ᱱᱮᱦᱚᱨ

ᱡᱟᱭᱛᱮᱫ ᱱᱮᱦᱚᱨ ᱫᱚ ᱢᱚᱱᱮ ᱡᱤᱣᱤ ᱦᱚᱲᱢᱚ ᱱᱟᱯᱟᱭ ᱛᱮ ᱞᱟᱲᱟᱣ ᱤᱫᱤ ᱞᱟᱹᱜᱤᱫ ᱢᱤᱫ ᱱᱟᱯᱟᱭ ᱦᱚᱨ ᱰᱟᱦᱟᱨ ᱠᱟᱱᱟ ᱾ ᱱᱮᱶ ᱦᱚᱨ ᱠᱷᱚᱱ ᱜᱮ ᱱᱮᱦᱚᱨ ᱨᱚᱲ ᱫᱚ ᱩᱠᱡᱟᱹᱱ ᱟᱠᱟᱱᱟ ᱾ ᱦᱚᱲᱢᱚ ᱫᱚ ᱯᱮ ᱞᱮᱠᱟᱱ ᱯᱷᱮᱡᱟ ᱛᱮ ᱜᱚᱲᱦᱚᱱ ᱟᱠᱟᱱᱟ ᱾ ᱦᱚᱭ ᱦᱚᱲᱢᱚ , ᱫᱟᱜ ᱦᱚᱲᱢᱚ , ᱠᱮᱴᱮᱡ ᱦᱚᱲᱢᱚ ᱾ ᱫᱟᱜ ᱟᱨ ᱠᱮᱴᱮᱡ ᱦᱚᱲᱢᱚ ᱫᱚ ᱡᱚᱢ ᱧᱩ ᱥᱩᱱᱩᱢ ᱥᱮᱸᱫᱮᱛ ᱛᱮ ᱱᱤᱯᱷᱩᱴᱚᱜ-ᱟ ᱾ ᱦᱚᱭ ᱦᱚᱲᱢᱚ ᱫᱚ ᱱᱮᱦᱚᱨ ᱥᱮᱨᱮᱧ ᱛᱮ ᱥᱟᱶᱟᱨᱚᱜ-ᱟ ᱾ ᱦᱚᱭ ᱦᱚᱲᱢᱚ ᱥᱟᱶᱟᱨ ᱞᱮᱱ ᱱᱟ ᱡᱚᱛᱚ ᱦᱚᱲᱢᱚ ᱪᱚᱴᱠᱟᱨᱚᱜ-ᱟ ᱾

ᱱᱮᱦᱚᱨ*᱑

ᱟᱢ ᱫᱚ ᱵᱟ ᱵᱳᱨᱳ ᱵᱟᱨᱟᱝ ᱱᱚᱝᱠᱟᱢ ᱵᱟᱰᱟᱭᱟ, ᱪᱟᱸᱫᱚ ᱤᱯᱤᱞ ᱥᱟᱶᱛᱮ ᱨᱤᱢᱤᱞ ᱥᱮᱨᱢᱟᱢ ᱥᱟᱡᱟᱣᱟ ᱾

ᱫᱟᱲᱮ ᱢᱚᱬᱮ ᱠᱚᱫᱚᱢ ᱦᱩᱞᱟᱹᱝ ᱟᱹᱪᱩᱨ ᱠᱚ, ᱤᱧ ᱫᱚ ᱪᱮᱫ ᱤᱧ ᱠᱟᱹᱭᱟᱱᱛᱮ ᱵᱟ ᱮᱨᱮᱢ ᱮᱨᱟᱹᱧ ᱠᱟᱱ ᱾

ᱟᱢ ᱦᱚᱸ ᱭᱳ ᱡᱟᱹᱦᱤ ᱨᱟᱝᱜᱤ ᱟᱰᱤᱢ ᱱᱟᱯᱟᱭᱟ, ᱫᱷᱤᱨᱤ ᱫᱟᱜ ᱥᱟᱶ ᱫᱟᱨᱮ ᱱᱟᱹᱬᱤᱛᱮ ᱚᱛᱮᱢ ᱥᱟᱡᱟᱣᱟ ᱾

ᱫᱩᱞᱟᱹᱲ ᱛᱩᱨᱩᱭ ᱠᱚᱫᱚᱢ, ᱜᱩᱸᱜᱩᱫ ᱜᱩᱢᱟᱹᱝ ᱠᱟᱠᱚ ᱤᱧᱫᱚ ᱪᱮᱫ ᱤᱧ ᱠᱟᱭᱟᱱᱛᱮ ᱭᱳ ᱯᱷᱟᱸᱰᱟᱢ ᱜᱤᱰᱤᱭᱟᱹᱧ ᱾

ᱥᱮᱨᱢᱟ ᱫᱷᱩᱸᱫᱮᱱ ᱛᱟᱢᱟ, ᱚᱛ ᱦᱚᱸ ᱥᱟᱵᱟᱜ ᱮᱱᱟ, ᱡᱤᱣᱤ ᱡᱟᱹᱛᱤ ᱪᱤᱠᱟᱹᱧ ᱫᱚᱦᱚᱭ, ᱤᱧ ᱢᱟᱹᱧ ᱟᱸᱫᱟᱜ ᱮᱱᱟ ᱾

ᱡᱚᱦᱟᱨ ᱢᱟᱨᱟᱝ ᱵᱳᱨᱳ ᱱᱮᱦᱚᱨ ᱡᱟᱹᱦᱤ ᱨᱟᱹᱝᱜᱤ, ᱠᱟᱹᱭ ᱠᱟᱜ ᱠᱷᱟᱱ ᱤᱠᱟᱹ ᱠᱟᱹᱧᱵᱤᱱ ᱵᱟᱹᱵᱤᱱ ᱫᱚᱦᱚᱭ ᱨᱟᱹᱜᱤ ᱾

ᱱᱮᱦᱚᱨ*᱒

ᱫᱷᱤᱨᱤ ᱨᱮᱦᱚᱸ ᱫᱟᱨᱮ ᱨᱮᱦᱚᱸ, ᱟᱢ ᱫᱚ ᱢᱟᱨᱟᱝ ᱵᱳᱨᱳ, ᱚᱠᱛᱚ ᱡᱟᱹᱱᱤᱡ ᱫᱟᱲᱮᱢ ᱦᱮᱞᱟᱣ, ᱦᱟ~ ᱜᱮ ᱟᱹᱨᱩ ᱟᱹᱨᱩ ᱾

ᱫᱷᱤ~ᱨᱮ ᱦᱚᱸ ᱛᱤ~ᱨᱮ ᱦᱚᱸ, ᱟᱢ ᱜᱮ ᱢᱟᱨᱟᱝ ᱵᱳᱨᱳ, ᱚᱠᱛᱚ ᱡᱟᱹᱱᱤᱡ ᱫᱟᱲᱮᱢ ᱦᱮᱞᱟᱣ, ᱦᱟ~ ᱜᱮ ᱟᱹᱨᱩ ᱟᱹᱨᱩ ᱾

ᱮᱞᱟᱝ ᱨᱮ ᱦᱚᱸ ᱨᱟᱛᱟᱝ ᱨᱮᱦᱚᱸ, ᱟᱢᱜᱮ ᱢᱟᱨᱟᱝ ᱵᱳᱨᱳ, ᱚᱠᱛᱚ ᱡᱟᱹᱱᱤᱡ ᱫᱟᱲᱮᱢ ᱦᱮᱞᱟᱣ, ᱦᱟ~ ᱜᱮ ᱟᱹᱨᱩ ᱟᱹᱨᱩ ᱾

ᱦᱚᱭ ᱨᱮ ᱦᱚᱸ ᱫᱟᱜ ᱨᱮ ᱦᱚᱸ, ᱟᱢ ᱜᱮ ᱢᱟᱨᱟᱝ ᱵᱳᱨᱳ, ᱚᱠᱛᱚ ᱡᱟᱹᱱᱤᱡ ᱫᱟᱲᱮᱢ ᱦᱮᱞᱟᱣ, ᱦᱟ~ ᱜᱮ ᱟᱹᱨᱩ ᱟᱹᱨᱩ ᱾

ᱧᱩᱛ ᱨᱮ ᱦᱚᱸ ᱟᱹᱠᱩᱛ ᱨᱮ ᱦᱚᱸ, ᱟᱢ ᱜᱮ ᱢᱟᱨᱟᱝ ᱵᱳᱨᱳ, ᱚᱠᱛᱚ ᱡᱟᱹᱱᱤᱡ ᱫᱟᱲᱮᱢ ᱦᱮᱞᱟᱣ, ᱦᱟ~ ᱜᱮ ᱟᱹᱨᱩ ᱟᱹᱨᱩ ᱾

ᱱᱮᱦᱚᱨ*᱓

ᱡᱚᱦᱟᱨ ᱡᱚᱦᱟᱨ ᱚᱞ ᱜᱩᱨᱩ ᱡᱚᱦᱟᱨ ᱡᱚᱦᱟᱨ ᱨᱟᱹᱜᱷᱩ ᱜᱩᱨᱩ, ᱫᱮᱥᱮ ᱜᱩᱨᱩ ᱦᱚ ᱫᱮᱞᱟᱥᱮ ᱜᱩᱨᱩ ᱦᱚ ᱟᱹᱭᱩᱨ ᱠᱟᱞᱮ ᱵᱤᱱ, ᱫᱮᱥᱮ ᱜᱩᱨᱩ ᱦᱚ ᱫᱮᱞᱟᱥᱮ ᱜᱩᱨᱩ ᱦᱚ ᱥᱩᱛᱩᱜ ᱠᱟᱞᱮ ᱵᱤᱱ ᱾

ᱚᱛ ᱢᱟ ᱯᱟᱛᱟᱞ ᱠᱷᱚᱱ ᱦᱩᱢᱴᱟᱣ ᱚᱰᱚᱠ ᱠᱟᱛᱮ, ᱫᱷᱟᱹᱨᱛᱤ ᱯᱩᱨᱤ ᱜᱚᱴᱟ ᱰᱟᱵᱟᱣ ᱠᱟᱛᱮ, ᱫᱮᱥᱮ ᱜᱩᱨᱩ ᱦᱚ ᱫᱮᱞᱟᱥᱮ ᱜᱩᱨᱩ ᱦᱚ ᱟᱹᱭᱩᱨ ᱠᱟᱞᱮ ᱵᱤᱱ, ᱫᱮᱥᱮ ᱜᱩᱨᱩ ᱦᱚ ᱫᱮᱞᱟᱥᱮ ᱜᱩᱨᱩ ᱦᱚ ᱥᱩᱛᱩᱜ ᱠᱟᱞᱮ ᱵᱤᱱ ᱾