ᱮᱱᱮᱡ
ᱮᱱᱮᱡ
ᱮᱱᱮᱡ ᱦᱚᱸ ᱢᱟᱹᱱᱢᱤᱭᱟᱜ ᱵᱷᱟᱵᱽᱱᱟ, ᱵᱮᱵᱷᱟᱨ ᱨᱮᱭᱟᱜ ᱢᱤᱫ ᱞᱮᱠᱟᱱ ᱩᱫᱩᱜ ᱥᱚᱫᱚᱨ ᱠᱟᱱᱟ ᱾ ᱱᱚᱣᱟ ᱦᱚᱸ ᱢᱤᱫ ᱞᱮᱠᱟᱱ ᱵᱟᱰᱚᱦᱤ ᱠᱟᱱᱟ, ᱡᱟᱦᱟᱸ ᱨᱮᱭᱟᱜ ᱥᱤᱨᱡᱚᱱ ᱢᱟᱹᱱᱢᱤ ᱡᱤᱭᱚᱱ ᱥᱟᱶ ᱜᱮ ᱦᱩᱭ ᱛᱟᱨᱟ ᱟᱠᱟᱱᱟ ᱾ ᱵᱟᱞᱚᱠ ᱡᱟᱱᱟᱢ ᱥᱟᱶᱛᱮ ᱨᱟᱜ ᱟᱛᱮ ᱟᱡᱟᱜ ᱛᱤ ᱡᱟᱸᱜᱟ ᱦᱤᱞᱟᱹᱣ ᱯᱷᱟᱸᱫᱟ ᱟᱛᱮ ᱱᱚᱣᱟᱭ ᱥᱚᱫᱚᱨ ᱟ ᱡᱮ ᱩᱱᱤ ᱫᱚ ᱨᱮᱸᱜᱮᱡ ᱟᱠᱟ ᱫᱮᱭᱟ ᱾ ᱱᱚᱣᱟ ᱦᱚᱲᱢᱚ ᱨᱮᱭᱟᱜ ᱦᱤᱞᱟᱹᱸ ᱞᱟᱲᱟᱣᱱᱟ ᱠᱷᱚᱱ ᱜᱮ ᱮᱱᱮᱡ ᱨᱮᱭᱟᱜ ᱜᱚᱲᱦᱚᱱ ᱫᱚ ᱦᱩᱭ ᱟᱠᱟᱱᱟ ᱾ ᱱᱚᱣᱟ ᱵᱟᱰᱚᱦᱤ ᱫᱚ ᱵᱚᱸᱜᱟ ᱵᱳᱨᱳ, ᱢᱟᱹᱱᱢᱤ ᱫᱟᱹᱱᱢᱤ ᱟᱨ ᱡᱤᱵᱽ ᱡᱟᱱᱣᱟ ᱠᱚᱦᱚᱸ ᱟᱹᱰᱤ ᱠᱚ ᱠᱩᱥᱤᱭᱟᱜᱼᱟ ᱾ ᱵᱷᱟᱨᱚᱛᱤᱭᱟᱹ ᱫᱷᱚᱨᱚᱢ ᱯᱩᱛᱷᱤ ᱨᱮᱫᱚ ᱮᱱᱮᱡ ᱫᱚ ᱵᱟᱹᱲᱤᱡ ᱱᱟᱥ ᱟᱨ ᱵᱚᱸᱜᱟ ᱵᱳᱨᱳ ᱥᱟᱶ ᱧᱟᱯᱟᱢ ᱨᱮᱭᱟᱜ ᱢᱤᱫ ᱰᱟᱦᱟᱨ ᱢᱮᱱᱛᱮ ᱢᱟᱱᱟᱣ ᱵᱟᱛᱟᱣ ᱢᱮᱱᱟᱜᱼᱟ ᱾ ᱚᱢᱨᱩᱛ ᱢᱚᱱᱛᱷᱚᱱ ᱠᱮᱫ ᱛᱟᱭᱚᱢ ᱛᱤᱱ ᱡᱚᱦᱚᱜ ᱵᱟᱹᱲᱤᱡ ᱨᱟᱠᱟᱥ ᱠᱚ ᱡᱤᱭᱟᱹᱛ ᱧᱟᱢ ᱨᱮᱭᱟᱜ ᱮᱴᱠᱮᱴᱚᱬᱮ ᱡᱟᱱᱟᱢ ᱮᱱᱟ, ᱩᱱ ᱡᱚᱦᱚᱜ ᱵᱷᱚᱜᱚᱵᱟᱱ ᱵᱤᱥᱱᱩ ᱢᱳᱦᱤᱱᱤ ᱭᱟᱜ ᱨᱩᱯ ᱦᱟᱛᱟᱣ ᱠᱟᱛᱮ ᱟᱡᱟᱜ ᱮᱱᱮᱡ ᱦᱚᱛᱮᱛᱮ ᱯᱮ ᱯᱩᱨᱤ ᱨᱟᱠᱟᱥ ᱴᱷᱮᱱ ᱠᱷᱚᱱ ᱮ ᱫᱩᱜ ᱵᱟᱧᱪᱟᱣ ᱞᱮᱜᱼᱟ ᱾
ᱞᱮᱠᱟᱱ ᱞᱮᱠᱟᱱ ᱵᱷᱟᱨᱚᱛᱤᱭᱟᱹ ᱮᱱᱮᱡ
ᱥᱟᱯᱲᱟᱣᱵᱷᱟᱨᱚᱛᱤᱭᱟᱹ ᱮᱱᱮᱡ ᱦᱚᱸ ᱩᱱᱟᱹᱜ ᱜᱮ ᱞᱟᱮᱠᱟᱰ ᱞᱮᱠᱟᱱᱟᱜ ᱢᱮᱱᱟᱜᱼᱟ, ᱡᱟᱦᱟᱸ ᱛᱤᱱᱟᱹᱜ ᱟᱵᱚᱣᱟᱜ ᱞᱟᱹᱭᱞᱟᱠᱪᱟᱨ ᱢᱮᱱᱟᱜᱼᱟ ᱾ ᱤᱠᱷᱟᱹᱱ ᱱᱚᱣᱟ ᱫᱚ ᱵᱟᱨ ᱵᱷᱟᱜᱽ ᱨᱮ ᱦᱟᱹᱴᱤᱧ ᱦᱩᱭ ᱫᱟᱲᱮᱭᱟᱜᱼᱟ ᱼᱼ ᱠᱞᱟᱥᱤᱠᱟᱞ ᱮᱱᱮᱡ (Classical dance) ᱟᱨ ᱯᱷᱚᱞᱠ ᱮᱱᱮᱡ (Folk dance) ᱾ ᱱᱟᱦᱟᱜ ᱫᱚ ᱵᱳᱞᱤᱣᱩᱰ ᱮᱱᱮᱡ ᱦᱚᱸ ᱟᱹᱰᱤ ᱞᱮᱠᱟᱱᱟᱜ ᱦᱚᱲ ᱟᱹᱰᱤ ᱡᱩᱨ ᱠᱚ ᱠᱩᱥᱤᱭᱟᱜ ᱠᱟᱱᱟ, ᱡᱟᱦᱟᱸ ᱫᱚ ᱯᱷᱤᱞᱤᱢ ᱨᱮ ᱵᱮᱵᱷᱟᱨᱚᱜ ᱠᱟᱱᱟ ᱾ ᱱᱚᱣᱟ ᱮᱱᱮᱡ ᱨᱮᱫᱚ ᱵᱷᱟᱨᱚᱛ ᱨᱮᱭᱟᱜ ᱡᱮᱛᱮ ᱞᱮᱠᱟᱱ ᱥᱟᱶᱛᱟᱨᱤ ᱮᱱᱮᱡ ᱠᱚ ᱨᱮᱭᱟᱜ ᱥᱮᱞᱮᱫ ᱢᱮᱥᱟ ᱨᱮᱭᱟᱜ ᱦᱚᱸ ᱡᱷᱚᱞᱚᱠ ᱧᱮᱞᱚᱜᱼᱟ ᱾ ᱡᱟᱦᱟᱸ ᱞᱮᱠᱟ ᱵᱷᱟᱨᱚᱛ ᱫᱤᱥᱚᱢ ᱨᱮ ᱱᱟᱥᱮ ᱥᱟᱺᱜᱤᱧ ᱴᱚᱴᱷᱟ ᱛᱟᱭᱚᱢ ᱠᱷᱟᱱ ᱜᱮ ᱫᱟᱜ ᱟᱨ ᱨᱚᱲ ᱟᱲᱟᱝ ᱦᱚᱸ ᱵᱚᱫᱚᱞᱚᱜᱼᱟ ᱚᱱᱠᱟ ᱜᱮ ᱮᱱᱮᱡ ᱨᱮᱭᱟᱜ ᱛᱚᱦᱚᱨ ᱦᱚᱸ ᱟᱹᱰᱤ ᱞᱮᱠᱟᱱᱟ ᱾ ᱢᱩᱬ ᱞᱮᱠᱟᱛᱮ ᱵᱷᱟᱨᱚᱛᱤᱭᱟᱹ ᱥᱟᱶᱛᱟᱨᱤ ᱮᱱᱮᱡ ᱼᱼᱼ
● ᱠᱚᱛᱷᱚᱠ
● ᱳᱰᱤᱥᱤ
● ᱵᱷᱟᱨᱚᱛᱱᱟᱴᱭᱚᱢ
● ᱠᱩᱪᱤᱯᱩᱰᱤ
● ᱢᱚᱬᱤᱯᱩᱨᱤ ᱟᱨ
● ᱠᱚᱛᱷᱠᱚᱞᱤ ᱾
ᱥᱟᱱᱛᱟᱲ ᱥᱟᱶᱛᱟ ᱨᱮ ᱮᱱᱮᱡ
ᱥᱟᱯᱲᱟᱣᱵᱷᱟᱨᱚᱛ ᱫᱤᱥᱚᱢ ᱨᱮ ᱡᱟᱦᱟᱸ ᱛᱤᱱᱟᱹᱜ ᱮᱱᱮᱡ ᱢᱮᱱᱟᱜᱼᱟ ᱥᱟᱱᱛᱟᱲ ᱥᱟᱶᱛᱟ ᱨᱮ ᱚᱱᱟ ᱠᱷᱚᱱ ᱦᱚᱸ ᱵᱟᱹᱲᱛᱤ ᱜᱮ ᱮᱱᱮᱡ ᱫᱚ ᱯᱟᱞᱮ ᱢᱮᱱᱟᱜᱼᱟ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮ ᱮᱱᱮᱡ ᱫᱚ ᱟᱹᱰᱤ ᱢᱟᱨᱟᱝ ᱥᱚᱢᱯᱚᱛᱤ ᱠᱟᱱᱟ ᱾ ᱮᱱᱮᱡ ᱵᱟᱝᱠᱷᱟᱱ ᱯᱟᱨᱟᱵᱽ ᱯᱩᱱᱟᱹᱭ, ᱵᱚᱸᱜᱟ ᱵᱳᱨᱳ, ᱵᱟᱯᱞᱟ, ᱵᱷᱟᱸᱰᱟᱱ, ᱡᱟᱱᱟᱢ ᱪᱷᱟᱹᱴᱭᱟᱹᱨ, ᱡᱟᱛᱨᱟ ᱯᱟᱛᱟ ᱚᱯᱩᱨᱩᱱ ᱜᱮᱭᱟ ᱾ ᱚᱠᱛᱚ ᱡᱟᱹᱱᱤ, ᱴᱚᱴᱷᱟ ᱡᱟᱹᱱᱤ ᱮᱱᱮᱡ ᱨᱮᱭᱟᱜ ᱧᱩᱛᱩᱢ ᱟᱨ ᱮᱱᱮᱡ ᱛᱚᱦᱚᱨ ᱦᱚᱸ ᱵᱷᱮᱜᱟᱨ ᱵᱷᱮᱜᱟᱨ ᱜᱮᱭᱟ ᱾ ᱢᱤᱫᱴᱟᱹᱝ ᱮᱱᱮᱡ ᱫᱚ ᱜᱚᱴᱟ ᱯᱟᱲᱟ ᱫᱚ ᱵᱟᱝ ᱦᱩᱭᱩᱜᱼᱟ ᱾
ᱮᱱᱮᱡ ᱨᱮᱭᱟᱜ ᱧᱩᱛᱩᱢ ᱠᱚ
ᱥᱟᱯᱲᱟᱣᱥᱟᱱᱛᱟᱲ ᱥᱟᱶᱛᱟ ᱨᱮ ᱟᱹᱰᱤ ᱞᱮᱠᱟᱱ ᱮᱱᱮᱡ ᱢᱮᱱᱟᱜᱼᱟ ᱟᱨ ᱡᱚᱛᱚ ᱮᱱᱮᱡ ᱨᱮᱭᱟᱜ ᱧᱩᱛᱩᱢ ᱵᱷᱮᱜᱟᱨ ᱵᱷᱮᱜᱟᱨ ᱜᱮᱭᱟ ᱾ ᱮᱱᱮᱡ ᱨᱮᱭᱟᱜ ᱛᱤᱱᱟᱹᱝ ᱜᱟᱱ ᱧᱩᱛᱩᱢ ᱼᱼᱼ
● ᱫᱚᱝ ᱼ ᱪᱷᱟᱹᱴᱭᱟᱹᱨ ᱫᱚᱝ, ᱵᱟᱯᱞᱟ ᱫᱚᱝ, ᱵᱷᱟᱸᱰᱟᱱ ᱚᱠᱛᱚ ᱨᱮᱦᱚᱸ ᱫᱚᱝ ᱫᱚᱠᱚ ᱮᱱᱮᱡ ᱜᱮᱭᱟ ᱾ ᱫᱚᱝ ᱮᱱᱮᱡ ᱫᱚ ᱢᱤᱫ ᱦᱚᱲ ᱟᱨ ᱢᱤᱫ ᱦᱚᱲᱟᱜ ᱛᱤ ᱟᱨᱵᱟᱝ ᱛᱤᱛᱤ ᱥᱟᱯᱟᱵ ᱠᱟᱛᱮ ᱡᱟᱸᱜᱟ ᱠᱚᱞᱥᱟ ᱟᱛᱮ ᱠᱚ ᱮᱱᱮᱡᱼᱟ ᱾
● ᱞᱟᱜᱽᱬᱮ - ᱞᱟᱜᱽᱬᱮ ᱫᱚ ᱢᱤᱫᱴᱟᱹᱝ ᱱᱚᱝᱠᱟᱱ ᱮᱱᱮᱡ ᱠᱟᱱᱟ, ᱱᱚᱣᱟ ᱮᱱᱮᱡ ᱫᱚ ᱡᱟᱦᱟᱸ ᱛᱤᱱ ᱨᱮᱜᱮ ᱡᱟᱦᱟᱸ ᱴᱚᱴᱷᱟ ᱨᱮᱜᱮ ᱮᱱᱮᱡ ᱜᱟᱱᱚᱜᱼᱟ ᱾ ᱥᱮᱫᱟᱭ ᱦᱟᱯᱲᱟᱢ ᱠᱚᱫᱚ ᱱᱚᱣᱟ ᱱᱚᱣᱟ ᱮᱱᱮᱡ ᱫᱚ ᱠᱟᱹᱢᱤ ᱞᱟᱸᱜᱟ ᱨᱟᱲᱮᱡ ᱮᱱᱮᱡ ᱢᱮᱱᱛᱮ ᱦᱚᱸᱠᱚ ᱢᱮᱛᱟᱜ ᱠᱟᱱ ᱛᱟᱦᱮᱸᱫ ᱾ ᱥᱤᱸᱜᱟᱹᱲ ᱵᱮᱲᱟ ᱵᱟᱹᱲᱛᱤ ᱠᱚ ᱮᱱᱮᱡ ᱛᱟᱦᱮᱸᱫ ᱾ ᱚᱱᱟᱛᱮ ᱥᱤᱸᱜᱟᱹᱲ ᱞᱟᱜᱽᱬᱮ ᱮᱱᱮᱡ ᱢᱮᱱᱛᱮ ᱦᱚᱸ ᱠᱟᱛᱷᱟᱨᱮ ᱢᱮᱱᱟᱜᱼᱟ ᱾ ᱱᱚᱣᱟ ᱦᱚᱸ ᱥᱟᱯᱟᱵ ᱠᱟᱛᱮ ᱡᱟᱸᱜᱟ ᱠᱚᱞᱥᱟ ᱮᱱᱮᱡ ᱜᱮ ᱾ ᱱᱚᱣᱟ ᱫᱚ ᱵᱚᱸᱜᱟ ᱮᱱᱮᱡ ᱢᱮᱱᱛᱮ ᱦᱚᱸ ᱥᱟᱶᱛᱟ ᱨᱮ ᱢᱟᱱᱟᱣ ᱵᱟᱛᱟᱣ ᱢᱮᱱᱟᱜᱼᱟ ᱾ ᱱᱚᱣᱟ ᱮᱱᱮᱡ ᱡᱚᱦᱚᱜ ᱫᱚ ᱥᱮᱨᱢᱟ ᱠᱷᱚᱱ ᱵᱚᱸᱜᱟ ᱵᱳᱨᱳ ᱠᱚ ᱦᱚᱸ ᱫᱷᱟᱹᱨᱛᱤ ᱛᱮ ᱟᱬᱜᱚ ᱦᱮᱡ ᱠᱟᱛᱮ ᱢᱟᱹᱱᱢᱤ ᱥᱟᱶ ᱠᱚ ᱮᱱᱮᱡ ᱢᱤᱫᱟ ᱢᱮᱱᱛᱮ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱾ ᱚᱱᱟᱛᱮ ᱥᱮᱫᱟᱭ ᱫᱚ ᱞᱟᱜᱽᱬᱮ ᱮᱱᱮᱡ ᱛᱟᱭᱚᱢ ᱫᱚ ᱡᱷᱚᱢ ᱡᱷᱚᱢ ᱥᱮᱨᱢᱟ ᱡᱟᱹᱲᱤ ᱦᱚᱸᱭ ᱡᱟᱹᱲᱤ ᱛᱟᱦᱮᱸᱫ ᱾
● ᱵᱟᱦᱟ ᱮᱱᱮᱡ :- ᱵᱟᱦᱟ ᱫᱚ ᱥᱟᱱᱛᱟᱲ ᱠᱚᱣᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱵᱚᱸᱜᱟ ᱵᱳᱨᱳ ᱯᱟᱨᱟᱵᱽ ᱠᱟᱱᱟ ᱾ ᱟᱨ ᱱᱚᱣᱟ ᱫᱚ ᱡᱟᱦᱮᱨ ᱜᱟᱲ ᱨᱮ ᱵᱚᱸᱜᱟ ᱵᱳᱨᱳ ᱦᱩᱭᱩᱜᱼᱟ ᱾ ᱱᱚᱣᱟ ᱵᱚᱸᱜᱟ ᱡᱚᱦᱚᱜ ᱜᱮ ᱵᱟᱦᱟ ᱮᱱᱮᱡ ᱫᱚ ᱦᱩᱭᱩᱜᱼᱟ ᱾ ᱠᱩᱲᱤ ᱥᱩᱢᱩᱝ ᱜᱮᱠᱚ ᱮᱱᱮᱡᱼᱟ ᱟᱨ ᱠᱚᱲᱚ ᱦᱚᱯᱚᱱ ᱠᱚᱫᱚ ᱫᱚᱱ ᱮᱱᱮᱡ ᱠᱚ ᱮᱱᱮᱡᱼᱟ ᱾ ᱱᱚᱣᱟ ᱮᱱᱮᱡ ᱡᱚᱦᱚᱜ ᱠᱩᱲᱤ ᱠᱚᱫᱚ ᱵᱟᱝ ᱥᱟᱯᱟᱵ ᱠᱟᱛᱮ ᱠᱚ ᱮᱱᱮᱡᱼᱟ ᱾
● ᱢᱟᱜ ᱢᱚᱬᱮ :- ᱢᱟᱜ ᱢᱚᱬᱮ ᱦᱚᱸ ᱡᱟᱦᱮᱨ ᱨᱮᱜᱮ ᱠᱚ ᱮᱱᱮᱡᱼᱟ ᱟᱨ ᱱᱚᱣᱟ ᱮᱱᱮᱡ ᱦᱚᱸ ᱵᱟᱦᱟ ᱮᱱᱮᱡ ᱞᱮᱠᱟ ᱜᱮ ᱛᱟᱦᱮᱸᱱᱟ ᱾
ᱱᱚᱣᱟ ᱠᱚ ᱥᱟᱶᱛᱮ ᱟᱨ ᱦᱚᱸ ᱟᱹᱵᱤ ᱠᱮᱠᱟᱱ ᱮᱱᱮᱡ ᱢᱮᱱᱟᱜᱼᱟ, ᱚᱱᱟ ᱠᱚᱫᱚ ᱦᱩᱭᱩᱜ ᱠᱟᱱᱟ-- ᱡᱷᱤᱸᱠᱟᱹ, ᱞᱩᱦᱨᱤ, ᱰᱟᱱᱴᱟ, ᱥᱚᱦᱨᱟᱭ, ᱠᱟᱨᱟᱢ, ᱵᱩᱰᱷᱤᱜᱟᱹᱲᱤ, ᱵᱩᱨᱩ ᱡᱟᱛᱨᱟ/ᱰᱷᱟᱹᱵᱩᱞ, ᱫᱷᱚᱸᱜᱮᱲ, ᱟᱨ ᱦᱚᱸ ᱟᱹᱰᱤ ᱞᱮᱠᱟᱱᱟᱜ ᱮᱱᱮᱡ ᱥᱟᱱᱛᱟᱲ ᱥᱟᱶᱛᱟ ᱨᱮᱫᱚ ᱧᱮᱞᱚᱜᱼᱟ ᱾
ᱟᱨ ᱦᱚᱸ ᱧᱮᱞ ᱢᱮ
ᱥᱟᱯᱲᱟᱣhttps://en.m.wikipedia.org/wiki/Art
https://en.m.wikipedia.org/wiki/Outline_of_performing_arts
ᱥᱟᱹᱠᱷᱭᱟᱹᱛ
ᱥᱟᱯᱲᱟᱣhttps://books.google.com/books?id=K4FN1lOcR-wC&pg=PA43
https://books.google.com/books?id=ze8TAQAAIAAJ
http://www.artsalive.ca/en/dan/dance101/forms.asp
https://en.m.wikipedia.org/wiki/Special:BookSources/9780835111867
ᱵᱟᱦᱨᱮ ᱡᱚᱱᱚᱲ
ᱥᱟᱯᱲᱟᱣhttps://en.m.wikipedia.org/wiki/Encyclop%C3%A6dia_Britannica_Eleventh_Edition
http://www.gutenberg.org/etext/17289
https://web.archive.org/web/20060820155540/http://www.dancemuseum.org/