ᱧᱮᱱᱮᱞᱚᱢ

ᱧᱮᱱᱮᱞᱚᱢ

ᱢᱟ.ᱱᱢᱤᱭᱟᱜ ᱠᱟ.ᱢᱤ ᱞᱟᱸᱜᱟ ᱡᱤᱭᱚᱱ ᱥᱚᱨᱮᱥ, ᱪᱚᱨᱚᱠ ᱟᱨ ᱦᱮᱲᱮᱢ ᱥᱤᱵᱤᱞ ᱵᱮᱱᱟᱣ ᱞᱟ.ᱜᱤᱫ ᱛᱮ ᱥᱟᱬᱮᱥᱤᱭᱟ. ᱠᱚ ᱡᱟᱦᱟᱸ ᱡᱟᱭ ᱠᱚᱠᱚ ᱵᱮᱱᱟᱣ ᱜᱚᱲᱦᱚᱱ ᱟᱠᱟᱜᱼᱟ, ᱚᱱᱟ ᱠᱚ ᱛᱟᱞᱟᱨᱮ ᱧᱮᱱᱮᱞᱚᱢ ᱢᱤᱫᱴᱟ.ᱝ ᱟ.ᱰᱤ ᱢᱟᱨᱟᱝ ᱡᱤᱱᱤᱥ ᱾ ᱢᱟᱨᱠᱳᱱᱤ ᱨᱚᱲᱭᱚᱢ ᱵᱮᱱᱟᱣ ᱚᱰᱚᱠ ᱠᱟᱛᱮ ᱩᱱ ᱡᱚᱦᱚᱜ ᱢᱟ.ᱱᱢᱤ ᱠᱚ ᱛᱟᱞᱟᱨᱮ ᱢᱤᱫ ᱪᱩᱦᱩᱞ ᱮ ᱥᱟᱨᱥᱟᱣ ᱦᱚᱪᱚ ᱠᱮᱜᱼᱟ ᱾ ᱦᱚᱲ ᱠᱚ ᱚᱲᱟᱜ ᱨᱮ ᱫᱩᱲᱩᱵ ᱠᱟᱛᱮ ᱨᱚᱲᱭᱚᱢ ᱥᱚᱦᱚᱫ ᱛᱮ ᱥᱮᱨᱮᱧ ᱟᱨ ᱞᱮᱠᱟᱱ ᱞᱮᱠᱟᱱ ᱠᱟᱛᱷᱟ ᱜᱟᱞᱢᱟᱨᱟᱣ ᱠᱚᱠᱚ ᱟᱸᱡᱚᱢ ᱫᱟᱲᱮᱭᱟᱫᱼᱟ ᱾ ᱤᱠᱷᱟ. ᱚᱠᱚᱭ ᱮ ᱥᱮᱨᱮᱧᱮᱜᱼᱟ ᱟᱨᱵᱟᱝ ᱮ ᱨᱚᱲ ᱠᱟᱱᱟ, ᱚᱱᱟ ᱵᱟᱰᱟᱭ ᱞᱟ.ᱜᱤᱫ ᱛᱮ ᱢᱟ.ᱱᱢᱤᱭᱟᱜ ᱢᱚᱱᱮᱨᱮ ᱥᱟ.ᱥᱠᱟ. ᱥᱟᱨᱥᱟᱣ ᱮᱱᱟ ᱾ ᱱᱚᱣᱟ ᱵᱟᱰᱟᱭ ᱡᱚᱝ ᱨᱟ.ᱥᱠᱟ. ᱯᱮᱨᱮᱡ ᱯᱩᱨᱩᱱ ᱞᱟ.ᱜᱤᱫ ᱟᱨ ᱡᱚ ᱵᱤᱞᱤ ᱦᱚᱪᱚᱭ ᱞᱟ.ᱜᱤᱫ ᱥᱟᱬᱮᱥᱤᱭᱟ. ᱠᱚ ᱟ.ᱰᱤ ᱠᱮᱴᱮᱡ ᱠᱚ ᱠᱩᱨᱩᱢᱩᱴᱩ ᱠᱮᱜᱼᱟ ᱾ ᱤᱠᱷᱟ.ᱱ ᱡᱤᱛᱠᱟ.ᱨ ᱮ ᱟᱢᱮᱴ ᱠᱮᱜᱼᱟ ᱤᱸᱜᱽᱞᱚᱸᱰ ᱨᱤᱱᱤᱡ ᱥᱟᱬᱮᱥᱤᱭᱟ. ᱡᱚᱱᱵᱚᱭᱮᱰ ᱑᱙᱒᱖ ᱥᱟᱞᱮᱨᱮ ᱾ ᱦᱚᱲ ᱠᱚ ᱚᱲᱟᱜ ᱨᱮ ᱫᱩᱲᱩᱵ ᱫᱩᱲᱩᱵ ᱥᱟᱺᱜᱤᱧ ᱨᱮᱭᱟᱜ ᱥᱮᱨᱮᱧ ᱠᱚ ᱟᱸᱡᱚᱢ ᱫᱟᱲᱮᱭᱟᱫᱼᱟ ᱟᱨ ᱥᱮᱨᱮᱧ ᱮ ᱨᱟᱦᱟ ᱮᱫ ᱦᱚᱲ ᱦᱚᱸᱠᱚ ᱧᱮᱞ ᱫᱟᱲᱮ ᱟᱫᱮᱭᱟ ᱾ ᱭᱩᱨᱳᱯ ᱟᱨ ᱟᱢᱮᱨᱤᱠᱟ ᱨᱮ ᱯᱩᱭᱞᱩ ᱟ.ᱰᱤ ᱡᱩᱨ ᱦᱚᱲ ᱠᱚ ᱠᱩᱥᱤᱭᱟᱫᱼᱟ ᱾ ᱑᱙᱖᱕ ᱥᱟᱞᱮᱨᱮ ᱧᱮᱱᱮᱞᱚᱢ ᱵᱷᱟᱨᱚᱛ ᱛᱮ ᱥᱮᱴᱮᱨ ᱮᱱᱟ ᱟᱨ ᱑᱙᱘᱑ ᱥᱟᱞᱮᱨᱮ ᱟᱨᱮ ᱟᱱᱟᱜ ᱮᱥᱤᱭᱟᱰ ᱠᱷᱮᱞᱚᱸᱰ ᱦᱩᱭ ᱮᱱ ᱵᱮᱲᱟᱨᱮ ᱱᱚᱣᱟ ᱳᱰᱤᱥᱟᱨᱮ ᱜᱚᱴᱟ ᱯᱟᱥᱱᱟᱣ ᱮᱱᱟ ᱾ ᱛᱮᱦᱮᱧ ᱳᱰᱤᱥᱟᱨᱮ ᱟ.ᱰᱤ ᱜᱚᱴᱟᱝ ᱵᱟᱡᱟᱨ ᱨᱮ ᱥᱟᱶᱛᱮ ᱟ.ᱛᱩ ᱴᱚᱞᱟᱨᱮ ᱧᱮᱱᱮᱞᱚᱢ ᱨᱮᱭᱟᱜ ᱵᱮᱵᱷᱟᱨ ᱦᱩᱭᱩᱜ ᱠᱟᱱᱟ ᱢᱮᱱᱛᱮ ᱧᱮᱞᱚᱜ ᱠᱟᱱᱟ ᱾ ᱧᱮᱱᱮᱞᱚᱢ ᱨᱮᱭᱟᱜ ᱵᱮᱵᱷᱟᱨ ᱵᱟ.ᱲᱛᱤ ᱤᱫᱤ ᱟᱠᱟᱱ ᱥᱟᱶ ᱥᱟᱶᱛᱮ ᱨᱚᱲᱭᱚᱢ ᱨᱮᱭᱟᱜ ᱵᱮᱵᱷᱟᱨ ᱩᱱᱟ.ᱝ ᱜᱮ ᱠᱚᱢ ᱤᱫᱤ ᱟᱠᱟᱱᱟ ᱾

ᱠᱟ.ᱢᱤ ᱛᱚᱦᱚᱨ

ᱧᱮᱱᱮᱞᱚᱢ ᱢᱤᱥᱤᱱ ᱫᱚ ᱤᱞᱮᱠᱴᱨᱳᱱᱤᱠ ᱜᱚᱲᱚ ᱥᱚᱦᱚᱫ ᱛᱮ ᱠᱟ.ᱢᱤ ᱦᱩᱭᱩᱜᱼᱟ ᱾ ᱟ.ᱰᱤ ᱟ.ᱰᱤ ᱴᱚᱴᱷᱟᱨᱮ ᱧᱮᱱᱮᱞᱚᱢ ᱛᱟᱞᱢᱟ ᱛᱷᱟᱯᱚᱱ ᱟᱠᱟᱱᱟ ᱾ ᱚᱱᱟ ᱛᱟᱞᱢᱟ ᱨᱮᱜᱮ ᱡᱚᱛᱚ ᱠᱷᱚᱱ ᱞᱟᱯᱷᱟᱝ ᱵᱤᱞᱰᱤᱝ ᱨᱮ ᱨᱩᱯ ᱟᱨ ᱟᱲᱟᱝ ᱟᱸᱜᱚᱪ ᱞᱟ.ᱜᱤᱫ ᱡᱚᱱᱛᱨᱚ ᱮᱢᱟᱱ ᱠᱚ ᱛᱟᱦᱮᱸ ᱠᱚᱜᱼᱟ ᱾ ᱩᱰᱟ.ᱱ ᱜᱟ.ᱰᱤ ᱠᱚᱛᱮ ᱟᱞᱚ ᱵᱟᱡᱟᱣᱜ ᱢᱟ ᱚᱱᱟ ᱠᱷᱟ.ᱛᱤᱨ ᱚᱱᱟᱨᱮ ᱟᱨᱟᱜ ᱨᱚᱝ ᱵᱟ.ᱛᱤ ᱡᱩᱞᱩᱜᱼᱟ ᱾ ᱢᱟᱨᱟᱝ ᱢᱟᱨᱟᱝ ᱵᱟᱡᱟᱨ ᱠᱚᱨᱮ ᱚᱱᱟ ᱠᱚᱫᱚ ᱟ.ᱰᱤ ᱴᱷᱟ.ᱣᱠᱟ. ᱥᱟᱺᱦᱤᱡ ᱵᱟᱰᱟᱭᱚᱜᱼᱟ ᱾ ᱧᱮᱱᱮᱞᱚᱢ ᱛᱟᱞᱢᱟ ᱨᱮᱭᱟᱜ ᱵᱮᱵᱚᱥᱛᱟ ᱞᱮᱠᱟᱛᱮ ᱛᱤᱱᱟ.ᱝ ᱜᱟᱱ ᱪᱤᱛᱟ.ᱨ ᱫᱚ ᱦᱮᱸᱫᱮ ᱟᱨ ᱛᱤᱱᱟ.ᱝ ᱜᱟᱱ ᱫᱚ ᱨᱩᱸᱜᱤᱱ ᱛᱟᱦᱮᱸ ᱠᱚᱜᱼᱟ ᱾ ᱥᱟᱺᱜᱤᱧ ᱨᱮᱭᱟᱜ ᱪᱤᱛᱟ.ᱨ ᱟᱨ ᱵᱮᱣᱨᱟ ᱠᱚ ᱡᱟᱣᱨᱟᱭ ᱞᱟ.ᱜᱤᱫ ᱛᱮᱫᱚ ᱥᱟᱴᱞᱟᱭᱤᱴ ᱜᱚᱲᱚ ᱥᱚᱦᱚᱫ ᱮ ᱛᱟᱦᱮᱸᱱᱟ ᱾

ᱧᱮᱱᱮᱞᱚᱢ ᱛᱮ ᱞᱟᱵᱽ

ᱧᱮᱱᱮᱞᱚᱢ ᱦᱚᱛᱮᱛᱮ ᱞᱟᱵᱽ ᱫᱚ ᱡᱚᱛᱚ ᱠᱷᱚᱱ ᱵᱟ.ᱲᱛᱤ ᱜᱮᱭᱟ ᱾ ᱡᱟᱦᱟᱸ ᱴᱚᱴᱷᱟ ᱨᱮᱜᱮ ᱡᱟᱦᱟᱸᱱᱟᱜ ᱜᱷᱚᱴᱚᱱ ᱦᱩᱭᱩᱜ ᱠᱷᱟᱱ ᱟ.ᱰᱤ ᱠᱟ.ᱡ ᱚᱠᱛᱚ ᱨᱮ ᱧᱮᱱᱮᱞᱚᱢ ᱦᱚᱛᱮᱛᱮ ᱚᱱᱟ ᱧᱮᱞ ᱦᱩᱭ ᱫᱟᱲᱮᱭᱟᱜ ᱠᱟᱱᱟ ᱾ ᱡᱟᱦᱟᱸ ᱵᱤᱞᱚᱢ ᱠᱟᱛᱮ ᱵᱮᱣᱨᱟ ᱥᱟᱠᱟᱢ ᱨᱮ ᱯᱟᱨᱥᱟᱞᱚᱜ ᱠᱟᱱᱟ ᱟᱨ ᱨᱚᱲᱭᱚᱢ ᱦᱚᱛᱮᱛᱮ ᱩᱪᱷᱟ.ᱱᱚᱜ ᱠᱟᱱᱟ ᱚᱱᱟ ᱧᱮᱱᱮᱞᱚᱢ ᱨᱮ ᱥᱚᱸᱜᱮᱼᱥᱚᱸᱜᱮ ᱵᱟᱰᱟᱭᱚᱜ ᱠᱟᱱᱟ ᱟᱨ ᱧᱮᱞᱚᱜ ᱠᱟᱱᱟ ᱾ ᱵᱷᱟᱨᱚᱛ ᱨᱤᱱᱤᱡ ᱢᱟᱨᱟᱝ ᱢᱚᱱᱛᱨᱤ ᱥᱨᱤᱢᱚᱛᱤ ᱤᱸᱫᱽᱨᱟ ᱜᱟᱸᱫᱷᱤᱭᱟᱜ ᱜᱩᱨ ᱪᱮᱛᱟᱱ ᱨᱮ ᱵᱮᱣᱨᱟ ᱤᱫᱤ ᱠᱟᱛᱮ ᱧᱮᱞ ᱡᱚᱝ ᱟᱨ ᱵᱟᱰᱟᱭ ᱡᱚᱝ ᱞᱟ.ᱜᱤᱫ ᱧᱮᱱᱮᱞᱚᱢ ᱛᱟᱦᱮᱸᱱ ᱚᱲᱟᱜ ᱠᱚᱨᱮ ᱡᱟᱦᱟᱸ ᱞᱮᱠᱟ ᱵᱷᱤᱲ ᱦᱩᱭ ᱞᱮᱱᱟ ᱟᱨᱵᱟᱝ ᱠᱨᱤᱠᱮᱴ ᱦᱮᱯᱨᱟᱣ ᱠᱚ ᱧᱮᱞ ᱞᱟ.ᱜᱤᱫ ᱱᱤᱛ ᱫᱷᱟ.ᱵᱤᱡ ᱦᱚᱸ ᱚᱠᱛᱚ ᱚᱠᱛᱚ ᱨᱮ ᱡᱟᱦᱟᱸ ᱞᱮᱠᱟ ᱵᱷᱤᱲ ᱧᱮᱱᱮᱞᱚᱢ ᱥᱩᱨ ᱨᱮ ᱦᱩᱭᱩᱜᱼᱟ ᱚᱱᱟ ᱜᱮ ᱟᱡᱟᱜ ᱫᱟᱢᱟᱱ ᱨᱮᱭᱟᱜ ᱯᱚᱨᱢᱟᱱ ᱫᱚ ᱾ ᱫᱤᱥᱚᱢ ᱨᱤᱱ ᱢᱟᱨᱟᱝ ᱜᱚᱢᱠᱮ ᱠᱚᱣᱟᱜ ᱜᱟᱞᱚᱪ, ᱮᱴᱟᱜ ᱫᱤᱥᱚᱢ ᱠᱷᱚᱱ ᱠᱚ ᱦᱟ.ᱡᱩᱜ ᱵᱤᱫᱮᱥ ᱱᱮᱛᱟ ᱠᱚᱣᱟᱜ ᱥᱟᱨᱦᱟᱣᱱᱟ, ᱫᱤᱥᱚᱢ ᱨᱮ ᱜᱷᱚᱴᱟᱣᱜ ᱠᱟᱱ ᱫᱤᱱᱟ.ᱢ ᱦᱤᱞᱚᱜᱟᱜ ᱜᱷᱚᱴᱚᱱ, ᱥᱟᱬᱮᱥ ᱨᱮᱭᱟᱜ ᱯᱟᱥᱱᱟᱣ, ᱥᱮᱪᱮᱫ ᱯᱚᱨᱛᱚᱱ, ᱥᱤᱱᱢᱟ, ᱜᱟᱭᱟᱱ, ᱟ.ᱰᱤ ᱞᱮᱠᱟᱱᱟᱜ ᱚᱲᱟᱜ ᱨᱮ ᱫᱩᱲᱩᱵ ᱠᱟᱛᱮ ᱟᱸᱡᱚᱢ ᱟᱨ ᱧᱮᱞ ᱫᱟᱲᱮ ᱦᱩᱭᱩᱜ ᱠᱟᱱᱟ ᱾ ᱠᱷᱟ.ᱞᱤ ᱟᱵᱚ ᱫᱤᱥᱚᱢ ᱥᱩᱢᱩᱝ ᱨᱮᱭᱟᱜ ᱵᱮᱣᱨᱟ ᱜᱮ ᱩᱪᱷᱟ.ᱱᱚᱜ ᱠᱟᱱᱟ, ᱚᱱᱟ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ, ᱮᱴᱟᱜ ᱫᱤᱥᱚᱢ ᱨᱮᱭᱟᱜ ᱦᱚᱸ ᱵᱟᱰᱟᱭ ᱧᱟᱢᱚᱜ ᱠᱟᱱᱟ ᱾ ᱟ.ᱰᱤ ᱞᱮᱠᱟᱱ ᱴᱚᱴᱷᱟ ᱨᱤᱱ ᱦᱚᱲ ᱠᱟ.ᱢᱤ ᱠᱟᱛᱮ ᱛᱤᱱ ᱡᱚᱦᱚᱜ ᱮ ᱞᱟᱸᱜᱟ ᱠᱚᱜᱼᱟ ᱩᱱ ᱡᱚᱦᱚᱜ ᱧᱮᱱᱮᱞᱚᱢ ᱧᱮᱞ ᱠᱟᱛᱮ ᱞᱟᱸᱜᱟᱭ ᱨᱟᱲᱮᱡ ᱛᱟᱭᱟ ᱾ ᱜᱮᱭᱟᱱ ᱦᱟᱨᱟ, ᱞᱟ.ᱭ ᱞᱟᱠᱪᱟᱨ ᱨᱮᱭᱟᱜ ᱯᱟᱥᱱᱟᱣ ᱟᱨ ᱞᱮᱠᱟᱱ ᱞᱮᱠᱟᱱ ᱵᱮᱣᱨᱟ ᱯᱟᱥᱱᱟᱣ ᱵᱮᱵᱚᱥᱛᱟ ᱧᱮᱱᱮᱞᱚᱢ ᱦᱚᱛᱮᱛᱮ ᱥᱚᱢᱵᱷᱚᱵᱽ ᱦᱩᱭ ᱫᱟᱲᱮ ᱠᱟᱣᱟᱫᱼᱟ ᱾

ᱧᱮᱱᱮᱞᱚᱢ ᱛᱮ ᱦᱟ.ᱱ

ᱞᱟᱵᱽ ᱟᱨ ᱦᱟ.ᱱ ᱫᱚ ᱡᱚᱛᱚ ᱡᱤᱱᱤᱥ ᱨᱮᱜᱮ ᱢᱮᱱᱟᱜᱼᱟ ᱾ ᱠᱟ.ᱣᱰᱤ ᱨᱮᱭᱟᱜ ᱵᱟᱨ ᱯᱟᱦᱴᱟ ᱞᱮᱠᱟ ᱱᱚᱣᱟ ᱫᱚᱭ ᱠᱟ.ᱢᱤᱭᱟ ᱾ ᱚᱱᱟᱛᱮ ᱧᱮᱱᱮᱞᱚᱢ ᱨᱮᱭᱟᱜ ᱦᱚᱸ ᱚᱱᱠᱟ ᱜᱮ ᱦᱟ.ᱱ ᱦᱚᱸ ᱛᱟᱦᱮᱸᱱ ᱜᱮᱭᱟ ᱾ ᱤᱠᱷᱟ.ᱱ ᱞᱟᱵᱽ ᱥᱟᱢᱟᱝ ᱨᱮ ᱱᱚᱣᱟ ᱦᱟ.ᱱ ᱫᱚ ᱟ.ᱰᱤ ᱠᱟ.ᱡ ᱜᱮᱭᱟ ᱾ ᱦᱟ.ᱱ ᱫᱚ ᱞᱟᱫᱮ ᱛᱟᱦᱮᱸᱱᱟ ᱱᱚᱣᱟ ᱨᱮᱭᱟᱜ ᱵᱮᱵᱷᱟᱨ ᱪᱮᱛᱟᱱ ᱨᱮ ᱾

ᱪᱮᱛᱮᱫᱤᱭᱟ. ᱠᱚ ᱧᱮᱱᱮᱞᱚᱢ ᱫᱚ ᱟ.ᱰᱤ ᱵᱟ.ᱲᱛᱤ ᱵᱮᱵᱷᱟᱨ ᱠᱟᱛᱮ ᱟᱠᱚᱣᱟᱜ ᱟᱺᱜᱤᱵᱷᱟᱨ ᱠᱚ ᱦᱤᱲᱤᱧ ᱪᱟᱵᱟᱭᱟ ᱾ ᱠᱷᱮᱞ ᱟᱨᱵᱟᱝ ᱥᱤᱱᱢᱟ ᱧᱮᱞ, ᱥᱤᱱᱢᱟ ᱥᱮᱨᱮᱧ ᱟᱸᱡᱚᱢ ᱟ.ᱰᱤᱜᱟᱱ ᱨᱮ ᱩᱱᱠᱩ ᱱᱚᱝᱠᱟ ᱠᱚ ᱞᱟᱵᱟᱫᱷᱤᱭᱟ.ᱣ ᱠᱚᱜᱼᱟ ᱫᱚ ᱢᱩᱪᱟ.ᱫ ᱨᱮ ᱡᱤᱛᱠᱟ.ᱨ ᱦᱚᱨ ᱠᱷᱚᱱ ᱟ.ᱰᱤ ᱠᱟ ᱥᱟᱺᱜᱤᱧᱚᱜᱼᱟ ᱾ ᱚᱱᱟᱛᱮ ᱟᱭᱳ ᱵᱟᱵᱟ ᱟᱨᱵᱟᱝ ᱚᱲᱟᱜ ᱦᱚᱲ ᱫᱚ ᱠᱟᱺᱦᱤᱥ ᱠᱟᱛᱮ ᱧᱮᱱᱮᱞᱚᱢ ᱫᱚ ᱵᱟᱝ ᱞᱟ.ᱠᱛᱤ ᱟᱨᱵᱟᱝ ᱵᱟ.ᱲᱤᱡ ᱜᱮᱭᱟ ᱢᱮᱱᱛᱮ ᱠᱚ ᱨᱚᱲ ᱥᱚᱫᱚᱨ ᱜᱚᱫ ᱠᱟᱜᱼᱟ ᱾ ᱟ.ᱰᱤᱜᱟᱰ ᱴᱚᱴᱷᱟ ᱨᱮᱭᱟᱜ ᱯᱩᱨᱠᱩᱛ ᱧᱮᱢᱮᱧ ᱧᱮᱞ, ᱫᱤᱥᱚᱢ ᱢᱩᱠᱷᱤᱭᱟ. ᱠᱚ ᱧᱮᱞ ᱟᱨᱵᱟᱝ ᱩᱱᱠᱩᱣᱟᱜ ᱜᱟᱞᱚᱪ ᱟᱸᱡᱚᱢ, ᱥᱚᱨᱠᱟᱨᱟᱜ ᱠᱟ.ᱢᱤᱦᱚᱨᱟ ᱨᱮᱭᱟᱜ ᱨᱩᱯ ᱢᱚᱦᱚᱨ ᱵᱟᱰᱟᱭ ᱡᱚᱝ, ᱱᱟᱶᱟᱼᱱᱟᱶᱟ ᱥᱟᱬᱮᱥᱤᱭᱟ. ᱰᱟᱦᱟᱨ ᱥᱮᱪᱮᱫᱚᱜ, ᱱᱚᱝᱠᱟ ᱜᱮ ᱟ.ᱰᱤ ᱞᱮᱠᱟᱱ ᱞᱟᱵᱽ ᱛᱩᱞᱟ.ᱡᱚᱠᱷᱟᱨᱮ ᱱᱚᱣᱟ ᱱᱟᱥᱮ ᱫᱷᱟᱨᱟ ᱜᱷᱚᱴᱚᱱ ᱦᱩᱭᱩᱜ ᱠᱟᱱ ᱦᱟ.ᱱ ᱫᱚ ᱪᱮᱫ ᱦᱚᱸ ᱵᱟᱝ ᱠᱟᱱᱟ ᱾

ᱟᱵᱚ ᱫᱤᱥᱚᱢ ᱟᱨ ᱮᱴᱟᱜ ᱫᱤᱥᱚᱢ ᱨᱮ ᱧᱮᱱᱮᱞᱚᱢ ᱨᱮᱭᱟᱜ ᱵᱮᱵᱚᱥᱛᱟ

ᱮᱴᱟᱜ ᱮᱴᱟᱜ ᱫᱤᱥᱚᱢ ᱨᱮ ᱧᱮᱱᱮᱞᱚᱢ ᱨᱮᱭᱟᱜ ᱯᱟᱥᱱᱟᱣ ᱫᱚ ᱟ.ᱰᱤ ᱵᱟ.ᱲᱛᱤ ᱜᱮᱭᱟ ᱾ ᱯᱩᱨᱟ. ᱥᱮᱪᱮᱫ ᱠᱟ.ᱢᱤᱦᱚᱨᱟ, ᱯᱟ.ᱪᱷᱞᱟ. ᱫᱤᱥᱚᱢ ᱨᱮ ᱧᱮᱱᱮᱞᱚᱢ ᱦᱚᱛᱮᱛᱮ ᱜᱮ ᱦᱩᱭᱩᱜᱼᱟ ᱾ ᱢᱟᱪᱮᱛ ᱠᱚ ᱴᱷᱮᱱ ᱠᱷᱚᱱ ᱡᱟᱦᱟᱸ ᱛᱤᱱᱟ.ᱜ ᱠᱚ ᱟᱸᱡᱚᱢ ᱠᱟᱛᱮ ᱪᱮᱛᱮᱫᱤᱭᱟ. ᱠᱚᱣᱟᱜ ᱡᱟᱦᱟᱸ ᱩᱭᱦᱟ.ᱨ ᱛᱟᱦᱮᱸᱱᱟ, ᱧᱮᱱᱮᱞᱚᱢ ᱨᱮ ᱧᱮᱞ ᱟᱨ ᱟᱸᱡᱚᱢ ᱦᱚᱛᱮᱛᱮ ᱱᱚᱣᱟ ᱟᱨ ᱦᱚᱸ ᱵᱟ.ᱱᱛᱤ ᱢᱚᱱᱮ ᱛᱟᱦᱮᱸᱱᱟ ᱟᱨ ᱪᱮᱛᱮᱫᱤᱭᱟ. ᱠᱚᱣᱟᱜ ᱨᱟ.ᱥᱠᱟ. ᱟᱨ ᱦᱚᱸ ᱵᱟ.ᱲᱛᱤᱜᱼᱟ ᱾

ᱟᱨ ᱦᱚᱸ ᱧᱮᱞ ᱢᱮ

https://en.m.wikipedia.org/wiki/List_of_countries_by_number_of_television_broadcast_stations

https://en.m.wikipedia.org/wiki/List_of_television_manufacturers

https://en.m.wikipedia.org/wiki/List_of_years_in_television

https://en.m.wikipedia.org/wiki/Sign_language_on_television

ᱥᱟ.ᱠᱷᱭᱟ.ᱛ

https://books.google.com/books?id=7c0ycySng4YC&pg=PA53&lpg=PA53

http://www.tvtechnology.com/opinions/0087/the-state-of-television-worldwide/222681 Archived ᱒᱐᱑᱕-᱐᱔-᱒᱘ at the Wayback Machine.

http://www.cepro.com/article/mitsubishi_drops_dlp_displays_goodbye_rptvs_forever/ Archived ᱒᱐᱑᱕-᱐᱓-᱒᱖ at the Wayback Machine.

http://www.cepro.com/article/mitsubishi_drops_dlp_displays_goodbye_rptvs_forever/ Archived ᱒᱐᱑᱕-᱐᱓-᱒᱖ at the Wayback Machine.

http://www.tomsguide.com/us/lg-end-plasma-tvs,news-19840.html

http://www.oled-info.com/lg-electronics-expects-oled-tv-market-gradually-replace-led-tv-market

https://www.theverge.com/2015/1/5/7497383/sony-new-smart-tv-run-android-tv-ces-2015

ᱵᱟᱦᱨᱮ ᱡᱚᱱᱚᱲ

http://www.nab.org/television/

http://www.acte.be/

https://en.m.wikipedia.org/wiki/Museum_of_Broadcast_Communications

http://www.tvhistory.tv/

https://en.m.wikipedia.org/wiki/Canada_Science_and_Technology_Museum

https://en.m.wikipedia.org/wiki/Canada_Science_and_Technology_Museum

https://web.archive.org/web/20130718174822/http://www.nhk.or.jp/strl/aboutstrl/evolution-of-tv-en/index-e.html