ᱨᱚᱵᱤᱞᱟᱞ ᱴᱩᱰᱩ
ᱨᱚᱵᱤᱞᱟᱞ ᱴᱩᱰᱩ ᱥᱟᱱᱛᱟᱲᱤ ᱯᱟᱹᱨᱥᱤ ᱨᱤᱱᱤᱡ ᱥᱤᱧᱚᱛᱤᱭᱟᱹ ᱚᱱᱚᱞᱤᱭᱟᱹ ᱟᱨ ᱯᱚᱪᱷᱤᱢ ᱵᱟᱸᱜᱽᱞᱟ ᱨᱤᱱᱤᱡ ᱥᱮᱱᱴᱨᱟᱞ ᱵᱮᱝᱠ ᱚᱯᱷ ᱤᱱᱰᱤᱭᱟ ᱨᱮᱱ ᱢᱟᱨᱮᱱ ᱜᱚᱲᱚ ᱪᱟᱪᱞᱟᱣ ᱤᱡ ᱞᱮᱠᱟᱛᱮ ᱠᱟᱹᱢᱤ ᱠᱟᱱ ᱛᱟᱦᱮᱸ ᱱᱤᱛ ᱫᱚᱭ ᱡᱤᱨᱟᱹᱣ ᱟᱠᱟᱱᱟ ᱾ ᱩᱱᱤᱫᱚ ᱒᱐᱑᱕ ᱨᱮ ᱟᱡᱟᱜ ᱯᱟᱹᱨᱥᱤ ᱠᱷᱟᱹᱛᱤᱨ ᱜᱟᱭᱟᱱ ᱞᱟᱹᱜᱤᱫ ᱥᱟᱶᱦᱮᱫ ᱮᱠᱟᱰᱮᱢᱤ ᱥᱤᱨᱯᱷᱟᱹ ᱡᱤᱛᱠᱟᱹᱨ ᱟᱠᱟᱫᱼᱟ᱾
| ᱨᱚᱵᱤᱞᱟᱞ ᱴᱩᱰᱩ | |
|---|---|
 ᱨᱚᱵᱤᱞᱟᱞ ᱴᱩᱰᱩ ᱟᱡᱟᱜ ᱯᱟᱹᱨᱥᱤ ᱠᱷᱟᱹᱛᱤᱨ ᱯᱩᱛᱷᱤ ᱠᱷᱚᱱ | |
| ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ ᱟᱨ ᱡᱟᱱᱟᱢ ᱴᱷᱟᱶ | ᱒᱑ ᱰᱤᱥᱮᱢᱵᱚᱨ ᱑᱙᱔᱙ ᱱᱳᱣᱟᱲᱟ, ᱵᱳᱦᱟᱨᱠᱩᱞᱤ, ᱠᱟᱞᱱᱟ, ᱵᱚᱨᱫᱷᱚᱢᱟᱱ, ᱯᱚᱪᱷᱤᱢ ᱵᱟᱸᱜᱽᱞᱟ, ᱥᱤᱧᱚᱛ |
| ᱫᱤᱥᱚᱢᱤᱭᱟᱹ | ᱥᱤᱧᱚᱛᱤᱭᱟᱹ |
| ᱠᱟᱹᱢᱤ | ᱚᱱᱚᱞᱤᱭᱟᱹ, ᱵᱮᱝᱠ ᱪᱟᱪᱞᱟᱣᱤᱡ |
ᱮᱛᱚᱦᱚᱵ ᱡᱤᱭᱚᱱ ᱥᱟᱯᱲᱟᱣ
ᱴᱩᱰᱩ ᱟᱜ ᱡᱟᱱᱟᱢ ᱫᱚ ᱒᱑ ᱰᱤᱥᱮᱢᱵᱚᱨ ᱑᱙᱔᱙ ᱨᱮ ᱯᱚᱪᱷᱤᱢ ᱵᱟᱸᱜᱽᱞᱟ ᱯᱚᱱᱚᱛ ᱵᱚᱨᱫᱷᱚᱢᱟᱱ ᱦᱚᱱᱚᱛ ᱨᱮᱱᱟᱜ ᱠᱟᱞᱱᱟ ᱛᱷᱟᱱᱟ ᱨᱮᱭᱟᱜ ᱵᱳᱦᱟᱨᱠᱩᱞᱤ ᱰᱟᱠ ᱚᱲᱟᱜ ᱨᱮᱭᱟᱜ ᱱᱳᱣᱟᱲᱟ ᱟᱹᱛᱩ ᱨᱮ ᱦᱩᱭ ᱞᱮᱱᱟ ᱛᱟᱦᱮᱸᱫ᱾[᱑] ᱟᱯᱟᱛ ᱧᱩᱛᱩᱢ ᱫᱚ ᱨᱟᱢᱮᱥᱥᱚᱨ ᱴᱩᱰᱩ ᱟᱨ ᱟᱭᱳ ᱫᱚ ᱵᱟᱥᱚᱱᱤ ᱴᱩᱰᱩ᱾
ᱚᱞᱚᱜ ᱯᱟᱲᱦᱟᱜ ᱥᱟᱯᱲᱟᱣ
ᱨᱚᱵᱤᱞᱟᱞ ᱟᱜ ᱚᱞᱚᱜ ᱯᱟᱲᱦᱟᱜ ᱫᱚ ᱟᱹᱛᱩ ᱤᱥᱠᱩᱞ ᱠᱷᱚᱱ ᱜᱮ ᱮᱦᱚᱵ ᱞᱮᱱᱟ᱾ ᱛᱟᱭᱚᱢ ᱛᱮ ᱵᱟᱫᱞᱟ ᱦᱟᱭ ᱤᱥᱠᱩᱞ ᱨᱮᱠᱚ ᱵᱷᱩᱨᱛᱤ ᱞᱮᱫᱮᱭᱟ᱾ ᱱᱚᱸᱰᱮ ᱠᱷᱚᱱ ᱜᱮ ᱩᱱᱤ ᱫᱚ ᱑᱙᱖᱙ ᱥᱮᱨᱢᱟ ᱨᱮ ᱥᱟᱬᱮᱥ ᱥᱟᱛᱟᱢ ᱨᱮ ᱦᱟᱭᱟᱨ ᱥᱮᱠᱮᱱᱰᱟᱨᱤ ᱮ ᱯᱟᱥ ᱞᱮᱫᱟ᱾ ᱥᱟᱬᱮᱥ ᱨᱮ ᱞᱟᱥᱮᱨ ᱦᱟᱛᱟᱝ ᱯᱟᱹᱴᱷᱩᱣᱟᱹ ᱨᱚᱵᱤᱞᱟᱞ ᱫᱚ ᱑᱙᱗᱒ ᱥᱮᱨᱢᱟ ᱨᱮ ᱠᱟᱞᱱᱟ ᱠᱚᱞᱮᱡᱽ ᱠᱷᱚᱱ ᱵᱤ.ᱮᱥᱥᱤ ᱮ ᱯᱟᱥ ᱞᱮᱫᱟ᱾ ᱚᱱᱟ ᱛᱟᱭᱚᱢ ᱟᱫᱚ ᱵᱟᱭ ᱯᱟᱲᱦᱟᱣ ᱫᱟᱲᱮ ᱟᱠᱟᱱᱟ᱾
ᱠᱟᱹᱢᱤ ᱡᱤᱭᱚᱱ ᱥᱟᱯᱲᱟᱣ
ᱯᱚᱪᱷᱤᱢ ᱵᱟᱝᱞᱟ ᱨᱮᱱ ᱮᱠᱟᱭᱩᱱᱴᱮᱱᱴ ᱡᱮᱱᱟᱨᱮᱞ ᱞᱮᱠᱟᱛᱮ ᱠᱟᱹᱢᱤ ᱡᱤᱭᱚᱱ ᱮᱦᱚᱵ ᱞᱮᱱ ᱛᱟᱭᱟ᱾ ᱛᱟᱭᱚᱢ ᱛᱮ ᱚᱱᱟ ᱠᱟᱹᱢᱤ ᱵᱟᱹᱜᱤ ᱠᱟᱛᱮ ᱵᱮᱝᱠ ᱠᱟᱹᱢᱤ ᱨᱮᱭ ᱵᱚᱞᱚ ᱮᱱᱟ᱾ ᱠᱟᱹᱢᱤ ᱤᱭᱟᱹ ᱛᱮᱜᱮ ᱠᱚᱞᱠᱟᱛᱟ ᱥᱟᱶ ᱟᱹᱰᱤ ᱫᱤᱱ ᱨᱮᱭᱟᱜ ᱥᱟᱹᱜᱟᱹᱭ ᱢᱮᱱᱟᱜ ᱛᱟᱭᱟ᱾ ᱱᱚᱣᱟ ᱥᱟᱹᱜᱟᱹᱭ ᱜᱮ ᱟᱡᱟᱜ ᱥᱟᱶᱦᱮᱫ ᱪᱟᱨᱪᱟ ᱨᱮ ᱩᱥᱠᱩᱨ ᱨᱮᱭᱟᱜ ᱮ ᱠᱟᱹᱢᱤ ᱟᱠᱟᱫᱟ᱾ ᱛᱟᱭᱚᱢ ᱛᱮ ᱩᱪᱟᱹᱲ ᱠᱟᱛᱮ ᱵᱚᱨᱫᱷᱚᱢᱟᱱ ᱨᱮᱭ ᱦᱮᱡ ᱮᱱᱟ᱾
ᱥᱟᱶᱦᱮᱫ ᱪᱟᱨᱪᱟ ᱥᱟᱯᱲᱟᱣ
ᱵᱟᱫᱞᱟ ᱤᱥᱠᱩᱞ ᱨᱮ ᱯᱟᱲᱦᱟᱜ ᱚᱠᱛᱮ ᱠᱷᱚᱱ ᱜᱮ ᱥᱟᱶᱦᱮᱫ ᱪᱟᱨᱪᱟ ᱫᱚᱭ ᱮᱦᱚᱵ ᱞᱮᱫᱟ᱾ ᱵᱟᱰᱟᱭᱚᱜᱼᱟ ᱵᱤᱨᱫᱟᱹᱜᱟᱲ ᱨᱮᱭᱟᱜ ᱢᱮᱜᱟᱡᱤᱱ ᱨᱮ ᱟᱡᱟᱜ ᱵᱟᱝᱞᱟ ᱠᱟᱹᱦᱱᱤ ᱪᱷᱟᱯᱟ ᱞᱮᱱᱟ᱾ ᱟᱡᱟᱜ ᱥᱟᱶᱦᱮᱫ ᱫᱩᱞᱟᱹᱲ ᱫᱚ ᱵᱟᱹᱭᱻᱵᱟᱹᱭ ᱛᱮ ᱥᱟᱱᱛᱟᱞᱤ ᱯᱟᱹᱨᱥᱤ ᱨᱮ ᱩᱪᱟᱹᱲ ᱦᱮᱡ ᱮᱱᱟ᱾ ᱥᱟᱶᱦᱮᱫ ᱨᱮᱭᱟᱜ ᱜᱟᱭᱟᱱ ᱦᱟᱹᱴᱤᱧ ᱜᱮᱭ ᱵᱟᱪᱷᱟᱣ ᱞᱮᱫᱟ᱾ ᱪᱟᱞᱟᱣ ᱦᱤᱡᱩᱜ ᱠᱟᱱ ᱜᱟᱭᱟᱱ ᱚᱞ ᱦᱚᱨᱟ ᱠᱷᱚᱱ ᱥᱟᱦᱟ ᱠᱟᱛᱮ ᱵᱷᱮᱜᱟᱨ ᱫᱷᱟᱨᱟ ᱛᱮ ᱜᱟᱭᱟᱱ ᱚᱞ ᱮ ᱫᱷᱩᱨᱟᱹᱣ ᱮᱱᱟ᱾ ᱛᱟᱭᱚᱢ ᱛᱮ ᱟᱭᱢᱟ ᱜᱟᱭᱟᱱ, ᱢᱤᱫ ᱠᱤᱛᱟᱹ ᱜᱟᱭᱟᱱ, ᱨᱮᱰᱤᱭᱳ ᱜᱟᱭᱟᱱ ᱮ ᱚᱞ ᱟᱠᱟᱫᱟ᱾ ᱟᱡᱟᱜ ᱡᱟᱹᱥᱛᱤ ᱜᱟᱱ ᱜᱟᱭᱟᱱ ᱜᱮ ᱵᱚᱨᱫᱷᱚᱢᱟᱱ ᱨᱮᱭᱟᱜ ᱡᱤᱭᱟᱹᱲ ᱡᱷᱟᱨᱱᱟ ᱜᱟᱭᱟᱱ ᱜᱟᱶᱛᱟ ᱦᱚᱛᱮᱛᱮ ᱩᱫᱩᱜ ᱟᱠᱟᱱᱟ᱾
ᱥᱟᱱᱛᱟᱞ ᱥᱟᱶᱛᱟ ᱨᱮᱭᱟᱜ ᱱᱟᱱᱟᱼᱦᱩᱱᱟᱹᱨ ᱮᱴᱠᱮᱴᱚᱬᱮ, ᱥᱟᱱᱛᱟᱞ ᱠᱚᱣᱟᱜ ᱫᱟᱹᱵᱤ, ᱵᱤᱨᱩᱫᱽ ᱮᱢᱟᱱ ᱠᱚ ᱜᱟᱭᱟᱱ ᱨᱮ ᱥᱟᱵ ᱨᱟᱠᱟᱵ ᱛᱟᱞᱟ ᱛᱮ ᱥᱟᱱᱛᱟᱞ ᱠᱚ ᱪᱮᱸᱜᱷᱟᱣ ᱨᱮᱭᱟᱜ ᱮ ᱠᱩᱨᱩᱢᱩᱴᱩ ᱟᱠᱟᱫᱟ᱾ ᱥᱟᱱᱛᱟᱞ ᱥᱟᱶᱛᱮ ᱨᱮ ᱵᱮᱼᱥᱤᱠᱷᱱᱟᱹᱛ, ᱡᱤᱭᱚᱱ ᱨᱮᱭᱟᱜ ᱡᱟᱞᱟ ᱠᱚᱸᱭ ᱡᱷᱟᱞᱠᱟᱣ ᱨᱟᱠᱟᱵ ᱟᱠᱟᱫᱟ᱾ ᱟᱨᱦᱚᱸ ᱥᱚᱞᱦᱮ ᱨᱮᱭᱟᱜ ᱦᱚᱨ ᱰᱟᱦᱟᱨ ᱦᱚᱸᱭ ᱩᱫᱩᱜ ᱟᱠᱟᱫᱟ᱾ ᱨᱟᱡᱽᱟᱹᱨᱤ, ᱱᱟᱜᱟᱢ ᱟᱨ ᱫᱩᱞᱟᱹᱲᱼᱫᱩᱯᱩᱞᱟᱹᱲ ᱜᱟᱭᱟᱱ ᱛᱟᱞᱟ ᱛᱮ ᱦᱚᱸ ᱦᱚᱲ ᱠᱚᱸᱭ ᱢᱩᱦᱤᱛ ᱟᱠᱟᱫ ᱠᱚᱣᱟ᱾
ᱜᱟᱭᱟᱱ ᱪᱷᱟᱰᱟ ᱠᱟᱛᱮ ᱚᱱᱚᱞ ᱚᱞ ᱨᱮᱦᱚᱸ ᱯᱟᱹᱨᱩᱠᱷᱤᱭᱟᱹ ᱮ ᱛᱟᱦᱮᱸ ᱠᱟᱱᱟ᱾ ᱟᱡᱟᱜ ᱚᱞ ᱠᱚ ᱛᱮᱛᱨᱮ, ᱯᱚᱪᱷᱤᱢ ᱵᱟᱝᱞᱟ, ᱠᱩᱦᱩ, ᱥᱤᱸᱜᱟᱹᱨ ᱥᱟᱠᱣᱟ, ᱵᱤᱸᱫᱤ ᱥᱩᱛᱟᱹᱢ ᱮᱢᱟᱱ ᱯᱟᱛᱷᱟᱢ ᱠᱚᱨᱮ ᱪᱷᱟᱯᱟ ᱟᱠᱟᱱᱟ᱾
ᱚᱞ ᱠᱚ ᱥᱟᱯᱲᱟᱣ
- ᱜᱟᱭᱟᱱ
- ᱥᱚᱢᱟᱡᱽ ᱵᱟᱹᱭᱨᱤ - ᱑᱙᱗᱔
- ᱥᱟᱹᱨᱫᱤ ᱥᱮᱸᱜᱮᱞ - ᱑᱙᱗᱕
- ᱢᱩᱨᱩᱠᱷ ᱡᱟᱞᱟ - ᱑᱙᱗᱖
- ᱫᱩᱞᱟᱹᱲ ᱵᱟᱹᱱᱩᱜ - ᱑᱙᱗᱗
- ᱠᱟᱺᱦᱤᱥ - ᱑᱙᱗᱘
- ᱵᱤᱨ ᱵᱤᱨᱥᱟᱹ - ᱑᱙᱗᱘
- ᱧᱩᱛᱟᱹᱛ ᱥᱟᱶᱛᱟ - ᱑᱙᱗᱙
- ᱯᱟᱹᱨᱥᱤ ᱠᱷᱟᱹᱛᱤᱨ - ᱒᱐᱑᱑
- ᱨᱮᱰᱤᱭᱳ ᱜᱟᱭᱟᱱ
- ᱥᱚᱢᱵᱟᱹᱨᱤ - ᱑᱙᱗᱗ ᱥᱮᱨᱢᱟ ᱨᱮᱭᱟᱜ ᱑᱖ ᱨᱮ ᱩᱪᱷᱟᱹᱱ ᱞᱮᱱᱟ᱾
- ᱠᱩᱠᱢᱩ - ᱑᱙᱖᱘ ᱥᱮᱨᱢᱟ ᱨᱮᱭᱟᱜ ᱑᱗ ᱥᱮᱯᱴᱮᱢᱵᱚᱨ ᱨᱮ ᱩᱪᱷᱟᱹᱱ ᱞᱮᱱᱟ᱾
- ᱫᱩᱞᱟᱹᱲ - ᱑᱙᱘᱒ ᱥᱮᱨᱢᱟ ᱨᱮᱭᱟᱜ ᱒᱓ ᱡᱟᱱᱩᱣᱟᱨᱤ ᱨᱮ ᱩᱪᱷᱟᱹᱱ ᱞᱮᱱᱟ᱾
- ᱨᱩᱛᱩᱡ ᱢᱩᱨᱞᱤ - ᱑᱙᱘᱓ ᱥᱮᱨᱢᱟ ᱨᱮᱭᱟᱜ ᱒᱖ ᱯᱷᱮᱵᱽᱨᱩᱣᱟᱨᱤ ᱨᱮ ᱩᱪᱷᱟᱹᱱ ᱞᱮᱱᱟ᱾
ᱮᱴᱟᱜ ᱠᱟᱹᱢᱤ ᱠᱚ ᱥᱟᱯᱲᱟᱣ
ᱜᱟᱭᱟᱱ ᱚᱞ ᱥᱟᱶᱛᱮ ᱨᱚᱵᱤᱞᱟᱞ ᱴᱩᱰᱩ ᱫᱚ ᱚᱞ ᱪᱤᱠᱤ ᱟᱸᱫᱳᱲ ᱨᱮᱦᱚᱸ ᱜᱟᱹᱦᱤᱨ ᱛᱮ ᱡᱚᱯᱲᱟᱣ ᱮ ᱛᱟᱦᱮᱸ ᱠᱟᱱᱟ᱾
ᱟᱡᱟᱜ ᱯᱟᱹᱨᱥᱤ ᱠᱷᱟᱹᱛᱤᱨ ᱜᱟᱭᱟᱱ ᱤᱫᱤ ᱠᱟᱛᱮ ᱵᱷᱤᱰᱤᱭᱳ ᱯᱷᱞᱤᱢ ᱦᱚᱸᱭ ᱵᱮᱱᱟᱣ ᱟᱠᱟᱫᱟ᱾
ᱢᱟᱹᱱ ᱟᱨ ᱥᱤᱨᱯᱷᱟᱹ ᱥᱟᱯᱲᱟᱣ
- ᱑᱙᱘᱔ ᱥᱮᱨᱢᱟ ᱨᱮ ᱵᱤᱨ ᱵᱤᱨᱥᱟᱹ ᱜᱟᱭᱟᱱ ᱞᱟᱹᱜᱤᱫ ᱡᱟᱢᱥᱮᱫᱽᱯᱩᱨ ᱨᱮᱱᱟᱜ ᱥᱟᱨᱡᱚᱢ ᱫᱟᱜ ᱵᱤᱨᱥᱟᱹ ᱢᱮᱢᱳᱨᱤᱭᱟᱞ ᱥᱳᱥᱟᱭᱴᱤ ᱠᱷᱚᱱ ᱯᱚᱸᱰᱤᱛ ᱨᱚᱹᱜᱷᱩᱱᱟᱛᱷ ᱢᱩᱨᱢᱩ ᱩᱱᱩᱭᱦᱟᱹᱨ ᱥᱤᱨᱯᱷᱟᱹ᱾
- ᱒᱐᱐᱒ ᱥᱮᱨᱢᱟ ᱨᱮ ᱥᱟᱱᱛᱟᱲᱤ ᱜᱟᱭᱟᱱ ᱨᱮ ᱮᱱᱮᱢ ᱮᱢ ᱞᱟᱹᱜᱤᱫ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ (ᱟᱭᱥᱣᱟ) ᱠᱷᱚᱱ ᱥᱤᱨᱯᱷᱟᱹ ᱪᱟᱞ᱾
- ᱒᱐᱑᱕ ᱥᱮᱨᱢᱟ ᱨᱮ ᱯᱟᱹᱨᱥᱤ ᱠᱷᱟᱹᱛᱤᱨ ᱜᱟᱭᱟᱱ ᱞᱟᱹᱜᱤᱫ ᱵᱷᱟᱨᱚᱛ ᱥᱚᱨᱠᱟᱨ ᱟᱜ ᱥᱟᱶᱦᱮᱫ ᱮᱠᱟᱰᱮᱢᱤ ᱠᱷᱚᱱ ᱢᱟᱹᱱ ᱟᱨ ᱥᱤᱨᱯᱷᱟᱹ ᱪᱟᱞ ᱟᱫᱮᱭᱟ ᱠᱚ ᱛᱟᱦᱮᱸᱫ᱾[᱒][᱓][᱔]
ᱥᱟᱹᱠᱷᱭᱟᱹᱛ ᱥᱟᱯᱲᱟᱣ
- ↑ "A reader's guide to the 24 books that have won the Sahitya Akademi awards". Scroll.in. 21 February 2016. Retrieved 27 November 2019.
- ↑ "AKADEMI AWARDS (1955-2018)". Sahitya Akademi. Retrieved 20 November 2019.
- ↑ "Cyrus Mistry, Ramdarash Mishra among Sahitya Akademi award winners". Business Standard. 17 December 2015. Retrieved 28 November 2019.
- ↑ "Tirumalesh, Mistry among Akademi award winners". Deccan Herald. 18 December 2015. Retrieved 28 November 2019.