᱚᱣᱟᱜ ᱪᱷᱟᱴᱠᱟ ᱨᱮ,

ᱡᱚᱲᱟ ᱠᱩᱸᱥᱵᱤ ᱵᱟᱦᱟ ᱟᱠᱟᱱ ᱫᱚ ᱾

ᱛᱟᱨ ᱛᱮᱠᱚ ᱮᱴᱮᱫ ᱟᱠᱟᱫ, ᱡᱟᱹᱱᱩᱢ ᱛᱮᱠᱚ ᱨᱟᱢᱯᱷᱟ ᱟᱠᱟᱫ,

ᱡᱟᱨᱮ ᱠᱩᱸᱥᱵᱤ ᱡᱟᱨᱮ ᱠᱩᱸᱥᱵᱤ, ᱪᱤᱠᱟᱹᱛᱤᱧ ᱵᱟᱦᱟᱢᱮ ᱾

• ᱢᱟᱹᱡᱷᱤ ᱠᱚᱭᱤᱡ ᱦᱚᱯᱚᱱ ᱮᱨᱟ,

ᱵᱟᱹᱛᱤ ᱥᱮᱸᱜᱮᱞ ᱡᱩᱞᱩᱜ ᱞᱮᱠᱟ,

ᱵᱟᱹᱛᱤ ᱮᱸᱜᱮᱞ ᱡᱩᱞᱩᱜ ᱞᱮᱠᱟᱜᱚᱭ ᱡᱷᱟᱨ

ᱡᱷᱟᱨᱟᱣᱜ ᱠᱟᱱ ᱾ ᱵᱟᱝᱫᱚ ᱵᱟᱝᱫᱩᱧ ᱪᱚᱴᱨᱮᱠᱟᱭ, ᱵᱟᱝᱫᱚ ᱵᱟᱝᱫᱩᱧ ᱯᱷᱮᱰᱨᱮᱠᱟᱭ,

ᱵᱟᱹᱛᱤ ᱥᱮᱸᱜᱮᱞ ᱡᱩᱞᱩᱜ ᱞᱮᱠᱟᱜᱚᱭ, ᱡᱷᱟᱨ ᱡᱷᱟᱨᱟᱣᱜ ᱠᱟᱱ ᱾

• ᱛᱮᱦᱮᱧ ᱧᱤᱫᱟᱹᱧ ᱠᱩᱠᱢᱩ ᱠᱟᱱ,

ᱨᱩᱥᱩᱱᱤ ᱠᱟᱹᱠᱤᱹᱹ

ᱛᱟᱝ ᱦᱟᱺᱰᱤᱨᱤᱧ ᱯᱟᱭᱨᱟ ᱵᱟᱲᱟᱭ ᱠᱟᱱ,

ᱨᱩᱥᱩᱱᱤ ᱠᱟᱹᱠᱤᱹᱹᱹᱹ

ᱞᱮᱴᱚ ᱨᱮᱜᱤᱧ ᱛᱷᱟᱹᱞᱤ ᱟᱠᱟᱱ ᱫᱚ ᱾

• ᱛᱤᱨᱤᱞ ᱯᱩᱨ ᱨᱮᱫᱚ ᱪᱤᱞᱤᱜᱚ ᱢᱮᱱᱟᱭᱟ,

ᱢᱮᱱᱟᱭ ᱢᱮᱱᱟᱭ ᱦᱟᱞᱮ ᱜᱚᱜᱚᱨ ᱥᱟ~ᱞᱚ,

ᱢᱮᱱᱟᱭ ᱢᱮᱱᱟᱭ ᱥᱟᱹᱨᱤ ᱯᱟᱹᱱᱤᱨ ᱯᱤ~ᱭᱳ ᱾

• ᱦᱟᱺᱰᱤ ᱦᱟ:ᱰᱤ ᱵᱩᱰᱷᱤ

ᱥᱚ ᱠᱟᱱ ᱫᱚ, ᱥᱩᱭ ᱥᱩᱛᱟᱹᱢ ᱵᱩᱰᱷᱤ ᱤᱢᱟᱹᱧ ᱢᱮᱥᱮ,

ᱦᱟᱺᱰᱤ ᱧᱩᱧᱩ ᱢᱚᱪᱟᱧ ᱨᱚᱜ ᱠᱟᱜ-ᱟ ᱾

• ᱵᱩᱨᱩ ᱠᱷᱚᱱ ᱞᱮ ᱟᱬᱜᱚ ᱟᱠᱟᱱ,

ᱵᱟᱲᱜᱮ ᱨᱮᱞᱮ ᱠᱩᱸᱵᱟᱹ ᱟᱠᱟᱫ,

ᱛᱚᱠᱚᱭ ᱡᱟᱯᱮ ᱦᱚᱦᱚ ᱟᱞᱮᱠᱟᱱ ᱾

ᱫᱷᱟᱫᱽᱨᱟ ᱦᱟᱴᱟᱜ ᱥᱤᱞᱯᱤᱧ ᱛᱟᱞᱮ,

ᱡᱚᱱᱚᱜ ᱴᱷᱩᱴᱠᱤ ᱦᱩᱨᱠᱟᱹᱬ ᱛᱟᱞᱮ,

ᱛᱚᱠᱚᱭ ᱡᱟᱯᱮᱹᱹᱹ

ᱛᱚᱠᱚᱭ ᱡᱟᱯᱮ ᱫᱷᱟᱨᱯᱟᱲ ᱫᱷᱟᱨᱯᱟᱲ ᱮᱫ ᱾

• ᱥᱤᱞᱤ ᱵᱩᱨᱩ ᱨᱮᱢᱟ ᱛᱨᱤᱭᱟᱹᱣ ᱥᱟᱰᱮ ᱠᱟᱱ,

ᱤᱧ ᱢᱟ ᱢᱤᱱᱟᱧ ᱦᱟᱞᱮ ᱫᱟᱜ ᱞᱩᱞᱩ ᱜᱷᱟᱴ ᱨᱮ ᱾

ᱴᱷᱤᱞᱤᱧ ᱵᱟᱹᱜᱤᱭᱟᱜ ᱢᱟ ᱦᱚᱲᱠᱚ ᱨᱚᱨᱚᱲᱟ,

ᱵᱟᱹᱧ ᱵᱟᱹᱜᱤᱭᱟᱜᱼᱟ ᱜᱟᱛᱮᱧ ᱠᱟᱺᱦᱤᱸᱥᱚᱜ ᱾

• ᱛᱚᱠᱚᱭ ᱠᱚᱫᱚᱯᱮ ᱡᱟᱹᱯᱤᱫ ᱟᱠᱟᱫ,

ᱛᱚᱠᱚᱭ ᱠᱚᱫᱚᱯᱮ ᱵᱮᱸᱜᱮᱫ ᱟᱠᱟᱫ,

ᱟᱞᱮ ᱠᱟᱹᱭᱫᱷᱤ, ᱟᱞᱮ ᱠᱟᱹᱭᱫᱷᱤ, ᱡᱚᱵᱟᱵᱽ ᱟᱞᱮᱯᱮ ᱾

• ᱨᱩᱱ ᱛᱩᱠᱩᱱ ᱵᱩᱰᱷᱤ

ᱦᱚᱞᱚᱝ ᱦᱩᱲᱩᱝ ᱞᱮᱫ,

ᱠᱩᱱᱟᱹᱢᱤ ᱪᱟᱸᱫᱚ ᱞᱮᱠᱟ

ᱯᱤᱴᱷᱟᱧ ᱨᱟᱯᱟᱜ ᱞᱮᱫ,

ᱡᱚᱡᱚᱢ ᱵᱤᱫᱟᱹᱞ ᱨᱮᱫᱚ

ᱱᱮᱸᱭᱟᱶ ᱡᱚᱲᱟᱣ ᱮᱱ ᱾

• ᱛᱚᱠᱚᱭ ᱠᱚ ᱫᱚ ᱥᱩᱭᱟᱹ ᱥᱚᱦᱨᱟᱭ,

ᱛᱚᱠᱚᱭ ᱠᱚ ᱫᱚ ᱥᱟᱦᱟᱨ ᱥᱚᱦᱨᱟᱭ,

ᱟᱞᱮ ᱠᱟᱹᱭᱫᱷᱤᱹᱹᱹᱹ ᱟᱞᱮ ᱠᱟᱹᱭᱫᱷᱤ ᱠᱷᱟᱸᱰᱮᱨᱤᱭᱟᱹ ᱠᱚ ᱾

ᱥᱚᱲᱚ ᱠᱚᱫᱚ ᱥᱩᱭᱟᱹ ᱥᱚᱦᱨᱟᱭ,

ᱥᱩᱞᱩᱠ ᱠᱚᱫᱚ ᱥᱟᱦᱟᱨ ᱥᱚᱦᱨᱟᱭ,

ᱟᱞᱮ ᱠᱟᱹᱭᱫᱷᱤᱹᱹᱹᱹ ᱟᱞᱮ ᱠᱟᱹᱭᱫᱷᱤ ᱠᱷᱟᱸᱰᱮᱨᱤᱭᱟᱹ ᱠᱚ

᱾ ᱥᱚᱲᱚ ᱠᱚᱫᱚ ᱫᱟᱬᱟ ᱥᱟᱨᱮᱡ,

ᱥᱩᱞᱩᱠ ᱠᱚᱫᱚ ᱪᱮᱨᱮᱡ ᱯᱮᱨᱮᱡ,

ᱟᱞᱮ ᱠᱟᱹᱭᱫᱷᱤᱹᱹᱹᱹ ᱟᱞᱮ ᱠᱟᱹᱭᱫᱷᱤ ᱠᱷᱟᱸᱰᱮᱨᱤᱭᱟᱹ ᱠᱚ ᱾

• ᱦᱚᱲ ᱨᱤᱱ ᱟᱭᱳ ᱵᱟᱵᱟ

ᱡᱟᱹᱬᱤ ᱯᱩᱨᱩᱫᱷᱩᱞ,

ᱤᱧ ᱨᱤᱱ ᱟᱭᱳ ᱵᱟᱵᱟ ᱢᱟᱺᱬ ᱜᱷᱟᱹᱴᱤ ᱨᱮ ᱾

• ᱱᱚᱶᱟ ᱢᱤᱨᱛᱷᱤ ᱠᱟᱫᱚ ᱵᱤᱞ ᱟᱠᱟᱱᱟ,

ᱱᱚᱶᱟ ᱢᱤᱨᱛᱷᱤᱠᱟ ᱫᱚ ᱟᱴᱮᱫ ᱟᱠᱟᱱᱟ,

ᱜᱤᱫᱤ ᱠᱩᱲᱤᱫ ᱵᱟᱲᱮᱧ ᱡᱟᱱᱟᱢ ᱞᱮᱱ ᱠᱷᱟᱱ,

ᱱᱚᱶᱟ ᱢᱤᱨᱛᱷᱤᱠᱟ ᱫᱩ ᱢᱟᱰᱨᱟᱣ ᱟᱹᱪᱩᱨ ᱠᱚᱜ,

ᱱᱚᱶᱟ ᱢᱤᱨᱛᱷᱤᱠᱟ ᱫᱚ ᱦᱟᱞᱚ ᱟᱹᱪᱩᱨ ᱠᱮ ᱾

• ᱦᱚᱞᱟ ᱨᱮ ᱜᱩᱛᱤ ᱠᱚᱲᱟ ᱦᱚᱞᱟ ᱨᱮ ᱵᱟᱹᱱᱩᱜᱤᱡ,

ᱛᱮᱦᱮᱧ ᱠᱟᱹᱲᱢᱤ ᱠᱩᱲᱤ ᱛᱮᱦᱮᱧ ᱵᱟᱹᱱᱩᱜᱤᱡ ᱾

ᱦᱚᱞᱟ ᱨᱮ ᱵᱟᱥᱠᱮ ᱫᱟᱠᱟ ᱨᱚ ᱠᱚ ᱪᱟᱹᱰᱩᱭᱮᱱ,

ᱛᱮᱦᱮᱧ ᱛᱚᱣᱟ ᱫᱟᱠᱟ ᱪᱩᱸᱫᱮ ᱚᱸᱰᱚᱨᱟᱫ ᱾

• ᱛᱚ~ᱠᱚᱭ ᱨᱤᱱ ᱜᱟᱹᱭ ᱠᱚ,

ᱜᱟᱹᱭ ᱠᱚ ᱵᱩᱨᱩᱫ ᱵᱩᱨᱩᱫ,

ᱛᱚ~ᱠᱚᱭ ᱨᱤᱱ ᱵᱤᱛᱠᱤᱞ,

ᱦᱚ ᱵᱤᱛᱠᱤᱞ ᱧᱟᱺᱦᱩᱢ ᱫᱟᱹᱨᱩᱢ ᱾

ᱯᱷᱟᱨᱱᱟ ᱨᱤᱱ ᱜᱟᱹᱭ ᱠᱚ,

ᱜᱟᱹᱭ ᱠᱚ ᱵᱩᱨᱩᱫ ᱵᱩᱨᱩᱫ,

ᱛᱩ~ᱥᱠᱟᱹ ᱨᱤᱱ ᱵᱤᱛᱠᱤᱞ,

ᱦᱚ ᱵᱤᱛᱠᱤᱞ ᱧᱟᱺᱦᱩᱢ ᱫᱟᱹᱨᱩᱢ,

ᱛᱚᱠᱟ ᱵᱤᱨ ᱠᱚ ᱵᱚ~ᱞᱟ,

ᱢᱟᱱ ᱵᱤᱨ ᱠᱚ ᱵᱚ~ᱞᱟ,

ᱪᱮᱫ ᱥᱟᱫ ᱠᱚ ᱱᱟᱺᱛᱤᱧ,

ᱩᱵᱤ ᱥᱟᱫ ᱠᱚ ᱱᱟᱺᱛᱤᱧ,

ᱪᱮᱫ ᱫᱟᱜ ᱠᱚ ᱧᱩ~ᱭᱟᱸ,

ᱪᱷᱟᱯᱟᱨ ᱫᱟᱜ ᱠᱚ ᱧᱩ~ᱭᱟ,

ᱴᱟᱯᱟᱨ ᱰᱟᱺᱰᱤ ᱴᱟᱯᱟᱨ ᱴᱟᱺᱰᱤ,

ᱦᱚ ᱞᱚᱫᱽᱢᱟ ᱞᱚᱭᱚᱝ ᱨᱮ ᱾

• ᱜᱟᱛᱮᱧ ᱫᱚ ᱵᱩᱨᱩ ᱠᱷᱚᱱᱮ ᱟᱬᱜᱚ ᱟᱠᱟᱱ ,

ᱜᱟᱛᱮᱧ ᱫᱚ ᱞᱚᱫᱽᱢᱟ ᱠᱷᱚᱱᱮ ᱦᱚᱥᱚᱨ ᱟᱠᱟᱱ,

ᱜᱟᱛᱮᱧ ᱫᱚ ᱞᱩᱸᱦᱪᱤ ᱦᱳᱲᱳ ᱞᱮᱣᱮᱨ ᱠᱚᱫᱚᱨ , ᱜᱟᱛᱮᱧ ᱫᱚ ᱠᱩ~ᱡᱩ~ᱨᱤ ᱰᱚᱜᱽ ᱾

• ᱜᱟᱛᱮᱧ ᱫᱚ ᱠᱟᱴ ᱵᱟᱱᱟᱢ ᱠᱟᱴᱟᱵ ᱠᱟᱴᱟᱵ,

ᱜᱟᱛᱮᱧ ᱫᱚ ᱵᱟᱹᱨᱥᱤ ᱦᱟᱯᱟ ᱡᱷᱚᱢᱚᱨ ᱡᱷᱚᱢᱚᱨ , ᱜᱟᱛᱮᱧ ᱫᱚ ᱥᱤᱨᱟᱹ ᱰᱟᱝᱜᱽᱨᱟᱭ ᱯᱷᱟᱸᱫᱟ ᱠᱮᱫᱮ , ᱜᱟᱛᱮᱧ ᱫᱚ ᱵᱷᱟᱹᱜᱤᱧ ᱛᱟᱦᱮᱸ ᱠᱟᱱᱟ ᱢᱮᱱᱛᱮ , ᱜᱟᱛᱮᱧ ᱫᱩᱧ ᱦᱟᱹᱨ ᱥᱟᱢᱴᱟᱣ ᱠᱟᱫᱮ ᱾

• ᱨᱟᱡᱽ ᱠᱚᱫᱚ ᱨᱟᱯᱟᱡᱽ ᱠᱚᱫᱚ

ᱦᱟᱹᱹᱛᱤ ᱪᱮᱛᱟᱱ ᱥᱟᱫᱚᱢ ᱪᱮᱛᱟᱱ

ᱥᱟ~ᱨᱟ~ᱠᱚ ᱥᱟᱹ~ᱜᱩᱱᱟ ᱠᱚ ᱾

ᱢᱟᱹᱡᱷᱤ ᱠᱚᱫᱚ ᱯᱟᱨᱟᱱᱤᱠ ᱠᱚᱫᱚ

ᱢᱟᱹᱪᱤ ᱪᱮᱛᱟᱱ ᱜᱟᱸᱰᱚ ᱪᱮᱛᱟᱱ

ᱥᱟ~ᱨᱟ ᱠᱚ ᱥᱟ~ᱨᱟ ᱠᱚ ᱥᱟᱹ~ᱜᱩᱱᱟ ᱠᱚ ᱾

ᱟᱞᱮ ᱞᱮᱠᱟᱱ ᱯᱚᱨᱡᱟ ᱠᱚᱫᱚ

ᱛᱟᱝ ᱦᱟᱺᱰᱤ ᱵᱚᱰᱚᱡ ᱦᱟᱺᱰᱤ ᱨᱮᱞᱮ

ᱥᱟᱨ ᱥᱟᱹᱜᱩᱱᱟ ᱾

ᱥᱚᱦᱨᱟᱭ ᱨᱮᱱᱟᱜ ᱨᱚᱲ ᱠᱚ

• ᱞᱟᱹᱴᱤᱡ ᱥᱤᱢ ᱯᱤᱴᱷᱟᱹ,

ᱵᱩᱰᱷᱤ ᱢᱟᱞᱦᱟᱱ ᱞᱮᱴᱚ ᱾

• ᱵᱟᱲᱜᱮ ᱨᱮ ᱯᱮ ᱛᱟᱯᱟᱢᱟ,

ᱤᱧ ᱜᱮ ᱯᱮ ᱫᱚᱥᱤᱧᱟ, ᱞᱟᱹᱭᱟᱹᱧ ᱞᱟᱹᱭᱟᱹᱧ, ᱜᱟᱯᱟ ᱜᱟᱯᱟ ᱯᱟᱯᱟ ᱾

• ᱦᱚᱛᱚᱫ ᱫᱚ ᱠᱚ ᱦᱮᱲᱟ,

ᱠᱚᱸᱦᱰᱟ ᱫᱚ ᱠᱚ ᱞᱚᱲᱟ, ᱦᱚᱭ~ᱭᱟ ᱦᱚᱭ~ᱭᱟ ᱦᱚᱭ~ᱭᱟ ᱾

ᱯᱟᱨᱟᱵᱽ ᱯᱩᱱᱟᱹᱭ ᱠᱚ

ᱯᱟᱨᱟᱵ ᱫᱚ ᱵᱟᱨᱞᱮᱠᱟᱛᱮ ᱢᱟᱱᱟᱣᱜ ᱠᱟᱱᱟ ᱑-ᱵᱟᱵᱟ ᱫᱟᱲᱮ ᱱᱮᱦᱚᱨ ᱯᱟᱨᱟᱵᱽ ᱒-ᱟᱭᱳ ᱫᱟᱲᱮ ᱱᱮᱦᱚᱨ ᱯᱟᱨᱟᱵᱽ ᱾ ᱥᱚᱦᱨᱟᱭ ᱯᱟᱨᱟᱵᱽ ᱫᱚ ᱟᱭᱳ ᱫᱟᱲᱮ ᱱᱮᱦᱚᱨ ᱯᱟᱨᱟᱵᱽ ᱠᱟᱱᱟ ᱾

ᱱᱚᱶᱟ ᱯᱟᱨᱟᱵᱽ ᱫᱚ ᱠᱷᱮᱨᱣᱟᱲ ᱠᱚᱣᱟᱜ ᱟᱹᱰᱤ ᱢᱟᱨᱟᱝ ᱯᱟᱨᱟᱵ ᱠᱟᱱᱟ ᱾ ᱚᱱᱟᱛᱮ ᱢᱮᱱᱟᱠᱚ ᱦᱟᱹᱛᱤ ᱞᱮᱠᱟᱱ ᱥᱚᱦᱨᱟᱭ ᱯᱟᱨᱟᱵᱽ ᱾ ᱦᱟᱹᱛᱤ ᱫᱚ ᱫᱷᱟᱹᱨᱛᱤ ᱨᱮ ᱢᱟᱨᱟᱝ ᱡᱟᱹᱱᱤ ᱠᱟᱱᱟᱭ ᱾ ᱵᱚᱝᱜᱟᱭᱤᱡ ᱜᱚᱱᱤᱡ [ᱜᱚᱜ ᱜᱚ ᱜᱤᱡ] ᱠᱟᱱᱟᱭ ᱾ ᱦᱟᱹᱛᱤ ᱢᱮᱱ ᱞᱮᱠᱷᱟᱱ ᱠᱩᱱᱟᱝ [ᱠᱩᱲᱤ ᱡᱟᱱᱟᱝ] ᱢᱮᱱᱛᱮ ᱟᱹᱭᱠᱟᱹᱣᱜᱼᱟ ᱾ ᱵᱤᱱᱛᱤ ᱠᱚᱨᱮ ᱠᱷᱚᱱ ᱵᱟᱰᱟᱭᱚᱜᱼᱟ, ᱜᱟᱹᱭ ᱟᱭᱳ ᱜᱮ ᱦᱤᱦᱤᱲᱤ ᱯᱤᱯᱤᱲᱤ ᱠᱷᱚᱱ ᱦᱳᱲᱳᱭ ᱫᱤᱯᱤᱞ ᱟᱹᱜᱩ ᱞᱮᱫᱼᱟ ᱾ ᱚᱱᱟ ᱛᱮ ᱜᱟᱹᱭ ᱦᱚᱸᱭ ᱠᱩᱱᱟᱝ ᱠᱟᱱᱛᱮ ᱜᱟᱹᱭ ᱧᱩᱛᱩᱢ ᱛᱮᱜᱮ ᱠᱚ ᱯᱟᱨᱟᱵᱚᱜᱼᱟ ᱾ ᱥᱚᱦᱨᱟᱭ ᱵᱚᱝᱜᱟ ᱨᱮᱱᱟᱜ ᱡᱚᱥ ᱵᱟᱝ ᱴᱷᱤᱠᱟᱹ ᱦᱟᱠᱟᱱᱛᱮ ᱟᱹᱰᱤ ᱴᱷᱟᱶ ᱨᱮ ᱟᱹᱰᱤ ᱞᱮᱠᱟᱵᱚ ᱯᱟᱨᱟᱵᱚᱜ ᱠᱟᱱᱟ ᱾ ᱚᱠᱚᱭ ᱠᱚᱫᱚ ᱥᱚᱦᱨᱟᱭ ᱵᱚᱝᱜᱟ ᱵᱟᱞᱮ ᱢᱩᱞᱩᱜ, ᱚᱠᱚᱭ ᱠᱚᱫᱚ ᱥᱚᱦᱨᱟᱭ ᱵᱚᱝᱜᱟ ᱠᱩᱱᱟᱹᱢᱤ, ᱚᱠᱚᱭ ᱠᱚᱫᱚ ᱯᱩᱥ ᱵᱚᱝᱜᱟ ᱠᱚ ᱥᱚᱦᱨᱟᱭᱚᱜ ᱠᱟᱱᱟ ᱾ ᱱᱚᱝᱠᱟ ᱟᱯᱟᱱ ᱟᱹᱯᱤᱱ ᱵᱟᱝ ᱠᱟᱛᱮ ᱢᱤᱫᱩᱜ ᱦᱩᱭ ᱟᱵᱚᱱᱟ ᱾

ᱵᱚᱸᱜᱟ ᱵᱩᱨᱩ ᱠᱚ

ᱥᱚᱦᱨᱟᱭ ᱨᱮ ᱫᱚ ᱜᱚᱴ ᱵᱚᱝᱜᱟ, ᱜᱚᱲᱟ ᱵᱚᱝᱜᱟ ᱠᱚ ᱯᱮᱨᱮᱡ ᱩᱢᱟᱬᱚᱜᱼᱟ ᱾ ᱜᱚᱴ ᱨᱮ ᱫᱚ ᱢᱟᱨᱟᱝ ᱵᱳᱨᱳ, ᱡᱟᱦᱮᱨ ᱟᱭᱳ, ᱢᱚᱬᱮ ᱠᱚ, ᱛᱩᱨᱩᱭ ᱠᱚ ᱾ ᱜᱚᱲᱟ ᱨᱮ ᱫᱚ ᱯᱟᱹᱨᱤᱥ ᱡᱟᱹᱱᱤᱡ ᱟᱯᱟᱱ ᱟᱹᱯᱤᱱ ᱜᱮᱭᱟ ᱾ ᱠᱷᱩᱱᱴᱟᱹᱣ ᱴᱟᱺᱰᱤ ᱨᱮ ᱫᱚ ᱢᱟᱨᱟᱝ ᱵᱳᱨᱳ, ᱦᱟᱯᱲᱟᱢ ᱠᱚ, ᱟᱯᱟᱱ ᱟᱹᱯᱤᱱ ᱨᱤᱱ ᱾

ᱥᱟᱹᱠᱷᱭᱟᱹᱛ

ᱥᱚᱦᱨᱟᱭ ᱵᱚᱝᱜᱟ ᱥᱚᱦᱨᱟᱭ ᱯᱟᱨᱟᱵᱽ ᱚᱠᱛᱚ ᱨᱮ ᱦᱟᱲᱟᱢ ᱦᱚᱲ ᱵᱩᱰᱤ ᱮᱨᱟ ᱢᱚᱪᱟ ᱠᱷᱚᱱ ᱟᱸᱡᱚᱢ ᱪᱮᱫᱟᱜ ᱠᱚᱜᱮ ᱚᱞ ᱯᱷᱚᱴᱮᱞ ᱟᱠᱟᱱᱟ ᱾ ᱵᱟᱰᱟᱭᱟᱜ ᱠᱚᱦᱚᱸ ᱵᱚ ᱚᱞ ᱥᱚᱫᱚᱨ ᱢᱟ ᱾