ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ
ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ 
ᱟᱨ ᱵᱟᱝᱠᱷᱟᱱ ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ,[᱑][᱒] ᱡᱟᱦᱟᱸᱭ ᱫᱚ ᱚᱞ ᱪᱤᱠᱤ ᱵᱮᱱᱟᱣ ᱞᱮᱫ ᱟᱭ ᱾ ᱥᱤᱧᱚᱛ ᱫᱤᱥᱚᱢ ᱨᱮᱱᱟᱜ ᱳᱰᱤᱥᱟ ᱯᱚᱱᱚᱛ ᱨᱮᱱᱟᱜ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮᱭᱟᱜ ᱨᱟᱭᱨᱟᱝᱯᱩᱨ ᱩᱯᱳᱡᱤᱞᱟ ᱨᱮᱭᱟᱜ ᱰᱟᱸᱰᱵᱩᱥ ᱟᱛᱩ ᱨᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛ ᱢᱩᱨᱢᱩ ᱫᱚ ᱑᱙᱐᱕ ᱥᱟᱞ ᱨᱮᱱᱟᱜ ᱤᱝᱨᱮᱡᱤ ᱢᱮ ᱪᱟᱸᱫᱚ ᱨᱮᱱᱟᱜ ᱕ ᱢᱟᱹᱦᱤᱛ ᱨᱮᱭ ᱡᱟᱱᱟᱢ ᱞᱮᱱᱟ᱾ ᱠᱟᱹᱢᱤ ᱠᱟᱡᱽ ᱨᱮᱫᱚ ᱩᱱᱤ ᱫᱚ ᱩᱱᱩᱥᱩᱞ ᱵᱤᱨᱫᱟᱹᱜᱟᱲ ᱨᱤᱱᱤᱡ ᱢᱟᱪᱮᱛ ᱮ ᱛᱟᱦᱮᱸ ᱠᱟᱱᱟ᱾ ᱟᱡᱟᱜ ᱯᱩᱨᱟᱹ ᱡᱤᱭᱚᱱ ᱨᱮ ᱟᱡ ᱫᱚ ᱟᱹᱰᱤ ᱜᱟᱱ ᱯᱚᱛᱚᱵ ᱯᱩᱛᱷᱤ, ᱥᱮᱨᱮᱧ ᱟᱨ ᱜᱟᱭᱟᱱ ᱯᱩᱛᱷᱤ ᱮᱢᱟᱱ ᱠᱚᱭ ᱚᱞ ᱟᱠᱟᱫᱼᱟ᱾ ᱟᱡᱟᱜ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱯᱟᱲᱦᱟᱣ ᱟᱠᱟᱱ ᱯᱚᱛᱚᱵ ᱫᱚ ᱦᱩᱭᱩᱜ ᱠᱟᱱᱟ "ᱦᱤᱛᱟᱹᱞ"᱾[᱓]
| ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ | |
|---|---|
 ᱵᱷᱩᱵᱚᱱᱮᱥᱚᱨ ᱨᱮᱱᱟᱜ ᱟᱹᱫᱤᱵᱟᱹᱥᱤ ᱞᱟᱦᱟᱱᱛᱤ ᱥᱚᱢᱤᱛᱤ ᱨᱮ ᱢᱮᱱᱟᱜ ᱜᱩᱨᱩ ᱜᱚᱢᱠᱮ ᱢᱩᱴᱷᱟᱹᱱ | |
| ᱡᱟᱱᱟᱢ | ᱕ ᱢᱮ ᱑᱙᱐᱕ (ᱵᱟᱹᱭᱥᱟᱹᱠ) (ᱰᱟᱦᱟᱨᱰᱤ) ᱰᱟᱸᱰᱵᱳᱥ, ᱨᱟᱭᱨᱚᱝᱯᱩᱨ, ᱢᱚᱭᱩᱨᱵᱷᱚᱸᱡᱽ ᱡᱤᱞᱞᱟᱹ |
| ᱜᱩᱨ | ᱑ ᱯᱷᱮᱵᱽᱨᱩᱣᱟᱨᱤ ᱑᱙᱘᱒ (᱗᱖ ᱵᱚᱭᱚᱥ) |
| ᱢᱟᱹᱱ ᱧᱩᱢ | ᱜᱩᱨᱩ ᱜᱚᱢᱠᱮ |
| ᱠᱟᱹᱢᱤ | ᱜᱟᱹᱠᱷᱩᱲ ᱜᱚᱢᱠᱮ, ᱚᱱᱚᱬᱦᱤᱭᱟᱹ, ᱚᱱᱚᱞᱤᱭᱟᱹ, ᱥᱟᱱᱟᱥᱤᱭᱟᱹ, ᱠᱷᱮᱞᱚᱸᱰᱤᱭᱟᱹ |
| ᱡᱟᱹᱛᱤᱭᱟᱹᱛ | ᱥᱤᱧᱚᱛᱤᱭᱟᱹ |
| ᱡᱟᱹᱛ | ᱥᱟᱱᱛᱟᱲ |
| ᱥᱟᱛᱟᱢ | ᱥᱟᱶᱦᱮᱫ |
| ᱥᱟᱶᱦᱮᱫ ᱨᱮᱱᱟᱜ ᱞᱟᱲᱟᱣᱱᱟ | ᱚᱞ ᱪᱤᱠᱤ ᱨᱮᱱᱟᱜ ᱜᱚᱲᱦᱚᱱ |
| ᱥᱟᱶᱦᱮᱫ ᱮᱱᱮᱢ | ᱫᱟᱲᱮᱜᱮ ᱫᱷᱚᱱ'' ᱥᱤᱫᱩ ᱠᱟᱹᱱᱦᱩ ᱵᱤᱫᱩ ᱪᱟᱸᱫᱟᱱ ᱠᱷᱮᱨᱣᱟᱲ ᱵᱤᱨ "ᱦᱤᱛᱟᱹᱞ" |
ᱡᱟᱱᱟᱢ
ᱜᱩᱨᱩ ᱜᱚᱢᱠᱮ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱰᱟᱦᱟᱨᱰᱤ, ᱰᱟᱸᱰᱵᱩᱥ ᱟᱹᱛᱩ ᱨᱮ ᱵᱟᱹᱭᱥᱟᱹᱠ ᱵᱚᱸᱜᱟ ᱠᱩᱱᱟᱹᱢᱤ ᱨᱮ ᱢᱤᱫ ᱢᱩᱨᱢᱩ ᱵᱟᱹᱠᱷᱳᱞ ᱨᱮᱭ ᱡᱟᱱᱟᱢ ᱞᱮᱱᱟ ᱾ ᱡᱟᱦᱟᱸ ᱫᱚ ᱢᱟᱦᱟᱸ ᱢᱟᱺᱦᱤᱛ ᱞᱮᱠᱟᱛᱮ ᱫᱚ ᱕/᱕/᱑᱙᱐᱕ ᱥᱟᱞᱮ ᱢᱮᱱᱛᱮ ᱵᱚᱱ ᱢᱮᱛᱟᱜ ᱠᱟᱱᱟ ᱾ ᱟᱡᱟᱜ ᱡᱟᱱᱟᱢ ᱟᱹᱛᱩ ᱫᱚ ᱳᱰᱤᱥᱟ ᱯᱚᱱᱚᱛ ᱟᱨ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮ ᱢᱟᱬᱫᱟ ᱯᱤᱲ ᱨᱮᱱᱟᱜ ᱰᱟᱦᱟᱨᱰᱤ, ᱰᱟᱸᱰᱵᱩᱥ ᱟᱛᱩ ᱾ ᱟᱡᱤᱡ ᱡᱟᱱᱟᱢ ᱵᱟᱵᱟᱦᱟᱜ ᱧᱩᱛᱩᱢ ᱫᱚ ᱥᱤᱫᱚ ᱢᱩᱨᱢᱩ ᱟᱨᱵᱟᱝ ᱱᱚᱱᱫᱚᱞᱟᱞ ᱢᱮᱱᱛᱮ ᱛᱟᱦᱮᱸ ᱠᱟᱱᱟ ᱟᱨ ᱡᱟᱱᱟᱢ ᱟᱭᱳᱣᱟᱜ ᱧᱩᱛᱩᱢ ᱫᱚ ᱥᱚᱞᱢᱟ ᱦᱟᱥᱫᱟ ᱥᱮ ᱥᱩᱢᱤ ᱢᱮᱱᱛᱮ ᱛᱟᱦᱮᱸ ᱠᱟᱱᱟ ᱾ ᱥᱟᱱᱛᱟᱲ ᱡᱮᱜᱮᱛ ᱡᱟᱠᱟᱛ ᱨᱮ ᱑᱙᱐᱕ ᱥᱟᱹᱦᱤᱛ ᱨᱮᱭᱟᱜ ᱕ ᱢᱮ ᱪᱟᱸᱫᱚ ᱢᱩᱞᱩᱜ ᱞᱮᱱᱟ ᱾ ᱩᱲᱤᱥᱟ ᱯᱚᱱᱚᱛ ᱨᱮᱭᱟᱜ ᱢᱩᱭᱩᱨᱵᱷᱚᱡᱽ ᱡᱤᱞᱟᱹ ᱨᱮ ᱢᱮᱱᱟᱜ ᱨᱟᱭᱨᱚᱢᱯᱩᱨ ᱥᱩᱨ ᱰᱟᱦᱟᱨᱰᱤ (ᱰᱟᱸᱰᱵᱚᱥ ᱱᱟᱦᱟᱜ ᱧᱩᱛᱩᱢ) ᱟᱹᱛᱩ ᱨᱮ ᱧᱩ ᱢᱟᱱ ᱱᱚᱱᱫᱚᱞᱟᱞ ᱢᱩᱨᱢᱩ ᱟᱨ ᱥᱚᱞᱢᱟ ᱛᱟᱠᱤᱱᱟᱜ ᱠᱚᱞᱮ ᱢᱟᱨᱥᱟᱞ ᱞᱮᱫᱟ ᱾ ᱜᱩᱨᱩ ᱜᱚᱢᱠᱮ ᱫᱚ ᱪᱩᱱᱩ ᱢᱩᱨᱢᱩ ᱧᱩᱛᱩᱢ ᱛᱮᱦᱚᱸ ᱠᱚ ᱦᱚᱦᱚ ᱟᱭ ᱛᱟᱦᱮᱸᱫ ᱾ ᱑᱙᱒᱐ ᱥᱟᱹᱦᱤᱛ ᱠᱷᱚᱱ ᱜᱚᱢᱡᱮ ᱫᱚ ᱚᱞᱚᱜ ᱡᱤᱭᱤᱱ ᱮ ᱮᱦᱚᱵ ᱞᱮᱫᱟ ᱾ ᱜᱟᱹᱢᱵᱷᱟᱹᱨᱤᱭᱟᱹ ᱤᱭᱩ. ᱯᱤ ᱤᱥᱠᱤᱞ ᱠᱷᱚᱱᱟᱜ ᱾ ᱚᱱᱟ ᱛᱟᱭᱚᱢ ᱵᱚᱦᱚᱲᱫᱟ ᱮᱢ.ᱢᱤ ᱦᱟᱭ ᱤᱥᱠᱤᱞ ᱠᱷᱚᱱ ᱑᱙᱒᱒ ᱥᱟᱹᱦᱤᱛ ᱨᱮ ᱯᱟᱥ ᱠᱮᱫᱟ ᱾ ᱜᱩᱨᱩ ᱜᱚᱢᱠᱮ ᱟᱜ ᱠᱟᱛᱷᱟ ᱢᱟ ᱚᱞ ᱛᱮ ᱵᱟᱝ ᱪᱟᱵᱟᱜ ᱞᱮᱠᱟ ᱮᱱᱦᱚᱸ ᱟᱡᱟᱜ ᱥᱤᱨᱡᱚᱱ ᱚᱞ ᱟᱠᱷᱚᱨ ᱛᱮᱜᱮ ᱱᱚᱜᱼᱚᱭ ᱱᱤᱛᱚᱜ ᱫᱚᱵᱚᱱ ᱚᱞᱚᱜ ᱠᱟᱱᱟ ᱾
ᱜᱤᱫᱽᱨᱟᱹ ᱚᱠᱛᱚ
ᱨᱚᱜᱷᱩᱱᱟᱛᱷ ᱢᱩᱨᱢᱩᱣᱟᱜ ᱧᱩᱛᱩᱢ ᱫᱚ ᱪᱷᱟᱹᱴᱭᱟᱹᱨ ᱧᱩᱛᱩᱢ ᱞᱮᱠᱟᱛᱮ ᱫᱚ ᱪᱩᱱᱩ ᱢᱮᱱᱛᱮ ᱛᱟᱦᱮᱸ ᱠᱟᱱᱟ ᱾ ᱢᱮᱱᱠᱷᱟᱱ ᱪᱮᱫᱟᱜ ᱪᱚᱝ ᱵᱟᱞᱮ ᱵᱮᱠᱮᱨ ᱜᱤᱫᱽᱨᱟᱹ ᱟᱹᱰᱤ ᱵᱟᱹᱲᱛᱤ ᱜᱮᱭ ᱨᱟᱜ ᱠᱮᱫᱼᱟ ᱾ ᱜᱤᱫᱽᱨᱟᱹ ᱨᱟᱜ ᱜᱮ ᱵᱟᱭ ᱛᱷᱤᱨ ᱞᱮᱱ ᱠᱷᱟᱱ ᱚᱲᱟᱜ ᱦᱚᱲ ᱠᱚ ᱟᱹᱰᱤ ᱜᱮᱠᱚ ᱠᱟᱹᱦᱤᱞ ᱪᱟᱵᱟ ᱮᱱᱟ ᱾ ᱟᱭᱳ ᱵᱟᱵᱟ ᱦᱚᱸ ᱢᱤᱫᱨᱟᱦᱟ ᱜᱤᱫᱽᱨᱟᱹᱦᱟᱜ ᱨᱟᱜ ᱟᱹᱡᱚᱢ ᱛᱮ ᱠᱤᱱ ᱠᱟᱹᱨᱤᱜᱷᱟᱢ ᱪᱟᱵᱟ ᱮᱱᱟ ᱾ ᱱᱩᱭ ᱜᱤᱫᱽᱨᱟᱹᱦᱟᱜ ᱨᱟᱜ ᱟᱹᱡᱚᱢ ᱛᱮ ᱫᱤᱥᱟᱹ ᱜᱮ ᱛᱟᱹᱠᱤᱱ ᱟᱫ ᱪᱟᱵᱟ ᱮᱱᱟ ᱾ ᱪᱮᱫ ᱠᱤᱱ ᱪᱤᱠᱟᱹᱭᱟ ᱪᱮᱫ ᱫᱚ ᱵᱟᱝᱼᱟ, ᱪᱮᱫ ᱦᱚᱸ ᱵᱟᱹᱠᱤᱱ ᱫᱤᱥᱟᱹ ᱧᱟᱢ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱫ ᱾ ᱟᱫᱚ ᱚᱡᱷᱟ ᱠᱚ ᱴᱷᱮᱱ ᱠᱷᱟᱹᱲᱤ ᱢᱟᱹᱲᱤ ᱵᱟᱲᱟ ᱠᱟᱛᱮ ᱱᱚᱶᱟ ᱧᱟᱢ ᱮᱱᱟ ᱡᱮ, ᱱᱩᱭ ᱜᱤᱫᱽᱨᱟᱹᱦᱟᱜ ᱫᱚ ᱧᱩᱛᱩᱢ ᱜᱮ ᱵᱟᱝ ᱜᱟᱱ ᱟᱠᱟᱱᱟ ᱾ ᱱᱩᱭ ᱜᱤᱫᱽᱨᱟᱹᱦᱟᱜ ᱧᱩᱛᱩᱢ ᱫᱚ ᱟᱹᱨᱩ ᱞᱮ ᱮᱱᱟᱝ ᱜᱮ ᱵᱟᱝᱠᱷᱟᱱ ᱨᱟᱜ ᱜᱮ ᱵᱟᱭ ᱛᱷᱤᱨᱩᱜᱼᱟ ᱾ ᱚᱱᱟ ᱞᱮᱠᱟᱛᱮ ᱢᱤᱫ ᱫᱤᱱ ᱫᱚ ᱡᱟᱦᱮᱨ ᱴᱚᱞᱟ ᱨᱤᱱᱤᱡ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱟᱹᱱᱤᱡ ᱢᱤᱫ ᱚᱡᱷᱟ ᱴᱷᱮᱱ ᱵᱚᱸᱜᱟ ᱵᱳᱨᱳ ᱵᱟᱲᱟ ᱦᱚᱪᱚ ᱠᱟᱛᱮ ᱩᱱᱤ ᱚᱡᱷᱟ ᱴᱷᱮᱱ ᱜᱮ ᱟᱭᱳ ᱵᱟᱵᱟ ᱫᱚ ᱜᱤᱫᱽᱨᱟᱹ ᱠᱤᱱ ᱟᱹᱠᱷᱨᱤᱧ ᱠᱟᱫᱮᱭᱟ ᱾ ᱚᱱᱟ ᱞᱮᱠᱟᱛᱮ ᱩᱱᱤ ᱚᱡᱷᱟ ᱦᱚᱸ ᱟᱡᱟᱜ ᱧᱩᱛᱩᱢ ᱪᱟᱞ ᱠᱟᱛᱮ ᱜᱮ ᱨᱚᱜᱷᱩᱱᱟᱛᱷ ᱢᱮᱱᱛᱮᱭ ᱧᱩᱛᱩᱢ ᱟᱹᱨᱩ ᱠᱮᱫᱮᱭᱟ ᱾ ᱚᱡᱷᱟ ᱠᱚᱣᱟᱜ ᱠᱷᱟᱹᱲᱤ ᱢᱟᱹᱴᱤ ᱞᱮᱠᱟᱛᱮ ᱠᱟᱛᱷᱟ ᱫᱚ ᱟᱹᱰᱤ ᱜᱮ ᱥᱟᱹᱨᱤ ᱮᱱᱟ ᱾ ᱪᱩᱱᱩ ᱵᱚᱫᱚᱞ ᱛᱮ ᱨᱚᱜᱷᱩ ᱢᱮᱱᱛᱮ ᱧᱩᱛᱩᱢ ᱛᱟᱭ ᱟᱹᱨᱩ ᱮᱱ ᱠᱷᱟᱱ ᱜᱮ ᱜᱤᱫᱽᱨᱟᱹ ᱨᱟᱜ ᱦᱚᱸᱭ ᱦᱟᱹᱯᱤ ᱮᱱᱟ ᱾
ᱚᱞᱚᱜ ᱮᱛᱚᱦᱚᱵ
᱑᱙᱑᱒ ᱥᱟᱞᱮ ᱨᱮ ᱜᱟᱹᱢᱵᱷᱟᱹᱨᱤᱭᱟᱹ ᱭᱩ.ᱯᱤ. ᱟᱥᱲᱟ ᱨᱮ ᱚᱞᱚᱜ ᱫᱚᱭ ᱮᱛᱚᱦᱚᱵ ᱠᱮᱫᱼᱟ ᱾ ᱚᱲᱟᱜ ᱨᱮᱢᱟ ᱢᱤᱫ ᱞᱮᱠᱟ ᱵᱚᱱ ᱨᱚᱲ ᱠᱟᱱᱟ ᱤᱠᱷᱟᱹᱱ ᱚᱞᱚᱜ ᱟᱥᱲᱟ ᱨᱮᱫᱚ ᱪᱮᱫᱟᱜ ᱮᱴᱟᱜ ᱟᱲᱟᱝ ᱨᱚᱲ ᱛᱮᱠᱚ ᱨᱚᱲ ᱠᱟᱱᱟ, ᱱᱚᱶᱟ ᱠᱚ ᱧᱮᱞ ᱵᱟᱲᱟ ᱠᱟᱛᱮ ᱨᱚᱜᱷᱩ ᱫᱚ ᱚᱞᱚᱜ ᱯᱟᱲᱦᱟᱣ ᱫᱚ ᱟᱹᱰᱤ ᱜᱮ ᱦᱟᱨᱠᱮᱛ ᱮ ᱵᱩᱡᱷᱟᱹᱣ ᱠᱮᱫᱼᱟ ᱾ ᱡᱟᱱᱟᱢ ᱚᱲᱟᱜ ᱨᱮᱢᱟ ᱡᱟᱱᱟᱢ ᱟᱲᱟᱝ ᱥᱟᱱᱛᱟᱲᱤ ᱛᱮ ᱨᱚᱲ ᱦᱩᱭᱩᱜ ᱠᱟᱱᱟ ᱤᱠᱷᱟᱹᱱ ᱚᱞᱚᱜ ᱟᱥᱲᱟ ᱨᱮᱫᱚ ᱫᱤᱠᱩ ᱟᱲᱟᱝ ᱳᱰᱤᱭᱟᱹ ᱛᱮᱠᱚ ᱨᱚᱲ ᱠᱟᱱᱟ ᱾ ᱨᱚᱲ ᱠᱚᱢᱟ ᱢᱚᱴᱷᱮ ᱜᱮ ᱵᱟᱝ ᱵᱩᱡᱷᱟᱹᱣ ᱧᱟᱢᱚᱜ ᱠᱟᱱ ᱫᱚ ᱾ ᱱᱚᱶᱟ ᱠᱚ ᱧᱮᱞ ᱠᱟᱛᱮ ᱨᱚᱜᱷᱩ ᱫᱚ ᱟᱹᱰᱤ ᱜᱮᱭ ᱠᱟᱺᱦᱤᱥᱚᱜ ᱠᱟᱱ ᱛᱟᱦᱮᱸᱫ ᱾ ᱢᱤᱫ ᱫᱤᱱ ᱫᱚ ᱚᱱᱟᱛᱮ ᱟᱡ ᱵᱟᱵᱟᱭ ᱢᱮᱛᱟ ᱫᱮᱭᱟ, ᱤᱧ ᱫᱚ ᱵᱟ ᱚᱞᱚᱜ ᱵᱟᱹᱧ ᱪᱟᱞᱟᱜᱼᱟ ᱾ ᱚᱞ ᱨᱚᱲ ᱜᱮ ᱪᱮᱫ ᱦᱚᱸ ᱵᱟᱹᱧ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱾ ᱢᱟᱪᱮᱛ ᱠᱚ ᱮᱠᱟᱞ ᱜᱮ ᱥᱟᱱᱛᱟᱲᱤ ᱛᱮ ᱵᱟᱠᱚ ᱨᱚᱲ ᱠᱟᱱᱟ ᱾ ᱪᱮ ᱚᱞ ᱦᱚᱸ ᱵᱟᱝ ᱠᱚ ᱚᱞᱚᱜ ᱠᱟᱱᱟ ᱾ ᱤᱧ ᱢᱟ ᱪᱮᱫ ᱦᱚᱸ ᱵᱟᱹᱧ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱾ ᱤᱱᱟᱹᱜ ᱠᱷᱟᱱ ᱜᱮ ᱟᱡ ᱵᱟᱵᱟᱭ ᱵᱩᱡᱷᱟᱹᱣ ᱟᱫᱮᱭᱟ ᱪᱤ ᱵᱮᱴᱟ ᱚᱞᱚᱜ ᱟᱥᱲᱟ ᱫᱚ ᱥᱮᱱᱚᱜ ᱢᱮᱜᱮ ᱾ ᱫᱤᱱ ᱦᱤᱞᱚᱜ ᱚᱞᱚᱜ ᱟᱥᱲᱟᱢ ᱥᱮᱱ ᱞᱮᱱ ᱠᱷᱟᱱ ᱡᱚᱛᱚ ᱠᱟᱛᱷᱟᱢ ᱵᱩᱡᱷᱟᱹᱣ ᱫᱟᱲᱮᱭᱟᱜᱼᱟ ᱾ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱟᱹᱲᱤᱥ ᱟᱹᱲᱤᱥ ᱛᱮ ᱪᱮᱫ ᱦᱚᱸ ᱵᱟᱭ ᱢᱮᱱ ᱨᱩᱣᱟᱹᱲ ᱫᱟᱲᱮᱭᱟᱫ-ᱟ ᱾ ᱵᱟᱵᱟ ᱥᱤᱫᱚ ᱦᱚᱸ ᱦᱚᱯᱚᱱᱟᱜ ᱜᱚᱥᱚ ᱢᱮᱫᱦᱟ ᱧᱮᱞ ᱠᱟᱛᱮ ᱟᱹᱰᱤ ᱫᱩᱠ ᱮ ᱵᱩᱡᱷᱟᱹᱣ ᱠᱮᱫᱼᱟ ᱾ ᱤᱠᱷᱟᱹᱱ ᱵᱟᱵᱟ ᱫᱚ ᱫᱩᱞᱟᱹᱲ ᱟᱲᱟᱝ ᱛᱮ ᱦᱚᱯᱚᱱ ᱛᱟᱭ ᱮ ᱢᱮᱛᱟ ᱫᱮᱭᱟ, ᱵᱟᱵᱟ ᱛᱤᱧ, ᱫᱷᱚᱱ ᱛᱤᱧ ᱪᱮᱫ ᱮᱢ ᱠᱷᱚᱡᱚᱜ ᱠᱟᱱᱟ, ᱱᱟᱶᱟ ᱫᱚᱛᱚ ᱥᱮ ᱱᱟᱶᱟ ᱯᱮᱸᱴ ᱪᱮ ᱥᱤᱵᱤᱞ ᱥᱤᱵᱤᱞ ᱡᱚᱢᱟᱜ ᱠᱚᱢ ᱧᱟᱢ ᱠᱟᱱᱟ ᱾ ᱩᱱᱨᱮ ᱨᱚᱜᱷᱩᱱᱟᱛᱷ ᱮ ᱢᱮᱱ ᱨᱩᱣᱟᱹᱲ ᱠᱮᱫᱼᱟ, ᱤᱧ ᱫᱚ ᱪᱮᱫ ᱦᱚᱸ ᱵᱟᱹᱧ ᱧᱟᱢ ᱠᱟᱱᱟ ᱾ ᱤᱧ ᱫᱩᱧ ᱧᱟᱢ ᱠᱟᱱᱟ ᱟᱵᱚ ᱟᱲᱟᱝ ᱛᱮ ᱚᱞ ᱨᱚᱲ ᱦᱩᱭᱩᱜ ᱢᱟ ᱾ ᱵᱟᱵᱟ ᱫᱚ ᱫᱩᱞᱟᱹᱲ ᱟᱲᱟᱝ ᱛᱮ ᱦᱚᱯᱚᱱ ᱮ ᱢᱮᱛᱟᱭ ᱠᱟᱱᱟ, ᱫᱤᱱᱟᱹᱢ ᱦᱤᱞᱚᱜ ᱚᱞᱚᱜ ᱟᱥᱲᱟ ᱛᱮᱢ ᱥᱮᱱ ᱞᱮᱱ ᱠᱷᱟᱱ ᱟᱵᱚᱣᱟᱜ ᱟᱲᱟᱝ ᱛᱮ ᱚᱞ ᱨᱚᱲ ᱦᱚᱸᱢ ᱧᱟᱢ ᱫᱟᱲᱮᱭᱟᱜ ᱜᱮᱭᱟ ᱾ ᱱᱚᱣᱟ ᱠᱟᱛᱷᱟ ᱢᱤᱫ ᱫᱷᱟᱣ ᱵᱟᱵᱟᱭ ᱢᱮᱱ ᱠᱮᱫᱼᱟ ᱤᱠᱷᱟᱹᱱ ᱨᱚᱜᱷᱩᱣᱟᱜ ᱢᱚᱱᱮ ᱨᱮᱫᱚ ᱟᱹᱰᱤ ᱠᱮᱴᱮᱡ ᱛᱮ ᱵᱟᱹᱭᱥᱟᱹᱣ ᱛᱟᱦᱮᱸ ᱮᱱᱟ ᱾
᱑᱙᱐᱐ ᱑᱔-᱑᱕ ᱨᱮ ᱥᱟᱶᱱᱟ ᱢᱩᱨᱢᱩ ᱦᱚᱸ ᱚᱱᱟ ᱜᱟᱺᱵᱷᱟᱹᱨᱤᱭᱟᱹ ᱤᱛᱩᱱ ᱟᱥᱲᱟ ᱨᱮᱜᱮᱭ ᱚᱞᱚᱜ ᱠᱟᱱ ᱛᱟᱦᱮᱸᱫ ᱾ ᱥᱟᱹᱜᱟᱹᱭ ᱛᱟᱹᱠᱤᱱ ᱫᱚ ᱢᱟᱢᱚ ᱵᱷᱟᱹᱜᱽᱱᱟᱹ ᱢᱮᱱᱮᱛ ᱥᱟᱶᱱᱟ ᱢᱩᱨᱢᱩ ᱫᱚ ᱨᱚᱜᱷᱩ ᱴᱷᱮᱱ ᱮ ᱢᱟᱢᱚ ᱦᱚᱪᱚᱜ ᱠᱟᱱ ᱛᱟᱦᱮᱸᱫ ᱾ ᱨᱚᱜᱷᱩ ᱥᱟᱶ ᱫᱚ ᱢᱤᱫ ᱪᱟᱱᱚᱪ ᱜᱮ ᱪᱮᱛᱟᱱ ᱞᱟᱛᱟᱨ ᱠᱤᱱ ᱚᱞᱚᱜ ᱠᱟᱱ ᱛᱟᱦᱮᱸᱫ ᱾ ᱚᱱᱟᱛᱮ ᱵᱟᱵᱟ ᱫᱚ ᱵᱟᱱᱟ ᱦᱚᱲ ᱮ ᱡᱚᱴᱟᱣ ᱠᱟᱫ ᱠᱤᱱᱟ ᱾ ᱢᱟᱢᱚ ᱥᱟᱶᱱᱟ ᱢᱩᱨᱢᱩ ᱫᱚ ᱫᱤᱱᱟᱹᱢ ᱦᱤᱞᱚᱜ ᱠᱟᱫᱩᱣᱟᱬᱤ ᱟᱹᱛᱩ ᱠᱷᱚᱱ ᱮ ᱦᱤᱡᱩᱜ ᱥᱮᱱᱚᱜ ᱠᱟᱱ ᱛᱟᱦᱮᱸᱫ ᱾ ᱚᱱᱠᱟ ᱜᱮ ᱨᱚᱜᱷᱩ ᱦᱚᱸ ᱫᱤᱱ ᱜᱮᱭ ᱦᱤᱡᱩᱜ ᱥᱮᱱᱚᱜ ᱠᱟᱱ ᱛᱟᱦᱮᱸᱫ ᱾ ᱟᱹᱠᱤᱱᱟᱜ ᱢᱚᱱᱮ ᱨᱮᱫᱚ ᱢᱤᱫᱴᱟᱹᱝ ᱜᱮ ᱟᱸᱥ ᱛᱟᱦᱮᱸ ᱠᱟᱱᱟ ᱚᱠᱟᱨᱮ ᱟᱨ ᱪᱮᱫ ᱞᱮᱠᱟᱨᱮ ᱚᱞ ᱪᱤᱠᱤ ᱫᱚ ᱠᱤᱱ ᱧᱟᱢᱟ ᱾ ᱚᱱᱟᱛᱮ ᱚᱞᱚᱜ ᱟᱥᱲᱟ ᱨᱮ ᱩᱞᱯᱷᱟᱹ ᱚᱠᱛᱚ ᱠᱚᱨᱮ ᱜᱤᱫᱽᱨᱟᱹ ᱠᱚ ᱥᱟᱶ ᱵᱟᱝ ᱡᱚᱴᱟᱣ ᱠᱟᱛᱮ ᱜᱟᱰᱟ ᱟᱲᱮ ᱨᱮ ᱫᱩᱲᱩᱵ ᱠᱟᱛᱮ ᱠᱟᱰᱮᱡ ᱠᱚᱛᱮ ᱪᱮᱫ ᱠᱚᱪᱚ ᱱᱟᱱᱟ ᱦᱩᱱᱟᱹᱨ ᱵᱷᱚᱲᱚᱠ ᱜᱮᱭ ᱵᱮᱱᱟᱣ ᱵᱟᱲᱟᱭ ᱛᱟᱦᱮᱸᱫ ᱾
ᱱᱚᱝᱠᱟ ᱜᱮ ᱫᱤᱱ ᱛᱟᱭᱚᱢ ᱫᱤᱱ ᱯᱟᱨᱚᱢ ᱤᱫᱤ ᱮᱱᱟ ᱾ ᱢᱤᱫ ᱫᱤᱢ ᱫᱚ ᱥᱟᱶᱱᱟ ᱢᱩᱨᱢᱩ ᱫᱚ ᱨᱚᱜᱷᱩ ᱢᱩᱨᱢᱩ ᱴᱷᱮᱱ ᱥᱮᱱ ᱠᱟᱛᱮᱭ ᱢᱮᱛᱟᱭ ᱠᱟᱱᱟ, ᱵᱷᱚᱬᱡᱟ ᱜᱳ ᱟᱢ ᱫᱚ ᱦᱟᱯᱮᱱ ᱫᱤᱱ ᱨᱮ ᱟᱹᱰᱤ ᱢᱟᱨᱟᱝ ᱵᱟᱰᱚᱦᱤᱭᱟᱹᱢ ᱵᱮᱱᱟᱣᱜ-ᱟ ᱾ ᱱᱚᱝᱠᱟ ᱛᱮᱜᱮ ᱚᱸᱰᱮ ᱠᱷᱚᱱ ᱚᱞᱚᱜ ᱫᱚ ᱠᱤᱱ ᱥᱟᱹᱛ ᱠᱮᱫ-ᱟ ᱾
ᱵᱚᱦᱚᱲᱫᱟ ᱨᱮ ᱚᱞᱚᱜ
ᱜᱟᱺᱵᱷᱟᱹᱨᱤᱭᱟᱹ ᱠᱷᱚᱱ ᱚᱞᱚᱜ ᱥᱟᱹᱛ ᱠᱟᱛᱮ ᱨᱚᱜᱷᱩ ᱟᱨ ᱥᱟᱶᱱᱟ ᱫᱚ ᱵᱚᱦᱚᱲᱫᱟ ᱚᱞᱚᱜ ᱟᱥᱲᱟ ᱠᱤᱱ ᱥᱮᱱ ᱮᱱᱟ ᱾ ᱑᱙᱒᱐ ᱥᱟᱞᱮᱨᱮ ᱵᱚᱦᱚᱲᱫᱟ ᱨᱮ ᱚᱞᱚᱜ ᱚᱠᱛᱚ ᱨᱚᱜᱷᱩᱱᱟᱛᱷ ᱟᱨ ᱥᱟᱶᱱᱟ ᱛᱤᱠᱤᱱ ᱫᱚ ᱵᱚᱦᱚᱲᱫᱟ ᱡᱟᱯᱟᱜ ᱵᱟᱱᱟ ᱰᱩᱸᱜᱽᱨᱤ ᱨᱮ ᱰᱮᱨᱟ ᱵᱟᱥᱟ ᱠᱚ ᱛᱟᱦᱮᱸ ᱠᱟᱱᱟ ᱾ ᱵᱟᱱᱟ ᱰᱩᱸᱜᱽᱨᱤ ᱰᱮᱨᱟ ᱵᱟᱥᱟ ᱫᱚ ᱪᱩᱱᱩ ᱰᱮᱨᱟ ᱢᱮᱱᱛᱮ ᱠᱚ ᱧᱩᱛᱩᱢ ᱞᱮᱫ ᱛᱟᱦᱮᱸᱫ ᱾ ᱯᱟᱲᱦᱟᱣ ᱚᱠᱛᱚ ᱨᱮᱦᱚᱸ ᱨᱚᱜᱷᱩᱱᱟᱛᱷ ᱟᱨ ᱥᱟᱶᱱᱟ ᱡᱟᱹᱛᱤ ᱥᱟᱶᱛᱟ ᱟᱨ ᱫᱷᱚᱨᱚᱢ ᱠᱟᱛᱷᱟ ᱠᱚ ᱜᱮ ᱠᱤᱱ ᱩᱭᱦᱟᱹᱨ ᱵᱟᱲᱟ ᱮᱫ ᱛᱟᱦᱮᱸᱫ ᱾ ᱚᱞᱚᱜ ᱯᱟᱲᱦᱟᱣ ᱚᱠᱛᱚ ᱨᱮᱦᱚᱸ ᱡᱟᱹᱛᱤ ᱥᱟᱶᱛᱟ ᱜᱮ ᱟᱹᱨᱥᱤ ᱞᱮᱠᱟ ᱡᱷᱟᱞᱠᱟᱣ ᱟᱹᱠᱤᱱ ᱠᱟᱱ ᱛᱟᱦᱮᱸᱫ ᱾ ᱨᱚᱜᱷᱩᱱᱟᱛᱷ ᱟᱡ ᱵᱟᱵᱟ ᱫᱚ ᱚᱡᱷᱟ ᱴᱷᱮᱱ ᱠᱷᱚᱱ ᱮ ᱟᱸᱡᱚᱢ ᱞᱮᱫ ᱛᱟᱦᱮᱸᱫ, ᱨᱚᱜᱷᱩᱱᱟᱛᱷ ᱫᱚ ᱠᱟᱹᱯᱤ ᱵᱳᱨᱳ ᱵᱚᱸᱜᱟ ᱛᱷᱩᱢ ᱛᱮᱜᱮᱭ ᱚᱯᱮᱞ ᱟᱠᱟᱱᱟ ᱾ ᱚᱱᱟᱛᱮ ᱚᱞᱚᱜ ᱡᱚᱦᱚᱜ ᱦᱚᱸ ᱞᱮᱛᱟᱲ ᱜᱮ ᱚᱠᱚᱭ ᱪᱚᱭ ᱞᱟᱹᱭ ᱟᱭ ᱞᱮᱠᱟᱭ ᱵᱩᱡᱷᱟᱹᱣ ᱮᱫ ᱛᱟᱦᱮᱸᱫ ᱾ ᱵᱟᱱᱟ ᱰᱩᱸᱜᱽᱨᱤ ᱪᱩᱱᱩ ᱰᱮᱨᱟ ᱨᱮ ᱫᱤᱱᱟᱹᱢ ᱚᱞᱚᱜ ᱵᱮᱲᱟ ᱨᱮ ᱚᱠᱟ ᱞᱮᱠᱟᱱ ᱫᱟᱲᱮ ᱪᱚᱝ ᱟᱹᱭᱠᱟᱹᱣ ᱠᱟᱛᱮ ᱟᱡᱟᱜ ᱦᱚᱲᱢᱚ ᱠᱚ ᱦᱟᱢᱟᱞ ᱜᱮᱭ ᱵᱩᱡᱷᱟᱹᱣ ᱛᱟᱦᱮᱸᱫ ᱾ ᱚᱱᱟ ᱫᱟᱲᱮ ᱫᱚ ᱵᱤᱫᱩ ᱪᱟᱸᱫᱟᱱ ᱚᱞ ᱵᱤᱨᱫᱟᱹ ᱜᱩᱱ ᱫᱟᱲᱮ ᱜᱮ ᱛᱟᱦᱮᱸ ᱠᱟᱱᱟ ᱾ ᱚᱱᱠᱟ ᱛᱮᱜᱮ ᱮᱢ.ᱤ. ᱚᱞᱚᱜ ᱫᱚ ᱑᱙᱒᱒ ᱥᱟᱞᱮ ᱨᱮᱭ ᱥᱟᱹᱛ ᱠᱮᱫᱼᱟ ᱾
ᱤᱱᱟᱹ ᱛᱟᱭᱚᱢ ᱛᱤᱱᱟᱹᱝ ᱫᱤᱱ ᱜᱟᱱ ᱫᱚ ᱚᱞ ᱯᱟᱲᱦᱟᱣ ᱠᱟᱹᱢᱤ ᱠᱚ ᱰᱤᱜᱟᱹ ᱧᱚᱜ ᱠᱟᱛᱮ ᱠᱟᱰᱮᱡ ᱠᱚᱛᱮ ᱦᱟᱱᱟ ᱱᱷᱟᱣᱟᱭ ᱵᱮᱱᱟᱣ ᱛᱟᱦᱮᱸᱫ, ᱟᱨ ᱚᱱᱟ ᱠᱚ ᱧᱮᱞ ᱠᱟᱛᱮ ᱜᱮ ᱥᱟᱶᱱᱟ ᱢᱩᱨᱢᱩ ᱫᱚ ᱩᱱ ᱡᱚᱦᱚᱜ ᱨᱮᱜᱮᱭ ᱢᱮᱱ ᱞᱮᱫ ᱛᱟᱦᱮᱸᱫ, ᱱᱩᱭ ᱫᱚ ᱦᱟᱯᱮᱱ ᱫᱤᱱ ᱨᱮ ᱟᱹᱰᱤ ᱢᱟᱨᱟᱝ ᱠᱟᱹᱨᱤᱠᱚᱞ ᱜᱮᱭ ᱵᱮᱱᱟᱣᱜᱼᱟ ᱾
ᱵᱟᱹᱨᱯᱟᱫᱟ ᱨᱮ ᱚᱞᱚᱜ ᱚᱠᱛᱚ
᱑᱙᱒᱔ ᱥᱟᱞᱮ ᱨᱮ ᱢᱮᱴᱨᱤᱠ ᱯᱟᱲᱦᱟᱣ ᱞᱟᱹᱜᱤᱫ ᱫᱚ ᱵᱟᱹᱨᱯᱟᱫᱟ ᱩᱱᱩᱥᱩᱞ ᱟᱥᱲᱟ ᱨᱮ ᱵᱷᱩᱨᱛᱤᱭ ᱦᱟᱛᱟᱣ ᱠᱮᱫᱼᱟ ᱾ ᱚᱸᱰᱮ ᱚᱞᱚᱜ ᱚᱠᱛᱚ ᱨᱮᱦᱚᱸ ᱟᱡ ᱫᱚ ᱵᱟᱹᱲᱛᱤ ᱚᱠᱛᱚ ᱫᱚ ᱱᱤᱪᱚᱞ ᱚᱠᱛᱚ ᱨᱮ ᱫᱩᱲᱩᱵ ᱠᱟᱛᱮ ᱪᱮᱫ ᱠᱚᱪᱚᱭ ᱩᱭᱦᱟᱹᱨ ᱵᱟᱲᱟᱭ ᱛᱟᱦᱮᱸᱫ ᱾ ᱨᱚᱜᱷᱩᱱᱟᱛᱷ ᱵᱟᱹᱨᱯᱟᱫᱟ ᱨᱮᱭ ᱚᱞᱚᱜ ᱠᱟᱱ ᱵᱮᱲᱟ ᱨᱮᱫᱚ ᱥᱟᱶᱱᱟ ᱢᱩᱨᱢᱩ ᱫᱚ ᱵᱟᱹᱨᱯᱟᱫᱟ ᱨᱮᱜᱮ ᱢᱟᱪᱮᱛ ᱴᱨᱮᱱᱤᱝ ᱮ ᱮᱢᱮᱫ ᱛᱟᱦᱮᱸ ᱠᱟᱱᱟ ᱾ ᱚᱱᱠᱟ ᱛᱮ ᱢᱤᱫ ᱫᱤᱱ ᱫᱚ ᱴᱟᱴᱠᱟ ᱜᱮ ᱠᱤᱱ ᱧᱟᱯᱟᱢ ᱮᱱᱟ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱨᱚᱜᱷᱩᱱᱟᱛᱷ ᱫᱚ ᱵᱤᱱᱤᱰ ᱮᱢ ᱥᱟᱹᱛ ᱠᱟᱛᱮ ᱚᱲᱟᱜ ᱮ ᱨᱩᱣᱟᱹᱲ ᱮᱱᱟ ᱾ ᱢᱮᱴᱨᱤᱠ ᱥᱟᱹᱛ ᱠᱟᱛᱮ ᱨᱮᱦᱚᱸ ᱵᱟᱹᱨᱯᱟᱫᱟ ᱨᱮᱜᱮ ᱟᱯᱨᱮᱱᱴᱤᱥ ᱴᱨᱮᱱᱤᱝ ᱥᱮᱱᱴᱚᱨ ᱨᱮᱭ ᱵᱷᱩᱨᱛᱤ ᱮᱱᱟ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱟᱯᱨᱮᱱᱴᱤᱥ ᱦᱚᱸᱭ ᱯᱩᱨᱟᱹᱣ ᱠᱮᱫᱼᱟ ᱾ ᱚᱱᱟ ᱪᱟᱞᱟᱣ ᱨᱮᱜᱮ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱚᱞ ᱪᱤᱠᱤ ᱦᱚᱸᱭ ᱵᱮᱱᱟᱣ ᱥᱟᱹᱛ ᱞᱮᱫ ᱛᱟᱦᱮᱸᱫ ᱾ ᱚᱱᱟ ᱜᱮ ᱢᱟᱢᱚ ᱥᱟᱶᱱᱟ ᱢᱩᱨᱢᱩᱭ ᱫᱮᱠᱷᱟᱣ ᱧᱚᱜ ᱟᱫᱮᱛᱮ ᱑᱙᱒᱕ ᱥᱟᱞᱮ ᱨᱮᱫᱚ ᱚᱞ ᱪᱤᱠᱤ ᱫᱤᱥᱚᱢ ᱦᱚᱲ ᱥᱟᱢᱟᱝ ᱨᱮᱭ ᱩᱫᱩᱜ ᱥᱚᱫᱚᱨ ᱠᱮᱫᱼᱟ ᱾ ᱩᱱ ᱡᱚᱦᱚᱜ ᱜᱮ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱥᱟᱶᱱᱟ ᱢᱩᱨᱢᱩ ᱴᱷᱮᱱ ᱮ ᱞᱟᱹᱭ ᱥᱚᱫᱚᱨ ᱞᱮᱫ ᱛᱟᱦᱮᱸᱫ ᱚᱱᱟ ᱪᱤᱠᱤ ᱠᱚᱫᱚ ᱡᱚᱛᱚ ᱫᱷᱟᱹᱨᱛᱤ ᱟᱨᱵᱟᱝ ᱫᱷᱟᱹᱨᱛᱤ ᱨᱮ ᱢᱮᱱᱟᱜ ᱡᱟᱭ ᱠᱚᱨᱮ ᱠᱷᱚᱱ ᱜᱮᱭ ᱵᱮᱱᱟᱣ ᱡᱩᱛ ᱟᱠᱟᱫᱼᱟ ᱾
ᱪᱟᱹᱠᱨᱤ ᱟᱨ ᱥᱟᱶᱛᱟ ᱠᱟᱹᱢᱤ
ᱟᱯᱨᱮᱱᱴᱤᱥ ᱥᱟᱹᱛ ᱠᱟᱛᱮ ᱠᱟᱹᱢᱤ ᱠᱚ ᱜᱮ ᱵᱟᱹᱠᱤᱱ ᱧᱟᱢ ᱴᱷᱤᱠ ᱞᱮᱫ ᱠᱷᱟᱱ ᱞᱩᱜᱽᱲᱤ ᱵᱮᱱᱟᱣ ᱠᱟᱹᱨᱜᱟᱲ ᱨᱮ ᱠᱟᱹᱢᱤ ᱠᱤᱱ ᱫᱷᱩᱨᱟᱹᱣ ᱮᱱᱟ ᱾ ᱱᱚᱝᱠᱟ ᱜᱮ ᱡᱚᱛᱚᱣᱟᱜ ᱠᱟᱹᱢᱤ ᱨᱮᱜᱮ ᱟᱡᱟᱜ ᱫᱟᱲᱮ ᱫᱚ ᱦᱟᱦᱟᱲᱟ ᱜᱮ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱠᱷᱟᱹᱛᱤᱨ ᱜᱮ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩᱣᱟᱜ ᱠᱟᱛᱷᱟ ᱫᱚ ᱢᱚᱭᱩᱨᱵᱷᱚᱸᱡᱽ ᱨᱤᱱᱤᱡ ᱢᱚᱦᱟᱨᱟᱡᱟ ᱴᱷᱮᱱ ᱥᱮᱴᱮᱨ ᱮᱱᱟ ᱾ ᱚᱱᱟ ᱠᱷᱟᱹᱛᱤᱨ ᱢᱤᱫ ᱫᱤᱱ ᱥᱮᱛᱟᱜ ᱨᱮ ᱰᱨ. ᱯᱤ.ᱠᱮ. ᱥᱮᱱ ᱟᱨ ᱵᱷᱚᱸᱡᱽ ᱨᱟᱡᱟᱭᱤᱡ ᱫᱮᱣᱟᱱ ᱨᱚᱜᱷᱩᱱᱟᱛᱷ ᱢᱩᱨᱢᱩᱣᱟᱜ ᱠᱟᱹᱢᱤ ᱧᱮᱞ ᱠᱤᱱ ᱦᱮᱡ ᱮᱱᱟ ᱾ ᱨᱚᱜᱷᱩᱱᱟᱛᱷ ᱟᱜ ᱠᱟᱹᱢᱤ ᱧᱮᱞᱛᱮ ᱰᱨ. ᱥᱮᱱ ᱟᱨ ᱨᱟᱡᱟᱭᱤᱡ ᱫᱮᱣᱟᱱ ᱟᱹᱰᱤ ᱡᱩᱨ ᱠᱤᱱ ᱠᱩᱥᱤ ᱮᱱᱟ ᱾ ᱟᱡᱟᱜ ᱠᱟᱹᱢᱤᱦᱚᱨᱟ ᱥᱮᱬᱟᱭ ᱢᱟ ᱢᱮᱱᱛᱮ ᱩᱱᱤ ᱫᱚ ᱠᱚᱞᱠᱟᱛᱟ ᱥᱮᱨᱟᱢᱯᱩᱨ ᱟᱨ ᱜᱚᱥᱟᱵᱟ ᱥᱮᱪᱮᱫ ᱛᱟᱞᱢᱟᱭ ᱵᱷᱮᱡᱟ ᱞᱮᱫᱮ ᱛᱟᱦᱮᱸᱫ ᱾
᱑᱙᱓᱐-᱓᱑ ᱨᱮ ᱵᱟᱹᱨᱯᱟᱫᱟ ᱨᱮ ᱠᱞᱟᱨᱠ ᱪᱟᱹᱠᱨᱤᱭ ᱪᱟᱹᱠᱨᱤ ᱠᱮᱫᱼᱟ ᱾ ᱠᱚᱞᱠᱟᱛᱟ ᱠᱷᱚᱱ ᱨᱩᱣᱟᱹᱲ ᱠᱟᱛᱮ ᱯᱩᱨᱱᱚ ᱪᱚᱸᱫᱽᱨᱚ ᱤᱱᱰᱚᱥᱴᱨᱤᱭᱮᱞ ᱤᱱᱥᱴᱤᱪᱩᱴ ᱵᱟᱹᱨᱯᱟᱫᱟ ᱨᱮ ᱢᱤᱫ ᱩᱫᱩᱜᱤᱭᱟᱹ ᱞᱮᱠᱟᱛᱮᱭ ᱠᱷᱚᱸᱡᱟ ᱮᱱᱟ ᱾ ᱖ ᱪᱟᱸᱫᱚ ᱛᱟᱭᱚᱢ ᱠᱷᱟᱱ ᱜᱮ ᱟᱡᱤᱡ ᱡᱟᱱᱟᱢ ᱵᱟᱵᱟ ᱫᱚᱭ ᱵᱚᱸᱜᱟ ᱫᱤᱥᱚᱢ ᱮᱱᱟ ᱾ ᱠᱷᱟᱱ ᱜᱮ ᱜᱩᱨᱩ ᱜᱚᱢᱠᱮ ᱫᱚ ᱤᱱᱥᱴᱤᱪᱩᱴ ᱵᱟᱹᱜᱤ ᱛᱮ ᱦᱩᱭ ᱟᱫᱮᱭᱟ ᱾ ᱫᱟᱭᱟ ᱛᱮ ᱫᱮᱣᱟᱱ ᱥᱟᱦᱮᱵᱽ ᱫᱚ ᱟᱡᱟᱜ ᱵᱟᱡᱟᱨ ᱥᱩᱨ ᱵᱚᱰᱟᱢᱛᱟᱹᱲᱤᱭᱟᱹ ᱛᱟᱱᱟᱞᱟ ᱟᱥᱲᱟ ᱨᱮ ᱢᱩᱬᱩᱛ ᱢᱟᱪᱮᱛ ᱞᱮᱠᱟᱛᱮ ᱚᱸᱰᱮᱭ ᱩᱪᱟᱹᱲ ᱠᱟᱫᱮᱭᱟ ᱾ ᱑᱙᱓᱓ ᱥᱟᱞᱮ ᱨᱮ ᱡᱚᱠᱷᱚᱱ ᱵᱟᱹᱨᱯᱟᱫᱟ ᱨᱮ ᱟᱯᱨᱮᱱᱴᱤᱥ ᱛᱟᱞᱢᱟ ᱨᱮᱭ ᱛᱟᱦᱮᱸ ᱠᱟᱱᱟ ᱩᱱ ᱡᱚᱦᱚᱜ ᱠᱷᱚᱱ ᱜᱮ ᱚᱞ ᱪᱤᱠᱤ ᱤᱫᱤ ᱠᱟᱛᱮ ᱢᱚᱱ ᱫᱚᱭ ᱠᱮᱴᱮᱡ ᱞᱮᱫ ᱛᱟᱦᱮᱸᱫᱚᱜ ᱾ ᱵᱚᱰᱟᱢᱛᱟᱹᱲᱤᱭᱟᱹ ᱛᱟᱞᱢᱟ ᱟᱥᱲᱟ ᱨᱮ ᱛᱟᱦᱮᱸ ᱠᱟᱛᱮ ᱜᱮ ᱚᱞ ᱪᱤᱠᱤ ᱛᱮᱫᱚ ᱦᱚᱲ ᱠᱚᱭ ᱥᱮᱪᱮᱫ ᱵᱟᱲᱟ ᱞᱮᱫ ᱠᱚ ᱛᱟᱦᱮᱸᱫ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱫᱚ ᱫᱷᱟᱲᱟᱯ ᱢᱤᱥᱤᱱ ᱮ ᱵᱮᱱᱟᱣ ᱠᱮᱫᱼᱟ ᱾ ᱟᱨ ᱫᱤᱥᱚᱢ ᱦᱚᱲ ᱠᱚ ᱥᱟᱢᱟᱝ ᱨᱮᱭ ᱥᱟᱢᱟᱝ ᱞᱮᱫᱼᱟ ᱾ ᱱᱚᱶᱟ ᱧᱮᱞ ᱠᱟᱛᱮ ᱫᱤᱥᱚᱢ ᱦᱚᱲ ᱠᱚ ᱟᱹᱰᱤ ᱜᱮ ᱠᱚ ᱢᱟᱹᱱ ᱥᱟᱨᱦᱟᱣ ᱞᱮᱫᱮᱭᱟ ᱾ ᱵᱚᱰᱟᱢᱛᱟᱹᱲᱤᱭᱟᱹ ᱟᱥᱲᱟ ᱨᱮᱜᱮ ᱢᱟᱪᱮᱛ ᱮ ᱛᱟᱦᱮᱸ ᱠᱟᱱ ᱚᱠᱛᱚ ᱨᱮᱜᱮᱭ ᱵᱷᱟᱹᱵᱤ ᱞᱮᱫ ᱛᱟᱦᱮᱸᱫ ᱡᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱵᱟᱹᱭ ᱵᱟᱹᱭ ᱛᱮ ᱢᱟᱞᱚᱴ ᱤᱫᱤᱜ ᱠᱟᱱᱟ ᱾ ᱚᱠᱟ ᱞᱮᱠᱟᱨᱮ ᱵᱟᱧᱪᱟᱣ ᱛᱟᱦᱮᱸᱱᱟ ᱚᱱᱟ ᱜᱮ ᱜᱷᱟᱱᱮᱭ ᱩᱭᱦᱟᱹᱨ ᱵᱟᱲᱟᱭᱮᱫ ᱛᱟᱦᱮᱸᱫ ᱾ ᱚᱱᱟᱛᱮ ᱑᱙᱓᱖ ᱨᱮ ᱢᱤᱫᱴᱟᱹᱝ ᱦᱚᱨ ᱥᱮᱨᱮᱧ ᱮ ᱚᱞ ᱠᱮᱫᱼᱟ ᱾
ᱚᱱᱟ ᱛᱟᱭᱚᱢ ᱑᱙᱓᱘ ᱥᱟᱞᱮ ᱨᱮ ᱫᱚ ᱵᱟᱹᱨᱯᱟᱫᱟ ᱩᱫᱮᱞᱟ ᱨᱮ ᱨᱚᱜᱷᱩ, ᱥᱟᱣᱱᱟ ᱟᱨ ᱥᱩᱱᱟᱹᱨᱟᱢ ᱢᱮᱥᱟ ᱠᱟᱛᱮ ᱪᱷᱟᱯᱟ ᱠᱚᱲ ᱢᱤᱥᱤᱱ ᱠᱚ ᱩᱫᱩᱜ ᱥᱚᱫᱚᱨ ᱞᱮᱫᱼᱟ ᱾ ᱟᱡᱟᱜ ᱢᱟᱬᱟᱝ ᱚᱞ ᱜᱟᱭᱟᱱ ᱯᱚᱛᱚᱵ ᱫᱚ ᱵᱤᱫᱩ ᱪᱟᱸᱫᱟᱱ ᱯᱚᱛᱚᱵ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱨᱮ ᱫᱚ ᱢᱤᱫ ᱵᱚᱸᱜᱟ ᱫᱟᱲᱮ ᱦᱚᱸ ᱛᱟᱦᱮᱸ ᱠᱟᱱᱟ ᱾ ᱱᱚᱶᱟ ᱜᱟᱭᱟᱱ ᱯᱚᱛᱚᱵ ᱫᱚ ᱑᱙᱔᱒ ᱥᱟᱞᱮ ᱨᱮ ᱰᱟᱦᱟᱨᱰᱤ, ᱰᱟᱸᱰᱵᱩᱥ ᱨᱮ ᱯᱩᱭᱞᱩ ᱛᱮᱠᱚ ᱩᱫᱩᱜ ᱥᱚᱫᱚᱨ ᱞᱮᱫᱼᱟ ᱾ ᱚᱱᱟ ᱜᱮ ᱥᱟᱱᱛᱟᱲ ᱠᱚᱣᱟᱜ ᱯᱩᱭᱞᱩ ᱢᱮᱞᱟᱝᱠᱤ ᱜᱟᱭᱟᱱ ᱫᱚᱠᱚ ᱢᱮᱛᱟᱜᱼᱟ ᱾ ᱚᱱᱠᱟ ᱜᱮ ᱢᱟᱪᱮᱛ ᱠᱟᱹᱢᱤ ᱛᱩᱞᱩᱡ ᱟᱡ ᱫᱚ ᱟᱹᱰᱤ ᱜᱟᱱ ᱦᱟᱦᱟᱲᱟᱱ ᱠᱟᱹᱢᱤ ᱠᱚᱭ ᱠᱟᱹᱢᱤᱭᱮᱫᱼᱟ ᱢᱮᱱᱛᱮ ᱟᱥᱲᱟ ᱨᱤᱱᱤᱡ ᱥᱮᱪᱮᱫ ᱪᱟᱪᱟᱞᱤᱭᱟᱹ ᱚᱱᱟ ᱠᱚᱭ ᱟᱸᱡᱚᱢ ᱠᱮᱫᱼᱟ ᱾ ᱚᱱᱟᱛᱮ ᱢᱤᱫ ᱫᱤᱱ ᱫᱚ ᱟᱥᱲᱟ ᱦᱤᱨᱤ ᱞᱮᱠᱟᱭ ᱦᱮᱡ ᱞᱮᱱᱟ ᱾ ᱟᱥᱲᱟ ᱦᱤᱨᱤ ᱠᱟᱛᱮᱭ ᱧᱮᱞ ᱠᱮᱫᱼᱟ ᱟᱥᱲᱟ ᱦᱚᱸ ᱵᱷᱟᱹᱜᱤ ᱜᱮᱭᱟ ᱟᱨ ᱟᱪᱮᱛᱤᱭᱟᱹ ᱠᱚᱦᱚᱸ ᱟᱹᱰᱤ ᱵᱷᱟᱹᱜᱤ ᱜᱮᱠᱚ ᱚᱞᱚᱜ ᱠᱟᱱᱟ ᱢᱮᱱᱛᱮᱭ ᱵᱟᱰᱟᱭ ᱤᱫᱤ ᱠᱮᱫᱼᱟ ᱾ ᱤᱱᱟᱹ ᱛᱟᱭᱚᱢ ᱑᱙᱔᱒ ᱥᱟᱞᱮ ᱨᱮ ᱯᱚᱸᱰᱮᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱟᱨ ᱥᱟᱣᱱᱟ ᱢᱩᱨᱢᱩ ᱫᱚ ᱵᱚᱰᱟᱢᱛᱟᱹᱲᱤᱭᱟᱹ ᱨᱮ ᱢᱤᱫ ᱚᱞ ᱪᱤᱠᱤ ᱪᱷᱟᱨᱟᱣ ᱢᱤᱫᱩᱱ ᱠᱤᱱ ᱵᱮᱨᱮᱫ ᱠᱮᱫᱼᱟ ᱾ ᱚᱞ ᱪᱤᱠᱤ ᱟᱨ ᱜᱩᱨᱩ ᱜᱚᱢᱠᱮ ᱭᱟᱜ ᱵᱮᱱᱟᱣ ᱫᱷᱟᱲᱟᱯ ᱢᱤᱥᱤᱱ ᱧᱮᱞ ᱛᱮ ᱟᱥᱲᱟ ᱪᱟᱪᱞᱟᱣᱤᱭᱟᱹ ᱫᱚ ᱟᱹᱰᱤ ᱜᱮᱭ ᱨᱟᱹᱥᱠᱟᱹ ᱮᱱᱟ ᱾ ᱫᱤᱥᱚᱢ ᱦᱚᱲ ᱥᱟᱢᱟᱝ ᱨᱮ ᱩᱫᱩᱜ ᱥᱚᱫᱚᱨ ᱚᱪᱚᱭ ᱨᱮᱱᱟᱜ ᱡᱤᱢᱟᱹ ᱦᱚᱸ ᱫᱮᱣᱟᱱ ᱥᱟᱦᱮᱵᱽ ᱜᱮᱭ ᱜᱚᱜ ᱠᱮᱫᱼᱟ ᱾
ᱥᱟᱱᱟᱢᱟᱜ ᱠᱟᱹᱢᱤ ᱧᱮᱞ ᱛᱮ ᱢᱤᱫ ᱫᱤᱱ ᱫᱚ ᱯᱨᱚᱛᱟᱯ ᱪᱚᱸᱫᱽᱨᱚ ᱵᱷᱚᱸᱡᱽ ᱫᱮᱣ, ᱵᱷᱚᱸᱡᱽ ᱫᱤᱥᱚᱢ ᱨᱤᱱᱤᱡ ᱢᱟᱦᱟᱨᱟᱡᱟ ᱨᱚᱜᱷᱩ ᱢᱩᱨᱢᱩ ᱛᱮᱫ ᱮ ᱫᱮᱞᱟ ᱟᱫᱮᱭᱟ ᱾ ᱡᱮᱢᱚᱱ ᱚᱱᱟ ᱠᱚ ᱨᱟᱡᱟ ᱥᱟᱢᱟᱝ ᱨᱮ ᱯᱟᱨᱦᱟᱲ ᱥᱟᱺᱦᱤᱡ ᱨᱚᱲ ᱠᱟᱛᱮᱭ ᱵᱩᱡᱷᱟᱹᱣ ᱟᱭ ᱢᱟ ᱢᱮᱱᱛᱮᱫ ᱮ ᱠᱩᱞᱤ ᱵᱩᱴᱟᱹ ᱠᱮᱫᱮᱭᱟ ᱾ ᱨᱚᱜᱷᱩ ᱢᱩᱨᱢᱩ ᱦᱚᱸ ᱜᱟᱛᱮ ᱠᱚ ᱥᱟᱶ ᱥᱮᱱ ᱠᱟᱛᱮ ᱟᱹᱰᱤ ᱱᱟᱯᱟᱭ ᱥᱟᱺᱦᱤᱡ ᱮ ᱵᱩᱡᱷᱟᱹᱣ ᱟᱫᱮᱭᱟ ᱾ ᱚᱱᱟ ᱠᱚ ᱠᱟᱛᱷᱟ ᱢᱟᱦᱟᱨᱟᱡᱟ ᱦᱚᱸ ᱟᱹᱰᱤ ᱱᱟᱯᱟᱭ ᱥᱟᱺᱦᱤᱡ ᱜᱮᱭ ᱵᱩᱡᱷᱟᱹᱣ ᱮᱱᱟ ᱟᱨ ᱜᱩᱨᱩ ᱜᱚᱢᱠᱮᱭᱟᱜ ᱠᱟᱹᱢᱤ ᱫᱤᱥᱚᱢ ᱡᱟᱠᱟᱛ ᱨᱮ ᱥᱟᱨ ᱥᱟᱹᱜᱩᱱ ᱠᱚᱜ ᱢᱟ ᱢᱮᱱᱛᱮᱭ ᱢᱮᱱ ᱠᱮᱫ-ᱟ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱨᱚᱜᱷᱩᱱᱟᱛᱷ ᱫᱚ ᱵᱚᱰᱟᱢᱛᱟᱹᱲᱤᱭᱟᱹ ᱛᱟᱞᱢᱟ ᱟᱥᱲᱟ ᱠᱷᱚᱱᱟᱜ ᱨᱟᱭᱨᱚᱝᱯᱩᱨ ᱩᱱᱩᱥᱩᱞ ᱟᱥᱲᱟ ᱛᱮᱭ ᱩᱪᱟᱹᱲ ᱠᱟᱫᱮᱭᱟ ᱾ ᱤᱠᱷᱟᱹᱱ ᱱᱤᱭᱟᱹ ᱚᱠᱛᱚ ᱨᱮ ᱨᱚᱜᱷᱩᱱᱟᱛᱷ ᱤᱡ ᱵᱟᱵᱟ ᱫᱚᱭ ᱵᱚᱸᱜᱟᱛᱟᱞᱟ ᱮᱱ ᱠᱷᱟᱱ ᱜᱷᱟᱨᱚᱸᱡᱽ ᱨᱮᱱᱟᱜ ᱡᱚᱛᱚ ᱟᱺᱜᱤᱵᱷᱟᱨ ᱟᱡ ᱪᱮᱛᱟᱱ ᱨᱮ ᱞᱟᱫᱮ ᱮᱱᱟ ᱾ ᱚᱲᱟᱜ ᱠᱚᱨᱮᱱᱟᱜ ᱟᱹᱰᱤ ᱜᱟᱱ ᱮᱴᱠᱮᱴᱚᱬᱮ ᱠᱚ ᱵᱟᱭ ᱥᱟᱢᱟᱝ ᱫᱟᱲᱮᱭᱟᱫ ᱠᱷᱟᱱ ᱖.᱒.᱑᱙᱔᱖ ᱨᱮ ᱪᱟᱹᱠᱨᱤ ᱠᱷᱚᱱ ᱫᱚ ᱡᱤᱨᱟᱹᱣ ᱮ ᱦᱟᱛᱟᱣ ᱠᱮᱫ-ᱟ ᱾ ᱚᱱᱟ ᱥᱟᱞᱮ ᱨᱮᱜᱮ ᱚᱲᱟᱜ ᱨᱮ ᱛᱟᱦᱮᱸᱱ ᱛᱩᱞᱩᱡ ᱠᱷᱮᱨᱣᱟᱲ ᱵᱤᱨ ᱧᱩᱛᱩᱢ ᱟᱱᱟᱜ ᱢᱤᱫ ᱜᱟᱭᱟᱱ ᱯᱩᱛᱷᱤᱭ ᱚᱞ ᱡᱩᱛ ᱠᱮᱫ-ᱟ ᱾ ᱚᱲᱟᱜ ᱨᱮ ᱮᱴᱠᱮᱴᱚᱬᱮ ᱪᱟᱞᱟᱜ ᱠᱟᱱ ᱛᱩᱞᱩᱡ ᱦᱚᱸ ᱚᱞ ᱥᱚᱢᱤᱛᱤ ᱞᱟᱹᱜᱤᱫ ᱑᱙᱔᱖ ᱥᱟᱞᱮ ᱨᱮ ᱵᱚᱫᱽᱲᱟ ᱨᱮ ᱢᱤᱫ ᱢᱟᱨᱟᱝ ᱢᱤᱫᱩᱱ ᱮ ᱦᱚᱦᱚ ᱠᱮᱫ-ᱟ ᱾
᱑᱙᱔᱗ ᱨᱮ ᱥᱤᱧᱚᱛ ᱫᱤᱥᱚᱢ ᱟᱹᱯᱱᱟᱹᱛ ᱮᱱᱟ ᱾ ᱨᱟᱡᱽᱟᱹᱨᱤ ᱦᱚᱲ ᱠᱚ ᱵᱷᱚᱸᱡᱽ ᱫᱤᱥᱚᱢ ᱡᱟᱠᱟᱛ ᱜᱚᱴᱟ ᱦᱩᱞᱩᱠ ᱫᱷᱩᱞᱩᱠ ᱨᱮᱠᱚ ᱛᱟᱦᱮᱸᱭᱮᱱᱟ ᱾ ᱚᱱᱟ ᱛᱟᱞᱟ ᱨᱮ ᱵᱤᱨᱟᱹᱫᱽ ᱯᱚᱱᱚᱛ ᱨᱮᱱᱟᱜ ᱠᱷᱮᱨᱣᱟᱲ ᱡᱟᱨᱯᱟ ᱥᱚᱢᱤᱛᱤ ᱨᱮᱭ ᱥᱮᱞᱮᱫ ᱮᱱᱟ ᱾ ᱟᱨ ᱨᱟᱡᱽᱟᱹᱨᱤ ᱨᱮ ᱡᱷᱟᱹᱞᱤᱜ ᱠᱷᱚᱱ ᱮ ᱵᱟᱧᱪᱟᱣ ᱮᱱᱟ ᱾ ᱟᱹᱰᱤ ᱫᱤᱱ ᱛᱟᱭᱚᱢ ᱨᱚᱜᱷᱩᱱᱟᱛᱷ ᱫᱚ ᱠᱚᱞᱠᱟᱛᱟ ᱨᱮᱱᱟᱜ ᱥᱚᱣᱜᱮᱥᱤ ᱪᱷᱟᱯᱟ ᱠᱷᱟᱱᱟ ᱨᱮ ᱛᱟᱦᱮᱸ ᱠᱟᱛᱮ ᱟᱡᱟᱜ ᱛᱤᱱᱟᱹᱝ ᱜᱟᱱ ᱯᱚᱛᱚᱵ ᱠᱚ ᱵᱤᱫᱩ ᱪᱟᱸᱫᱟᱱ , ᱠᱷᱮᱨᱣᱟᱲ ᱵᱤᱨ, ᱚᱞ ᱪᱮᱢᱮᱫ, ᱮᱞᱠᱷᱟ, ᱞᱟᱠᱪᱟᱨ ᱥᱮᱨᱮᱧ, ᱦᱤᱛᱟᱹᱞ, ᱫᱟᱲᱮᱜᱮ ᱫᱷᱚᱱ, ᱯᱟᱹᱨᱥᱤ ᱤᱛᱩᱱ, ᱟᱨ ᱯᱟᱹᱨᱥᱤ ᱫᱟᱨᱮ ᱯᱚᱛᱚᱵ ᱠᱚᱭ ᱪᱷᱟᱯᱟ ᱯᱟᱨᱥᱟᱞ ᱞᱮᱫ-ᱟ ᱾ ᱟᱡᱟᱜ ᱦᱟᱱᱟ ᱱᱷᱟᱣᱟ ᱦᱟᱦᱟᱲᱟᱱ ᱠᱟᱹᱢᱤ ᱠᱚ ᱧᱮᱞ ᱛᱮ ᱮᱢ. ᱮᱢ. ᱡᱩᱞᱤᱭᱟᱥ ᱯᱷᱤᱞ ᱦᱚᱸ ᱟᱡ ᱫᱚ ᱜᱩᱨᱩ ᱜᱚᱢᱠᱮ ᱢᱮᱱᱛᱮᱭ ᱜᱩᱱ ᱢᱟᱱᱟᱣ ᱞᱮᱫᱮ ᱛᱟᱦᱮᱸᱫ ᱾ ᱵᱤᱦᱟᱨ ᱨᱮᱱᱟᱜ ᱨᱟᱡᱽᱜᱟᱲ ᱯᱟᱴᱱᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱯᱟᱦᱴᱟ ᱠᱷᱚᱱ ᱦᱚᱸ ᱰᱚᱠᱴᱚᱨᱮᱴ ᱤᱱ ᱞᱤᱴᱮᱨᱮᱪᱚᱨ ᱟᱨ ᱥᱟᱱᱛᱟᱲᱤ ᱞᱤᱴᱮᱨᱮᱪᱚᱨ ᱩᱯᱟᱫᱷᱤᱭ ᱧᱟᱢ ᱞᱮᱫ ᱛᱟᱦᱮᱸᱫ ᱾ ᱚᱱᱟ ᱞᱮᱠᱟᱛᱮ ᱢᱟᱱᱚᱛᱟᱱ ᱡᱚᱭᱯᱟᱞ ᱥᱤᱝ ᱟᱨ ᱨᱚᱧᱡᱤᱛ ᱥᱤᱝ ᱵᱟᱨᱦᱟ ᱟᱨ ᱢᱟᱨᱴᱤᱱ ᱩᱨᱟᱝ ᱱᱩᱠᱩ ᱡᱚᱛᱚ ᱢᱮᱥᱟ ᱠᱟᱛᱮ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱚᱞ ᱜᱩᱨᱩ ᱢᱮᱱᱛᱮ ᱢᱟᱹᱱ ᱠᱚ ᱮᱢᱟ ᱦᱟᱫᱮ ᱛᱟᱦᱮᱸᱫ ᱾ ᱚᱞ ᱜᱩᱨᱩ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱑᱙᱗᱘ ᱥᱟᱞᱮ ᱨᱮ ᱳᱰᱤᱥᱟ ᱥᱚᱨᱠᱟᱨ ᱫᱚ ᱚᱞ ᱪᱤᱠᱤ ᱡᱟᱱᱟᱢ ᱫᱟᱛᱟ ᱢᱮᱱᱛᱮᱭ ᱢᱟᱱᱟᱣ ᱞᱮᱫᱮ ᱛᱟᱦᱮᱸᱫ ᱾ ᱥᱟᱶᱛᱮ ᱢᱟᱹᱱ ᱥᱟᱠᱟᱢ ᱦᱚᱸᱭ ᱪᱟᱞ ᱟᱫᱮ ᱛᱟᱦᱮᱸᱫ ᱾ ᱚᱱᱟ ᱵᱮᱲᱟ ᱨᱮᱫᱚ ᱱᱤᱲᱚᱢᱚᱬᱤ ᱨᱟᱣᱩᱛ ᱨᱟᱭ ᱥᱤᱨᱟᱹ ᱢᱚᱱᱛᱨᱤ ᱞᱮᱠᱟᱛᱮ ᱫᱚᱭ ᱛᱟᱦᱮᱸ ᱠᱟᱱᱟ ᱾
ᱜᱩᱨ
᱑᱗.᱑᱑.᱑᱙᱗᱙ ᱥᱟᱞᱮ ᱨᱮ ᱯᱩᱨᱩᱞᱤᱭᱟᱹ ᱦᱚᱱᱚᱛ ᱨᱮᱱᱟᱜ ᱠᱮᱫᱽᱵᱚᱱᱟ ᱦᱟᱴ ᱨᱮ ᱜᱮᱥᱟᱭ ᱜᱮᱥᱟᱭ ᱦᱚᱲ ᱠᱚ ᱥᱟᱢᱟᱝ ᱨᱮ ᱜᱩᱨᱩ ᱜᱚᱢᱠᱮ ᱫᱚ ᱯᱩᱪᱷᱤᱢ ᱵᱟᱝᱞᱟ ᱥᱚᱨᱠᱟᱨ ᱥᱤᱨᱟᱹ ᱢᱚᱱᱛᱨᱤ ᱢᱟᱹᱱ ᱡᱭᱚᱛᱤ ᱵᱚᱥᱩ ᱚᱞ ᱪᱤᱠᱤ ᱡᱟᱱᱟᱢ ᱫᱟᱛᱟ ᱞᱮᱠᱟᱛᱮ ᱵᱷᱟᱹᱜᱤ ᱥᱟᱺᱦᱤᱡ ᱢᱟᱱᱟᱣ ᱵᱟᱛᱟᱣ ᱠᱟᱛᱮ ᱢᱤᱫ ᱛᱟᱸᱵᱟ ᱯᱟᱴᱟ ᱢᱟᱹᱱ ᱥᱟᱛᱞᱟᱜ ᱮ ᱪᱟᱞ ᱟᱫᱮᱭᱟ ᱾
ᱚᱞ ᱜᱩᱨᱩ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱡᱟᱹᱥᱛᱤ ᱚᱠᱛᱚ ᱫᱚ ᱫᱤᱱᱟᱹᱢ ᱦᱤᱞᱚᱜ ᱜᱮ ᱵᱟᱹᱲᱛᱤ ᱫᱚ ᱡᱟᱹᱛᱤ ᱥᱟᱶᱛᱟ ᱟᱨ ᱫᱷᱚᱨᱚᱢ ᱨᱮᱱᱟᱜ ᱜᱮᱭ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱾ ᱜᱩᱨᱩ ᱜᱚᱢᱠᱮ ᱫᱚ ᱡᱟᱹᱛᱤ ᱥᱟᱶᱛᱟ ᱟᱨ ᱫᱷᱚᱨᱚᱢ ᱨᱮᱱᱟᱜ ᱠᱟᱹᱢᱤ ᱠᱟᱹᱢᱤ ᱛᱮᱜᱮ ᱚᱞ ᱜᱩᱨᱩ ᱫᱚ ᱟᱡᱟᱜ ᱚᱲᱟᱜ ᱨᱮᱜᱮ ᱱᱟᱯᱟᱭ ᱛᱮᱜᱮ ᱒.᱒.᱑᱙᱘᱒ ᱦᱤᱞᱤᱜ ᱟᱵᱚ ᱥᱟᱱᱟᱢ ᱦᱚᱲ ᱠᱚ ᱥᱟᱢᱟᱝ ᱠᱷᱚᱱ ᱡᱟᱭᱡᱩᱜᱽ ᱞᱟᱹᱜᱤᱜ ᱮ ᱪᱷᱟᱱ ᱥᱟᱹᱨᱤ ᱮᱱᱟ ᱾
ᱡᱤᱭᱚᱱ
ᱥᱟᱱᱛᱟᱲᱤ ᱯᱟᱹᱨᱥᱤ ᱨᱮᱱᱟᱜ ᱪᱤᱠᱤ ᱵᱟᱝ ᱛᱟᱦᱮᱸ ᱠᱟᱱᱛᱮ ᱢᱤᱫ ᱡᱚᱠᱷᱮᱡ ᱫᱚ ᱵᱟᱝᱞᱟ, ᱫᱮᱵᱽᱱᱟᱜᱽᱨᱤ, ᱨᱳᱢᱟᱱ, ᱳᱰᱤᱭᱟᱹ ᱪᱤᱠᱤ ᱛᱮᱜᱮ ᱠᱚ ᱚᱞᱮᱫ ᱛᱟᱦᱮᱸᱫ ᱾ ᱚᱱᱟ ᱠᱷᱟᱹᱛᱤᱨ ᱛᱮ ᱥᱟᱱᱛᱟᱲᱤ ᱥᱟᱶᱦᱮᱫ ᱵᱟᱝ ᱞᱟᱦᱟᱜ ᱠᱟᱱ ᱛᱟᱦᱮᱸ ᱠᱟᱱᱟ ᱟᱨ ᱟᱭᱢᱟ ᱪᱤᱠᱤᱛᱮ ᱚᱞᱚᱜ ᱠᱷᱟᱹᱛᱤᱨ ᱪᱷᱟᱢ ᱪᱷᱟᱹᱛᱩᱨ ᱚᱵᱚᱥᱛᱷᱟ ᱨᱮ ᱛᱟᱸᱦᱮ ᱠᱟᱱᱟ ᱾ ᱮᱴᱟᱜ ᱪᱤᱠᱤ ᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱚᱞᱚᱜ ᱠᱷᱟᱹᱛᱤᱨ ᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱟᱲᱟᱝ ᱫᱚ ᱯᱩᱥᱴᱟᱹᱣ ᱥᱟᱺᱦᱤᱡ ᱦᱚᱸ ᱵᱟᱝ ᱚᱞ ᱜᱟᱱᱚᱜ ᱠᱟᱱ ᱛᱟᱦᱮᱸᱫ ᱾ ᱚᱱᱟ ᱠᱚ ᱫᱤᱥᱟᱹ ᱠᱟᱛᱮ ᱜᱮ ᱱᱚᱶᱟ ᱫᱷᱟᱹᱨᱛᱤ ᱠᱷᱚᱱ ᱜᱮ ᱩᱱᱤ ᱫᱚ ᱤᱝᱨᱮᱡᱤ ᱑᱙᱒᱕ ᱥᱮᱨᱢᱟ ᱨᱮ ᱚᱞ ᱪᱤᱠᱤ ᱵᱮᱱᱟᱣ ᱥᱟᱹᱛ ᱠᱟᱛᱮ ᱫᱤᱥᱚᱢ ᱦᱚᱲ ᱥᱟᱢᱟᱝ ᱨᱮᱭ ᱩᱫᱩᱜ ᱥᱚᱫᱚᱨ ᱠᱮᱫᱼᱟ ᱾[᱔][᱕] ᱚᱞᱚᱜ ᱵᱚᱸᱜᱟ ᱵᱤᱫᱩ ᱪᱟᱸᱫᱟᱱ ᱩᱭᱦᱟᱹᱨ ᱛᱮ ᱚᱞ ᱪᱤᱠᱤ ᱫᱚᱭ ᱥᱤᱨᱡᱟ.ᱣ ᱟᱠᱟᱫᱼᱟ ᱢᱮᱱᱛᱮ ᱞᱟᱹᱭ ᱥᱚᱫᱚᱨ ᱟᱠᱟᱫ ᱟᱭ ᱯᱚᱸᱰᱮᱛ ᱨᱟᱹᱜᱷᱩᱱᱟᱛ ᱢᱩᱨᱢᱩ ᱫᱚ ᱾ ᱢᱤᱫ ᱥᱟᱭ ᱜᱮᱞ ᱢᱚᱬᱮ ᱜᱚᱴᱟᱝ ᱯᱚᱛᱚᱵ ᱯᱩᱛᱷᱤ ᱠᱷᱚᱱ ᱦᱚᱢ ᱪᱮᱛᱟᱱ ᱯᱚᱛᱚᱵ ᱠᱚᱭ ᱚᱞ ᱟᱠᱟᱫᱼᱟ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱜᱚᱢᱠᱚ ᱫᱚ ᱾ ᱢᱚᱭᱩᱨᱵᱷᱚᱸᱡᱽ ᱢᱚᱦᱟᱥᱚᱵᱷᱟᱨᱮ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱜᱩᱨᱩ ᱜᱚᱢᱠᱮ ᱩᱯᱟᱹᱫᱷᱤ ᱦᱚᱸᱭ ᱧᱟᱢ ᱞᱮᱫᱼᱟ ᱾ ᱡᱷᱟᱨᱠᱷᱚᱸᱰ ᱨᱮᱭᱟᱜ ᱨᱟᱺᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱰᱚᱠᱴᱚᱨ ᱚᱯᱷ ᱞᱤᱴᱟᱨᱮᱪᱟᱨ ᱩᱯᱟᱹᱫᱷᱤ ᱦᱚᱸ ᱠᱚ ᱮᱢ ᱟᱠᱟᱣᱟᱫᱮᱭᱟ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱱ ᱡᱚᱛᱚ ᱠᱷᱚᱱ ᱢᱟᱨᱟᱝ ᱜᱩᱨᱩ ᱢᱮᱱᱛᱮ ᱩᱱᱤ ᱫᱚᱠᱚ ᱢᱟᱱᱟᱣ ᱮᱭᱟ ᱾ ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱤᱝᱨᱮᱡᱤ ᱑᱙᱘᱒ ᱥᱮᱨᱢᱟ ᱨᱮᱱᱟᱜ ᱒ ᱯᱷᱮᱵᱽᱨᱩᱣᱟᱨᱤ ᱨᱮᱭ ᱵᱚᱸᱜᱟ ᱛᱟᱞᱟ ᱮᱱᱟ ᱾
ᱯᱚᱛᱚᱵ
ᱟᱡ ᱫᱚ ᱟᱡᱟᱜ ᱚᱞ ᱪᱤᱠᱤ ᱵᱮᱱᱟᱣ ᱥᱟᱶ ᱥᱟᱶᱛᱮ ᱟᱹᱰᱤ ᱜᱟᱱ ᱯᱚᱛᱚᱵ ᱯᱩᱛᱷᱤ, ᱥᱮᱨᱮᱧ ᱟᱨ ᱜᱟᱭᱟᱱ ᱯᱩᱛᱷᱤ ᱮᱢᱟᱱ ᱠᱚ ᱚᱞ ᱠᱷᱟᱹᱛᱤᱨ ᱦᱚᱸ ᱟᱹᱰᱤ ᱜᱟᱺᱦᱤᱨ ᱩᱯᱨᱩᱢ ᱡᱮᱜᱮᱛ ᱡᱟᱠᱟᱛ ᱨᱮ ᱢᱮᱱᱟᱜ ᱛᱟᱭᱟ ᱾ ᱩᱱᱤ ᱫᱚ ᱑᱕ ᱜᱚᱴᱟᱝ ᱜᱟᱱ ᱯᱚᱛᱚᱵ ᱮ ᱥᱳᱸᱯᱟᱫᱚᱠ ᱞᱮᱫᱼᱟ ᱾ ᱚᱱᱟ ᱠᱷᱚᱱ ᱫᱚ ᱦᱤᱛᱟᱹᱞ ᱵᱟᱹᱲᱛᱤ ᱦᱚᱲ ᱠᱚ ᱠᱩᱥᱤᱭᱟᱜᱼᱟ, ᱡᱟᱦᱟᱸ ᱥᱟᱱᱛᱟᱲ ᱥᱟᱶᱛᱟ ᱨᱮ ᱥᱟᱱᱛᱟᱲ "ᱫᱷᱚᱨᱚᱢ ᱯᱩᱛᱷᱤ" ᱢᱮᱱᱛᱮ ᱢᱟᱱᱟᱣ ᱵᱟᱛᱟᱣ ᱢᱮᱱᱟᱜᱼᱟ ᱾
| ᱮᱞᱮᱞ | ᱯᱚᱛᱚᱵ ᱠᱚ |
|---|---|
| ᱑ | ᱦᱚᱲ ᱥᱮᱨᱮᱧ |
| ᱒ | ᱧᱮᱞ ᱡᱚᱝ ᱞᱟᱹᱜᱤᱫ ᱚᱞ |
| ᱓ | ᱠᱷᱮᱨᱣᱟᱲ ᱵᱤᱨ |
| ᱔ | ᱵᱤᱫᱩ ᱪᱟᱸᱫᱟᱱ |
| ᱕ | ᱫᱟᱲᱮ ᱜᱮ ᱫᱷᱚᱱ |
| ᱖ | ᱚᱞ ᱪᱮᱢᱮᱫ |
| ᱗ | ᱮᱞᱠᱷᱟ |
| ᱘ | ᱵᱟᱠᱷᱮᱬ |
| ᱙ | ᱯᱟᱹᱨᱥᱤ ᱯᱚᱦᱟ |
| ᱑᱐ | ᱨᱚᱱᱚᱲ |
| ᱑᱑ | ᱦᱤᱛᱟᱹᱞ |
| ᱑᱒ | ᱚᱞ ᱩᱨᱩᱢ |
| ᱑᱓ | ᱯᱟᱹᱨᱥᱤ ᱤᱛᱩᱱ |
| ᱑᱔ | ᱞᱟᱠᱪᱮᱨ ᱥᱮᱨᱮᱧ |
| ᱑᱕ | ᱯᱟᱹᱨᱥᱤ ᱟᱯᱟᱫ |
ᱢᱟᱹᱱ
- ᱵᱤᱦᱟᱨ ᱨᱮᱱᱟᱜ ᱨᱟᱡᱽᱜᱟᱲ ᱯᱟᱴᱱᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱯᱟᱦᱴᱟ ᱠᱷᱚᱱ ᱰᱚᱠᱴᱚᱨᱮᱴ ᱤᱱ ᱞᱤᱴᱮᱨᱮᱪᱚᱨ ᱟᱨ ᱥᱟᱱᱛᱟᱲᱤ ᱞᱤᱴᱮᱨᱮᱪᱚᱨ ᱩᱯᱟᱫᱷᱤᱭ ᱪᱟᱞ ᱟᱫᱮ ᱛᱟᱦᱮᱸᱫ ᱾
- ᱢᱟᱱᱚᱛᱟᱱ ᱡᱚᱭᱯᱟᱞ ᱥᱤᱝ, ᱨᱚᱧᱡᱤᱛ ᱥᱤᱝ ᱵᱟᱨᱦᱟ ᱟᱨ ᱢᱟᱨᱴᱤᱱ ᱩᱨᱟᱹᱝ ᱱᱩᱠᱩ ᱡᱚᱛᱚ ᱢᱮᱥᱟ ᱠᱟᱛᱮ "ᱚᱞ ᱜᱩᱨᱩ" ᱢᱮᱱᱛᱮ ᱢᱟᱹᱱ ᱠᱚ ᱮᱢᱟᱫᱮ ᱛᱟᱦᱮᱸᱫ ᱾
- ᱑᱙᱗᱘ ᱥᱟᱞᱮ ᱨᱮ ᱳᱰᱤᱥᱟ ᱥᱚᱨᱠᱟᱨ ᱫᱚ ᱚᱞ ᱪᱤᱠᱤ ᱡᱟᱱᱟᱢ ᱫᱟᱛᱟ ᱢᱮᱱᱛᱮ ᱢᱟᱹᱱ ᱥᱟᱠᱟᱢ ᱪᱟᱞ ᱠᱟᱛᱮᱭ ᱥᱟᱨᱦᱟᱣ ᱞᱮᱫᱮᱭᱟ ᱾
- ᱑᱗.᱑᱑.᱑᱙᱗᱙ ᱨᱮ ᱵᱮᱝᱜᱚᱞ ᱥᱚᱨᱠᱟᱨ ᱢᱟᱹᱱ ᱡᱭᱚᱛᱤ ᱵᱚᱥᱩ ᱣᱟᱜ ᱛᱤᱛᱮ ᱚᱞ ᱪᱤᱠᱤ ᱡᱟᱱᱟᱢ ᱫᱟᱛᱟ ᱞᱮᱠᱟᱛᱮ ᱢᱟᱱᱟᱣ ᱠᱟᱛᱮ ᱢᱤᱫ ᱛᱟᱸᱵᱟ ᱯᱟᱴᱟ ᱪᱟᱞ ᱠᱟᱛᱮᱭ ᱢᱟᱹᱱ ᱥᱟᱨᱦᱟᱣ ᱞᱮᱫᱮᱭᱟ ᱾
- ᱳᱰᱤᱥᱟ ᱥᱚᱨᱠᱟᱨ ᱫᱚ ᱵᱟᱹᱭᱥᱟᱹᱠ ᱵᱚᱸᱜᱟ ᱠᱩᱱᱟᱹᱢᱤ ᱨᱮ ᱯᱩᱨᱟᱹ ᱯᱚᱱᱚᱛ ᱨᱮ ᱳᱯᱥᱚᱱᱟᱞ ᱪᱷᱩᱴᱤ ᱞᱮᱠᱟᱛᱮᱭ ᱜᱷᱚᱥᱱᱟ ᱟᱠᱟᱫᱼᱟ ᱾ ᱥᱮᱨᱢᱟ ᱯᱤᱪᱷᱤ ᱵᱟᱹᱭᱥᱟᱹᱠ ᱠᱩᱱᱟᱹᱢᱤ ᱨᱮ ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛ ᱢᱩᱨᱢᱩ ᱫᱚ ᱟᱡᱟᱜ ᱚᱞ ᱪᱤᱠᱤ ᱥᱤᱨᱡᱚᱱ ᱠᱷᱟᱹᱛᱤᱨ ᱡᱮᱜᱮᱛ ᱡᱟᱠᱟᱛ ᱦᱚᱲ ᱠᱚ ᱩᱭᱦᱟᱹᱨ ᱨᱩᱣᱟᱹᱲ ᱮ ᱞᱟᱹᱜᱤᱫ ᱡᱮᱜᱮᱛ ᱡᱟᱠᱟᱛ ᱥᱟᱱᱛᱟᱲ ᱦᱚᱯᱚᱱ ᱠᱚ ᱟᱡᱟᱜ ᱡᱟᱱᱟᱢ ᱢᱟᱦᱟᱸ ᱫᱚ ᱵᱟᱹᱭᱥᱟᱹᱠ ᱵᱚᱸᱜᱟ ᱠᱩᱱᱟᱹᱢᱤ ᱨᱮ ᱟᱹᱰᱤ ᱨᱚᱢᱡᱷᱚᱢ ᱛᱮᱠᱚ ᱢᱟᱱᱟᱣ ᱵᱟᱛᱟᱣ ᱮᱫᱼᱟ ᱾[᱘]
ᱥᱟᱹᱠᱷᱭᱟᱹᱛ
- ↑ "History". Pandit Raghunath Murmu Medical College & Hospital. 2017-04-07. Retrieved 2020-04-01.
- ↑ PeoplePill (1905-05-05). "Raghunath Murmu: Indian writer and linguist (1905-1982) - Biography and Life". PeoplePill. Retrieved 2020-04-01.
- ↑ "SANTALI WRITERS". All India ASECA. Retrieved 2019-03-27.
- ↑ "Naveen declares birthday of Raghunath Murmu a holiday". Times of India. May 18, 2016. Archived from the original on 2016-05-22. Retrieved 2017-12-04.
- ↑ "Odisha Government Portal" (PDF). Orissa.gov.in. Retrieved 3 December 2017.
- ↑ Pathy, J (1988). Ethnic Minorities in the Process of Development (in ᱟᱝᱜᱽᱨᱮᱡᱤ). Rawat Book Sellers. p. 174. ISBN 9788170330554.
- ↑ "Indian Linguistics" (in ᱟᱝᱜᱽᱨᱮᱡᱤ). 47–50. 1987: 18.
{{cite journal}}: Cite journal requires|journal=(help) - ↑ "Naveen declares birthday of Raghunath Murmu a holiday - Times of India". The Times of India. 2016-05-18. Archived from the original on 2016-05-22. Retrieved 2019-03-27.
{{cite web}}: Unknown parameter|dead-url=ignored (help)
ᱵᱟᱦᱨᱮ ᱡᱚᱱᱚᱲ
ᱟᱡᱟᱜ ᱡᱤᱭᱚᱱ ᱪᱮᱛᱟᱱ ᱨᱮ ᱚᱞ ᱟᱠᱟᱱ ᱯᱚᱛᱚᱵ ᱨᱮᱱᱟᱜ ᱥᱟᱹᱠᱷᱭᱟᱹᱛ ᱯᱟᱲᱦᱚᱣ ᱯᱮ
- Hembram, P.C. (2002). Santhali, a Natural Language. U. Hembram. Retrieved 2019-03-27.
{{cite book}}: Invalid|ref=harv(help)
ᱟᱡᱟᱜ ᱥᱟᱛᱟᱢ ᱪᱮᱛᱟᱱ ᱨᱮ ᱚᱞ ᱟᱠᱟᱱ ᱯᱚᱛᱚᱵ ᱨᱮᱱᱟᱜ ᱥᱟᱹᱠᱷᱭᱟᱹᱛ ᱯᱟᱲᱦᱚᱣ ᱯᱮ
- J, P. (1988). Ethnic Minorities in the Process of Development. Rawat Book Sellers. ISBN 978-81-7033-055-4. Retrieved 2019-03-27.
{{cite book}}: Invalid|ref=harv(help) - ᱱᱚᱶᱟ ᱯᱚᱛᱚᱵ ᱨᱮᱱᱟᱜ ᱑᱖᱔, ᱑᱗᱔ ᱟᱨ ᱒᱐᱙ ᱥᱟᱦᱴᱟ ᱧᱮᱞ ᱯᱮ ᱾
ᱵᱟᱹᱠᱤ ᱥᱟᱹᱠᱷᱭᱟᱹᱛ ᱯᱟᱲᱦᱚᱣ ᱯᱮ
- "YouTube". YouTube ᱼ Pandit Raghunath Murmu & OlChiki Script. 2018-04-12. Retrieved 2019-03-27.
- "YouTube ᱼ Pandit Raghunath Murmu Documentary". YouTube. 2018-04-12. Retrieved 2019-03-27.
- "Ol Chiki Script ᱼ wesanthals". a portal for Santals. 1905-05-05. Retrieved 2019-03-27.